استشارة عاطفية لأحوكم الغلبان

[last_Samurai]

السلام عليكم

بص يا احمد نصيحه من اخ لاخوه

اتجوز اللى تستريحلها وكلام الاخ زهيرى صح 100 100%

شكرا

[eastsoul]

السلام عليكم و رحمة الله و بركاته...

هل استخرت الله ؟

صلاة الاستخارة مهمة في الامور الغير واضحة ... أو التي يصعب فيها اتخاذ القرار...

ربنا يوفقك لما يحب و يرضى...

[إيزيس]

موضوع قديم لكن نفسي أعرف حصل إيه

أكيد الزواج له شروط و بالعقل و التخطيط لكن الأول الراحة والانسجام لأنهم بوابة الحب

[shawshank]

أنا أول مرة أقرا الموضوع ده ...

صحيح حصل ايه؟ وأخونا أحمد فين ؟

كان لي كذه تعليق ...

واحد منهم على كلام الأخت Folana ...

صحيح دي تعاليم ديننا الحنيف ، لكن ممكن واحدة تكون متدينة جدًا ، ومؤدبة جدًا ، وفيها صفات هايلة قوي . يعني لو سألتي 100 شخص مختلفين كلهم هيمدحوا فيها ، لكنها ممكن ببساطة لا تصلح أن تكون زوجة لفلان . لأن طباعها وميولها وشخصيتها لا تندمج ولا تتوافق مع طباع وميول وشخصية فلان . رغم إن فلان ده كمان متدين ومؤدب وفيه صفات هايلة قوي . يعني ذي ما بيقولوا مفيش chemisty . فالمسألة مش بس مسألة سلوك طيب وأخلاق كريمة وتدين ، المسألة فيها كمان الشخصية . والشخصية تتكون بعوامل كثيرة جدًا تنصهر معًا عبر السنين .

[~Heba~]

ضحكتها مبتعجبنيش - مش عشان حاجة لا سمح الله - بس مبتعجبنيش مش عارف لية

يادى النيلة هما كمان بيبصوا للضحكة عشان كده انا مجوزتش لغاية دلوقتى اصل ضحكتى هباب و بكايا هباب اكتر منا هبه :) :) :)

عايزة اعرف انا كمان حصل ايه

[احمد هادي]

القصة انتهت :)

لم يكتمل ذلك المشروع

وما زلت ابحث عن بنت الحلال

دعواتكم

[ملك]

بقي الموضوع ياجماعة ببساطة اني لما نزلت مصر بعد غياب 700 يوم حسيت بصدمة رهيبة

الصدمة تتمثل في إني كنت فاكر اني بمجرد ما هنزل من الطيارة هحس بسعادة غير عادية

لكني محستش بأي نوع من السعادة علي الاطلاق

صحيح رؤية أهلي وأخواتي واصدقائي كانت شئ ممتع

لكن انا بتكلم عن الحياة كحياة

حسيت ان الحياة في مصر لا تبعث علي البهجة علي الاطلاق

الاحساس ده سبب ليا مشكلة نفسية كبيرة جدا .....دانا اللي كنت باتخانق مع الناس اللي بتقول انها معدتش تقدر - ولا تحب أصلا- انها تعيش في مصر وكنت بتهمهم بعدم الوطنية كمان في الخليج زي مانتو عارفين ممكن تروح الشغل الصبح تلاقي قرار انهاء خدمتك علي مكتبك

يعني من الآخر انت مالكش غير مصر بلدك

ترجع لها عاجلا أم آجلا

فأوعي تخلي الاحساس ده يأثر عليك

المهم .......

خدت أسبوع علي ما ابتديت افوق من الصدمة في الاسبوع ده كان باين عليا الذهول لدرجة ان الناس كانت بتقولي لو مش مبسوط إرجع هناك تاني يمكن تنبسط

بعد الاسبوع قررت اشوف أول عروسة

ورحت شفتها

البنت كويسة جدا

ومخها كويس جدا

وغريزة الانثي عندها عالية جدا

يعني بتفهمني بسهوله

وبتحس باللي انا حاسس بيه ومش عايز أقوله

مش عارف هل ده ذكاء غير عادي منها ؟ ولا عشان انا شخصية واضحة ووجهي دايما بيفضح مشاعري

واهلها ناس في غاية الذوق والأدب

وملاقيتش فيها شيء يتعيب غير انها قليلة الكلام .... لكن ارجعت الموضوع ده لمسألة الخجل -

فقررت الاستمرار

مقابلة .....في التانية ......

وبعد التانية لقيت أبوها بيقولي .....

" انا عايزك تبقي مقتنع 100% بالقرار اللي انت هتاخده

لو عايز تقعد مع البنت كمان مرة انا معنديش مانع

لأني عارف ان وقتك ضيق وعايزك تكون واخد قرارك وانت مطمئن "

بعد القعدة التالتة

رحت انا واهلي زرناهم

وهما جم زارونا

ولقيت نفسي بخطب

طب إيه المشكلة ؟

المشكلة يا جماعة اني لقيت نفسي مش حاسس بأي حاجة

المفروض ان فترة الخطوبة دي تبقي فتره جميلة كلها مشاعر وأحلام وردية

انا محسيتش بأي حاجة من الكلام ده خالص

والمشكلة الاكبر اننا بنقعد مع بعض ساعات منلاقيش حاجة نقولها

رغم اني رغاي جدا وممكن اتكلم لمدة 3 أيام متواصلة

حاسس كده انه الموجة بتاعتي مش مظبوطة علي الموجة بتاعتها

لما بكون قاعد معاها ساعات ابقي مبسوط وساعات احس انها عبء عليا

ساعات بحس انها جميلة جدا وساعات بحس انها عاديه جدا وساعات بحس انها مش حلوة خالص

وساعات مابحسش بحاجة خالص

وكمان ما بتوحشنيش خالص

ولا بفكر فيها

يعني مش فارقة معايا

من ساعت ما سافرت مجتش علي بالي مرتين علي بعض

وانا أصلا شخص عاطفي جدا

وكل المقربين مني يعرفوا الموضوع ده

لدرجة ان الكل كان مقتنع اني هتجوز بمجرد ما أخلص الكلية مهما كانت الظروف

لكن ده ماحصلش

كمان انا بحس انها عقلانية جدا

يعني بتحسب الموضوع بالعقل

أنا لما بدأت الحكاية دي خدتها بعقلي

لكن بعد الموضوع ما دخل في الجد ...حاسس انه العقل وحده لا يكفي

وخد عندك آراء الناس

اللي يقولي " يابني انت عندك 31 سنه .. طبعا لازم تتجوز بعقلك وأحمد ربنا ان في بنت كده في الزمن ده "

وناس تقولك " أوعي يا أحمد تتجوزها لو ما حبتهاش الحياة هتبقي جحيم "

وناس تقول " يا بني مش مهم تحبها قبل الجواز المهم تحبها بعده "

واللي يقولك " مشكلتك انك حاسس انك متورط عشان دي أول عروسة تشوفها , ولو كنت شفت غيرها كنت حتحتار أكتر "

واللي يقول " كلنا مرينا بالاحاسيس دي , ده شيء عادي ومنطقي بس اوعي تخليه تسيطر عليك "

ساعات كمان بحس اني دخلت في الموضوع لأني كنت تحت ضغط الاحساس بأني لو مخطبتش في الاجازة دي تبقي ضاعت السنة ولازم تستني للسنة الجاية

وانا تحت ضغط الحياة في دبي وما أدراك ما الحياة في دبي -وخصوصا لما يكون في الشغل ستات - حيث كل شيء متاح وكل شي مباح وبمنتهي السهوله لدرجة اني بقيت أدعي ربنا انه يسترها معايا وأطلع من هنا زي ما دخلت

المشكلة الأكبر انه بعد سفري العلاقة بينا تحولت الي تليفونات وانترنت وشكرا

والموضوع ده هيستمر 4 او 5 شهور علي أحسن الأحوال لحد ما اعرف آخد اجازة أسبوعين انزل فيهم مصر - ده لو عرفت أصلا

في ملحوظة أخيرة

ضحكتها مبتعجبنيش - مش عشان حاجة لا سمح الله - بس مبتعجبنيش مش عارف لية

أفيدونا يا أصحاب الرأي

وقولولي أعمل اية في اللي أنا فيه ؟؟؟؟

وتحياتي

[ملك]

انا بتكلم بصفتي ام وليست قارئة

سؤال واضح وصريح هل الانسانة دى كفيلة بانها

تحمل اسمك وتصون شرفك في غيابك دي اهم حاجة

كثير تزوجوا عن حب ولكن تاتي بما لاتشتهي السفن

الحب حب العشرة والايام كفيلة بوجود الحب

واذا كانت ذاكية كما قلت فهي كفيلة بان تزرع الحب

واذا اخذت عن حب ففي الحالة دى ستجد نفسك لا تري غير ما تحب ان تري فقط

ولا تري العيوب الا بعد فوات الاوان دي نقطة النقطة الثانية البيئة التي تربت فيها والعلاقة الاسرية

تاكد اذا كانت النشئة صحيحة والام تراعي زوجها فاكيد الابنة كذلك

هل البنت ستراعي وتعامل ربنا فيك

هي دى الاسئلة التي يجب ان تسال نفسك عنها

واولا واخيرا رضا امك عن زواجك وهل البنت تتعامل بكل الحب والاحترام لامك

ودى اهم حاجة

اكن موضوع الضحكة والهدوء كل دة بايدك الزوجة بعد الزواج بيطرا عليها تغيرات في الكلام والهدوء

محتاجة وقت مش اكتر

وطبيعي لو سافرت معك تكون لغة الحوار موجودة

صدقني ليس الحب اساس الزواج اهم ما في الموضوع التفاهم والرضا

والافضل صلي صلاة الاستخارة

واخيرا اتمني لك كل التوفيق والرضا :)

[سهران]

ضحكتها مبتعجبنيش - مش عشان حاجة لا سمح الله - بس مبتعجبنيش مش عارف لية

يادى النيلة هما كمان بيبصوا للضحكة عشان كده انا مجوزتش لغاية دلوقتى اصل ضحكتى هباب و بكايا هباب اكتر منا هبه :lol:

عايزة اعرف انا كمان حصل ايه :baby:

فكرتني و الله بالذي مضا ...كل المغتربين بيمروا بالمرحلة المهببة دي ... نزلت أنا و واحد صحبي من 8 سنين ندور على عرايس ... كنت باعمل طلعتين و تلاتة كل يوم عشان أحس براحة و أخطب ما فيش فايدة ... كل اللي كنت باعمله أجيب من الحلواني اللي عالناصية دستة جاتوه و أطلع الطلعة و أرجع بدون فايدة ... و بدون دستة الجاتوه .. و مش حاسس براحة لا قبل الأستخارة ولا بعدها... الحلواني بقى يشوفني جيّ من أول الشارع يلفلي دستة الجاتوه قبل ما أوصله ... ما أنا كل يوم باخد منه تلات أربع دست ... و صديقي دوخ أمه معاه و شاف عروسة ممتازة جدا طبعا أمه قالتله ما فيش بعد كدة ... قالها هي كويسة بس لما بتضحك لثتها بتبان شوية !!! أمه طبعا من زهقها قلعت الشبشب و جريت وراه ... قالتله هي اللي هاتعيش معاك عمرها هاتشوف ضحك .....في النهاية هاتتجوز أن شاء الله ما تسألش أزاي فالجواز مشيئة علوية ... و هاتلاقي نفسك بتطبق المثل القائل ........ الأنسان هو الكائن الوحيد الذي ينام مع عدوه في فراش واحد ..............

باهزر و الله الحمد لله أتجوزنا جواز صالونات و بالعقل و مبسوطين و سعدا بفضل الله و كرمه ...

أصبر و دعواتي لك بالتوفيق ... و أنت يا باشمهندسة أجلي الضحك لبعد الجواز .... ربنا يوفق الجميع

تم تعديل 10 أبريل 2008 بواسطة سهران

[Diab]

القصة انتهت

لم يكتمل ذلك المشروع

وما زلت ابحث عن بنت الحلال

دعواتكم

كان الله في عونك

:ninja:

[~Heba~]

القصة انتهت

لم يكتمل ذلك المشروع

وما زلت ابحث عن بنت الحلال

دعواتكم

كان الله في عونك

:ninja:

جنيت على روحك يا دياب

هجووووووووووووووووووووووم :lol: po:: po::

[النجم الثاقب]

تمنياتى بالتوفيق لك يا أستاذ أحمد وبزوجه و ذريه صالحه

أستاذ سهران ..... جامده قوى الحته دى

و صديقي دوخ أمه معاه و شاف عروسة ممتازة جدا طبعا أمه قالتله ما فيش بعد كدة ... قالها هي كويسة بس لما بتضحك لثتها بتبان شوية !!! أمه طبعا من زهقها قلعت الشبشب و جريت وراه ... قالتله هي اللي هاتعيش معاك عمرها هاتشوف ضحك

تمنياتى للجميع بالتوفيق :wub:

[احمد هادي]

تمنياتى بالتوفيق لك يا أستاذ أحمد وبزوجه و ذريه صالحه

:wub:

عزيزي النجم ....لك مني كل الحب واجمل الامنيات بالتوفيق

تحياتي

[Nonna]

لوالدتي :happy:

عادة تشبيه في الاول كنت استغرب له و مع الوقت بقى عاجبني :blink:

عاجبني لدرجة انى بقيت باستخدمه كتيييييييير :blush2: :blink:

_وده طبعا بقى يغيظها :sad: _

هو ايه بقى التشبيه؟!! wst::

كانت تقول لي بصي من تاني تالت مرة ماارتحتيش خلاص

كفى الله المؤمنين شر القتال

اه

اصلها مش أكلة باميا

أكلة باميا يا ماما!! :lol:

ببساطة ماما قالتلي ان واحد ادامه طبق بامية

و هو مش طايق الباميا

مش حاسس انه عاوز ياكل باميا

ما بيحبش الباميا

ياكلها ازاى؟!!

اذا اكلها غصب عنه نظام تعالي على نفسك يا بني

عشان خاطر مش عارف مين

او لاي اعتبارات اخرى

هيرجعها

_معلش بقى في ده الكلمة wst:: _

لكن ممكن يشيل البامية ويجيب حاجة تانية ياكلها

حتى لو كانت الحاجة التانية مش بجمال و روعة الايـــــــــــــــــه؟!!

البامياااااااااااااااااااااا :lol:

سؤال معلش بقى

فضولي اصله يقتلني :happy:

الطرف التاني تقبلت الموضوع ازاى؟!!

يعني زعلت حزنت حاولت تفهم ليه و ايه الاسباب ولا فركش فركش ؟!!

_حشرية انا_

[احمد هادي]

كل ما اعرفه هو انها قالت لأحدي قريباتي عندما قابلتها صدفه بعد ذلك بشهور

أنها لن تدعي عليا

[gopy]

أخى أحمد

ربنا يوفقك لبنت الحلال الى تملا حياتك بالمودة و الرحمة ويزيد المجتمع الأسلامى الصالح بيكم أسرة

يا صديقى الزواج ده رزق لاحيلة فيه لكنه محتاج السعى والدعاء وثق أنه لما هاييجى ناصيبك هتلاقى الأمور متسهلة وهتلاقى نفسك مستريحة فى كل خطوة بتخطوها لإتمام هذا الزواج واعلم ان علامة الإذن التيسير

يا أخى نصيحة لا تبحث عن الحب "أعنى به العشق" قبل الزواج فهو وهم فبالله عليك كيف تحب من لم تعرفه وكيف تعرف من لم تعاشره فالبيوت لا تبنى على الحب ولكن تبنى على القبول و التفاهم وتستمر بعدها بالمودة و العشرة الطيبة والحب إن شئت

أسعى وادعى ونشاء الله هايوفقك لأنسانة صالحة تسعدك

وبالتوفيق يا أخى

[إيزيس]

معلش أنا داخلة لسبب تاني سامحوني

أحب أقول لنونا :

إنتي جميلة و بيعجبني عقلك جدا وإنك دايما ترجعي لكلام ماما

مامة نونا:

تحية و تقدير

[kazabaza]

اصبر و ساعت ما ربنا هيريد هتلاقي الموضوع خلص لوحده

هييييييييه تنهيده كبيره فكرتني بالماضي

بص يا ابوحميد

انا شخصيا الموضوع اخد مني ثلاث مواسم تزاوج "اجازات يعني"

بس انا كنت مقضيها تورت و بعدين حسيت ان المحل كله عرفني انا ووالدتي

فقلبت شويه علي الشيكولاتات و بعدين رجعت للتورت تاني

و كانت كل اجازه شعارها

Mission Impossible Fining Wife in 30 Days

في النهايه الي كاتبه ربنا بيكون