رباعيات هشام الجنيدى ..........(6)!!!!!

[هشام الجنيدى]

سألت شعرى يا شعرى ليه بتكئبنى

وتهد فيّا الامل بدل ما فيه تبنى

شهق الكلام عالورق وبص ليّا وقال.....

انا اصلى من جواك باديك بتكتبنى .!!

عصفور وطار وفوق غصونك حطّ

قلم وتحت اسمك حط مليون خط

بحار وتاه مركبه ف قلب بحرك وتاه....

ونفسه قبل الموات يوصل بحبك لشط..!!

كان فيه ملك ساق الغبا واستبد

وفكّر انه اله حق وحقيقى بجد

اهو ده غبى واللى اغبى منّه الناس...

لأنه لما امر معصهش منهم حد ..!!

مش قلتلى يا قلب انك رفضت

تعيش ف حبه اسير وانك خلاص نفّضت

طب ليه يا قلبى لما مر عليك ....

حسيت كأنك بين ضلوعى اتنفضت ..؟!!

طبيب سنان ومريض مش لاقى حتى اللضا

جالى فى وشه الالم وقع بخطه ومضى

بطير يا ناس م الفرح لما بنول اجرى....

مش بالفلوس انما دعوة وبسمة رضا..!!

يا بيت بنيته بعزم ايدى ووقع

وبنيته تانى وهدّه واحد طمع

اياك تفكّر انى اسيبك تراب ...

وانا لسه نفسى يا حلمى لم ينقطع ...؟!!

[لخبطه]

كدا هتابعك بقا اي خدمه ياخال :) B) B)

شديده أوي مجموعة الرباعيات حاجه حلوه وشغل في كتير أوي من الاحتراف

دي جامدة جدا

كان فيه ملك ساق الغبا واستبد

وفكّر انه اله حق وحقيقى بجد

اهو ده غبى واللى اغبى منّه الناس...

لأنه لما امر معصهش منهم حد ..!!

وربنا ماهو علشان بتلسن على واحد احنا بنكرهه :D :P لا بس هيا فعلا حلوه ودقيقه وكمان معبرة

فيه بعض الحاجات بقا

كلمة بتكئبني جايه من الكآبه المشكله أنها لا عامية ولا فصحي

تكرار فيه في دا مش عارف مفيد ولا مضر

وتهد فيّا الامل بدل ما فيه تبنى

بردو تكرار تاه هنا مش لاقي قافله ولا يه

بحار وتاه مركبه ف قلب بحرك وتاه....

الكلمة في الرباعيه مهمه أوي يعني من الصعب نحط كلمه ومش تعبر لاننا محكومين بعدد كلمات قليل فلازم كل كلمه تعبر

سنان هنا فرقت ايه

طبيب سنان ومريض مش لاقى حتى اللضا

اسف ياخال على الملاحظات بس علشان بحب اقرا لك فبقرا بتدقيق

[فولان بن علان]

وحشتنا طلتك يا هشام

ووحشنا شعرك السهل الممتنع

إن شاء الله تكون خلصت إمتياز

يعجبني جدا تعبيراتك المستمدة من حياتك اليومية يا طبيب السنان

وإن شاء الله تكتب لنا شعر في خلع الضرس وحشو السنة وعمل الكباري

وربنا يوفقك وتتقن الزرع

[khedr]

بس

حلاوه

وسلاسه الكلمات

وايقاعها السريع

مش بيديك فرصه

.....................................

هشام دائما مميز وقريب ....من القلب قبل العين

[houssin abo habaga]

ألأخ /هشام .......... المحترم

تحية طيبة الى شخصك العزيز رباعيات رائعه وكتابه جيده فقط أجعل كل أربع أبيات قصة

لأن هذه ميزة الرباعيات لأن قبل أستاذنا الكبير المرحوم صلاح جاهيين وهو أستاذنا ومعلمنا

كان للرباعيات شأن كبير فى مجالس الشعراء فيطلب أربع أبيات ذات وزن وقافية ومعنى وهذا

هو مدى صعوبتها ونهاية آخر حرف فى الرباعية يبدأ الشاعر المنافس بنفس الحرف وهنا تكمن

الصعوبه أما نحن نكتب بالعامية وهى أسهل كثيرا أرجوا تعدد المحاولات وأختار من العشرة خمسه

لنشرهم وتمتعنا مع رباعياتك .

أتمنى لك التوفيق

رباعيات هـــشام فيها من المحاسن كتير

أقرأ بقلبك من حسنها عايزيين منها كتير

لآن الرباعية قصة وقصص حارتنا كتير

ملك ساق الغبى واستبد أكتب عنه كتيير

"""""""""""""""""""""""

....................................................................... أخوك / حسين أبو حباجه

[shahd]

هشام لطالما اعجبت بسلاسلة اسلوبك الراقي الممتع سملت اناملك وعود احمد اخي الفاضل

[مهيب]

افتقدناك حقا يا هشام ... غبت كثيرا تلك المرة ... لكنك أعطيتنا فرصة كى نعيد قراءة رباعياتك القديمة أكثر من مرة ...

تميزك ما زال واضحا جليا ... يثير الدهشة ... ومكانك الغامض الذى تأتى منه بالأفكار لم يخذلك حتى الآن ... واضح أن المخزون وفير و لله الحمد ... مازلت أعد كتابة الرباعيات من أصعب الأشياء ... و مازلت أعدك متمكنا منها حقا ...

لن أنقد هذه المرة ... لأن لخبطة قد ذكر أغلب ما كنت أود ذكره ... وله أقول - أنه يملك احساسا كبيرا بالرباعيات بصفة عامة ... و لا يريد لها سوى الكمال ... بالمناسبة ... طبيب سنان .. ذكرت هكذا ... لأن هشام هو طبيب أسنان فعلا ..

مهيب

[Doofy]

=============================================================================

أستاذي هشـام الجـنيدي

كالعاده تنتزع حروف ومعاني

دفنت تحت انقاض اليأس والهزيمه

وتعيد لها الحياة من جديد بأسلوب سهلك الممتنع

لك اطيب تحيه ونتمنى تواجدك المستمر والمطلوب بشدة بين قوائمنا

تحياتي

:

:

[هشام الجنيدى]

عزيزى العزيز لخبطه

يسعدنى جدا ان تكون متابعا وليس فقط متابعا وانما ناقدا ايضا : ............

واما بالنسبه لما ذكرت من نقد .....

1)كيف تعبّر عن جملة (اصابنى بالاكتئاب )بالعامية ......؟!

كلمة( بتكئب ) يستخدمها الناس فى دمياط حيث ولدت ونشأت لما واحد يقول لواحد فى موقف ما ..(ايه ده دى حاجه تكئب يا جدع ..... :P ) اى تصيب بالكآبه

فما مرادفها فى كفر الشيخ ؟؟!! mfb:

2).....(وتهد فيّا الامل بدل ما فيه تبنى )

تكرار( فى )لم يات على نفس الحروف( فيّا) تعود عليّا انا الشخص و(فيه ) تعود على الامل اى المعنى ليس مكرر مما يبرر استخدامى لهما هكذا واعتقد انه التكرار ده مش مضر ولا حاجه .... -_-

3) تكرار تاه كان سهوا منّى واعترف به وشكرا لانك نبهتنى لانى لما كتبتها فى الاول على انها مسوده كنت كاتبها كده بالتكرار وكنت مش مقتنع وكنت ناوى افكر فى حل ونسيت لان الرباعيه دى تحديدا كاتبتها من يجى شهر ولما نزلتها امبارح فى المنتدى كنت بكتب من الذاكره فكتبت الكلام ولم انتبه

واليك الحل ....

عصفور وطار وفوق غصونك حط

قلم وتحت اسمك حط مليون خط

بحار على مركبه سرح فى بحرك وتاه....

ونفسه قبل الموات يوصل بحبك لشط

ارجو من الاداره تصحيح الخطا

4) قد تكون جمل الرباعيه طويله او قصيره وكله فى حدود بس المهم فى رأيى هو الموسيقى وانسيابيه الكلام فى النطق

نيجى بقى لكلمة (سنان ) اولا وكما قال مهيب لانى طبيب اسنان ثانيا عندما اكتب احب ان اكتب واقعى بقدر الامكان وان اشعر المتلقى انى احادثه عن نفسى كى يصدقنى ويخرج الكلام بتلقائيه ويتلقاه الناس بتلقائيه ايضا

من حيث الوزن والموسيقى .... لم تخل الكلمه بهما بل على العكس حاول ان تقرا تلك الرباعيه بدون كلمة سنان وسترى الفرق ......

وبعدين ايه حكاية التلسين دى....... متوديناش فى داهيه يا خال

اشكرك جدا جدا واتمنى ان اكون وضحت وجهة نظرى ولك وافر الاحترام

عزيزى فلان ....

شكرا لرفع معنوياتى هكذا....... ووالله انا اللى وحشنى ردودكم وتعليقاتكم على اعمالى وتواجدكم الدائم على صفحتى

ولسالى شهر ان شاء الله واخلّص امتياز ادعيلى ميحصلش حاجه وان ربنا يعديه على خير .....

صديقى العزيز خضر

اشكر لك حضورك الرائع وانا سعيد انك تقول لى هذا الكلام .... ولقد اثبت لدى الان خطا المثل اللى بيقول (البعيد عن العين بعيد عن القلب ) لان فعلا كما قلت انت احس دائما انى هنا احبكم جميعا مع انى لم ارى الكثير منكم الا من خلال كتابتكم وردودكم ووالله (انى احبكم فى الله)

ادام الله الود بيننا وارجو من الله ان يظلنا بهذا الحب فى الله ان يظلنا فى ظله يوم لا ظل الا ظله

عزيزى الاستاذ حسين ....

.شكرا على مرور حضرتك الذى عطّر صفحتى واثلج صدرى وشكرا على نصيحتك الغاليه وانا فعلا احاول منذ ان بدات كتابة الرباعيات ان افعل هذا وان تابعت الخمس اجزاء السابقه ستجد فرق كبير فى بين اول وتانى جزء عن تالت ورابع جزء عن خامس وسادس جزء فقد وفقت فى الكثير منها وكدت اسقط فى الكثير ايضا ولكن لابد ان تلسعنى النار كى اعرف انها تلسع :angry: ....... او حد يقوللى ان النار بتلسع :D

شكرا على تزين صفحتى برباعيتك عن رباعيتى واتمنى ان اكون عند حسن ظن الجميع

الاخت الغاليه شهد ...

دائما انت قليلة الكلام عميقة المعنى وكانك تكتبين برقيه انتظرها دائما بعد فراغى من تنزيل عمل من اعمالى هنا فى منتدانا الجميل....

تم الاستلام

و شكرا لك ;)

اخى العزيز الرهيب ... مهيب

انا من افتقدكم فعلا ولكن الفتره السابقه وما كان فيها من حرب على لبنان جعلتنى اشعر بحاله من الاكتئاب وعدم الرغبه حتى فى الخروج من المنزل

ولكن حمدا لله ان جعل فينا من يمسح عن جباهنا بعض من ماء الوجه وجعلنى اشعر بل ارى الامل ورفع معنوياتى كثيرا فقلت اخرج واشوف الدنيا بنظرة تفاؤل بعد ما اعتدت رؤيتها بتلك النظرة المكتئبه السوداويه وعلى فكرة انا كنت بدأت اكتب الرباعيات دى من شهر تقريبا ويوم الاثنين كملت كتبت اخر رباعيه استلهمتها من موقف لبنان وشعب لبنان وهم فى صدد بناء بلدهم للمره الثالثه

اما بخصوص النقد فلخبطه قام بالواااجب ;) وانا معك تماما فى رايك بالنسبه للخبطه لانه فعلا دقيق جدا جدا جدا

دوفى تحرجنى دائما كلمة( استاذى ) :ph34r: وتضعنى دائما فى مرتبه عاليه عليّا حبتين تلاته لاننى لا اعتبر نفسى هذا الرجل الذى يمكن ان يقال له استاذ

ولكن امام هذا الاحتفاء منك وكرمك البالغ لا استطيع الا ان اشكرك كثيرا واشكر لك متابعتك الدائمه لاعمالى وان شاء الله اكون موجود دائما بالجديد لاسعد دائما بصحبتكم على صفحتى ....... :)

شكرا لكم جميعا ........

والله الموفق .............

[لخبطه]

ياعم هشام أنا اقل من كدا تسلم يا عمنا على سعة الصدر

وبخصوص كلمه (فيا ) فعلا انا غلطت الظاهر مش ركزت في قرائتها للكن معناها وفق ما قولت فعلا مهمه

فهمت كل ردك بالحرف وشاكر على الاهتمام

تكئبني حداكم في دمياط لكنا حدانا في الكفر مش بنقولها :angry: :ph34r: mfb: كل كفر وله لهجته بقا

إلى الأمام ياجاهين المنتدى