هيهربوا فى فرنسا ؟؟؟

[mido_cyrix]

السلام عليكم يا جدعان مصر

اخوكم احمد من الشرقيه واقع فى مشكله

انا ليه جماعه صحابى ناويين يسافروا فرنسا سياحه لمدة 6 ايام

منهم 3 شباب ناويين يهربوا ويقعدوا غير شرعى بيقولوا هيدوروا على اى شغل واى حته يباتوا فيها

المهم رجليهم تحط ارض وطنهم الجديد

الجماعه دول لسه فى كليات ولسه حتى معرفوش الجيش ايه اخباره

ده حتى واحد منهم شطح شويه بيقول ممكن كمانلو ملاقاش حاجه فى فرنسا -- يركب القطار الاوروبى ويروح ايطاليا

بيقولوا ده احسن من مركب الموت بتاعة ايطاليا واللى وصلت تذكرتها 30000 و 40000 جنيه

وطبعا لانى متمرس على الانترنت طلبوا منى اسأل

وطبعا لانهم اصدقاء عمرى خايف طبعا عليهم

ممكن اعرف هم لوعملوا كده ايه النتيجه

و ازاى بعد ما يهربوا يحولوا اقامتهم شرعى

اوممكن اللى يعملوه ده ينجع

انتوا طبعا عارفين انا القعده هنا مش جايبه همها

ولو فضلوا هربانين مده كبيره يرجعوا مصر ازاى ؟؟؟

وايه اللى ممكن يحصلهم لو رجعوا

من الاخر الناس دى لو لاقت سكه يفضلوا هناك مش جايين تانى الا لما يبقى معاهم اللى يضمنلهم حياه كويسه

فا ايه النصيحه ؟؟؟؟؟

ولو فيه سكه مش تبخلوا عليهم بيها والا هتسمعوا فى النشره عن حالة انتحار جماعى

معلش طولت عليكم

[Salwa]

موضوع السفر والهرب وشغل الانتحار ده مينفعش لمليون سبب..

لو مصممين ينتحروا .....يبقى الافضل ينتحروا فى بلادهم على الاقل حايلاقوا اللى يدفنهم ..

انهاردة بانهاردة فى اميركا وكل اوروبا .........فيه حذر لا يتخيله عقل ...من ناحية اى عربى ..

امبارح صدر قرار بأن يوضع تحت الملاحظة ( واخد بالك ) ....كل من يسمى او يكون لقبه..........محمد او احمد..

خصوصا لو واحد بهذا الاسم حاول ارسال حوالة او استقبل اى حوالة ........!!!...المطارات ومحطات القطار والاتوبيسات عليها تفتيش دقيق جدا..

والخوف فقط من شئ واحد مرعب اكثر......ان لو اخدوا واحد بدون اوراق ممكن يروح ورا الشمس ...

وشوف بقى امتى يسيبوه.....ده لو سابوه.

واحيانا الشاب من دول مش بيلاقى شغل ............واحيانا ( بيحاول ينتحر )....واحيانا ( بياخد حبوب يحاول يخلص من حياته )....ويكتشفوا بقايا شاب مرمى على قارعة الطريق ..مصاب بأمراض لاشفاء منها ..وطبعا حتى بيستخسروا فيه انهم يرجعوه بالطائرة لبلده........وعلى السجن اسهل شئ..بتهمة حيازة مخدرات او التسول او اى شئ من هذا القبيل ..

انهاردة فيه قانون جديد ...........واخد بالك !!!

لو صاحب عمل شغل واحد بدون اوراق فيه غرامة تزيد عن ستة الاف يورو وممكن قضية تؤدى حتى لغلق مكان العمل

ولهذا نجد ان محدش بيغامر دلوقت ...

زمان كانوا بيستسهلوا ....ويشغلوا ناس كتير من المغرب وموريتانيا والسنغال .....فى جمع المحاصيل الزراعية ..وكان العمال يقبلوا بأقل من ( عشر ) ما يحصل عليه العامل الاوروبى .......ويقبل ينام كل ستاشر فى حجرة ...

الى ان حدثت حادثة مشهورة من حوالى ثلاث سنوات .........واعتدى شاب مغربى على صاحب العمل وزوجته وقتلهما لانهما كانا يعاملاه كالعبد...

نظرة الاوروبى للشخص ....او المهاجر الغير شرعى .........نظرة مؤلمة جدا ..........فيها تحقير وعدم احترام واستغلال غبى ..

ممكن يكون هذا الانسان مؤهلات ...لكنه يائس من بلده ...لكن ؟؟ بهذا كأنه يهرب من النار .......الى نار اشد..

قول لصحابك........

فرنسا مش بنات وديسكو ....

فرنسا او غيرها مش ناس فاضية وعايشة مش هاممها ...

هو لسا فيه ناس بتفكر كدة ؟؟ شايفة بس صورة وردية ؟؟؟

الفرق بين الشاب المصرى والشاب الاوروبى ..ان الاوروبى بيعتمد على نفسه وهو عنده اقل من ستاشر سنة ....وبرضه بيذاكر ....وبرضه بيفكر يسافر ...( محدش راضى بحاله فى اى مكان فى العالم ) ....بس اهم شئ درجة التعليم ...وتتقن ايه ؟؟

خليهم يكملوا تعليمهم .......وساعتها ......فرنسا اللى حاتجرى وراهم ...فرنسا وغيرها ..

وصدقنى ....

الانسان الناجح....ناجح فى اى مكان ...

واللى عاوز يعمل قرش...........مصر اكتر بلد على مستوى العالم ممكن تعمل فيها قرش حلو ..

بس فكر...

فيه هنا فى المحاورات مواضيع كتير لمشاريع كتير ...........والبداية مبالغ بسيطة جدااااا...

ارجو الا يكون كلامى ضايقك بعض الشئ ...

لكنى فقط اوضحت لك الحقيقة ........آسفة .....بعض من الحقيقة ..

سلام.

[mido_cyrix]

شكرا سلوى على الرد

هو اللى حصل ان واحد منهم ابن عمه قاعد فى فرنسا وعامل مطعم كبير هناك فى ليون

هو بس عايز يروح سياحه ويعمل تصريح عمل هناك من ابن عمه ويصحح وضعه

هم عايزين يعرفوا ده حقيقى ممكن

يعنى تتحول من سياحه لعمل لو لاقوا شغل هناك

طايب ايه حتى الاوراق اللى هتتطلب عشان يعمل تصريح العمل ده

هم دلوقت مش رايحيين يدوروا هم عارفيين هيشتغلوا فين

[م الغزالى]

شوف ياميدو انا حأجيب لك من الأخر

ولا جاك شيراك نفسه يقدر يغير فيزا لواحد من سياحة لعمل يعنى هو لو عاوز يخدمه يبقى من الأول يبعت له عقد عمل لانه لازم يدخل بتأشيرة عمل

اما بالنسبة للناس إل عاوزة تهرب أنا قعدت سنة تقريبا فى فرنسا وكان بيقابلنى حكايات من هذا النوع احب اقول لهم حاجة :

اولا كان زمان بالفعل ممكن تقعد وطبعا البوليس لو مسكك بيسلمك للسفارة وهما كانوا فى الحقيقة فى الموضوع ده بالذات متساهلين ويقولوا منعرفش عنه حاجة و يرفضوا إعطاءه وثيقة سفر فبيضطروا يفرجوا عنه

بعد ساركوزى وزير الداخلية الجديد ما أتى ببداخبية زادت الأمور صعوبة والأن ترحيل

وحتى لو لم يقبض عليك البوليس فالمعيشة التى يعيشها هؤلاء الناس غير ادمية بالمرة غير ان لو وفقت ووجدت من يشغلك حيكون من بلاد المغرب العربى فى أشغال النقاشة وماشابه ذلك ولن يعطيك أجرك والجيد منهم يعطيك البعض منه والذى لن يسمن ولايغنى من جوع

وصدقنى فيه ناس بتبقى عاوزة ترجع تانى اسبوع ولكن خوفا من خيبة امل الأهل او عدم القدرة على سداد المبالغ التى تم انفقها على تكاليف السفر هو مايجعل هؤلاء يتراجعون عن العودة ويظلون فى تلك الحلقة الجهنمية والتى فيها يفقد المرء فيها كرامته وأدميته و أحلى أيام عمره

تقبل تحياتى

[ايهاب سالم]

خليهم يكملوا تعليمهم .......وساعتها ......فرنسا اللى حاتجرى وراهم ...فرنسا وغيرها ..

واللى عاوز يعمل قرش...........مصر اكتر بلد على مستوى العالم ممكن تعمل فيها قرش حلو ..

-_- :ph34r: :wub: :D :D

[محمد عبدالعزيز]

يارب انتقم لنا من الذى جعل الشباب يفكرون بهذه الطريقة اليائسة البائسة

صحيح كما تقول مدام سلوى هو لسه فى ناس بتفكر بالطريقة دى؟

لسه فى ناس بتستلف وتعرض نفسها للمخاطر ويمكن الموت عشان فاكرين إنهم بره مصر هيلاقوا الدنيا بمبى؟

أنا بصراحة مندهش جداً من حال المصرى اللى يخللى الواحد يتجنن!

يعنى الشباب مستعد إنه يعمل أى حاجة مهما كانت درجة الخطورة ولكن عند الاعتراض على الأوضاع السيئة أو المشاركة فى مظاهرات أو فعاليات لمجرد التعبير عن الرأى نجده يملأ مقاعد المتفرجين؟!

هو احنا ليه كده؟

يا أخ ميدو أنا معرفش إذا كان اللى إنت بتسأل عليه ممكن ولا لأ... بس أنا أرفضه فى كل الأحوال لأنه ببساطة مش هو الحل... وحتى إذا كان حل فهو على سبيل المسكنات وليس حلاً جذريًا, والمفروض إن الشباب يبقى عنده روح الإصرار والعزيمة ويرسم مستقبله بإيده ويكون له دور فى الحياة مش بس مجرد آلة أو ماكينة بتجيب فلوس وخلاص... والدور ده ماحدش هايقدمه له على طبق من فضة, لازم يكون فى تضحيات ولازم يكون فى جهد.

[Salwa]

مساء الخير ..

السيد /ايهاب سالم..

وضعت لى علامات تعجب .....لماذا ؟؟...هل لانى قلت ان مصر ممكن تكسب فيها اكتر من برة ... ؟؟

طيب....!!!

مش ده احسن ما ييجى ويتبهدل برة ...او احسن ما يسيب دراسته ؟؟

واللى يخللى واحد مهندس مثلا .....والا طالب جامعة مش حايكمل دراسة ....ييجى ويشتغل طباخ والا زبال ..آسفة اقصد مساعد زبال ...آسفة اقصد مساعد مساعد الزبال لان الزبال الرسمى بيقبض مرتب ثابت كبير وعنده اوراق طبعا ...وبيفضلوا يكون من اهل البلد لانه ده شغل حكومى .......

يعنى يرضوا بالهم والهم مايرضاش بيهم (( وهم ولاد ناس اساسا يعنى )) ...

طيب ما يشتغل نفس الشغلة فى بلده اكرم بقى ؟؟...اشمعنى يرضى بالهوان برة بس ؟؟

هو فيه هوان اكتر من كدة ؟؟؟

واما عن المكسب فى بلدك فاليك امثلة ....

اليك مثال بسيط من مناقشة الاخوان هنا ..

http://www.egyptiantalks.org/invb/index.ph...=13740&st=0

وبالنسبة انى بنقول لو كملوا تعليمهم ....فرنسا هى اللى حاتجرى وراهم ...

ايوة ياسيدى .....فرنسا هى اللى حاتجرى وراهم ...فرنسا وكل اوروبا ..والكلام ده حقيقى ...

سمعت عن حاجة اسمها c.v.؟؟..........طيب........يعنى التاريخ الدراسى والعملى ...كدة بالبسيط ..

اى منشأة فرنسية او اوروبية لو وصلها تاريخك الدراسى والعملى ...وكنت متفوق ...حاتلاقى اللى بيبعتلك حتى من مكان انت لم ترسل له اى شئ ...(..اعتقد مفهوم ).

ياريت نستمع شوية لصوت العقل ...

السيد / ميدو ...

((صاحب الموضوع ..))

لو اصحابك او انت عندكم الحل .....

طيب ليه وضعت هذا الموضوع اساسا ؟؟؟...وليه بتسأل لما كل حاجة واضحة امامك ؟؟ وليه بتقول اصحابى ...وكام حكاية كدة مش ماشيين مع بعض ؟؟

طيب ماكنت تسأل قريبكم ده اللى عنده مطعم وحايبعتلكم ........وحايديكم اقامة ؟؟؟

طيب ما يشرح لكم ازاى ........ازاى .......ازاى يعنى حايحول لكم فيزا زيارة لاقامة ثابتة ؟؟

شوف يابنى ....( مانت فى سن ابنى ) ..

مابنى على باطل فهو باطل ....

لو بدأت طريق... بطرق ملتوية للوصول .........فلن تصل الى شئ ..

ابدأ صح...

وعلشان تبدأ صح ............لازم قريبكم يبعت لك عقد عمل وتاخد فيزا عمل من مصر ....او تاخد فيزا اسمها فيزا اسبيسيال ....(( ده لو اخدتها )) ...دى الوحيدة اللى ممكن تتغير وتبقى فيزا للعمل ....وكمان (( فى بعض الاحيان فقط ))

عاوز تسمع النصيحة ... .اسمعها .( وكفى الله المؤمنين شر القتال ) ..بلاش بهدلة ....يعمل لكم اوراق صح قبل ما تروحوا ....هو ده المفروض وهو يقدر يعمل كدة لو حقيقى عنده اى منشأة باسمه ومعندهوش مشاكل مع ضرائب او غيره وسمعته حلوة ......انا بنتكلم معاك بالحق ........لوجه الله ...وصدقنى .( ماليش صالح فى عدم ذهابكم مثلا )

مش عاوز ؟؟

انت حر ...

بس متبقاش تبكى ...وانت لوحدك ....فى مكان ما ..

سلام ..

[Diab]

معلش يا مدام سلوي انا رأي من رأي إيهاب سالم

حضرتك بتقولي طيب ما يشتغل في بلده أحسن

يشتغل أيه في بلده ويا خد كام

فرضنا حيشتغل بيه في مصر وزبال في فرنسا

لو خد مرتبه باليورو حتي لو قليل فأكيد لما يحوله لأهله في مصر حيجيب أكتر من أضعاف مرتبه في مصر

الحاجة التانية كفاية أنه حيقدر لو حب يكمل دراسته برة حياخدها من جامعة أوروبية و ده حينفعوه كتير في أي بلد

ده كفاية أن معاه لغة أجنبية أو أتنين

طبعا حتيقسوا ده بتعب الأنسان والغربة

أذا كان الواحد ميتغربش و هو شاب يبقي يتغرب أمتي ؟ لما يبقي صاحب مرض و كوم عيال

لكن هذا لا يعني أني أوافق علي الدخول لأي بلد بطريقة غير شرعيةو لا أنصحهم بتلك الخطوة ولكن

تلك نقرة وتلك نقرة

تم تعديل 1 سبتمبر 2006 بواسطة Diab

[حشيش]

فى دول الإتحاد الأوروبى لا يسمح بحال من الأحوال تحويل فيزة السياحة إلى فيزة عمل كما تفضلت الأخت العزيزة سلوى بالتوضيح باستفاضة ... فى حالة الحصول على فيزة دراسة من جامعة معترف بها وسداد مصاريف الجامعة بالكامل تسمح بعض الدول الأوروبية (وليس كلها) للطالب بالعمل فى فترة الأجازة الصيفية .... لا أنصح بالإقدام على ما يفكر أصدقائك به .... تحياتى

[princedody]

فى دول الإتحاد الأوروبى لا يسمح بحال من الأحوال تحويل فيزة السياحة إلى فيزة عمل كما تفضلت الأخت العزيزة سلوى بالتوضيح باستفاضة ... فى حالة الحصول على فيزة دراسة من جامعة معترف بها وسداد مصاريف الجامعة بالكامل تسمح بعض الدول الأوروبية (وليس كلها) للطالب بالعمل فى فترة الأجازة الصيفية .... لا أنصح بالإقدام على ما يفكر أصدقائك به .... تحياتى

الأخ المحترم حشيش

تحية طيبة

بداية كل عام وجميع الأخوة المصريين فى أوربا وكافة الأمة الإسلامية بألف خير

مع إحترامى الشديد لكلام سيادتكم ولكنى أختلف معكم وذلك للتناقض الواقعى :

كيف أنه يمكن لمن دخل أى من الدول الأوربية بطريقة غير شرعية بأن يسوى حالتة بعمل إقامة

وفى نفس الوقت لا يسمح لمن دخل البلاد بطريقة شرعية يعمل إقامة؟؟؟؟؟؟؟؟؟؟؟؟؟؟؟؟؟؟؟؟

ولعلم سيادتكم أنا أعلم كثير من الشباب دخلوا أوربا بفيز سياحة وقاموا بعمل إقامات منهم الكثير فى إيطاليا وألمانيا وفرنسا أيضا

كما أعلم من دخل البلاد عن طريق مراكب ليبيا ودخلو إيطايا ومنها الى مختلف الدول الأوربية والآن لديهم إقامات شرعية فى أوربا بالله عليكم جميعاً تفسروا ذلك

وبصراحة لا أعلم لماذا يتسم وينادى جميع المصريين الموجودين بأوربا بالمثالية ويصروا على أنك عندما تقوم بعمل c.v خاصة بك فإن أوربا هى التى تجرى وارك

وأيضاً ألاحظ من مداخلات أغلب المصريين بأوربا أنهم دائماً يعطونا إحساس إن أوربا مقبرة بالنسبة للمصريين الجدد ومفيش شغل طب لو مفيش شغل فيها كان ليه الشخص يسافر تهريب أو بفيزا سياحة ممكن تكلفة أكثر من 45000 ج وبعدها نجده يرسل لإخوانه وأقربائة لكى يلحقوا به مهما كانت التكلفة ؟؟؟؟؟؟؟؟؟؟؟

وأيضا من أغلب مداخلات المصريين بأوربا تحس أن الجميع علماء وأن أوربا هى التى جرت خلفهم وأنا على يقين أن أغلب المصريين فى أوربا هم ينقسمون الى ثلاثة أنواع :

1. منهم من جرت خلفهم أوربا بالفعل وذلك لتفوقهم العلمى أو الحرفى ولكنهم أقلية

2. منهم من دخل البلاد بصورة شرعية عن طريق فيزا لإحدى الدول الأوربية سواء فيزا بالتكلفة القانونية أو بمبالغ طائلة وقاموا بتسوية حالاتهم هناك بعمل إقامات شرعية

3. ومنهم من دخل الدول الأوربية بصورة غير شرعية بدخوله إلى إحدى الدول الأوربية مثل إيطاليا أو أسبانيا أو اليونان ومنهم دخلوا أى من الدول الأخرى وقاموا بتسوية حالاتهم بعمل إقامات شرعية وهم أغلبية

بالله عليكم الرجاء من السادة الموجودين سواء بفرنسا أو باقى الدول الأوربية يعرفونا كيف تأتى لهم السفر الى أوربا وما هى الطريقة التى سافروا بها

[عبده بيه]

بالله عليا لاكلمك بصراحة الاسلوب الملتوي في الحياة لا ينفع في هذا الزمن يعني لما يقع في حرس الحدود ويضرب عليك نار ده مش حرام عليك

بالنسبة لي انا بسافر منذ 25 سنة بفيزا ومنذ هذا الوقت اخذت الاوراق الاوروبية

اما بالنسبة للناس اللي بشوفهم في اوروبا لما بسالهم نصهم من زمان و الباقي مفيش حد بيحكي الحقيقة اكيد فيه سر

من الاخر الصراحة راحة فتح دماغ وربك يسهل لك الطريق واتقي الله في نفسك

[مكرمعبدة]

:ninja: السلام عليكم ـ اولا هذ الموضوع ممتاز وكان ارد الاول ممتاز فعلا يا شباب مصر انا عرف انكومفى هم وغم واعرف العيشة وحال الشباب وللاسف الان فرنسا خلص اسف انا جربت بعد الحرب على طول والحمد للة وكل شى نصيب لكن واللة واللة من مدة كبيرة صعب جدآ من البوليس والاحكام حتى العمل صعب الان حتى ابنى ليس لهو عمل وهو فرنسى الجنسية واعرف كثير من الابناء بدون عمل مثل مصر بس هنا احسن لان فى عاطفة وحب وكثير من المساعدات للاشباب واهم شى فى احترام ولكن واللة لو فى عمل عندى كثير من الاهل بس للاسف الان صعب جدآ جدآ ولا ولا تفكر فى هذة الفكرة تخسر الفلوس وطبعآ الفلوس بابا وكفية على بابا وارجو الصبر لان مش انت بس فى 5مليون شاب مثلك للاسف ولى طلب واطلب من اللة ان يكون فى يوم من الايام تغير شامل فى مصر وتكون صح ام الدنيا مثل ما يوقال للاسف ليس فى ضمير ولة حب بين الناس واللة معك ومع شباب مصر ولكم حبى