بنك مصر .. وتكنولوجيا العصر .؟؟

[achnaton]

بسم الله الرحمن الرحيم

منذ الوكسة الاسرائيلية الامريكية فى الاراضى اللبنانية .. وانا مكتفى بالاذاعة المصرية .. وطبعا عندما أستخدم كمبيوتر المكتب فقط .. اما باقى الوقت فاقضيه بين الكتب او متابعة القنوات الاخرى فالاقمار الصناعية كثيرة .. وتبث لنا قنوات عظيمة .. كل ثانية فيها فايده .. وعندما قرأت موضوع اخونا " المهاجر " عن مرضه .. هفنى الشوق للقناة المصرية .. طبعا الفضائية - من فضاء الفكر - ومش حا اطول عشان انا قرفان.. من بنك مصر كمان .. الناس اللى فيه الوقت نسيت بكل أسف مؤسسة العظيم وكلمة العظيم مش كفاية عليه المرحوم طلعت حرب .. وياما جدى الشيخ حسن " رحمةالله عليه " واقروا حكاياته ..

فى شريط الاخبار بتاع الفضائية .. نداء للمساهمة للمبتلين فى لبنان .. ورقم الحساب اللى الوحد ممكن يحول مساعدته علية .. عظيم تشكروا .. ولكن التلفزيون عندى ليس به خاصية ايقاف الصورة .. لأتمكن من كتابة رقم الحساب .. وعشان كده ما قدرتش .. رقم الحساب ده يا سادة .. مكون من عشرة او اتناشر رقم .. وهوما توصل اليه خبراء الكمبيوتر فى هذا البنك .. طب أنقلها إزاى ..؟؟ ولأنى عشت هذه التجربة لايف فى فرع البنك اثناء زيارتى للقاهرة من فترة .. دوخونى السبع دوخات عشان الرقم اللى معايا قديم - لم يخطرنى البنك بتغيره - وروح للشباك الفولانى خلى الاستاذ اللى هناك يعطيك الرقم الجديد .. وانفذ وارجع .. عشرات الاصوات تنادى التزم الطابور يا استاذ .. انا كنت فى الطابور من الصبح ..دا انا كنت باجيب الرقم الجديد ..وترتفع الاحتجاجات .. لأ.. انضم للطابور ..

تانى يوم من بدرى كنت فى البنك.. واقف فى الطابور بالرقم الجديد .. وقدمت طلب الصرف .. موقع عليه ..قال .. لأ..خد وقع امامى توقيعين .. حاضر .. ووقعت .. او وقعت فى الخية الروتينية .. التوقيع غير مطابق ..هات بطاقتك .. فقدمت البطاقةالعائلية.. قال .. الرقم القومى من فضلك ..ماعنديش .. طب روح الخزنه الرئيسية عشان يكشفوا على التوقيع الاصلى .. تانى حا اقف فىطابور من الآخر .. مش عاوز .. خد غير لى مائتين يورو وخلصنى .. لأ.. التغير فى الشباك اللى هناك .. قرفت حتى من نفسى .. فواحد قال لى ما تصرف من الماكينه .. سألته .. إيه الماكنه دى .. قال الصندوق علىواجهة المبنى ..تحط الكارت الفيزا بتاع البنك .. إنت مش معاك كرت بنك مصر ..قلت آه .. فقال على هناك .. دا انت حتى حتصرف فلوس جديده .. وطرت على خارج البنك يمكن التفاهم مع الحديد يحل المشكلة ويرحمنى

حطيت الكارت اللى لسه مستلمه من البنك من شهر .. رد علي الجهاز .. رقم الكارت غير موجود .. إرجع للأدارة ..

ولقين على الجهاز انه فى الامكان الصرف ببطاقات الائتمان الاجنبية .. فاخرجت بسرعة البطاقة الالمانية .. وطلبت 200 يورو وبعد دقيقتين لفظ الصندوق المبلغ بالمصرى ورق جديد .. شوفتو السعد والهنا ..طلبت البنك بالتلفون ..الكارت الجديد اللى انا استلمته من منكم من اسبوعين مش شغال .. ؟؟ قولى الرقم كام .. قلت الرقم ..قال .. معلش السيريا دى اتلغت وروح الفرع إستلم الكارت الجديد ؟؟ إيه بقى رأيكم فى التجديد ؟؟

ونفسى أعرف .. حساب جمع التبرعات ليه ما يكونش بسيط تلقطة العين من غير عناء ولا أخطاء .. يعنى ليه السادة المحترمين فى إدارة الحاسب الالكترونى بتاع البنك يخصصوا رقم بسيط جدا من رقمين او ثلاثة ..وتحول المبالغ التى تحول اليه الى الرقم الأصلى فى البنك ..هل ده ممكن يا أهل الخبرة فى الكمبيوتر من الاعضاء .. ؟؟ ولا حنحتاج لهذا العمل رواد من الفضاء ؟؟

تم تعديل 18 أغسطس 2006 بواسطة achnaton

[khedr]

استاذي الكبير...اعتقد ان تعبير الحكومه الذكيه

نسبه الي الست ذكيه بتاعه الطعميه

الموجوده في كل قريه مصريه مش القريه الالكترونيه

اف من الكترونيتهم...واف من ذكيتهم....واف منهم

[كلاتشي]

اخي علي موضوعك ... تقبل مروري