السنيما والصيف والناس

[nancy]

الموضوع ان الصيف فى اسكندرية هو البحر والسنيما والناس

فعوزة اقولكم عن انطباعى عن الصيف والسنيما خصوصا

بد ل ما تدخلوا افلام وتطلع فشنك

الجو فى اسكندرية مش حر اوى يمكن علشان السعودية حر اكتر

الشياكة مقلقش .. اوحش من كدة مفيش

ياما نفس شكل السنة الى فاتت اما الاضافة ان البنات بتلبس فوق البدى والجينز الحجاب وفستان شبة الكاش مايوا

شكلة غريب اوى مع الحجاب والوان برايت اوى ومكياج قوى جدا

شكل كل حاجة زى ما هيه كان مفتش سنة مرت

نيجى للسنيما دخلت 3 افلام فى الاسبوع دة

الاول عودة الندلة متوسط اديلة 50%

ممكن تشوفوه من باب التضيع الوقت على الاقل مش حتخرجوا منة ندمانين اوى على الوقت الى قضيتوة فية

تانى فيلم عن العشق والهوى

كاتب القصة هو تامر حبيب فالقصة حلوة اوى وكالمعتاد متشعبة بحيث ان الاحداث تبقى بعيدة اوى وتقرب

فيلم عاطفى جدا والحوار هايل والاخراج والتصوير بس عيبة ان فية لقطات كلوز كتير اوى حتى لو مفيش مشاعر عوزة تبان فى الملامح

واغرب حاجة لفتت نظرى الجمهور

الفيلم مفيهوش جملة تخليك حتى تبتسم والناس مييتة من الضحك وبتالس طول الفيلم

مش فاهمة هما مش فاهمين الفيلم ولا مش عوزين يفهموا ولا انا الى شخصية كئيبة

ياريت لو حد دخل يقولى اية الى كان بيضحك

تالت فيلم حليم

هو فيلم تسجيلى اكتر منة روائى بس ابن احمد زكى ضعيف فى الدور وبيقلد حاجة وسط بين احمد زكى وعبد الحليم

احمد زكى كان تعبان جدا وباين علية ان الفيلم كان كانة حفلة تابين لة اكتر من قصة عبد الحليم

انا كنت متاثرة اكتر لاحساسى ان دى اخر لقطات لاحمد زكى اكتر من عبد الحليم

بس مش عرفة انا الى انطبعاتى واقعية ولا بهتانة

حسيت انى عوزة اكتب الى فى دماغى يمكن الرد ميهمش حد

يمكن دة مش موضوع اصلا

بس كل ما ادخل فيلم او يلفت نظرى حاجة حاكتبها وخلاص :closedeyes:

[Diab]

تالت فيلم حليم

هو فيلم تسجيلى اكتر منة روائى بس ابن احمد زكى ضعيف فى الدور وبيقلد حاجة وسط بين احمد زكى وعبد الحليم

احمد زكى كان تعبان جدا وباين علية ان الفيلم كان كانة حفلة تابين لة اكتر من قصة عبد الحليم

انا كنت متاثرة اكتر لاحساسى ان دى اخر لقطات لاحمد زكى اكتر من عبد الحليم

كويس انك قلتي كدة عشان كنت بفكر ادخله .... مش كفاية المقلب بتاع عمارة يعقوبيان كده بقي مش داخله بالعند في عماد أديب :closedeyes:

تحياتي

[hopsan]

نانسى

احلى ما فى السينما فى اسكندريه هى السينما نفسها ....فكل قريه فى الساحل الشمالى عامله سينما صيفى ..و شوفى بقى لما تتفرجى على فيلم و الفرجه اساسا على الناس اللى بتتفرج ...مش فاهم ليه مزاج عند البنات يلبسو المايوه و فوق منه الكاش مايوه و الدنيا قربت تليل ..يعنى شويه و العشا يؤذن ..ما خلاص البحر و نهار ربنا خلص ايه لازمه المايوه باليل ..ودى مش واحده ولا اتنين دول شعب من البنات وفى كل القرى تقوليش فيه سين بينهم على بعد القرى عن بعضها ...و اللى ميعجبوش الفيلم يسيبو و يمشى و تيجى ناس تانيه على منتصف الفيلم ولا كأن الفيلم له اعتبار و انما الأحاديث الجانبيه هى اللى ليها الإعتبار الأول و احيانا كثيره اصوتهم و ضحكاتهم تعلى على صوت الممثل يعنى لا فاهمين ولا عايزين حد يفهم و تصبح مشتت إما تتابع كلامهم او تسيب المكان و تمشى زيهم و بكره فيلم جديد ...اقصد كاش مايوه جديد

[المدهش]

نانسي ..

حمد الله على السلامة ولو انها متأخرة..وبصراحة انتي بتقدمي خدمة كبيرة بكتابة انطبعاتك عن أفلام الصيف ..علشان ما ندخلش حاجة وتطلع ما تستاهلش ..وانا شخصياً أثق في ذوقك..وبصراحة أنا كنت متوقع ان فيلم حليم يكون أقل كتير من الدعاية اللي اتعملت له..لكن يا ترى ليه ما دخلتيش فيلم عمارة يعقوبيان؟!

[Hammer]

طب دي السنيما و الحجاب ..

فاضل لك الناس و الصيف :closedeyes:

[nancy]

لله يسلمك يا مدهش

وعموما السنيما فعلا معدش ليها الرونق الى كان ليها زمان والى بيدخلوا كتير بيكونوا نوين على التهريج او البحث عن مكان مدارى وخلاص انما السنيما والموضوع دى حاجات ثانوية

وملحوظة كمان لو عندك ولاد فى ال12 مدخلهمش العشق والهوى ولا حليم لان اخدت بناتى وبنات صديقاتى ونكدوا علينا نكد هما زهقوا واتحولت القاعدة لانهم يرغوا ويضحكوا ويلعبوا بالموبيل والجيم بوى وسابواالفيلم اصلا

مدخلتش يعقبيان لان زوجى قالى استنى ندخلة سوى فكمان اسبوع حندخلوا سوى واكتيبلكم انطبعاتى

فية مجموعة افلام بتطلع فى العروض القادمة او الى موجودة فى سنيمات تانية زى كتكوت واوقات فراغ ولخمة راس وواحد من الناس

لخمة راس واوقات فراغ دول فشنك من الاعلان

كتكوت البنات حيدخلوة وانا مستحيل طبعا

واحد من الناس واضح انة كويس اكشن بس لسة منزلش

دة ملخص السنيما للاسبوع دة والى جاى

الناس بقى يا همر حاجة كدة غير واضحة المعالم

كل حاجة غليا الاسعار الدبل الدنيا زحمة متحسش ان فية حاجة تفرح اوى

كل ما اشوف محل اسالهم هو كدة الاسعار معقولة فيقولو اه عادى

كارفور ومحطة الرمل والمنشية مفيش مكان رغم اختلاف المستوايت تقدر تقول رخيص

الزحمة فظيعة تحس الناس كلها فى الشارع بيعموا اية مش عارفة

حتى الكتب اسعرها الدوبل

واحنا فى السنيما فى حليم جات صورة للسادات فبقولهم ولهى مات فى الوقت المناسب عقابل مبارك

لاقتها بتقولى بصوت واطى وطى صوتك المعتقلات دلوقتى ولا ايام جمال عبد الناصر كل بيدخل

الصيف (برضة توضيح لهمر) انا الصيف عندى النادى والبسين غير كدة مليش فى الشواطى والكلام دة خالص

الا لو اسبوع فى الساحل وبعمل بحث دلوقت لاحسن مكان ممكن نروحوا

لو حديعرف مكان ظريف جديد ويستحق يدينى خبر (ميضرش برضة)

ادى السنيما والناس والصيف

واول ما يكون فية جديد حاكتبلكم على طول :closedeyes:

[المدهش]

شاهدت أمس برنامج دينا رامز الجديد على روتانا وكان ضيفها هو الناقد السينمائي طارق الشناوي..وتطرق الكلام لأفلام الصيف..وشارك عدد من الجمهور عبر التليفون..وجاءت معظم الانطباعات موافقة تماما لما قالته نانسي..

شكرا يا نانسي لأمانة النقل وصدق الانطباعات..وفي انتظار انطباعاتك وآراءك عن الأفلام الأخرى.

[نورية]

انا بقى كنت حاموووووووت و ادخل فيلم ( عمارة يعقوبيان).. برغم الانتقادات الكتيرة اللى وجهت لكل المشاركين فى الفيلم.....

انا قريت جزء من الرواية الاصلية... و دة اللى شجعنى اكتر انى ادخله...

و هوباااااااااا تحديت كل الاراء و دخلته.....

حقيقى الفيلم عجبنى جدااااااااااااااااااااااااا ... فوق ما تتخيلوا....بغض النظر عن المشاهد اللى يطلق عليها ( تخدش الحياء)... لكن الفيلم فعلا هادف... بيتناول الفساد فى مجتمعنا المصرى بكل صراحةةةةةةةة...

عجبنى جدا تمثيل خالد الصاوى فى دور الصحفى المنحل....حقيقى عنده جرأة شديدة بحيث انه يقبل هذا الدور الذى اداه ببراعة شديدة... كمان ابن عادل امام ... اللى قام بدور طه ابن البواب... حقيقى بكيت من قلبى مش من عنية بس على اللى حصله فى الفيلم و على نهايته....

الفيلم كان تركيزه اكتر على عادل امام و هند صبرى ( بحكم انه يعنى عادل بيه امام).. بس حقيقى حياة معظم الاشخاص فى هذه القصة سوف تجذب كل حواسك....

كان فيه اسرة جنبى فى السينما اب و ام و اولادهم فجأة فى نص الفيلم كدة لقيت الراجل بيزعق و اخد مراته وولاده و خرج و هو بيسب و يلعن .... الفيلم مكتوب عليه للكبار فقط...

اما حكاية الناس فى اسكندرية عندنا هنا فمش عايزة اتكلم .... لان فعلا مع فئة من البنات اصبح الحتشام و الحجاب ديكور بس...

عامة صيف سعيد و ( فرجة ) ممتعة ان شاء الله..

[لخبطه]

يسلم تحليلك ياباشمهندسه / نانسي

بس معلهش لو حد فيكم يرجع معاي لورا شويه ويقولى تعليقه على فيلم حرامية في تايلاند للي شافه لأنى قديم شويه

لسه سامعه من كام يوم طبعا هنا مافيش سيمنا وفين بقا على ماتلاقيه على النت

[واحد تاني]

اول فيلم ادخله في مصر من حوالي 6 شهور ... هو عمارة يعقوبيان ...

قررت ابدأ بيه ... ومش هتكلم عن انطباعاتي عن الفيلم - هسيب المايك لنانسي - انا عاوز اتكلم عن حاجة تانية ...

انطباعاتي عن الناس ... احنا يعني الشعب ... مش ممكن ... احنا شعب الافيهات والنكتة ... صعب جدا نسيب موقف بدون تعليق ... والاصعب ان التعليق ميطلعش مضحك و يفطس من الضحك ... على قد ما بحب اكون فى حالة تركيز مع الفيلم اللى بتفرج عليه فى السينما ... واكون فى موود الفيلم ... الا ان بعض التعليقات من المتفرجين ... كانت بتجبرني اني اضحك بجد ... هذكر مثال من التعليقات على مشهد واحد بس من الفيلم ... وقس على ذلك ... من شاهد الفيلم سيتذكر هذه اللقطات ... ومن لم يشاهد الفيلم سينتبه لها لاحقا عند مشاهدته وهحاول محرقش الفيلم لمن لم يشاهده ... مع العلم اني دخلت الفيلم في سينما تعتبر من السينمات الراقية ... حفلة الميد نايت ... في محاولة للوجود وسط جمهور معقول نسبيا ...

- شاذلي (البواب) يعطي لحاتم بيه (الصحفي) مفاتيح غرفة صديقه عبد ربه (المجند)... بعد ان قرر عبد ربه الهروب

- متفرج : عبد ربه بعت له ورقته :P

- يدخل حاتم غرفة عبد ربه والدموع تنهمر يا كبدي من عنيه حزنا وكمدا على فراق عبد ربه

- متفرج : خده لحم ورماه عضم :)

- حاتم جالس يتذكر ذكريات طفولته مع والديه ... ويتذكر عم ادريس الخدام (اللى خلاه بقى كده) ... ويقوم لينزع صور والديه من على الجدار

- متفرج للى جنبه : هو شال الصور ليه ؟ :wub:

- اللى جنبه : عشان يعلق صورة عم ادريس B)

... حد فيكم يرجع معاي لورا شويه ويقولى تعليقه على فيلم حرامية في تايلاند

انا فاكرة يا استاذ لخبطة ... افتكر دخلته هنا فى مصر برده من حوالي 4 سنين ... بس في تقييمي ان مستواه ضعيف واداء كريم عبدالعزيز متواضع كان لسه يقتفد للخبرة السينمائية ... ماجد الكدواني كان لحد كبير مفتعل ومبالغ فيه كوميديا ... اما حنان ترك حسيت انها رايحة الشغل تمثل الفيلم ده ...ناهيك عن الفكرة الساذجة ... والاحداث الخيالية ... خصوصا على ما اذكر سرقة المتحف وتهريب اللوحة فى الساندويتش ... البطل الحقيقى في الفيلم كان تايلاند وده مش كفاية عشان تعمل فيلم سينما

[Sherief AbdelWahab]

حاشية :

هالة خليل أفضل بكثير من ساندرا نشأت .. لكن مشكلة ساندرا نشأت أنها أشهر!

كريم عبد العزيز هو مارلون براندو مقارنة بأحمد حلمي!

خلص الكلام

[لخبطه]

يسلم فومك ياعمنا واحد تاني

المشكلة كمان مش بس في التفاهه ماهو كل افلام الصيف تافهه لكن المشكله في الحوار اللى كتب الحوار فاشششششششششششششششششششششل والله أي حوار بينكتب هنا في المحاورات من أي عضو متماسك وقوي عن الفيلم دا .............. اللى يغيظ بقا ان المتفلسفين دول سواء ممثلين او كتاب او حتى مخرجين لو شوفت واحد منهم في برنامج ولا حاجه تقولى دا عبقري زمانه وانا مش بقبل اي نص وانا مش بقبل اي دور وهو أمي في القراءه و الكتابة انا انشليت من الفيلم لانه فعلا جديد علي فيلم بدون حوار

[nancy]

انا معاك جدا يا واحد تانى فى حكاية ان الناس بتهزر فى السنيما بطريقة فظيعة

انا لما دخلت عن العشق والهوا الفيلم عاطفى جدا وكتير بابقى تماثرة وفى مود الفيلم والدمعة حتنزل من عنايا

الاقى واحد غلس علق تعليق والناس تضحك وفية مشاهد متتحكيش لانها من غير كلام بس كلها مشاعر

وتلاقى الناس بتصقف

مبقتش فاهمة هو انا الى مش طبعية والا هما ومين فينا الى مشفاهم الفيلم

لدرجة ان كنت حزعق فى ناس ورايا بس قولت عيب البرستيج حيضيع :angry2:

بالنسبة ليعقوبيان انا حدخلة الجمعة واكتب الى حصل السبت وويارب يطلع حلو

بس مش عرفة انا ملاحظة من كلامك ان معظم التهكم على شخصية واحدة(حاتم الصحفى) دة نتيجة لتركبتة الغلط فى الفيلم

ولا التهكم كان على الكل

لان افيلم فى الاخر مليان شخصيات غير سوية وان اختلف الاسلوب

[hopsan]

بالنسبة ليعقوبيان انا حدخلة الجمعة واكتب الى حصل السبت وويارب يطلع حلو

نانسى

النهارده الأحد و وعدتينا و خليتى بينا

معلهش العزايم و الزفر والمحمر والمشمر هنا وهناك و ياعينى مش ملاحقه تشوفلنا الفيلم ...يعنى ادخله انا و اخلص مادام نانسى مش فاضيالنا

ملحوظه حمدلله على السلامه ...جت متأخره ...بس مش انا بس اللى بتأخر

تم تعديل 16 يوليو 2006 بواسطة hopsan

[nancy]

ياقبطان لله يسلمك

وبعدين انا محدش عزمنى وحياتك

وانا مصدقت لانى عاملة رجيم وموتة نفسى فى الجيم

و بتغالط فى الايام بقى النهاردة الاحد برضة

دة انت مشكلة

وبعدين متعرفليش مكان رومنتيك كدة وشيك وجديد ينفع يتراح فية يومين

و مش حتجيب الولاد يخدوا الهدية الرانيج شوز الى طانط نانسى جبتهم

ولا انزل ادور على شقتين احسن بدلهم -_- <_<

[مومو الامور]

الصيف والناس والسينما

لما كنت فى اجازة بمصر من 6 شهور وجدت نفسى فاضى جدااا اجازة بقا نوم وخروج وفسح

قاللى ابن خالتى تعالى نخش السينما

روحنا مول سيتى ستار بتاع مدينه نصر وجدت نفسى خير الله ام اجعله خير فى اوربا وباريس ولندن

وشربنا قهوة من كوفى شوب مش فاكر اسمه ايه ودخلت السينما واتفرجت على فيلم بردة مش فاكر اسمه ايه بس اعتقد انه فيلم من افلام الصيف

بس اللى استغربتله ان الناس بتروح السيما بطريقه منتظمه ومتابعين الافلام وبيحكوا عن كل افلام السوق ووجدت اننا فىالغربه هنا وبالاخص فى السعوديه

تنقصنا سينما وتنقصنا حياة الناس المصريه بتاعتنا وتنقصنا اللمه والزحمه والحركه والاثارة والتشويق

اى انه بمعنى اصل تنقصنا الحياة الطبيبعه

ومن اخر اجازة لفيت فيها فى مصر اكتشفت ان مصر من اجمل مدن العالم بالنسبه لى

واستمتعت جدا جدا بالرحله الاخيرة

الحمد لله انى مصرى ومش حاجه تانيه

[hopsan]

ياقبطان لله يسلمك

وبعدين انا محدش عزمنى وحياتك

وانا مصدقت لانى عاملة رجيم وموتة نفسى فى الجيم

و بتغالط فى الايام بقى النهاردة الاحد برضة

دة انت مشكلة

وبعدين متعرفليش مكان رومنتيك كدة وشيك وجديد ينفع يتراح فية يومين

و مش حتجيب الولاد يخدوا الهدية الرانيج شوز الى طانط نانسى جبتهم

ولا انزل ادور على شقتين احسن بدلهم

شوفى يا ستى ....لو بتتكلمى فى يومين يبقى عليكى و مطروح ...و لو حضرتك من رواد سبورتنج يبقى عليكى و على بتوع الرحلات فى النادى و تشوفى مين ساب حجزه فى المصيف بتاع النادى اللى فى مطروح ...صراحه آخر نضافه و أمان و شاطىء خاص و بالوجبات ...يعنى مش حتحتاجى تنزلى البلد علشان تشترى و تخلى الشراء ده و انتى راجعه

حاجه تانيه

عليكى بجريده الوسيط...حتلاقى عروض معقوله و بدون سمسار...وفى القرى اللى بطل على الساحل .....

المعموره لا انصح بيها ...العالم اتجنت هناك والعرب ولعو الأسعار كمان اكتر من الأول علشان لبنان و كله سقط هنا

ممكن تروحى قريه الأسد على الطريق الصحراوى..نظام اليوم الواحد ...اكل من كل الأذواق و الأصناف ومشاهده عروض الأسود التعبانه و الغلبانه...و جنينه حيوانات مصغره و خلى بالك من اى حد يقرب للنعامه ...هى شقيه ومجرمه و مره حاولت اصورها عن قرب فخطفت الكاميرا و على ماجبتها كانت الشاشه بتاعتها انكسرت من احد اظافر اخواتها

برضه تافيرنا و على نفس الطريق الصحراوى ..يمكنك قضاء يوم مع الألعاب البحريه

برضه افريكانو تقدرى قضاء يوم سفارى و مغامره تنعش الخوف و الرعب ده لو نسيتى الرعب و الخوف

بالنسبه للهديه بتاعه الأولاد ....والله انا احترت ...مش عارف اختار ليهم الشوز ولا الشقتين ؟...هو انهى اغلى ؟؟؟

سيبينى افكر ....الإغراء مش مخلينى آخد قرار ..دلوقتى!!....مش انتى قاعده معانا يومين ؟؟

تم تعديل 17 يوليو 2006 بواسطة hopsan

[nancy]

امبارح دخلت السنيما فى مول زهران فيلم واحد من الناس من احسن افلام السنة مستواة فى نفس مستوى العشق والهوى

كريم عبد العزيز اول مرة اشوفة بيمثل بجد ومنا شلبى ظريفة

اولا الموسيقى التصورية اول حاجة فى الفيلم ومن اول التيتر تعجبك بس حاول تركز فى ان الموسيقى ماشية فى طرقين متوازين واحدة مبهجة ودى فى المقدمه وواحدة على الناى وحزينة فى الخلفية عطتنى احساس بسكة الفيلم من الاول

التصوير فية لقطات جديدة زى تصوير للقطات سريعةمن زاوية صعبة اوى من اعلى اوى وبتصور الحركة فى حى الحسين

الاحداث سريعة جدا والاكشن معمول بشكل طبيعى مش مبالغ فية

نيجى للقصة انت تحس ان الفيلم جزئين او ممكن كان يبقى فلمين الاحداث كلها واحد عادى بينضرب على دماغة جامد اوى مع ان احلامة بسيطة جدا

لحد ماعملوا استراحة فى الفيلم وانا ميتة من العياط من حزنى ان دة بيحصل بجد فى مصر وكلنا ممكن نكون الشخصية دى لاننا معندناش الظهر الى يحمينا

بعد الاستراحة اتغير الحال وبداء انتقام الشخص الضعيف وتحول لشخصية تانية

بس الانتقام على الطريقة الامريكية انك تضرب من بعيييد حد برة الموضوع فيضربلك الى تقصدة

او زى لعبت البلياردوا انت بتضرب كورة علشان هى تنشن على التانية وتدخل فى فتحات الترابيزة وتتحسبلك انت مش للكورة الى ضربتها

ماعلينا الفيلم ممتاز ويستحق المشاهدة والتركيز والاستمتاع والحزن الشديد

الفيلم كلة فى كلمة واحدة جت على لسان البطل بتلخص الموضوع ( انا كنت ماشى جنب الحيط ومنفعش خلينى اجرب امشى فى نص الطريق)

اتمنى مشاهدة سعيدة

النهارة رايحة يعقبيان وحاكتبلكم بكرة علية باى :blink:

[واحد تاني]

تعقيب (اصلي حضرت نفس الفيلم امبارح كمان)

من اول لقطة بتظهر عقلية مدير التصوير ... عجبتني اوي اماكن وزوايا الكاميرا

عجبتني تقطيعات الكادرات بالاضافة للمحات المخرج اللى اشارت لها نانسي في لقطة الحسين مسقط افقي للكاميرا ... وكمان لحظة اختطاف الزوجة ... فى البطئ والسرعة في مواقف مختلفة

احساسي كمشاهد ... منتهى القهر في نص الفيلم الاول والذي ينفصل بالفعل عن المرحلة التالية وهي مرحلة الانتقام...

بعض المشاهد افتقرت للذكاء كتكرار مشهد الانتحار لشخصيتين على اختلافهما بنفس الاسلوب والمكان وحتى الملابس ...

نفس مشكلة الراكور المتكررة ... تجد البطل يركب السيارة فى مشهد اختطاف بنت رجل الاعمال يلبس البدلة ولحظة نزوله من السيارة يكون بملابس اخرى تلك الملابس التى استمر بها طوال الفيلم الذي تغطى احداثة مدة 4 سنوات لم يتغير خلالها حتى لون الجاكيت الميري الزيتي او الكوفية من تكرار الغسيل :wub:

[محمود الشاعر]

ايه الجمال ده كله

وانا اعد مكاني رحت صيفت فى الساحل الشمالي ولفيت اسكندرية وشفت افلام الصيف

تسلموا لي كلكم ربنا يخليكوا لينا

على فكرة انا نفسي اروح شرم يا ريت الاجازة الجاية تودهوالي