هساافر النهاردة!!

[مريوم المصرية]

صباح الخير بتوقيتي دلوقتي :huh:

يا جماعة أنا طيارتي الساعة 8 بالليل،

هروح بلدي آخد أجازة :huh: من الهم اللي هنا،المشكلة ان هناك برضو مصيبة تانية

ماعلينا :huh:

يا ريت تساعدوني وتقولولي ايه أحسن الأماكن اللي تتراح غير النيل والمتحف وسيتي ستارز والكلام ده

لاني معرفش حاجة ف مصر وبتوه في الشارع اللي ورا بيتنا،(شفتو خيبة أكتر من كده؟؟؟؟) :blink: بس معذورة عشان مش عايشة هناك

ويا ريت في اسكندرية كمان

والاسكندرانية هنا مش هيقصروا :huh:

مع الشكر مقدما عالمساعدة

تم تعديل 13 يوليو 2006 بواسطة مريوم المصرية

[yacho]

شوفى يا مريوم فى اماكن حلوه كتير ف اسكندريه

بس يعنى لو معاكى واحده صاحبتك او مجموعة اصحاب

حتبقى الفسح دى الذ

فى عندك مكان زى قهوه روشه كده اسمها 7\24 فى اول طريق مصر اسكندريه الصحراوى

قبل كارفور بشويه بس عالناحيه التانيه .. وقبلها بشويه على نفس الصف فى ملاهى مش

بطاله اسمها فانتازى لاند .. وبعدها بشويه حتلاقى مكان لذيذ اسمه hands ده ممكن تقضى اليوم كله فيه

مع العيله بحيث ان الكبار لهم مكان يقعدوا فيه وفيه غدا والاولاد بمختلف الاعمار بيمارسوا

انشطه مختلفه بيكون مسئول عنهم فيها مجموعه من البنات والاولاد تقريبا خريجى فنون جميله ..

يعنى على سبيل المثال هى عباره عن مجموعه ورش كل واحده بتعملى فيها حاجه سواء اعمال فنيه من السيراميك

او وشوش من الجبس فى ورشه نجاره وفى رسم والوان وفى كمان فرن فلاحى بيخللوكوا تعجنوا وتخبزوا فيه ..اليوم

هناك للطفل الواحد من اول اليوم للساعه 11 بالليل ب 25 جنيه .

فى عندك اماكن تلفى وتتسوقى وممكن تلاقى اماكن تتغدى او تتعشى وتدخلى سينما زى جرين بلازا او المول اللى فيه

كارفور .. فى كمان جانجل وجاردينيا .. ولو عايزه تنزلى الميه روحى فندق فلسطين واحجزى يوم على البلاج الخاص بتاعه

حتى لو مش نازله فى الاوتيل تقدرى تقضى اليوم هناك .

شوفى فى كمان حاجه لذيذه حتعجبك روحى مسرح سيد درويش اللى هو اوبرا اسكندريه دلوقتى وخدى البروجرام بتاع

شهرين يوليو واغسطس .. ساعات بيبقى فى حفلات لذيذه قوى بتتعمل فى المسرح الرومانى المفتوح .. مكتبه اسكندريه

برضه خدى البروجرام بتاعها لو بتحبى عمر خيرت بيبقى له حفله ف التوقيت ده تقريبا ف المكتبه .. وفى حفلات تانيه

حلوه انا حضرت لمنير حفله فى قاعه حفلات المكتبه كانت حلوه قوى ومنظمه جدا .

لو افتكرت حاجه تانى حاجى اقولك .واجازه سعيده يا مريومه

[مريوم المصرية]

شكرا يا طنت ياشو :blink:

ربنا يخليكي :blink:

ولازم أجرب حكاية القهوة دي :wub:

تم تعديل 13 يوليو 2006 بواسطة مريوم المصرية

[زعلان]

مجمع دار الاوبرا فيه متحف الفن الحديث اكثر من رائع ومتاحف موسيقية وعروض موسيقية وغنائية وعروض مسرحية محترمة في الهناجر ده أسعارها رمزية جدا

وفي ساقية الصاوي بالزمالك فيه عروض متنوعه

وممكن تبصي في الجرنال وتسألي عن العروض المسرحية لوزارة الثقافة بعضها بيكون متميز وأعلى سعر تذكرة ما يوصلش 150 أو 200 جنيه حسب الابطال

[مريوم المصرية]

شكرا خالص يا عمو زعلان :blink:

[زعلان]

إذا ما زرتيهاش ممكن تروحي القرية الفرعونية على النيل في الجيزة بيقولوا لسه حلوة وممكن تقضي فيها يوم كامل انا زرتها من حوالي 16 سنة كان يوم ظريف بداية من الاجواء والعروض وممكن تلبسي زي فرعوني وتتصوري وفيه مطاعم

[سهيلة]

العزيزة مريوم

هتنورى مصر كلها

بصى يا ستى عندك

اماكن خضرا كتير لو انتى بتحبى الطبيعة والانطلاق

هتروحى هناك مع صحبة لذيذة من صحابك وتقضوا وقت كويس

عندك

حديقة الازهر

الحديقة الدولية بمدينة نصر

القناطر الخيرية

وف القناطر ممكن تركبى عجل او حصان

وهناك ف الاماكن دى كافتريات كويسة ممكن تقعدوا فيها

لو بتحبى النيل

ممكن تاخدى رحلة نيلية بتبقى تحفة

وعلى فكرة فى رحلات نيلية للاقصر واسوان

ويا رب تستمتعى باجازتك

[زعلان]

هي القناطر لسه حلوة يعني نظيفة ومرتبة و أخبارالزحمة ايه

[سهيلة]

استاذ زعلان

القناطر اخر مرة روحتها من سنة وروحتها عن طريق النيل كانت رحلة نيلية حلوة اوى

هية الى حد ما نظيفة

وبتكون زحمة فقط ف الاعياد والاجازات

عدا ذلك

بتكون فاضية وهادية وهتستمتع بيها اكتر

[مومو الامور]

:blush

صباح النور بتوقيتى انا

شوفى يا ستى اول حاجه حمدالله على سلامتك ويارب تطمنى على اهلك وذوييكى

هههههههههه حلوة ذوييكى دى

ثانى حاجه الوعاوزة تتفسحى فسحات حلوة فى مصر اوعى تنسى ان مصر بلدنا بتحب الكريم يعنى اوعى تبقى بخيله

متنسيش شرم الشيخ وطابا والقرى السياحيه الجديدة اللى هناك

نخش على اسكندريه متغوطيش اوى احسن زحمه والشواطئ متاجرة كلها لشويه صيع خدى بالك من نفسك

القاهرة طبعا حدثى ولا حرج 24 ساعه فاتحه مبتقفلشى

مسرحيات وافلام وملاهى مائيه

[مريوم المصرية]

العزيزة مريوم

هتنورى مصر كلها

بصى يا ستى عندك

اماكن خضرا كتير لو انتى بتحبى الطبيعة والانطلاق

هتروحى هناك مع صحبة لذيذة من صحابك وتقضوا وقت كويس

عندك

حديقة الازهر

الحديقة الدولية بمدينة نصر

القناطر الخيرية

وف القناطر ممكن تركبى عجل او حصان

وهناك ف الاماكن دى كافتريات كويسة ممكن تقعدوا فيها

لو بتحبى النيل

ممكن تاخدى رحلة نيلية بتبقى تحفة

وعلى فكرة فى رحلات نيلية للاقصر واسوان

ويا رب تستمتعى باجازتك

مصر منورة بالناس اللي زيك ;)

ومتشكرين خالص عالمساعدة،ادعيلي بس أعرف أقابل صاحبتي عشان ننطلق سوا :blink:

:blush

صباح النور بتوقيتى انا

شوفى يا ستى اول حاجه حمدالله على سلامتك ويارب تطمنى على اهلك وذوييكى

هههههههههه حلوة ذوييكى دى

ثانى حاجه الوعاوزة تتفسحى فسحات حلوة فى مصر اوعى تنسى ان مصر بلدنا بتحب الكريم يعنى اوعى تبقى بخيله

متنسيش شرم الشيخ وطابا والقرى السياحيه الجديدة اللى هناك

نخش على اسكندريه متغوطيش اوى احسن زحمه والشواطئ متاجرة كلها لشويه صيع خدى بالك من نفسك

القاهرة طبعا حدثى ولا حرج 24 ساعه فاتحه مبتقفلشى

مسرحيات وافلام وملاهى مائيه

:wub: هههه

شكرا،بس متهيألي الصيع اللي في الشواطئ ماليين اسكندرية كلها!!أهم حاجة بس الواحد ياخد باله

هي القناطر لسه حلوة يعني نظيفة ومرتبة و أخبارالزحمة ايه

مصر كلها زحمة وده واقع لازم نتقبله ونتعايش معاه -_-

مرسي خالص مره تانية -_-

صحيح هو حضرتك زعلان ليه؟؟؟ :blink:

تم تعديل 13 يوليو 2006 بواسطة مريوم المصرية