عن أم الدنيا .. احكوا لي !!

[مصرية الهوى]

اهلي وحبايبي واخواتي المصريين ...

بسم الله الرحمن الرحيم نخش في الموضوع على طول :wub: ....

انا عايزه اسألكم عن ام الدنيا .. واهل مكة ادرى بشعابها ...

كلكم تقريبا عارفين اني قريبا ان شاء الله هأخش القفص الذهبي .. عقبال البكاري ...

والايام دي بنخطط لشهر العسل .... وكانت ام الدنيا من ضمن الخيارات المطروحة ...

واكيد كلكم عارفين ان حلمي ومنى عيني اني ازور ام الدنيا .. واشوف المصريين في مصر :P

طبعا على طول قلت : مصر مفيش كلام تاني :) ...

رجعت تاني وفكرت : هل مصر تنفع شهر عسل ؟؟ ..

والسبب اللي خلاني اطرح السؤال ده .. عدة اسباب ...

اولا هأقسملكم مصر من وجهة نظري انا اللي حلمت كتير اني اشوف مصر وعندي كتب سياحية وخرائط عن مصر ياما ...

فكرت بسيناء ومنطقة البحر الاحمر .. شرم الشيخ والغردقة ودهب والاماكن دي ...

بصراحة خفت ..

عايزه افرح انا مش عايزه اموت .. يمكن يكون الامن مستتب .. والتفجيرات حصلت برضه عندنا في السعودية كتير ..

بس بصراحة خايفة وهأفضل ماشية وانا متوقعة انه يحصل انفجار في اي لحظة ....

وخصوصا ان وحدة قريبتي راحت شرم الشيخ شهر عسل في نفس اليوم اللي سافرت فيه حصل انفجار ..

يعني ربنا ستر عليهم ...

سبب اخر .. خالي راح شرم الشيخ وصاحبتي راحت الغردقة .. وحكوا لي على مناظر مش ولا بد ...

من ناحية السياح الاوروبيين وتعريهم والكلام ده .. وانا بصراحة باتضايق من مناظر العري الخليعة اوي ..

وكمان وحده مصرية قالتلي نصيحة متروحيش شرم الشيخ انتي مش هتشوفي مصريين هناك كلهم اوروبيين واسرائيلين ....

بصراحة انا شلت الفكرة دي من بالي .. بس برضه عايزه وجهة نظركم ...

القسم التاني : اللي هي القاهرة ومناطق البحر المتوسط زي الاسكندرية والساحل الشمالي ...

بصراحة انا معرفش التفاصيل .. وان شاء الله هاحاول ادور على سايتات في النت اشوف عن الخدمات والاوتيلات والكلام ده ...

بس قلت اكيد انتوا هتفدوني اكتر ....

انا عايزه اعرف .. هل الاسكندرية والساحل الشمالي ينفعوا شهر عسل .. يعني اوتيلات خمس نجوم ( انا عندي عناوين فنادق الاسكندرية بس الساحل الشمالي معرفش حاجه ) .. واماكن هادية وراقية وحلوة تنفع لعرسان .. ومولات فخمة ( الشوبنج شي رئيسي :) ) وكلام من ده ...

والقاهرة نفسها ... والا تحسوا انها صاخبة ؟؟ مع اني نفسي جدا جدا الى ما لانهاية اني ازورها ..

الفنادق طبعا كل الفنادق العالمية موجودة ... عندي العناوين .. بس قولوا لي الاحلى ..

و قولوا كمان اماكن حلوة وهادية ...

انا حلمي في القاهرة بصراحة اروح القلعة ( واقابل عوكل :P ) واروح مدينة الانتاج واشوف الاهرامات واروح سور الازبكية و وسط البلد واروح القناطر واركب مركب في النيل .. واماكن كتير سمعت وقريت عنها ..

بس هل تحسوا بحكم انكم عارفين البلد كويس ان الاماكن دي حلوة لعرسان .. والا تنفع سياحة للتعرف على البلد ؟؟

القسم التالت : اللي هو جنوب مصر .. الاقصر واسوان ..

حاسه ان المناطق دي اغلبها اثار .. تنفع لسياح جايين خصيصا عشان الآثار بس ...

صحيح انه نفسي اشوفها .. بس مش دلوقتي ..

نأجلها لحد ما يبقى معايا عيلين تلاتة B)

والا ايه رأيكم ؟؟ ....

حاجه تانية لازم اعرفها .. فرحي ان شاء الله هيبقى يوم 25 اكتوبر .. على بداية الشتاء تقريبا ...

الجو في مصر بيبقى عامل ازاي في نوفمبر .. والا الدنيا بتبقى برد .. ولازم نقعد جوا البيت ومينفعش خروج ...

:rolleyes:

جاوبوا على اسئلتي بالتفصيل واتكلموا على قد ماتقدروا والا هاسيبكم واروح ماليزيا والا المالديف :P بس خايفة من تسونامي ....

يا ساتر هي الدنيا بتخوف كده ليه :blush:

ربنا عالظالم والمفتري ...

[se_ Elsyed]

ونعم الإختيار يا جيجي يا بنتي

ويا حبذا كمان لو عريسك كان راح مصر قبل كده .. وده أنا شبه متأكد منه .. هايبقى عنده خبرة إلى حد كبير عن الأماكن وعلى الأقل مش هايبقى غريب ..

أولاً : الغردقة وشرم الشيخ .. أقترحها عليكي لو عريسك رايح يعسل لوحده في شهر العسل .. وممكن تفضلي إنت في القاهرة وهو لما يرجع يحيلك على اللي شافه :happy: ، وأهو منها تبعدوا عن بعض شويه عشان توحشوا بعض .. ومنها توفير للتكاليف .. لإنك عارفه الغرفة الدبل غير السنجل وكده يعني ...

لأ بجد .. الغردقة وشرم الشيخ في الشتا ما تعرفيش تحطي رجلك فيهم لإن ده عز الموسم هناك عشان السُياح بتوع أوروبا بييجوا هربانين من الثلج والبرد ... أما جوهم في الشتا فجننننننان .. لكن نوت ريكومينديد ... ما أنصحكوش تروحوا المكانين دول بالذات ..

ثانياً : القاهرة ... بالرغم زحمتها إلا أن لها سحر خاص .. وزي ما قولتي .. لو نزلتوا في فندق كويس فمش هاتشيلوا هم الإقامة ولا الأكل ولا الشرب وهاتفضوا للفُسح بس .. وعندك بقى من أول النيل والنايل كروز ... مروراً بعشرات المولات الخطيرة اللي هاتنبهري بها وأولهم " ستي ستارز " في مدينة نصر .. وصولاً إلى الملحق التجاري بهيلتون رمسيس ويتخللهم العديد والعديد من المولات التجارية العديدة اللي ممكن أنسى إسم واحد فيهم ...

وعندك برضوا مدينة الإنتاج الإعلامي زي ما قولتي ... و جنبها على طول " دريم بارك " ...

ونصيحة أوعوا تروحوا أي منطقة في مصر في العيد لإن الزحام بيبقى رهيب .. وشكلكوا كده هاتتجوزوا في العيد .. يعني على ما تجهزوا الشُنط وتاكلوا الكحك والبيتي فور يكون العيد خلص .. ساعتها تنزلوا مصر وتبقوا ملوكها وتحسوا إنها ملككم لوحدكم .. لإن العيال بتبقى رجعت المدارس والناس رجعت أشغالها والدنيا كلها زهقت فُسح في العيد .. وبالتالي أماكن الفُسح والترفيه بتبقى فاضية جداً ..

أما عن إسكندرية ... فيعجز الكلام عن وصفها سواء صيفاً أو شتاءاً ... فهي منطلقة وشقية في الصيف .. ودافئة وحنونه في الشتا وحتى مع أمطارها ونوانتها فهي رائعة أيضاً .... بس ما فيش نزول بحر في الشتا عشان الموج وكده ..

الساحل الشمالي .. لم أذهب إليه وما عنديش فكرة عنه وممكن الإخوة هنا يحكوا لك عنه بإستفاضة ...

الأقصر وأسوان ... مش محببه لأهل الخليج ...ولو إن جوهم في الشتا أكثر من عبقري وأنا شخصياً روحتهم في الشتا ... وأسوان بالذات جميلة جميلة بناسها وجوها وخُضرتها وأثارها ونيلها ... كفاية لو ركبتوا نايل كروز من الأقصر لحد أسوان .. يا عيني يا عيني

أما عن الأمن والأمان .. فدي أخر حاجة الواحد يفكر فيها ... يا بنتي عندنا شُرطة ما بترحمش ... وإيدهم دي كإنها رجول ومركيبين لها إيدين ...

أما المفاجأة اللي محضرها لك فهي :

إني مستعد أنزل معاكو مصر وأشتغل لكم مرشد سياحي ومُترجم .. مجاناً .. بس إنتوا إحجزوا لي تذكرة وخرجوا لي تأشيرة خروج وعودة وأحجزوا لي أوضة جنبكو فوول بورد .. أو فول بس مش مهم وأنا هاتصرف في البورد .. ومش هاتحسوا بيه .. ده أنا نسمه وكإني مش موجود .ولا بأشوف حاجه أو بأسمع حاجه ..

سين سين .. مرشد سياحي ومبلط سيراميك وبتاع كله

[نانو]

يا اجمل و ارق عروسه

الف مبروك الاول و ربنا يتمم لك بخير

طبعا لازم تيجي مصر....ده الخيار الوحيد ادامك....يعني ما ليكيش اي خيار تاني

شوفي يا ستي

اولا انت ....سئلتي و ردتيتي علي جزء كبير من الاسئله .

نبدا من الاخر للاول...زي ما قلتي بالضبط....بالنسبه للاقصر و اسوان هتبقي غير مناسبه لشهر العسل خالص لانها بتبقي مجهده شويه

و معظمها مشي مسافات طويله ....و زيارات لاماكن كتير في فتره صغيره

و علي فكره انا عندي واحده صاحبتي راحت شهر العسل هناك ...و علي مركب نيلي بس الحقيقه تعبت جدا و كانت متجوزه كمان تقريبا في نفس الشهر

اوكي ....يبقي بلاها الاقصر

نيجي للاماكن اللي فيها بحر زي شارم او الاسكندريه او الساحل الشمالي

شوفي يا ستي .....لو انت بتحبي تنزلي البحر ....يبقي ما فيش قدامك غير شارم الشيخ....و الغردقه...لان الوقت ده من السنه

الجو هناك بيبقي مناسب و دافي لكن باقي مناطق مصر كلها بتبقي برد شويه و ما ينفعش تنزلي البحر

و بعدين انا شايفاكي مرعوبه من موضوع الضرب ده و اعتقد ان شهر العسل مش ناقص رعب :wub:

اوكي كده....يبقي بلاها كمان شارم ....و لو انها تعتبر من الاماكن المرشحه

نيجي بقه للاسكندريه و الساحال الشمالي

انا اصلا من الاسكندريه الغاليه....بس هاحاول ما اكونش منحازالها علشان :wub: خاطرك

شوفي يا ستي اسكندريه بتبقي جميله جدا في الوقت ده من السنه بس طبعا بتبقي برد شويه علي نزول البحر و كمان لانها صغيره شويه مش هيبقي فيها

اماكن كتير ممكن تزوريها...و كمان ما فيش قدامك غير فندقين كويسين هناك هم الشيراتون و فلسطين

و طبعا دول هيبقي فيه احسن منهم في القاهره

بالنسبه للساحل الشمالي اعتقد انه هيبقي غير مناسي برضه لانه بيبقي فاضي اوي في الوقت ده من السنه

بيبقي زي ما يكون مهجور....و ده انسب وقت ليه هو فصل الصيف بيبقي يجنن وبعيد عن التفجيرات والقلق....فده بقه خليه السنه اللي جايه ان شاء الله

و بكده يا حبيبتي .....يبقي ما فيش قدامك غير القاهره.....و اعتقد انها هتكون انسب حل ليكي في الوقت ده

اولاا عندك اختيار واسع جدا من الاوتيلات و انا ارشح لك ...سميراميس انتركونتينتال او كونراد...او الاحسن و الاحلي انتركونتينتال سيتي ستارز

لانه ده اجدد واحدث و افخم اوتيل في القاهره كمان فيه شوبنج علي اعلي مستوي...و طبعا انت قولتي انك مهتمه بالشوبنج

ثانيافي القاهره في فرص كتير اوي للخروج و الفسح ...يعني لازم مثلا تركبي مركب نيلي

لازم تزوري المتحف.....لازم تروحي خان الخليلي....لازم تروحي الاهرامات...كمان فيه مولات كتير اوي هناك ممكن تزوريها و تتسوقي منها

فيه فرصه انك تروحي مسرح .... تروحي سينيما.....انك تحضري حفله اوبرا....او حتي تتمشي علي النيل

و انت مترفقه ايد جوزك في ليله شاعريه مقمره علي ضفاف النيل (حلوه مترفقه ديه.... :wub:)

عارفه يا جيجي دنيا تانيه مش ممكن تزهقي منها اقولك ايه يا جيجي ...عن ليل القاهره و سحره ودفئه...نسمه الهوا و انت ماشيه علي النيل :happy:

و بعدين الجو في القاهره في الوقت ده ....احلي جو في الدنيا بحقيقي

و بالنسبه للزحمه و الدوشه ما تقلقيش....لان انت هتبقي موجوده دايما في الاوتيل او الاماكن اللي هتزوريها...هتبقي بعيده عن الدوشه والصخب

و حركتك خارج الاوتيل بتبقي سهل جدا بالليموزين ....او حتي بتاكسي المدينه وده الاوتيل نفسه بيوفرهولك في اي وقت تطلبيه

مش عارفه يا جيجي ديه والله خلاصه افكاري و يارب تعجبك ويوفقك ربنا و تكوني احلي و اجمل عروسه

[nancy]

شوفى يا جيجي

اعملى خطة علشان تعرفى تستمتعى بوقتك

الغى الشرم والغردقة لانها موسم والاجانب هناك بيعيشوا حياتهم على الاخر ومش معقول تروحى من النقيض للنقيض

فى القاهرة النيل كروز دى جميلة 4 ايام فى النيل والمركب ماشية بالراحة فحتحسى اد اية انها ممتعة

وحتة الحسين والازهر فيها اماكن كتير حتعجبك

المولات الى قالك عليها س س حتعجبك مع انى كمصرية مش باجيب مشتريات من مصر كتير انما ممكن تركزى على السيفونيرز من خان الخليلى احسن

طبعا فسحة الهرم فى الحنطور تجنن ومدينة الاعلامين والملاهى ظريفة

نيجى للاسكندرية( الحتة بتاعتى)

طبعا يا بختك حتروحى فى وقت جميل صحيح مفيش نزول بحر بس ممكن تنزلى فى شيراتون المنتزة او جوة المنتزة نفسها

لان التمشية فيها جميلة جدا والتمشية على البحر تجنن

بس اسكندرية علشان هاديا اوى فى الشتة كفاية عليها 3 ايام بالكتير

لانك ممكن تروحى مكتبة الاسكندرية ومطاعم للسمك عندك ايلع فى بحرى والبيتزا مينوش رشدى على البحر وشى جابى فى محطة الرمل بعد كدة التمشية على البحر وفى المنتزة وحنطور على البحر وصوت خطوات الحصان تريح الاعصاب

ومتتامليش اوى فى السهر فى الاسكندرية لان على الساعة 11 حتلاقى البلد نايمة فى الشتاء

بس وسليملنا على مصر يا جيجي رغم اننا لسة جايين بس وحشتنا رغم كل شىء :happy:

[MZohairy]

لو عايزه الاسترخاء و الطبيعه ارشحلك يا جيجي حي الباطنيه و الدرب الأحمر و الجياره

من ارقى الأحياء :wub:

قصور من العصر الروماني

فلل من التراث الاغريقي

واحات غناء

رياض و رياحين

عصافير مغرده و طيور غناء

سحر الحضاره و المعاصره

الفن و الطبيعه و الجمال يجتمعون

و لو عايزه محلات و شوبنج يبقى عليكي و على الزاويه الحمرا و منشية ناصر و السواح

و لو عايزه السياحه الرياضيه و العلاجيه يبقى انتي فعلا اخترتي المكان المناسب

بولاق الدكرور

شوارع واسعه مخصصه للمشاه و اخرى لراكبي الدراجات

برك من الماء احيانا تجديها في وسط الشارع (مش مجاري) بس عشان محبي صيد الأسماك

يارب شهر عسل سعيد

و متنسيناش في الدعا بقى :happy:

[se_ Elsyed]

لانك ممكن تروحى مكتبة الاسكندرية

فعلاً أنا أؤيد أختشي نانسي في النقطة دي ..

في شهر العسل بالذات أحسن مكان للعروسين هو المكتبات ..

ويا سلام بقى لو ماما سوزان كانت هناك وشافتك وإنت بفستان الفرح وعريسك لابس توب ( الدفة ) والغترة مع البشت التمام وكل واحد واخد له ركن وإنت ماسكه كتاب ألف ليلة وليلة بأجزاءة الخمسين .. وهو ماسك مجموعة " البداية والنهاية " لإبن كثير وهعاتك يا قراية للصبح ......

ياله من شهر عسل مفيد ...

وهكذا تكون شهور العسل وإلا فلا ..

ولعلمك الفكرة دي جديدة وماحدش عملها قبل كده - ولا هايعملها بصراحة -

ويا سلام بقى بعد ما كل واحد يخلص المجموعة اللي بيقرأ فيها - وده بعد إنتهاء الشهر طبعاً - يسمع بقى اللي إستفاده للطرف الأخر .. ويا سلام برضوا لو كان في إيدكو نوت باد تدونوا فيها ملاحظاتكو والهيد لاينز بتاعت الكتاب بحيث الفائدة تعم على الجميع .... واندر فول .. واندر فو :happy:

[se_ Elsyed]

لو عايزه الاسترخاء و الطبيعه ارشحلك يا جيجي حي الباطنيه و الدرب الأحمر و الجياره

أخي العزيز الدوق زُهيغي

كنت عارف إنك مش هاتبخل على بنتنا جيجي بنصايحك الغالية النابعة من أعماق خبرتك الطويلة في عالم السياحة والتسول قصدي التسوق

ولكنني أعتقد بإنك قد أوجزت ولم تعطها تفاصيل أكثر عن تلك الأماكن ..

فلو جيجي أخدت عريسها وذهبا سوياً إلى الباطنية مثلاً .. فمن أين يبدأ ؟

هل من عند كُتكت بتاع الكوكايين .. أم من عند أم أشرف بتاعت التوسيفان ؟

إيضاً لا أدري لماذ أغفلت أماكن أخرى جذابة مثل " نزلة السمان " وأول " طريق بلبيس "

حيث أشهر تجار الصنف ...

إبنتنا الغالية جيجي .. أبشري بشهر عسل جديد ومفتكس ولم يتم إختباره معملياً من قبل ..

[Diab]

أنا حأقولك علي أسوان إكمنها بلدي عايزه تروحيها براحتك

مش عايزه

مش عايزة :wub: بتقولي أيه طااااااااااااااخ :wub: أه يا عيني براحتك برضه :wub:

في فنادق حلوة هناك متشليش هم

الفسحة بقي طبعا أبو سمبل أساسي

مممن تروحي السد العالي ( ليه هي رحلة مدرسية :happy: )

جزيرة فيلة ومتحف النوبة

منظر النيل والخضرةالراااااااااااااااااائع

aswan at night

[مصرية الهوى]

مليش دعوى هأروح مصر .. ويبقى هو يروح ماليزيا لوحده :P ....

الله الله يا سلام .. فعلا شوقتوني اروح مصر .. وانا فعلا مبسوطة اوي ان الوقت مش صيف وحر وقرف .. واحتلال خليجي طبعا .. وبرضه الناس كلها مدارس ومش فاضيين ..

يعني هنتمشى لوحدنا في الشارع :wub: ...

س س فعلا خطيبي راح مصر قبل كده بس كانت زيارات عمل ..

يا سلام والله انت شوقتني فعلا ازور القاهرة .. احنا تقريبا ان شاء الله هننزل بعد العيد بكم يوم .. قول على 6 او 7 شوال .. يعني تكون الناس ان شاء الله خلصت فسح وعيدت خلاص ورجعت شغلها .. نبقى لوحدنا في المولات والملاهي ...

بجد انت صعبت عليا .. شكلك كده واحد غلبان وهنكسب فيك ثواب .. ماشي ولا يهمك هناخدك معانا .. تشيل الشنط .. و تروح تجيب اللحمة والخضار من السوق .. ويعني .. وخصوصا انك واحد لا بتهش ولا بتنش .. ومش هتحس باللي حواليك .. خلاص يا سيدي .. جهز شنطتك من دلوقتي :P ..

الله يخليكي يا نانو ويبارك فيكي ...

لا بصي من ناحية نزول البحر .. حتى هنا في السعودية انا مبحبش انزل البحر كثير .. بحب اتفرج عليه بس ..

بس عايزه اسألك ليه بتقولي ان الساحل الشمالي بيبقى مهجور .. يعني هي مش بلد ليها ناسها يعني والا ايه .. والا هي منتجعات بس ..

طيب حلو انا عايزه مكان هادي ورايق .. طيب فيه فنادق وملاهي ومولات وكلام ده .. والا ايه النظام ؟؟

شكلك رحتي لها قبل كده يا ريت تقولي لي عليها ..

يا سلام عليكي يا نانو انا عايزه انزل القاهرة النهارده .. فعلا والله خليتيني في الجو ..

الله عليكي يا نانسي .. قلتي ووفيتي ...

بالعكس انا نفسي في مكان هادي ورايق كده زي اسكندرية ..

وخلاص يا ستي هاسلملك على مصر ان شاء الله بس اروح الاول .....

زهيري .. ايه الجمال ده كله ... كل ده موجود في مصر .. ام الدنيا بحق وحقيق :wub: ..

بس فعلا والله انا نفسي ازور احياء القاهرة القديمة اللي البيوت لازقة ببعضها والشوارع ضيقة .. والستات اللي بتنشر الهدوم في البلكونات .. والراجل اللي بشطف قدام المحل .. يا سلاااااااام .. حاسه ان دي مصر الحقيقة ...

س س ..

ههههههههههههههههههههههههه ..

هقوتك نقضي شهر العسل كده ؟؟ .. والله فكرة مبتكرة ..

انا بحب المغامرات ..

دياب ...

انا عارفه ان اسوان بلد جميلة وشفت نيلها وخضرتها وجمالها بس في التليفزيون :wub: ..

بس مش حاسس انها بعيدة اوي :happy:

يلا بقى عايزه اسمع اراء تانية ..

بس ان شاء الله تقريبا جدا هنختار مصر يا اول نور في الدنيا :wub:

[محمود الشاعر]

لو عايزه الاسترخاء و الطبيعه ارشحلك يا جيجي حي الباطنيه و الدرب الأحمر و الجياره

من ارقى الأحياء :wub:

قصور من العصر الروماني

فلل من التراث الاغريقي

واحات غناء

رياض و رياحين

عصافير مغرده و طيور غناء

سحر الحضاره و المعاصره

الفن و الطبيعه و الجمال يجتمعون

و لو عايزه محلات و شوبنج يبقى عليكي و على الزاويه الحمرا و منشية ناصر و السواح

و لو عايزه السياحه الرياضيه و العلاجيه يبقى انتي فعلا اخترتي المكان المناسب

بولاق الدكرور

شوارع واسعه مخصصه للمشاه و اخرى لراكبي الدراجات

برك من الماء احيانا تجديها في وسط الشارع (مش مجاري) بس عشان محبي صيد الأسماك

يارب شهر عسل سعيد

و متنسيناش في الدعا بقى :happy:

زهيري يا اخويا انت شكلك عاوز تفسحهم على الاخر

يا راجل حرام عليك

نسيت اهم شارع

شارع عشرة فى الوايلي

هههههههههههه

[Tafshan]

اولاً الف مبروك و ان شاء الله بالرفاء و البنين :wub:

ثانياً في الوقت اللى انتِ مقررة تنزلى فيه مصر ح تبقى الاسكندرية برد جداً و الساحل الشمالى رصاص و بالتالى مش ح تنبسطى ..

واضح انك عايزه تشوفى القاهرة و دى اولوية رقم واحد بالنسبه لك : احجزي في فندق النيل هيلتون :

هو افضل فنادق مصر من حيث الخدمه و يمتاز بقربه من المتحف المصري (فرعونى) و قريب جداًَ من خان الخليلي و القاهرة الفاطمية و عنده احلى شيشة تفاح في مصر - للعريس طبعاً :happy:

تقدري تقعدى هناك 3 ايام ح تشوفي فيهم الهرم و خان الخليلي و القلعة و كله يعتبر قريب ما عدا الهرم ح يبقى بعيد شوية ..

بعد كده تأخذى الطيارة و على الاقصر و منها تأخذى نيل كروز 7 ايام .. بتبقى كل يوم في بلد

.. بتتحرك بالليل و بتقف الصبح عشان تتفرجى على مدن النيل و دى حاجه قمه في الرومانسية .. المناظر في وقت الغروب مع النيل بتبقى تحفه ...

بعد كده تنزلوا في كتاراكت اسوان يومين كمان :

هناك بقى في اسواق احلى من خان الخليلي :

على فكرة ماليزيا مش قد كده :wub: سنغافورة احلى .. بس زيارة مصر - بلا تحيز - لها مزاق آخر

و الف مبروك

[se_ Elsyed]

والله حرام عليكو

ده أنتوا لعبتوا في دماغي وهاتخلوني أتجوز تاني عشان أقضي شهر العسل في الأماكن الجميلة دي

إحم إحم

قصدي يعني أعيد تمثيل جوازي من أم عمر ونقضي شهر العسل في مصر

أنا بأحب الحكومة قوي ..

تعيش الحكومة اللي ما نقدرش نستغني عنها .. فكما قال أمير الشعراء " لابد للحكومة من شعب تحكمه .. ولابد للشعب م حكومه تشكمه "

ألو ألو 1 2 3 ... سامعني يابني هناك

وبعدين إيه المناظر دي كلها ؟

أومال أنا روحت فين في الشهر ده ؟

والله شكلي قضيت شهر عسلي فوق السطوح أو تحت بير السلم .. لإن روحت أماكن من دي بس ماكنتش حلوه بالطريقة دي ...

عارفه يا جيجي . لو روحتي أي مكان غير مصر

قلبي هايبقى غضبان عليكي ... وإنت عارفه قلب الأم لما يغضب

وهانمنعك تدخلي المحاورات إلا بالليل لما الناس تنام عشان تبقى في المكان لوحدك وما تلاقيش حد يسليكي ..

[Folana]

مليش دعوى هأروح مصر .. ويبقى هو يروح ماليزيا لوحده :wub: ....

زهيري .. ايه الجمال ده كله ... كل ده موجود في مصر .. ام الدنيا بحق وحقيق :wub: ..

بس فعلا والله انا نفسي ازور احياء القاهرة القديمة اللي البيوت لازقة ببعضها والشوارع ضيقة .. والستات اللي بتنشر الهدوم في البلكونات .. والراجل اللي بشطف قدام المحل .. يا سلاااااااام .. حاسه ان دي مصر الحقيقة ...

يلا بقى عايزه اسمع اراء تانية ..

بس ان شاء الله تقريبا جدا هنختار مصر يا اول نور في الدنيا :wub:

السلام عليكم ورحمة الله .....

واااووووووووو...اوه ..لالالالالا...دى حاجة اورجينال خالص...ستات بتنشر هدومها فى التراسينة!!!ياىىىىىىى...رجال بيستحموا قدام المحل...ياسلالالام سلم......هى دى مصر ياعبلة......

اسمعى منى يابنتى ....اول شىء انت ناوية على كام يوم شهر عسل ؟؟....ولا حتاخدى الشهر من بابه؟...تانى حاجة انت حتنزلى ومعاكى ..قصدى المستر حيبقى معاه كام الف ريال؟؟؟؟...مااحنا لازم نعرف علشان نرسم خطة محكمة ...قصدى نعمل بلان ...

اذا حيكون معاكم ريالات ياما ...يبقى فى الحالة دى ممكن استضيفك عندى واهو انا اولى من الفنادج...انا اقطن فى الشيخ زايد ..فى بيت صغنن ..بجنينة نونو ..يعنى حاحة اخر رومانسية وفول بوورد كمان ...وباقبل الفيزا كارد ....وممكن اسيبلك بيتى والم العيال وابوهم وارجع شقتى ..واهو كله بتمنه..... :happy:

طبعا كلاتهم هنا قالوا كل حاجة ....فعلا شرم الشيخ والغردقة مافيش داعى انك تروحيهم فى شهر العسل ..ليه بقى؟ اقولك..بقى انا رحت الاجازة دى ..ومن كتر الستات الاجانب ماهم مرميين يمين وشمال ..لقيت جوزى عينيه بقت زى عين عبد الفتاح القصرى ...نيننى راح يمين وننى راح شمال علشان يشوف اكبر قدر ممكن من هذه المهلبيات ...وللان كل يوم اقعد قدامه ساعات علشان ننى عينيه يرجع يتظبط على انا من جديد .....يعنى مافيش داعى انك تروحى ...ولو انها جميلة فعلا بس من خاف سلم يا أمى

الساحل الشمالى ....عبارة عن منتجعات ...فيها شاليهات وفيلل مملوكة لاصحابها ...وبتتقفل طبعا مع دخول المدارس لان كله بيرجع ..وكل المحلات بتقفل ....يعنى هى فى الصيف حاجة وفى الشتا حاجة تانية ...وطبعا فيها شاليهات للايجار..بس مش حتنبسطى ...لكان لو فكرتى تروحى فى الصيف ...حتستمتعى اكتر ..وخصوصا لو رحتى بورتو مارينا ..دى مكان رائع ..كانك فى فينيسيا مثلا....وفيها برضه مجرى مائى ممكن تركبى فيه جندول وحاجات كده جميلة ...وتتفرجى بقى على يخوت علية القوم ..وحابقى انزل لكم صورة احدهم ان شاء الله ...

ممكن تنزلى فى القاهرة ومنها تروحى اسكندرية كام يوم ..يعنى يومين تلاتة تغطيها كلها ...وفيه مول سان استيفانو دلوقت ..حاجة راقية جدا ..وبيساويه فى القاهرة سيتى ستارز....

وممكن فى القاهرة تنزلى فى فندق الواحة ..ده فى اول طريق مصر اسكندرية الصحراوى..يعنى قريب جدا من الاهرامات ...

بيعجبنى اكتر حاجة ..لانه زى الشاليهات ..وفيه خضرة كتير ونافورات مياه ..وكده .....وبوفيه العشا بتاعه جميل ...وكمان بوفيه العشاء بتاع انتركونتنينتال سيتى ستارز ...راااااائع

مش عايز اعيد كلام الاخوة ...بس عايزاك تاخدى بالك بس علشان ماينضحكش عليك فى اسعار اى حاجة ..زى التاكسيات او الكاريتات ...

انا تعبت بقى ..حاكمل بعدين.....

[مصرية الهوى]

الله عليك يا طفشان الله عليك .....

وزارة السياحة المصرية ملهاش حق والله .. المفروض تديك على المجهود اللي بتعمله لانعاش السياحة ..

انت مش اقل من بتوع " نورت مصر" :wub:

بجد والله العظيم .. انت خليتني اقرر تقريبا ان الوجهة تكون مصر ...

استنى عليا بس وهأخد منك التفاصيل .....

ايه رايك يا س س تعمل اعادة للهوني مون وتيجي معانا :wub:

لا متغضبش عليا ان شاء الله قررنا نحن الحكومة ان شهر العسل يبقى في مصر ...

وانت عارف لما الحكومة تتخذ قرار مفيش تراجع :wub: :wub:

وخصوصا في اليومين الحلوين دول الكلام يتنفذ على طول :happy:

[أبو محمد]

الإبنة جيجى

بما إن الأغلبية استبعدت شرم الشيخ والغردقة لأسباب "إنسانية" .. وبما أن أسوان بعيدة .. علما بأن الجو فى كل من أسوان والبحر الأحمر بيكون من أروع ما يمكن فى نوفمبر .. فأنا أوافقهم الرأى ..

إستبعدى كمان الساحل الشمالى .. لإن مش حيكون فيه صريخ ابن يومين

يبقى قدامك القاهرة والإسكندرية .. أنا أقدر أتكلم عن اسكندرية بصفتى اسكندرانى .. أما القاهرة فمعلومات الأخوة ومعلومات " المستر " حيكون فيها الخير والبركة إن شاء الله

بالنسبة لفنادق اسكندرية .. الأختين نانو ونانسى رشحوا شيراتون المنتزه .. وفندق فلسطين "داخل حدائق قصر المنتزه" .. دول هايلين .. لكن أنا لاحظت إنك عاملة حساب للشوبينج فى رحلتك .. وهنا أقدر أقولك إن فيه هيلتون جرين بلازا فى منطقة سموحة .. ودى منطقة شوبينج ومطاعم وكافيتريات مختلفة الأذواق من الغربى إلى المصرى إلى الشامى وحتى الخليجى .. فيه كمان فندق فاخر فى سان ستيفانو جراند بلازا مول .. على البحر .. والمول خطير مليان برضه محلات ومطاعم وكافيتريات على كل شكل ولون .. وفيه كمان عشر صالات سينما أو يمكن أكتر "يعنى إذا كان عندكم وقت" ..

لو نزلتى فى فندق فلسطين أو شيراتون المنتزه حتكونى فى الطرف الشرقى لكورنيش اسكندرية وبجوار منطقة المعمورة .. تقدرى تاخدى الكورنيش من طرفه الشرقى إلى طرفه الغربى (حاجة كدة بتاعة 25 كيلو) .. وفى الطرف الغربى للكورنيش "فى حى رأس التين" ممكن تاخدى أكلة سمك هايلة فى مطعم الفيش ماركت بجوار قلعة قايتباى التى بنيت فى مكان منارة الإسكندرية " إحدى عجائب الدنيا السبع القديمة" .. ودى فى الطرف الشمالى للميناء الشرقى .. ولو عايزة أكلة سمك جميلة فى جو شعبى .. أرشح لك جزيرة الملكة فى "بحرى" .. لو رحتى قريب من القلعة وسألتى عنها ألف مين حيدلك ... عاوزة أكلة سمك فى جو تانى خالص ممكن تروحى مطعم السى جل Sea Gull مكان بديع ممكن تتغدى فيه على نغمات العود والكمان لعازفين يدورون على الطاولات وتطلبى منهم الأغانى اللى بتحبيها

لو رحتى مكتبة اسكندرية فيه كتابين صغننين ممكن تقريهم عالماشى "تهافت الفلاسفة للإمام أبو حامد بن محمد بن محمد الغزالى" والرد عليه "تهافت التهافت" لابن خلدون .. وحياتك تبقى تلخصيهم وتفتحيلنا بيهم موضوع جديد فى المحاورات لما ترجعى بالسلامة

ألف مبروك وعقبال البكارى

نسيت أقولك ياجيجى .. مطعم السى جل فى منطقة المكس .. غرب اسكندرية .. بالهنا إن شاء الله

[MZohairy]

بالذمه دي اماكن يابو محمد؟ -_-

عايز تقارن الحتت دي بالحتت اللي انا قلتلها عليهم؟

ياسيدي على درب البرابره و عزبة الصعايده و قلعة الكبش و حارة عبد الباقي

شهر عسل صحيح -_-

[نانو]

شوفي يا ستي

انت سالتيني عن الساحل الشمالي

اقولك بقه ده عباره عن مصيف بس عندنا.....يعني ما فيهوش ناس مقيمين علي طول

و تقريبا ما فيهوش بيوت هو كله فيلات وشاليهات....و شويه محلات ..بتفتح بس فس الصيف

و حتي ما فيهوش مولات ...يعني زي ما الكل قالك بيبقي منطقه مهجوره تماما مجرد الصيف ما يخلص

و احسن حل زي الكل ما قال تقريبا ....تكون معظم اقامتك في القاهره.....و لو حبيتي يومين او ثلاثه استجمام

يبقي في الاسكندريه نفسها....في فلسطين اللي جوه حدائق المنتزه لانه هادي ....و جميل جدا و بيطل علي مساحه كبيره جدا من الحدائق حواليه من كل اتجاه

و طبعا بيطل علي البحر مباشره.....يعني قمه الرومانسيه والشاعريه

و بعدين ابو محمد الله يخليه ...اقترح لك احسن اماكن ممكن تاكلي فيها سمك.....و كمان اماكن الشوبنج

فلانه .....انا مش مصدقه نفسي .....هو انت ديه اللي كنتي في الاوضه اللي جنبي في هلنان شارم الصيف ده

اللي طول الليل ...بنسمع ضرب وخناق وكراسي بتطير....و جوزي دايما يقولي انت زعلانه و بتقولي عيني هتطلع علي الاجانب.....

ما اهو في راجل محترم و زوجته واولاده و شكلهم في غايه الاحترام ....و برضوا عينه بظت اهيه من وشه علي الاجانب .....يااااااااااااااه الدنيا ديه صغيره اوي......فعلا رب صدفه خير من الف ميعاد

[أبو محمد]

بالذمه دي اماكن يابو محمد؟ -_-

عايز تقارن الحتت دي بالحتت اللي انا قلتلها عليهم؟

ياسيدي على درب البرابره و عزبة الصعايده و قلعة الكبش و حارة عبد الباقي

شهر عسل صحيح -_-

وانت فاكر ان الحكاية دى كانت فايتانى يامسيو زهيرى ؟

أنا بس ما حبتش أرهق ميزانيتها .. ومارضيتش أقول لها عن أماكن عندنا فى اسكندرية لا تقل جمالا وهدوءا ورومانسية عن الأماكن اللى انت اقترحتها .. خد عندك سوق عداية .. وزعربانة .. وغيط العنب ..

كفاية كده ولا نقول كمان ؟؟

جيجى .. كأنك ماسمعتيش حاجة .. أنا على رأى اخوانا اللبنانيين ، عم بحكى مع حالى .. عم بأَروِش

[Folana]

فلانه .....انا مش مصدقه نفسي .....هو انت ديه اللي كنتي في الاوضه اللي جنبي في هلنان شارم الصيف ده

اللي طول الليل ...بنسمع ضرب وخناق وكراسي بتطير....و جوزي دايما يقولي انت زعلانه و بتقولي عيني هتطلع علي الاجانب.....

ما اهو في راجل محترم و زوجته واولاده و شكلهم في غايه الاحترام ....و برضوا عينه بظت اهيه من وشه علي الاجانب .....يااااااااااااااه الدنيا ديه صغيره اوي......فعلا رب صدفه خير من الف ميعاد

السلام عليكم ورحمة الله ......

لا يانانو ..لالا.....كراسى بتطير ..لالالا طبعا خالص...هو انا اقدر ..انا زوجى الحبيب ده يابنتى حاجة كده تسد عين الشمس ماشاء الله ...وبيشيل حديد وزرنيخ ..وحركات كده...وانا يا عينى علىً ..مهيضة الجناح ..منزوعة الريش...كلى على بعضى كده ..160 سم .. و58 كيلو...يعنى لو نفخنى اطير...لعلمك بقى انا باحترم نفسى معاه جدا ...يخرب بيت اللى يزعله..انا بادخله من باب تقوى الله وغض البصر..بس هو مسكين سمعه تقيل حبتين ....ماكانش بيسمعنى.....ادعى له بالشفا -_-

انا اعتقد كل الرجال اللى كانوا فى شرم اتشحوروا كده....

[محمد عبدالعزيز]

مع إنى اسكندرانى, بس أرشحلك الأقصر وأسوان, بعد اسكندرية طبعًا -_-

لا بجد الأقصر وأسوان مناسبة جدًا لشهر العسل, بالذات الرحلة النيلية لمدة 7 أيام, هاتستمتعى بها جدًا ومش متعبة ولا حاجة, مش شرط تلتزمى ببرنامج الرحلة وتروحى كل المزارات لأن بصراحة رأيى الشخصى معظم المعابد شبه بعضها ماحسيتش بفرق مابينهم, يعنى لو شفتى واحد أو اتنين كفاية قوى أو تشوفيهم كلهم براحتك.

على فكرة أنا زرت الأقصر وأسوان فى يناير اللى فات وكان معانا عريس وعروسة فى شهر العسل, وأعتقد إنهم كانوا مستمتعين جدًا.

فى أسوان تلاقى الطبيعة والنيل والخضرة فوق الوصف, فى الأقصر الآثار تفكرك بمحمد العزبى فى الفيلم اللى مش فاكر اسمه -_-

رحلة سعيدة وشهر عسل ممتع إن شاء الله