الشرطة في خدمة الشعب ( اللي بيدفع )

[se_ Elsyed]

موضوع قديم ومتكرر وهو تحدثنا عن فساد جهاز الشرطة على أساس يعني إن حاميها حراميها :

- الموقف الأول : أخويا ااصغير نزل معايا الأجازة دي لكنه قعد 10 أيام فقط .. فقبل ما يسافر ذهب إلى مكتب تصاريح العمل بالخارج والذي عادة بيتبع أقسام الشركة وتقريباً بيكونوا في نفس المبنى أو الحيز .. وأنا شخصياً قعدت فترة طويلة مختصورة إن إدارة الجوازات وإدارة تصاريح العمل من أنظف وأنزه إدارات هذا الجهاز الحيوي .. المهم ذهب ليتسلم تصريحه في اليوم الثاني كما وعدوه فقالوا له إن ده مش ممكن ...

ليه يا حكومه ؟ لإن يا حبيبي فيه تشابه بين اسمك وبين إسم شخص أخر عليه قضية سرقة تيار كهربائي !!!!

طب وأنا مال أهلي .. واحد سارق عمود نور يقوموا يشتبهوا في واحد تاني .. وبعدين إحنا في القرن الخمسة وعشرين دلوقت وفي إستخراع إسمه كمبيوتر ورقم قومي وعنوان وتاريخ ميلاد ومحل إقامة وبعد ده كله تقولوا إن إسمي تشابه مع اسم واحد تاني ثم إن السرقة حصلت إمتى وأنا مسافر أساساً ...

وفضل على الحال ده إسبوع رايح جاي عليهم وهما يقولوا له هانحل الموضوع هانحل الموضوع لحد ما دخل للباشا العميد رئيس المكتب اللي أعرفه من زمان واللي ناقص له شهور قليلة ويترقى لواء مساعد وزير للداخلية .. يقوم يقول له إن مشكلته صعبة ولكن في إيده حلها .. أبوس إيدك يا باشا عايز أسافر والناس في السعودية وحوحت وعايزييني أرجع بسرعة .. فكان الحل هو يا سادة أن الباشا أبو رتبه كبيرة طلب... كرت شحن موبيل من أبو 100 جنيه .. ورزمة ورق تصوير A4 .. الولد سمع كده وذُهل .. فهو لم يتصور إن العفانة والخسة والإبتزاز الرخيص يوصل لهذا الدرجة المُنحطة .. يا أخي ده المثل بيقول إن عشقت أعشق قمر وإن سرقت إسرق جمل .. أومال سيبت ايه للشاويشية ولأمناء الشرطة .. وبالفعل راح جري إشترى المطلوب للباشا اللي ناوله التصريح وأصر على أن يأخذ نمرة تليفونه هنا . عشان لو إحتاج حاجة من الأراضي الحجازية .... لا تعليق .

- الموقف الثاني : حصل معي شخصياً حيث إني نزلت الأجازة بعربيتي ورجعت طيران ... وأنا اساساً لا أحمل رخصة قيادة مصرية لإني ما عنديش وقت في الأجازة استخرجها ... المهم كنت واقف في إشارة تقاطع مصطفى النحاس مع عباس العقاد والأمور ماشيه هادية والإشارة فتحت ولسه بأتحرك إلى أن وجدت الواد أمين الشرطة اللي واقف هناك على طول ( هناك في كشك مرور ثابت بيبقى جواه نقيب شرطة وبيسرح العيال أمناء الشرطة يقلبوا الناس ) لقيت الأمين بيرمي نفسه على كبوت العربية وهي بتتحرك ووقفت طبعاً وقلت حرام أدوسه طبعاً لما بيشوفوا إن نمر العربية جمرك بيفرحوا .. طلب الرخص فرحت مديله الرخصة السعودية وأوراق العربية السليمة .. فتهلل وجهه لإنه وجد زبون سُقع .. فقالي أركن على جنب فنزلت أنا وأخويا .. وهو شرح الموضوع للباشا النقيب اللي قالي إن دي مخالفة لإنني لا أحمل رخصة مصرية وإنه هايسحب الورق .. فطبعاً ما سكتتش وقلت له تسحب الورق ليه .. إنت لك عندي إيه أساساً ؟ إذا كانت دي مخالفة فأخرك كام يعني وإيه قيمتها ؟ فقال لي إن قيمة المخالفة هي 51 جنيه وإني لازم اروح مع الواد الأمين أدفعها في قسم مدينة نصر ... يا سلام وكل ده عشان 51 ج .. وبالفعل الواد ركب معانا .. ولقيته بيجر ناعم ويا باشا ومش يا باشا ... فقلت له باشت إيه وزفت إيه .. مانا رايح جاي عليكوا ييجي 50 مرة في اليوم إشمعنى النهاردة ... ... المهم خرجت له 25 جنيه ورميت هم له وكان هايبوس إيدي وراح مرجع لي كل حاجة ..

أتاري بقى إن الباشا النقيب بيعمل له مقطوعية في اليوم وعليه توريد مبلغ معين من تقليب البشر .. واللي يزيد عن المقطوعية دي ياخده الأمين .... عمار يا مصر .

- الموقف الثالث : وده اللي موتني على نفسي من الضحك .. أكتشفت إن الفيلا اللي جنبي تخص عميد شُرطة .. الباشا العميد ماشي بعربيته الشاهين من غير نمر لا أمامية ولا خلفية ... حكومة بقى وإحنا الشرطة وما يهمناش من أي معيز .. مش بس كده .. ده طول اليوم مذنب واحد من عساكر الشرطة السواقين الغلابه ومعاه بوكس شرطة ذو اللون الأزرق والواد قاعد طول اليوم قدام البيت في الشمس تحت أمر الباشا وأولاده ... الموقف اللي يهلك من الضحك .. إن في اليوم على المغرب كده لقيت بوكس تاني جاي قدام بيته ومحمل ناس ورا وقدام .. فقلت : ايه ده هو الراجل فاتح في بيته قسم قطاع خاص ؟ ولا بيجيب المجرمين يستجوبهم من منازلهم ولا إيه ؟ ... أتاريهم طلعوا ضيوف جايين له وشكلهم إتزنقوا في مواصلة فراح مودي لهم بوكس شرطة يجيبهم.. وولاده طلعوا من جوه وإتفضلي يا طنط وأتفضل يا أونكل ... فلقيت نسيبي اللي كان قاعد معايا بيقول لي : وأنا أقول عربيات الشرطة بتروح فين .. وليه كل ما يحبوا يطلعوا كبسه يقوموا مبلطجين على اي ميكروباص معدي في الشارع ؟ ... وبحبك يا مصر

[لخبطه]

مش تبرير

بس اظن سوء الحالة طال حتى القيادات و الضباط يعنى الناس دي لو بتاخد من 2000 لفوق فدا بردو مبلغ تافه مقارنة بطاغوت الغلاء .......... اكيد الغلاء طايلهم لذلك أنا اظن منذ سنوات ليست بكثيره ماكنتش الرشوه عيني عينك وبالتدني دا ........ الموقف دا اللى انته بتحكيه ياسي السيد انا عمري ماتصورته بس كونك انته حكيته فانا اصدقه عين اليقين

[واحد تاني]

الموقف الاول بتاع تصريح العمل ده حصل معايا حاجة شبهة شوية ...

من كام سنة اضطريت اقطع الاجازة لظرف طارئ فى العمل والمفروض اسافر بكره ... عدلت الحجز (طبعا بواسطة فى شركة الطيران) ... وظبطت اموري كلها ... وكان باقى فقط تصريح العمل ... وانا عارف انه بيخلص فى نفس اليوم ...

طلعت على مكتبهم اللى فى سموحة ودفعت الفلوس واديت لهم التصريح القديم ... استلم امتى ؟ ...

الهانم قالت هو يخلص على الساعة 6 مساء بس اضمن تعالى بكره الصبح تلاقيه قاعد فى انتظارك (ده التصريح)

رحت الساعة 6 ... لا والله ... لسه يا باشا ما خلصش ... تعالى بكره تلاقيه جاهز

المهم رحت تاني يوم (اللى انا مسافر فيه) ... قالولى لسه ...

طيب ليه يا محترمين ... لعل المانع خير ...

مش عارفين ... استنى لما نشوف...

شافوا ... آآآه ... دا الموضوع سعادتك محتاج كمان 3 ايام ...

3 ايه ؟ انا مسافر كمان كام ساعة بتصريحكم ده او بدونه ... ليه ان شاء الله 3 ايام ... (كان نفسي اسمع سبب مقنع)

اصل احنا يا باشا كل 3 سنين لازم نعمل تحريات عن الشخص اللى عاش 3 سنين بره ده ... طيب وانا مالى ما تعملوا

المهم ... فين رئيسكم ... دخلت للسيد الاميرالاي ... مدير ادارة تصاريح العمل ... قلت له انا مسافر كمان شوية واكيد فى طريقة تخلصوا بيها شغلكم اللى انا مش عارفه ... بحيث اني اسافر (طبعا ده بعد مقدمة تعارف)

قالي طيب حيث كده ... يبقى انا هديلك الاوراق الرسمية بتاعتنا دي تخلصها بنفسك بقى وانت وشطارتك ... هتروح ادارة تنفيذ الاحكام ... وادراة البحث الجنائي ... وامن الدولة

و كان ما كان ... فى ادارة البحث الجنائي قلت اجرب ادخل بنفسي من غير ما استخدم تليفونات ... لقيتهم دخلوا فى سكة انت ساكن فين ...

ليه ...

اصل فى واحد اسمه شبه اسمك عليه قضية نفقه ...

قلت بقى لازم التليفون ... دخلت على الاميرالاي مدير ادارة البحث الجنائي واديته التليفون ... طلع معايا وخلاهم مضوا وختموا ...

وبالمثل فى ادارة تنفيذ الاحكام ... اديت التليفون للاميرالاي مدير الادارة ... طلع معايا خلاهم مضوا وختموا ...

وكذلك فى امن الدولة اللى لقيتها فى مكان عجيب اصلا ... تليفون لسعادة الكوموندان هناك راح مضى وختم ... وسافرت وانا بقول عمار يا مصر ... وهما بابتسامتهم المعهودة بيقولولى ... نورت مصر

[صبح]

طبعا أنا أصدق كل ما تقول وأكثر

بدءا من استخرج البطاقة للرخصة لدفع المخالفات

هنا يتم توقيف السيارات الفخرة (واخد بالك :wub: ) والتي ليس بها أي مخالفات ظاهرة علشان الأبيج

أما أن تكون السيارة سيات مهكعة فلا يتم توقيفها حتى ولو بدون نمر

أكتشفت إن الفيلا اللي جنبي B) :unsure: تخص عميد شُرطة ..