مبارك يُعزي نجيب ... ويصلح ساعات

[se_ Elsyed]

كان في نكته قديمة قوي عن واحد خواجه يهودي .. إبنه مات .. فمن هنا وهنا حصلت عليه ضغوط عشان ينزل نعي في الجرنان لإن عيب قوي يكون تاجر ساعات كبير وواخد كذا وكالة وإبنه يموت كده سُكيتي .. فراح أتصل بأحدى الجرائد وقالهم : عايزك تنقيلي أصغر حجم إعلان وتكتبلي فيه " الخواجه كوهين يُنعيي ولده حاييم " فموظف الجريدة قاله : أقل إعلان يا خواجه لازم يتكون من 10 كلمات .. وإعلانك ده 5 كلمات يعني برضوا هاتحاسب على 10 .. فقاله إذا كان كده يبقى أكتب " الخواجه كوهين يُعني ولده حاييم .. وبيصلح ساعات "

مش عارف ليه إفتكرت النكتة دي وأنا بأقرأ الخبر ده في ورك قصدي صدر جريدة الجمهورية السمورية الحديدية المباركة

مبارك ينعي محفوظ للعالم

لازم ندور على أي مخرج نُحشر به إسم الزعيم القائد حفظه الله ورعاه وبشبش الطوبة اللي تحت راسه في أي حاجة .. عزا .. فرح .. طهور ... جنازة .... كل حاجة وأي حاجة

يعني توقعت - طول عمري خايب في توقعاتي الغير مرئية - إني أقرأ مثلاً " ورحل نجيب محفوظ " " مصر والعالم العربي يفقدا صاحب الحرافيش "

إنما إزاي .. دي حتى الصُحف تاكل وشنا وتقول عيب مناسبة زي دي تعدي من غير ما نلمع إسم الريس بالورنيش ونديله وش

[MZohairy]

اقسم بالله العظيم انا كنت قلقان جدا عليك وانت في مصر في الأجازه

وحياة ولادي كنت خايف ليستقصدوك و يرزلوا عليك ياحمد

ربنا يحفظك

[se_ Elsyed]

اقسم بالله العظيم انا كنت قلقان جدا عليك وانت في مصر في الأجازه

وحياة ولادي كنت خايف ليستقصدوك و يرزلوا عليك ياحمد

ربنا يحفظك

صادق طبعاً يا زهيري فأنت أخٌ لي .. وبيننا عيش وموبيلات -_-

ولكن : هل تتصور إني بالكلمتين اللي الواحد بيكتبهم دول عشان يفضي اللي في قلبه تجاه هذا النظام الفاشي بيبقى كده أحسن من اللي ضحوا بحياتهم وأرواحهم لهذا الوطن اللي إحنا مخلوقين من ترابه ؟

وهل تتصور إني بالكلمتين دول أكون أفضل ممن تم إعتقالهم في أحداث قلوظة الدستور .. أو رستأت مبارك الكهل على الكُرسي أو توضيب مجلس الشعب للحزب الفاشي أو طمس دور القضاة في الحياة السياسية المصري ؟

يا راجل ده أنا إتحكى لي روايات واقعية برؤية العين عما حدث للمعتصمين أمام دار القضاء واللي زبانية مبارك كانوا بيدبوا فيهم ولا دب أولمرت في مسلمي لبنان

يا زهيري مصر فيها آلاف بل ملايين من الشرفاء اللي بيقولوا كلمة الحق ومستعدين يموتوا عشانها لكن النظام القمعي بيبطش بكل من تسول له نفسه ويفعل ذلك .. وهذا لن يستمر

فخليها على الله وتذكر قول الشاعر

فإما حياة تسُر الصديق ... وإما مماتً يكيد العِدا

[محمد عبدالعزيز]

لا واللى غاظنى أكتر كمان لما بيقولك إيه

"وكان حصوله علي جائزة نوبل للآداب اعترافا بإسهام الفكر العربي في حضارة الانسانية وتراثها المعاصر‏.‏"

قال يعنى العرب ما أسهموش فى الحضارة الا فى عهد اسم الله عليه

حاجة تقرف

تم تعديل 31 أغسطس 2006 بواسطة محمد عبدالعزيز

[إبن مصر]

لا حول ولا قوه الا بالله ...

يعنى يا سى السيد يا اخويا والله معارف اقول ايه....

أدى نجيب مات .. والنهارده محمد عبد الوهاب لاعب الاهلى الشاااااااااااااب..

يعنى الشباب بتموت وهو لسه قاعد

أستغفر الله العظيم

... بس أكيد ربنا ليه حكمه..

فاكر لما كنا فى مصر قولت لك اييييييييييييييييه............؟؟؟؟؟؟؟

ازاى مريضكم قالوا سليمنا مااااااااااااااااات

بس كفايه كده

[Sherief AbdelWahab]

حتى الصياغة نفسها مضحكة وأقرب للنكتة منها لأي شيء :

مبارك ينعي نجيب محفوظ للعالم

لا تعليق..

خلص الكلام

[Diab]

النكتة مش كدة

ده يعتبر تغير مرفوض

النكتة خمس كلمات بس

حاييم ينعي واده ويصلح جزم

وبالتالي

مبارك ينعي محفوظ و بيسوق طيارات

[لخبطه]

اختلف معكم في حاجه أولا الصياغة مش غلط ابدا

والسبب أن لما يكون حد في حجم نجيب محفوظ فيه شبه عرف أنه اللى ينعى العالم فيه يكون شخص يتناسب مع مكانة المتوفي بمعني أن نجيب محفوظ اللى ينعيه رئيس الجمهورية فدا شىء حلو وتكريم للراجل مهما اختلفنا مع مبارك ومهما اختلفنا في مكانته بين العالم يبقى هو رئيس الجمهورية

ثانيا الحاجات التلميعية لمبارك وبدون داعي كتير وكلها كذب

[lالمطحون]

فى النهايه انا مش عارف احنا هننعى حبيب الملايين امتى على فكره ملايين الدولارات عشان متفهمونيش غلط

[se_ Elsyed]

اختلف معكم في حاجه أولا الصياغة مش غلط ابدا

والسبب أن لما يكون حد في حجم نجيب محفوظ فيه شبه عرف أنه اللى ينعى العالم فيه يكون شخص يتناسب مع مكانة المتوفي بمعني أن نجيب محفوظ اللى ينعيه رئيس الجمهورية فدا شىء حلو وتكريم للراجل مهما اختلفنا مع مبارك ومهما اختلفنا في مكانته بين العالم يبقى هو رئيس الجمهورية

ثانيا الحاجات التلميعية لمبارك وبدون داعي كتير وكلها كذب

طب إقرأ الخبر ده في أهرام إمبارح كده يابو اللخابيط .. ودوق وقولي رأيك

" الرئيس مبارك يتقدم جنازة الكاتب الكبير نجيب محفوظ .. هذا وقد حضر الجنازة السادة رؤساء مجلسي الشعب والشورى ورئيس الوزراء والوزراء والمحافظين والسيد / جمال مبارك أمين عام لجنة السياسات ونائب الأمين العام للحزب الوطني "

وأنا وإنت ورقصني يا جدع وسلام مربع يا عم عشان المعلم وإبنه أصحاب الواجب اللي بيعرفوا الأصول اللي بيحبنا آه واللي بيكرهنا لأ .. كفايه لأ .. المعارضة لأ .. الوطني آه .. أخاصمك آه .. أصالحك لأ ... وسلام لليلة واللي فيها والتحية دي من المعلم سين سين اللي بيقول للريس عقبال عوضك وعقبال الليلة الكبيرة بتاعت آبيه جمال اللي ندرٍ عليه لأتحزم وأرقص يومها للصبح .. هو أحنا عندنا كام ريس وكام جمال .. والله أكبر فوق أيدي المُعتدي .

[لخبطه]

يابنى انا عصبي وصاحب عيال يعني لازم حرق الدم دا على الصبح ايه اللى دخل جمال في الموضوع الله يريحنا من جمال وابو جمال .............. على فكرة عادب ااوي الاكل يابو عمر