دبى .. و ما ادراك ما دبى

[abo 3ali]

السلام عليكم

الحقيقه فى ناس فاكره دبى انها جميله و ناس فاكرها انها مخور كبير .. طبعا بتختلف النظره من شخص لاخر .. حسب هو جاى ليه و عاوز ايه

يعنى مثلا لو جاى سياحه . لا فعلا دبى جميله .. بس من ناحيه المولات الضخمه و السياحيه الاستهلاكيه . لكن مش ممكن نقارنها بمصر ام الدنيا فى الشواطى و المنتجعات السياحيه . و اهم حاجه الروح .. روح البلد نفسها بتفرق كتير . هنا تحس ان الخواجه هو اللى عامل كل حاجه و دى حقيقه . عاملها بنظام انجليزى دقيق فى التخطيط و الشوارع و الواجهات . و اهم حاجه الصيانه .. تصوراو شفت واحد هندى بيغسل سلات القمامه بعد مافضاها ..

لكن انا اول ماجيت مانبهرتيش بدبى اوى يمكن علشان اخويا كان بقولى واضح انك مش ضحيه زيى ( اخويا جه زياره و كان نموذج لكلمه ضحيه و انبهار ) و بعدين انا مكنتش جاى اتفسح انا كنت جاى اشتغل فقاعد قاعد اللى مش حاشوفه النهارده حاشوفه بكره مش فارقه ( بقالى حوالى سنه و شغلى جنب الايمارتس مول و عمرى مادخلتها )

المهم بالنسبه للناس اللى بتفكر تيجى دبى علشان تشتغل من مصر اولا لازم يكون الانجليزى بتاعهم كويس لان دبى فيها حوالى 180 جنسيه بس امترهم الهنود و الفلبنه .. و بعديهم الباكستانين و طبعا فى عرب كتير و ايرانين ده غير كل الدول بتاعت روسيا القديمه اللى اتفككت و اللى كلها بتنتهى ب ( ستان ) كازخاستان و اذربيجيان و و

و لازم برضه يعرف ان العيشه هنا غاليه موت خصوصا الايجارات و فلوس المعيشه ( صنفت كاغلى بلد او مدينه فى الشرق الاوسط ) و انه جاى هنا علشان يشتغل و يموت نفسه مش يهزر و يخرج ( ياما مش حيعمل تعريفه ...

بالنسبه للموضوع المهم الى هو ( و ماادراك ما دبى ..) فهى و بلا ادنى مورابه شهرتها بالدعاره .. الكلام ده حقيقى بس بيتم بشكل ساعات مهذب يعنى تروح المواخير يا ما تلاقيها بشكل غير مهذب ( واقفينلك فى الشارع الصبح و انت رايح الشغل و بتقول اصطبحنا و صبح الملك لله ..

طبعا بالنسبه للشباب اللى مش متجوز فهى ازمه و اختبار حقيقى لقوه ايمانك . نصحيتى ليك متخرجش من البيت اصلا و متفكرش تروح الاماكن دى و استفيد بوقتك فى حاجه مفيده او نام علشان تعرف الصبح تروح شغلك ..

انا بقول الكلام ده ليه لان ليا اصحاب كتير اوى بيجوا زياره فعايزين يكتشفوا الكلام ده و مهما نصحت قليل بيستجيب و الباقى لا يستجيب

يا جماعه اى بلد فيها الحلو و فيها الوحش و اى بنى ادام برضه جواه الحلو و الوحش

اللى عاوز يجى دبى ياكل عيش بما يرضى الله اهلا بيه الفرص كتير و موجوده . حتتقى ربنا و عارف انك سايب اهلك و بلدك و ناسك علشان تعمل لنفسك قرشين تقدر بعد فتره ترجع بلدك تانى او تكمل انت حر

حتيجى تدور على الحاجات دى من اولها . لا خليك فى بلدك احسن لان الموضوع ده بيجيب الفقر و الامراض و ربنا يعفينا جميعا

دبى زيها زى مصر زى امريكا زى كندا زى بلاد الواق واق فيها الحلو و فيها الوحش المهم انت ايه و عاوز ايه

دبى غاليه .. بس جميله

دبى نظيفه . منظمه . بيحترموا البنى ادم . فيها احسن شرطه على المستوى الانسانى

دبى فيها كده و فيها العن من كده المهم انت عاوز ايه ...