القسوة اهون لما تيجي من الغريب والغربة مرة.. بس العن منها الاغتراب

[المدهش]

محتار انا..

الحس ترابك يا وطن..

وانسى اللي شفته من عفن..

والذل على ايد جلاديك..

اللي ابتديت من ظلمهم..

اتبرى من جنسيتي..

واندم على يوم ولادتي فيك..

واتمنى اهاجر زي باقي صحبتي ..

ولا اني اعيش ولا لحظة ليك ..

ده القسوة اهون لما تيجي من الغريب

والغربة مرة.. بس العن منها الاغتراب

و كتيرة جدا أسئلة مالهاش جواب

ازاي احبك.. وانت مش بتحبني

وعايزين اركع للمامة وانحني

ودموعي لسه م الوجع بتهزني

لا انا ابن جاحد ..ولا ابويا ضحا بالضنا

محتار انا..

الحس ترابك يا وطن..

ولا اخبط الراس العجوزة في الحجر..

قلبك حجر ..

صمتك حجر..

ناسك حجر..

متحنطين من عهد خوفو مش بشر

خايفين وراضعين الهوان

ومكتفين حتى اللسان ..

الحس ترابك يا وطن ..

ولا اخبط الراس العجوزة في الحجر

يمكن تلين..

وتسكت الصوت اللي موت ضحكتي قبل الاوان..

مين الوطن..

الأرض والطين والفضا ولا البشر..

لو كانت الارض الوطن

يبقى انا بصراحة برئ من ده وطن

علشان ماليش ولا شبر فيه

يبقى البشر..

مين م البشر

الاغنيا.. والاوليا.. ولا الغلابة.. ولا الغجر

ايوه الوطن هوه البشر..

المنقوشين فوق الحجر

والمسخوطين زي الحجر ..

مجنون انا.. لو كنت افخر بالحجر

مجنون انا.. لو كنت ادافع عن حجر

لا انا ابن جاحد ولا ابويا ضحى بالضنا

محتار انا..

[yacho]

جميل يا مدهش .. الكلام طعمه مر.

بس اليومين دول لازم يكون فى شوية تفاؤل

انت خلاص راجع مصر . :angry2:

[المدهش]

عندك حق يا ياشو..

لازم أحاول أدرب نفسي على التفاؤل..رغم أن التفاؤل وسط كل ما يحدث سيكون نوع من الهطل!!

لكن هاغمض عيني "رغم أنف هالة سرحان" وآكل التفاحة..

عموماً القصيدة قديمة وكتبتها أيام فترة التجنيد..لأني اكتشفت وقتها يعني ايه معنى المثل اللي بيقول اللي ليه ضهر ..يعني ايه واسطة وكوسة..

مسيرك يا ياشو ترجعي مصر وتشوفي بنفسك..لكن رغم كل شئ..بلدي ولو جارت علي عزيزة وأهلي ولو ضنوا علي كرام..