"شبكة" العروس المصرية .. إلى أين وصلت

[عادل أبوزيد]

رغم الأحداث الدائرة على الساحة التى تفرض "النكد" على أى مصرى إلا أننى أحاول بموضوعى هذا أن أفرض نوع من الحوار الباسم و السعيد و سأنجح فى غرضى هذا لو تذكر كل زوج مشوار شراء الشبكة و تذكرت كل زوجة لحظة لبسها للشبكة أول مرة.

ما سبق كان إستهلالا لابد منه

معظمنا أو قل معظم جيلى أنا يتذكر أغنية محمد عبدالمطلب المطرب الشعبى المشهور و هو يتغنى بشبكة العروس المصرية :

تسلم إيدين اللى إشترى .... الدبلتين و الإسورة ... تسلم تسلم

أنا لما دريت من فرحتى جيت و جبت معايا هدية .... دستة مناديل منظرها جميل و صحبة ورد ...

حا جيب عقدين و سبع فساتين ...... و عشر وقات حنة و سكر ....

و حا قيد النور فى طاقات بنور أحمر و أخضر و أصفر

و من أجل الشباب يلزم نوع من الشرح لهذه الأغنية .... طبعا واضح إن الشبكة عبارة عن دبلتين و إسورة و لم يقل المطرب من أين تم شرائهم هل من الصاغة أم من وسط البلد ... هل من عكاوى (أشهر تاجر مجوهرات زمان) أم من السرجانى أم من عند الصائغ اللى إشترت منه جارتنا

و هل هم ذهب أصلى أم ذهب الجمل ( نوع من المصاغ المطلى فقط بالذهب و لو ذهبت للصاغة ربما تجد عدة محلات تضع جملا ذهبيا فى الفترينة) أم هى من البلاتين المرصع بالألماظ ؟؟

و نكمل شرح الأغنية

الرجل أحضر هدية من فرحته و أنا أعرف إن المناديل تعتبر فآلا سيئا !!! و لكن حرمنا المصون أعطنى المعلومة الصحيحة أن دستة المناديل هذه ذات المنظر الجميل إنما هى "مناديل رأس مشغولة بالأوية و سيسألنى البعض يعنى إيه منديل رأس و يعنى إيه أويه و لكنى لن أرد حتى لا يخرج الموضوع عن سياقه"

طبعا العريس سيأتى ب عقدين و هذه معروفة و سبع فساتين ( سيأتى بهم العريس و ليس العروس) و سيأتى أيضا ب " عشر وقات حنة و سكر" و أظن هذه الأخيرة تمثل نوع من الطلاسم لشباب محاورات المصريين و نشرح ....

عشر بمعنى رقم عشرة .... هذه سهلة " وقات" جمع وقة و هى الإسم العامى لوحدة الوزن "أقة" و كانت تساوى أربعمائة درهم (وحدة وزن أيضا) و الأقة تساوى 1248 جراما و الرطل و هو وحدة وزن أيضا يساوى 12 أوقية و كل أوقية تساوى 12 درهما و الدرهم يساوى 3.12 جراما

يكفى ذلك عن تعبير "عشر وقات" بالمناسبة كان الشائع بيع اللحم فى القاهرة بإستخدام وحدة الرطل و فى الإسكندرية بإستخدام وحدة الأقة و فى مصر كانت توجد سلع تباع بالأقة و أخرى تباع بالرطل بدون أى قاعدة مثلا الطماطم بالرطل و البطاطي بالأقة ...

لم تذكر الأغنية إذا كان العريس سيحضر عشر أقات حنة و عشر أقات أخرى سكر أم أن مجموع ما سيحضره هو عشر أقات 2 حنة و 8 سكر ... طبعا معروف إن السكر لزوم الشربات و الحنة لزوم ليلة الحنة.

نعود لأصل الموضوع .. الشبكة .... أذكر فى الأربعينيات من القرن الماضى أن خالى و كان يخطب لأخيه فتاه من علية القوم جاء لأمى متساْئلا " يا ختى خالتها بتقول شبكة ليلى - إسم العروس - لازم تكون ألماظ" و يبدو أن المعتاد وقتها - على الأقل فى أسرة خالى أن الشبكة من الذهب ...

و مرت السنوات و تغيرت الأصول و أصبحت أغنية محمد عبد المطلب شيئا من التراث ..

و الآن أنتظر من الجميع الحديث عن الشبكة .. ما نوعها و من أين ستشتريها أو تتمنى تشتريها و بكام و تقاليد الشبكة الآن كحقائق فى مواجهة المرحوم محمد عبد المطلب

[زعلان]

انت ناوي تعملها تاني ولا ايه الف الف مبروك

[عادل أبوزيد]

انت ناوي تعملها تاني ولا ايه الف الف مبروك

سيدى .. الموضوع هام لكل من هم مقبلون على الزواج الأرجح أنك لم تقصد المزاح و تشتيت الموضوع و سبب حديثى هذا أن أبنائى مقبلون على الزواج فحديث الشبكة من الموضوعات التى تناقش بجدية فى كل أسرة عندها إبن أو إبنه على أعتاب الزواج.

[achnaton]

ياسلام .. يا أستاذ عادل .. فكرتنا باللى راح .. وايام الافراح .. !! وانت دائما تعاكسنى ..وتثير موضوعات .. تقلب فى اللى فات .. تمام زى حكاية المنجه .. اللى أنا محروم منها .. وغيرى مغترب أيضا .. وسافح الموسم ده نص طن - كما إعترف وقال - الشبكة .. !! أنا عملت شهم وقلت للمدام ..بدلا من الزواج تحت سلم السفارة .. وكان أيامها سفارتنا المصرية تعقد الزواج تحت سلم الدور الثانى فى الفيلا .. والساعى والسواق شهود .. المدام وافقت وقالت ننزل مصر .. وامام موثقة الشهر العقارى التى أصرت على استخدام الفرنسية عشان تفهم العروسة ماذا تقول الشريعة الاسلامية .. وسألتها لك الحق فى مهر .. جزء عاجل وجزء آجل .. ولابد أن نذكرها بالعقد .. والمقدم لا يقل عن خمسة وعشرين قرش .. والمؤرخ كما تريدين .. وطلبت العروسة 25 قرش مقدم .. و368 قرش مؤخروسألتها الموثقه واشمعنى 368 قرش .. ما تخليها الف جنيه .. وقالت العروسة .. المبلغ ده دفعناه عشان نوثق شهادة ألسفارة بتاعتنا إنها موافقة على الزواج .. ولولا هذه الشهادة ما كان الزواج يتم .. وشربنا العصير .. واستمرت الموثقة تعاكس العروسة .. وسألتها جابلك ايه شبكه .. ؟؟ قالت الدبلة الدهب دى .. وشخصه .. وكفايه كده ..

وتم الزفاف فى المساء .. ومن الفرحة نسيت آخذها ونشترى الشبكه .. ومرت الايام .. والسنون .. وبعد تسعة سنوات أخذنا الاولاد ونزلنا زيارة .. وقلت لأمى .. انا عاوز إشترى شبكه من هنا من مصر .. عشان الذكرى ياحاجه .. فبماذا تشيرى على .. قالت روح للسرجانى وانا حاكلمه فى التلفون وحيجهز لك حاجه حلوة .. وهذا السرجانى غير السرجانى الحالى وكان محله صغير من ثلاثة ادوار .. أول محل على الشمال لما الواحد يدخل الصاغة من شارع الموسكى .. كان راجل طيب جدا .. لدرجه أنه أصر على إهداء المدام حلق جميل ..

كان الجرام ايامها بثلاثه جنيهات .. وكانت مفاجأة للمدام وانا اقول لها .. هذه العلبة كان المفروض أن اقدمها لك من زمان .. وزمان قوى ..

وغير هذا مفيش وحياتك ولا حتى فسان .. !! الا أن اختى أصرت أن تأخذ العروسةالى الترزى بتاعها واهدتها ثلاثة تيرات عموله ..

تم تعديل 18 سبتمبر 2006 بواسطة achnaton

[se_ Elsyed]

والله يا عم عادل الشباب المقبل على الزواج دلوقت بيشم جبس أو حسب أخر المصطلحات المصرية " بيكحتوا في الأسفلت " فبقى الغالب الأعم دلوقت إن أهل العروسة بقوا يتساهلوا في موضوع الشبكة عشان يزحلقوا البنت وما تجرشش جنبهم ..

وبالتالي كنا زمان لا يُمكن نسمع عن حاجة إسمها دبلة ومحبس وكلام من ده للشبكة ..

لكن دلوقت لو الشاب معاه يجيب الدبلة بيبقى بطل بعد ما جرام الذهب عيار 21 وصل إلى أكثر من 100 جنيه ...

ولكن هذا لا يمنع إن الشباب المقتدر بيشتري شبكة مُحترمة ... والغالب الغالب من الشعب المصري بيتعامل في الذهب والقلة القليلة هي من تعرف الألماظ أو البلاتين

أنا عن نفسي كنت خاطب أو بمعنى أصح مرتبط بإنسانة ، ولإن الذهب في الخليج يجنن وياخد العقل من حيث جودته وتنوع موديلاته التي تحتار في شياكتها فلقد أشتريت الشبكة من هنا وهي عبارة عن طقم كامل ( كولية وخاتم وإسورة وحلق ودبله فضة بتلاتة تعريفة لي طبعاً ) وقلت نشتري الدبل من مصر .. نزلت أجازة و قعدت إسبوعين روحنا ضاربين بعض وسيبتها من غير ما تلبس الشبكة ... بنفس الشبكة دي ومن غير أي تغيير روحت مرسي العطا على زوجتي الحالية اللي بكرم أخلاقها وبطيبة عائلتها لم يُعلقوا على إن الشبكة كانت جايه على اسم واحده تاني أو إزاي بنتنا تلبس حاجة كانت جاية لوحده تانية وكلام من ده .. ولكن لإن شراء الشبكة له فرحه في مصر .. فلقد إصطحبتها إلى الصايغ وأشترينا ما تيسر من الدهب إضافة إلى الموجود ( تصدق بالله إن الموضوع ده حصل سنة 99 وساعتها ولسه بافكر تمام إن الجرام كان بـ 34 ج شاملاً المصنوعية وضريبة المبيعات ؟ ) ...

الغريب بقى إن حماتي ست طيبة جداً وبمثابة أم لي .. قبل الفرح لقيتها بتقولي : بص يا سين سين يا بني ( ساعتها ما كانش إسمي سين سين عشان ما كانوش إخترعوا النت mfb: ) شوف خطيبتك معاها دهب قد إيه باباها وإخواتها كانوا جايبينه لها .. فأنا هاروح عند الصايغ ألمعه وأظبطه ونقوم دافسينه في علبة المجوهرات اللي إنت جايبها من غير ماحد يحس .. عشان وإنت بتلبس خطيتك الدهب في الكوشه الناس تقول : الله شوفي ياختي الجدع جايب لها دهب شيء وشويات .. ما هو راجع من السعودية وبقى له كذا سنة شغال في ليبيا بعد ما رجع من العراق "

فأعتذرت لها بكل لطف وقلت لها .. أسف يا نينه مش هايحصل .. والموضوع مش موضوع منظره والجوده في الموجود ...

[بنت الشاطئ1]

فعلا موضوع لطيف

اما بالنسبة لشبكتى فكانت بصراحة غالية جدا كانت منذ حمس سنوات بستة الاف جنيه

وعندما قدرت قيمتها الان بعد الزيادة المهولة لجرام الذهب وجدتها تساوى الضعف تقريبا

المهم الشئ الذى يضحك اننى عندما وجدت ايامها ان هذا هو سعر الشبكة التى اخترتها انا بنفسى مع وجود حماتى وامى

شعرت انها غالية جدا وقلت لخطيبى -زوجى حاليا- لابد ان ترجع نصفها للصائغ فهذا كثير عليك

قال لى لا لا لن نرجع شئ وانا الان نادمة اننى لم اشترى ضعفها فقد عرفت الان قيمة الذهب فهو ينفع فى هذه الايام

[زعلان]

عموما الف مبروك مقدما للأولاد

وربنا يوفقكم في شبكة بنت حلال

الحمد لله في عليتنا الشبكة على أهل العروسة مش على العريس

[صبح]

سيدي الفاضل استاذ عادل

شكرا فعلا لفتح هذا الموضوع المهم

والله يا سيدي معلوماتي أن شبكة العروس تقريبا بتبقى من 100 جرام دهب الى 200 جرام أو ما يساويهم حسب مقدرة كل أسرة (أو هكذا جرى العرف في المحيطين بي)

ولقد رزقني الله مثل سي السيد بنعم الزوجة والتي لو كنت جبت خاتم صفيح لقبلته بمنتهى الرضا (وحماتي والله مثلها وأكثر) ولكن كانت المشكلة في الأعمام والذين أصروا أن تكون الشبكة محترمة

لقد كنت خطوبتي في 1998 وكن جرام الذهب الأيطالي ب 33 أو 34 جنيه بمصنعيته

وقدمت لخطيبتي شبكة (طقم ذهب +خاتم ألماظ)

وكان أن أثر هذا على ميزانيتي بشكل رهيب (كنت لسة متخرج وأعمل Part time) وداخل الجيش بعد شهر

يعني حالتي لا تسر عدو ولا حبيب

وهنا كما ذكر س س تأتي أهمية حسن اختيار الزوجة بتوفيق من الله سبحانه وتعالى

لقد كانت دفعتي وبدأت العمل بالطبع قبلي

ودفعت كل ما كانت تأخذه من عملها (ومازالت الى الآن) وبدون علم أهلها في كل شيء من الجهاز الى حتى السيارة التي اشتريناها بعد الزواج

فرأيي هنا أنه فعلا كما قال رسول الله خير متاع الدنيا المرأة الصالحة

171974 - ما استفاد المؤمن من شيء بعد تقوى الله خيرا له من زوجة صالحة : إن أمرها أطاعته , و إن نظر إليها سرته , و إن أقسم عليها أبرته , و إن غاب عنها نصحته في نفسها وماله

الراوي: أبو أمامة الباهلي - خلاصة الدرجة: إسناده ضعيف لكن له شواهد - المحدث: العجلوني - المصدر: كشف الخفاء - الصفحة أو الرقم: 2/236

62451 - قلب شاكر و لسان ذاكر و زوجة صالحة تعينك على أمر دنياك و دينك خير ما أكتنز الناس

الراوي: أبو أمامة و ثوبان و علي بن أبي طالب - خلاصة الدرجة: صحيح - المحدث: الألباني - المصدر: صحيح الجامع - الصفحة أو الرقم: 4409

22553 - إنما الدنيا متاع وليس من متاع الدنيا شيء أفضل من المرأة الصالحة

الراوي: عبدالله بن عمرو بن العاص - خلاصة الدرجة: صحيح - المحدث: الألباني - المصدر: صحيح ابن ماجه - الصفحة أو الرقم: 1516

[the sad man]

الشبكة هى هدية من العريس لعروسه

الاصح فى رأيى الا يكون لها معيار معين سوى قدرة العريس المادية

فهى تبدأ من الدبلتين الى مالا نهاية كلا على قدر استطاعته

و لكن ما يحزنى اننى ارى بعض الشباب يقترض لشراء شبكة من الالماظ رغم انه من مستوى متوسط

يعنى الذهب يعتبر كنز لهم ومع ذلك يصرون على الالماظ

المهم الرضا و حسن الاختيار و السعادة التى اتمناها من الله للجميع

وبالتوفيق

[Folana]

السلام عليكم ورحمة الله .....

ياه ه ه يا أستاذ عادل.....قلبت علينا المواجع..لأ..قصدى رجعت لنا أيام الماضى الجميل ..(سؤال خبيث:هل الماضى لازمن ولابد يكون جميل ).... :D

طبعا موضوع جميل فعلا...وممكن فى النهاية نصل لحلول جذرية لمشكلة الشبكة والمهر اللى بتؤرق الشباب من الجنسين...

أنا عن نفسى شبكتى كانت حاجة قيمة جدا واللى بنقول عليها تتوارثها الاجيال...ومش عايزة أفسر بقى ياحضرة البكباشى (وش أطاطا).....لكن زوجى العزيز هو اللى جابها لوحده بدون اى ضغوط والله ...اى نعم الست والدته كانت عايزة تولع فى جَنابى بس وانا مالى بقى...

نرجع للموضوع....انا افتكرت برضه اغنية لعبد المطلب كان بيقول

"...قلت لابوها عليها وقالى ..خَلى المهر علينا وخلى ..........( رٌحت مِخَلَى... :D )..."

يعنى كان بيوضح قد ايه ناس زمان كانوا بيمتازوا بالشهامة والرجولة ..وكانوا بيشتروا رجل....اما جملة رحت مخلى دى فانا باحب اغنى الاغنية بعد هذه الاضافة واللى انا شايفة انها بتناسب الجيل الحالى ....

دلوقت بقى الشبكة طبعا بتتحدد حسب مستوى العروسة ثم العريس ...وبرضهة الناس الشيك ..واقصد بكلمة شيك هنا شياكة الاسلوب والمعاملة ...بيجيبوا هدية للعروسة فى قراءة الفاتحة وربط الكلام...وبتكون دهب برضه بس حاجة بسيطة يعنى انسيال ...خاتم ...حاجة كده ...وبتقوم ام العريس تلبسها لها على مضض ولسان حالها بيقول بالسم الهارى ....

وبيتفقوا على ثمن الشبكة فى حدود كذا ..والمهر فى حدود مذا...او حندفع شبكة ومهر باكدج على بعض ...وده حسب سعر السوق والمستوى الاجتماعى ودرجة التفاهم والتقارب بين العروسين...

أقل شبكة دلوقت واللى ممكن نقول ثلاث غوايش ودبلة وخاتم مش حتكون اقل من اربع او خمس الاف جنيه...وانت طالع بقى الى ماشاء الله....ومعروف جرام الدهب اللى ممكن يتلبس بيوصل فوق 100 جنيه بالمصنعية والدمغة والضريبة ....

طبعا حاجات مغالى فيها جدا وشكليات مالهاش لزمة ولكن لاغنى عنها ...وحيث انى ام لبنات ..حقيقى عن نفسى مش عارفة ممكن الواحد يطلب ايه...يعنى انا بأكلهم بكام وبأصرف على تعليمهم كام ؟؟...لكن فى النهاية هى مش بيعة ...ده انا حأديله بنتى اللى هى بالنسبة لى جوهرة ...والله موضوع محير فعلا...

لكن فى النهاية يفضل ان العريس والعروسة ينزلوا ينقوا الشبكة لوحدهم على اساس انها هديته لها ...

تصوروا الكلام كله هرب منى لما بدأت افكر فى بناتى :blink:......كملوا حضراتكم بقى علشان استفاد اكتر .....

صباحكم جميل............. :blink:

[son of jacob]

و الله ده موضوع جميل و بما غني لسه متجوز من 6 7 أشهر كده فأكيد فاكر كويس موضوع الشبكه ده,بس حليني أؤلوكوا على الموضوع و الحاصل ي مصر دلوقتي:

الشباب في مصر مقسوم لعدة أصناف منها و مش كلها:

1-صنف مش لاقي يجيب حتى دبلتين مش شبكة, و ده نتقسم إلي أصناف

و منهم صنف ياأما بيختار بنت حلال كده و يتفقوا انهم يحوشوا و يجيبوا دنلتين و فكك من الشكة دلوقتي و بعد كده ربنا يسهلها. أو يأجل جوازه لحد لما يحوش عشان الشبكة ده طبعا بعد لما يكون طله عينه و عين الجابوه عشان يلم فلوسها ده غير طبعا تكاليف الزواج الاخري اللمش هنكلم عنها. أو صنف يستلف من طوب الأرض عشان يلم تمن نص دبلة

2-صنف معاه مبلغ يدوبك على الأد يجيب بيه أي حاجة و السلام ده لو كانت عروسته ربنا هاديها هى و أهلها و متفقين إن لما ربنا يكرمها نبقى نجيب بعدين.

3- و صنف في من الشباب الذين هم من أسر ميسورة و بوظائف جيدة و لكن بالطبع لن يقدروا على أن يدفعوا ثمن الشبكة بأنفسهم لأنهم ارتبطوا ببنت من أسرة ميسورة أيضا و من نفس المستوى و بالطبع يجب أن تكون الشبكة قد المقام ( مقام الجانبين أكيد) بالتالي و الده يتكفل بكل شيء من شبكة و تجهيز و بصراحة أنا واحد منهم,مش عشان قلت ما هو أبويا يقى ربنا يطولنا في عمره موجود يعملي كل حاجه لأ و لأ بس عشان أنا فعلا كنت لسة متخرج و مهما كنت في وظيفة محترمة مرتب جيد أكيد مش هعرف أوفر ولا أقل من ربع ثمن الشبكه المختارة من الجانبين.مع إن اللي كنت أسمعه إن الشبكه دي هدية من العريس يعني محدش يدخل فيها ]عني أجيب شبكة ب ألف أتنين عسرين خمسن ستين مية ألف أنا حر.بس طلع كله كلام فشينك. و هتجيب يعني هتجيب.مش أنتوا من أسرة كبيرة أخترت بنت من أسرة كبيرة برضوا يعني لا مفر :blink:

طبعا ده كله من أسباب الحالة الإقتصادية المنعشة فلتة زمنها اللي خلت الواحد يا إما يطفح الكوتة أو يشطب على أبوه عشان يجوز و بعد كده يسيب بلده و يسافر(صحيح يل بشر إنتوا بتعملوا إيه في أم الحر ده , أنا الحمد لله كولول تمام و مبسوط و العشة كويسة بس الحر ده مش ممكن كولو تكيف تكيف مفيش حته بحري في البلد ده, ده حتى الميه نزله سخنة من الحنفيه) عشان ياخد مكانه في الساقية عشان لما الزمن يجي يتشطب برضه عشان يجوز ولاده و يجيب شبكه

أه ه ه يا زمن...غين أيام سيدنا عمر,و عمرو و الصحابه لما كان المنادي بينده و يقول: الا يوجد محتاج,الا يوجد فقير ألا يوجد من يريد أن يتزوج فنزوجه ألا ألا ألا فلا يرد عليه أحد لشيوع الخير و البركه و فائض ببيت مال المسلمين .. و يارب يخليك ياباااااااا

[عادل أبوزيد]

عموما الف مبروك مقدما للأولاد

وربنا يوفقكم في شبكة بنت حلال

الحمد لله في عليتنا الشبكة على أهل العروسة مش على العريس

لم أفهم هل تقصد فعلا أن بعض التقاليد السائدة أن أهل العروس هم الذين يشترون الشبكة ؟ و هل حضرتك مصرى و تتكلم عن مصر ؟

سؤالى هذا يرجع لأنى تعلمت هنا فى محاورات المصريين أن هناك تقاليد للزواج تختلف من جزء إلى آخر فى مصر و منها مثلا طريقة كتابة القائمة (قائمة جهاز العروس) و كان ذلك فى أحد الموضوعات بحثت عنه و لم أجده.

و قد وضعت مداخلتى هذه لأنى تذكرت موضوع شبكة العروس بمناسبة سؤال الفاضلة "بنت الشاطيئ" عن سعر جرام الذهب فى الخليج.

[mesryforever]

يعني الشبكة في الوقت الحاضر ممكن تكون في حدود كام

وياريت لو حد عنده خبره في تفاصيل الحاجات إلى على العريس وإيه اللي هتجيبه العروسة

وده يفرق لو واحد نازل من الخليج وطبعاً يعني نازل بقريشين يعمل بيهم مشروع العمر

وشكراً مقدماً لمن سوف يشارك في الموضوع

[عادل أبوزيد]

يعني الشبكة في الوقت الحاضر ممكن تكون في حدود كام

وياريت لو حد عنده خبره في تفاصيل الحاجات إلى على العريس وإيه اللي هتجيبه العروسة

وده يفرق لو واحد نازل من الخليج وطبعاً يعني نازل بقريشين يعمل بيهم مشروع العمر

وشكراً مقدماً لمن سوف يشارك في الموضوع

هناك موضوع هنا فى باب الأسرة عن جهاز العروسة المصرية و يحوى معلومات مهمة عن أعباء الزواج و ماذا على العريس و ماذا على العروس.

و الموضوع يمكن إثراءه بمعلومات حديثة.

طبعا لا تتوقع وجود تسعيرة محددة و مواصفات محددة كما لو كنت ستشترى سيارة مثلا.

رابط الموضوع هو

http://www.egyptiantalks.org/invb/index.php?showtopic=22651

و هذا هو الموضوع "حتى لاتتحجج بنقص المعلومات و تؤجل الجواز و تقول محاورات المصريين السبب"

[mesryforever]

أنا شاكر لك يا أخ " عادل " الموضوع أكثر من رائع

ومرة أخرى أشكرك على إستجابتك السريعة

[عادل أبوزيد]

في الشهور الأخيرة  سمعنا أخبارا سعيدة  من خطبة و زواج  في محيط الأقارب و المعارف ، بالتالي تساؤلات بعضها جاد و بعضها من باب العلم بالشيئ ... و كان أن عدت لهذا الموضوع أكيد هناك شباب كثيرين يحلمون ببناء البيت السعيد.

[tarek hassan]

كان زمان أٌقل شبكة للعروسة من عريس شبه معدم هي دبلة ومحبس ... 

ترى ما ثمن الدبلة فقط الآن ؟ 

أكيد من أقل من خمسة آلاف جنيه 

كان الله في عون المقدمين على الزواج 

[Scorpion]

بنك الأفكار .. للعرسان الشطار