ايه النحس ده ............؟؟

[عليـ***ـاء]

في مثل بيقول المنحوس منحوس لو علقو في ديله فنوس وامثال تانية كتير اكيد انتو عارفينها

انا كنت الاول مبصدقش حكاية النحس دي لانها كلها اقدار وهتفضل كده بس في مواقف غريبة شوية تخليك تؤمن بالنحس

مثلا .......

ليا واحدة صاحبتي والدتي هي اللي عرفتني عليها هي بنت زميلتها , هي البنت كويسه صحيح فضولية شوية بس اهو ... طيبة

قبل ما تيجي كنت بكنس بالمكنسه وبعدين امي قالتلي فلانه جت رحت قلت لختي خدي كملي انتي .... المكنسه كانت زي الفل اختي مسكتها لاقتها سكتت مرة واحدة انا طبعا قلت عادي ملاحظتش حاجة ...

مرة تانية شافت الكمبيوتر قالتلي انا عايزة اشوف منزله عليه ايه وكده قلتلها من عنيا .... قبل ماتيجي والله الكمبيوتر كان زي الفل وكنت شغاله عليه عادي يدوب قفلته قبل ماتيجي بنص ساعه جت من هنا وبشغل الكمبيوتر .... مش عارفة ايه اللي حصل اتجنن..!!! بيجيب برامج بمزاجه ويقفل لوحده وميرضاش يفتح بمزاجه وحاجات غريبه عجيبة مريبة ...مرة تالته ... شافت الموبايل قالتلي صوريني قلتلها ...حاضر .. صورتها وجاية بسمعها الاغاني اللي منزلاها .. لاقيت اغاني ممسوحه ...والاغاني اللي موجودة مش راضية تشتغل ...

قلت ...لااااااا دي حاجة مش طبيعيه ... رحت لماما قلتلها بقولك ايه ؟ البت دي مش عايزة اعرفها وصاحبتك هي كمان ياريت انتي كمان متعرفيهاش .... وياريت اصحابي انا اللي اختارهم بمزاجي ....

الحكاية دي بقي مع اختي ...

هي بتمتحن عملي وشفوي وكل امتحان شفوي من المفروض الدكاترة من جوة الكلية ومن برة الكلية الدكاترة اللي من جوه الكلية من المعروف انهم كويسين وبيدو درجات عالية كان عندها 4 مواد كل ال4 مواد دكاترتهم جم من بره ورؤساء اقسام كمان وواحد منهم كان عميد كلية

كانت بتمتحن مادة منهم صعبه اوي شفوي برده 330 طالب 5 منهم المفروض يمتحنوا قدام عميد الكلية هي كانت اولهم

كانت بتمتحن مادة نظري الكتاب 300 صفحة هي ذاكرته كله ما عدا 13 ورقة ال13 دول جم منهم 3 اسئلة في الامتحان ...........

اخر موقف متعلق بعيد ميلادي اليوم ده غريب كل ما اعمله لازم تحصل فيه حاجة تعكنن عليا السنه اللي فاتت بابا اتخانق معايا انا واخواتي يعني لازم تعلمنا اصول التربيه النهاردة !! والسنه اللي قبلها كانت الخناقة بيني وبين اخواتي واتفشكل العيد ميلاد ...... المرة دي جيت اعمل العيد ميلاد لاقيت اختي جتلها سخونية وهتعمل عملية اللوز وجوز خالتي راح الانعاش وجوز خالتي التاني تعب واعتذر هو وخالتي ..!!! ياتري ده ليه علاقة بعيد ميلادي او هو يوم منحوس ولا حاجة ............؟؟

تم تعديل 10 يوليو 2006 بواسطة عليـ***ـاء

[واحد تاني]

في مثل بيقول المنحوس منحوس لو علقو في (ديله) فنوس...

ربما عشان الفانوس مش في رقبته !!! :P

[عليـ***ـاء]

ربما عشان الفانوس مش في رقبته !!!

ايه ده هو انا قلت المثل غلط ولا ايه ......؟؟؟

[واحد تاني]

لأ ... اكيد انا اللى سمعتك غلط ... :blush:

المهم ...

[لخبطه]

فكرتيني ياعلياء بنكتة القرد دي نكته شهيره عن النحس

بيقولك قردين واحد حظه زفت و التاني محظوظ المحظوظ قال لللى حظه زفت انا عارف شجرة موز وهم تعالى نضرب منها النهارده المنحوس قاله ياعم بدل ما الراجل يمسكنها قاله ياعم ما تخفش انا مضبط المهم راحوا عند الشجره طلع المحظوظ فوق وقعد المنحوس تحت على اساس التاني يهز الشجره ينزل الموز لسه المنحوس بيضرب أوي صوباع جه صاحب الشجر اللى فوق هرب وصاحب الشجره مسكت اللى تحت طحنه

تاني يوم المحظوظ بيقوله يالله على الشجره قاله ياعم لا الراجل هناك قاله ما تخافش انا هراقب لك الطريق من فوق راحوا وشويه والمحظوظ إنشغل ف الاكل فوق وجه صاحب الشجره مسك المنحوس اللى تحت وفين يوجعك

تالت يوم المحظوظ بيقول للمنحوس يالله قال لا ابدا قاله ياعم تعالى و المره دي اطلع انته فوق

المهم راحو بردو وطلع المنحوس فوق وفضل المحظوظ تحت وشويه وصاحب الشجره جاي هو وابنه رايح ابنه يمسك المحظوظ اللى تحته راح الراجل قاله لا سيب دا انا بقالى يومين بضرب فيه هات لى ابن الجزمه اللى فوق دا :D :D :P :P :P :P :P

انتوا الاتنين قولتوا المثل غلط المثل

بيقول المنحوس منحوس ولا حطوا على رأسه فانوس

[واحد تاني]

انتوا الاتنين قولتوا المثل غلط المثل

بيقول المنحوس منحوس ولا حطوا على رأسه فانوس

دا كان الاول يا استاذ لخبطة ...

بعدين اكتشفوا ان الطريقة دي مش ناجحة لأن الفانوس كان بيقع من على راس المنحوس ...

قاموا بدأوا يتبعوا سياسة جديدة وهي انهم يعلقوا الفانوس في رقبتة ...

والحمد لله جابت نتيجة ...ومازال منحوس كما هو ...

حضرتك بس اللى مش متابع اخر الابحاث ... :D

تحياتي :D

[pharaoh]

يا أخوانا

انتم سبتم القرد ومسكتم في الموزة

احنا في الحالة اللي اتذكرت دي

مش في المثل

انا اعرف ان الفانوس فوق الراس

القالب في الديل

الخيارة في السلطة

[المدهش]

علياء..

أفكارك جديدة ولذيذة..وبالمناسبة لنا زميل في العمل نحس فعلاً ..بصراحة همه اتنين..الأول كان كل يوم قبل اجازتي يقول لي ايوه يا عم انت بكره اجازة وكأن الكعكة في ايد اليتيم عجبة ..وكان دايما يحصل فيه مصيبة يعني..حادثة..خناقة..مشكلة لدرجة اني كرهت يوم الاجازة..والثاني زي صاحبتك منحوس لكن نحسه يصيبه هو شخصيا في الاساس وان كان طبعا لا يحرم الآخرين منه..يعني لو ركب معاكي السيارة تعطل..ولو جالك البيت النور يقطع..ولو اشاد بحاجة عندك تكسر..وبصراحة الولد طيب وخدوم ولا ذنب له فيما يحدث لكنه بالفعل منحوس جداااااااا..سبحان الله..

لكن قراءة المعوذتين وآية الكرسي تنجينا من كثير من هذه المواقف وهؤلاء الأشخاص وربنا يستر.

[MZohairy]

يا عيني يا علياء يا بنتي :D

بيقولك قليل البخت يعضه الكلب في المولد! :D

[مصرية يعني مصرية]

احم..احم..

بارك الله فيكم أختي ولمزيد من الفائدة حول هذا السؤال فقد نتطرق لموضوع التشاؤم والاعتقادات الفاسدة :

إن بعض الناس يربط حياته ومستقبله باعتقادات وتصورات بعيدة كل البعد عن تعاليم ديننا الإسلامي ومن أبرز السمات التي تختص بها الشريعة الإسلامية لأنها عقيدة ربانية أودعها الله تعالى في أرضه لتستنير البشرية بنورها وتحتمي بعدلها تلبي رغبات وحاجات وطبائع البشر وتعطي الفكرة الكاملة عن الكون وحقيقته وتوضح أي تساؤل قد يتبادر إلى الذهن بخصوص ذلك

أما ما ذكرته أنت فهو يدخل في باب :( الطيرة [ التشاؤم ] )

قال رسول الله صلى الله عليه وسلم : ( الطيرة شرك ) ( صحيح الجامع 3960 )

وقال صلى الله عليه وسلم : ( من ردته الطيرة عن حاجته ، فقد أشرك ) ( السلسلة الصحيحة 1065 )

أقوال أهل العلم في الطيرة :

* قال الحافظ بن حجر في الفتح : ( هي التشاؤم وأصل التطير أنهم كانوا في الجاهلية يعتمدون على الطير فإذا خرج أحدهم لأمر فإن رأى الطير طار يمنة تيمن به واستمر ، وإن رآه طار يسرة تشاءم به ورجع ، وربما كان أحدهم يهيـج الطائـر ليطير فيعتمدها ، فجاء الشرع بالنهي عن ذلك

سئل الشيخ محمد بن إبراهيم آل الشيخ عن التصديق والتشاؤم في عدد أو يوم أو شهر أو نحو ذلك ، فأجاب - رحمه الله - :

( هذا لا يجوز ، بل هو من عادات أهل الجاهلية الشركية التي جاء الإسلام بنفيها وإبطالها ، وقد صرحت الأدلة بتحريم ذلك ، وأنه من الشرك ، وأنه لا تأثير له في جلب نفع أو دفع ضرر ، إذ لا معطي ولا مانع ولا نافع ولا ضار إلا الله سبحانه وتعالى ، قـال الله تعالى : ( وَإِنْ يَمْسَسْكَ اللَّهُ بِضُرٍّ فَلا كَاشِفَ لَهُ إِلا هُوَ وَإِنْ يُرِدْكَ بِخَيْرٍ فَلا رَادَّ لِفَضْلِهِ " سورة يونس - الآية 107 " ) ( فتاوى ورسائل سماحة الشيخ محمد بن إبراهيم آل الشيخ - 1 / 1166

* الحكمة من تحريم الطيرة :

وإنما حرمت الطيرة لعدة أمور أهمها :

أولا : لما في الطيرة من نسبة المنافع والمضار والقدرة عليها لغير الله

ثانيا : لما فيها من الاعتماد والتوكل على غير الله

ثالثا : لما فيها من تعلق القلب على غير الله

رابعا : لما تولده في نفس العبد من الخوف

وعدم الأمن من المكروه الأمر الذي يصيب كيانه بالاضطراب وعدم الاستقرار النفسي والذي هو بالتالي مؤثر على خلافته في الأرض

خامسا : إن الطيرة طريق لنشر الخرافة

يقول الأستاذ علي الطهطاوي : ( إن المسلم في كل شأن من شؤونه يستمد من ربه – عز وجل – العون والقوة فإذا أصابه أمر من الأمور فزع إلى الصلاة يروح فيها عن نفسه ويزيل بها همومه ويلتجئ إلى الله ويهرع إليه إذا عزم على أمر فيستخيره في هذا الأمر اتباعاً لسنة رسوله صلى الله عليه وسلم فإن هداه الله إلى العمل أقدم عليه وسار إلى الأمام ولم يلتفت إلى العواقب ما دام الله معه – وإن هداه ربه إلى ترك ما هم بفعله تركه إلى غيره ولم يلتفت إليه

وصلاة الاستخارة – إنما هي نعمة من الله يتوجه بها العبد إلى ربه ويستخيره ويطلب منه أن يهديه إلى ما فيه نفعه وأن يختار الله له ما فيه صلاحه في الدنيا والآخرة وهي من سنن النبي صلى الله عليه وسلم فقد كان صلى الله عليه وسلم يعلم أصحابه دعاء الاستخارة كما يعلمهم السورة من القرآن )

أعتذر على الإطالة و لكني أحببت نصحك أختي :)

[واحد تاني]

(مصرية يعني مصرية) هانم جابت المفيد

وهذا هو ما دعاني من البداية لتوجيه دفة الحوار فى اتجاه الفانوس السحري

واكون شاكرا لاحد الاعضاء ان قام بسرد بعض الآيات التي تكلمت عن الطيرة وذكر تفسيرها وحكمها فى موضوع جديد في باب هدى الاسلام

مع كامل الاحترام والتقدير لكاتبة هذا الموضوع الاستاذة عليـ***ـاء

انما ممكن نكملها حواديت زي قرود الاستاذ لخبطة لو تحبوا :)

[لخبطه]

والله يا أستاذ واحد كلامك محير

أولا علياء ماقالتش انها معلقة خرزة زرقاء ولا الموضوع مقصود منه التشاؤوم والتفائل داحاجه ظريفه منتشره في وسطنا انه فولان وشه فقر أو ما شابه وهيا تقصد حاجه ظريفه لذلك حتطها في باب موضوعات خفيفه وانا سرت على نفس النهج ورديت على انه موضوع ظريف مش على انه موضوع بنسال فيه هو حلال ولا حرام وقولت انا نكته بس انا اسف انى قرودي ما عجبتكش

ثانيا أنته بتتكلم ومعنى كلامك أنك بتاخدنا على قد عقلنا ودا طبعا غريب والسبب أن مافيش حد حجر ولا يقدر يحجرعلى حضرتك علشان تقول رأيك كان من الأول قولت يا جماعه الكلام دا فاضي والصح كدا مش تنتظر لما مصريه تقول مشاركتها وتقول انا كنت عايز اقول كدا

تقبل احترامي

[واحد تاني]

متقبل احترامك يا استاذي الفاضل :D

وجاي على ملا وشي عشان الحق واوضح كلامي المحير اللى حضرتك فهمته غلط و زعلك مني وانا برئ براءة الذئب من دم ابن يعقوب... :D

الجملة اللى قلتها وكان فيها اسم حضرتك دي كانت طلب مني لاستمرار الموضوع على هذا النهج اللطيف ...

نظرا لانه فى باب موضوعات خفيفة ... ونظرا كمان لان قصة القرود عجبتنى (والله وما لك علي يمين يا شيخ :D ) ...

يعني انا لا سمح الله لا قلت ان قرودك مش عاجباني ولا اخدت حد على قد عقله (لأن ده مش اسلوبي) ...

ومكنتش مستني تعليق حد عشان اقول رأيي (متزعلنيش منك :) )...

ومش ممكن اقول لحد كلامك فاضي ... رأيي بقوله بصراحة ووضوح وأدب...

ولو الموضوع مش عاجبني مش هعلق فيه اصلا ...

واكيد ده لا يمنع من التنويه عن خطأ ان وجد...

وكمان يا سيدي لا جبت سيرة الاستاذة علياء في خرزة زرقا ولا دياولو (ايه رأيك في دياولو دي - انت مابتضحكش ليه ؟)...

يا رب تكون فهمت كلامي صح دلوقتي ...

مع كامل احترامي لحضرتك...

وللجميع... B)

[لخبطه]

عمي واحد تاني ( دي فيها توريه ) :) :D :D :D

اسف حبيبي على حدتي معاك وأقدر لك سعة صدرك ودماثة خلقك الطيب وتفهمت كلامك أللى التبس على في الأول

لكن ثق تمام الثقه ان حرصك على الرد بسرعه وتوضيح الامور ليس لشىء سوى انك انسان خلوق

جزاك الله خير

[عليـ***ـاء]

دايما باجي متأخرة بعد ما الحدوته تخلص

اولا ........

بشكر كل اللي مرو وردو علي الموضوع

واحد تاني ....... انا رحت سألت بابا علي المثل وقالي المنحوس منحوس ولو علقو في راسه فانوس بس لخبطة جه وسبقني ده قبل مانعرف السياسة الجديدة اللي اتبعها المنحوس ويحط الفانوس علي رقبته

لخبطة ......... ههههههههههههههه حكاية القرود دي ضحكتني اوي رحت قلتها للي في البيت علي طول

pharaoh............. شكرا للمرور والرد وانا برده بقولهم الفانوس علي الراس والسلطة في الخيار مش مصدقني ..

المدهش ............ شكرا علي المرور والرد

mzohairy.......... شكرا علي المرور والرد

مصرية يعني مصرية .......شكرا علي المرور والرد والاضافة الجميلة اللي اضفتيها للموضوع

بالنسبة ليكي ول واحد تاني

انا عايزة اققول اني والله عارفة التطير واصل الكلمة ومعناها ولاحظي اني كتبت

"انا كنت الاول مبصدقش حكاية النحس دي لانها كلها اقدار وهتفضل كده بس في مواقف غريبة شوية تخليك تؤمن بالنحس"

يعني مؤمنه بقضاء الله وقدره وكنت هتكلم او الفت الانتباه للحكاية دي بس لاقيت ان الموضوع اصلا للضحك وموضوع خفيف وان الحديث عن التطير والتشاؤم مش من صلب الموضوع ومتوقعتش ان حد هيتكلم عن التطير في رده بل اتوقعت ان المشاركات كلها هتبقي كل واحد مثلا هيحكي موقف او حد يعرفه كده زي مشاركة المدهش ولخبطة

واظن ان لخبطة وضح قصدي كويس ..........اظن ان الرؤية اتضحت وشكرا مرة تانية للمرور

[واحد تاني]

قديما ... في الازمنة الغابرة ... وفي احدي القبائل ... كان هنالك احد الحكماء ... يسكن اعلى الجبل

لما اعتزل الناس ... كثرت عنه الاقاويل ... منها من قال انه ذو حظ عاثر ... ومنها من قال انه سيئ الطالع

قرر الحكيم الاختلاط بالناس ... وان ينزل لساحتهم ... ويحيا معهم ... وعند نزوله ... وجد حصان جامح ... اخذه ... ودربه

قال له الناس ... احذر ... هذا حصان شؤم ... لذلك لم يرضى به احد ... ولن يركبه احد ... فابتسم وركبه ... لم يحدث له ابدا شيئا

كثرت اقاويل الناس عنه ... كم محظوظ هذا الانسان ... فمنذ قديم الازمان ... لم يحظى احد منهم بحصان ... واصبح حصانه مثلا للفأل الحسن

وقع الحكيم في يوم ما من فوق حصانه ... كسرت ساقه ... ايقن الناس كم هو ذو حظ عاثر ... ايقنوا كم كان حصانه شؤم ... واصبح مضرب للامثال

وفجأة ... هجم على قبيلتهم المغيرون ... حارب كل فرسان القبيلة ومحاربيها ... لصد الهجمة ... قتل المغيرون محاربي القبيلة جميعهم ... عن بكرة ابيهم

ولم يبقى سوى هذا الحكيم ... الذي لم يشترك فى المعركه ... لأنه وقع من فوق حصانه ... فكسرت ساقه ... و أصبح هو وحصانه اسطورة

طيب ده كان فيلم مكسيكي ...

تعالوا بقى نحكي قصص واقعية ...

ايام دراستي في جامعة فاروق الأول ... مدرسة المهندسخانة ... كان معروف عن احد الزملاء مثل هذا الامر ... لم أكن اصدق في ذلك ... ولكن الكثير والكثير كانوا يتحاكون عن مواقفهم معه ... وما نتج عن كل موقف منها من مأساة اغريقية ... الى ان صادف يوما ... وحدث الموقف التالي معي أنا شخصيا ... كنا نقوم بتصميم المشروعات ورسمها على الواح من الورق المقوى ... اطلق عليها الفرنجة اسم الفوتوهول ... نرسم عليها بالحبر ... والالوان المختلفة ... نقضي ساعات طوال ... من الايام والليالي نعمل عليها ... الى ان جاء صديقنا هذا في يوم ما ... ليبدى اعجابه بما يراه من افكار والوان على لوحاتي ... وكنت اكثر من شرب القهوة اثناء عملي ... وما ان ابدى صديقنا هذا اطراءه ... الا ويسقط فنجان القهوة فوق اللوحة ... انزعج الجميع وانا معهم ... وكان في عينيهم نظرة ... هل صدقت الان كلامنا ... واحمر هو خجلا ... قلت له لا عليك يا صاح :blink: ... وقفزت في ذهني فكرة :excl: ... لماذا لا استخدم القهوة كوسيلة للاظهار ... وتجميل خلفيات اللوحة ... وبالفعل ... طلبت فناجينا اخرى من القهوة وبدأت اسكبها بنفسي ... وكانت فكرة ...

حظى المشروع باعجاب اللجنة ... واضافت القهوة للفكرة نكهة ... وكان من المشروعات التى كانت سببا في كوني الأول على الدفعة :)

تم تعديل 12 يوليو 2006 بواسطة واحد تاني

[the sad man]

ياه ليه تفكرونى بالنحس انا كنت نسيته لعدة ايام....

على العموم النحس دى رفيقى و حبيبى و لا اعرف ليه اصابنى النحس من بعد الزواج

قبل الزواج كان حظى ميه ميه و بعده الله يكفبكم الشر اه و الله شئ عجيب فعلا....

بس نحسى الحمد لله انه لى انا شخصيا و لا احد يصاب به الا العبد لله

مرة تانية اكون فاضى اكتب لكم بعض التفاصيل