افكار مغترب سابق

[محمود الشاعر]

1 -اختصار

و الوطن ساعة الرحيل بنختصره فى كوب من الشاي فى مقهى المطار لما يرن النداء الاخير فى ضلوعك على الطيارة اللي وخداك بعيد مبتعرفش ليه بتحس بحتقان شديد وارتفاع فى النبض وبيبقى همك الوحيد تكمل كوب الشاي وتصر على ان الجرسون اتعمد يتأخر علشان يضحك عليك وانت سايب الشاي وتعترف لنفسك انك اتسرقت ودفعت الحساب بزيادة قوي وانت بتلم نفسك فى شنطة و بتمشي للممر البارد هتبص وراك وتلاقي الجرسون بيقدم كبايتك والشاي اللي مكملتوش لواحد اجنبي فتحس بالختم اللي نازل على جواز السفر بالمغادرة نزل على قفاك

2-فراغ

تبقى كداب لو قدرت تحدد التوقيت بالتمام زي ما كنت بتعمل فى البيت اللي شاف لحظة ميلادك الساعة اللي فى ايدك صحيح بتشير لوقت معين لكنه وقت مزيف تقدر تحدد انت فين من الكرة الارضية مجرد انسحاب من الكون والزمن انت موجود لكن مش موجود دليل وجودك الاول هو كوع جارك المغروس فى جنبك وشخيره العالي دليل وجودك الاهم هو عيون المضيفة لما تقع عليك بالغلط فراغ داخلي او خارجي مش مهم المهم انه محيط بيك من كل الجهات احتمال تشغلك جيبة المضيفة القصيرة عن التفكير لبعض الوقت لكن اكيد القبلة المشتعلة فى الشاشة هتخليك تفكر فى ربنا وتخاف ليحاسبك عليها فتغمض عيونك زي ما كنت بتعمل فى لجنة الامتحان لما تشوف رجلين المراقبة علشان ربنا يكرمك وتعدي

3-صهد

خلف الباب صهد واقف فى انتظارك ورطوبة لزجة بدرجة تخليك تلعن اليوم اللي جابك هنا خلف الباب عيون حديد بتفحص كل ذرة فى كيانك يمكن تكون حامل لأفكار ممنوعة عن الحرية والمساوة وغيره من الافكار العبيطة مش قادرين يصدقوا اننا لما دخلنا من باب المطار فى بلدنا سبنا كل حاجة لبياع الروبابيكية ودخلنا بلدهم فاضين

دي بعض الافكار العبيطة اللي كتبتها اثناء الغربة سنة 96

لقيتها امبارح وانا بدور فى وسط الاوراق القديمة معرفش ليه لأقتني بكتبها ليكم دلوقتي

تم تعديل 3 أغسطس 2006 بواسطة محمود الشاعر

[محمود الشاعر]

4-يمكن

يمكن لأن الواحد فينا لما يصرخ كتير بيحس فى لحظة انه لوصرخ محدش هيسمعه أو ان صريخه ملهوش معنى علشان كدة تلقاني لابس عباية صمتي وماشي حاضن صوتي وصورة فى عيني لانسانة جميلة بحبها رغم المسافات والبعد يمكن صورتها غطت على الطريق كله فمشفتش السيارة اللي بترجع للخلف بكل سرعة علشان تخبط سيارتي وتهزني بكل عنف وقسوة زلزلتني بجد لما اصطدم راسي بزجاج بيطير ساعنها حسيت قد ايه انا محتاج لها وقد ايه بخاف عليها فغمضت عيني علشان الزجاج ميجرحهاش وهي فى عيوني فى نفس اللحظة حسيت ان العالم كله اتوحد علشان يخدها مني ولما الشرطة سئلتني عن اللي حصل معرفتشاجاوب وشاورت على بقعة الدم اللي فى قميصي ولما فقت من الصدمة اصريت على ان المحضر لازم تكون كل الخسائر مكتوبة فيه واصريت على اتهامي للطرف الاخر بمحاولة اغتيال ذكرى جميلة وصورة لانسانة بحبها بجد بس للأسف الشديد لما استلمت المحضر وجدته خالي من ذكر خسارتي لأغنية كانت بتغنيها ست عجوزة فى القدس القديمة ليلة ميلاد المسيح وعروسة قماش لطفلة من اطفال بحر البقر وضفيرة لطفلة ضاعت تحت الركام فى قانا وبسملة امي علي لما تلقاني لابس هدوم جديدة وانا رايح أقابلعنيها الطيبة

[nancy]

حلو يا محمود بس اكتر واحدة فرقت معايا صهد

ويمكن... كمان مميزة اوى

لانك دخلت صورتين جو بعض الى بيحصل خارج الجسد مع الى بيكون جوة النفس

ودى حالة بتكون عند كل الناس بس مش بيركبوها سوي ويفكروا فيها انها لنفس الانسان والى لازم يحسها كلها

فى انتظار افكار جديدة قديمة ومركبة :rolleyes:

[محمود الشاعر]

اشكرك جدا يا نانسي

فعلا فى ناس كتير ما بتخدش بالها من الانفعال الداخلي اللي بيثيروا الظروف الخارجية