شكر واجب لسى السيد

[إبن مصر]

اخوتى الاعزاء

كم هى سعادتى انى فى هذا المجتمع الجميل بكل الوانه واطيافه ...

كم هو احساسى بالافتخار والشرف بانتمائى لكم...

وكم هى سعادتى وفرحتى واعتزازى ان لى رجلا صديقا واخا مثل سى السيد.. هذا الرجل الذى التقيت به مرتان فقط فى عالم الواقع لم تزد عن سويعات قليله وثلاث سنوات من الالتقاء اليومى هنا فى بيتى الاول..

بالامس تعرضت لموقف عصيب اذ ان لى أخ فى الرياض سافر من شهر واحد وتعرض لوعكه صحيه فى الساعه ال 11 مساءا وتم حجزه فى المستشفى فاتصلت بسى السيد كعادتنا مع بعض أخبره بالامر وكان فى طريقه الى المنزل فاخبرنى انه سيقوم بالواجب وبعدها بعشر دقائق اتصلت باخى لاخبره بان هناك من سيحاول ان يساعده..... لاجد من يرد على من هاتف أخى... لاجد سى السيد يرد على من هاتفه .. ولم يتركه حتى ساعات الصباح الاولى بعد ان خرج من حجره العمليات......بل وقام بانهاء معاملات اداريه له.. ووفر له سكنا واتصل بعمله... بمعنى أصح قام بكل واكثر ما استطيع ان أفعله انا ان كنت هناك معه.

واحقاقا للحق فان هذه هى مواقف سى السيد دائما رجل فى كل المواقف من هذا المكان اشكرك عبر فضاء النت الواسع الرحب يا أحمد ليتك كنت هنا فى مصر ولكنها قريبا ان شاء الله.

رفعت رأسى وشددت من أزرى أحسست غريبا بالامان .

وليس ذلك فقط بل انى اتذكر ان دارون ايضا قد غضب منى لعدم اتصالى به بالامس عندما اخبرته...

يااااااااااااااااااااااااااااااه ياااااااااااااااااااااااااااه كم انتم رجال ايها الاخوه لكم فى عنقى جميلا لن يرد.. وهكذا الرجال وعد ودين.

شكرا لك يا سى السيد يا أرجل من رأيت عينى فى زمن عز به الرجال.

شكرا يا دارون يا أخ لم تنجبه أمى فى زمن يخون الاخ أخوه.

شكرا لكم يا أصدقائى هنا فى زمن أصبح الصديق هوالمستحيل .

أبن مصر

المتشرف بانتماءه هنا والفخور باخوته من هذا المكان.

اليك يا سى السيد...... واجبك محفوظ يا معلم لما تنزل مصر وكلها ايام وهاوريك من مصر الى عمرك ما شفته........يا معلم الرياض..

ومن هذا المكان سنشهد ميلاد عمده الرياض لمصرين.... سى السيد اسمح لى من الان اصبحت كنيتك عندى...........العمده

[واحد تاني]

الانسان ده فعلا انا بحبه فى الله

بحترمه و بقدره جدا

رغم ان معرفتي به لا تتعدى شهور قلائل منذ وجودي هنا في المحاورات...

ولكن مما قرات له من مداخلات وبعد تواصل شخصي معه من خلال الرسائل وملاحظة مواقفه مع الزملاء...

احسست كم هو انسان خلوق ... مثقف ... محترم ...و ابن بلد بجد ... وصفات اخرى كثيرة يستحقها

وددت ان اضم صوتى لصوت ابن مصر واحيي هذا الانسان الرائع ... سي السيد

تم تعديل 11 يوليو 2006 بواسطة واحد تاني

[صبح]

أضيف صوتي وان كان

أقل وأضعف مما قيل

فى هذا المكان

تحية عطرة لعمدة

كل مكان وزمان

تم تعديل 11 يوليو 2006 بواسطة صبح

[مصرية يعني مصرية]

فعلا

أنا كمان حاسة إن سي سيد

كده و أكتر :D

رغم إن تعاملنا مع بعض قليل جدا

بس أنا أتفق معاكم

سي السيد

إنسان محترم و مصري بجد

و بشكرك أنا كمان على إلي عملت مع أخوأحمد محمود

ربنا يخليك بواجبك

جزاك الله كل خير

[shahd]

اخونا الفاضل سي السيد يستحق كل تقدير واحترام فبارك الله فيك اخ كريما ذو خُلق رائع

استاذنا الفاضل احمد محمود حقيقة اسعدتني هذه الأخوة الرائعه والروح الطيبة فيما بينكم

بارك الله فيكم وادام الود والمحبة

تم تعديل 11 يوليو 2006 بواسطة شهد

[عصام]

مبروك العمودية يا كبير ... :D

[المدهش]

الشهامة والجدعنة ليست غريبة على شخص مهذب ومثقف مثل سي السيد"سين سين" ..وأعتقد أن الموقف الذي يحكيه الأخ أحمد هو خير رد على من يروجون لحكاية المصريين وحشين مع بعض في الغربة..وحاسب من المصريين والناس بيكرهونا وكل الكلام العبيط المنافي للعقل والواقع والمنطق..تحية للمواطن مصري سي السيد..وجزاك الله كل خير يا رجل.

[الرافعي]

أضم صوتي لصوت أخي الحبيب أحمد محمود، وأشكرك يا س.س كل الشكر .. والمروءة من أكثر ما يأسرني

أحمد ...

أشر انت بس على أي قريب ولا بلديات لك في دبي ضواحيها ... وعنينا :D

تم تعديل 11 يوليو 2006 بواسطة الرافعي

[MZohairy]

هو 172 سنتي صحيح :D

انما جدع و راجل

كل الحب ليك يا أحمد

[صبح]

في دبي ضواحيها ... وعنينا :D

الله

هو أخونا الرافعي كمان فى دبي؟؟

طب خليك معايا على الخاص بقى..........!!

[محمود الشاعر]

اللهم لك الحمد

اللهم لك الحمد

اللهم لك الحمد

اشكركم من كل قلبي ان اثبتم بالدليل القاطع ان الرجال الرجال لم يموتوا ولم يختفوا

بالفعل اشكركم

واشكر س س لأنه اعطى لنا أمل جديد يتجدد بأن المصري الجدع موجود فعلا مش كلام افلام

لك التحية والحب والاحترام

[إبن مصر]

اخى الحبيب الرافعى اعلم من قلبى ان ما قلته ليس مجامله وانك بالفعل رجل قد القول ربنا يكرمك..

اخى الحبيب الغالى mzohairy والله الذى لا اله الا هو .. انت نفسك ساعدت محمد دون ان تدرى فكما قال الرسول عليه الصلاه والسلام .. يثاب المؤمن رغم انفه... والحكايه طويله ابقى اقولهالك بعدين..

انا فى قمه فرحتى بهذا المجتمع الراقى بس انزلوا نتم مصر واحنا نقوم بالواجب...

انا ملعبى مصر

وارضى مصر

ورجالتى فى مصر

والى عايز حاجه منها ...........يقول لابن مصر

[عصام]

والى عايز حاجه منها ...........يقول لابن مصر

رخصتى مسحوبة من سنة ومش عارف اجيبها .. :D

[صبح]

اخى الحبيب الرافعى اعلم من قلبى ان ما قلته ليس مجامله وانك بالفعل رجل قد القول ربنا يكرمك..

اخى الحبيب الغالى mzohairy والله الذى لا اله الا هو .. انت نفسك ساعدت محمد دون ان تدرى فكما قال الرسول عليه الصلاه والسلام .. يثاب المؤمن رغم انفه... والحكايه طويله ابقى اقولهالك بعدين..

انا فى قمه فرحتى بهذا المجتمع الراقى بس انزلوا نتم مصر واحنا نقوم بالواجب...

انا ملعبى مصر

وارضى مصر

ورجالتى فى مصر

والى عايز حاجه منها ...........يقول لابن مصر

أخى العزيز ابن مصر

رغم ان مداخلاتي قليلة جدا معك

الآ أننى أيضا أحبك فى الله مثل سى السيد والرافعى وواحد تانى و وطفشان الأفوكاتو و.......الكثيرين حتى لا أنسى أحد

عامة أنا برضه فى مصر

وملعبى فى مصر

ومن هنا ورايح

من رجالة ابن مصر

والى عايز حاجة يأمر

تم تعديل 11 يوليو 2006 بواسطة صبح

[إبن مصر]

الاخ الغالى صبح.. احبك الذى احببتنى فيه

اكرمك الله العفو يا باشا احنا الى من رجاله رجالتك انت تأمر..... والله الدنيا جميله اذا ما اردنا ان نراها جميله..

الفاضل عصام شوقى

لو سألتنى تانى عن رخصتك انا بنفسى هاكون سبب فى اعتقالك.........يا راجل يا مفترى الرخصه الى بتتكلم عليها مسحوبه من سنه وجاى تسأل عليها من شهر...

وبعدين احنا رجاله فى الحق... بس.... واخد بالك يا شقيق.....

وبعدين عيب يا ريس واحد فى مركزك يتواضع ويطلب حاجه من حد ...والا اقووووووووووووووول....

[وليد صفوت]

انا ملعبى مصر

وارضى مصر

ورجالتى فى مصر

والى عايز حاجه منها ...........يقول لابن مصر

عاوز اتجوز :D

[عصام]

وبعدين عيب يا ريس واحد فى مركزك يتواضع ويطلب حاجه من حد ...والا اقووووووووووووووول....

:D

[Modest]

كان نفسي ألحق مظاهرة الحب في أول صفحة :P .... لكن ملحوقة :D

سعدت بلقاء سي السيد و تمنيت و مازلت أتمنى أن تتكرر لقاءاتنا .. إنسان يُشعِرك منذ اللحظة الأولى بحميمية صداقتكم و أنك تعرفه منذ زمن طويل .. مكالماتنا التليفونية لا تنقطع و أرى أن أرائنا متطابقة ما عدا كونه أهلاوي و أنا ........ ماعلينا ما علينا :P

أشكر أخي العزيز أحمد محمود "إبن مصر" على هذا الموضوع الذي اتاح لنا التعبير عن بعض ما نكنه لسي السيد و أكاد أشعر به مُحرجاً لأنه لم ينتظر كلمة شكر و إنما الرجولة و الشهامة طبعان متأصلان فيه .. ناهيك عن خفة الدم :P .

"شايفك مكسوف يا سين سين و مش عارف تقول إيه :P .. ما تتكسفش يا راجل انت تستاهل مجلدات حب مش بس موضوع :P "

سين سين .. انت مرتبط؟ :D

[se_ Elsyed]

أحببكم الله الذي أحببتموني فيه

والله يا جماعة أنا ما عملت غير الواجب

الواحد ممكن يطنش ويكبر دماغه وما يجاملش في فرح أو مناسبة سعيدة ..

لكن مرض أو أزمة ... مش ممكن

وبعيني دي أمور ربنا بييسرها من عنده

ولو إحكيلكوا على السيناريو اللي حصل فمش هاتصدقوا

أولاً أحمد أتصل بي الساعة 11 بالليل ولقيته بيسألني إنت فين ؟

فقلت له : إزاي يعني .. انا في الرياض هاكون فين ...

فقالي : المستشفى الفلانية قريبة منك ؟

قلت له : آه بيني وبينها دقيقتين بالعربية .. فقالي أصل الحكاية كذا كذا وأخويا محجوز هناك عشان عملية الزايدة .. المهم أنا أعرف ناس كتير في مسشتفيات الرياض لإن التأمين الطبي لعبتي وكلهم أصدقائي .. المستشفيات هنا بقى بتخلص عمل الساعة 9 مساءً تقريباً وبعد كده الطواريء هي اللي بتشتغل ...

والله يا جماعة يشاء السميع العليم إني لسه بأركن العربية قدام المستشفى إلا والاقي واحد من أصدقائي داخل من باب المستشفى .. وٍأول حاجة سألنا بعض سؤال في نفس التوقيت : إنت بتعمل إيه هنا في وقت زي ده ؟

هو قالي إنه لقى نفسه فاضي بالليل فقال ييجي يقعد شويه مع أصحابة اللي سهرانين .. وأنا قلت له على الحكاية ..

والحمد لله قدرنا نظبط المسائل سوا ويتعمل العملية للراجل بأسرع وقت لإنه كان تعبان من الصبح ..

وعلى فكرة ما كنتش أنا لوحدي .. فكان معاه مديره المباشر وهو مصري أيضاً وشخص زي العسل .. وفي الأخر أنا مشيت على وش الفجر لإني ماكنتش روحت من الصبح وقاعد بهدومي وشكلي زي الزباليين وحاسس إن هايغمى عليه من التعب .. والراجل ساب بيته وعياله وفضل سهران جنب أخو أحمد لحد 6 الصبح ..

المهم دور مسيو زُهيري إيه بقى في الموضوع ؟

قعدنا نرغي أنا والراجل عشان الوقت يُمر .. طلع بقى إنه جار وصاحب والصديق الأنتيخ :D لمحمد زُهيري وزمايل تخته واحده ( هابقى أقولك هو مين يا مان ) .. وطبعاً قعدنا نقطع في فروت زهيري ( زمانه دلوقت من غير فروه وهايموت من البرد ) ..

النهاردة روحت أزور المريض .. والله يا جماعة كنت نفسي أصور لكم الوضع هناك في المستشفى عشان تعرفوا العينات العشوائية من الشعب المصري الأصيل اللي قلة لا تُذكر هما اللي نقدر نقول عليهم وحشين .. فالغرفة تكاد تكون مكتظة بالناس من كل حدب وصوب جايين يمطئنوا على الراجل

على فكرة اخو أحمد بقى له شهر هنا في السعودية .. منها 3 أسابيع تدريب في جده .. وهو هنا في الرياض تقريباً من إسبوع أو 10 أيام ... لكن كمية الناس اللي لقيتهم في المستشفى واللي أنا نفسي أتخضيت وقلت دي مظاهرة أو دول ليهم فلوس عنده وجايين ياخدوها :D أحسن تحصل في الأمور أمور وفلوسهم تروح عليهم

فالخير موجود يا جماعة وكثير كمان

طب هاقولكم على حاجة .. زميلنا بالمنتدى وصديقي .. الآنتيخ برضوا - هاندي كرافت هو كمان له دور في الموضوع

فمن فترة كده كلمني على شقة عندهم في العمارة فضيت لو حد بيدور على شقة .. المهم الشقة إتأجرت لواحد دكتور باكستاني من إسبوع .. ويشاء السميع العليم إن الباكستاني ده يسافر أمريكا وما ياخدش الشقة .. فلقيت أحمد بيتصل بي أول إمبارح وزي ما يكون بياخد عمولة من صاحب العقار :D وقالي : الشقة فضيت .. روحت مكلم أخو أحمد محمود إمبارح الصبح عشان كان بيدور على شقة ومازال قاعد في فندق .. وراح شافها وعجبته جداً وأتفق وخلص .. ولقيته حتى أمبارح بيقولي : ده بتوع مكتب العقار بيقولوا لي إن أخوك ساكن في الشقة اللي جنبي .. فقلت له هو إنسان أكثر من أخويا بصراحة وهايبقى ونعم الجار بالنسبة لك ( يعني ممكن تستلفوا منهم سكر ، زيت تموين ، شاي ، طقم كراسي .. كده يعني ) .. فقالي بس أنا مالحقتش أتفق على الشقة فياريات توصل النهاردة الصبح تشرح لبتوع المكتب العقاري الظروف أحسن يقول إني رجعت في كلامي ..

المهم مدير المكتب ... بالصدفة ومش إحنا اللي مختارينه .. مصري برضوا .. كلمته وبأطلع له فلوس ربط كلام عشان ما يأجرش الشقة .. لقيته حلف ما ياخد مليم وإن الشقة بتاعت الراجل زي ما أتفقنا والمفاتيح أهي وممكن يخلي زمايله يجيبو شنطة وحاجته من الفندق يحطوها في الشقة لحد ما يخرج من المستشفى بالسلامه ...

النهاردة الصبح وعلى الريق لقيت واحد ---- والله العظيم بالصدفة برضوا مصري - شغال في المستشفى في قسم التسويق جاي لي المكتب ويعاتبني لإنه عرف إن أحد أصدقائي محجوز هناك وما رفعتش السماعة وكلمته بالليل ... مع إن اللي كانوا موجودين في الوردية عملوا الواجب وزيادة .. وقالي إنهم هايغيروا له طقم التمريض من فلبينيات لـــــ .. مصريات كومبليمينت منهم ليه يعني .....وده عشان ما بيفهمش حالتك إلا ولاد بلدك ( يا بختك يابويا ... مشيه معاك بزيادة يا بتاع الزايدة :) )

ده بإختصار اللي حصل يعني ، واللي أنا كنت جزء صغير من الحدوتة والباقي كملها أبطال أجدع مني وبدون أي منفعه وراء الجدعنة دي لإننا تقريباً ما نعرفش بعض كلنا ..

وعشان تشوفوا إن الدنيا صغيرة برضوا .. فكان معايا نسيبي النهاردة وإحنا في المستشفى .. ولقيت زمايل أخو أحمد بيقولوا له ... إحنا شوفنا السحنة دي فين قبل كده ؟ .. فقال لهم طول ماحنا كلنا في مجال الكمبيوتر فلازم نتقابل .. وطلعوا فعلاً يعرفونا وإحنا نعرفهم لإنهم من أكبر عملاءنا في السعودية لكن ممكن تكون تعاملاتنا مقتصرة على التليفونات أو المعاملات الرسمية بشكل غير مباشر ...

[الرافعي]

سين سين .. انت مرتبط؟ :)

ما رديتش برضه على سؤال موديست ؟؟؟ :D