عبد الناصر ....انت من الأحرار يا حسني..!!!

[صبح]

عزيزي حسني .. :)

يسرني ويشرفني و يسعدني ويحز ف نفس اللي جايبني أن أبلغك بالنتيجة التي توصل إليها مجلس قيادة الثورة في اجتماعه الوهمي الأخير بين السما والأرض.. بس امسك نفسك أرجوك لأن البلد محتاجة لك..

ماسك نفسك....؟..هه..ماسك؟....

طيب ....

امسك نفسك كمان

إنت من الأحرار يا حسني.. :angry2:

طبعاً مندهش تماماً، لكن إحنا خلاص قررنا وماتقدرش تعترض على حاجة خالص. هي دي الديمقراطية بتاعتنا وهو ده كلامنا الأخير عشان مش طالبة "لكاكة"، وإحنا دماغنا وارمة خلقة..

أنت من الأحرار يا حسني :D

آه زهقانين وطهقانين من اللي بنسمعه كل سنة في نفس الوقت في التليفزيون وأنك على خطانا وأنك ابن الثورة البار والحركات القرعة دي.. ده ناقص يا راجل يقولوا إن إحنا كنا 22 واستنيناك لحد ما بقينا 23 ورحنا قايمين بالثورة..

ناقص يا راجل يقولوا إن أنت اللي خططت وأنك الجندي المجهول.. وأنك كنت تحت ترابيزة الاجتماعات، مش مستخبي.. لأ، مستني عشان لو أتقبض علينا أنت اللي تعمل الثورة لوحدك وتقول البيان لوحدك وتحكم البلد لوحدك.. إنما عادي.. إحنا إعلامنا برضو كان مطين بطينة ومنيل بنيلة ومزفت بهياب زي إعلام اليومين دول بتاع البيت بيت مين وحالة خوار وضلمت مصر..، وده برضو مش هيغير أي حاجة من النتيجة لأنك وبكل بساطة بقيت من الأحرار.. بعبارة تانية ومباشرة وصريحة ومن غير لت وعجن..

أنت من الأحرار يا حسني.. ;)

تعرف يا حسني..وحياة أمي أنا لو اعرف إن الموضوع هيوصل لكدة، كنت ولعت بجاز في بقيت الأحرار وكنا فضلنا زي ما كنا.. فاروق فاروق.. أه هو كان بتاع نسوان ومالوش في السياسة إنما قدر الله وما شاء فعل وذنب ناس بتخلصه ناس. وإحنا خلاص مننا اللي قابل وجه رب كريم ومننا اللي بيلم الشنط عشان يلحقله مكان حاكم، أصل هنا برضو زحمة أوي.. إنما أنا ببلغك وأقولك أنك مننا.

أنت من الأحرار يا حسني.. :D

المهم يا حسني إن بعد الزمن ده كله جيت أنت وعملت كل اللي نفسنا فيه صدقني..

القضاء على الاستعمار كان أول هدف من أهداف الثورة وأنت عملتها يا حس حس.. قضيت على الاستعمار.. مفيش ولا أجنبي يستنضف يحتل مصر دلوقتي.. طب هيحتل فيها إيه والنبي.

سيبك من اللي بينتقدوك.. دول لو في زمن تاني كنت رمتهم في السجون وخليت صلاح يخلص معاهم كلهم بمجرد ما يفكروا.. هه.. يفكروا يكتبوا حاجة ع الأحرار اللي أنت منهم.. وديني كنت ألبسهم طرح.. إنما عادي يا حسنسن.. أنت ذكي وأنا عارف أنت بتعمل إيه.. أنت بتنيمهم في الدرة يا لئيم عشان تخزوقهم كلهم في الآخر واللي يقولك أي حاجة تقولوا ما أنا سايبهم أهم يشتموا فيا.. مش بقولك

أنت من الأحرار يا حسني :blink:

سيبك من حكاية أن الاستعمار لسة موجود وأنك بتسمع كلام أمريكا والكلام ده.. لأ.. طب ما أمريكا طلبت منك تطلع الواد أيمن.. كنت طلعته.. طب و الله أنا بحبك وبحترم فيك ذكاءك ده.. خليهم يخبطوا دماغهم في الحيط.. أرميلهم عزام.. عديلهم سفن.. ساندهم بتصريح.. يعني من الآخر أرميلهم عضمة.. إنما تسمع كلامهم ده إيه.

أنت من الأحرار يا حسني :blink:

وبما إننا أحرار زي بعض، خليني أفكرك أن تاني حاجة في مبادئ الثورة كانت القضاء على رأس المال.. هيييييييييييه.. دنيا يا حسني..، وأنا أقدر أقولها أنك قضيت على رأس المال بجد.. فيه دلوقتي بطن المال ورجل المال وإيد المال وكبدة المال وسوق المال اللي الواد أحمد جاب فيها في خبطة واحدة بتاع 40 مش عارف إيه.. أصل على أيامنا المليون دي ما كناش نسمع عنها الا في ألف ليلة وليلة فما بالك بالمليار يا حسني.

يا حسني أنت قضيت على رأس المال بجد مش تريقة.. مش أي حد دلوقتي بقى يعمل مشروع.. ده حتى صفقة عمر أفندي بتتفق مع مبادئ الثورة.مش بقولك..

أنت من الأحرار يا حسني :blink:

تيجي بأه للقضاء على الاحتكار فدي ما حدش يتكلم فيها.. أنت قضيت على الاحتكار.. بقى فيه دلوقتي الإستحمار.. وبصراحة أنت عندك ناس بيستحمروا الناس صح.. ده غير أن هما أصلاً حمير.. حمير شغل يعني..، وحمير وطنية.. هو انا ما قلتلكش صحيح.. مش وطنية أتجوزت.. يا دوبك قلتلها أنك بقيت من الأحرار فاتطلقت بعدها على طول.. جوزها العفش رمى عليها اليمين وركب الـ"بي إم" و شرخ.. إنما تعرف بأه أقولك على حاجة..

أنت من الأحرار يا حسني.. :blink:

أي و الله من الأحرار والأحرار جمع حر والدنيا فعلاً حر والحر بيجيب العرق والريحة المعفنة والعرق بيجيب التسلخات والتسلخات اليومين دول خنقة خنقة خنقة.. يعني نستنتج بعد اللفة المعفنة دي أن أنت راجل خنقة.

إنما عادي.. كونك خنقة شيء وكونك من الأحرار شيء تاني خالص.

ما أنا كنت خنقة وأنور كان خنقة.. إنما ده معناه إن إحنا مش أحرار؟.. يا أخي.. ولا بلاش..آخر حاجة بس بتاعة حياة ديمقراطية سليمة..

أي خدمة يا عم لغتلك اتنين عشان الوقت.

أنت من الأحرار يا حسني :blink:

عشان أقمت حياة ديمقراطية سليمة.. لغيت رقم وخليته رقم جديد بنفس الروح.. الناس بدل ما كانت بتحط صح لواحد في ورقة لوحده بقت بتحط صح لنفس الواحد وهو معاه وحايد تانيين.. واللي مش عاجبه يعمل واحد.. قصدي يعني يحاول يبقى واحد.

المهم هو كده خلاص..

أنت من الأحرار يا حسني ...

وإحنا مستنيينك فـ"والنبي" ما تتأخرش..

وحياة ابنك الغالي.. يا شيخ الواد محتاج يشوف مستقبله فتعالى بأه وسيبهاله.. وضربوا مصر على عينها قالت خسرانة خسرانة.

ولو حد وقفك في السكة قل له أنك من الأحرار

ولو طلع عليك كمين قل له أنا من الأحرار

ولو إبليس قالك رايح على فين اغمز له وعدي لأنه راخر من الأحرار..

يا أخي يحرق الأحرار..

أخواتك في الحرية جمال و أنور وباقي الشلة

عنبر 23 حالات خطرة سرير 7

مستشفى البلاء للولادة

منقولة من ايميلي

[نورية]

ياااااااااااااااااااااه يا صبح

اللى كاتب الايميل دة ( جلبه جايد نار)...

و مش قلبه بس.... دى قلوبنا كلنا مليانة

بجد نفسى اشوف مصر بقت احسن... يا ترى احفاد احفاد احفاد احفادى راح يشوفوا اليوم دة؟؟؟