هو حرام الرد على الستات (فى محاورات المصريين) ؟

[Folana]

السلام عليكم ورحمة الله.....

نانو...حالا حاروح ارد ...اوعى تزعلى ياجميلة.........

[أبو زياد]

الأخت العزيزة فلانة

أولا جزاكى الله خيرا على المجاملة و هى تدل على ذوقك و كرم أخلاقك

ثانيا أنا دلوقت بقه عايز اعمل اقتباس - ما فهمتش حكاية العقل الباطن دى -

العجلة بتاعتى باينها حتمشى و تسيبنى

المهم انا قلت حاجة على المشرفين ؟

دول ولاد حلال و الله :blink:

تعرفى أنا اول مشاركة لى فى المنتدى اتشتمت وواحد حذف شتيمتى و ردى :)

و أنا شكرته و لا زلت أشكرهم على مجهودهم لكن ملاحظتى كانت مش بس على المشرفين كمان العضاء كتير تيجى تردى على موضوع تلاقى واحد بيقولك الموضوع اثير من قبل - قديم وحاطط لك رابط روح لفلان

أنا رأيى بقة ان مفيش حد صاحب موضوع يعنى انا حطيت موضوع و الباقى شاركوا أو حتى حولو مسار الموضوع

لا مانع و لا يوجد حد صاحب موضوع

واشايف اكتر شيء يميزنا هو الحرية و لأ الردود مش دايما للإختلاف بل معظمها للتأييد او التأكيد على نقاط معينة

والهدف النهائى هو الفايدة للجميع من يقرأ و من يشارك بأى طريقة حتى لو كانت كلمة

طيب انا كدة حاروح جرى لأن العجلة سابتنى و جريت

صوم مقبول لجميع غخوتى و إلى اللقاء

[khedr]

هو من ميزه الموضوع الجميل ده

ان عدد الردووود فيه بتزيد يوم عن يوم

وادينا بنحاول نوصل لحل علي قله الردووود

انا برضه متهيأ لي لما يكون الموضوعات كتيره بتكون نسبه الردووووود فيها اقل

وايضا المشاركات الطويله بتكون محتاجه تركيز وتمعن بصوره كبيره

عموما اهم شئ نحوش رقم الصفر ده من قاموسنا سواء في المنتدي او خارجه

عموما هذا المنتدي يزخر بمجموعه من الناس

اللهم بارك فيهم جميعا

من النادر ان تلقاهم في مكان كهذا

ويبعد عنهم سوء الجوار..... وسوء الحوار

ملحوظه

المعاهده الغير مكتوبه بيننا ياسيداتي.....

متهيأ لي لم احضرها

لكن موافق عليها طبعا ...وانا اقدر

[نانو]

النوع ده من المعاهادات مش محتاجه مواثيق يا خضر :closedeyes:

شد حيلك معانا بس و زود عدد الاعضاء

و اديني اهو هاشد ام البنات و ابو زياد بس يارب يسمعونا

[أبو زياد]

السلام عليكم و رحمة الله

أخى خضر

اخواتى نانو - صفاء - فلانة

تحية طيبة لكم جميعا و صوم مقبول للجميع

فإنه يسعدنى الإنضمام لمعاهدتكم الجميلة منذ الآن - ولو إنى مش عارف إيه المعاهدة - بس لو على إننا نرد على بعض أنا مستعد للرد على جميع من بالمنتدى

بس بقى لو حنكون حزب خاص يبقى فيه كلام تانى و محاكمات و تلفيق قضايا و أنا عندى عيال

لكن أنا حاقول لكم أحسن فكرة إننا نخلى باب ثابت لنا هنا مثلا و نسميه باب أم تويتى عشان د صفاء ما تزعلش و تعتبر إن أى مشاركة فى هذا الباب عبارة عن رد عليها و بكدة تستمر الردود و نأمن جانب ام تويتى و يظل يرفرف بجناحيه

معلنا اواصر المحبة و السلام نحو مستقبل زاهر مليء بالكتاكيت

يا إخوانى و الله مش عارف الصيام دة بيعمل فينا إيه بس أسأل الله ان يقبله منا ولا يجعلنا ممن رغم أنفه إذ أدرك رمضان و لم يغفر له

و الآن إلى اللقاء مع الخواطر - و حنشوف مين اللى حينقض المعاهدة - :closedeyes:

شوفوا بقة يا شباب

انا حاكتب كل شىء ييجى ف بالى بس ياريت ماحدش يقرا حاجة

هو حرام الرد على الستات ؟

شوفوا بقة الستات دول مشكلة كبيرة و الواحد ذكرياته معاهم كتير

من ايام الجامعة تيجى البنت حاطة الأزرق و الأحمر و على سنجة خمستاشر و عايزة تبقى أحسن واحدة فى الشلة و تجذب جميع الشباب و لما ييجى واحد يقرب منها تقوله عنندك إحنا اللى بينا زمالة وانت زى اخويا

يا بنتى هوانا كلمتك والا أخوكى ولا بقية عيلتك ؟ تقوله ما تقربلييش و هكذا

و بعدين تبدأ تلمح الأخ اللى قاعد فى الركن مع نفسه و مش سائل فيها و ترمى الشباك و المسكين يلاقى نفسه متورط فى قصة حب و عايز يتجوز

يتجوز ؟ و هو لسة بياخد مصروفه من باباه ؟ مششكلة كبيرة حاقولكم حلها فى العدد القادم قصدى الحلقة القادمة

التمثيلية اللى بعدها .....

الردود بتدخل على بعضها

فيه حاجة غلط

[نانو]

السلام عليكم و رحمة الله

أخى خضر

اخواتى نانو - صفاء - فلانة

تحية طيبة لكم جميعا و صوم مقبول للجميع

فإنه يسعدنى الإنضمام لمعاهدتكم الجميلة منذ الآن - ولو إنى مش عارف إيه المعاهدة - بس لو على إننا نرد على بعض أنا مستعد للرد على جميع من بالمنتدى

بس بقى لو حنكون حزب خاص يبقى فيه كلام تانى و محاكمات و تلفيق قضايا و أنا عندى عيال

لا ابوزياد احنا ما فيناش من التفرقه ....لا مش حزب خاص لا سمح الله

ديه احلي حاجه في المحاورات اللمه و الزحمه

هي بس الفكره ان احنا بنعمل حزب تنشيط الرد ....و قلنا نبدأ بانفسنا و طبعا نرد علي غيرنا كمان

و انا بقه هابدأ بنفسي في تنفيذ المعاهده علشان كده مش هارد عليك :closedeyes:

اقصد مش هارد دلوقتي حالا ....بعد شويه كده ....هاروح اشوف ايه الحكايه و اجي تاني

[White heart]

هناك حكمة بليغه لدينا تقول: " إعمل الخير ... و إرميه فى البحر " ....

انا أحاول تطبيق تلك الحكمة أيضا على ما تتحدثون عنه ... أى اننى أعتبر المداخلة سواء كانت مقرؤة أو مكتوبة .... هى بوجه عام " خير " .... و الخير لا ينتظر أن يرد عليه .... و لا ينتظر أن يتم الإعلان عنه .... و بكل تأكيد لا يجوز أن يكون صاحبه مجبرا أو مرغما على الإقدام على فعله ... بل ببساطة هى نقطة تتبع لحرية صاحبها .... اما أن يفعل الخير و يرميه البحر .... اما يتقبل هذا الخير و يتفاعل معه ... اما أن يتقبل هذا الخير و لا يعبر بأى وسيلة .... و الا أن يطلع على هذا الخير و لا يعتبره خير من الأساس فيتركه حيث هو ..... !

تحياتى للجميع .... :closedeyes:

تم تعديل 12 أكتوبر 2006 بواسطة White heart

[نانو]

هناك حكمة بليغه لدينا تقول: " إعمل الخير ... و إرميه فى البحر " ....

انا أحاول تطبيق تلك الحكمة أيضا على ما تتحدثون عنه ... أى اننى أعتبر المداخلة سواء كانت مقرؤة أو مكتوبة .... هى بوجه عام " خير " .... و الخير لا ينتظر أن يرد عليه .... و لا ينتظر أن يتم الإعلان عنه .... و بكل تأكيد لا يجوز أن يكون صاحبه مجبرا أو مرغما على الإقدام على فعله ... بل ببساطة هى نقطة تتبع لحرية صاحبها .... اما أن يفعل الخير و يرميه البحر .... اما يتقبل هذا الخير و يتفاعل معه ... اما أن يتقبل هذا الخير و لا يعبر بأى وسيلة .... و الا أن يطلع على هذا الخير و لا يعتبره خير من الأساس فيتركه حيث هو ..... !

تحياتى للجميع .... :closedeyes:

عزيزي وايت هارت

انت تستاهل شكر خاص علي كل ما تقدمه للموقع من معلومات جديده و مفيده

لكن الحقيقه وجودنا في هذا المنتدي ليس فقط من اجل تبادل المعلومات ...لانه ببساطه لسنا جميعا علي نفس القدر من المعرفه و القدره علي الخوض في النت و الحصول علي المعلومات القيمه و تقديمها الي زملائه كما تفعل انت مشكورا

و لكننا نحتاج ايضا الي طرح افكار و قضايا للنقاش ....

نحتاج للمسانده المعنويه من التفافنا معا في السراء و الضراء كاسره واحده .....

نحتاج احيانا للمشوره من احدنا لمشكله ما تؤرقه .......

ومجرد حتي تبادل الاراء بيننا في اي مشكله يثري و يزيد ثقافتنا

نحن هنا لاننا نحتاج ان نتواصل معا من كل مكان وفي اي مكان

منا من يشعر بالغربه و هو خارج وطنه و منه من يشعر بها و هو بداخله و في النهايهالعلاقه بينا هي علاقه ود و تواصل في كل ما هو خير و مفيد

دمت لنا و دام الجميع اخوه في هذا البيت الكبير

[bentmasria]

:unsure: :rolleyes: :blink:

موش عارفة اقولك ايه الموضوع دمه خفيف جدا وبشكل ما يفتقد لاعتذارى انا شخصيا مع كل مساهماتك الرائعة انتى ودكتور صفاء فى باب الادب انا بعتذر فعلا صحيح عندى اسباب قهرية مضحكة لانى علشان ادخل المحاورات اصلا بقعد ادور على بروكسى واكتب مشاركة واضغط ارسال وغالبا تختفى او لا اتمكن من العودة مرة ثانية للمحاورات او يأتينى زائر الليل ابنى محمد ويصرخ حضن ماما اقفلى كمبروتر وينتهى الامر بان يغلقه هو شخصيا بيديه الكريمة وما يهمهوش لا ضرب ولا توبيخ المهم انا تقريبا رجعت انتظم شويه بالرد مؤخرا لانه ابتدى ينام بدرى وصديق ربنا يكرمه ادانى برنامج هاكرز بيساعدنى فى ايجاد بروكسيات

سامحونى لو قصرت واوعدكم بالمتابعة لكل الرائع الذى تقدمونه والرد دائما

سامحونى بجد انا فعلا مقصرة

كل سنة وانتم طيبين

البنت المصرية

[أبو زياد]

السلام عليكم ورحمة الله

القلب الأبيض خير ان شاء الله ؟ :angry:

نانو حصل خير ؟!! :unsure:

البنت المصرية اللهم اجعله خير :ph34r:

انتم والله أحسن أصدقاء و أحسن صحبة

وان شاء الله حزبنا يكبر و خلاص فلانة اترقت و ماحدش حيعرف يكلمنا ( ناسبنا الحكومة )

إلى لقاء آخر استودعكم الله و ادعو ربنا يوفقنا فى نهاية رمضان و يعتقنا من النيران

كل عام وانتم جميعا بكل خير :rolleyes:

[mizo]

الفاضله صفاء

يؤسفنى ان اخبرك اننى لم ارى اى موضوع للك من مده كبيره ,انا عضو قديم جداً ولكنى لم اكن اشارك لانى كلما شاركت

بعث لى اخى العزيز عادل ابو زيد الكتابه باللغه العربيه مما جعلنى ادخل جمعيه وشراء كيبورد عربى مخصوص للمحاورات

وعليه سوف يتم الرد على اى موضوع تقومين بكتابته

ملحوظه : انا شاكك انك عاوزه تكسبى نقط بعدد الردود ثم تستبدلين النقط بسياره :rolleyes: :unsure:

[nancy]

صفاء وحياة تويتى الى جنحاتة اتخدلت دى

موضوعك دة موتنى من الضحك

وبعدين اهو جالك ردود من غير موضوع

بدل ما يكون فيه رد على موضوع

حطى دى فى دية

وبعدين انا كتير بتحصل معايا ارد فى موضوع ومحدش يرد عليا وابقى انا الى جبت ضلف الموضوع

وفعلا زى ما قلك س س رمضان شاغل الناس

مع انى سعيدة جدا النهاردة بالمنتدى

مودست رجع

وياسو رجع بعد غيبة طويلة

نسر عمال يكتب فى كل المواضيع

وواحد تانى فاتح موضوع يدعوا للتفائل

وفلانة مقطعة المنتدى اشراف

يعنى المنتدى اليوم فى اجمل حالاته

فمحدش حيقفل على تويتى ابدا بعد كدة يا صافى :rolleyes:

[lingo]

هو ايه الموضوع هو مافيش شغلانه في الدنيا الا حلال وحرام ومكروه يعني ايه فاهموني هي الناس غاويه تخش النار وبس

[Diab]

ماهو يا العيب فى تويتى زى ما قال قبل كده سى السيد يا إما أنا مجنونة وبيستهيألى

يا إما حد عامللى عمل ان اسقط سهوا وابقى ساقطة كيك :closedeyes:

هو فى ايه يا جدعان ؟

يعنى كل ما اشترك فى الرد على موضوع .. غالبا أسقط من قعر القفة

ما تبقوا تخيطوا القعر الله يخليكو

انا مش هقول أى مواضيع .. لكن الموضوع اتكرر اكتر من مرة

وده صدمنى .. والصدمة عملتلى اندهاش فى الشعور واستغراب فى الذاكرة وانبلاج فكرى

يعنى اجيبه من فين تانى فكرى؟

ذنبه فى رقبتكم

مررت على موضوعك هذا - من العنوان - و كان إنطباعى أنه ربما صدرت فتوى فى مكان ما تحرم محادثة "الحريم" تليفونيا أو الرد عليهم سواء كفتوى أو أحد إختراعات مشايخ الفضائيات أو دول معينة ....

كان هذا تصورى من عنوان موضوعك ..... و قررت أن أقرأ الموضوع و أستعين بكل ما آتانى الله من الصبر فى الرد و الإقناع و الذى منه !!!!

فجأة وجدت الموضوع شئ آخر بالمرة تقصدين " هل هناك مانع شرعى من التعقيب على موضوعات الستات فى محاورات المصريين" و أكيد الإجابة لا " بالثلث" لكن هل تأكدتى أن موضوعات الستات فقط هى التى لا يتم التعقيب عليها أم أنها ظاهرة عامة فى أى لحظة تجدين ما يزيد على الستين أو السبعين متصفح لمحاورات المصريين يتصفحون مئات الموضوعات و لكن الكتابة سواء كموضوعات جديدة أو تعقيب حتى على ما قرأوه من موضوعات قديمة يمثل نسبة ضئيلة ؟

جائزة مليون جنيه "عراقى" لمن يتقدم بحل عملى.

تـــفـــضـــل

ذكر الاسم الحقيقي للمرأة في المنتديات حرام

[nora]

:closedeyes:

بس ايه الفرق مهي هيا هي الست وحتى لو غيرت اسمها مش هتفرق مهيا الي بتتكلم وهيا الي بتتعامل يبقى لو هنحرم نحرم كلمها من اساسو مش اسمها بس احنا منسبش الاصل ونجيب الفروع نعد نتحجج بيها عموما انا مسميش نوره اصلا :huh:

[inas]

يبقى معنى كده منشاركش ونسيب المحاورات طالما حرام

طالما لا اتطرق الى كلام خارج او حوارات خاصه اظن اني معملتش كده حاجه غلط

ومش شرط زي ما نوره قالت يكون ده اسمي الحقيقي فرق ايه باه الاسم حد يعرف اذا ده كان اسمي الحقيقي ولا اسم مستعار؟؟؟؟؟؟؟؟

معنى الكلام ده اني البس نقاب وافعل ما اشاء مهو محدش يعرف شكلي الاتنين واحد :closedeyes:

[Diab]

انا أساسا معرفش هو إستند علي أي مرجع عشان الفتوي الغريبة دي

[Dr.Know]

بس هو منهاش عن المشاركة

هو نهي عن ذكر الاسم الحقيقي

يعني حرض علي الكذب مش الصدق

يعني لو حد سألني اسمك ايه مع الفارق طبعا اقول اسمي د/ نو

لو الشئ ده غلط او حرام كان حرمه كله

ولا ايه

[أبو زياد]

كنت أنوى عدم فتح الرابط لأنى لا يعنينى السؤال و لكن ردود سيادتكم شدتنى لقراءة هذا الرابط فقمت بنقله و إبراز ما فيه حتى تتضح الأمور

إخوتى الأعزاء لقد كان السؤال :

س: هناك ظاهرة بدأت تنتشر وهي قيام الفتيات بكشف اسمائهن في المنتديات فبدأت بعض أخواتنا في المنتديات استبدال أسمائهن المستعارة باسمائهن الحقيقية بدافع الحماس الشبابي و الانفتاح في النقاش

وكانت الإجابة من أحد المشايخ ( لا أعرفه ولم أسمع عنه من قبل ) :

بسمه تعالى

من الواضح ان الاسلام سعى جاهداً ليضع فواصل بين الجنسين لتقيهما من الانزلاق الحيواني ولذا حث الاسلام الطرفين على التعفف والاحتشام وأمر المرأة بالحجاب وعدم الاختلاط وهذا الاختلاط الحاصل بمقتضى التقنية الجديدة ليس خارجاً عن نهي الشارع بل هو من موارده فكل اختلاط سواءاً في مكان واحد او في دردشة واحدة او أي شيء قد يطالعنا به الزمن مادام يساهم في حركة الشهوة ولو على المدى البعيد فهو مرفوض دينياً ولذا حري بالمؤمن وكذا المؤمنة أن يجنبا أنفسهما ما لا يحمد عقباه فكم من سائل للتوبة وقع في مصيدة الشيطان بسبب الانترنت وغرف الدردشة . هذه نصيحة عامة واما مورد السؤال فقد لا نستطيع ان نعطي ضابطاً كلياً لذلك ولكن في الغالب عدم ذكر المرأة لاسمها في تلك المواقع والتخفي وعدم القاء جلباب الحياء مما يساهم في عفتها وقد ورد عن أمير المؤمنين(ع) قوله ( سبب العفة الحياء) . صاننا الله وإياكم ووقانا من مرديات أنفسنا إنه لطيف ودود.

لقد وضعت خطوطا تحت النقاط التى أردت إبرازها

وسؤالى الآن : أين هى الفتوى التى تحرم ذكر المرأة لإسمها ؟

لقد كان الرد على سؤال محدد (مثل لا تقربوا الصلاة ) و السؤال كان محتواه ( بطريقة خبيثة ) أن الغرض من ذكر الإسم هو الإثارة فكان الرد حسب السؤال أو بمعنى أصح حسب الغرض من السؤال ....

يا إخوتى الأعزاء أرجو أن تعلموا أن الحرام هو أن يسأل إنسان عن فتوى لا تخصه و لا تفيده حتى يوقع المفتى فى مأزق و يحرجه ...

من يفعل ذلك هو من يشيع الفتنة فى المسلمين و يدخل في دائرة المحظور فى القرآن ..

إن للفتوى آدابا و أحكاما لا يجوز أن يتخطاها أحد .. وأبسطها أن يكون المستفتى محتاجا فعلا إلى معرفة أمر ما

أرجو أن تتفهمونى و شكرا للأخ الفاضل دياب الذى أضاف مداخلة لموضوع قديم كنت أحبه و كم تمنيت أن نقوم جميعا بالسؤال عن صاحبته خفيفة الظل و التى أضافته فى باب ( موضوعات خفيفة )