سرقوا احلامى يا رجب - مذكرات عيان

[achnaton]

ستة وعشرين يوما .. قضيتها بين رائحة التخدير .. وسمعاة الطبيب .. وأجهزة البحث الألكترونى .. ثم أخيرامبضع الجراح .. والغيبوبة.. غيبوبة عن العالم اللى حولى .. ولكن لم يستطيعوا تغييب ذاكرتى.. فكنت أحلم وانا مغيب عن الوعى .. وكنت أسبح فى بحور الذكريات .. التى كانت كلها تنبع .. وتصب فى وادى أخضر جميل .. كانت أمى الحبيبة بعلمها الأخضر الجميل ذو الثلاث نجوم تضمنى فى حنان .. وتذكرنى بشريط حياتى .. وجميل ذكرياتى .. وأغرقت فى الضحك الطويل عندما تذكرت الحديث من الذكريات .. والست قشطة اللى أسعدت صديق المحاورات الدكتور رجب .. وأختها زبده اللى إخترتها على كبر .. واصبحت والدكتور رجب عدايل على الورق .. فكرتنى الواقعة بأيام زمان .. قبل ما يسرق أحلامنا الحيتان .. ويستوردوا الفراخ الفاسدة .. ولحم البقر المجنون .. وصعبت على نفسى وسألتها .. راحوا فين الفلاحيين .. فين قمحنا اللى كنا بنطلع زكاته للجيران .. فين كيزان الدرة اللى كنا بنشوى منها اجمل كيزان .. فين اللبن ..والقشطة والزبدة .. وفين الزيت البلدى فى سرجة عم طه السراج .. فين الزيت الحار والطحينة .. فين الرز المعمر .. كل ده راح واختفى مع الدراع القوى اللى كانت تلف الشادوف .. ويو العيد يأكل لوحده خروف .. فين قطن مصر .. والكسب والزيوت .. يا خسارة يامصر يا أم الخير .. سرقوكى اللصوص والنواب والعساكر ..

وعلى سرير المرض خرجت القصة التالية .. عن أحلامى اللى سرقةها .. وغدا أكل لما أطيب .. ويندمل جرحى الكبير .. واسمعو معى .. وقولوا لى رأيكم ..

عسكر وحرامية .. سرقوا احلامى !!

كنت بأحلم من زمان .. إنى حر ..!؟  ومش سجين !!؟؟

كنت بأشرب قهوتى .. سكر زيادة ..  ومش سكريين !!؟؟

ولما فوقت .. لقيت كل ده كانت أحلام

سرقها منى الحيتان .. وأنا لسه تحت العشرين !!

---------------

لقيت البن .. لا يمنى ..ولا برازيلى .. ولا حتى كولمبانى ..!!

وجدته حمص بقشرة محروق .. وعليه تراب السودانى  ..؟؟

مخلوط بريحة بن .. وطبعا مش مستورد

زى زبالة أمريكا .. يا حبيبتى يامصر  يا مغلبانى ..!!

----------------

أكتشف يومها من قريب أنهم ضحكوا عليـــا ..!!

بتاريخ صلاحية مضروب .. مية فى الماية ..؟؟

حتى إرادتى زوروها فى بطاقة الإنتخاب .. وخلوها نعم !!؟.؟

طب أعيش شريف ازاى .. وكل اللى جنبى .. عسكر .. وحرامية !؟

----------------

إنت فاكر يا أخى .. لما قاموا يهتفوا .. العز جالك !!

وقوم يا ولــد .. افتح إيديك .. وغمض عنيك .. جوز عيالك !!

بعنا يومها .. الشرشرة .. والشقرف .. والغبيط ؟؟!!

وسبنا الأرض .. والفلاحة للجيران .. يشحتونا القمح ..واخد بالك ؟؟

( كلمة ولد ستتكرر وهى بكسرة تحت الواو وشدة على اللام .. لذا لزم التنويه )

-----------------------------

رحت يا ولد .. تعمر بلاد الناس .. وتزرع وتبنى ونسيت بلادك ؟!!

ما هو ده صُــح يا ولــد .. فكيف كنت حتربى عيـــالك ؟؟!!

وخير البلد سرقه الأبالسة .. وهربوا بيه خارج البلد ؟!!

نواب ووزرا .. وموظفين كبار .. قواد قدام .. وبوابين بنو قصور من مالك !

---------------------  

طب بعد ما سبت أرضك .. ودارك .. وولادك وهجيت ..؟!!

وجبت المروحة والفديو وتلفزيون ملون .. وبيضت البيت ..!

مين حيزرع لنا القمح عشان نأكل .. وفين اللبن والبيض ؟؟

والله خسارة يا ولد .. بقينا نستورد القشطة والفول وقزايز الزيت !!!!

--------------------  

مين حيخبز لنا يا ولد .. الفطير والبتاو وطاجن الرز المعمر .؟؟

والبت خوخة .. سابت الكفر كله .. وراحت البندر ..!!

فى وظيفة ميرى فى الديوان .. سبت انت فيه المكان خالى ؟؟

قاعدة الوقت على مكتبك .. تقرن البامية وتحضر غدا الأولاد ..يا غضنفر !؟؟؟

------------------

حوش يا ابو سويلم .. دول هدموا الفرن فى الدوار ؟؟!!!

ودبحوا الجاموسة .. وباعوا الغنم كلها لأحمد الجزار ؟؟

أما الفراخ والبط والوز .. اللى كانو فوق السطوح..

فكل ده ويا الأرانب سدد ديونا الكثيرة ومصاريف السفر لعم محمد العطار !

------------------  

هدوا الفرن يا عم أبو سويلم .. وبعتوا ناعسة للجامعة ؟!!!

تاخد شهادة فى الكلام .. خلاص فى شغل البيت مش نانعة ؟!

وطبعا حتسيب تربية العيال  ..للشغالة أو الخدامة

فابعت يا ولدى المصارى .. وحقيد لك فى السيدة شمعة ؟!

-----------------

يا ولد .. عشان تنور لك طريقك ..

وتهديك يا ابن بهانة .. وترجعك بيتك ..

تربى عيالك .. تربية أمك وابوك ليــك

وتزرعوا كلكم أرضكم .. وناكل الشهد من إيديك ..

----------------

وغدا نكمل بأذن الله مع جدى الشيخ حسن

مع حبى للجميع ..

اخناتون  

:inlove:  :inlove:

[ragab2]

ألفين سلامة

عليك من المرض الملعون

لسة فاكر

القشطة والزبدة يا اخناتون

بعد ما قالوا

وفروا الأكل

وشدوا الحزام ع . البطون

لما قلعنا الجلابية

… ولبسنا البنطلون

فين البط

المظغط والكبش أبو قرون

والا الشهد

بدلوه  بكنتالوب مجنون

كان فيه بطيخ

يافاوى يملا العيون

والموز مغربى

منقط بنى وأصفراللون

وسنابل القمح

الجميلة تطحن فى الجرون

فين قطننا

اللى كان بيسدد …  كل الديون

دهب أبيض

وقبل الجمع يدفع فيه عربون

راح فين

الخير اللى من أيام فرعون

ياخسارة

يا مصر ويا مصريون

خيرك لغيرك

والله يكون فى العون

فين الأخلاق

والاخلاص وحياء العيون

الشرف

بقى عملة صعبة والسرقة بالمليون

والمرتشى

يلمع تانى  ويظهر فى التليفزيون

فين الحساب

والعقاب وفين الرقابة  والقانون

والا الشريف

زى الفاسد وكله عند العرب صابون

ولا شاطرين

فى الكلام والخطب بالميكروفون

وكله كلام

فى الهجايص  وضحك ع . الدقون

[achnaton]

شمعة ياِولد .. عشان تنور لك طريقك ..

وتهديك يابن بهانة .. وترجعك بيتك

تربى العيال ..تربية أمك وابوك ليك

وتزرعوا كلكم أرضكم من تانى ..ونأكل الشهد من إيدك

--------------------

هاتوا لى واحد كده ..ايام جدى الشيخ حسن من البلد هاجر ؟!!!

الا عشان الدراسة ..أو كان بالقطن وفى البورصة بيتاجر !! ؟

ورجع الجميع من لندرة ..وبرلين وباريس

نظار مدارس ومهندسين ..عملوا البنوك والمصانع والمدارس وبنوا القناطر

---------------------

جدى حسن ..رحمة الله عليه .. كان بيراعى فدادينه !! ؟

وهو نفسه ساعد فى بنا الكتاب فى الكفر ونور قناديله!!؟

 ويومها كان كل أهل الكفر بيساعدوا فى عمل الطوب !!؟

حتى ابن عمى واخوه  جم من باريس مخصوص ..ومعاهم رسم راسمينه

--------------------

جدى الشيخ حسن - الله يرحمه - ما كانش عمده ..وكان بيزرع كل فدادينه

وعمر بيت العيلة ..ولا الدوار دخله رغيف عيش بمساميره

ورغم أن عمتى " خضرة " كانت بتدرس فى مدارس البندر

كانت تساعد  بهانه وام الخير فى العجين والخبيز وتجهيزه

--------------------

وكانت الحاجة الكبيرة - جدتى - كل يوم قدام الكانون بنفسها ..والطبيخ شغال

بدون شغالة أسيويه تساعد أو بوتاجاز  أو حلة بخار ..ده غير طلبات العيال

اللى عاوز بيضة فى رغيف فى الفرن .. واللى عاوز كوز بطاطا !!؟

كل ده " ستى الكبيرة " بتنفذه .. ومعاها عماتى وخالاتى وبنات الخال

--------------------

كنا نزرع الدرة .. فدادين كتيره ..نمشى فيها ونجمع كيزانه !!؟

نملا الزكايب .. النص للبيع .. وجدى حسن يحضر ميزانه

والنص يتنشر تحت شمس مصر وينشف وتفركه بنات وعيال العيلة

وعلى وابور الطحين ينقلوه للطحين .. رزق فى الأكل من رب العباد سبحانه

--------------------

وغدا بإذن الله .. نكمل حكاية جدى الشيخ حسن اللى حلمت بيها وانا مرضان .. ما كانش تخريف .. ولا أثار البنج .. ولكنه الحنين لماضى حلو جميل أتمنى أن يعود بحداثه أكثر ..

وتحياتى وشكرى للأخ رجب ,الأخ مصرى لتمنياتهم بالشفاء .. ونعمل إيه ..خلاص عجزنا .. وتحياتى وحبى للجميع

أخناتون  :inlove:  :inlove:

[متسائل]

سلامتك يا أخي أخناتون و أتمنى لك الشفاء العاجل بإذن الله.

[freefreer]

ستة وعشرين يوما .. قضيتها بين رائحة التخدير .. وسمعاة الطبيب .. وأجهزة البحث الألكترونى .. ثم أخيرامبضع الجراح .. والغيبوبة.. غيبوبة عن العالم اللى حولى ..

الف مليون سلامة ..  :nervous:

عسى ان تكون بخير الآن عزيزى اخناتون :inlove:

[achnaton]

الأخوة ألأعزاء .. متسائل وفرىفرى

أحمد الله ,اشكر فضله .. وأسأله جل وعلا .. العفو عن كل مريض .. والصحة لكل عليل .. صديقا كان أم عدوا .. وخاصة هؤلاء الذين أصاب المرض ضمائرهم ..

مرة أخرى شكرا لتمنياتكم وأدام عليكم الصحة والرضا

إخناتون  :inlove: