امرأة ترد على بابا الكاثوليك ... يستاهل !

[mohameddessouki]

هذه رسالة وصلتنى من زميلة صحفية بها كلام كثير منطقى هيا نقراء

إيه بقى اللي مخليني مصرة الرسالة دي أكتبها بالعامية، بصراحة لأني ح أطق وماعنديش بال أفكر وأنمق الكلام فمعلش أعذروني وإن شاء الله بعد كدا ابقى اكتب باللغة العربية الفصحىىىىىىىىىى

ح أطق من إيه: بابا الفاتيكان قال بقين في الإسلام والرسول مش ولابد، باختصار سب الدين لمليار ونص بني آدم. خلص الخبر؟

لا إزاي، الناس هاجت وماجت وأتجننت، وسحب سفراء، ومظاهرات وووو، يا سلام حاجة آخر بر وتقوى، خصوصا من حكام العرب اللي منهم استدعى السفير ومنهم اللي سحب السفير! سفير مين؟ الفاتيكان؟ أي والله الفاتيكان اللي قد عقلة الصباع، وماعندهاش جيش والسبب هو إن راجل عجوز بعمر التاريخ، مش قرب يموت، هو مات خلاص وبيلعب في الوقت الضايع، وكنيسته معتمدة اعتماد كامل على الولايات المتحدة الأمريكية اللي لو سحبت تبرعاتها سوف تتحول الفاتيكان إلى وزارة الشئون الاجتماعية المصرية سابقا اللي اتغير اسمها لحاجة تانية مش فاكرة ايه، واللي مش عارف ايه هي وزارة الشئون الاجتماعية المصرية من الاخوة العرب يسأل واحد مصري صاحبه. والفاتيكان لا تمتلك أي جيش، ولا لها أي سلطة سياسية أو عسكرية أو حتى اقتصادية، آخرها الراجل العجوز دا يقف يصلي والناس تصلي وراه أو تتفرج عليه في التلفزيون وتنزل لها دمعتين وكل واحد يشوف حياته بعد كدا.

إيه اللي حصل؟ الست أمريكا عملت المستحيل مع الكنيسة المصرية، مرة بالتدخل لإحداث فتن، مرة بالضغط بأقباط المهجر، مرة بالإغراء المادي، كل دا عشان يحصل فتنة بين المسلمين والمسيحيين، وتتحول لحرب أهلية، والكنيسة المصرية مدية أمريكا الطرشة وأبدا لم بتحن ولا بتتعاون مع المخطط الأمريكي.

طب نعمل إيه؟ دلوقت عايزين ننزع سلاح حزب الله اللي منه لله انتصر وأحرجنا، وعايزين نعمل حكومة ائتلافية نتمكن فيها من السيطرة على حماس وإسقاطها، واحتلال السودان، والمسيحين العرب ولاد الـ.... الرهان عليهم خسران، وحكاية سنة وشيعة دي طلعت فشنك، مع إنهم صرفوا دم قلبهم على الموضوع دا، تتصرف كيف يا عبد الرحيم؟ تتصرف كيف يا عبد الرحيم؟

اعطوا للراجل العجوز اللي في الفاتيكان ورقة يقراها. الراجل يا قلب امه، حط النضارة القدييييييييييمة وقعد يقرا، قوم المسلمين، اللي عودوا العالم على إنهم مايجوش غير على الهايفة ويتصدروا، زي الرسومات المسيئة للرسول كدا، اتجننوا، والراجل يعتذر، يقولوا له: لا مش كفاية!

مش كفاية ازاي يعني؟ هل ح نطالب بأن يقوم بابا الفاتيكان بإشهار إسلامه؟

يعني غزة بتسحق على مدى أكثر من شهرين، وبتجوع منذ أن مارس الفلسطينيون حقهم في الانتخاب الحر، والمسلمين اسم الله عليهم، قاعدين يلعبوا في صوابع رجليهم ويصفروا أغنية إنت عمري، ولبنان على مدى شهر فضلت تترقع وتتهبد والمسلمين ياختي عليهم قعدوا يسلكوا ودنهم ويتناقشوا في السنة والشيعة، وإيران بتفرض عليها عقوبات عشان عايزة تعمل توازن في المنطقة، والحكومات العربية تتواطئ عليها عيني عينك وتقول بكل بجاحة: خطر إسرائيل أقل من خطر إيران، والمسلمين يا بطة قاعدين يطرقعوا رقبتهم ويقولوا: ماهم شيعة، والسودان ح تحتل عيني عينك، قدام كل الناس، والصومال اتفحتت حرب أهلية وتدخل أمريكي، حد سأل في الصومال من ساعة ما ابتدت الحرب لحد دلوقت؟ حد يعرف حتى الصومال مالها؟ ايه مشكلتها بالظبط؟ طب ايه مشكلة دارفور بالظبط؟ ليه العالم بيتآمر على السودان دلوقت؟

والحكومات العربية اللي اتشمللت وسحبت السفير، وجابت سفير الفاتيكان وشدت له ودانه، ماشفنهاش يعني قالت لإسرائيل: كخ كدا، بلاش، دول ماكانش مطلوب منهم غير يخرسوا ويرحمونا من تصريحاتهم اللي اعطت غطاء "تاريخي" كما صرح أولمرت، للعدوان الإسرائيلي على لبنان، كما أن أولمرت، اللي عامل زي الرقاصة الفضحية، صرح بأنه أثناء سحق غزة، محمود عباس كلمه وقال له: احنا متفهمين الموقف الإسرائيلي!

يا شللي يانا.

طيب الحكومات العربية عميلة، خلصنا، مالهم بقى ومال الفاتيكان، يعني هم مسلمين يعني؟ يعني عايزين يفهمومنا إنهم مسلمين؟ بذمة النبي مسلمين؟ والله العظيم، مسلمين؟

الكلام دا مالوش غير تعليق واحد لا يليق بفتاة مهذبة زيي إنها تقوله!

دلوقت مافيش حاجة مهمة، المهم إن الراجل العجوز - اللي أكيد عنده زهايمر وتصلب في الشرايين، وبيلخبط في أسماء أخواته - يعتذر عن بقين اتحطوا قدامه على الترابيزة وقالوا له الورقة دي من أمريكا: خالتي بتسلم عليك!

طب أهه اعتذر، لا مش كفاية! طبعا مش كفاية، واحد قال بقين تافهين هو نفسه ما يعرفش معناهم، المفروض يقلع الطقية ويلف حوالين العالم الإسلامي وهو بيقول نحن غرابة عبس، عشان احنا ناس الحقيقة فاضية وماعندناش أي مشاكل غير بابا الفاتيكان اللي هو أصلا مش مسلم ومالوش أي أهمية فعلية.

المشكلة مش في الفاتيكان ولا في الدنمارك، ولا في السويد ولا في جرين لاند، المشكلة في المسلمين اللي سهل جدا أي حد يجي يقول لهم: بصوا العصفورة، يقوموا يبصوا على طول.

يا شباب، في الوقت اللي احنا قاعدين فاحتين نفسنا نفرم في بابا الفاتيكان ونقول له: أريد كليب حيا، الباشمهندس محمود عباس قال بصراحة: مش ح نشكل الحكومة الائتلافية الفلسطينية إلا لما اجتمع ببوش!

والباشمهندس السنيورة الأمورة تعهد بصراحة بأنه ح ينزع سلاح حزب الله، ويمكن ملابسه كمان.

والباشمهندس مجلس الأمن، بينفذ قراره باحتلال السودان والتدخل في دارفور اللي أصلا الولايات المتحدة هي اللي خلقت المشكلة في داخلها. مستغلة طبعا الفقر والقهر والظلم اللي بيعاني منه المواطن السوداني، ولكن يعني مش بس السودانيين اللي بيعانوا من المشاكل المذكورة آنفا. لكن لسة أمريكا ما قررتش انها تستغل المشاكل دي في مكان تاني مؤقتا، يعني بتاكل قطمة قطمة، أفغانستان، العراق، الخليج، لبنان (دا بعدهم فيها أبضايات)، السودان، ومصر لسة في الفرن.

يعني إنتوا ليه مش مصدقين ان الدور على مصر؟ تعمل إيه أمريكا أكتر من أنها بتضيق الخناق علينا لحد ما وصلت للسودان؟ تحلف لنا على المصحف عشان نصدق؟

ولما لاقدر الله يحصل لنا اللي حصل لغيرنا، أحلق شعري لو حد من العرب – إللى عملنا معاهم شغل منايفة صح – سأل فينا.

أنا مش ح اوقع على عريضة ضد الفاتيكان، ولا ح أراسل الفاتيكان، ولا ح اسأل في الفاتيكان لأن ما عنديش وقت أضيعه مع مؤسسة مالهاش أي تأثير فعلي على كاثوليك العالم نفسهم.

أما بخصوص الكنيسة اللي اتحرقت في فلسطين، فيعني مش عايزة نباهة إن إسرائيل هي اللي عاملاها. عشان تشعل فتيل الفتنة مابين المسلمين وكاثوليك العالم الإسلامي، ومدام الأرثودوكس قالوا لأمريكا إمشي العبي بعيد، يبقى يراهنوا على الكاثوليك العرب، وللا حتى على تفاهة بعض المسلمين اللي عايزين يفشوا غلهم في مسيحين العالم العربي.

الفتنة نائمة لعن الله من أيقظها، بس الفتنة دلوقت استيقظت وصهللت وشربت لها ماجين قهوة وقاعدة لنا،

ح نعرف نقول لها ننة هوووو وللا ح نقضي السهرة معاها؟

تم تعديل 19 سبتمبر 2006 بواسطة mohameddessouki

[محمد عبدالعزيز]

بصراحة هو ده الكلام السليم, دماء المسلمين تراق فى جميع أنحاء العالم كل يوم, ولدينا حديث شريف يقول (لهدم الكعبة حجراً حجراً أهون عند الله من إهراق دم مسلم بغير حق), فماذا فعلنا لهؤلاء المسلمين, ولا هو الاستسهال وخلاص.

وبعدين فى حاجة برضه مش فاهمها ياريت حد يجاوبنى عليها, لو البابا ده ماعتذرش, ياترى إيه اللى ممكن نعمله معاه ساعتها عشان مايبقاش شكلنا أوحش من دلوقتى كمان؟

[أبو زياد]

مين يا عم الصحفية دى ؟ مين

مين يا عم الصحفية دى ؟ مين هى؟

لأماتقولش

بس وصلها ردى إنتى عسل

لأنها عبرت عما يدور بخاطرى بلهجة جميلة جدا

المهم مش موضوع مصر مستهدفة والا لأ

المهم إننا فى عالم لا يعترف إلا بالأقوياء

المهم نصحى بقة لنفسنا و نشتغل و نشوف ضميرنا

قبل ما ييجى اللى يصحينا بجردل مية و ساعتها نقول ياريت اللى جرى ما كان

لأ انا عايز البابا يقولنا أسف واحد واحد و يعتذر بالعربى مش بالإنجليزى!!

كله كلام وما فائدة الكلام ؟؟؟؟

[Eldisel]

كلام موزون ويدخل العقل .. ويبين مدا تفاهتنا وجرينا وراء صغائر الامور .. ومدا علمهم بينا وبشخصيتنا ( الناس دي مبتلعبش )

الدنيا بتطربق من حولينا واحنا ولا احنا هنا .. ولما تيجي الهيفة نصدرلها اوي

احنا فعلن بنستسهل

وبجد صحفية بميت راجل وياريت في منها كتير بالوعي والحكمة دي

[صبح]

أحسنت وأخطأت

فعلا المسلمون بيبصوا على العصفورة ...أي عصفورة

ونسيوا المسلمين في فلسطين والسودان والصومال ووووو

بس اللي نسي دول

أنا متأكد أن ليس بين الأخرين (اللي هاجوا لما قاله البابا)

يعني التوازن مطلوب

ما ننساش أخواننا في كل مكان

وما نسكتش على الأهانة أيا كانت

[نانو]

يا جماعه الكلام جميل جدا و منطقي و ضبوط

و يمكن كلنا تقريبا عارفينه و حاسينه

بس طبعا الصحفيه كانت ماهره في تلخيصه

لكن المشكله ان احنا لسه في نفس الدايره المغلقه

البيضه الاول و لا الفرخه

الحكومه ولا الشعب ...مين في ايده الحل

الشعب مقهور في كل البلاد العربيه...و الحكومات كلها عارفه الحقايق اللي الصحفيه بتتكلم عنها

لكن كل حاكم عربي مضبط نفسه ووضعه مع امريكا و ساعه ما يجي الوقت المناسب هتحميه و توفره العيشه الكريمه ليه ولاعائلته

كنوع من انواع رد الجميل...لتواطئوه معاها.....و لو ان ده مش دايما بيحصل..!! و ممكن تقلب عليه و تديله علي دماغه زي ما حصل مع صدام

طيب وبعدين.... ايه الحل؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[mohameddessouki]

بصراحة هو ده الكلام السليم, دماء المسلمين تراق فى جميع أنحاء العالم كل يوم, ولدينا حديث شريف يقول (لهدم الكعبة حجراً حجراً أهون عند الله من إهراق دم مسلم بغير حق), فماذا فعلنا لهؤلاء المسلمين, ولا هو الاستسهال وخلاص.

وبعدين فى حاجة برضه مش فاهمها ياريت حد يجاوبنى عليها, لو البابا ده ماعتذرش, ياترى إيه اللى ممكن نعمله معاه ساعتها عشان مايبقاش شكلنا أوحش من دلوقتى كمان؟

اخى الفاضل

حاول ان تطلع على موضوع لاتلومونى ولوموا انفسكم تحت نفس الباب لترى كيف اراق العرب الاسلام امام الغرب وفى النهاية نندهش اذا ما هاجمنا الغرب ولا نلوم انفسنا اولا

يا جماعه الكلام جميل جدا و منطقي و ضبوط

و يمكن كلنا تقريبا عارفينه و حاسينه

بس طبعا الصحفيه كانت ماهره في تلخيصه

لكن المشكله ان احنا لسه في نفس الدايره المغلقه

البيضه الاول و لا الفرخه

الحكومه ولا الشعب ...مين في ايده الحل

الشعب مقهور في كل البلاد العربيه...و الحكومات كلها عارفه الحقايق اللي الصحفيه بتتكلم عنها

لكن كل حاكم عربي مضبط نفسه ووضعه مع امريكا و ساعه ما يجي الوقت المناسب هتحميه و توفره العيشه الكريمه ليه ولاعائلته

كنوع من انواع رد الجميل...لتواطئوه معاها.....و لو ان ده مش دايما بيحصل..!! و ممكن تقلب عليه و تديله علي دماغه زي ما حصل مع صدام

طيب وبعدين.... ايه الحل؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

يا اخى الفاضل

لو الحكام دول منتبهين مكنوش يعتمدوا على امريكا لان المتغطى بامريكا عريان وياليتهم يتذكروا ما حدث لعميلهم شاة ايران اللى انتهى به الامر ان اصبح كالجربان محدش راضى يستقبلة الا جربان زيه هو الوحيد اللى استقبلة مقابل كام سجادة عجمى وشويه هدايا ودفنه فى ارض مصر فى مسجد الرفاعى على ارض مصر التى ظل يحاربها فى عهد الملك فاروق وعهد عبد الناصر حتى ازاحة الله من عرش الطاووس بفضل الثورة الاسلامية بقيادة ابة الله الخومينى

[El-Masri]

ليس المطلوب أسفا ، ولااعتذارا ولا تراجعا ولا التقاء صور ، ولا حوار احتفالات ولا سحب الأقوال الشائنة ، ولا تسجيل نقاط في مباراة ... فالإناء نضح بما فيه ، ولسوف ينضح ،بما فيه ولسوف يستمر ينضح بأسوأ ما فيه ، ومن الخير أن يستمر ينضح بما فيه بغير تستر أو غطاء.

[mohameddessouki]

ليس المطلوب أسفا ، ولااعتذارا ولا تراجعا ولا التقاء صور ، ولا حوار احتفالات ولا سحب الأقوال الشائنة ، ولا تسجيل نقاط في مباراة ... فالإناء نضح بما فيه ، ولسوف ينضح ،بما فيه ولسوف يستمر ينضح بأسوأ ما فيه ، ومن الخير أن يستمر ينضح بما فيه بغير تستر أو غطاء.

ايها الاخوة الافاضل

ادعوكم لقراة موضوع "لادخان بدون نار" فى باب القضية العربية لتلاحظوا ما قال عنه الاخ الفاضل "المصرى" من نضح الاناء باقذر ما كنا نتخيل

وانا اختلف مع اخى المصرى فى ترك الاناء ينضح اكثر مما نضح بل ادعو الى الاستعانة بمرفق المجارى والصرف الصحى لنزح المجرور العربى والاسلامى فكفانا روائح وتلوث . نريد حياة صحية ، حرية ، مشاركة شعبية فعلية فالاسلام لايعيش فى الظلام حيث تعبث ايدى الخونة والمنحرفين ولكن يزدهر فى النور