توم وجيري ونقار الخشب

[محمود الشاعر]

انا من عشاق توم وجيري ونقار الخشب

لو فى ايه ممكن اسيبه واتفرج عليهم

وافتكر ان كتير مننا كدة برضه

بس من كام يوم وانا بتفرج على نقار الخشب بضحكته الشهيرة

وكانت الحلقة بتدور عن نقار الخشب وهو بيحتل بيت عصفور صغير ويطرده بره البيت طبعا المغامرات كانت مضحكة وعمرو ابني كان فطسان على نفسه من الضحك

شوية جاه توم وكان بيتخانق مع الفار ومين ياكل اللحمة

المهم لقيت عمرو بيقلدهم فى تصرفاته

بيسرق من اخته كيس الشيبسي وينط وهو بيضحك لما سئلته بتعمل كدة ليه قال زي توم ما بيعمل

فرغت نفسي علشان اشوف اسبيس تون وحزمة القنوات الفضائية الكرتونية للاطفال واحلل اللي بيحصل وجدت حاجات غريبة جدا

استعمال لك انواع الاسلحة البيضاء من سكاكين ومطاوي وسيوف

استخدام المسدسات والبنادق والقنابل بكثرة

المهم ان محدش بيموت لا بنضحك

والطفل بيضحك وبيتعلم ان استعمال هذه الاسلحة مشروع وطبيعي وانه من حقه ياخد اللى عوزه بالقوة

بالفعل اصابني رعب حقيقي

ازاي الافكار دي بتتزرع فى عقول الاطفال بكل هذه البساطة

ولا انا مكبر الموضوع ولا ايه رايكم

[dr.sAsSo]

للاسف الموضوع فعلا كبير

انا اخواتى وصلوا تانيه اعدادى ولحد الان سبيس تون وخلافها مأثرة عليهم

هما الحمدلله مبيضربوش بعض بسكاكين لكن متعلقين ببرامجها بصورة فظيعة

طلع اليويو يروحوا يجيبوا كل أنواعه

طلع البوكيمون,طلع يوجى

كل ثانية بموضوع جديد

استنزاف أموال الأهالى وفى الآخر اللعب كلها مصيرها الكرتونة المنفية فى اخر الاودة

بالذمة مش حرام ده

وصحابهم مش أرحم منهم

كلهم نفس التفكير

أنا قلت يمكن الموضوع هنا فى السعودية بس يمكن لأن فى شىء من الانغلاق

لكن لما نزلت مصر لقيت نفس الموضوع ويمكن أشد

وبالنسبة بقى لحكاية الأسلحة دى

فحقيقى من صحاب ماما ليهم أطفال صغيرين

الأولاد بيضربوا بعض بطريقة وحشية وشايفين ان دى حاجة ممتعة

وبيمسكوا لبعض عصيان وحاجات من دى

غير المسدسات والسيوف الى بتتباع ودى بتبقى أجمل هدية ممكن تجيلهم

بجد ربنا يستر

[زعلان]

لأ مش مكبر الموضوع

لأنه كبير

ما بين رسوم متحركة .. عاطفية جنسية وشاذة وعنيفة

والمشكلة هناك نوعيات غير صريحة لكنها تحمل أفكار سيئة جدا

بخلاف العاب الفيديو والبلاي ستيشن والكمبيوتر فمابين جنسية وشاذة وعنيفة او خليط من هذا وذاك

[محمود الشاعر]

الاغرب ان فى مسلسل اسمه المفتش كونان كل حلقة بتدور حولين جريمة قتل لمختلف الاعمار و الشخصيات والاسباب

مرة علشان المدير طرده

مرة علشان يخلي ابوه يحبه

مرة علشان بيحب مش عارف مين

طب وبعدين

[se_ Elsyed]

أحب أحيي كل المشاركين في الموضوع الهام جداً جداً والذي يتعرض لشريحة هامة في حياتنا وهم الأطفال وعلاقتهم بأفلام الرسوم المتحركة

بالمناسبة أنا كنت كاتب موضوع زمان إسمه " ما بين الآرتينز وسبيس تون .. خلاص بقيت مجنون " لكنه لم يرى النور .. مشاكل إنتاج وتمويل يعني :)

لكن أحب أقول إن الأهل لهم دور حيوي هنا .. وبالتالي لا يجب أن يتركوا الحبل على الغارب للأطفال لكي يكونوا لقمه سائغة لأفلام الكارتون والتي أثبتت جميع الدراسات العلمية بأن جلوس الأطفال لفترات طويلة أمام الكارتون والتليفزيون والكلام ده بيسبب تأخر أو تراجع في مستوى ذكائهم .. لإن دورهم في الحالة دي بيبقى سلبي .. يعني العيل بيقعد متنح بالساعات قدام التليفزون ما بيعملش حاجة غير حشو الدماغ بتلك الخزعبلات

يبقى علينا إحنا بقى أن نملأ هذه الدماغ بما يفيدها

يعني سبيس زفت دي بالذات نحاول نقلل منها شويه أو نمنعها خالص لكمية العنف والخيالات اللي فيها .. وهناك البدائل الكثيرة كقناة الجزيرة للأطفال والإم بي ثري وآرتينز .. أو قناة الرسالة والمجد في فترة الظهيرة وما تعرضه من أفلام كارتون مفيده جداً للأطفال

وأحسن من هذا كله .. إني أحاول أجيب للأطفال أفلام كارتونية تعليمية بتعلم القيم والأخلاق الجيده في شكل محبب لهم

ويا حبذا لو أقنعنا الطفل بمشاهدة الأفلام العلمية خصوصاً عالم الحيوانات والنباتات .. أهي منها تبقى فُرجة وتعليم في نفس الوقت .

[محمود الشاعر]

الله عليك يا س س فينك من زمان يا راجل

بس المشكلة ان برضه كل القنوات دي بتعرض نفس الافلام

السؤال هل فعلا ده مقصود

يعني هما فعلا قاصدين يعملوا كدة فى دماغ الاطفال

ومحدش يقول لي نظرية المؤامرة والوسواس القهري

اطفال العالم كله بيتفرجوا على نفس الافلام

طب مين المستفيد بقى

ومين اللى وراهم

[نانو]

يا سلام يا جماعه علي ده موضوع

بجد انا لما قريت لقيت فعلا ان ديه اكبر مشكله بعاني منها

بس انا للاسف الاثر السلبي للمحطات ديه شوفته بعينيه في اولادي

لاني انا عندي بنتين ...و ما فيش غيرهم يعني مالهومش اخوات صبيان

لكن من كتر مخهم ما هو محشي بفلام الكرتون اللي كلها عنف...طول النهار بينفذور في بعض اللي بيشوفوه

و بعدين كل ما اخرج ما فيش واحده منهم...بتطلب عروسه زي باقي البنات....لا كل طلباتهم مسدس

بندقيه ...طياره....دبابه.....يويو .....كروت يوجي ....لما بقيت خلاص هاتجن

اجيبلهم عرايس جميله و زي برضه اللي في محطاتهم ...فله وباربي ...لكن لا ..ثانيه واحده والاقيها تحت السرير

و اللي فوق السرير الطيارات و العربيات والمسدسات

لا ده مش كده و بس ده لما بيخلص الكرتون .....بيبداو يقسموا الادوار علي نفسهم ويعيدوا اللي شافوه بدقه بما فيه من عنف...و ضرب..... وجبنه جيري

لغايه ما خلاص مخي ضرب....

بحقيقي ديه مشكله كبيره وكلنا واقعين فيها ومستسلمين و ما حدش عارف يعمل حاجه

و مهما حاولنا نصرف نظرهم عنها ...بيرجعوا تاني بتعلق جنوني

بس انا بصراحه وقفت الموضوع ده عند حدود....و حددت ساعه واحده في اليوم كرتون

و قوبلت بوابل من الاعتراضات الشديده اللهجه في الاول....بس انا ولا همني ...صمدت و تمسكت برايي

لغايه ما عرفت اسلب منهم هذا الحق المكتسب.....يعني يا جماعه ..هي مش صعبه...بس محتاجه شويه صمود كويسين

و عدم استسلام لاي ضغوط خارجيه

[أسد]

منذ شهور .. نبهتني زوجتي إلى هذا الأمر ..

أن قناة سبيس تون تصيب الأطفال بالعنف ..

وأن البرامج والأفلام التي تعرضها غير هادفة بل هي هادمة ...

تابعت الأمر عدة أيام فوجدت بالضبط ما أشرتم إليه ...

وقررنا .. زوجتي وأنا .. أن نحد من مشاهدة إبننا الوحيد لتلك القنوات ..

واستعنا بالبدائل الأخرى ..

أفلام نختارها بأنفسنا ...

أيضاً قنوات ديزني أفضل حالاً من تلك القنوات المتخلفة ..

[محمود الشاعر]

المشكلة هى زرع قيم العنف و الاستبداد هذا من جهة

ومن جهة اخرى نجد صور لمغامرات عاطفية وقبلات خصوصا فى توم وجيري

حاولت امنع التليفزيون معرفتش اعمل ايه

[nancy]

فعلا انا عندى الصغيرة هى الى متمسكة بالكرتون انما الكبيرة خلاص ممكن بس تشوف الافلام الكاملة زى الى بتتعرض فى السنيما ودى ديما بيكون فيها هدف

بس خلاص الدراسة حتبتدى والكارتون حايكون ساعة واحدة فى اليوم بعد المذاكرة

فية حاجة كمان الكتب

لو حد ولادة غاوى قراءه .. زى بنتى هى بتحب تقراء هارى بوتر وانا كنت سعيدة جدا على اساس انها بتعودها تقراء حوالى 500 صفحة فى خلال اسبوع واحد

وطبعا انا بقراء معاها كل الاجزاء واحيانا كانت تحاول تسرع علشان تسبقنى ونتنافس مين يقراء اكتر خلال اليوم ونتخانق على الكتاب كمان

لحد ما وصلنا للجزء السادس الى نزل الصيف دة هو كويس بس ابتدى يحود على اعجاب الولد بالبنت وعلى مشهدين غراميين مبين الابطال فخفت ان يلفت نظرها ان دة السن المناسب للعواطف وبداءت اسالها عن رايها ونتكلم كتير لحد ما وصلنا ان مش كل الى نقراءة ممكن يكون حقايق وكمان هى اصلا قصة خيالية اجمالا لانها بتتكلم عن مدرسة للسحرة وعفاريت بيتكلموا معاهم عادى وديناصورات ونباتات سحرية يعنى الموضوع كلة وهمى

فلازم نهتم كمان بنوعية الكتب زى ما بنفكر فى الكرتون

[محمود الشاعر]

كلامك صح يا نانسي

واسلوب القرأة اكثر من رائع

انا فعلا بعمل كدة لكن الكرتون له سحره انا شخصيا بحبه