مواطنين ... وصنايعية !

[عصام]

حد ما اتعاملش قبل كدا مع أحد أصحاب الحرف؟ :blink:

صنايعية يعنى؟

ما افتكرش ..

وانا باتكلم هنا عن الصنايعية داخل حدود المحروسة ..

من كُتر ما شفت منهم قولت اعمل لهم موضوع .. نِفِش فيه غلنا .. ونعبر فيه عما يدور فى نفوسنا من محبة مكبوتة :angry2:

أحكى لكم آخر تجاربى ..

إمبارح روحت اشتريت تيل فرامل من شارع دمشق .. خلفى وأمامى

وانا عادة - وزى ما انتوا عارفين - باغير الحاجات دى بنفسى

بس ما تعرفوش إيه اللى هفنى فى نافوخى وسيبت ميكانيكى يركبهم !!

لما أخدت التيل من الراجل قولت له الخلفى مش هو نفس الموديل .. قالى لأ هو .. قولت لأ مش هو

قالى احسن حل أجيب لك ميكانيكى يركبهم لك هنا جنبى .. عشان لو طلع مش هو أشوف لك غيره .. :blink:

قولت ماشى

وجه الميكانيكى .. وإذا به واخد ناصية شارع .. وحاطط عدته جوا حوش بيت mfb:

المهم الراجل ركب التيل الأمامى ..

وجه على الخلفى وراسه وألف صرمة ما يغيره .. ليه يا عم؟

قالك كويس وحرام عليا لو غيرته ..

ما علينا .. خلاص يا عم اعمل اللى تشوفه <_<

صنفره .. ولعب فيه شوية قال يعنى بيظبطه ..

وبعدين خدت العربية ومشيت .. ولحد هنا عادى -_-

لما مشيت بدأ صوت يطلع من العجلات الخلفية .. تزييء منتظم

قولت ف عقل بالى يا واد مش مهم لما أروح ابقى افكه واعمله انا ..

وإذا بيا يا ولاد وانا فى شارع فيصل وما أدراك ما هو ..

آن آن آآآآآن تششششششششش

ماشى على 60-70 وهووووب فرامل ورا مسكت لوحدها :angry2:

كأنى شديت فرامل اليد

واسمع بقى أحلى فرملات تعقبها كل أنواع الشتايم وراك .. :D

والعربية راسها والف سيف ما تمشى ..

منه لله .. خلانى نزلت ورفعت بالكوريك وفكيت عَجَل ورا فى وسط الشارع وقعدت اصلح فيه

وكانت ليلة ما يعلم بيها إلا ربنا

وقال إيه يقولى : دا انت هاتقول الله يبارك لك :angry2:

روح يا شيخ ...

وتعالى بسرعة :D