السنيما والصيف والناس

[nancy]

انا لسة جاية من فيلم اوقات فراغ

بصراحة زعلت من نفسى انى مدخلتوش من اول ما جيت

الفيلم هايل جدا وسنيما جديدة تمثل سنيما الواقع

تديلك احساس انك اخذت شريحة من مشاكل المجتمع وبتشفها فى الميكرسكوب

بيخليك تعمل تركيز على نقط فى حياة الشباب انت شايفهم بس اول مرة بيكون بتركيز كدة

طبعا اكتر حاجة هايلة الانتاج لانة غامر بان كل الى فى الفيلم جداد

هما مش بيمثلوا انما بيتكلموا عن مشاكلهم الفراغ والبطالة والاحتياج الجنسى

والمخدرات وكل دة من غير وعى بيتعمل بافراط وعبط

لان محدش مصاحب اهلة

المخرج والمصور والكاتب كلهم شباب والممثلين الى فى الادوار الاهل هما ممثلى التليفزيون

مش السنيما

حسيت انى بشوف فيلم خرجى معهد السنيما بس مش ربع ساعة زى مشاريع تخرجهم لا ساعة ونص

ارشحة للمشاهدة بشدة جدا جدا

[nancy]

رحت حفلة منير يوم الاربعاء

ورغم انى مش من اعضاء لاجون بس جبنا وسطة علشان نشوف منير

الحفلة كانت مليانة من كل انواع واشكال واعمار مختلفة

وتحس بجد ان منير كل الناس بتحبة وكلامة بيمس حاجة جوانا كلنا

الحفلة بداءت ببشرى هى ظريفة بس مش صوت اوى ومعندهاش غير اغنيتين وبس

وزى ماهيا قالت انتم جاين علشان بتحبوا منيروعندها حق

جة بعدها فريق جديد اسمة 30 فبراير

بصراحة انا اول ما سمعت الاسم حولت افتكر دة تاريخ اية (شغل زهيمر بأة)

وبعدين افتكرت ان اليوم دة مش موجود اصلا فى النتيجة

المهم كلايماتهم واسلوبهم والمزيكة بتاعهم من اسلوب منير

وبعدين جة منير .. الناس كانها جتلها حالة من النشاط المافجىء

والفرحة الفظيعة جدا اول ما بان منتير

وفضلت مع كل اغنية نتقدم خطوة

منير غنى حوالى ساعة وربع وغنى فيهم حوالى 15 اغنية

اتكلم طول الحفلة خمس جمل بالظبط الى برة الاغانى

اول واحدة انة علق ان الموضة الجديدة وحشة الى بيلبسها الشباب الخاصة بالبنطلونات ذات الوسط النازل

فحد سالة من الى قدامة على طول طيب والبنات قال لا على البنات ممكن

تانى جملة انة لما جة يغنى رابع اغنية قال دى من غير تعليق وغنى الخواجة ابن مريكه

تالت جملة انة قال دة علشان جنود اسرائيل

الحقنى بتخطف

رابع جملة انة اعتذر انةملوش نفس يتكلم

الخامسة انة بيحب لاجون وناسها لانهم هما كمان بيحبوة

اخر اغنية غناها بعد ما عرف الناس على كل المشاركين معاه

وبدات بعض الناس تمشى على اساس انة خلص

غنى على روقان حدوتة مصرية

كانت على الجرح بالظبط

وكان لابس قميص ابيض علية رسمة صورة جيفارا

كانت برضة رمز للى هو حاسس بية

او الى نفسة ان يكون فى العالم العربى

انا وانا بسمع منير حسبت حاجة غريبة جدا ان منير عنده حوالى 300 اغنية لو غناهم كلهم

حنفضل وقفين بنسمع 25 ساعة

وحنسمع فيهم 25 سنة من تاريخنا الشخصى

يعنى كل اغنية فيها حتة من عمرنا واحلامنا ومشكلنا الى مرة بينا

انا بحب منير جدا كل كلمة منة فعلا بتمسنى اوى

دة ملخص الحفلة

بكرة حاكتبلكم عن 3 ايام فى القاهرة الحلوة جدا والحر جدا

[واحد تاني]

طول عمري بقول عليكي بتفهمي ... :D

الكلام اللى فى المداخلة اللى فاتت دي يا جماعة ميطلعش الا من حد فاهم الدنيا دي صح ...

وبعدين عاوزة تدخلي لا جون وكمان عشان تسمعى منير... تقومي تدوري على واسطة واحنا موجودين هنا ... :lol:

تم تعديل 20 أغسطس 2006 بواسطة واحد تاني

[nancy]

مرسى يا تانى على رايك فيا

بس هو انت كنت فى الحفلة ؟

مع انى كنت متوقعة كدة لانك مستحيل تبقى بتحب منير اوى كدة ومتكونش موجود

انت كنت واقف فين بالظبط :lol:

[nancy]

كل الناس بتحب تيجى اسكندرية وانا بحب اروح العكس احب اروح القاهرة

صحيح حر جدا .. بس الفسحة هناك لها طعم مختلف

ممكن فى يوم واحد تروح اكتر من مكان كل واحد منهم لة روح مختلفة تماما عن التانى

فية امكان بحب اروحها ديما فى الزيارة دى واماكن احب اتعرف عليها واماكن اروح افتكرها تانى بعد مامر وقت طويل على الزيارة الى قبلها

بالنسبة للاماكن الى مش ممكن مرحاش كل مرة الحسين والفشاوى والخيامية ومركب فى النيل بالليل مع صوت ام كلثوم بتسمع ثومة وصوت المياة وبس

من ساعة ما اطلع المركب لحد ما انزل ولا كلمة عوزة اوفر كل ذرة فيا لثومة وصوت النيل

ومن الاماكن الى حبيت استعيد ذكرياتها كانت بيت الكرتلية الى مفتوح على بيت امنة بنت سالم وطبعا مقتنيات اخر مالك (اندرسون ) من اول حجرات تحمل مقتنيات وطابع معين زى القاعة الصينى الى جانب المقتنيات من الاثار المصرية ومسكات من الجص لاصحاب البيت

اكتر حاجة مش باحبها ان كل غرفة فيها لمبة كهرباء عادية بحس انها بتخصر من قيمة تاريخ المكان النور الى جاى من ورا المشربيات لة روح مختلفة

بيدى احساس مختلف

دخلت فى المشرفيات الى بتطل على قاعة الرجال وتخيلت ازاى كانت السيدات بتابع الحفلات والحوارات من فوق هما شيفين كل حاجة بس مش مشركين فى اى حاجة

مكان الفرقة الى بتغنى وتعزف اكيد كان المكان ميخدش اكتر من المغنية وعازف مندولين والدفوف والناى

العود والقانون مينفعوش فى المساحة دى بس اكيد كان احساس الموسيقى مختلف وهو جاى من فوق بعيد من وراء المشرفيات

الاماكن الى اول مرة اشوفها هما اتنين مختلفين تماما ستى ستارز وحديقة الازهر

ستى ستارز اكبر مول ممكن تشوفة فية ديكورات جديده فى تكسية الاعمدة والارضيات والاسقف والاضاءة الغير مباشرة بلونها الازرق

انما المحلات هى مش اكتر من شريكات عالمية لها سيستم بتنفزة فى كل مكان

وطبعا حيزات المطاعم فى كل دور وكل واحده ولها شكل خاص بيها مختلف عن المجاور لة

عجبنى مطعم صينى عجبنى ديكورة الى بينضح بالحداثة المفرطة والخطوط الحادة والالوان الصريحة

والغريبة ان المكان الساعة واحدة صباحا وكاننا الظهر ومليان عرب

حديقة الازهر دى اكتر من رائعة النوافير والفسقيات والزرع على الربوات والنخل والخضرة لونها اخضر بجد

توزيع الرخام والاحجار معمول بحساب رغم ان المكان حر جدا ومينفعش تروحة قبل الساعة خمسة

وحدات الاضاءة لها تصميم واحد وطولين مختلفين اماكن القمامة من نفس شكل وحدة الاضاءة مع اختلاف الحجم

الجلسات من الحجر وبعضها من الخشب

المكان رائع جدا .. ويستحق الزيارة

كنت اتمنى انزلكم ال200 صورة الى صورتهم بس انتم عرفين شطارتى فى النت:lol: