نصائح مطبخيـــة تهمك...

[Folana]

لسلام عليكم ورحمة الله ....

بقى احنا عمالين نطبخ ..نطبخ...ومش واخدين بالنا ان المطبخ عايز شوية لمسات كده...

اخواتى سيدات المحاورات اللى عندها نصيحة مطبخية تتفضل تكتبها هنا ولها الاجر والثواب....انا حابدأ اهو...

- بعد القلى بالزيت والسمن نصب على البوتاجاز او الفرن مسحوق التنظيف ونلمع بورق الجرايد...لانه بيلمع الافرا ن

- للتخلص من رائحة قلى السمك ..نضيف واحنا بنقلى شوية فصوص مستكة على صفيحة فوق نار هادئة جدا لتمتص رائحة التحمير.

- للتخلص من رائحة البصل فى اليد..تفرك بقليل من البن المطحون وتغسل بماء وليمون.

- للاحتفاظ برائحة المطبخ زكية يمكن اضافة بعض قطرات كولونيا على ماء المسح لانها تبقى فترة اطول

- حتى تحافظى على قوة التبريد فى الثلاجة...انزعى الفيشة كل عشر ايام لمدة عشر دقائق ثم اعيدها مرة اخرى

- تغسل الثلاجة مرة كل 10 ايام بالماء والصابون وتشطف بماء وكولونيا وتجفف جيدا

- حتى لا تختلط الروائح ببعضها فى الثلاجة...نضع قليل من الفحم فيها....

وحتى نحافظ على رائحتها زكية نضع قشر برتقال والليمون متناثرة فى اطباق صغيرة او على قطع من ورق الفويل .............

فى انتظار نصائحكم....

تم تعديل 10 أكتوبر 2006 بواسطة folana

[eltayer]

للتخلص من رائحة الثوم في اليد

يوضع اناء استالس مقلوب في الحوض وتفتح المياه وتدعك اليد علي الاناء

سوف تتخلصين نهائياٍ من رائحة الثوم

حته اه من الرجاله

حد يعرفها

تم تعديل 10 أكتوبر 2006 بواسطة eltayer

[Folana]

السلام عليكم ورحمة الله ....

اخى الطاير..اله يبارك لك..تصور انى ماكنتش عارفة اتخلص من رائحة الثوم ابدا..وكنت بأجل تفصيصه لاى حد فاعل خير وذوى القلوب الرحيمة...

معلومة جميلة باشكرك عليها ....ايه ساسيدات مافيش نصائح...؟دى جت من الطاير ولاجتش منكم....

- تجنبى تقطيع اللحوم والفراخ على لوح تقطيع واحد حتى لا ينتقل مرض السالمونيلا...لذلك يجب غسل خشبة التقطيع جيدا وفركها بالملح قبل شطفها

- لازالة بقع الرمان والكركديه من كونتر المطبخ ننظف بمحلول الليمون والخل وتشطف بماء ممزوج بماء الاوكسجين - من الصيدلية-

- لتنظيف الصينى والبورسلان من بقع الشاى ..نغليها فى ماء به قليل من الصودا يعنى بيبسى او سفن او ماء صودا عادية بتاعة الشرب ...لمده 10 دقائق ثم تشطف وتجفف ...

ونلتقى بعد الفاصل

تم تعديل 10 أكتوبر 2006 بواسطة folana

[نانو]

تسلم ايديك يا فلانه

و منكم نستفيد

و بعدين يا حبيبتي كان نفسي اشارك معاكي بس انا اخري ...انه لما بنشتري التين مش بنغسله كله علشان ما يحمضش :)

يعني...ماكو.... معلومات في المطبخ ...

شكر يا طاير علي المعلومه الصغيره ديه بس قويه....

[khedr]

وانا كمان ممكن اقول شويه

لتسهيل عمليه تقشير البصل وتقل كميه الدموع اثناء تقشيره

يوضع في طبق به ماء ويوضع في الثلاجه قبل التقشير بعشر دقائق

لاحتفاظ بالليمون طازج لمده طويله في الثلاجه تلف كل ليمونه علي حده بقطعه من ورق الجرايد

اذا طار بعض من الزيت او السمن اثناء التحمير علي يديك فضعي عليها بعض من معجون الاسنان

للاحتفاظ بالنعناع لفتره طويله طازج داخل الثلاجه ضعيه في قطعه قماش نظيفه

لكي تتجنب العطش خلال نهار الصيام ضعي بعض قطرات من الليمون علي الماء قبل شربه

لو استعملنا الشبه بعد الحمام مباشره يمنع رائحه العرق لفترات طويله

بعد الحمام او غسل القدمين يتم تنشيف الاصابع جيدا ولا تترك مبلوله حتي لا يحدث روائح غير مرغوب فيها

فاصل ونواصل

[Folana]

السلام عليكم ورحمة الله ..........

- حتى لا يمتص الباذنجان الزيت اثناء القلى مررى حلقات الباذنجان فى الدقيق

- اضيفى القرنفل عند شوى الفراخ لامتصاص اى رائحة منها

- اضيفى بعض قطرات من الزيت اثناء سلق الكرنب حتى يمتص الرائحة ولا تنسى الكمون

- الحليب المكثف يجعل الحلويات هشة لذلك فهو يفضل عن اللبن الحليب فى استخدام الحلويات

- قبل شى اللحوم اخرجيه من الفريزر قبل الشوى بفترة كافية حتى لا ينشف اثناء الشوى

- حتى تحصلى على بطاطس محمرة وهشة وخالية من الزيت اسلقى البطاطس قبل تحميرها لمدة دقيقتين

تم تعديل 12 أكتوبر 2006 بواسطة folana

[se_ Elsyed]

إيه الحلاوه دي

مونكن أطبع الكام نصيحة دول وأروح أعلقهم لمدام سين سين في المطبخ ؟

[shahd]

موضوع جميل ياتيتا فولانه :unsure:

واستلمي نصايح عواجيزي من زميلة الكفاح المطبخي المسلح تيتا شهد

نصيحة عواجيزي على الماشي

لما تسلق بيض لو عايز تعرف انها لسه نية ولا مستويه

وانت بطلعها من الميه

دورها بأديك.. مش على ايديك -_- ..على الطبق او في الطربيزرة لو لفت لفة كاملة يعني خلاص كله تمام

ولو لأ خلي تبقى لسه نيه

وانت بتقلي السمك حط منشفة مبلولة على غطا البوتجاز يشيل الريحة

اتنظرونا في نصايح عواجيزي ثانية بعون الله

كح كح كح هاااااااااااااااتشوووووووووو

كلمة في سرك استنيتك ياتيتا فولانة في دار المسنين جمب المحاروات مالقتكيش رحت راكبة العصاية بتاعتي ورجعت :closedeyes:

تم تعديل 12 أكتوبر 2006 بواسطة شهد

[Folana]

السلام عليكم ورحمة الله.............

ابن بنت بنت بنتى الغالى س.س. مونكن طبعا تطبع انصائح بس استنى لما نكملها كلها علشان الحساب يبقى مرة واحدة....

شهد..انت رحتى انهى دار مسنين...البناتى ولا الرجالى؟..انا حتلاقينى فى المشتركة اللى ورا المحاروات ..هات لنا شوية نصائح يمنية بقى نعمل بهم شغل قبل العيد ..ده موسم وعايزين البلية تلعب معانا...انا حاقف على ناصية وانت على التانية..نبيع نصايح يمنى ونصايح مصرى...وممكن هندى برضه ..واهو نجيب مصاريف مراجيح العيد....

خدوا دول ...

- اذا كنت تستخدمى الحلة الالومنيوم وطبعا حتلاقى لونها اغمق ..ابقى اغلى فيها ميه بعصير ليمون تجعلها كالجديدة.

- عند طهيك للارز ضيفى بعض قطرات من عصير الليمون ...تجعل لونه ناصع البياض..وده فى عمل الفتة ..كمان ممكن تضيفى ملعقة زيت ذره تخليه يلمع ويبقى مفرول

- لا تقطعى السلطة قبل تناولها باكثر من خمس دقائق حتى لا تفقد فوائدها

- عند فتح علبة الصلصة (البرطمان) ضيفى شوية زيت فوق اوش علشان مايظهر عليها العفن الابيض

ونلتقى بعد الفاصل...(يعنى بكرة ولا بعده وعليكم خير ...اصل الفاصل ده يعنى الكهربا فصلت من دماغى ..وحاروح اجيب بونطة لحام وانبوبة اكسجين لزوم اللحام والتصليح...)

تم تعديل 12 أكتوبر 2006 بواسطة folana

[Folana]

السلام عليكم ورحمة الله ............

- افرشى سطح البوتاجاز بورق فويل علشان ترتاحى شوية من تنظيفه ...وايضا للمحافظة عليه

- للتخلص من الدسم على وش الشوربة او الطبيخ ..امامك حلين ..اذا مش مستعجلة ممكن تحتفظى بها فى الثلاجة ولما تجمد ..انزعى الدسم بالملعقة

او..لو مستعجلة مررى قطعة عيش على وش الشوربة لتمتص الدهون بها ..

- عند شرائك للخضار المجمد ...يراعى ان تكون الخضروات بتتحرك بحرية ..لانها لو ماسكة ومجمدة فى بعضها فهذا دليل على انها سبق اذابتها وتجميدها مرة اخرى وبتكون غير صالحة للاستخدام

- لراحتك...نظفى مكان عملك بالمطبخ اولا بأول ...حتى لا يتراكم عليك العمل...يعنى تغسلة الطاسة على طول ..والخلاط ..والملاعق..واى حاجة بتستخدميها وانت واقفة ..وفى ايديك فوط المطبخ الورقية تلمعى على طول ...

ونلتقى بعد الفاصل.........

[نانو]

السلام عليكم ورحمة الله ............

- افرشى سطح البوتاجاز بورق فويل علشان ترتاحى شوية من تنظيفه ...وايضا للمحافظة عليه

ايوه..دي بقه شغلتي و بصراحه فكره منتازه

- للتخلص من الدسم على وش الشوربة او الطبيخ ..امامك حلين ..اذا مش مستعجلة ممكن تحتفظى بها فى الثلاجة ولما تجمد ..انزعى الدسم بالملعقة

انا عندي فكره رائعه للموضوع ده ..و احل ده وصلتله من كتر ما بقرف من الفراخ النيه( يعععععععععععععععععع)

بصي يا ستي باضرب الجونتي في ايدي و البس مريله المطبخ :unsure:

و اعلن الحرب علي الفرخه و هوبااا اروح نازعه كل جلدها بخليها مصيفه تماما :angry:

و بالطريقه ديه باتخلص من كل الدهون نهائيا قبل اصلا ما احطها علي النار و حقيقي بجد الطريقه ديه صحيه جداحتي لو قوبلت باعتارض من الجميع

.. ..

- عند شرائك للخضار المجمد ...يراعى ان تكون الخضروات بتتحرك بحرية ..لانها لو ماسكة ومجمدة فى بعضها فهذا دليل على انها سبق اذابتها وتجميدها مرة اخرى وبتكون غير صالحة للاستخدام

بحريه ازاي يعني ....و ده يبقي خضار و لا تعابين :rolleyes:

[Folana]

السلام عليكم ورحمة الله......

نانو....مختار الصحاح بيقول "تتحرك بحرية ..يعنى مش مكلبشة فى بعضها "....

- لتستفادى من بواقى السمك....لو كان عندك سمك متبقى او اجزاء منه من اليوم السابق ..بدل ما ترميها....هاتى سلطانية وفصصى فيها السمك المتبقى

خرطى عليه بصلة كبيرة و4 فصوص ثوم مدقوق..وشوية كمون وشوية زيت ومستردة ومايونيز وليمون وذرة ملح لو احتاج الامر...و2 حبة فلفل اخضر واصفر....وقلبى كله ..وبكده بقت عندك سلطة سمك جميلة وشهية وماترميش بواقى السمك..جربيها وعلىّ.

- اهتمى بنظافة الاطباق اللى بتقدمى فيها الاكل واستبعدى اى طبق مشروخ لانه ضار بالصحة

- لو كنت تأكلين فى المطبخ ( زى حالاتى كده) احرصى على ان يكون نظيفا ومرتبا قبل ان تجتمعى مع اسرتك لتناول الطعام ..يعنى اجعلى منه حجرة سفرة اخرى...

- اعتنى بمفرش المائدة ومش معنى ذلك انه يكون غالى ولكن يكون نظيفا وانيقا وذو الوان مبهجة ...ومافيش مانع ابدا لو وضعتى زهرة جميلة على المائدة اثناء تناول الطعام

- عند شرائك للمعلبات انتبعى لتاريخ الصلاحية ..واذا كانت العلبة منتفخة فان ذلك دليل على انها فاسدة ..وكذلك العلب الصدئة والمطبقة ابتعدى عنها.

- عند شرائك الفاكهة والخضروات ....ركزى على الشكل الجميل والحجم المتوسط فهما يدلان على الجودة...وابتعدى عن الثمار الطرية....

ونلتقى بعد الفاصل ...

[MZohairy]

آآآآه

مش عارف من غيري كنتو عملتوا ايه في موضوع النصايح المطبخيه ده :wub:

خدوا دي

وانتي بتطبخي دايما تخلي عينك على الأكل عشان ميتحرقش :wub:

[eltayer]

حد جرب النصيحة بتعتي ونفعت

قلولي عشان اجبلكوا غيرها وجمده برده

اي خدمة

تم تعديل 22 أكتوبر 2006 بواسطة eltayer

[Folana]

السلام عليكم ورحمة الله.........

اخى العزيز امرؤ الزهيرى....كنا فعلا محتاجين النصيحة دى ...انت كده ساهمت فى خفض نسبة الطلاق...:excl:

الاخ الفاضل الطاير..طبعا نصيحتك هاية ..وفى انتظار باقى النصائح........