سؤال للسادة الرجال

[سمـ مصر ــا]

يقول الشاعر العربى ;)

أنا خلاص حتجوز وأبطل أبص على البنات mfb:

وحظبط نفسى وأبطل أقضيها إشتغلات :D

وحكبر دماغى :wub:

ومعنتش حلاغى -_-

ولا عمرى مرة

حبص برة

وأبص لغيرها لية :huh:

أصبروا لسة السؤال مجاش

خلاصة كلام الشاعر العظيم دة أن الزواج هوة النهاية النى سيتوقف عندها حركاتة القديمة

وحيعقل ويركز ( صح )

السؤال

هوة لية الراجل يحب بيبص لبرة mfb: حتى لو كانت زوجتة أحلى الف مرة :o

يعنى تلاقى الراجل ماشى جنب المدام وعينة بردة فى رحلة بحثية كأنة يبحث عن شئ مفقود

ممكن نستعرض الموضوع من وجهة نظركم أيها الرجال بصراحة

تم تعديل 12 أغسطس 2006 بواسطة سمـ مصر ــا

[last_Samurai]

السلام عليكم

والله يا اخت سما مش كل الرجال ولكن البعض منهم والسبب الاكيد لانه مش مرتاح مع مراته وخلى بالك ان الجمال مش كل حاجه

[ياسر ابو احمد]

آآآآآآآه ... ايه يا سما .. ليه كدا يا بنتي ... :wub:

ضربتي سهم في الصميم .. الاجابه صعبه قوي على السؤال ده ... لانها تحتوي على الصح والخطأ والثواب والعقاب .. وعلشان الواحد يفضفض .. لازم ينام على الشيزلونج .. ويقول آه ... ويبعبع بقى ..

انا مستعد اقول وجهة نظري .. لكن بيني وبينك .. هل الرجاله بس اللي عينهم زايغه .. يعني مفيش ستات عينهم زايغه..خالص ؟؟!!

على العموم انا حلخلصلك الموضوع كله في جملتين مؤقتاً ...

انا حتكلم على الرجاله المتجوزيين ...

الراجل ربنا اداله الحق في الزواج بأربعه في نفس الوقت... صح .. وده لاسباب كثيره نعلم منها القليل ويعلم الله منها الكثير .. والبنت لا يحق لها الزواج الا من رجل واحد في نفس الوقت.. صح .. وده لنفس الاسباب ..

نيجي بقى للراجل اللي عينه زايغه زي ما سعادتك بتقولي .. ده بفرض ان فيه رجاله اصلاً عينهم زايغه :o ... الحمد لله كلهم محترمين .. لمّا الراجل يكون ماشي لا له ولا عليه وفجأه يحس انه في مجال مغناطيسي شديد جرفه ناحية واحدة تانيه .. فمن حقه انه يتقدم للزواج بها مع عدم اي مانع في وجود زوجته الاولى .. لأن ده مش حرام كما اسلفت .. بغض النظر عن الظروف والملابسات .. انا بتكلم عن الخطوط العريضه وليس التفاصيل ...

لكن لمّا الست تكون متزوجه فلا يحق لها اصلاً ان تتزوج رجلاً آخر وبالتالي فالمرأه المتزوجه لا تزوغ عينها على رجل آخر .. وتستبدل هذا بالاكياس البلاستيك .. والله اعلم ... ;)

وربنا .. ربنا يجعله عامر ان شاء الله mfb: mfb:

[سمـ مصر ــا]

وعليكم السلام last_Samurai

والله يا اخت سما مش كل الرجال ولكن البعض منهم والسبب الاكيد لانه مش مرتاح مع مراته وخلى بالك ان الجمال مش كل حاجه

]

حضرتك بتقول مش كل الرجالة لكن البعض منهم ممكن رأى حضرتك صح لكن أنا مختلفة معاك فى السبب

لان عدم الراحة مع الزوجة لا يعطية الحق فى أن عنية تكون زايغة ولاة اية رأيك؟

أبو أحمد منور بصراحتك الحلوة

الشيزلونج حطتهولك وجنبة مقطوعة من أغانى الحنان للمطرب الفنان شعبولا علشان تعرف تفضفض كويس

لمّا الراجل يكون ماشي لا له ولا عليه وفجأه يحس انه في مجال مغناطيسي شديد جرفه ناحية واحدة تانيه .. فمن حقه انه يتقدم للزواج بها مع عدم اي مانع في وجود زوجته الاولى .. لأن ده مش حرام كما اسلفت .. بغض النظر عن الظروف والملابسات .. انا بتكلم عن الخطوط العريضه وليس التفاصيل ...

مش ممكن أن أى رجل يطلب الزواج من أنسانة ما لمجرد أن وهوة ماشى لطشة مجالها المغناطيسى

المجال دة عايز وقت وحكايات وروايات ودة مش سؤالى أنا سؤالى عن الراجل الظريف الذى يمشى وعنية رادار ماسح المكان

وحنلاقى معانا هنا فى المنتدى أقلام وصفت الحالة الرجولية الرادرية

زى أخونا أحمد عمر لما كتب فى باب أدب وشعر عم البنطلون الجينز قال

آه منه ومن بلاويه

آه من شكله واللي عليه

مثير مشاكل .... مثير هياكل

أسير أنا يا ناس معاليه ؟!

وربنا يجعلة عامر بإذن الله يا أبو أحمد

[نانو]

و الله يا جماعه انا شايفه الموضوع بشكل تاني خالص

ان الله جميل يحب الجمال يعني من حق كل واحد يتمتع بالجمال اللي بيلاقيه في خلقته طب هيعمل ايه يعني

ده انا اوقات ببقي ماشيه جنب جوزي و الاقي بنت حلوه بقوله بص القمر اللي هناك ده

بجد والله او لو عجبني حاجه في شكلها او لبسها اقوله بص شيك ازاي

ايه المشكله هو انا كمان هامسك عينه مش كفايه ماسكه روحه

و بعدين هو لوبص علي واحده في الشارع هيجري يجوزها يعني لا طبعا اهو بيتفرج وخلاص

و بعدين اشمعني الستات بتقعد جنب جوزها ساعتين تتفرج علي فيلم و اكيد فيه ستات حلوه و مش بتتضايق

و بتبقي سعيده هي هي بالضبط

و بعدين احلي حاجه في الحب الحريه

اديله حريه يديلك حنان صدقيني

اكتر حاجه تاسري بيها الراجل الحريه

و صدقيني لو عايز يخونك او يتجوز عليك هيعملها هيعملها

و لو مش ممكن يعملها تبقي انت الكسبانه لانك عرفتي تسعديه وتسعدي نفسك

و ربنا يهدي الجميع

و بحبك يا بلدي

[ياسر ابو احمد]

يا سلام عليكي .. يا سما .. دايما تحرجيني كده ... -_-

شوفي يا ستي .. اولا عايز الفت انتباهك اني قلت .. انا بتكلم عن الخطوط العريضه وليس التفاصيل ... والمعنى في بطن الشاعر .. يعني للقارئ الحريه في تحديد ماآلت اليه امور الإنجذاب العاطفي المغناطيسي .. من بارفانات وموضه ..وما تبعه من لقاءات ونظرات وخلافه .. وبرضه لن اشرح التفاصيل .. لإنها قد تطول .. وعايزك تفكري معايا ..

لمّا حضرتك تكوني معزومه على حفل زفاف احدى صديقاتك او واحده من أقربائها.. وها انتي تدخلين على القاعه التي تعج بالضيوف الافاضل .. ماذا يلفت انتباهك .. طبعاً المعازيم .. (العروسه مش محور كلامي الان) .. وايه اللي ممكن يلتفت نظر الانسان في المعازيم .. الشكل العام او المظهر العام .. الانطباع الاول .. من اناقة وشياكه و ذوق عام في اختيار الالوان .. وكذلك الجديد من فنون المكياج والوان الشعر ... اليس هذا صحيحاً.. وفي الحاله دي .. مين اللي نظره رايح جاي .. طبعاً كلاً من الراجل والست حرمه .. وكل واحد فيهم بيفكر في نفسه وفي من بالجوار ..

فشيطان الرجل يقول: ياسلام يابو الشباب لو الريح رمتك على الكرسي اللي هناك ده .. ايه الشياكه والجمال ده .. وايه القوام ده .. تمام ذي الكتاب (كتاب الرشاقه ص124 ايروبك) ما بيقول .. بس لو مراتي تهتم شويه .. مش كان زمانها زي دي .. ثم يلتفت الى زوجته وإذ يفاجأ بها :ph34r: :excl:

ههههه .. (جوزها) الحقيقه الجو العام للفرح حلو جداً الليله دي ياحياتي .. :angry2: :angry2: ... تاكسي ..

(أرجو ألا اكون قد خرجت عن الموضوع بهذه القصه القصيره.. حبيت أضيف عليه شئ من الدعابه .. حتى لا اكون جاد زياده عن اللزوم ....)

ارجع تاني واقول ان الانسان هو السبب الرئيس في لفت انتباه الاخرين .. يعني الراجل مش ممكن يكون ماشي في الشارع راسه رايحه جايه زي البندول الا اذا كان هناك من يستفزه بشئ خارج عن المألوف .. والشئ الخارج ده هو ما يرتديه الرجل او البنت في كل مكان سواء في العمل او الشارع او الكليه .. أو أو ..

وتكون نظرته للمظهر العام .. لانه بالتأكيد ما يعرفش اصل الشخصيه .. إلا إذا كان بعد ذلك نظره فابتسامه فموعد فلقاء ..

كانت هناك في الماضي اصول في كل شئ .. في الملبس و المأكل والمشرب .. وهكذا .. وكان لكل مقام مقال .. حاولي تركزي مره على الحضور في اي حفله لأم كلثوم .. تلاقي الناس غايه في الاناقه .. السيدات ترتدي السواريه او ما شابه .. والرجال ترتدي الاسموكن او ما شابه .. ولا يمكن بأي حال ان يذهب الرجل او السيده بنفس اللبس الى العمل صباحاً وده لأنه عيب .. لكن مادمنا في عصر التيك اواي والكجوال .. تلاقي الناس بتحضر الحفلات بالشورت والبنات بتضحك على نفسها وتسمي الايشارب حجاب والبنطلونات الاسترتش التي تصرخ من التضخم .. وركود عام وانحسار في الجيبات ..

اليس هذا استفزاز .. الا تستفزك هذه المناظر .. والله يمسيه بكل شر .. نابليون .. عندما قال فتش عن المراه ...

انتوا اللي تعملوها وعايزنا نقع فيها وكمـــــــــــــــــــــــــــــان مش عاجبكم ... ياساتر ايه الحقد ده ..

بس .. وخلتيني اطول في الكلام .. ولا انام .. وسوف اتأخر على الدوام .. ومن ثَم سوف أُلام ... وسلام ...

وبرضه .. يجعله عامر ان شاء الله -_- -_-

نسيت .. قبل ما واحد يقولي .. مش كل الناس .. ايوه مش كل الناس فيه شرفاء كتير وهمه دول املنا في مستقبل اولادنا او احفادنا ان شاء الله ..

تم تعديل 14 أغسطس 2006 بواسطة ياسر ابو احمد

[nancy]

شوفى يا سما حكاية العين الزايغة دى عوزة وقفة

يعنى بيكون لة اسباب وحدود

الاسباب اما من داخل العين فى المخ يعنى او من خارج العين يعنى المتحرك فى منظور الرؤيا

على بلاطة الراجل ممكن بيحب يبص ودة عادى لان كل راجل عندة محدد جمالى بيكون فى جزء معين فى المرأه فطول مهو ماشى نازل تقيم

بس فية راجل يقيم وبس وفية الى يتمعن وفية الى يتحصر وفية الى يتمنى يعنى الموضوع مراتب مختلفة من شخص لاخر

وبعدين فى بنات وستات لازم تبصى حتى لو انت ست مش راجل اما بسبب غرابة اللبس او المكياج او التسريحة

او من كتر الجمال المبهر الحقيقى الى من غير اضافات

وحكاية ان الستات كمان بتبص انا مش مع الراى دة لان الست الى بيجزبها للراجل زوقة او اسلوبة فى الحوار والتعامل او ثقافتة او خفة دمة انما ان راجل معدى فالست تبص دة مش بيحصل

لان الراجل اعجابة مادى بحت انما الست اعجابها فى الغالب معنوى وبامور جوهرية ....مش عموما طبعا

وبعدين الراجل الى مراتة مش مهتمة بنفسها ومهملة وصوتها عالى وكشرية وعصبية يبقى كويس لوجوزها اكتفى بزواغان العين وتحمد ربنا اوى على كدة

والخلاصة ان الراجل عينة زايغة مهما كان سنة بس النسب مختلفة ودة امر واقع مش محتاج زعل :ph34r:

[سمـ مصر ــا]

نانو

واضح انك عقلك كبير

ولذيذة انتى والله يانانو

وحلو أسلوب خلية يتفرج هوة أنا حمسك عنية مش كفاية روحة

وحلوة الحرية لكن فى الحالة دى فين الغيرة غيرة المرأة على الرجل ؟

أبو أحمد

أحلى حاجة ضحكتنى قوى وصفك لشيطان الرجل

وأنا معاك أن الوضع المتردى فى الشارع فى المظهر العام والذوق العام أصبح شئ فوق الوصف

ولكن هل يكفى ماتلبسة البعض أن يكون سبب فى بندولية رأس الرجل فى الشارع

ونقطة تانية بالنسبة للبس

أصبحنا نرى فى الشوارع من موديلادت غريبة لها العجب مع الوان عجيبة

هل البنت فقط هية من أساءت اختيار اللبس ولاة ورا ذلك تقصير من الأهل ؟

نانسى

انتى جبتى المفيد

والخلاصة ان الراجل عينة زايغة مهما كان سنة بس النسب مختلفة ودة امر واقع مش محتاج زعل

فعلا الملاحظ أن الرجل فى العموم لة نظرة رادارية :ph34r:

تم تعديل 13 أغسطس 2006 بواسطة سمـ مصر ــا

[Tafshan]

اممم :ph34r:

عقلي الباطن : جينا للمواضيع اللى بتودى في داهية

احتار العلماء في تفسير تلك الظاهرة .. ارجعها البعض للسلوك البدائى الطبيعي الذى يمثل عموم الازواج نظراً لطبيعتهم الاقل تعقيداً و طيبتهم الجمه -_- .. فتجدهم بصورة تلقائية منجذبين الى ما خلق الله من خيرات الطبيعة متفكريين في حكمة توزيعها على خلقه :angry2: و كيف ان الخالق قد استأثر على عباد من خلقه بجمال "تيك اواي" معروض على الجميع لا ينفرد به شخص واحد :angry2: بينما خص عباداً بجمال خفى لا يتمتع به الا شخص واحد الا و هو الزوج .. ففيم العجب ؟؟ كلاهما من خيرات الله سواءً كان من النوع العام المتاح فقط للمشاهدة او من النوع الخاص الذى يستحق ان يخبأه في صدره و يعيش معه ما تبقى من عمره ..

في النهاية .. غض البصر من حسن خلق :excl:

طفشان الحدق

مدرس اعدادى

[ياسر ابو احمد]

عندما قرأت بعض الردود .. أخذت فترة للتأمل في الموضوع .. وسألت نفسي هل فعلاً الاخوات اللاتي رددن على الطرح .. كان عندهم حق .. هل الرجاله فعلاً عينهم زايغه يمين وشمال بداعي او بدون ..

والحقيقه حضرني مشهد (برضه حقيقي) عندما ماتت الاميره ديانا في حادث المنصه .. قصدي النفق .. وقامت الدنيا .. واتهم جميع من له علاقه بالامر ومن هم غير ذلك .. الصحفيين .. نعم .. وكانت الطامه الكبرى (التي لم يعووها آن ذاك) أن ممثلين هوليوود قد شاركوا هم ايضاً في اتهام الصحفيين .. ماذا حدث ؟؟!!

اتفق الاخوه الصحفيين على ألا يلتقطوا اية صوره للمثلين الذين قاموا باتهامهم من قبل .. وكان هذا من حظ (او من سوء حظ) الممثل ارنولد شوارزينجر على ما اعتقد .. في افتتاح فيلمه الجديد .. ذهب الصحفيون وكل يحمل كاميرته .. وعندما انتهى العرض حيّا الممثل الجمهور الغفير .. وهَّم بالخروج ليلاقي الصحافة ووسائل الاعلام والفلاشات والاضواء وخلافه .. ولكنه وجد الاخوة الصحفيون وقد وضعوا كاميراتهم على الارض في مشهد مهيب .. يمكن ان يتذكره البعض في حينه .. ولا اضواء ولا كاميرات ولا خلافه .. وصدقوني انا من مكاني هنا احسست بمدى الالم والندم الذي عاناه النجم في هذا الموقف والذي تجرد فيه من شئ مهم جدا .. الا وهو تقدير الجمهور المميز ..

المهم == مش عارف ليه كل ما انوي اكتب سطرين ثلاثه الاقيني باكتب الالفيه الخامسه ==

المهم قصدت ان اقول ان المرأه .. ويا لها من مخلوقه أنعم الله بها علينا كي نستأنس بها ونسعد بصحبتها في السراء وتشد من ازرنا في الضراء ... دائماً تبحث عن كل ما هو يذيد من جمالها وشياكتها واناقتها في فترة الشباب وبعد الجواز بسنتين ثلاثه .. خصوصاً لمّا ربنا يرزقها بالذريه الصالحه (ان شاء الله) .. وفي تلك الفتره لابد من وجود من هم يقدرون ذلك الجمال وتلك الاناقه .. الكاميرات والفلاشات والبريق الذي يطل من عيون الناس .. وان لم يفعلوا ففي نهاية القصه سالفة الذكر .. المعنى المقصود..

تاني .. عمركم شفتم واحده ممن هن في مرحلة الشباب .. واحد بيعاكسها .. وبيقولها .. بسم الله ما شاء الله .. تبارك الله فيما خلق .. :blink: ترد عليه وتقوله .. والنبي يابني اصل انت اللي نفسك حلوه شويه .. :blink: :huh:

انا لمّا اشوف بنتي الصغيره = ثلاث سنوات= وهي بتلبس وتنقي الالوان وبعدين تدور على الشنطه علشان تعلقها على كتفها .. وتتخانق مع مامتها علشان تعملّها التسريحه اللي هي عايزاها .. وبعد ما تخلص لبس تيجي جري عليّ .. وتقول تاتاتاتاااااه .. علشان انا بدوري اقول لها اش اش اش .. ايه الشياكه دي ..

وياريت على كده وبس دي كل نصف ساعه بالكتير بتغير لبسها .. وبيصعب عليّ شعرها لمّا بتقعد تسرح فيه طول النهار...

فما بالك فيما هن في مرحلة المراهقه وما بعدها ... دي طبيعة الكون .. يا آنساتي سيداتي الاعزاء ..عايزين تغيروها ليه .. وعايزين تحرموا نفسكم من الكاميرات والفلاشات ليه .. بالذمه ده اسمه كلام ..

وربنا .. ربنا يجعله عامر ان شاء الله :blink: :blink:

تم تعديل 13 أغسطس 2006 بواسطة ياسر ابو احمد

[^^^hi^^^]

موضوعك رائع يا اخت سما

فكرنى بموضوع كنت كتبتوا في منتدى زماااااااااااااااااااااااااااااااااااااااااااااااان كنت مسميه و تعبه نفسك ليه كنت بكلم عن الحجاب الجديد(ساعتها) بتاع نص الشعر اللى باين و الستريتش و الجينز و خلافواااااااااااااااا المهم

انا حسالك سوال صريح و مباشر انتى بتسالى ليه الراجل عينه زايغه و انا حرد بسوال ليكى و لكل اللى علق من السيدات

هل لو جوزك لاقى واحده محترمه اللبس و المظهر و الاسلوب (وده كارثه لوحدوا ) في المشى و الكلام و خلافوا بيبص عليها ؟؟؟؟؟؟؟؟؟؟؟؟؟؟

لا طبعا ( ايه ده ده انا اللى جوبت يلا ما علينا )

يبقى لما الاقى واحده ماشيه بتقولىىىىىىىىىىىىىىىى بص ( زى الاخت بتاعت الاغنيه بص عليه بص....... واللى هى بتكمل القبليه بتاعها بشخطه يملها الامر الواضح للحيوان اللى مش بيبص ........ ما تبص ........ ودى للى مش عارف الاخت دانا دندن فتح عينك تاكل ملبن ) :blink:

ومصممه في لبسها و في كل شى بتعملوا انى ابص غصب عن عين اهلى لازم ابص طيب اعمل ايه يعنى :blink: ده يا مومن لو انت طنشت كل ده ممكن تلاقى ضحكه و لا كلام عالى بشكل غريب يجبرك على البص :blink:

و هنا احب انى اقدم تحيه للاخت سما على سوالها

هل البنت فقط هية من أساءت اختيار اللبس ولاة ورا ذلك تقصير من الأهل ؟

سوال مهم و ممتاز وبيفكرنى بموقف حصل في المترو في مصر لحد اصدقائى

كان راكب المترو ودخلت بنت (هو وصفلى بتفصيل بس انا مش حعرف اوصف بقى عشان في سيدات هنا ) لكم ان تتخيلوا يعنى كانت لابسه بنطلون الاخت الفاضله شاكيره و عليها البديهات اللى هى واصله لحد كامر البنطلون بالعافيه ( من اللى بيقعدوا يشدوا في البادى طول ما هما واقفين طيب ما كنت جبتيه طويل اساسا ) المهم ما علينا بيقولى الرجاله اللى في المترو ( الكبار طبعا ) قاعدوا يبصوا بقرف ( هما عايزين يبصوا طبعا بس عشان لوحد خد بالو)

ويبص لبعض و يتاففوا جامد و بشكل ملحوظ راح راجل كان قاعد في المترو مزعق بعلوا حسوا و قالهم

طالما كلنا مضايقين اوى كدا امال دى تبقى بنت مين ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

صح دى بنت مين انا شايف يا اخت سما ان الست ليها دور كبير جامد جدا جدا جدا جدا في قيم اى مجتمع لو اللبس كويس حيبقى في بص

لو البنت محترمه ومودبه حيبقى في جواز عرفى او غيروا البنت هى ترمومتر اى علاقه بينها و بين الولد و على اد ما حتفتح باب العلاقه دى على اد ما الولد حيدخل( الواد مش بيهموا :blink: )

و انا مش ححمل البنت كل شى يمكن المجتمع يمكن التربيه يمكن الظروف الاجتماعيه يمكن يمكن يمكن لكن يظل الموضوع متعلق بالبنت اللى بتبقى ام و مسئوله عن جيل بعد كدا

وللحديث بقيه انشاء الله

ويجعلوا عامر

[نانو]

اختي سما مصر

ربنا يخليك علي ذوقك و مجاملتك اللطيفه

بس انا لسه مقتنعه ان مش معني ان الراجل يبص علي البنات انه مش بيحب مراته او مش مرتاح معاها

يا حبيبتي ده جين فيهم و علي فكره في البنات كمان و الا ما كانش ربنا سبحانه وتعالي حذرنا في القران و شدد في غض البصر للمؤمنين والمؤمنات

يبقي لازم نعترف انه ده موجود فينا كلنا وبس المهم لاي مدي وازاي نتعامل معاه و ما تبقاش العمليه انه لما جوزي يبص علي اي واحده يبقي مش بيحترمني او مش بيحبني او انا مش عاجباه

و ما تنسيش انه بيبص علي اي واحده في الشارع لكن لما جه يختار و يتجوز اختارك انت

و كمان لازم احاول انا احترم تركيبته كراجل و انه بيبص و هيبص علي الست الحلوه ...يا ستي اعتبريه بيبص عليها زي ما بيبص مثلا علي عربيه حلوه معديه جنبه غصب عنه لازم هيبص

يعني علشان الراجل يغض بصره ده نوع من انواع الجهاد في سبيل الله يعني هو نسبيا امر صعب

و ممكن الست تلفت نظر جوزها بذوق ورقه او بهزار لو حست انه مزودها

بس المهم ما تحسش انها قضيه كبيره في حياتها

[بنت النيل]

السلام عليكم

اختى سمامصر اعتقد بعد الكلام الجميل اللى سمعناه من الاخت العزيزة نانو الواحد ميقدرش يقول اكتر من كدا حاجة

ولكن اهم شىء كماذكرت ان مش معنى ان الراجل بيبص لواحده انه مش بيحب مراته او مش بيحترمها لا ابدا

وفى بعض الاحيان بيكون النظر غصب عنه لانه بيشوف شىء ملفت للنظر بزيادة واكيد انتى بتشوفى بعض البنات والسيدات بيكونو ماشين اذاى الله يهديهم انا نفسى ياست ببص عليهم والله اعلم ماجايز لمابيبص بيقول لنفسه الحمدلله انه رزقنى بواحدة محترمه مش واحده كل من هب ودب بيبص لها ليه لاء

ولكن هى دى عاده وتركيبه وبرده ليست عند الرجل فقط ولكن عند بعض السيدات ممكن اوى الست تبص على واحد اذا كان مبالغ فى شياكته فى لبس معين مثلا

ولكن المهم الغرض من النظرة

ولكن برده نرجع ونقول على الانسان المؤمن غض النظر مهما كانت الموغرايات وفى شىء كان فى رد الاخ ابواحمد

مهم وهو عن البنات بعد الزواج بسنتين ده فعلا ممكن يكون احد الاسباب اللى ممكن اوى تخلق المشاكل بدون قصد

هنقول كثير من البنات بعد الزواج بفترة خلاص يبتدى معاهم الاهمال فى نفسهم وده حقيقى تقول خلاص بقى ما انا تزوجت وده اكبر غلط على الست دايما المحافظه على نفسها وبعض الاهتمام بنفسها برده عامل مهم فى مثل هذه الظاهره

ولكن نرجع ونقول على المراءه المتفهمه الواعيه اذا لاحظت نظره الزوج لاى واحده تانيه واذا حست ان فيها مبالغه او زادت عن الحد بطريقه لطيفه تجاول لفت انتباه الزوج وساعاتها هو بنفسه هيحس بمدى احترامه من ناحيتها له ووجوب احترامه لها

[رمضان]

من وجهة نظري ان الستات في مصر مش بيأخدوا بالهم من نفسهم ومعقدين وكل حياتهم اكل وشرب وحاجات خايبة

مش بيجددوا حياتهم

بصوا مثلا لواحدة لبنانية بعد فترة من الجواز وشوفوا صورها قبل الجواز مش هتلاقوا فرق

لكن على العكس بصوا لمصرية وشوفوا الفرق مش هتعرفوهم من بعض

الواحد يكون متجوز واحدة فرنساوي وبعد الجواز الله لا يوريك تبقى حاجة صعبة قوي

[^^^hi^^^]

من وجهة نظري ان الستات في مصر مش بيأخدوا بالهم من نفسهم ومعقدين وكل حياتهم اكل وشرب وحاجات خايبة

مش بيجددوا حياتهم

بصوا مثلا لواحدة لبنانية بعد فترة من الجواز وشوفوا صورها قبل الجواز مش هتلاقوا فرق

لكن على العكس بصوا لمصرية وشوفوا الفرق مش هتعرفوهم من بعض

الواحد يكون متجوز واحدة فرنساوي وبعد الجواز الله لا يوريك تبقى حاجة صعبة قوي

الاخ رمضان اسمحلى انى اختلف معاك الكلام ده لو كان موجود يبقى زمان .................. دلوقتى تقريبا ما بقاش موجود ولو موجود بيبقى نظرا لضيق اليد

مش اخد البال ده عايز مصاريف يا ترى المواطن المصرى اللى مش لاقى ياكل ولادوه عنده القدره على مصاريف اخدان البال طيب الست حتطلب منه ازاى

وهى شايفه الحال :huh:

اما الحاجات البسيطه او الاساسيات فاعتقد انها بتكون موجوده عند الغالب و اللى مش حيبقى عندها دى كمان يبقى تستاهل اللى يجرلها بقى دى واحده مهمله في نفسها و في بيتها و الموضوع هنا يبقى شى ....................... و لا بلاش

يلا ما علينا

ويجعلوا عامر

[Eldisel]

مع احترامي لكلمكم ياجماعة فانا شايف ان الاتنين غلطنين الراجل ابو عين زيغة والبنت المحزقة الملزقة (علي رقي الست ولدتي) ... ومع اختلافي التام ليكي يا نانو ان الموضوع عادي ومفهوش مشكلة دة بنظرية (لما يبص قدامي احسن مايعملة من وريا) دة غلط فاحش لان المرئة يجب تخاف علي جوزها وبتها من الفتن لانة هيتعود علي البص معاكي واحيانن بتوجيهات منك وهيتعود علي ........ وهو مش معاكي بدون توجية لان الراجل مش محتاج توجية ......

ولأن دة في الاول والاخر حرام الرسول علية الصلاة والسلام قال(الاولى لك والثانية عليك)يعني اول نظرة انت غير محاسب عليها والنظرة الاولى دي الي هي من اول ما وقعت عينك على الشئ دة الي ان ترجم مخك الي انت شفتة ان دة بنطلون ولا ميكروجب ولا top ولا .. ولا ولا ..والحكاية دي بتاخد اقل من الثانية والنظرة التانية بعد ما عقلك يترجم ويشغل كمراتة وياخد كل القطات الممكنة وهومبحلق في المنظر الغلط دة :huh: والبنت صاحبة الغلط الاكبر من راي لانها بتشيل زنبها وزنب كل واحد غلط وبص وبحلق فيها بغرض دنيئ ولانها لوكانت لبست محترم ومشيت في الشارع محترم واتكلمت واتعاملت مع الناس باحترام مكنش اي واحد غير محترم او محترم عينة تزوغ عليها بغرض غير محترم

وربنا يستر علي ولايانا