دباديب وورود ذابلة وصور لا تنسى..ماذا تحمل في درج الذكريات؟!

[yacho]

حاجه غريبه جدا لما جيت اشارك فالموضوع ده .. فوجئت انى مش باحتفظ بذكريات mfb:

مش بحبها خالص اى حاجه تخللينى افتكر ايام كانت حلوه وراحت خلاص ومفيش امل اعيشها تانى

قطع ارمى :P .. ليه الواحد يسبب لنفسه الالم اكتر ويقعد بقى يقارن بين ايام الحب الاول

والايام اللى بيعيشها بعد كده ف الجواز حتى لوسعيد بس برضه فيه شويه ملل :) ناقص شويه

فلفل شطه بتوع الحب الاولانى اللى كانوا بيخللوا لكل حاجه هبله طعم .

بس انا برضه شايله جوابات اد كده من كل قرايبى .. اوراق صغيره كنا بنكتب عليها لبعض عشان بابا

وماما مايسمعوناش .. فرشة شعر.. بابا الله يرحمه طوحنى بيها فوشى mfb: لما كنا بنتناقش مناقشه

ديمقراطيه واختلفت رؤيتنا الموضوعيه فى الموضوع لدرجه ان الرؤيه انعدمت عندى خالص بعدها .. :blink:

احتفظت بيها عشان انكش بابا لما كان عايش وافكره باللى عمله فيا .

بس خلاص

تم تعديل 17 يوليو 2006 بواسطة yacho

[nancy]

اده يا ياشو قطعتى قلبى

حابقى اديك شوية مجات وفخارات من بتاعة الوحات من الى عندى ولا تزعلى ياشيخة

محتفظة بفرشة شعر بتاعة انعدام الرؤيا :)

[هشام الجنيدى]

حاولت كذا مره الاحتفاظ بالاشياء الصغيره كذكريات بس معظم المحاولات فشلت .... اسمع واحد يقول ....... ليه فشلت ؟؟!!!

ده موضوع يطول شرحه .......

كنت مغرم قوى بموضوع الاثار اللى الناس بيلاقوها للفراعنه والحجات دى وورق البردى وما الى ذلك

فلما كنت فى تانيه اعدادى تقريبا كنت كتبت مجموعه اشعار طبعا كانت محاولات بسيطه جدا بس كانت بتعجب اللى حواليّه وسعات مكنتش بتكمل يعنى موضوعات وافكار مش كامله وكان عندى مجموعه اوراق كنت كاتب فيها رموز ومعانيها شبه الرموز الهيروغليفيه كده على اعتبار انها شفره كنت بالعب بيها مع اصدقائى فى المدرسه بنقعد نتفق على الرموز ومعانيها بحيث محدش يفهمها الا احنا وكل واحد معاه نسخه من فك الرموز دى

يسألنى واحد تانى .........ليه رموز وكلام من ده هو انتا مخابرات ؟؟؟!!!! :P

اقوله لا وقتها كنت مغرم جدا بمسلسلات رافت الهجان ودموع فى عيون وقحه واليله دى ......

المهم جمعت كل ده فى كيس بلاستيك ولفيتهم كويس قوى فى كذا كيس بلستيك وشيلتهم فى اغرب مكان ممكن يتوقعو بنى ادم .......

يجاوب واحد ويقوللى العجل فى بطن امه ؟؟؟!!!!

اقوله برضه لا انا خبيت الاشياء دى فى وسط فروع نخله كانت اطول منى شويه قدام البيت بتاعنا على اعتبار انها هتبقى فى يوم من الايام اثار ليّه للناس اللى هيجو بعدنا (كنت بعمل كده ليه ؟؟؟!!) :blink: mfb:

والنخله كبرت ومعنتش عارف اجيب الحاجات دى تانى mfb:

دى اول مره حاولت يكون ليّا ذكريات

المحاوله التانيه كانت بعد كده ايام ثانوى ......

كان عندى درج فى الكتب محتفظ فيه بحاجات غريبه .......!!!!

زى ايه ؟؟؟؟؟ يسالنى واحد تالت ؟؟!!

زى مواتير اللعب اللى كنت بستولى عليها لما حد من اخواتى الصغيرين يكسر لعبته بعد ماتبوظ ومجموعه اسلاك كهربائيه وبطاريات فاضيه وقطع فلين وخليه تحليل كهربى بسيطه كنت عملتها بعد دراستى للتحلل الكهربى ودى بقى كانت لعبتى ايام ثانوى عشان ابعد عن المذاكره وكده يعنى

وقصائد فى الهجو ليّه ولواحد صديق كانت بدايه معرفتى بيه انه كان قاعد جنبى فى الفصل وكنت انا بحب شعلر الفصحى قوى ومش بعتبر الشعر العامى ده شعر من اساسه فكنت اهجوه بالفصحى ويهجونى بالعاميه واللى حوالينا فى الفصل يحكمو مين الاحسن فكنت باحتفظ بالورق اللى انكتب عليه المبارزات دى ولسه عندى لحد دلوتى بقاياه فى اكلاسيه فيه مجموعة الشعر بتاعت ايام الهجاء دى وشهاده تقدير من المدرسه عن مسابقه فى الشعر بمناسبه حرب اكتوبر مكتوب فيها اسمى بالمقلوب وهما دول اللى نجو من حمله التطهير التى اجتاحت مكتبى فى غفله منّى من جانب الست الوالده اطال الله لى فى عمرها ومتعها بالصحه .........

دى المحاوله التانيه ....

التالته كانت ايام ............ ولا اقول لكم كفايه كده النهارده عشان متقلش عليكم ........... :)

وللحديث بقيه ان شاء الله ......... :)

تم تعديل 17 يوليو 2006 بواسطة هشام الجنيدى

[yacho]

اده يا ياشو قطعتى قلبى

حابقى اديك شوية مجات وفخارات من بتاعة الوحات من الى عندى ولا تزعلى ياشيخة

محتفظة بفرشة شعر بتاعة انعدام الرؤيا :wub:

لا متخافيش يا نانسى انا اللى باقطع وانا اللى بارمى بايدى .. يعنى انا اللى مش عايزه

يكون فى ذكريات من اصله .. انا احاول العمل بمبدأ " عش يومك لنومك " :P

وعموما مش حاقول لا .. هاتى مفيش مشاكل ( وش واحده بتموت ف الهدايا) :D