لقاء المصريين

[بنت النيل]

السلام عليكم اخوانى واخواتى المصريين بالكويت

ايه اخباركم يارب يكون الجميع بخير والله انا نفسى ان يكون فى تعارف بين العائلات المصرية هنا بالكويت

للتقرب من بعض وعدم الاحساس بالغربة وتقارب وجهات النظر بينا تعرفو مكان هنا بالكويت فى مدينه الكويت تجمع الباصات كل ماروح هناك وخصوصا يوم الجمعه واشوف الهنود والاسيوين هناك مجمعين وحارصين على هذا اليوم للقاء مع بعض بجد شىء جميل منهم

اكثر غير متاح لهم مساكن للقيام بزيارة بعضهم فيها او اماكن متوفره واعتقد انه بعكس المصريين احنا ممكن نتقابل باماكن كتير او حتى بزيارات المنزليه والله بجد بجد نفسى نكون كلنا هنا يد واحدة ومتعرفين على بعض وتكوين صداقات حميمه بينا ولو على الاقل السيدات

وانا عن نفسى اول واحدة ارحب بالمعرفه والتعارف

[متمردة]

ih

هاى فرفوشه

احيك على الفكرة الجميله ده ودعوه المصريين للتعارف

بس تعرفى المشكله فينا احنا كمصريين لما نحب حد بندخله بيتنا وبنعرفه على احبابنا

وتقريبا بيعرف كل حاجة عندك وفجاه يغدر بيك او يتكلم عنك او يوصل الموضوع الى خلافات كبيرة مثل الطلاق بين الزوج وزجته او تتنتقلى الى مكان اخر للسكن ده حتى ممكن يحكوا للبواب حاجة المفروض هو ملهوش علاقة بيها

عموما احنا كان لينا اصدقاء كتير وبعد كام حركه مش كويسه بابا قرر اننا نمنع الزيارات نهائيا وفعلا الحمد الله عايشين كويسين بس طبعا مفتقدين الحياه الاجتماعيه اللى اتعودنا عليها فى بورسعيد وعلى فكرة انت عرفت منين انى من بورسعيد ؟؟؟؟؟؟

[eltayer]

والله فكره كويسة يا فرفوشة ويريت تتنفذ لو كنت اقدر اجي لعملت بس انا للاسف في دبي مش في الكويت وانتهز الفرصة وادعي كل اخونا في دبي علي لقاء مماثل واتفق ايضا في الرئ مع متمرده ان المصريين لما بيعرفوا اسرار بعض في الغربة بيفضحوا بعض وده كان موضوع نقاشنا في موضوع ليه المصريين مبقفوش جنب بعض في الغربة

يارين نقرب من بعض احنا المصريين

[بنت النيل]

السلام عليكم شكرا اختى متمرده على ردك انتى والطاير

وانا عن نفسى بقول نفسى ده يتحقق بس على فكرة يامتمرده بجد انتى عندك حق فى كلامك انا نفسى بواجه نفس المشكلة حتى مع الاهل هنا مش كمان الاصدقاء لان اهل زوجى اكثرهم هنا ودايما مابيجى لنا المشاكل غير منهم :wub:

وفعلا لما ببعد بنكون باحسن حال وسعادة وبعيد عن المشاكل بس نعمل ايه برده الموده والتعارف مهمين فى بعض الاوقات

ولازم واهم شىء فى التعارف هى النيه الحسنه وان الواحد يراعى الله فى تعامله مع الناس هنقول ايه ربنايهدى

وعلى فكره يا متمرده انا كمان من بورسعيد وساكنه فى مساكن ال5000 تعرفيها

اناسعيدة جدا ;) :mellow: انك من بورسعيد واتمنى اننا نكون على اتصال وصدقينى ماراح تندمى

وانا تحت امرك وامر كل المصريين باى وقت :)

[رمضان]

وانا اعلن نفسي عضو في رابطة المصريين ( المحترمين ) بالكويت

[بنت النيل]

واحنا نرحب ونتشرف بوجودك معنا يا استاذ رمضان

ولا تنسى اعتقد انك اول من فكر فى تقارب المصريين بالكويت لبعض وتعارفهم :)

مسا الخير يا متمرده وينك وكيف احوالك واخبارك عساكى طيبه وبخير

واخى الطاير انت كيفك واخبارك انشاالله بخير

ايه اخبار الجو معاكم اليومين دول بالنسبة ليا ده حالى بجو شهر 8 بالكويت شوفو ايش صاير لى :) :huh:

[ياسر ابو احمد]

بادئ ذي بدئ .. احييك على الفكره وان كنا نحن المصريين عاطفيين ونحب روح الموده والالفه .. لكن للأسف لما يحصل تقارب تبتدي العين تراقب والرأي الاخر يشتغل .. وطبعا النتيجه لازم نتكلم .. وعلشان احنا بنفهم في كل حاجه يبقى لازم نقول رأينا في غيرنا .. لاحظي في غيرنا مش فينا.. انا عن نفسي لي صداقات محدوده جدا مع اثنين ثلاثه مصرين في الخبر-السعوديه .. لكن برضه لما نزور بعض تبتدي النميمه .. لدرجة اني سألت نفسي مره ..

هل ممكن الناس لما تزور بعض مايتكلموش عن الاخرين .. هل ده ممكن .. ممكن .. يمكن :D :P

فكري في السؤال ده لما تلتقي انتي وصديقاتك .. ولاحظي .. وابقي قوليلي النتيجه ... الكلام على الناس سواء سلبي او ايجابي .. فهو كلام .. ناهيك عن سياسة الصوت العالي لبعض المصرين (اسميها سياسة الفضيحه) واصرار البعض على نشر القصة التي يقولها عبر الاثير لكل من هم بالجوار .. :sad:

انا مش بنتقد ومش سلبي .. لكن الناس اتغيرت قوي .. لدرجة اني حسيت ان لا الحكومه الحاليه ولا المستقبله تقدر تغير من سلوك المصريين في الوقت الحالي .. ومع ذلك ادعو كل من كانت نفسه جميله وعنده امل في اليوم وغدا ان يتواصل معي ويعتبرني صاحب صاحبه .. وربنا يجعله عامر :) mfb: :D

[بنت النيل]

السلام عليكم يا اخ ابواحمد

احنا تشرفنا بوجودك معنا والله

انت كلامك صحيح الناس لما بتتعرف مع بعض بتبتدى لنميمه وخصوصا الستات :D

بس اكيد مش كل الناس ذى بعضها مو معنى ان الواحد يقابل اتنين او حتى تلاثه وحشين يبقى الملايين التانية مثلهم

كمان الناس المغتربين صدقنى مع مرور الوقت عليهم تلاحظ تغير فى تصرفاتهم وعادتهم مثلا الزيارات هنا تعودنا ما نزور حدا بدون سابق تلفون وموعد بعكس مصر فاجئه تلاقيه فوق راس الواحد ;) مع ان فى ناس بمصر غير الحكاية دى وبقو ياخدو ميعاد للزيارة وحاجات كتير بتتغير فى الشخص المغترب

لكن بينى وبينك الطبع غلاب :P

لكن نرجع ونقول معرفه الناس كنوز وعلى الواحد انه يحسن اختيار الناس والواحد لازم يراعى ربنا فى كل شىء جيرانه اصدقاءه معارفه وربنا يبعدنا عن النميمه وشرها تعرف يا ابو احمد انا لما اجلس مع صديقاتى او واحده اتعرف عليها والاقيها تبتدى النميمه باى حد اقولها اذكرى الله وكل واحد منه لربه وخلينا بحلنا

وده لان الواحد عارف ربه والحمدلله

على فكره كنت حابه اخدمك بخصوص مهندس الكمبيوتر بس للاسف ماحصلت لك اصل جوزى بيعمل مبرمج كمبيوتر والله كان نفسه يعمل بالسعودية بس بيقول ماراح يكون الراتب مجزى مثل الكويت صحيح الكلام ده

ندعو الله ان يجعلنا متواصلين على الخير وينصر امه الاسلام

وربنا يجعله عامر بحسنا ياابو احمد :P

[مـي]

....................................

فكرة جميلة جدا يا فرفوشة

لكن اللي متغرب برضُه بس مش عايش في الكويت و عايز يتعرف على مصريين زيه

يعمل ايييه؟؟!

...................................

ميوي (^_^)

[ياسر ابو احمد]

السلام عليكم .. زميلتنا في المنتدى الاخت .. ميوي .. بالنسبه لسؤالك .. فهو سهل الاجابه عليه .. اللي متغرب بس مش عايش في الكويت يعمل ايه .. بسيطه جدا .. يداوم على التواصل مع اخوانه واخواته المصرين عبر الانترنت زي ماحنا بنعمل دلوقتي بكل حب واحترام .. انتي عارفه ان الواحد لما يتكلم مع حد مش شايفه.. بيرسم له اجمل صوره يجب ان يكون عليها الصديق لصديقه والصاحب لصاحبه .. ودايما شايفه في خياله في اجمل صوره يمكن ماتكونش حقيقيه .. يعني مثلا وانتي بتكتبي رسالتك لفرفوشه .. مش تصورتيها في اجمل شكل انتي نفسك تشوفيها فيه .. صح ..

لأ انا لأ متفكريش انا اقرع .. عادي يعني معنديش مشكله .. هاهاها

[ياسر ابو احمد]

شكرا يا فرفوشه على التواصل وطرح المواضيع الجريئه .. اللي الواحد نفسه يسهب في النقاش فيها ولكن دائما كتر الحديث في موضوع واحد يمكن ان يبعث على الملل والميل الى السلبيات اكثر من الايجابيات .. ;) :P

اما بالنسبه للاخ الكريم فيمكن ان يرسل سيرته الذاتيه على الايميل اللي انا كاتبه .. وانا جاد فعلا في تعين بعض المهندسين ذووي الخبره الممتازه والتي سوف ننتفع بها وينتفع هو بنا إن شاء الله ..

المهم ان تكون مؤهلاته هي ما نبحث عنه واقول لكل من لديه الخبره العمليه والعلميه لوظيفة مهندس شبكات كمبيوتر (في المشاريع الكبرى) ان يراسلني وعسى الله ان ينفع بنا صالح اخوانا المسلمين .. :D

اما بالنسبه للراتب .. فعسى ان تكرهوا شيئا وهو خير لكم .. والرزق من عند الله .. ومفيش مانع تدوني فكره عن المرتب المتوقع .. :P :P

مش يمكن في يوم من الايام الفكره تكبر وتذدهر والعائلات تزور بعضها عبر الحدود .. مين يعرف :P

وربنا يجعله عامر .. :P :P

[بنت النيل]

مساالخير على الجميع

عزيزتى مى ( ميوى )

الاجابة على سؤالك بسيطه جدا عليه انه يتواصل مع اصدقاءه بنفس البلد الموجود فيها

اما بالنسبة للناس التانية فالحمدلله النت سهل موضوع التعارف والتواصل بينا الناس

واحنا المصرين الموجودين بالكويت نرحب بيكى جدا للتواصل معنا وعن شخصى بذات اتشرف بيكى عزيزتى

بجد صدقونى مهما كان فينا من عيوب ومشاكل الا اننا برضه شعب جميل ومحب و ودود عندنا الشهامه بزيادة وعندنا المحبه والاخوه اكتير من غيرنا

يارب دايما يحفظ اهل مصر ويحفظ مصر ست الكل مهما كانت على طول الزمن

مصر الخير والبركه مهما عملو فيها ومهما اساءو لاهلها

وكفايه كدا لحسن نقع فى المحظور ونوصل للخط الساخن :P

واخيرا على قوله اخونا ابو احمد

ربنا يجعله عامر

:D

على فكره مى ابو احمد كلامه صحيح اكيد وانتى بتكتبى لى متخيلانى باحسن صورة ;)

انتى عاوزه تشوفيها

اما بالنسبة لابو احمد لقد اصبت الكلام اصلى والنبى ذى ماقولت حلوة وجميلة :P :P

هاهاهاها

شكرا شكرا ياجماعة اخجلتم تواضعنا :P :P

الجمال جمال الروح طبعا

[^^^hi^^^]

الاخت فرفوشه

فكرم ممتازه جدا جدا بجد بس للاسف انا في السعوديه :sad:

عموما يا ريت تتعمم في كل بلد ليه لا لو في حد في الرياض يقول يا اخونا و نعمل رابطه :o

ياريت نتقابل بجد واهو اى حاجه تهون الغربه :)

اما بالنسبه لموضوع النميمه فانا مش فاهم ليه يعنى انا مش قادر افهم ايه السبب بجد :angry2:

انا شايف انى لو اتكلمت بالخير دى حاجه كويسه بس بقى ال دودودودودووووووووووووو اللى بالى بالكم مالهاش لازمه اكيد يعنى

يلا ما علينا حصل خير زحيحححححححححححح

ويجعلوا عامر باللقات و التجمعات اللى من غير نم :D

[Hady]

هلا والله يا جماعه

حلوة الفكره دى بس تفتكروا هاتنفع؟؟؟

عموما انا بقى لى سنتين فى الكويت وفعلا لاحظت ان معظم المصريين بيكرهوا بعض وبينموا على بعض ومفيش مره اتقابلت فيها مع مصريين الا ولازم فى حد بيكلموا عليه!!!!

على فكره العاده دى فى المصريين بس

عموما انا معاكم فى الرابطه وخير اللهم اجعله خير

[رمضان]

حيث كده لازم نفعل الرابطة ويكون فيه ملتقى بالفعل هنا في الكويت

[سمـ مصر ــا]

فكرة جميلة من الجميلة فرفوشة

((وانا بعد وياكم )) :blink:

اتمنى أن نلتقى حريم المنتدى فى مكان نتفق علية

اية رأيكم انا عزماكوا على الفطار فى تكة على البحر حددوا اليوم والساعة ونتقابل هنا

وهوة يبقى عيش وملح

[رمضان]

هوه فيه يعني مفيش غير حريم بس ولا ايه

انا كمان حعزم الرجالة ومش على البحر لا في وسط البحر

ومن غير تحديد زمان ولا مكان

كل يوم على البحر الساعة 7 صباحا و7 مساء

بس ممنوع اصطحاب الحريم والاطفال

[نانو]

اخواني في المنتدي كله

احيكم كلكم فرد فرد لان وجودكم هنا كان اول خطوه في تلاشي كلمه غربه

بجد انا قبل ما ادخل في المنتدي ده من حوالي اسبوعين كنت حسه بغربه فظيعه

انا مقيمه بالكويت من سنتين و ما اعرفش فيها غير عائلتين مصريتين و منهم واحده في الاجازه دلوقتي

علشان كده كنت حاسه اني خلاص هاتجن

بس بجد لما دخلت المنتدي وده بقدر الله سمعت صوت و ناس يتتكلم وناس بتهزر وناس بتضحك وناس بتبكي

يعني عالم تاني

و دلوقتي ما فيش يوم بيعدي غير لما ادخل

للاسف مش وقت طويل علشان طبعا البيت والاولاد لكن حاجه بتحسسني بالتواصل و اني لسه عايشه

سبحان الله ربنا خلق الناس علشان يكون بينهم نعارف و تواصل

واقتراح غنوجه جميل جدااا و بالمناسبه عرفني مين المقيمين بالكويت معانا لاني ما كنتش اعرف

و حقيقي اهلا بكل المصريين في الكويت وفي كل العالم

بحب مصر يا جماعه بحبها و بحب كل اللي منها

علي فكره يا غنوج انا ما كنتش فاهمه هم ليه الهنود بيتجمعوا في المكان ده يوم الجمعه

شكرا علي المعلومه القيمه ديه و عقبال المصريين

انا عرفت المصريين اللي في الكويت هنا هم

غنوجه وسما مصر و رمضان و هادي و ياسر ابو احمد صح كده ولا في حد تاني؟؟؟؟

مرسي يا سما علي ذوقك

يالا احنا علي استعداد بس :D يا حبيبتي ده هيبقي كرواسون وسوسيس مش عيش وملح

و بعدين انا اول مره اعرف انك مقيمه بالكويت و انت صاحبه موضوع ليه الراجل المتزوج بيبص علي البنات؟؟؟

اضحكتيني يا سما ما هو طبيعي لازم يبص انت مش شايفه البنات عامله ايه هنا :huh: يعني كل اللي عاملينه ده ومش عايزاه يبص ليه عايزهم يموتوا نفسهم ولا ايه؟؟؟؟

[ياسر ابو احمد]

إلى العزيزه والاخت الكريمه .. نانو

للأسف الشديد .. سيدتي .. فأنا في البلد المجاور على الحدود .. وإن لم أكن معكم بقالبي .. فإن قلبي معكم .. عسا الله أن يجمعنا على خير في مناسبات يملأها حب الانسان للأنسان ... :)

ولم لا .. ففكرة اجتماع موسع لجميع عائلات المتحاوريين في منتدى حوارات مصريه .. عند العوده الى ارض الوطن في الاجازه .. شئ غير مستبعد .. بل اتمناه .. بل وادعوكم الان .. ان لاقت فكرتي الاستحسان .. ان نجتمع سوياً بنادي المهندسين - على نيل القاهره العظيم او في اي مكان .. كان .. (ايه رأيكم في برج القاهره)...

والله على ما اقول شهيد .. B) B)

تم تعديل 14 أغسطس 2006 بواسطة ياسر ابو احمد

[بنت النيل]

السلام عليكم

فكره جميلة يا اخ ابواحمد وصدقنى والله فكرت فيها ليه كمان ما نتقابل فى مصر

بس السؤال اللى حيرنى فى الفكره هل ياترى الوقت راح يكون متوافق مع بعض بالنسبة للاجازة ؟؟

والكل هيكون فى مصر بنفس الوقت

على العموم اتمنى والله