التليفزيون في رمضان 1427-2006

[ايهاب سالم]

ايه يا جماعه ده .. عملتولي إحباط

بتجيبوا منين وقت تشوفوا المسلسلات دي كلها

يا جبابره

عموما انا مختلف عنكم خالص بأه

أنا باتابع مسلسل واحد بس يوميا بانتظام و هو عاجبني جدا لأنه بيفكرني بمسلسل الشعراوي اللي كنت باحبه قوي برضه

مسلسل الشيخ / المراغي للفنان حسن يوسف على الفضائيه المصريه الساعه 5:30 بتوقيت قطر

أنا تابعت المسلسل بالصدفه لأنه بييجي ساعة الفطار بالضبط في قطر .. لكن طلع مسلسل جيد

باشوف ساعات حلقات متقطعه كده من حليم

و مش عاجبني في المسلسل مكياج شادي .. اللي خلاه أقرب للبنات من الرجال

وكمان مش عاجبني السهوكه و النعومه اللي بيمثل بيها .. مافتكرش حليم كان مايص كده

ده الحلقه اللي فاتت لما اتنرفز ع المصور .. مكنتش مصدق .. قلت ايه المرجله دي .. امال كان فين الكلام ده من زمان

لكن المسلسل به مط و تطويل واضح .. و كمان لا يوجد به توازن بين الخطوط في السيناريو

يعني احيانا تكون مشاهد عبد الناصر في الحلقه أكتر بكتير من مشاهد حليم لدرجة أن اللي ميعرفش ممكن يفتكره مسلسل عن عبد الناصر

بس خلاص

خلص الكلام ....... و البندقيه اتكلمت

[se_ Elsyed]

أيوه كده يا هادي

عايزين براشيم مُختصرة للمسلسلات عشان الناس اللي ما بتتفرجش

أنا بأتابع مسلسل الشيخ المراغي لإنه بيتذاع وقت الإفطار بالظبط .... وبصراحة لما أجي أقارنه بمسلسل أمير الدعاة لنفس الممثل حسن يوسف أحس إن مسلسل المراغي فقير إنتاجياً جداً ومتكروت .

وكل كام يوم ممكن أشوف لي حلقة من " حدائق الشيطان " وما بيفتنيش كثير فهو من ضمن زمرة مسلسلات التستيف والحشو وأهم حاجة المُنتج يقلوظ 30 حلقة من بابهم ... ودماغي تربست ومُصمم أشوف الغوله .. ماحنا هنود والمسلسلات بقت تسرح بينا ..

نور الشريف مش عارف يكرر دور عبد الغفور البرعي في لن أعيش في جلباب أبي ... فالحاج متولي والعطار والسبع بنات والمسلسل العبيط بتاع السنة اللي فاتت مع منى عبد الغني ( مش فاكر إسمه ) كله في الكليتشه ...

ويحي الفخراني بيبحث عن نفسه بعد دوره الرائع في " للعدالة وجوه أخرى " وعمل كام مسلسل أعبط من بعض ومنهم مسلسل عباس الإسود في اليوم الأبيض :P وكله كوم وهذا الشيء المُسمى " المرسى والبحار " كوم تاني واللي سحب من رصيده الفني بالسالب وكان هايخليه على الحديدة ..

[نانو]

النهارده شوفت مسلسل يجنن

اول مره يذاع من اول رمضان بيجي علي ام بي سي الساعه 6 تقريبا بتوقيت السعوديه

هو عباره عن مواقف كل موقف حوالي 3 دقايق مش اكتر بس بصراحه بيقول كلام كبير اوي

احكي لكم علي موقف واحد و هتفهموا انا بقول ليه كده عليه

هو المسلسل اسمه احمد اتجوز مني و مدته حوالي 10 دقايق فقط

و بيكلم عن شكل الحياه الزوجيه في جيلنا ده

الموقف كالتالي :

احمد و مني قاعدين بيتفرجوا علي التليفزيون....و مني قاعده في ودن احمد تحكي له علي ما متها اللي نزلت اشترت سجاده جديده علشان شاليه المصيف

و في نفس الوقت تيجي الكاميرا علي احمد و هو مش سامع هي بتقول ايه و قاعد يحسب النقط اللي حتاجها فريق الزمالك علشان يفوز في الدوري

و بعدين لما حس ان مني قربت تخلص كلام... قال اركز معاها في اخر جمله قالتها علشان لما تسالني اعرف ارد عليها ....

و فجاه مني تساله طبعا عن السجاده و تقوله تفتكروا خلصوها بكام ؟ رد بكل تلقائيه 2 صفر للزمالك ......

و انا عن نفسي باعترف اني بعيش الموقف ده كتير اوي مع جوزي و فريق الزمالك بالتحديد

المسلسل فكرته جديده و قريبه مننا اوي.... و الابطال جداد و دمهم خفيف و الديكور حلو...يعني بصراحه ده احلي مسلسل شوفته الي الان

[Sherief AbdelWahab]

سكة الهلالي عك ..

نفسي أعرف يعني إيه أولا حزب خدمي ، الافتكاسة اللي طلعلنا بيها سي يوسف معاطي بلا معنى أو موقع من الإعراب..

المسلسل يصل لدرجة مميتة من المباشرة تشعر فيها أن يوسف معاطي هو الذي يقرأ مسامع من كتبه وليس يحيى الفخراني الذي يمثل ، وربما يكون ذلك ذا صلة ببرنامج يزمع يوسف معاطي إعداده وتقديمه والعهدة على وسائل إعلام..

حدائق الشيطان حكاية لوحده ، جمال سليمان ليس بذلك الإبهار الذي تصر وسائل الإعلام ويصر الصحفيون على تصويره به ، عدم إتقانه للهجة ، وبرود ملامحه ، أضف لذلك الطريقة الغريبة التي يكتب بها محمد صفاء عامر هذه الأيام ، والتي من معالمها استقطاع عشر حلقات على الأقل للتقديم للشخصيات ، وغياب أي ملمح من ملامح الصراع حتى وقت متأخر من المسلسل (ظهور شخصية رياض الخولي بفاعلية).. وكله كوم والغولة كوم..

سماح الحريري انتهى عمرها الافتراضي ككاتبة في أحلام لا تنام ، وقدمت تلفيقاً درامياً في شخصية أحلام المدربة على النيشان لا يتخير عن التلفيق الذي قدمه معاطي للفخراني بوصفه قائد الرأي الذي يراه الجميييييع في التليفزيون ويسمعون كلامه عن ظهر كلب لولو، المسلسل سيء من كافة الوجوه كتابة وإخراجاً ، ولا أدري كيف يقدم مجدي أبو عميرة هراءاً كهذا ، ناهيك عن الأداء المخيب للكبير نبيل الحلفاوي ..

ويصب حدائق الشوشو وأحلام مكسلة تنام ومعاهم امرأة من الصعيد الجواني في مسلسل الإلحاح الإعلامي والدرامي غير المبرر على التصوير التسطيحي للصعيد غير السعيد .. عمرك شفت القصور المنيفة مالية الصعيد الجواني كدة ، عمرك شفت الممثلات عاملين فول ميك أب ، وبيض البشرة كالقاهريات ، وربما نجد "نيكول سابا" بشعرها الأصفر وملامحها السويدية في دور صعيدية .. يا بوووووووووووووووووووووووي! :closedeyes:

حاول حضرة المتهم أبي أن يتناول الطبقة المتوسطة الحقيقية ، وطرح تساؤلات واقعية إلى حد ما ، لكن يعيبه المثالية الزائدة جداً لشخصية بطله نور الشريف ، والأداء "الكارتوني" لأشرف عبد الغفور ، ومحاولات معالي زايد المستميتة لتقليد والدتها الممثلة الراحلة جمالات زايد ، وظهرت معالي في مسلسلين وكان دورها في كل منهما أسوأ من الآخر ، ولا أدري ما هو مبرر وضع اسم سمير صبري بهذه الطريقة في حين أنه ضيف شرف حضوراً وتأثيراً..

أما السندريلا ، فاصل من التقليد على طريقة عزب شو ، مسلسل تسجيلي وياريته تسجيلي صح ، منى زكي مثيرة للشفقة أكثر من جمال سليمان في حدائق الشوشو .. أحمد حلمي اللي كان مفاجأة لكن سمير سيف حرص على تطويل مشاهده بشكل فج علشان ما يبقاش بس ظهر مشهدين والسلام ..

عن الموسيقى والتترات ، لعب عمار الشريعي على "المتوقع" في العندليب ، وابتعد عن مستواه في حدائق الشوشو الباهت ، ياسر عبد الرحمن اكتسحه باقتدار في المتهم أبي وأولاد الشوارع ، أشعار نجم مميزة ومتميزة في المتهم أبي مع أداء مدحت صالح ، ويواصل خميس عز العرب التألق في أولاد الشوارع مع آمال ماهر التي أعاد ياسر تقديمها بشكل جديد .. أسامة الهندي مفاجأة سارة في السندريلا ويعد الظاهرة الإيجابية الوحيدة في هذا المسلسل ..التنفيذ الموسيقي خذل حارة الزعفراني ، هذا لا يمنع أن التترات جميلة ، أما موسيقى أحلام مكسلة تنام فلا داعي للكلام عنها علشان ما نغلطش..

ولسة الكلام كتير بإذن الله عن مسلسل الست سهير رمزي.. قمة الكوميديا السودة بعيد عنك..

خلص الكلام

[هادي]

مش موضوع وقت يا حاج إيهاب :closedeyes:

زي ما انت عارف الدش في شمال امريكا بيعيد كل برامجه في فترة صبح وفترة ليل

يعني احيانا افطر في الشغل واحيانا ارجع على ميعاد الفطار زي حالاتك .. يبقى كده كده هالطش في مسلسلات من النوع ده سواء رضيت أم أبيت .. وأنا أفضل " أبيت " بره البيت في رمضان لو كله من النوعية الغم دي .. ويجعله عامر

أما عن ..

يعني احيانا تكون مشاهد عبد الناصر في الحلقه أكتر بكتير من مشاهد حليم لدرجة أن اللي ميعرفش ممكن يفتكره مسلسل عن عبد الناصر

فدي عندك حق بالثُلث .. وكمان لاحظت ان نظرات الممثل المتقمص دور عبد الناصر (مش عارف اسمه ومش مهم) نظرات كلها شك ، ومش حاطط على وشه غير القناع ده طول الحدوته .. نظرات شك لا أكثر ولا أقل .. هو التمثيل أصبح زي لوح العجين كده ليه .. غير بقى يا عمنا .. لأ .. نظرات شك وعينه تضيق ويشرب سجاير ..

يا راجل ده انا صدري وجعني والله من ورى الشاشة عشانك ..

المهم .. رمضان كريم

---------------------------------------------

والله يا بو عمر أنا المراغي" شفته زي ماشفت القائمة سيئة الذكر السابقة .. قصدي تخاطيف يعني .. حلقة من هنا وحلقتين من هناك وجزء من حلقة بعد كده وباجمع القصة والباقي اللي سقط مني من الاحداث ممكن اعرفه من زوجتي او استنتجه، ما انت المسلسلات بتاعتنا من 100 سنة مش عاوزه فكاكه في استنتاج القصة وما فيها .. :rolleyes:

لكن لعلك تلاحظ ان اخونا ايهاب قال عليه (جيد) وانت تعتبره (متكروت)

وده من الاسباب اللي جعلتني اهمل متابعته اكتر من اخواته .. واحد يسألني : ليه يا كابتن لوفه ؟! أقولك ياعمي

بسبب اولا ان تاريخ حسن يوسف مش عميق في كل أدواره قبل الالتزام وبالتالي فهو - فنياً - لا يشدني للفرجه عليه بعد الالتزام في شيء .. تماماً مثل هدى رمزي مثلا .. التي لم أر مسلسلها وفي انتظار اخويا شريف وبرشاماته عنه ..

ثانيا : لا أميل لتكرار تمثيل الشخصيات التاريخية .. لابد يحصل اتقان أولا ثم فشل

لاحظ ان ده تكرر ايضا مع احمد زكي - الذي لو قارنته "فنيا" بيوسف فهو يفرق كتير - زكي نفسه كسب من (ناصر 56) وكان مقنع .. لكنه في (أيام السادات) كان باهت .. ثم تكرر الفشل في دور عبد الحليم !!

ليه الناس مش بتتعلم من تجاربها .. انقل بقى يا عم الممثل .. مفيش داعي تكرر نفسك بالشكل الممل ده

لأ وسمعت ان زكي كان عاوز يمثل دور بابا مبارك في فيلم قادم !!! :unsure:

القدر لم يمهله .. ربنا يرحمه .. ويرحمنا من مسلسلات رمضان وشوال و ذو القعدة

الحقيقة يا جماعة الخير لم أشاهد :

حدائق الشوشو !!!

كا رنتينا : عزت العلايلي

أشباح المدينة : مرات سمير غانم .. مش فاكر اسمها والله .. المهم سمعت انه بيناقش مشاكل الغجر .. دي وسعت قوي

وحاجات كتير من هذا الباب زي( تامر وشوقية ) الواد ابن الفيشاوي بتاع فضيحة الزنا .. اسمه تايه عن بالي دلوقت

يظهر اني كبرت والذاكرة بقت ف النملية

ياريت ياجماعة نناقش موضوع (المثلين ولاد الممثلين ولاد المنتجين ولاد المخرجين ولاد ال ..) اللهم إني صائم

حاجه لا لون ولا طعم ولا رائحة

ولا حاجه تستاهل تطل علينا من الشاشة الفضية

سؤال على لسان الملايين

ويجعله عامر

[ايهاب سالم]

مش موضوع وقت يا حاج إيهاب :closedeyes:

زي ما انت عارف الدش في شمال امريكا بيعيد كل برامجه في فترة صبح وفترة ليل

يا أبو درش و دي هأعرفها منين

أنا أصحابي الأتنين اللي عندكوا في كندا .. واحد معندوش تلفزيون أصلا (يخشى على نفسه الفتنه):rolleyes: و التاني جايب كابل قنوات أجنبي فقط

يا ريت بالمره يا كابتن لطيف تدينا نبذه عن الدش في كندا نظامه ايه و ايه القنوات العربي اللي موجوده و لو في رساله خاصه .. يعني لو حسيت ان ده مش موضوعنا .. أصلي باسخن عشان أنزل الملعب جاهز

وكمان لاحظت ان نظرات الممثل المتقمص دور عبد الناصر (مش عارف اسمه ومش مهم) نظرات كلها شك ، ومش حاطط على وشه غير القناع ده طول الحدوته .. نظرات شك لا أكثر ولا أقل .. هو التمثيل أصبح زي لوح العجين كده ليه .. غير بقى يا عمنا .. لأ .. نظرات شك وعينه تضيق ويشرب سجاير ..

يا راجل ده انا صدري وجعني والله من ورى الشاشة عشانك ..

اسمه مجدي كامل .. بس انا شايف انه ممثل جيد .. لو شفته في فيلم "عن العشق و الهوى" هيعجبك قوي .. و على فكره الفيلم عندكوا في تورونتو حاليا

بس حكاية السجائر عندك فيها حق .. مبالغ فيها جدا .. كل الناس حريقة سجائر .. المؤلفين و الملحنين و الضباط .. اتخنقنا

واحد يسألني : ليه يا كابتن لوفه ؟! أقولك ياعمي

بسبب اولا ان تاريخ حسن يوسف مش عميق في كل أدواره قبل الالتزام وبالتالي فهو - فنياً - لا يشدني للفرجه عليه بعد الالتزام في شيء .. تماماً مثل هدى

ثانيا : لا أميل لتكرار تمثيل الشخصيات التاريخية .. لابد يحصل اتقان أولا ثم فشل

يا كابتن لوفه كفايه ان الراجل بيحاول يقدم مسلسلات عن شخصيات دينيه محترمه .. مش كله مسلسلات عن أهل المغنى و التمثيل .. برضه الناس دي من حقها الناس تعرفها .. يعني أنا عمري ما سمعت عن الشيخ / المراغي قبل المسلسل ده .. و ادينا عرفنا عن شخصيه محترمه من المجددين mfb: .. فاهمني ..

و هو دوره في مسلسل الشعراوي و المسلسل ده مش محتاج إمكانيات جامده

لأ وسمعت ان زكي كان عاوز يمثل دور بابا مبارك في فيلم قادم !!! :sad:

القدر لم يمهله .. ربنا يرحمه

ده ربنا اللي رحمنا .. تخيل الفيلم كان اسمه المقترح "الضربه الجويه" .. و كان بيدور فقط وقت حرب أكتوبر و عن التحضير عن لأعظم ضربه جويه فتحت باب الحريه .. و طبعا زي ما انت عارف هي كانت السبب الرئيسي في النصر :unsure: و كل اللي حصل بعد كده ده كان تحصيل حاصل

الحقيقة يا جماعة الخير لم أشاهد :

كا رنتينا : عزت العلايلي

هو عزت العلايلي لسه عايش و بيمثل كمان .. رحمتك يا رب

وحاجات كتير من هذا الباب زي( تامر وشوقية ) الواد ابن الفيشاوي بتاع فضيحة الزنا

اللي اختشوا ماتوا .. و بكره يرجع يقدم برامج دينيه كمان

ياريت ياجماعة نناقش موضوع (المثلين ولاد الممثلين ولاد المنتجين ولاد المخرجين ولاد ال ..) اللهم إني صائم

يعني هي جت على دي يا أبو درش

ما كله بيورث لولاده

الجيش و الشرطه و التلفزيون و مصر للطيران و القضاه و دكاترة الجامعه و البترول .. حتى الرئاسه

يبقى الفن أهونهم

[أبو محمد]

ياريت ياجماعة نناقش موضوع (المثلين ولاد الممثلين ولاد المنتجين ولاد المخرجين ولاد ال ..) اللهم إني صائم

حاجه لا لون ولا طعم ولا رائحة

ولا حاجه تستاهل تطل علينا من الشاشة الفضية

سؤال على لسان الملايين

ويجعله عامر

ياعم هادى التوريث فى البلد ماشى على ودنه .. أبناء الممثلين بقوا ممثلين .. ده غير أبناء اللى ورا الكاميرا .. وآخرهم الواد أبو طويلة ابن محمد جلال عبد القوى إللى زقه فى الليل وآخره .. وبعدين زقه فى حضرة المتهم أبى .. ده غير إبن الماكيير محمد عشوب .. بس ربنا رحمنا منه السنة دى .. كان طالع إبن السيد عبد الكريم فى مسلسل الأصدقاء .. والمهم إنهم بيقولوا الفن مش عاوز واسطة .. ده صحيح وبعضهم يادوب بيعرف يمثل .. لكن أنصاف أو أعشار الفنانين من أبناء الفنانين بفرضهم علينا بيحجبوا مواهب حقيقية لا تجد عُشر الفرصة إللى بياخدوها أبناء الفنانين بالواسطة

خد عندك كمان أبناء أساتذة الجامعة بيبقوا أساتذة جامعة .. وأبناء الضباط بيبقوا ضباط .. وأبناء القضاه على النيابة عدل ومنها إلى القضاء .. وعايز تعرف حاجة تانية مالهاش أى علاقة بالفن أو الفنانين أو أساتذة الجامعة أو القضاء والقدر ؟ .. البيه وزير البترول مانع التعيينات فى شركات الوزارة إلا لأبناء العاملين بقطاع البترول وبموافقة من سعادته شخصيا .. إيه رأيك بقى ؟؟؟؟؟؟؟ .. يبقى مستكترين ليه أبناء رؤساء الجمهورية يبقوا رؤساء جمهورية ؟؟

أنا آسف لإننا خرجنا شوية عن الموضوع ..

نرجع للمسلسلات .. أنا لا أستطيع أن اتفرج على أكتر من تلات مسلسلات .. فى أول رمضان أفر عليهم واختار 3 وانا وبختى .. أنا استبعدت مسلسل سميرة أحمد لإنى من أول حلقتين حسيت إنى حاشوف فيلم الليلة الأخيرة بتاع فاتن حمامة ومحمود مرسى واحمد مظهر .. كنت عاوز أستبعد جدائق الشيطان لأننى وجدته كوكتيل من هذا الرجل أحبه (اللى مأخوذ أصلا من قصة جين إير) وشئ من الخوف لشادية ومحمود مرسى بس لقيت إن الجزء اللى مأخوذ من جين إير صغير وهو حبس أخت مندور بيه المجنونة .. أما باقى المسلسل فهو كوكتيل من شئ من الخوف وبعض المسلسلات الصعيدى الأخرى .. لكن حظ حدائق الشيطان إنه محشور بين حضرة المتهم أبى وسكة الهلالى .. عشان كده مضطر أشوفه

حضرة المتهم أبى أحداثه إستاتيكية جدا .. منتهى البطء فى تطور الأحداث .. سكة الهلالى أحسن مافيه أغنية تتر النهاية والكليبات المصاحبة لها .. وأداء أحمد راتب .. فعلا ممثل عظيم .. كنت أظنه لن يلعب دورا فى عظمة القصبجى فى مسلسل أم كلثوم .. ولكنه أثبت أنه من ضمن الموهوبين .. منة شلبى كانت مفاجأة لى برغم عدم إعجابى بها فى السابق .. كانت مقنعة جدا فى شخصية البنت الزبالة (على حد وصفها لنفسها فى إحدى جمل الحوار)

نور الشريف ويحيى الفخرانى لم يفلحا فى مصالحة جماهيرهما على ما فعلاه فى العامين الماضيين

[White heart]

صحيح اننى لم أواظب على متابعة أى مسلسل بشكل منتظم ... انما إسمحوا لى بتقديم تحية إشادة و تقدير لهذا العمل ( حضرة المتهم ابى ) بصفة عامة ، و لأداء بعض أبطاله بصفة خاصة:

شكرا ...

[أبو محمد]

أداء نور الشريف ويحيى الفخرانى لا اختلاف عليهما .. فكرة المسلسلين جميلة .. العلاج سئ بسبب المط الذى أفقد الفكرة كثيرا من جدتها وجمالها .. " حضرة المتهم أبى " حاكم الطبقة المتوسطة المطحونة واتهمها بالسلبية والخوف والتنازل عن حقها .. الاتهام صحيح ولكنه كاد يسقط ليحييه كاتب السيناريو فى الحلقة الأخيرة وخاصة فى مشهد المحكمة .. ولكن كل ذلك ظهر فى آخر 3 حلقات .. مع 28 حلقة فرش ممطوط لعقدة المسلسل

الهلالى تناول قذارة لعبة السياسة ورسّخها .. وخوّف منها من لايحمل مؤهلاتها .. فقد دخل فيها أحد "التكنوقراط" الذى كان ينصح إبنه فى أول الحلقات بالانتباه إلى دراسته والابتعاد عن انتخابات اتحاد الطلبة ليقع هو فى نفس المحظور الذى كان يخشى على إبنه منه .. أستاذ جامعة لا يسعى لمناصب حتى أنه بعد عودته من فصل الجامعة له لم يسع لرئاسة القسم الذى فُصل منه بل كان كل همه أن يعود للتدريس .. ولما دخل معترك السياسة بطهره ، نجده فجأة (نقطة ضعف فى الحبكة الدرامية) ينزلق إلى خطيئة استغلال الخطاة (أحمد راتب) ويستولى على ملايين وفيللا .. ويقبل أن يقايض بعض مستندات كشف فساد أحد التايكونات بجائزة أدبية ومادية ولم يفق إلا بعد مقتل الصحفى الذى سلمه تلك المستندات .. الصعود ثم السقوط ثم العودة لم يستغرق سوى حلقتين .. واستلزم ذلك 28 حلقة كفرش للعقدة ..

لا أسمى هذا المط سوى ضحك على الدقون يمارسه أباطرة الوسط الفنى كل عام

حدائق الشيطان هو أضعف المسلسلات الثلاثة التى كنت أتابعها .. أصابنى الملل فى أحيان كثيرة خاصة مشاهد طلبة الجامعة الثلاثة من أبناء القرية .. ومشاهدهم مع دياب .. ومشاهد دياب مع النائب (المهندس الاستشارى) الصعيدى الأصل .. كانت مشاهد خطابية تتسم بالمباشرة الشديدة وكأننى أشاهد أحد أعمال المسرح المدرسى فى الستينيات .. نهايته مفتعلة وكأن المؤلف قد قرر فجأة أن يفرغ من الحدوتة

كل عام وأنتم بخير

[se_ Elsyed]

على فكرة نفس المداخلة دي بقى لي يمكن 3 سنوات بأكررها

ومازلت الدراما التليفزيونية المصرية الرمضانية تكره الناس فيها بالعافيه وبصراحة بتقرفهم في التليفزيون واللي عملوه ... وده أحسن لهم بجد يعني

كل مؤلف ومخرج بيدخل العمل الدرامي اللي هايتعرض له في رمضان وهو واضعا نصب عينيه تستيف الـ 30 حلقة ذوق عافية بالدراع .. المهم يبقوا 30 عشان السبوبة

في حين إن مسلسلات كثيرة جداً ممكن تتلف في سيجارة واحدة وتتعمل سهرة تليفزيونية أو بالكثير قوي سباعية

صعبت عليه نفسي قوي وأنا بأفنش مسلسل المراغي وحدائق الشيطان

سذاجة وضحك على الدقون وحسيت نفسي كإني بقيت عمر إبني وأنا بأضحك عليه وأقوله " تعالى أجيب شكاليته أو أشتريلك هاجه هلوه "

عمركو شوفتوا يا جماعة مسلسل تظهر فيه العائلة العلوية التي حكمت مصر أكثر من نصف قرن في بذخ وتبذير ودا مصر في داهية وخلاها ترزخ تحت نير الديون ... يظهروهم وكإنهم موظفين درجة عاشرة وبيلبسوا بدل من سوق الكانتو وكرافتات " Made in Attaba " وشكلهم يقرف البوبي الجربان ؟

ده مثل بسيط وصغير عك اللي جه في ملسل المراغي .. وبالذات منظر الملك فاروق اللي فكرني بعزيز عثمان في فيلم عنبر " مربوط على الدرجة العاشرة .. والناس درجات .. ومرشح أخد التاسعة غير العلاوت " لدرجة إنه صعب عليه وحاولت أتصل بأي حد من العائلة المالكة من عياله عشان أبعت لهم اللي في النصيب

حدائق الشيطان أو الشوشو زي ما شرشر سماها .. لا مؤخذه تحس إنهم رزعوا المشاهد مننا 100 قفا على سهوا .... ولا أملك إلا أن اقول " إيه القرف ده "

وإلى لقاء أخر في حلقة نقضية جديدة

[هادي]

الحمد لله الذي لا يُحمد على مكروه سواه

فعلا وحقيقي

لازم احطكوا في الحالة الشعورية اللي انا فيها الاول

:sad:

مهموم .. مكتئب .. مشرئب .. متفنشح ( ومحدش يسألني عن معناها .. هيا جت معايا كده )

ساقتني الاقدار

:D

(وش ابو محمد - المليجي - في فيلم الارض)

وقعدت امبارح باللي اتفرج على برنامج يستضيف الممثلة المعتزلة العائدة - سهير رمزي - على قناة ART

وطبعا معاها كل الشلة التي مثلت معاها مسلسل رمضان الذي لم يعرضه التلفزيون المصري بعد

ولكن عرضته فقط قناة واحدة اسمها (الراي) لم أسمع عنها سوى في حلقة مساء أمس

الحلقة كلها تمجيد في سهير من المذيعة العملاقة .. .. - خليفه هالة سرحان -

في المسلسل الذي أسعدني حظي وقدري فعلا ولم أراه ولن أراه

شعرت من البداية ان موضوع الفنانات المعتزلات لن يستمر

وزاد شعوري عندما رأيت انهن اخترن نوع غريب من الحجاب

نوع كله بهرجة و الوان و شغل ليزر و فناكيش

يعني حجاب شهرة برضه .. والاساس في الحجاب ألا يكون ثوب شهرة

الحجاب ليس قطعة قماش على الرأس

الحجاب فلسفة كاملة وطريقة تعاطي مع كل مفردات الحياة

إما ان نقتنع بها

أو نكون بنرقص ع السلم

وآيات اللحجاب نجدها مذكورة في القرآن الكريم في مواضع تحذير للمرأة من قضايا في غاية الخطورة :

قضية الكلمة :

كيف تتحدث .. ماذا تقول .. كيف تقوله

قضية اللباس والازياء :

مايحل لها أن تكشفه من بدنها وجسدها وما لا يحل لها أن تبرزه وتوضحه و تعرضه أمام الرجال

قضية الخطوة :

كيف تخطو .. كيف تسير في الشارع و النادي و المكتب والشركة والمواصلات وكل مكان يجمعها بالناس

شيء عجيب ان نختزل كل ذلك في قطعة قماش فوق الشعر !!! منتهى التسطيح لمفهوم خطير في حياة المسلمين

بل اقول انه ليس فقط مفهوم خطير وهام، بل هو عنوان الاسلام نفسه

لأن لكل دين خلق ، وخلق الاسلام الحياء

فالحياء مطلوب من المرأة ومن الرجل المسلم

نبينا كان أشد حياء من العذراء في خدرها

الحياء هو خلق هذا الدين

عندما أسير في شوارع كندا

لا يعرفني الناس ان كنت مسلم ولا مصري .. شكلي ممكن يكون هندي او يوناني او اسباني او اسرائيلي

وكل دول ليهم خلفيات مجتمعية ودينية وثقافية متقاطعة ومختلفة مع الاسلام

فقط زوجتي بحجابها

تعطي لكل من يراها في الطريق والمدرسة والمواصلات انطباع لا يمكن ان يخطيء

فهي مسلمة

كل من يراها يعرف انها مسلمة

حجابها عنوان لهذا الدين

ومن ثم ، يتم استدعاء منظومة القيم و الاعراف والثقافة الاسلامية في ذهن كل من يارها ويتحدث اليها

فعلا اقول : الحياء هو عنوان هذا الدين، والحجاب هو علمه

بعد كل هذا الاستطراد وهاتيك المجالي .. (الله يرحمك يا معلم بحبح عبد الفتاح القصري)

نعود الى موضوعنا

مثلا

في هذه المقالة

اتفقت مع الكثير مما جاء بها ..

http://www.almustaqbal.com/Nawafez.aspx?pageid=29763

حيث يقول الكاتب مثلا :

(( سهير البابلي كانت أكثر صراحة من الأخريات حين صرحت بأنها تشعر بالملل وبأن التفرغ للعبادة ليس كل شيء وأن الإنسان لا يستطيع أن يجلس طوال الوقت من دون عمل،وإلا فقد روحه ، وأن الموهبة في حد ذاتها ليست حراماً، أما الحرام فهو سوء استغلالها! وليست كل فنانة محجبة هي "شادية"، فشادية ابتعدت عن الأضواء 19 عاماً لم تظهر في لقطة واحدة ـ حتى على صفحات الصحف ـ لكن حب الجمهور ازداد حجمه، وصعدت شعبيتها .. ))

فعلا سبحان الله ..

الانسان المصري العادي بيقدر يميز بسهوله جداً بين الشخصيات

حتى ان تعبيرنا الدارج ان ( فلان ريحه حلو )

يعني له قبول .. وتجد من دعوات الجدود والصالحين ( ربنا يجعل ف وشك القبول)

و ان الشخص ذو الشعبية الجماهيرية الحقيقية ، تراه يمتلك روح شفافة قادرة على الامتزاج مع الناس بيسر وبدون تكلف أو مكياج او مبالغات قولية أو انفعالية.

لكن موقع ايلاف كان به مقالاً أكثر ضراوة من السابق ..

وكوني لا احب موقع ايلاف لتناولة العلماني - الفج احيانا - لكثير من الامور الدينية

إلا ان المقال ورد به ما يستحق المتابعة .. كمثال :

(( أداء باهت لسهير رمزى وقصة مفككة وإخراج ممل، طبيبة نساء تعطينا دروساً فى أصول التربية بطريقة كتاب القرية من خلال إبنها من زوجها الأول المريض، وهى بالطبع البريئة الغافلة عن ألاعيب الذئب البشرى زوجها الحالى والذى يقوم به مصطفى فهمى، وحلقات تمر فى رغى وثرثرة عن أن إبنها لازم يورث ثم عن زعلها وقمصتها لأن زوجها يبخل عليها بإثنين مليون جنيه لشراء مستشفى، وعن أزمة صديق إبنها الذى يعطفون عليه... الخ، والمدهش أن كم التحريمات والمنهيات التى وضعتها سهير رمزى على مشاهدها قابلها إنفلات على الجانب الآخر من الشاطئ الدرامى بين مصطفى فهمى وبثينه رشوان، فالإشارات الجنسية والتلميحات الإباحية فى الحوار بينهما والذى حاز على أكبر كم من المحذوفات الرقابية هى تعويض درامى عن تمثيل سهبر رمزى البارد المبستر، وكان منطق المخرج غطى رأس سهير هنا وعرى صدر بثينه هناك لكى تتوازن الأمور ونقدر نسوق المسلسل فهذه نقرة وتلك نقرة .. ))

على الجانب الاخر ..

لقد عبر - الواد التقيل ابن الايطاليه - الفنان حسين باشا فهمي عما بداخليعندما عقب على عودة المعتزلات في لقاء منشور في -المصري اليوم-

http://www.almasry-alyoum.com/article.aspx?ArticleID=34636

عندما قال :

(( كذلك من العيوب عودة كل النجمات المعتزلات مرة واحدة، فأداؤهم ضعيف وروايات مسلسلاتهم مهلهلة، وأحجامهم ضخمة، ولا أعلم لماذا عادوا؟ فعندما اعتزلوا قالوا إنهم وجدوا طريقهم إلي الله ودعوا لنا بالهداية، وقالوا إنهم كانوا يعيشون في ظلام، وما معناه أننا سندخل النار، فهل عادوا لندخل النار «سوا» لو كان هذا صحيح فهذا لطف منهم ))

mfb:

شكرا يا حسين

طبعاً كان اسامه افندي عكاشة أول المهاجمين - وكيف لا - ومعه يسرا

وردت عليهم سهير رمزي بشكل محترم ولائق

http://www.alburaq.net/images/fun/suhair6.jpg

عجبني الكلام التلقائي من - هند رستم - على صفحات الجمهورية

وخاصة تلك الفقرة عن الـ ( تر تر ) الكثير في ملابس سهير رمزي !!

http://www.algomhuria.net.eg/algomhuria/to...ts/detail00.asp

أرجو ألا يُفهم من كلامي انني ضد الفنانات المعتزلات

أنا بكل تأكيد ضد كل خلاعة وعري

ومع كل فن راقي ومحترم و له مضمون واعي ويتم اخراج فكرته الى النور بلا ابتذال و جنس

انا اعلن رفضي نقطتين:

طريقة الحجاب نفسها فيها الكثير من البهرجة والألق الجاذب للانظار وهذا ليس من أبجديات الحجاب

ثم العودة الى الفن الذي كان ظلاماً او حراماً عند البعض ، هو نوع من تذبذب المواقف الذي يعطي انطباع سلبي عند الناس - وأنا منهم بالطبع - عن الشخص الذي لا يثبت على موقف واضح .. انت عاوز ربنا والآخرة ولا عاوز الدنيا والاضواء والفن وما يدور في فلكه من تنازلات ..!!

هذا كل ما في الامر

وسلامتكم

[MZohairy]

أعظم حاجه في أعمال رمضان التليفزيونيه هو

هذا الممثل العملاق إبن نور الشريف في (حضرة المتهم أبي)

تمثيل مقنع :)

حضور طاغي :)

دم خفيف جدا :)

بصراحه

أعظم من مثل هذا الدور في الدراما المصريه

[nash]

شكرا والله علي السرد الرائع للمسلسلات المصريه :)

والله المداخلات بحد ذاتها ممكن تعمل فيلم لواحده..والله ضحكت من قلبي :)

الصراحه والله ماأقدرش أتابع مسلسل أساسا من أيام الثانوي وليالي الحلميه ورأفت الهجان..تقريبا ده كان أخر مسلسل شوفته بحياتي قديمه صح

.....................................................................................................................................

[نانو]

شكرا والله علي السرد الرائع للمسلسلات المصريه :)

والله المداخلات بحد ذاتها ممكن تعمل فيلم لواحده..والله ضحكت من قلبي :)

الصراحه والله ماأقدرش أتابع مسلسل أساسا من أيام الثانوي وليالي الحلميه ورأفت الهجان..تقريبا ده كان أخر مسلسل شوفته بحياتي قديمه صح

.....................................................................................................................................

نسيتي زيزينيا يا ناش

و اللي بعد كده.................................. فقع مراره :)