حارة فلفله

[daktara]

الاخ العزيز ليمو والاخوه الشعراء

شايفكوا نايمين فى العسل ومعندكوش جديد وباب الشعر بقى حاجه تزعل والظاهر ان الكل شرب الشاى بالكافور (الادبى) لذا قررت الخروج من صمتى وادعوكم لتكملة حكايات حارة فلفله

____

عالم عجيب مليان بلاوى متلتله

فيه من كده وفيه من كده ولا مشكله

ويوماتى يطلع ميت روايه مقفِّله

من حته واحده ..هى حارة فلفله

الواد حماده ابن المعلم منظره

ظبطوه بيضرب بانجو ويشم ف غِره

قال إيه عامل لى سبع وف ليلته الهباب

خبّط على باب ام سامى المخبره

اتاريها كانت فى اجتماع أمنى خطير

ومعاها صول وبتاع خمستاشر غفير

وما صدّقت شافت زبون زى بسلامته

مسكوه ...وفى الاخر سابوه زى الفطير

وف شقشقة فجر التلات والحاج جمعه

رايح يصلى الفجر ومعاه لاسطى سمعه

شافوا اللى مرمى ع الرصيف غرقان فى دمّه

والارض من كتر النزيف فى الضلمه لامعه

.........

اتفضلوا اكملوا من فضلكم

[leemo]

أخى العزيز " دكتره "

ليه بتعمل فيّه كده ... جيبتلى " سكوينت " طبعاً ما حدش فاهم يعنى إيه " سكوينت "  :D  لكن قبل ما يتفنن الماكرون فى التفسير .. أقول أن " سكوينت" يعنى "حَوَلْ" !!!!

فى فقرة " نداء إلى أهل تيتانك" بتاعة " الفياجرا الأدبيه"  أبدعت سيادتكم مقطوعه شعريه " لا ياحبيبى لن ترى عينى بدونك"  وطلبت منى التكمله !!  فى نفس اليوم كتبت أنا التكمله من نفس ذات الوزن والجو الشعرى تحت اسم " لن أحيا صريعك "  وطلبت منك التكمله .. لكنك لم تكمل لمدة 3 أيام ... كررت ندائى ... لكنك بدأت مداخله جديده " حارة فلفله"  !!! وتطلب الآن التكمله على زجلك الجميل !!!

والله خايف أكمل ألقاك  بتفتح  فقره جديده مثلاً " عطفة خوخه " أو مثلاً " درب حسنيه نعنشه "  :colgate:  !!!  

حرام عيك يادكتره !!! جيبتلى  سكوينت !!

[achnaton]

الأخ دكترة .. الشعر والزجل ليس لعبتى .. ولكن حكاية حارة فلفلة شدتنى وتصورت المشهد التالى .. ولعل وعسى

بص الحاج جمعه .. وشاف الواد حمادة

دمه سايح .. وعينه زايغة فى بلادة

وبأعلى صوت قال لزميله الأوسطى سمعة

هات قوام أمه وابوه .. ينقلوه فورا للعيادة !!

---------------

والعيادة دى أسطبل قديم للبهايم والخيول

خد منه جزء عمنا المطاهر وجزء تانى خده بهلول

وبهلول ده أصله مدمن قزازة

ولما كبر حول على البودرة والمحلول

----------------

سكران تقولشى .. مغيب تماما عن الوجــود

شاف الولد .. ودمه سايح لعن أبوهم والجدود

وقال هاتواى شوية بن .. والست مهجــة

تربط جراحه .. وتجبر زراعه .. وتجيب معاها صبغة يود

----------------

المهم الحاج جمعة سمع كلام المزين بهلول

خد ديله فى اسنانه يجيب الست مهجة والمعلم منظرة المسطول

وجت معاهم الست حرمة الغسالة بالقطعة

أما المعلم منظرة فمكانش دارى إيه يعمل وإيه يقول

----------------

حد يعرف عمل ايه وقال إيه ؟؟

مع تقدير اخوكم اخناتون   :inlove:

[ragab2]

بحق

استمتعت بموضوع فلفلة لدكترة ومداخلات ليمو ومحاولات اخناتون الزجلية الجميلة

حياكم الله

[daktara]

اخوانى الكسالى جدا

اتفضلوا الشويه دول وقولوا رأيكم واملى ان اخونا الدكتور رجب باشا يضيفهم على اللى قبلهم

الاخ العزيز ليمو والاخوه الشعراء

شايفكوا نايمين فى العسل ومعندكوش جديد وباب الشعر بقى حاجه تزعل والظاهر ان الكل شرب الشاى بالكافور (الادبى) لذا قررت الخروج من صمتى وادعوكم لتكملة حكايات حارة فلفله

____

عالم عجيب مليان بلاوى متلتله

فيه من كده وفيه من كده ولا مشكله

ويوماتى يطلع ميت روايه مقفِّله

من حته واحده ..هى حارة فلفله

الواد حماده ابن المعلم منظره

ظبطوه بيضرب بانجو ويشم ف غِره

قال إيه عامل لى سبع وف ليلته الهباب

خبّط على باب ام سامى المخبره

اتاريها كانت فى اجتماع أمنى خطير

ومعاها صول وبتاع خمستاشر غفير

وما صدّقت شافت زبون زى بسلامته

مسكوه ...وفى الاخر سابوه زى الفطير

وف شقشقة فجر التلات والحاج جمعه

رايح يصلى الفجر ومعاه لاسطى سمعه

شافوا اللى مرمى ع الرصيف غرقان فى دمّه

والارض من كتر النزيف فى الضلمه لامعه

.........

الحاج جمعه قال يا فتاح يا عليم

مسكين ابوه وامه دا شىء فعلا أليم

الواد ده ميت ميه ميه ياللا بينا

نلحق صلاة الفجر من غير سيم وجيم

قام رد لاوسطى قال دى حتى تبقى خيبه

مش عيب على الدقن اللى شابت والزبيبه ؟

فين المرِوَّه وفين يا حاج المجدعه

واللهِ لو سِبتُه لاوضّب لك مصيبه

إعقل يا ريس إحنا مش ناقصين بلاوى

ليه رب ‘ مالنا احنا بقى ‘ ولاّ انت غاوى؟

لو حدّ شافنا  واتهمنا فيه يا ناصح

مين اللى حيصلّح سيرتنا ع القهاوى

فضلوا كده بين آه ولأّه متربسين

والواد بيتصفّى وهما مبلّمين

ولما شافوا نور بعيد جريُم سوا

وبعد كام خطوه كده كسروا يمين

اتشاوروا تانى وسُمعه قال نضرب الو

والحاج قال له مين بقى اللى يقول لابوه

دا الواد ده حيله ولو عرف يمكن يموت

وذنبُه حتماً لابس اللى بلَّغوه

...........

مين اللى طرطق ودنه للهمس اللى بينهم

الواد سنوسى العربجى فى اسطبل زينهم

كان فى الخرابه جنبهم بيفك ضيقََه

ولبختُهمَ .. الواد ده كان أصلا ناوى لْهم

الحاج جمعه كان لسانُو بيسبَقه

وكلّ ما يشوف السنوسى يهزأُه

علشان ماسك له زلّه من ايام زمان

لما السنوسى مرّه حاول يسرقُه

واحده بِواحده يا جمعه والزمن دوّار

قالها السنوسى فى سرّه قبل ما يختار

أعمل فضيحه لجمعه وانتقم منّه

ولاّ استغلّه وبعدين اضربه مسمار

هَمّ السنوسى قبل ما يسيبوا المكان

وكحّ واتنحنح وقال الدار أمان

أهلا يا أهل العلم نوّرتوا الخرابه

سِرَّك فى بير يا حاج فينك من زمان

إلاوسطى سُمعه قال دى وقعه مطيّنه

إيه اللى جاب كرباج ورا الليله هنا

مالك يا واد عمال تلقّح فى الكلام

وكأننا قاتلين قتيل ما تقول لنا؟

.........

أى خدعة

ياعم دكترة انت تؤمر

قمت بالاضافة حسب طلبك

رجب

Edited By ragab2 on July 09 2002 3:19pm

[daktara]

اتفضلوا كمان الشويه دول وكمان شكر مربع لاستاذنا الدكتور رجب باشا

مين اللى طرطق ودنه للهمس اللى بينهم

الواد سنوسى العربجى فى اسطبل زينهم

كان فى الخرابه جنبهم بيفك ضيقََه

ولبختُهمَ .. الواد ده كان أصلا ناوى لْهم

الحاج جمعه كان لسانُو بيسبَقه

وكلّ ما يشوف السنوسى يهزأُه

علشان ماسك له زلّه من ايام زمان

لما السنوسى مرّه حاول يسرقُه

واحده بِواحده يا جمعه والزمن دوّار

قالها السنوسى فى سرّه قبل ما يختار

أعمل فضيحه لجمعه وانتقم منّه

ولاّ استغلّه وبعدين اضربه مسمار

هَمّ السنوسى قبل ما يسيبوا المكان

وكحّ واتنحنح وقال الدار أمان

أهلا يا أهل العلم نوّرتوا الخرابه

سِرَّك فى بير يا حاج فينك من زمان

إلاوسطى سُمعه قال دى وقعه مطيّنه

إيه اللى جاب كرباج ورا الليله هنا

مالك يا واد عمال تلقّح فى الكلام

وكأننا قاتلين قتيل ما تقول لنا؟

[ragab2]

أحييك

أخونا العزيز الدكترة على غزارة شعرك وأفكارك المتدفقة

تحياتى

Edited By ragab2 on July 09 2002 3:22pm

[daktara]

كمان شويه تكمله علشان الحبايب

-----------

الواد جِرى على ناصية الحاره وبَص

لقى ناس كتير متجمّعه وفى النُص

جوز جزمه باين تحت أوراق الجرايد

وامّا سأل  قالوا حماده انْطسْ

قال كلمتين اتنين وخد بعضه وجرى

عملوها فيك الندل دا والمفترى

ما ابقاش سنوسى يا حَوَش لو سبتكم

واللا لابيع فيكم يا أندال واشترى

كان وشُّه ليه فى الوقت ده بيصب ميّه

وكأنه طالع لسّه من حلّة غَليّه

أصلى القتيل الله ينور تربتُه

كان فى الدِّرا بيمِدّه بالماركه اللى هىَّ

الواد سنوسى أصله مش طيب دا ناب

وفى الخباثه برضو كان بيبيع هباب

من إيد لإيد كده فى الدِّرا بيسلِّمُه

وزباينه كل الأرزقيه والشباب

وكمان حماده منظَره علشان أبوه

تاجر كبير فى الصنف كانوا يقدَّروه

وعشان علاقة والده بالظباط تمام

كانوا بيتحاموا ف حماده وما يسيبوه

يارب تعجبكم