وبما انى الوحيدة هنا ....نتكلم بقى ..

[Salwa]

احساس غريب جدا جدا ....لما تحب مكان وتفضل منتظر الوقت اللى حاتروح فيه للمكان ده ...ولما توصل ..

متلاقيش حد...

احساس غريب ...

لكن برضه تلاقى معاه احساس (( عربيد )) .....بمعنى ؟؟

كويس ان مفيش حد ....انا بقى حتصرف بطريقتى بدون ماحد يضع لى نظام معين امشى عليه ....حتصرف واتكلم براحتى ..محدش حايقاطعنى ..اقول بقى اللى فى نفسى ..

انهاردة ...

انهاردة يوم جميل قوى .....يوم له ذكرى خاصة يعنى ..

كنت مشغولة طول الوقت وكل شوية ادور على المحاورات.....قلت اعمل حاجة مش بعملها ..اروح كزائر من بعيد اتفرج على الولاد والاخوة فى الاماكن الجديدة ...

اكتشفت ان .....محبط ...ومركيز ....برضوا يوم زواجهم كان فى 9/9............ضحكت...

بس انا اتكتب كتابى فى 31 /12.

(( معرفش ليه فضلت افكر )) ...هل معقول ان التواريخ لها علاقة بحياة الانسان ؟؟؟

فضلت افكر فى ....محبط ..و..مركيز......واحاول اكتشف هل فعلا فيه اى تقارب بين .....الثلاثة ؟؟

اخترت اقول ....ربما فى الاعتزاز بالاختيار ...

اخونا محمد حافظ ....كما هو ....غصب عنك يشدك لكل اللى بيكتبه ......تساءلت بينى وبين نفسى ؟؟

هو يقول ان حقيقة الروح ابدية ؟؟ ويرد آخر عليه( و النفس شئ آخر )..وياتى ببراهينه ..ويجد من يطاوعه ومن يعارضه ..

ويدخل الحفيد...ويتكلم فى الحب الاول واحساسه ....واجده سعيدا بين الاحفاد ...وايضا بينى وبين نفسى ادعو له بطولة العمر ...وارى الافوكاتو يرحب بالجميع فهو ابو الجميع ...وارى فريدة وشهد ...ومصرية يعنى مصرية ...وسهيلة ..و...و...حتى س.س. دخل يطمئن الجميع عليكم ....وسكوربيون .....

وابو حميد المصرى منساش يقول شوية زجل عن اسكندرية ....برضه شفتهم فى شئون مصرية .....ورجب ....و..

وسيزيف........

وافتكرت مثل هنا مشهور ....

انا كدة برمى كل حاجة من الشباك ...

انا كدة بقول اللى فى قلبى .....بالجامد قوى ..

وبرضه....

مدخلتش اسجل حضور .....ومش حادخل ..

اصل انا معرفش اتغير ودماغى متركبة غلط...

حتى اللى كتب يقول ...........( فين مدام سلوى ؟ ) ..ردوا قالوا له....لا...مدام سلوى مسجلتش هنا .

وقفلوا على المواضيع ....بسرعة بسرعة !!!

طيب كنتم ردوا وقولوا ....مدام سلوى كويسة بس هى فى البيت الكبير ...

والمهم ....والله ياجماعة انا سعيدة جدا بيكم ...وبمجموعتكم اللى عمالة تكبر ....

معرفش ليه فكرتونى بلعيبة البرشلونة ........لعيبة الكرة الفوتبول بالذات ..

ييجوا برشلونة ونعمل لهم سمعة هايلة ونحبهم من كل قلبنا ..........وهوبا....يكبروا ...وكل فرق الكرة على مستوى العالم تدور عليهم وتدفع فيهم دم قلبها ويروحوا فرحانين ..........ومع الايام ينسوا النادى اللى عمل لهم شهرة ..

وتكلم اللاعب من دول يقولك ..........رجلى هى سبب سعدى ...

اسيبكم بقى دلوقت ..

سلام ..

[nancy]

مدام سلوى

انا طول اليوم كل ساعة افتح اتاكد ان كان المحاورات بيفتح ولا لسة

ومن شوقى للمحاورات دخلت اتفرج زيك ولما لاقيت ناس كتير بحبهم

قلت اقعد معاهم لحد ما يرجع النور وادينا متونسين ببعض

وبعدين البيت الكبير برضة لة معزتة ومش ممكن تتغير

بيت العائلة بيفضل لة مكانة مهما اتنقلنا

والمصريين بيحبوا اللمة وبيدفوا بالحب مبنهم

والناس الى بنعتز بيهم هنا وهناك :angry2:

[نانو]

عندما قرات كلماتك...تذكرت عباره كنت اقراها دائمافي الصفحه الاولي في المحاورات

و هي اكثر عدد تواجد في المنتدي كان 508 بتاريخ ابريل 2006

انا كلما قرات هذه الجمله ...افكر قليلا...يا ليتني كنت عضوه في هذا الوقت و موجوده في هذا اليوم بالذات

تري كيف كان احساس الاعضاء جميعا في هذه اللحظه....

اي الفه و حميميه و دفا احس بها الجميع في اللحظه

لابد انها كانت من امتع اللحظات التي يمكن ان يمر بها اي انسان في حياته...ان يحيطه كل هذا العدد من الناس الذي يكن لهم شيئا ما

و هو علي يقين انهم يبادلونه هذا الشعور

فلا اقل ان نفس هؤلاء الناس...لن يغيبوا كثيرا

و لعل انقطاع الموقع عنا لاليام اثار في انفس الجميع...نوع من الشوق للبيت الكبير

لابد ان يعود ..الجميع ...حتي من تركوا و بعدوا ...سيعودوا للبيت الكبير

[محمود الشاعر]

يظل البيت الكبير دائما له عبق خاص

سحر اثيري متفرد يظل الواحد منا متأثرا به طوال حياته

ان سحر محاورات المصريين وتاثيرها علينا دائم متفرد ومتجدد ايضا

البيت الكبير هو الاساس هو الحب الاول والكلمة الاولى

لكم الف الف تحية

ولكم الحب والاحترام

[نبض الابداع]

انا مفهمتش لية المحاورات مكنتش راضية تفتح وكنت كل كام ساعة اشوف يمكن فتحت وبرضو لا لحد مافتحت هوكان في اية ؟ حدش يقولي ؟!!!!!!( كنت مشتاقة جداً)

[Folana]

السلام عليكم ورحمة الله ....

الحبيبة سلوى :P ..مش عارفة ليه حاسة ان طريقة تفكيرنا متقاربة الى حد ما ...انا شاعرة بكل حرف كتبتيه .....انا كمان ماكنتش عارفة اشترك فى اى مكان ..وكنت بازور الواحة وشايفة معظم الاخوة هناك ..واقول لنفسى ..لا لا مش حاعرف اكتب بدماغين........ولما المحاورات قفلت معايا من فترة برضه ماسجلتش فى اى مكان ...

ولما اتقفلت من يومين ...لاقيت الرسالة المكتوبة شكلها كده يزعل وبمعنى ان مافيش ويب سايت اصلا اسمه كده خالص...وفضلت اقول لنفسى استنى يافلانة ..بكرة تفتح ...الى ان اصابنى اليأس ودخلت سجلت فى الواحة ...بس تعرفى....ليه الواحة بالذات اللى سجلت فيها ....لانى وجدت كل الحبايب هناك...نفس الناس اللى باحب اتكلم معاهم ونفس الكلمات اللى بحب اقرأها واتابعها حتى من غير رد....

اللى حصل ..انى بعد ماسجلت وقرأت موضوع عن عطل المحاورات ...لقيت الاخوة بيقولوا ان المحاورات اشتغلت ..جربت ...لقيتها فتحت معايا فعلا ....كان اول رد فعل لى انى لقيتنى باقفل الواحة وباتابع هنا....

السؤال بقى ..هل فعلا حاقدر اشارك فى المنتدين معا....يعنى حابقى بروحين زى الغسالة الفوق اتوماتيك كده؟....ما اعرفش..لكن السؤال ده حتجاوب عليه الاحداث القادمة...

مش مشكلة ابدا ان الاعضاء لجؤا لمكان تانى اثناء عطل المحاورات ...لانهم هم هم مع بعض فى اى مكان ...وهم سعداء فعلا بعودة المحاورات تانى وبيهنوا بعض على كده وبيدعوا بعض للعودة هنا مرة اخرى ....

عمرك شفتى حب واخلاص بيجمع مجموعة من الناس ماتعرفش بعض زى اللى بيجعمنا هنا فى المحاورات ....

وحشتينى.... :rolleyes:

[Salwa]

مساء الخير ...

نانسى ...نانو...محمود الشاعر ..نبض الابداع....فولانة..

شكرا احبائى لتواجدكم هنا معى فى هذه الصفحة التى( نشأت ..او.. ولدت فى لحظة حيرة...ووحدة..وكانت صادقة ).

صح يانانسى ...المصريين بيحبوا اللمة ويحبوا يتونسوا مع بعض ...والحمدلله ان النور رجع بدرى وربنا ما يحرمناش من بعض ..لاهنا ولا هناك بس برضه البيت الكبير.....كبير بقى وميقدرش كل شوية يروح وييجى على بيوت الاولاد...لازم الاولاد هم اللى يروحوا يزوروه من وقت للتانى ......صح ؟؟

ايوه يانانو ....معك كل الحق ...لابد ان يعود الغائب يوما ما ...حتى لو كانت عودة ثم رحيل مرة اخرى تعقبه عودة اخرى وليست اخيرة ..فالذى يجمع بين افراد هذا البيت شئ اكبر من احساس كل فرد بذاته فقط..

يجمعهم احساس انهم دائما معا ...يفكرون ويتناقشون ويختلفون ...يختلفون على اى شئ ...لكنهم يتفقون على شئ واحد

حب مصر ..وهذا المكان يعبق بحب مصر ...تلفى الدنيا وتبحثى عن بديل لكن ؟؟ هذه الحميمية وهذا الحب وهذا العبق يوجد هنا فقط ..لعلنى واهمة لكن ؟؟.....لكل انسان رؤية خاصة فى اى شئ .....صح ؟؟

محمود الشاعر ....لن اطيل عليك ...اردد لك كلماتك كلمة كلمة ...فهى ما اريد قوله بالضبط.....وهى حق...هى احساس صادق صادق صادق...

نبض الابداع....المحاورات مفتحتش علشان كان فيه عطل ....وحصل خير ...( بس كانت بتورينا غلاوتها عندنا ) ..

فولانة ....انتى ايضا وحشتينى جدا ...ونفس الشئ اشعر به ايضا ...اننا نتفق فى حاجات كتير ...

فاكرة يوم ما سألتى على وصول حفيدى ؟؟ .كان يوم ما اتولد ...

.كانت حاجة غريبة فعلا انك تسألى فى نفس اليوم رغم ان ربنا سبحانه وتعالى رزقنا به قبلها باسبوعين ...

وايضا فى اشياء اخرى كثيرة اجد اننا نتفق ...(( مثلا اعتراف ان لنا تفكير كدة لوحده ))...

ولا تنسى هواية المطبخ...

وفعلا يافولانة المحاورات اصبحت شئ اساسى فى حياتنا ...وربنا يديمها نعمة علينا ...

كل سنة وانتم طيبين كلكم ...

[إبن مصر]

اخوتى الاحباء..

مدام سلوى يا شقيقه الكلمه يا من تقرأين بين حروفى أكثر مما تعطيه حروفى..

اذا كان هذا شعورك فما بالك بأخوك ... لمده 5 أيام وانا كالنمر الحبيس المجنون الثائر الذى يذهب فى كل مكان يبحث عن بيته وعرينه الذى فقده...

لمده 5 أيام وانا اجوب فضاء النت استخدمت كل ما وقعت عليه يدى من تقنيه قانونيه وغير قانونيه.. دخلت الى المحاورات زائر من أمريكا وانجلترا وماليزيا واسرائيل عن طريق برامج البروكسى ولم أستطع أن ادخل من مصر!!!! جن جنونى لا أستطيع أن أشارك

فقط مسموح لك بالقراءه ولكن... هذا ما أفعله فكتاباتى صارت معدومه؟؟

اذا لماذا الغضب..

لا .... ليس هذا هو السبب ..

الحرمان والخوف من التوهان..

الواحه كل من بها اعتز بمعرفته سواء اتفقنا او اختلفنا..

ولكنهم اشقاء قلم....

وأيضا لم أستطع أن ادخل الواحه اولا لانى لا أعرف الوصله فلم ابحث عنها وثانيا لان انتمائى الى المحاورات قاتل... لا أستطيعه أن يشاركها فى القلب غيرها..

أعددت نفسى للانسحاب من شبكه النت اذا كان الحدث جلل لا قدر الله..

أثر الامر على عملى ..

وعلى اسرتى..

بنت مصر زوجتى أحست بما فى عقلى وواستنى ولم تتعجب انى اقوم كل ساعه احاول الدخول الى الموقع فى منتصف الليل وفى الفجر ...

تيقنت الان من مدى ارتباطى بهذا المكان وبكل من فيه..

اخوتى الاحباء اتواصل مع الصديق منهم من خلال التليفون فقد خرجت صداقتنا من الحيز الافتراضى الى عالم الواقع..

ولكن المحاورات .. هى.. الحب الاول .... الذى لن ينساه القلب ولن يملا مكانه أى شىء مهما بلغ من الكمال..

تظل المحاورات هى من فتح أعين الكثير منا على عالم الواقع وعلى معنى وقوه الحرف....

ودونها....

يموت القلم ويذهب الابداع..

ابن مصر يمثل لى اكثر من مجرد شخصيه اعتباريه..

فهو كيان...ووجود ....وانتماء..

ولقد أوشك على الموت فى الايام الماضيه..

[بنت شعنونة]

كان فيه سؤال في مسرحية جحا يحكم المدينة بيقول في اخر المسرحية

" مين المهم.. الشعب والا الحكومة؟؟"

و بتختم المسرحية على ان المشاهد يدور على اجابته الخاصة للسؤال عشان يحل اللغز..

افتكرت الكلمة دي وانا بقرا كلامك ماما سلوى

ياترى مين المهم

المكان اللي اجتمعنا فيه؟ والا الناس اللي فيه؟؟

سؤال محير جدا من زمااااااااان وانا مش عارفة اجاوب عليه

بس اعتقد ان فيه ناس بترتبط ب علاقة عاطفية مع الجمادات

زي انا و عربيتي مثلا :rolleyes:

ف ممكن المكان يكون ليه "جزء" من العاطفة

انما في المثل بيقولوا " الجنة من غير ناس ما تنداس"

يعني محاورات بدون اهلها لا تساوي محاورات

واحة بدون اهلها لا تساوي واحة

وهكذا دواليك..

يالله

ربنا يصلح الحال

وحمدالله ع السلامة.. :P

[Salwa]

اخى الفاضل /ابن مصر ..

اهلا بك وحمدلله على السلامة ...

تسألنى قائلا ....اذا كان هذا شعورك فمابالك بأخوك ...

واجيبك ....( بعنوان موضوعى ) ...كنت بغنى وأرد على نفسى ...

وفعلا متخيلة موقفك...ومتخيلة شعورك بالغيظ ..(مثلى تماما )..

انا كنت اشعر كأنى اتسرقت ...آه والله...

يعنى بدون انذار ....شخص ظهر فجأة واخذ منك شئ يخصك وجرى بعيد..

والمشكلة ؟؟

مش ممكن حانعرف (( نحب مكان تانى بالشكل ده )) .....صح ؟؟

بما ان هوايتك السيارات ....اذن...تعال ناخد امثلة من مجال هوايتك..

المنتديات دى عاملة زى السيارات ....

والأعضاء ....اسطوانات الدبرياج..

كل موديل سيارة... له اسطوانة دبرياج معينة ...

(( تمشى مع السيارة آخر تمام )) ..

متلاقيش اسطوانة المرسيدس تركب على الفيات... .مثلا.

والا اللانسيا والبى.ام.دبليو.....تركب على اللادا والشاهين !!!

والا الرينو12 والبيجو ...تركب على الفولكس ..

تحاول انك تضع اسطوانة فى غير سيارتها الاصلية .........لا حاتركب ....ولا حاتمشى ..

يعنى متضيعش وقتك...

السيارة حاتفضل مستنية الاسطوانة بتاعتها .......والاسطوانة مش حاتتركب الا فى السيارة الخاصة بها اللى اتعملت مخصوص علشانها ....

يعنى بالقطر ...كله بالمسطرة ...كله مضبوط ولو فرقت مللى واحد متنفعش ...

واثقة انك فهمت قصدى ..( شفت ازاى بنكلمك بلغتك ؟؟)

مرحبا بك .........فى الرولز رويس...

[Salwa]

شانا ........شانا حبيبة قلب سلوى ..

انتى عارفة انك حبيبة قلبى ....زى مانتى عارفة برضه و كويس جدا جدا .جداااااا.....انى مش مرتبطة عاطفيا بحب

(( الجمادات ))..

هل تعتقدى حقيقة ياشانا .......ان الجنة اصبحت بلا ناس ؟؟ .

وهل اذا غضب الابن او الاخ ...وخرج واخد الباب وراه...مطلوب مننا ان نترك البيت ونجرى نصالحه ونقيم عنده ؟؟؟

الافضل لك ولى الا ننبش فى الماضى .....( ونأتى بأشياء قديمة لا تمسك ولا تمسنى ولكنها تؤكد على خلافات دائمة من اعضاء تهوى المعارضة لمجرد المعارضة ...وان كنت تخالفنى فى الرأى فأنت عدوى !!!!)

لانى ممكن ( افسر اى شئ حدث ).....بأنه تصرف ( ؟ ) ...

والشئ الغريب ياشانا ....الغريب جدا جداااااااا.....جداااااا...(( وانا شخصيا لا اجد له اى تفسير مقنع ))..ان

فيه ناس تركت المكان لان ( عضو اتسبب فى جرح عضو آخر بكلمة غير لائقة والادارة مأخدتش حقه ) ...

وافاجأ ....بأن الكل فى مكان آخر جديد ....تمام ومحدش زعلان من حد............الله ؟؟......هو فيه ايه ؟؟

اذن الحكاية بقى مش حكاية المكان والادارة والذى منه.....

نيجى بقى لقولك .......حب الجمادات ...

افرضى ياشانا .......مجرد فرض فقط....

انك فى يوم رجعتى من شغلك للبيت ولقيتى ورقة ان اخوكى سافر لمدة شهرين .............هل ستتركين البيت ؟؟

افرضى ....برضه مجرد فرض....انك بعد اسبوع تانى رجعتى من شغلك ل بيتك.....ولقيتى اخوكى التانى قال لك انه حايسافر ويحصل اخوه ومش عارف حايرجع امتى بالضبط ....ولو عاوزة تشوفيهم يبقى تسافرى لهم ؟؟

حاتسافرى لهم ؟؟

حاتسيبى شغلك وبيتك وتغيرى كل نظام حياتك .........لمجرد ان واحد فيهم قرر فجأة يسافر ؟؟ بدون حتى ما يستشيرك ؟؟ وترك لك مجرد ورقة ؟؟

والتانى راح جرى وراه.........ورغم انه يعلم اعتراضك على التصرف الاول .....برضه مشى وترك لك ورقة ؟؟

يعنى انتى اللى لازم.....لازم...تمشى وراء رغباتهم ؟؟

وتسيبى بيتك؟؟.......

لالا ياشانا .....انت غلطانة ....وحتى اثبت لك ان اهل المحاورات ..مازالوا اهل المحاورات ..ولازم يرجعوا مهما حصل ............

شوفى انتى اسمك منور ازاى .......؟؟؟.......رجعتى والا لأ ؟؟

حضن كبير قوى قوى يااجمل شانا .......تسكن فى احضان اجمل عروس على المتوسط..

[بنت شعنونة]

ماما سلوى

فهمت كلامك حرف حرف و كلمة كلمة وكنت عارفا انك ها تقولي كدا والله :wub:

" تركيبة دماغك نفس تركيبة دماغي :wub: "

بس عاوزة اقولك على حاجا غريبة

انتي سألتيني وقولتي " شوفى انتى اسمك منور ازاى .......؟؟؟.......رجعتى والا لأ ؟؟"

الأجابة...

لا

انا مارجعتش ..

:wub:

كلام حضرتك صح جدا

بس احنا مش عايشين في الدنيا لوحدنا

وربنا يجعله عامر... على قولة مش عارفا مين :wub:

[إبن مصر]

مدام سلوى ..

ايه الكلام الكبير ده وعربيات كمان....

الله ينور المهم انك والحمد لله موجوده..

فى ناس فراقها يعز...

وناس فراقها يتعز....

[Folana]

السلام عليكم ورحمة الله....

سلوى......................... الله عليك ....روحى ياشيخة..الله يبارك لك :wub:

الاخ الفاضل احمد...حمدلله على السلامة ..كلنا جالنا نفس الشعور والله...

اما عن سؤال ..الناس ولا المكان ....وعلى طريقة الاعلان اللى باحبه ..الشخليلة ولا اليويو ..حاقول آآآآ الاتنين ...

المكان والناس....وكتبت المكان قبل الناس ...لانه بيمدنا بالدفء اللى محتاجينه ...زى بيت الام كده ...كنا بنتجمع انا واخواتى دايما عند امى رحمة الله عليها ..وكانت ايام جميلة جدا....دلوقت ..ممكن اتجمع معاهم برضه ..مع نفس الناس ..ولكن دايما باحس ان فيه شىء ناقص...علشان كده المكان برضه مهم ....

ربنا يعزكم جميعا......