برتقال الملك!

[Sherief AbdelWahab]

يقال أن الكوميدي الأشهر إسماعيل يس دخل السجن بتهمة العيب في الذات الملكية ، والتهمة له هي نكتة دارجة في ذلك الوقت اسمها "برتقال الملك" ..عوقب لأنه كمونولوجست قالها في مكان عام!

على ذكر برتقال الملك ، صدع التليفزيون رأسنا طويلاً بنقل تمثال رمسيس الثاني ، بل وأمعن في السخرية من عقولنا بتذكيرنا من حين لآخر بأنه الناقل الحصري الوحيد للحدث على مستوى العالم!

معلوماتي أن ميدان رمسيس لم يكن المكان الأصلي للتمثال ، وأنه سبق نقل التمثال إليه يوماً ما ، أي أن الحدث عادي ، وليس مثل كسوف الشمس مثلاً..وأن هذا النقل قام به بشر في يوم من الأيام بإمكانيات أقل وتكنولوجيا أقل..

ليه الضجة دي ؟

خلص الكلام

[Sherief AbdelWahab]

حقيقةً لم يكن أداء التليفزيون في نقل برتقال الملك بأقل سوءاً من الحال الذي آل إليه تمثال الملك!

رشا مجدي نجمة الافتعال هي والكابتن أحمد بصيلة لم يديرا العمل بشكل جيد أبداً من الاستوديو ، أما المذيعون المعلقون من مكان الحدث فكانوا نكتة النكت .. حاجة تفكرك بمشهد جمال إسماعيل - معلق كروي في الفيلم- وهو بيعلق بشكل كروي على حفل زفاف في الفيلم!

أموت وأعرف ليه نقلوه حصرياً ، وليه شددوا ع النقل الحصري ، فرحانين قوي بمنظر الجزيرة وهي بتكتب "نقلاً عن التليفزيون المصري"؟ زي منظر الراجل اللي وقف على كرسي عالي علشان يقول لمراته : يا أُذعة!

خلص الكلام

[se_ Elsyed]

يا شريف حرام عليكم ما تدوسش عالجرح .. ما هي مش ناقصه قرف

عارف إني كتبت موضوع عن التغطية الإعلامية للكسوف الكلي للشمس اللي حدث منذ شهور قليلة وعن المهازل والإستخفاف بعقول المشاهدين من قِبل ما يسمون بالمذيعين الجهلة اللي كلهم جايين بالواسطة .. لكن في الأخر قرفت وقطعته وقلت والله مانا كاتبه ومش لازم أزيد مواجع الناس

بس في فقرة بسيطة في الموضوع كنت بأتحدث فيها عن شيء إسمه أحمد طه كان بيغطي الكسوف من أحد القرى الحدودية في ليبيا والقريبة من السلوم اللي حدث فيها كسوف كلي برضوا وشاهده بابا حُسني مع باقي العائلة المالكة ..

الشيء أحمد طه ده كان عمال يوصف الكسوف وبيقول إن يتزامن مع حدوث الكسوف .. حدوث ظهور واضح لأحد النجوم الشهيرة في السماء واللي يُمكن دلوقت أن نراه بالعين المُجردة .. فأخينا في أستوديو الإذاعة بالفضائية بيقوله : نجم ؟.!!!! بس ده العلماء بيقولوا إن اللي هانشوفه ده هو كوكب عطارد .. فالطه رد عليه وقال له " أيوه مانا عارف .. بس أنا قلت نجم عشان أقرب الفكرة للناس ............ شوفت السفه والسطحية وصلت لغاية فين ؟

المذيعة اللي كانت في السلوم فجأة صرخت وزعقت ونكشت شعرها ... فالمذيعة صاحبتها اللي بتقعد معاها في فسحة واحده في ماسبيرو بتقولها في إيه ؟ فقالت لها إن السياح عمالين يسقفوا ومنبهرين لإنهم فوجئوا بالكسوف .... والله العظيم هذا حصل يا عم شريف

وتقولي التغطية الإعلامية لنقل التمثال ؟

يا راجل دول لو كانوا جابو مخرج الأفراح اللي بينقل لنا ماتشات الكوره الأخ محمد نصر الدين .. كان عمل تغطية أفضل من دي ...

دي كانت أشبه بفرح بلدي الناس عماله ترقص وتهيص فيه

بس في الأخر أقولك يا شرشر " هي دي الريالة الإعلامية يا ولدي "

[أبو محمد]

معلوماتي أن ميدان رمسيس لم يكن المكان الأصلي للتمثال ، وأنه سبق نقل التمثال إليه يوماً ما ، أي أن الحدث عادي ، وليس مثل كسوف الشمس مثلاً..وأن هذا النقل قام به بشر في يوم من الأيام بإمكانيات أقل وتكنولوجيا أقل

لأن أيامها ماكانش فيه قنوات فضائحية ، وسبوبة ، وأيامها كنا لسه فى أول الصف الإعلامى .. دلوقت بقى والبركة فى "الشريف" ، كله بقى :

under control