جهاز العروسه المصريه ؟

[متمردة]

السلام من عند ربى

يا جماعه انا واحده مغتربه من زمان

واختى انشاء الله هتتجوز قريب فى مصر

وعايزة اعرف ايه هيه متطلبات جهاز العروسه المصريه واللى بتتقال فى العاميه ( الشوار )

ايه هيه متطلبات جهاز العروسه المصريه ( بالتفصيل )

الرجاء من السيدات الافاضل اللى عندهم الخبرة الرد

وطبعا ده ما يمنعش من الاباء الكرام اللى زوجوا بناتهم يدلو ببعض الاسعار ؟؟؟؟؟؟؟

تم تغيير العنوان ليعبر عن محتوى الموضوع

تم تعديل 7 سبتمبر 2006 بواسطة عادل أبوزيد

[بنت النيل]

مساالخير اختى متمرده

اولا الف مبروك وربنا يتمم على خير و زواج سعيد باذن الله

شوفى ياستى بالنسبة لجهاز العروسة هو فى حاجات بتتوقف على عادات البلد اللى العروسة منها لان بيختلف فى كل محافظة يعنى مثلا عندك بالاسماعيلة العروسة بتجيب اجهزة المطبخ ذى البوتاجاز والغسالة بعكس بورسعيد لا مفيش الكلام ده .. ده مثال فهمتى قصدى

لكن على العموم راح اساعدك فى الاساسيات فى الشوار اللى اعتقد مافيها اى اختلاف شوفى ياستى :ph34r:

طبعا ملابس العروسة شىء مفروغ منه عليها شراء ملابسها كامله من نوم وبيت وخروج ماشى

وكمان عليها شراء المفروشات ذى اطقم السراير والفوط والمفارش للسفرة وكمان السجاد اتفقنا :D

ده غير اطقم السرفيس والالمونيوم والفخار يعنى ادوات المطبخ كامله

وخدى بالك الستائر على العريس B) :D

ده غير بقى الحاجات اللى بتلزمها فى استعمالتها مثلا المكياج والذى منه ......... كدا اعتقد كل اللى بيلزم العروسة واللى هى ملزمه بيه واعتقد مافى اى اختلاف بين الناس

اما بالنسبة بقى للاسعار وربنا يكون فى العون هقولك على حسب تقديرى والاسعار عندنا

بالنسبة لحاجات الفرش اللى هى اطقم السراير والملايات والفوط يعنى لو فى حدود المعقول تقدرى تقولى حوالى 2000 جنيه

ونقول كمان ذيهم بالنسبة لملابس العروسة وممكن يزيدو 500 بس مش اكتر

لكن حاجات المطبخ والسرفيس قولى حوالى 3000 جنيه

الاسعار دى بالنسبة فى حدود المعقول او اللى المفروض تجيبه وممكن تزيد اذا حبيتى انك تزودى عن الازم

ولو نصيحه ماتجيب غير اللى يلزم فقط لان كله راح يتخزن بالسنين لما تستعمله او اللى استعملته استهلك انا عن نفسى صدقى متجوزه من عشر سنوات ولسه عندى حاجات ما استعملتها لانى كنت اجيب بزياده والله حتى اطقم السراير بداءت من التخزين تخسر وتعمل بطعه صفراء

على فكره انا مش عجوزه لا لا دانا اللى متجوزه صغير هههههههههههههه :D :D

ويارب يهنى عروستنا بحياة سعيدة ويوفقها ويرزقها بالخلف الصالح

[بنت النيل]

ممكن اقولك كمان على حاجات بالتفصيل يعنى مثلا بالنسبة للملابس عندك ملابس النوم

6 قمصان نوم بالروب طقم كامل بالوانات مختلفه دول اساسى وغير كدا الفرادى من القمصان بالونتهم طبعا

من الصيفى والشتوى طبعا وبجامات برده مفيش مانع لهم وقتهم فى الاستعمال

وعندك الفوط بتجيب عدد 12 فوطه وفيهم البرنس الكبير وطقم الحمام معاهم اتفقنا

بالنسبة لحاجات الفرش عندك ياسيتى 6 طقم سرير مطرز ومعاهم طقم السرير الغالى الحرير او المشغول احنا بنقول عليه الطقم الغالى لانه غالى فعلا

وكمان 6 اطقم عادية الملايات العاديه دى للاستعمال العادى لكن المطرز دول للفرش الزينه بس على السرير

وعدد 2 بطنيه واعتقد ماعد حد بيستعمل اللحاف صح بيكفى البطاطين وطبعا بتجيب قماش التنجيد للفرش

اقولك تعرفى طبعا بلد اسمها المحله اهى دى البلد فيها كل مايلزم العروسة من المفروشات وحاجات ايه تجنن واسعارها تجنن اكثر لانها لا تصدق اسعار معقوله جدا بالنسبة للحاجت اللى فيها

بتهيئلى انا كدا طولت عليكى معلش بس حبيت اوضحلك ذى ما طلبتى

واحنا بالخدمة

[dubai 2006]

وما تنسوش السجاجيد يا جماعة دي مهمة قوى

وشوية برفانات على شوية مكياجات على كام جزمة وشنطة

وفى شويى رفايع بلاش تكتر منها علشان لازم تعمل حسابها ان فى ناس كتير حتبقى عايزة تجامل وتهادى فمش لازم تبقى جايبة كل حاجة من الابرة للصاروخ زي ما بيقولوا........علشان تلاقى حاجات الناس ممكن تجيبها لها.

والف الف مبروكككككك....لو لول لول لول لول لللللللللييييييييييييييي

[متمردة]

السلام من عند ربى

شكرا جزيلا جدا على المعلومات القيمه الجميله وسرعه الرد يا اخت فرفوشه واخت دبى

فعلا المعلومات ده مكنتش اعرف حاجات كتير منها

معلش انا عايزة اعرف ايه متطلبات المطبخ كاملة وفى حدود كام ؟

يعنى الحلل و الصوانى و المعلاق وايه كمان

ويا ستى طولى زى ما انت عاوزة بجد معلوماتك قيمه

وشكرا

[النسر المصري]

والله ياست متمرده الموضوع اسهل مما تتخيلي... مش عارف انت معقداها كده ليه... وبعدين هيا فرفوشه هتعرف اكتر من اختك هي محتاجه ايه بالظبط....بس عموما وفي النهايه الف الف مبروك لاختك وربنا يتمم بخير

إلا تعالي قوليلي هنا... ايه حكاية السلام من عند ربي بتاتعك دي... ماتقولي السلام عليكم وخلاص.. هو لازم كل واحد يألف سلام على كيفو (وش واحد غلس عاوز يرزل :D :ph34r:

[بنت النيل]

مساالخير

كيف الحال ياختى متمرده وكيفك يا دبى الله الله على الزغاريط عقبال عندك :ph34r:

شوفى ياستى بالنسبة لحاجات المطبخ

بتجيبى طقم حلل كامل 6 قطع وبيكونو بالتدريج من الكبير للصغير ماشى

والصوانى بتكون 3 او 4 برده مقاسات وياريت يكون معاهم عدد 2 قارب يعنى صوانى مستطيله

وعدد 3 مقلايه مقاسات اتفقنا كل المقاسات بيكون من الكبير الى الصغير :D

وفى عندك كمان طقم حلل للثلاجه دول مهمين فى الاستعمال... و2 مصافى واحده مدورة والتانية اللى لها ارجل من تحت

وكمان عدد 12 ملعقه كبيرة و 12 صغيرة والشوك نفس الشىء كله 12 صغير وكبير

وطقم صوانى للتقديم و12 كبايه للماء و12 كبايه للشاى ولو تعرف تعمل جيلى ومهلبيه ههه B) يبقى هاتى لهم طقم

ومتنسيش طقم الطبخ الملعقه الكبير والمغرفه والمقصوصه عارفاهم طبعا

وهتجيبى بقى اطباق فخار او ميلامين للاستعمال العادى لها فى الاكل اليومى ممكن تجيبى منهم عدد 6 من كل واحد

ومطابق للشربه

وكمان اوعى تنسى فى طقم المعالق والسكاكين اللى فى العلبه دول مخصوص لسفره للضيوف

واحيانا بتحطهم على السفر زينة بس لازم وجودهم

و2 براد للشاى و 2 كانكه للقهوة

وطقم كاسات للعصير وطقم للبهارات والمدقه

ومايمنع وجود اطباق بيركس هتكون حلوة وعملية برده

اعتقد هو ده كل المطبخ

بالنسبة للاسعار مش عارفه اوى لكن لو هتجيبى من مصر هيكون فى حدود 3 او 3 ونص كدا اعتقد

اعتقد دول اهم حاجات للمطبخ الكامل ويارب ما اكون نسيت حاجة

[متمردة]

السلام من عند ربى( وايه يا نسر :huh: ده سلامى وانا قلت وهقول تانى الموضوع ده خاص للنساء من المنتدى الفاضلات او الاباء الذى زوجوا بناتهم فقط وبعدين

ثانيا اسمحليلى يا اخت فرشوشه ابدى اعجابى فعلا بالمعرفك القيمه ده لان احنا مكناش نعرف عنها حاجات كتير نتيجه لظروف كتير بسم الله ما شاء الله عليكى وكمان على سرعه الرد

وعايزة اقوللك ان الكلام اللى انت بتعبعيه باخده واطبعه علشان فعلا نستفيد منه

وسمعاكى بتتكلمى عن بورسعيد انا كمان من بورسعيد وساكنين فى الافرنج

بس سؤالى اشمعنه الستائر اللى على العريس ده من كلامك

وكمان ايه هيه حاجات التنجيد فى ناس بتقول اربع مراتب و10 مخدات و2لحفه , هل الكلام ده صحيح ؟؟؟؟؟

بالنسبه بقى للغرف انت مكلمتيش عنها يعنى كام غرفه وفى حدود كام

وشكرا جدا جدا

معلش وحاجه كمان وايه القائمه وبيكتب فيها ايه ؟؟؟؟

[بنت النيل]

صباح الخير يا اختى متمرده اولا انا تحت امرك ولا داعى للشكر على واجب

شوفى ياستى بالنسبة للستائر عندنا يعنى بعيلتنا اتفقنا بيكون ان الستاير على العريس وناس كتير كدا لانهم بعتبروهم من عفش وكماليات الشقه اللى على العريس وده بيبقى حسب الاتفاق ومافيش مشكلة لو العروسة جبتهم

اما حاجات التنجيد شوفى دول بيبقو على حسب العفش اللى العريس بيجيبه يعنى اليومين دول العريس بيجيب سرير صغير لفرد واحد مع غرفه النوم ده اذا كانت الشقة تسمح بكدا فى الحاله دى بتنجد 3 مراتب كبيره ومرتبه صغيره اما اذا كانت غرفه نوم فقط يبقى التنجيد كالاتى

عدد 4 مراتب وعدد 4 مخدات كبيره والتكاوى الصغيره عدد 8 كفايه اوى لان بتلبس ساعة التنجيد تاكوه واحده من كل طقم اللى هما السته والاتنين التانين عشان تكاوى الطقم الغالى

واللحاف هما دلوقت بيعملو واحد وبيجيبو 2 بطانيه غالين محترمين كدا

وعلى فكره اذا جابت السرير الصغير يبقى هتعملو عدد 2 تاكوه لان طبعا هتجيبى له اطقم سرير (ملايات )

وبتجيبى عدد 2 مفرش سرير اللى هو القطيفه لانه لغايه دلوقت لسه بيعملوه وبيكون حلو فى التنجيد

وكمان بتعمل بقى تكاوى صغيره ( مساند ) للانتريه او الصالون وممكن تعمل للارض بيكونو مربعين هو المنجد بيبقى عارفهم وخدى بالك ان فلوس التنجيد اجره المنجد يعنى على العريس ده معروف :huh:

امابقى بالنسبة للغرف طبعا بتكون على حسب الشقة يعنى مثلا لو ثلاث غرف فى ناس بتتفق ان العريس بيجيب غرفتين (النوم _ والسفره ) والعروسة بتجيب الصالون او الانتريه

ده اذا حبت العروسة ومقدرتها تساعد لكن مش شرط عليها

اما اذا كانت غرفتين فبيبقو على العريس طبعا وحسب ما العروسة تقول نوم وسفره او نوم وصالون

بخصوص بقى القائمه دى بقى ياستى بتتكتب كالاتى

اولا بتتكتب باسم ام العروسه او اسم الاب ده ضرورى والا لو باسم العروسة تبقى ذى قلتها

وبتكتبى فيها كالاتى

اولا حاجه الفرش كلها المراتب والمخدات والاطقم الغاليه بعددها كلها ماشى

ثانيا اكتبى من الفخار الطقم السرفيس الغالى بس

وبتكتبى فيها غرفه النوم بمواصفاتها كامله يعنى ( غرفه نوم موديل كذا مكونه من 2كمدينو وتسريحه وشفونيره ودولاب وسرير ) ومن الافضل كمان وضرورى يسجل تمنها )

واذا كانت العروسه جايبه اى غرفه من العفش برده تتكتب بنفس الطريقه وتمنها

بس كدا ياستى وكمان خدى بالك ضرورى ان الحاجات دى كلها بتتكتب على سبيل انها امانه عند فلان اللى هو العريس

واللى مكتوبه باسمه اللى هى الام او الاب من حقه مطالبته بيها فى اى وقت كان وكمان ضرورى ضرورى بعد ما يمضى عليها العريس

تسجليها فى الشهر العقارى ببورسعيد

كدا انا طولت اوى صح بس معلش انتى قولتى بالتفصيل

[ياسر ابو احمد]

انا ماكنتش عاوز ادخل في الموضوع لانها حاجات ستاتي .. بس انا شايف ان النيه مش كويسه ناحية (اخونا في الجهاد) العريس .. ايه الحكايه .. انتوا حتسلموه لحماته ولا ايه .. ارد ولا ماردش .. ده الراجل نيته خير ..

[بنت النيل]

شوف يا اخ ابو احمد

طبعا الزواج بيكون على نيه الخير والنيه الحسنة ماقلناش حاجه

بس برده ضمان الحق مافى منه زعل ولا مشكلة

وادينا بشوف حالات من السيدات واللى بحصلها وصدقنى والله كلامى ده مش الهوى ولكن عن تجارب لصديقات وبنات اعرفها شخصيا

الاب يقولك دانا مأنه على بنتى يبقى مش هأنه على شوية حاجات وهو ده الغلط الكبير اللى بعض الناس بتقع فيه

احنافى زمن لازم الواحد يعمل كدا

صحيح النيه الطيبه موجوده وحسن النيه والاخلاص لكن برده لا يمنع وجود ضمان الحق

يا اخ ابواحمد هاليومين النفوس بتتغير بين يوم وليلة

وربنا يسعد كل المسلمين ومايجب لهم اى شىء وحش

[متمردة]

بجد مش عارفه اقول ايه

مرسى جدا جدا جدا اخت فرفوشه

والله كلنا انا وماما واختى بنستنى معلوماتك الجميله والقيمه جدا

وبالنسبه للاخ ابو احمد كنت عايزة اقوللك

الحاجات اللى احنا بكتبها ده على العروسه والعروسه بتجبها

وحضرتك طبعا عارف ان عائله العريس الجديده لما تدخل على عائله العروسه الجديده

تبقى مجال كبير جدا جدا من النقد يعنى مثلا :

1-ايه ده اللى عائله العروسه جيباه ده ؟ مكانوش يعرفوا يجبوا

2- بقى اهلها نازلين من الخليج ومش عارفين يجبوا

3- ده العيله ده بخيله

4- ايه ده دول ميعرفوش سرو البلد

وغير كده من كلام كتير ممكن يؤدى الى مشاكل كبيرة بعدين

مش كده ولا ايه ؟؟؟؟؟؟

[بنت النيل]

السلام عليكم

العفو يااخت متمرده لا شكر على واجب والعروسة ذى اختى

وربنا يسعدها ويوفقها يارب بحياتها ويتمم على خير

ابقو اعزمونا بالفرح :wub: :huh:

واى شىء تحتاجيه فى اى وقت انا تحت امرك ولا تترددى فى طلبه بجد ومش مجرد كلام

والله ولو تحبى انزل اشتريك من هنا اى شىء تحتاجيه برده مفيش مشكلة كلنا اخوات عادى والله

وسلامى للست الوالده والف مبروك للعروسة

[ياسر ابو احمد]

السلام عليكم .. يا ستى ربنا يتمم بخير ..

اصل موضوع الجواز ده عباره عن شراكه بين طرفين .. اتفقوا بعد عدة لقاءات وتعارف على الخطوط العريضه التي يمكن ان تعطيهم الضوء الاخضر لبدء الارتباط .. سواء كانت عقلانيه ام عاطفيه .. المهم انهم اتفقوا على بدء اول خطوه في الطريق ..

وفي هذه الحاله يكون كل من الطرفين لديه حساسيه عاليه شويه .. وخصوصاً الاهل .. شئ طبيعي ..

ودايماً الاهل هم اللي عنيهم رايحه جايه على ما يفعله كل من الطرفين .. ودايماً لازم نصايح من فوق الترابيزه او من تحتها ..

المهم ان العروسين في النهايه هم القادرين بإذن الله على كسر هذه الحواجز والوصول بالاهل الى بر الامان .. وذلك في حال انهم فعلاً اتفقا على الارتباط ..

ومش حطول اكتر من كده.. ربنا يتمم على خير .. وربنا يوفق الاهل والعروسين في كل مراحل تأثيث منزل الزوجيه ..

ونفسي تتغير فكرة ان اللي جايين من الخليج لازم يبقى معاهم فلوس كتير .. انا مش عايز اقول اني لمّا نزلت مصر في الاجازه جالي احباط .. وحسيت احساس اكيد ان اللي في الخليج هم المطحونين مش اللي قاعدين في مصر .. :wub:

المهم .. ياريت تعملوا الفرح في الصيف .. علشان نشاركم الفرحه ان شاء الله ... وو

وربنا يجعله عامر :angry2:

[سمـ مصر ــا]

الف مبروك يامتمرة لأختك وربنا يتمم بخير

وعايزة أقولك يافرفوشة أن معلوماتك جميلة

فأول مرة أعرف أن القايمة بتتكتب بأسم أم العروسة وتتسجل فى الشهر العقارى

تانى ببارك للعروسة وربنا يتمم لها بخير

[otaka]

انا نفسى اعرف مين الرايق ابن الرايق اللى قعد زمان و عمل التفنيطه دى

و نفسى اعرف امتى هنتخلص منها

دى بتخلق مشاكل ملهاش اول من اخر

ده الواحد علشان يخلص دول لازم يزور الاخ سيد سيد الحبشى و محمد سيد الحبشى و كل الاخوه المثمنين القضائيين

انا عن نفسى و لا هعمل الى حاجه من دول على المتضرر اللجوء للقضاء

[بنت الشاطئ1]

السلام عليكم

اعتقد انه فى ظل قانون الخلع اصبحت القائمة ليس لها اهمية كبيرة

فمثلا اذا نشب الخلاف بين الزوجين وطلبت الزوجة الطلاق فمعنى هذا انها لابد من اخذ حقوقها

ولكن يمكن للزوج ان يتركها معلقة حتى تطلب هى الخلع وتتنازل عن حقها حتى تسترد حريتها

اذن فما فائدة المليون جنيه الذى يطلبهم والد العروسه من العريس كوصل امانه او شيكات ويوم ان يريد ان يتركها فيريها النجوم فى عز الظهر كما يقولون حتى تتنازل عن هذا كله فى سبيل ان يطلقها

فماذا ترون

[بنت النيل]

الاخت العزيزوة بنت الشاطى

بالنسبه لموضوع القايمه لو لاحظتى فى كلامى اننى اكدت على ان تكون القايمه باسم ام العروسة او الاب او اى شخص من العائلة والمهم الا تكون باسم العروسة

وفى حاله لسمح الله حصل الخلاف ولجأت الزوجة الى الخلع لا يكون له الحق فى اى شىء يخص القايمه لانها ليس باسم الزوجة فبتالى ليس لها علاقه بالموضوع دى بقى بتكون قاضية تانية وفى نفس الوقت لايستطيع الزوج عمل شىء لان كل اللى فى القايمه مكتوب انه عنده على سبيل امانه وهو مقر على ذلك ومن حق صاحبها مطالبته بها فى اى وقت

اما حكايه وصل امانه وشيكات دى مش سليمه ولا تكون مستحبه فى التعامل بين الزوجين والعائلة لانهابتحسب على عدم امانه او ثقه وتختلف تماما عن القايمه كل الناس عارفه ان القايمه حق الزوجة لان لا يكتب فيها سوى حقها الشرعى

ارجو ان يكون قصدى واضح لكن شيك ووصل امانه دى تبقى صفقه مش جواز

وعلى فكره موضوع الطلاق او الخلع بقى دلوقت سهل الحصول عليه اذا استطاعت الزوجة اثبات انه لايستحيل العشرة بينهم فبتحصل على الطلاق صحيح ممكن تاخد لها سنة او اتنين للحصول على الطلاق ولكنها بتفضل ذلك عن الخلع طلما قضية الطلاق مضمونه لها

اوريها النجوم فى عز الظهر ده خلاص قل كتير عن زمان

وربنا يوفق كل الزوجات المسلمين والمؤمنين والمؤمنات

[بنت الشاطئ1]

ماشاء الله على الذكاء

انا مع انى متزوجة ولكنى اول مرة اسمع بهذا الكلام

وانا فعلا قرأت مداخلتك التى قلتى فيها ان القايمة تكون باسم ام الزوجة او الزوج لكن لم افهم ما السبب

على فكرة ما قلته سابقا حصل مع احدى صديقاتى واضطرت الى رفع دعوى بالخلع وتنازلت عن كل حقوقها

ولكن يا عزيزتى تقولين ان وصل الامانه والشيكات تشعر بعدم الثقة اليس موضوع القايمه ان تكون باسم الام او الاب اليس هذا يعد غريبا او يعتبر نوع من التخوف وعدم الثقة ايضا

وكيف يطلب الولى هذا الطلب من زوج ابنته

ولكى جزيل الشكر على المعلومات القيمة

ولكن هل هذا الموضوع متعارف عليه فى مدينتكم مثلا اقصد هل هو وضع عادى غير شاذ

[ahm_ali_baba]

السلام من عند ربى

يا جماعه انا واحده مغتربه من زمان

واختى انشاء الله هتتجوز قريب فى مصر

وعايزة اعرف ايه هيه متطلبات جهاز العروسه المصريه واللى بتتقال فى العاميه ( الشوار )

ايه هيه متطلبات جهاز العروسه المصريه ( بالتفصيل )

الرجاء من السيدات الافاضل اللى عندهم الخبرة الرد

وطبعا ده ما يمنعش من الاباء الكرام اللى زوجوا بناتهم يدلو ببعض الاسعار ؟؟؟؟؟؟؟

هذة هى متطلبات جهاز العروس بالتفصيل الممل

حصيرة

قله

ستارة

فهذا هو ما حددة الشرع لبيت الطاعه اى بيت الزوجيه

قد نضيف على ماسبق لو كانت الزوجه غير متعلمه وتريد الاستفادة من علام الزوج نزيد على ماسبق

كراسه

وقلم

ومرايه

وشريط الاستاذ قمحاوى

:lol:

يعنى يا اخت متمردة تختفى وتغيبى عنا ولم ترجعى تحضرى معاك موضوع اختلف فيه عباد الرحمن من ايام مرضعه نفرتيتى

:lol:

الزواج هو انشاء اسرة وانجاب اطفال صالحين ... ولو خونت الزوجه زوجها وافترضت فيه تلك الافتراضات الشاذة قبل ها الزواج ..... قلماذا نتزوج ... خللى كل واحد فى بيت ابوة وامه ونتزوج زواج المسيار الوهابى .... الزوج يحضر للزوجه فى بيت ابوها مساء كل يوم خميس يلعب معاها عروستى ويروح لحال سبيله

ويسلام لو الاب يكون عندة شويه دم ويروح السيما مع امها حفله من 6 الى 6 وعشر دقائق ... فترة معقوله فى الزمن الاغبر دا قبل العروسه ما تطمع فى محفظه العريس

:D

يعنى الراجل يتغرب ويتبهدل ويستحمل غلاسه اللى يسوى واللى مايسواش وياكل التراب ليشترى شقه وعفش يريحوا ست الحسن زوجته المستقبليه ويجعلها تعيش فى جنته التى رزقه الله بها ..... ليفاجأ بطمع زوجته فى الوراثه منه وهو حى وقبل ان تضمهما عش الزوجيه

بصراحه وبدون زعل

ملعون دى جوازة

وملعون دى عروسه

تم تعديل 4 سبتمبر 2006 بواسطة ahm_ali_baba