الأسهم المصرية ترتفع لأعلى مستوياتها في شهرين

[المدهش]

الأسهم المصرية ترتفع لأعلى مستوياتها في شهرين

القاهرة 27 يوليو تموز (رويترز) - قال سماسرة إن الأسهم المصرية ارتفعت بشكل عام اليوم الخميس لتبلغ اعلى مستوياتها في شهرين مع عودة المستثمرين الأجانب والخليجيين إلى السوق بقوة.

واسهمت المكاسب المتحققة في اليومين الماضيين في اقناع المستثمرين بأن العنف الدائر في لبنان لن يكون له اثر طويل الأمد على السوق المصرية.

وأضافوا أن قيمة التداول بلغت 1.3 مليار جنيه مصري (230 مليون دولار) وهي الأعلى في عدة أسابيع وتمثل بادرة أخرى على تنامي الثقة في السوق.

وارتفع سهم بنك الأستثمار المجموعة المالية-هيرميس القابضة الأنشط في السوق مع استمرار التكهنات بانها ستستفيد من تحالف مع ابراج كابيتال الإماراتية التي تريد ضخ رأسمال في البنك. وسجل السهم في أحدث تداول عليه 38.60 جنيه بارتفاع بنسبة 6.1 بالمئة.

وقال هاشم غنيم من شركة النور لتداول الاوراق المالية "كان أداء المجموعة المصرية-هيرميس ممتازا لاننا نتوقع المزيد من الانباء فور اتمام الصفقة مع ابراج. اموال أبراج سيجري استثمارها."

وارتفع سهم اوراسكوم للانشاء والصناعة بنسبة 3.7 بالمئة إلى 209.10 جنيه بعد ان أعلنت أمس الأربعاء ان مشروعها الباكستاني للاسمنت يسير حسب الجدول الزمني المقرر له.

وارتفع سهم الشركة المصرية لخدمة الهاتف المحمول (موبينيل) 4.4 بالمئة إلى 142.70 جنيه قبل صدور نتائج أعمالها ربع السنوية في الساعة 1500 بتوقيت جرينتش اليوم.

وقال سماسرة إنهم سمعوا تقديرات عن ان الأرباح الصافية بعد خصم الضرائب ستتراوح بين 321 مليون و337 مليون جنيه بالمقارنة مع 421 مليون جنيه في الفترة نفسها من العام الماضي.

وكانت إعادة توجيه مخصصات الضرائب قد زادت الأرباح بنحو 120 مليون جنيه في الفترة من ابريل نيسان إلى يونيو حزيران في عام 2005.

وارتفع سهم اوراسكوم تليكوم المساهم الأكبر في موبينيل كذلك بنسبة 4.4 بالمئة إلى 273 جنيه.

وأغلق مؤشر هيرميس ?<.HRMS>?‏ القياسي مرتفعا 2.9 في المئة الى 48772.46 نقطة في حين زاد مؤشر التجاري الدولي ?<.CIBC>?‏ الأوسع نطاقا 0.9 في المئة مسجلا 204.87 نقطة. وصعد مؤشر كيس 30 الذي يحظى باهتمام واسع 3.1 في المئة إلى 5558.25 نقطة.

[عطر]

الله يبشرك بالخير

اما انا خسرت خسارة :wub:

[المدهش]

الله يعوض عليكي ..

بصراحة أنا بافكر أدخل في موضوع البورصة وخايف جدا..يا ترى ايه رأيك وتنصحيني بايه؟!

[عطر]

الله يعوض عليكي ..

بصراحة أنا بافكر أدخل في موضوع البورصة وخايف جدا..يا ترى ايه رأيك وتنصحيني بايه؟!

الحق انا اخيب من الخيبة

والله انا اول ما دخلت عملت ارباح 70% طمعت طبعا جدا رحت مزودة راس المال اكتر من الضعف

طبعا كانت هنا الغلطة لأني لما خسرت خسرت الأرباح وجزء كبير من راس المال

كان المفروض اسحب راس مالي الا جزء بسيط اتركه مع الأرباح

لكن اهو ادينا بنتعلم :(

حاول تبدأ بسيط وبلاش تطمع يعني في التأني السلامة

[Horus]

عطر

حد يعمل كده برضه :wub:

وش واحد خبير .... و بيعيط على القرشينات اللى خسرها :mellow:

بالمناسبه يا ساده

أنا أكتر حاجه كانت بتغيظنى .... :)

انى لازم ابعت فاكس للبروكر ... يشترى كذا و يبيع كذا

و استنى كام يوم .....

ولا حس ولا خبر

اكلم سيادته 70 مره

و فيييين لما يرد على ....

و يقوللى انه نفذ نص اللى قولتلله عليه

خدمه زفت بصراحه ;)

انا لما انزل ناوى اغير البروكر ده

حد يعرف شركه محترمه و بتتعامل بطريقه بروفيشنال :angry:

-------------------------------------------------------------------------------------

ما سبق كان استهلالا لابد منه :blink:

السؤال هنا:

انا سمعت انه هيبدا فى مصر تفعيل نظام الاستثمار الشخصى فى البورصه عن طريق النت ....

حد عنده خبر عن الحكايه دى و امتى هتبدأ ??

[Horus]

جيبتلكم المفيد .. B)

إذا كنت تريد الكشف عن رصيدك و / أو معاملاتك فى البورصه

يمكنك ذلك عن طريق الاشتراك مع خدمه مصر للمقاصه

مكانهم فى 70 ش الجمهوريه و التليفون : 5971666

الاستعلام يكون عن طريق التليفون - و ده مجانا - أو النت و ده بإشتراك 100 جنيه فى السنه

أما الشركه اللى بتخلليك تعمل المعاملات - من بيع و شراء - بنفسك

فأنا شوفت اعلان ليهم فى الاهرام ... و كلمتهم ... بس .. واضح انهم لسه فى الاول خالص

موش هاقدر اديكوا تقييم للخدمه ... لان الاجازه خلصت و بالعافيه كنت عرفت المعلومتين دول

روحت اطلع البطاقه الرقم القومى ....

بالمناسبه ... البطاقه العاديه ..... سوف ينتهى التعامل بيها اخر 2006 :unsure:

بعد استيفاء كلللللللللل الاوراق ...... روحت للبيه الموظف

افتكرت انى هاستلم البطاقه اخر النهار و لا حاجه .... :angry2:

البيه بصلى من فوق لتحت .... و قالى انت بقالك كتير بره مصر .....

و قاللى تعالى استلم بعد اسبوعين ..... :D

حاولت افهمه .. ان اجازتى .... كلها اسبوعين......

و عاوز اقضى مصالح كتير

و محتاج البطاقه ضرورى

الراجل الحقيقه كان اخلاق و متعاون جدا

قاللى اسبوعين ما ينقصوش يوم

و ان لو جه حسنى مبارك ... يطلع بطاقه ..... موش هياخدها فى نفس اليوم ;)

و عمار يا مصر

بس و لو ... برضه لسه باحبها B)

تم تعديل 29 أغسطس 2006 بواسطة Horus

[se_ Elsyed]

حورس يابني

إليك الرد

بالمناسبه ... البطاقه العاديه ..... سوف ينتهى التعامل بيها اخر 2006

ضحكوا عليك لإن التعامل بالبطاقة الورقية قد توقف بالفعل وعلى سبيل المثال التكويد في البورصة لا يتم إلا بالرقم القومي

و ان لو جه حسنى مبارك ... يطلع بطاقه ..... موش هياخدها فى نفس اليوم

بيضحك عليك عشان مالكش ضهر .. واللي له ضهر بيخصلها في ثواني يا مان .. إسألني أنا -_-

مدهش

بصراحة أنا بافكر أدخل في موضوع البورصة وخايف جدا..يا ترى ايه رأيك وتنصحيني بايه؟!

إوعى تعملها إذا ماكنتش فاهم وعارف القرد مخبي إبنه فين وإيه اللي بيحصل .. وعلى حد علمي إنت مُقيم في جده .. وبالتالي عايز تبقى بورصجي من منازلهم ... فبلاش يابني أحسن لك وخلي الخطوة دي لما تنزل مصر

انا سمعت انه هيبدا فى مصر تفعيل نظام الاستثمار الشخصى فى البورصه عن طريق النت

أيوه فيه ومنها شركة محترمة إسمها " عربية أون لاين "

والطريقة كالتالي :

أولاً لازم تروح مقر الشركة في أرض الجولف وتملاً نماذج الإشتراك ..

يومين تلاتة وبيبعتوا لك على الميل رقم حسابك في البنك العربي الأفريقي

ما تستغربش .. لإنهم عاملين إتفاقية مع البنك ده ... وبمجرد ما يوصلك رقم الحساب لازم تروح البنك وتودع على الأقل 25 ألف جنيه .. وبعدين تبعت لهم صورة إيصال الإيداع بالفاكس .. يومين تاني وبيوصلك كود التفعيل بتاعك وكمان يوزر نيم وباسوورد ...

تدخل بقى على السايت بتاعهم على النت تلاقي نماذج البيع والشراء الإلكترونية جاهزة ..

في هذه الأثناء لازم يكون عندك إشتراك في أحدى الشركات التي تقدم خدمة بيان أسعار البورصة في الحال وهما إتنين في مصر .

1- شركة مباشر

2- شركة ميست سات

وده بيبقى بإشتراك شهري يتراوح ما بين 50 ج إلى 100 ج

يعني هايبقى قدامك شاشتين :

1- شاشة بتشوف فيها حركة السوق ما بين بيع وشراء وعرض وطلب وتنفيذ وتحليلات للأسهم وحركات وكلام من ده

2- شاشة بتنفذ فيها مع شركة السمسرة وتديهم فيها الأوردر سواء بالبيع أو الشراء

الشراء بياخدوا من حسابك في البنك

البيع بيضيفوا لحسابك

طب إنت راجل متغرب دلوقت وعايز تسحب الفلوس وتخرج من السوق مثلاً ... إزاي هاتسحب الفلوس ؟

الإجابة : ما ينفعش حد غيرك إنت يتعامل مع الحساب ده لإنه حساب خاص بفلوس الأسهم فقط .. وبالتالي إما تعمل توكيل لحد في مصر يسحب من الحساب ده .. أما الإيداع فسهل خالص وممكن كمان تحول عليه من خارج مصر عشان تغذيه

أو الحل الأسهل وهو إنك تفتح حساب عادي توفير أو جاري في العربي الأفريقي وفي على السايت بتاع العربية أون لاين نموذج للتحويل من حساب الأسهم إلى الحساب الجاري أو التوفير ويقدر أي حد من معارفك أو أقرباءك يسحب بكرت الATM اللي إنت معطيه لحد تعرفه أو تصرف عن طريق الشيكات المصرفية

بالمناسبة عمولة الشركة هي 3.5 على كل ألف جنيه بيع أو شراء + 1 في الألف عمولة للبنك اللي بيحفظ لك الفلوس في حالة البيع أو الشراء

عربية أون لاين

أي خدمة

[the sad man]

الاخوة الاعزاء

البورصة هى مقامرة غير محسوبة

غالبا هى معمولة لخسارة الكادحين قروشهم لصالح الاغنياء و رجال الاعمال

نصيحتى الا يدخل البورصة الا كل مغامر

اما من لا يتحلى بروح المغامرة فنصيحتى له الا يفكر فيها ابدا ابدا

ان من غير المغامرين الذين اثر عليهم احد المغامرين فى السعودية لانه لمدة 3 سنوات و الناس بتكسب !! يعنى جت علينا؟؟؟؟

و فعلنا جت علينا و اشتركنا لما كان المؤشر 20000 (عشرين الف نقطه) و طبعا الحمد لله كسبنا نظريا لمدة يومين بعدها ربنا يقكم الشر....

ضاع تعب الغربة و كل يوم نحن فى انتظار التعويض و طبعا من ينظر الى المؤشر الان يعرف كم خسرنا....

اكثر من نصف رأس المال طبعا مع عمولة البنك...

و طبعا انا سحبت البقية الباقية من الفلوس و لم ابلغ زوجتى و اولادى عن مقدار الخسارة بالضبط و لكن قلت لها حوالى عشرة الاف و لكن ربنا وحده و البنك اعلم بمقدارها.....

خلاصة القول:

بلاش البورصة لغير المغامرين و للمنحوسين مثلى

و حياكم الله

و دمتم سالمين

[se_ Elsyed]

الاخوة الاعزاء

البورصة هى مقامرة غير محسوبة

غالبا هى معمولة لخسارة الكادحين قروشهم لصالح الاغنياء و رجال الاعمال

نصيحتى الا يدخل البورصة الا كل مغامر

اما من لا يتحلى بروح المغامرة فنصيحتى له الا يفكر فيها ابدا ابدا

ناس كثيرة وقعت في نفس الغلطة

بس عارف أن سبب ده كله يتلخص في كلمة واحده وهي

" الطمع "

وكمان الهدف

إنت داخل البورصة وشاري أسهم شركة مُعينه ليه ؟

عشان تكسب 100 % ؟

يبقى إنسى وممكن تخسر كل فلوسك

أما إذا كنت داخل بطريقة محسوبة وواضع لنفسك حد مُعين للربح والخسارة .. يبقى هاتكسب ... إزاي ؟

على سبيل المثال .. أنا داخل أشتري 100 سهم لشركة معينة أنا دارس مركزها المالي كويس وعارف إن سهمها سهم قوي .. وسعر السهم هانقول 50 ج ..

يبقى لازم أكون حاطط لنفسي حد أبيع عنده .. حتى لو كان السوق طالع .. فهاقول أنا هابيع عند 53 وبارك الله فيما رزق .. قد يصعد السهم أكثر من ذلك بعد ما أبيع مباشرة .. مش مهم ويجب ألا أندم لإن فلوسي معايا وكسبان كمان

طب في الخسارة بقى ؟

في الظروف العادية لازم أجمد قلبي .. يعني السهم لقيته نازل بعد ما اشتريته وبقى 49 أو 47 لمدة يوم أو يومين وما فيش ظروف سياسية أو أقتصادية تدعو للقلق وتخليني أتسربع وأبيع ... يبقى لازم أستحمل يومين تلاتة لحد السهم ما يطلع يا إما أقول أنا على إستعداد أن أخسر 3 ج في السهم مثلاً بس ألم فلوسي تاني وأحاول مرة أخرى ...

تصوروا بقى إن أكبر فرصة للربح هي الظروف الغير عادية وممكن أي واحد يتحول إلى مليونير في خلال عدة أيام ... طبعاً الكل هايطرطق ودانه ويقول إوعدنا يارب ....

أنا هاضرب مثل بحرب لبنان الأخيرة واللي بدأت تقريباً يوم 11/7/2006.. وأثرت على البورصة المصرية جداً في الأيام الأولى فقط وجعلتها في حالة إرتباك .. وهاخد مثل 3 أسهم قوية في السوق المصري وهي

هيرمس

حديد عز

أوراسكوم تيلكوم

. هيرمس في أول أيام الحرب نزلت وتدهور السهم بشكل كبير إنسياقاً مع الإتجاه العام للبورصة ووصل السهم إلى 24 جنية ... وده رقم قياسي مُدمر للسهم اللي كان قبلها بأيام أكثر من 40 ج وده رقم قليل جداً برضواً لما نعرف إن سعره قبل نكسة شهر مارس الماضي وصل إلى 78 ج

- حديد عز وصل 44 ج من بعد 80

- أوراسكوم وصل 240 ج من بعد التلتميات فما فوق

إذن الشخص المضارب الذكي ينزل في الوقت ده ويشتري على قدر المستطاع وينوع محفتظه بتلك الأسهم القوية .. ولم تمر أيام قليلة جداً تُعد على الأصابع إلا ولقينا في خلال إسبوع الوضع تحسن نتيجة المكاسب التي حققها حزب الله ونتيجة الوساطات الدولية المختلفة لوقف الحرب ... وبقى الوضع كالتالي :

- هيرمس وصل 40 ج

- حديد عز وصل 60

- أوراسكوم تيلكوم وصل 270 وبعدها بأيام كسر الـ 300 ج

يبقى إحسبوها إنتوا وشوفوا الناس المغامرة واللي معاها راس مال مش خايفه عليه كانت ممكن تكسب قد إيه ؟

[nancy]

الحمد لله على سلامتك يا مدهش انت كنت نازل مصر نهائى الشهر دة واضح انك وصلت مصر بالسلامة لان دة اول موضوع اقراءة لك

بالنسبة للبورصة

انا مش مع انك تحط فلوسك فيها .. انما لازم تحط فى اعتبارك شوية حاجات

لو انت معاك الف جنية هى كل ما تملك تحط 300 بس وكل ما تربح تسحب منهم الربح

لحد ما تبقى بتلعب بالربح بس ولازم متفكرش تسحب قبل ما تمر سنة كاملة مش اول ما تخسر

تصفى لان البورصة متقلبة فلازم تحسب اخر السنة

بس لازم تكون مش ناوى تستعمل الفلوس الى حطتها ولا خسرتها توجعك لانها مخاطرة وداخل فيها الحظ بنسبة كبيرة

لانها مش تجارة محسوبة لا دى داخل فيها تجارة وسياسة وحسابات خارج دائرتك كمستثمر صغير

س س الله يخليك عوزين دروس فى البورصة وياريت تركز على (البورصة السعودى)

تم تعديل 29 أغسطس 2006 بواسطة nancy