إحنا بجد بنعرف نسوق يا مصريين؟

[Lembic]

سؤال عجيب.. أنا عارف وإحتمال قد يبدو من الوهلة الأولى مستفز أو قليل الذوق .. لكن بجد هل إحنا فى مصر يا مصريين بنعرف نسوق سيارة ؟

قرأت هذه المداخلة من شخص أعرفه جيدا نزل مصر وحاول يسوق فيها، الرجاء قراءتها بصدر رحب والتعليق عليها بموضوعية أيضا - وللجميع الشكر:

---------------------------------------

مما لاشك فيه فإن جميع الدول الفقيرة منها والغنية تسعى لتوفير الطرق اللازمة للتسهيل على

مواطنيها سهولة التنقل والسفر فى أرجائها فى سهولة ويسر وأمان أيضا ً . بعد أكثر من ثمانية عشر عاما ً بعيدا ً عن أرض الوطن فانني ونزولا ً على إلحاح الأهل والأصدقاء فقد قررت أن أسعى للحصول على إجازة قيادة مصرية وبالتالي القيادة على طرق مصرنا الحبيبة. ولكم دهشت عندما خضت التجربة بنفسى وكنت سائقا ً لسيارتى فى شوارع المحروسة! فقد لاحظت بعض العادات العجيبة التى لم أجدها فى أى بلد أخر له من التاريخ والحضارة نصف ما نمتلك . أوجز هذه العادات فى عشرنقاط وأرجو أن أجد لها تفسيرا ً عند ذوي الخبرة والمعرفة:

1- معظم سائقي السيارات فى مصر سواءا ً داخل المدينة أو على الطرق السريعة يقودون سياراتهم ليلا والأضواء الأمامية مطفئة!

2- غالبية سائقي السيارات فى مصر سواءا ً داخل المدينة أو على الطرق السريعة يقودون سياراتهم بحيث يكون نصف السيارة فى حارة والنصف الأخر فى الحارة الأخرة.

3- أضواء معظم السيارات الخلفية عادة ً معطوبة أو غير موجودة بالمرة.

4- إشارتي الدوران لليمين أو لليسار لا تحترم أو بالأصح فقدت مدلولها فى عرف القيادة فى مصر!

5-التجاوز أثناء السير عبارة عن "مصارعة ثيران" وليست قيادة وحسب قواعد وأوصول.

6- إشارات المرور عند التقاطعات ما هى إلا زينة ولا يؤخذ بها إطلاقا ً وإذا حاولت الوقوف للإشارة الحمراء فقد تتسبب فى حادث مروري.

7- غالبية عربات الميكروباص عبارة عن نعوش طائرة!

8- "عسكري" المرور عبارة عن كاتب مخالفات فقط! أو موجود لكي يأخذ ما فيه القسمة ويدعك تركن صف ثان وأحيانا ً صف ثالث.

9- يوجد عددا ً مهولا ً من عيون القطط بدون مبررا ً واضحا ً اللهم إلا لخلخلة أجزاء السيارات المارة بدلا ً من إستعمالها لتوضيح حدود الطريق وحارات السير في معظم الطرق!

10- التزاحم الشديد لسيارات الميكروباص عند مداخل ومخارج الكبارى "محور 26 يوليو" وغيره مما يعرض حياة المواطنين للخطر الشديد عند هاتان النقطتان الهامتان من الكبارى! أما

الطريق الدائري وخطورة القيادة عليه , فحدث ولا حرج!

11- الحصول على رخصة قيادة فى مصر كأى شئ أخر فى مصر – "هرجلة". فقد رسبت فى إختبار السياقة وأنا أساسا أقود سيارة منذ عشرين عاما أو يزيد وللأسف لم أجتز إختبار السياقة لأنهم إمتحنونى بسيارة بحجم علبة الكبريت ومعى الممتحن الذى أصر هو على أن يتولىهو التحكم فى "الدبرياج" علشان ميبوظش! ولم أستطع أن أحصل على رخصة سياقة إلا بعد أن حصلت على "واسطة" من أحد أقاربى وطبعا لم أمتحن إلا إمتحان مهزلة لا يتعدى قيادة مترين للأمام ومتر واحد للخلف! وبعدها أخذت الرخصة فى نفس اليوم!

-------------------------------------------------------------

[أسد]

في مصر القانون لا يطبق ...

فبناء عليه ...

تشيع الفوضى .. وتظهر كل تلك الظواهر ..

[Lembic]

في مصر القانون لا يطبق ...

فبناء عليه ...

تشيع الفوضى .. وتظهر كل تلك الظواهر ..

برضه مش فاهم... ينعرف نسوق ولا لأ؟

[أسد]

برضه مش فاهم... ينعرف نسوق ولا لأ؟

على المعرفة .. بنعرف .. وبمهارة عالية كمان .. خاصة في القاهرة .

ولكن ماذكر في مداخلتك الأولى .. أن ما يحدث كله هو عدم إحترام للقوانين والأصول الصحيحة ..

والإستهتار .. والإهمال .. والفساد ..

[Lembic]

برضه مش فاهم... ينعرف نسوق ولا لأ؟

على المعرفة .. بنعرف .. وبمهارة عالية كمان .. خاصة في القاهرة .

ولكن ماذكر في مداخلتك الأولى .. أن ما يحدث كله هو عدم إحترام للقوانين والأصول الصحيحة ..

والإستهتار .. والإهمال .. والفساد ..

عزيزى أسد

شكرا لمداخلتك الوطنية ولكنى أشك فى إننا بنعرف نسوق فى مصر والدليل إن معظم المصريين يصابون بهالة من الهلع إذا صادفهم شئ معترض على الطريق السريع وغالبا ما تكون النتيجة حادثا مؤسفا. وللعلم أنا أتحدث عن المثقفين بالذات. قد يختلف الكثير معى ويدعى أنهم يقودون سياراتهم داخل القاهرة وببراعة ولكن هل القيادة على سرعة لا تتعدى 30 كلم/ساعة تعبر عن شئ وعلى غير أسس ولكن فقط "مدوحرة" تعتبر قيادة؟

لكى أكون واضحا "القيادة ليست فقط تحريك سيارة ولكنها مثل اللغة عبارة عن كلمات وقواعد". معرفة بضعة كلمات من لغة ما لا يطلق عليه متحدثا بها مش كده ولا إيه؟

إنجليزى ده:

Me have science with all happen>أنا عندى علم بكل ما يحدث.

نسيت أن أذكر ، إذا كنا نعرف القيادة جيدا فما سبب عدم وجود سيارة سليمة من الخدش أو الخبط فى مصر؟

[صفاء]

كل الناس فى ارجاء المعمورة بيعرفوا يسوقوا طبعا

طبعا.... كلهم....

حتى اللى مبيعرفش يسوق

حاكم احنا شعب فهلوى وزلنطحى وياكلها وهى والعة

كله بقى بالدراع وبالعافية وبالحداقة واحيانا كتير بقلة الأدب

بذمتك كام مرة فى اليوم بتشتم وتتشتم؟

يووووووووووووووه متعدش

صحيح ان الستات سواقتهم تعل " ماعدا انا :lol: "

انما بردو فى رجاله كتير خاصة سواقين الميكروباصات اللى ربنا بدل لهم الحمير اللى كانوا بيسوقوها بمواتير تيوتا

السواقة عافية

وهمجية ومفيش أدنى التزام بإشارة المرور خصوصا لو العسكرى مش موجود

عشان الناس بقت تخاف متختيشيش

وال مش عارفين احنا حالنا مايل ليه :P

[Lembic]

وهمجية ومفيش أدنى التزام بإشارة المرور خصوصا لو العسكرى مش موجود

عسكرى المرور إنقرض ولحق بالديناصورات ولكن الموجود حاليا هو موظف حكومى يأخذ مرتبه من الناس directly ولايجب أن يكون له أى مؤهلات . على فكرة أنا واثق من إن فى شحاتين بيلبسوا عساكر مرور بالذات فى رمضان والأعياد. وممكن جدا يكونوا موظفين حكومة الصبح وبعد الضهر عساكر مرور. عجبى!

[عصام]

أمر بفترة ركود محاوراتى منذ فترة ..

لكن غليان الدم اللى انا فيه دلوقتى .. والمصحوب بارتفاع فى ضغط الدم دفعونى للمشاركة فى هذا الموضوع .. يمكن اهدا !!

من عشر دقايق بس .. وانا جاى المكتب ..

واقف فى ميدان زحمة .. والطريق ماشى بالراحة ,, والمسافة بينى وبين السيارة التى أمامى حوالى متر واحد ..

وإذ فجأة وبدون مقدمات أجد نفسى "بارشق" فى العربية اللى قدامى .. واللى هى تاكسى بيجو موديل السبعينات .. حاجة كدا شبه الدبابة اإيه وان إم وان !!

تهشمت على إثره الإشارة والفانوس الأمامى .. واللى تمنهم .. كتير

فى الظروف دى عادة أنا بابقى هادى .. وباستعوض ربنا فورا ..

نزلت أبص .. وكذلك سواق التاكسى .. اللى بيبص لى باحتقار وقرف ..

بعد ما شوفت الموقف .. قولت له .. : إبقى هات لمبه ستوب بجنيه .. وسيبته وركبت العربية ..

بص لى بقرف وقعد يبرطم ويشوح بإيده ..

ما قدرتش بقى الحقيقة أمسك نفسى وقومت رايح له وصوتى بقى جايب آخر الدنيا : يعنى هو الأدب ما بينفعش؟ ماشى من غير نور فرامل .. وكل اللى باقوله لك إنك تبقى تصلحه .. وكمان مش عاجبك؟ .. يعنى هو ما ينفعش إلا لم أضربك واشتمك .... إلخ

قام راكب عربيته وماشى .. وما زال ينظر لى باحتقار !!

موضوع كتبته من قبل فى نفس السياق

أتذكر مرة كان معايا زميلة إنجليزية راكبة جنبى .. وانا جايبها من المطار كان أول تعليق لها "إنتوا ازاى بتسوقوا فى المسافات الضيقة دى .. دا المسافات بين العربيات سنتيمترات"

بعد ما قضت فى مصر عدة شهور وفى مرة تانية كانت جنبى .. ولفت نظرها السرعة الرهيبة اللى الناس بتسوق بيها وسط البلد قالت لى : "اللى يشوف السرعة دى يتخيل ان الوقت بيمثل لكم قيمة عظيمة جدا .. طيب اراهنك اللى اللى بيجرى هناك دا ما وراهوش أى حاجة وفى الغالب هايروح ينام" !!

[Sherief AbdelWahab]

بعض السائقين ، على مستوى التاكسي والميكروباظ ، أحدثوا نقلة نوعية في قيادة السيارات ستذكر لهم على مستوى العالم ، فهم يقودون مركباتهم بنفس تقنية وفكر الكارو ، مع الفرق أن الدابة التي كان لها دور ثانوي في الكارو صارت تقود السيارة بنفسها!

خلص الكلام

[أبو محمد]

فى الحقيقة أنا مش عارف إيه اللى بيحصل فى مصر .. يعنى هل من الممكن أن أقول كنا زمان بنعرف نسوق ودلوقتى ما تعلمناش السواقة ؟ .. طبعا اللى يقرا الإجابة دى يقول ده كلام راجل مهيِّس "بلغة العصر" ... لكن ده اللى حاصل .. أنا اتعلمت السواقة على يد أخى الأكبر .. قبل ما خلانى أقعد على الدركسيون هرانى كلام عن السيارة وعن القيادة فى البلد وعن القيادة على الطرق السريعة .. وأعطانى كتاب لكى أقرأه وهو مترجم عن الإنجليزية ومكتوب عنوانه باللغتين العربية والإنجليزية .. "القيادة الوقائية .. Defensive Driving" وكأن كاتبه كان يعلم أن القيادة فى بلادنا هى قيادة عدائية " Offensive Driving " ... الكتاب فيه كل شئ عن قيادة البنى آدمين لسياراتهم ...

الآن .. من يعلم من ؟ الباشمهندز حوده بيعلم واحد ما عندهوش نية إنه يطلع رخصة لأن هو أصلا ما عندهوش بطاقة .. كل اللى عاوزه إنه يقعد قدام الدركسيون عشان يجرى بالتونّاية يرازى بيها خلق الله ويطلع له فى آخر النهار بقرشين يعمل بيهم دماغ ... وطبعا أسلوب الناس دى فى القيادة مش عاوز شرح .. المهم بقى إن أولادنا اللى بيركبوا الميكروباصات بيلاحظوا أسلوب تلاميذ الباشمهندز حوده فى القيادة وبيتشبعوا بيه .. وبيفتكروا إن هى دى القيادة المحترفة .. ولما يفتح ربنا على حد من الشباب دول ويسوق عربية تلاقى الطريقة دى فى خلفيته وتلاقيه أوتوماتيكيا بيطبقها .. ناهيك عن الإبداع فيها

زد على ذلك مساهمة الحكومة فى جعل القيادة مهمة محفوفة بالمخاطر فى كل لحظة .. الأخ Lembic أشار إلى عيون القط التى لا وظيفة لها إلا تفكيك السيارات .. ده ياعزيزى إتفاق جنتلمان مع بتوع العفشة عشان يعملوا شغل .. ومن تعليمات الباشمهندز حودة إنك لما تقرّب لعيون القط دى لازم تزود السرعة عشان ما تحسش بالرجرجة .. هو بقى مش عارف إنه إذا كان قائد السيارة مابيحسش بعيون القط عند زيادة السرعة فإن من المؤكد إن السيارة بتحس بيها .. ومرة فى مرة لازم يزور باشمهندز العفشة وباشمهندز ضبط الزوايا واتزان العجل .. كما أن الباشمهندز حوده لايلقى بالا إلى أن على الطريق بعض الناس الغشيمة اللى حتيجى عند عين القط وتهدى السرعة .. وبذلك يجعل تلاميذه يلبسوا فى سيارات الناس الغشم دول .. وتصبح زيارة نقابة الباشمهندزين (الميكانيكى والكهربائى والسمكرى وبتاع الدوكو وبتاع العفشة وضبط الزوايا واتزان العجل) والحجاج بتوع قطع الغيار من ضرورات الحياة

كما تساهم الحكومة بدفع الملل عن قائدى السيارات بتجهيز مفاجئات من أنواع مختلفة على جميع الطرق .. مطب بعمق لا يقل عن نص متر .. مقب (عكس مطب) بدون خطوط بالأبيض أو بالأصفر لكى لا تراه وتبوظ المفاجأة ‘ مهمته ليلا هى عوجان الشاسيه .. شارع تلاقيه مليان حفر فى جزء منه ، وفى الجزء الآخر طالع له عضلات فشر عضلات شوارزنيجر .. بلاعات حبه فوق وحبة تحت ولا يمكن يكونوا فى خط مستقيم عشان يصطادوك أينما حاولت الفرار .. عسكرى بدفتر وعسكرى من غير دفتر .. الأول يقيد عمال على بطال .. والتانى لو قاعد جنب زراير الإشارة بيبقى نايم ولو واقف فى مفرق تلاقيه واقف (تروا كار) لا انت عارف إذا كان فاتح لك السكة ولا قافلها .. وتلاقى واحد من ابو دفتر واقف فى حته متدارية وعمال يقيد مخالفات على اللى جايين من الاتجاهين .. تيجى عند تجديد الرخصة تلاقى مخالفات ألفين تلاتلاف جنيه .. ويلقطك واحد بابتسامة معروفة ويسألك عاوز تعارض ياباشا ؟ .. تبص للطابور فتستسلم فورا وتديله شهادة المخالفات .. فى ظرف ربع ساعة يطلع وينزل ويدخل لوكيل النيابة ويجيب لك المخالفات متين تلتميت جنيه .. ويلهف منك تلاتين اربعين جنيه .. واهو كله بياكل عيش

أخشى لو استطردت فى الكتابة تكون النتيجة سيناريو لفيلم عربى بطولة هنيدى أو فيلم هندى من اللى ما بيخلصوش

[بندر]

والله انا شايف ان اللي يسوق في مصر وخصوصا في القاهره . لازم يكون سباح وبهلاواني يقدر يعوم ويقدر يطير .

طبعا كلهم سواقين لكن عارف المشكله فين يا Lembic المشكله

في الناس الي علي الرصيف مش عارفه تمشي .

[Sherief AbdelWahab]

من مساخر قيادة السيارات في مصر هي تلك التي نراها في رمضان هذه الأيام..

على سبيل المثال:

1-تلاقي الشوارع كلها زحمة بشكل جنوني وغامض في رمضان طول اليوم وخصوصاً في الساعتين الأخيرتين من رمضان ، وعلى يدك ، سواق التاكسي والميكروباص بيركن في نص الشارع علشان ياخد ركاب جداد ، ومن العادي إنك تلاقي واحد بيركن في النص ، وياريت لو ساب العربية فاضية في الشارع!

2-يعمل إيه بقى السواقين المتسربعين واللي مش فاهم سبب منطقي لسربعتهم؟ يدخلوا في الشوارع الضيقة اللي ما تتدخلش بعربية ، ويخنقوا الأمور أكثر وأكثر ..

وليس عندي وصف مهذب لعبقريات إدارات المرور في المحافظات التي تجعل من هذا الازدحام قطعة من الجحيم .. فما معنى مثلاً أن يتفتق ذهن العباقرة - ولا داعي لاستخدام الوصف الأدق- عن السكوت على جعل شارع يفصل بين شارع قناة السويس (شارع رئيسي في المنصورة) وبين شارع عبده معروف المؤدي إلى مواقف المراكز اتجاهين رغم ضيقه الشديد ومروره بالكاد بين صفين من العمارات ، ثم نستغرب من كثرة الغبار في الجو وانتشار الربو والأمراض الصدرية .. وسلملي على الحكم المحلي ووزارة البيييييييئة!

خلص الكلام

[سمـ مصر ــا]

من منكم يحترم اشارات المرور ؟

من منكم يعطى الفرصة لغيرة ليمر أمامة ؟

من منكم يحترم من يعبر الشارع ؟

عنى أنا أتحدث عندما أرى زحام على الاشارة فأننى أخذ الحارة اليمنى

حتى أصبح قريبة من أول واحد واقف على الإشارة من يسارى ثم أضع بوز السيارة بإتجاة الإشارة

يعنى حعدى حعدى وأخبط دماغك فى الحيط

ولم ترضعنى المخالفات التى دفعتها ففى الأسبوع الماضى دفعت 100 دينار تعدية مرتين أشارة حمراء

و20 دينار مخالفة سرعة على الطريق

المشكلة منبعها إحنا وليست مدى مهارتنا فى القيادة

تم تعديل 22 أكتوبر 2006 بواسطة سمـ مصر ــا

[White heart]

أفادت دراسة هندية بأن حركات شرطي المرور الذي يعمل على تسهيل حركة السيارات في بعض الطرق، تعمل على استنفار السائقين ودفعهم لارتكاب المزيد من الحوادث المرورية. ومن هذا المنطلق استعانت إدارة شرطة منطقة تشيني الهندية بأحد الراقصين المعروفين في المنطقة، لكي يدرب رجال الشرطة على القيام بحركات لطيفة، لتلطيف نفوس السائقين وتهذيب أمزجتهم •

عاوزين من ده فى شوارع مصر المحروسه على الاقل الناس فى المواكب و الزحمه تلاقى حاجه تسليها

:excl: ما رأيكم فى هذه الفكرة ؟

لقد ذكرنى هذا الموضوع بموضوع آخر فكاهى للعزيزة الحاضرة الغائبة " فيروز "، كان بعنوان: اتعلموا المرور بقى .. .. والذى إقتبست منه مداخلتها تلك بعالية ....

مبدئيا انا لم يسبق لى تجربة القيادة ببلدنا الحبيب أبدا !!!

النقاط المنقولة فى مداخلة العزيز Lembic .... صحيحة جدا، و أعتقد ان 3 نقاط تحديدا منها هى ما تمنعنى من الإقدام على مثل هذه " المغامرة " :

1 - عدم إحترام الحارات المخصصة لصفوف السيارات، سواء كانت حارتين أو 3 فى كل إتجاه ( التى أتفهم أساسا تجاهل الكثيرين لها فى كثير من الحالات لعدم وجود الخطوط البيضاء أساسا على الطريق !!! )....

2 - نقطه قصر المسافة بين السيارات والتى تعنى هنا شرطتين من الخط الأبيض بطول الطريق ... وهى 28 متر اذا كانت سرعة القيادة 50 كم فى الساعة اى داخل المدن، و 50 متر اذا كانت سرعة القيادة 90 كم فى الساعة، و 90 متر اذا كانت سرعة القيادة 130 كم فى الساعة على الطرق السريعة .... و هكذا ... ( تلك النقطة التى بكل تأكيد سيستغلها الكثيرين لدينا للسخرية من صاحبها و بالتالى " دبلرته " !!! )

و هى التى بكل تأكيد ترتفع كلما كانت الأحوال الجوية سيئة، أى الأمطار أو الشبورة و الضباب

3 - نقطة الإشارات الضوئية بأنواعها، و بالتالى الكثير من التصرفات أو الأفعال .... و منها على سبيل المثال طريقه الدبلرة ...... أو تلك التى وقعت للعزيز " عصام " مع سائق التاكسى و التى جمعت معها النقطة الأولى ... اى كارثة مزدوجة - يستحق صاحبها إحالته للمحاكمة - و التى أتوقع حكمها يمكن ان يصل الى سحب رخصة القيادة لمدة عام، و غرامة مالية كبيرة، و مضاعفتها فى حالة الإعادة مع الإشتراط بإجتياز دورة تدربية فى إحدى المراكز المتخصصة ( إختبارات و تدريبات نفسية و تقنية عديدة ) التابعة للدولة لإسترداد الرخصة من جديد .... أما اذا تكرر نفس الأمر فليس فقط المنع من القيادة لمدة عام بل 3 أعوام، بل إلغاء رخصة القيادة تماما بما يعنى إعادة الحصول على عدد ساعات عديدة من دروس القيادة ( نظرى و عملى )، و من ثم إجتياز إختبارى القيادة الرسمى كأى مبتدئ!!! طبعا ناهيك عن نظام النقط الى تفقدها عند إرتكاب مخالفات قانونية .....

اذا أردتم وجهه نظرى ... اذا رجعنا الى الأسباب التى أدت الى مثل هذا التدهور ... فإننى و كالعادة أرى " أخلاقيات الزحام " .... أى الزيادة السكانية العشوائية، أو الغير محسوبة !!!

تحياتى.

[salma]

انتو بجد بتقلبوا عليا المواجع انا كتير قوي كنت بركب عربيات قصدي طيارات و السواق دماغه عاليه قوي بيطوح بالعربيه شمال و يمين و الناس قاعده شبه الفراخ في القفص

و الله كنت بتشاهد و افتكر كل ذنوبي و اتوب منها اصل الواحد مش ضامن عمره في العربيات دي

و يا سلام لما يكون في سباق بين اتنين سواقين

المشكله معقده و متراكبه من عقد نقص و فقر و اللي مراته منكده عليه و سوء تنظيم الطرق

وكتير بنلاقي ناس بتسوق و الرخصه منتهيه من شهور لكن البريزه و الشلن <<<< عفوا الخمسه و العشره جنيه>>>>>>>>>

بيمشوا الحال

وابقوا سلمولي علي الميكروباص :)

[عبده بيه]

الموضوع هام جدا جدا واحنا شعب ناقص ثقافة مرورية وايضا ثقافة احترام الغير وفعلا ده خطر ما بعده خطر والحكومة غير واعية باهمية اشارات المرور واماكن عبور المشاة واهمية وجود رجال المرور في الشارع في كل اشارة ومن الافضل عمل اشارة مرور كل مسافة صغيرة والمهم ان السائقين لا يعرفون اهمية الانوار الامامية والخلفية اريد ان باعمل مشروع كامل متكامل في الموضوع ده وعايز اعرضه الي من يهمه الامر يا ريت تساعدوني كيف اعمل لكي اوصله كمشروع تنموي لثقافة المواطنين والسائقين وشكرا

[Lembic]

الموضوع هام جدا جدا واحنا شعب ناقص ثقافة مرورية وايضا ثقافة احترام الغير وفعلا ده خطر ما بعده خطر والحكومة غير واعية باهمية اشارات المرور واماكن عبور المشاة واهمية وجود رجال المرور في الشارع في كل اشارة ومن الافضل عمل اشارة مرور كل مسافة صغيرة والمهم ان السائقين لا يعرفون اهمية الانوار الامامية والخلفية اريد ان باعمل مشروع كامل متكامل في الموضوع ده وعايز اعرضه الي من يهمه الامر يا ريت تساعدوني كيف اعمل لكي اوصله كمشروع تنموي لثقافة المواطنين والسائقين وشكرا

أعتقد إحنا مش شعب أساسا ... ممكن مخلوقات لكن شعب؟ مظنش. أما بالنسة للحكومة الغير واعية، فدى عندك فيها حق.

[khedr]

بجد...

موضوع السواقه في مصر من أخطر الموضوعات في حياتنا كلها

بل ممكن ان نضيف الشارع المصري بصفه عامه وما يحدث فيه

ولو تريد ان تحكم علي اي شعب وامه في الدنيا لا حظ الشوارع فيها

ونحن الشارع المصري فيه كل مايخطر وما لا يخطر ويمر علي عقل وعين اي انسان

فالشارع تري فيه جميع انواع المواصلات من حمار الي احدث ماركه سيارات

تجد فيه من الباعه المتجولييين الي الساده اصحاب المحلات والشركات الفخمه

الشارع تجد فيه الست بائعه الفجل والمدام ست الحسن والجمال والكمال

ومن زمن طويل وتذكروا ما كتبه بيرم في الشارع وما يحدث فيه

ونعود الي السيارات والسواقه والسائقيين في مصر

بهلوانات ....طيور جارحه ....حيوانات متوحشه.

(غابه.......غابه.......غابه.......غابه.......غابه)

ملحوظه

السبب الرئيس في الوفاه في مصر هي حوادث السيارات

[nora]

انا والله كنت بسوق لما كنت عيشه في الكويت ولكن من ساعت مجيت مصر مفكرتش اني اخد الرخصه بس انا بضيف لجانب الملاحظات الي ذكرت ان كل الي بيسوق في مصر بيفتخر انه بيسوق بالدراع و مفكر انه كل مكسر على الي جمبه و محدش قدر يعدي منه انه كده ممتاز وانه سواق بريمو اما المكربوصات دول اصلا ممعهمش رخص وده معروف ده لسه في حاجه جديده طلعه اسمها التكتك اعتقد عبارة عن موتوسكل الفيزبا وعملينلو غطا ومزودينه بكنبه دي مش عرفه تدخل ضمن فات ايه ومش بشفها في كل حته شفتها في قباء والزتون الحتت الشعبيه بالاخص وبرضو سواقه مقولكش ربنا يسترها علينا

[عبده بيه]

العربيات في مصر هي المراجيح مش اكتر