يا ماما الحكومة

[هشام عبد الوهاب]

ياترى الحكومة والحكم والحاكم (اختار اللى تعجبك ) ناويين على ايه بالضبط . الواضح من فترة طويلة وباين قوى وناطط ادامنا ، ان اللى حاتكرهه حاتحط السيخ المحمى فى صرصور ودنه ،بل انها (الحكومة يعنى) حطت بالفعل السيخ المحمى وكل انواع الاسياخ الأخرى من طويل وقصير ورفيع وتخين فى عدة صرصورات (جمع صرصور) ودان الناس الوحشة اللى مش بتحب ماما الحكومة وبابا النظام ، واللى بكتبوا كلام ضدها (مع انه كلام مع الشعب ) ما علينا من الشعب الان .

ارجع للوراء قليلا .... كمان شوية ... كمان ... باااااس . كفايه كده.

من اول انتخابات الرئاسة ... ايمن نور لحد ابراهيم عيسى والأبراشى .. مرورا بنعمان جمعه والأخوان وعاكف وعاطف السادات وغيرهم كتيييييييييييييييير .

باختصار .. اللى هايفتح بقه ليلته سوده .......

طيب احنا الشعب بقى (المفعول به ) نعمل ايه .. يعنى لما نلاقى الفتوه بتاع حارتنا اتضرب علقة موت واتعلق من رجليه زى الدبيحه نعمل ايه ..نتكلم ولا نسكت ولا نعمل ايه ... طبعا فى الحالة دى الجرى مش نص الجدعنه .لأ ده الجدعنه كلها .

طيب ماهو احنا لوجرينا وسبنهالهم مش هايلاقوا المفعول به ولابد للفاعل من مفعول به يفعل به وفيه الفعل ... واحنا طبعا مايرضناش ان ماما الحكومة وبابا النظام يقعد من غير مفعول به .. ولذلك ولابد وحتما من عمل اى شئ والحل الوحيد اننا بعد ما نجرى نرجع تانى ونفضل قاعدين ...

المشكلة ان ماما الحكومة متصورة ان الشعب غبى وعبيط وبينضحك عليه ..

بيقوللنا هانغير الدستور بما يتماشى مع المتطلبات المصيرية الحلزونية السنكوباتية الالمعية ........ بنقولكم ......... كدابين

بيقوللنا ان فيه حالة حراك سياسى باذنجانى تنويرى ........................................................بنقولكم ......... اونطجيه .

بيقوللنا ان فيه اهتمام بمحدودى الدخل والفقراء ونحن نعمل لتوفير السيمون فيميه ..................بنقولكم .......... منافقين قليلى الحيلة.

بيقوللنا تطوير التعليم السلحفائى السلمباكى ................................................................. بنقولكم ........ روحوا حطوا كلمن.

بيقوللنا نحن نسير الى الديمقراطيه الملوخية الوحدوية ................................................... بنقولكم ........... ولا بلاش نقولكم اصلها ما تتكتبش.

فيا ماما الحكومة ويا بابا النظام سيظل هذا الشعب المفعول به قابعا على انفاسكم الى ما لا نهاية . سنظل نتكلم ونكتب عن فساد الفاسدين من سادتكم وخراب ضمائرهم .

واما تحلوا عننا او تجيلكم شوطه تاخدكم .

[عادل أبوزيد]

فيا ماما الحكومة ويا بابا النظام سيظل هذا الشعب المفعول به قابعا على انفاسكم الى ما لا نهاية . سنظل نتكلم ونكتب عن فساد الفاسدين من سادتكم وخراب ضمائرهم .

واما تحلوا عننا او تجيلكم شوطه تاخدكم .

نعم نحن باقون و لن نسكت و سنتكلم رغم ما تقومون و سنتحول يوم ما من الكلام إلى الفعل و ربما فى يوم ليس بالبعيد تتكرر أحداث أوروبا الشرقية على ضفاف النيل

النظام ليس أقوى من نظام شاوشيسكو

أعجبتنى عبارة "واما تحلوا عننا او تجيلكم شوطه تاخدكم"

[Salwa]

الله يرحمك يااستاذ هشام عبد الوهاب .

لاحول ولاقوة الا بالله العلى العظيم .

و..

تبقى الحروف شاهدة على فكر صاحبها .

البقاء لله وحده.

[Salwa]

......

المشكلة ان ماما الحكومة متصورة ان الشعب غبى وعبيط وبينضحك عليه ..

بيقوللنا هانغير الدستور بما يتماشى مع المتطلبات المصيرية الحلزونية السنكوباتية الالمعية ........ بنقولكم ......... كدابين

بيقوللنا ان فيه حالة حراك سياسى باذنجانى تنويرى ........................................................بنقولكم ......... اونطجيه .

بيقوللنا ان فيه اهتمام بمحدودى الدخل والفقراء ونحن نعمل لتوفير السيمون فيميه ..................بنقولكم .......... منافقين قليلى الحيلة.

بيقوللنا تطوير التعليم السلحفائى السلمباكى ................................................................. بنقولكم ........ روحوا حطوا كلمن.

بيقوللنا نحن نسير الى الديمقراطيه الملوخية الوحدوية ................................................... بنقولكم ........... ولا بلاش نقولكم اصلها ما تتكتبش.

فيا ماما الحكومة ويا بابا النظام سيظل هذا الشعب المفعول به قابعا على انفاسكم الى ما لا نهاية . سنظل نتكلم ونكتب عن فساد الفاسدين من سادتكم وخراب ضمائرهم .

واما تحلوا عننا او تجيلكم شوطه تاخدكم .

ونجح الشعب فى ازاحة النظام ..

فى جنة الخلد ياهشام ويااخناتون وياافوكاتو وياابو حميدالمصرى ..وياكل الشرفاء فى هذا البلد العريق .

وياشهداء الثورة ...ياورد فتح فى جناين مصر .

[المهندسه]

فعلا تبقى الكلمات هى الشاهده ...رحمه الله عليه

و اشكرك يا ماما سلوى على اللافته الرقيقه من حضرتك على تذكيرنا بكلمات الفاضل الاستاذ هشام رحمه الله عليه

[لماضة مصرية جدا]

السلام عليكم و رحمة الله و بركاته

ماما سلوي.....مش عارفة انام

و عايزة افكر في حاجة

ليه منكرمشي كل اساتذتنا اللي كانوا في يوم معانا في المحاورات و سابولنا ثروة من الافكار و الكلمات اللي لسه منورة و هتنور لكل اللي هيعدي من هنا

انا عارفة ان فيه موضوعات مجمعة و مثبتة لاستاذنا الافوكاتو...و كمان لاستاذنا اخناتون

طب انا نفسي ان احنا نعمل حاجة و نوصل بيها تقديرنا لاهل اساتذتنا و ولادهم...عشان يعرفوا ان احنا دايما شايلينم معانا

بفكر ليه منجمعشي كتير من المداخلات اللي اتكتبت...هنا....الافكار....و نؤرخها (بنفس التواريخ)...لان فيه كتير من المداخلات بتكتسب قيمة لان كان ليها بعد نظر و استشراف للاحداث...و نعملها في كتاب صغير

و نحط عليها لوجو المحاورات....و نهديها لاسرة اساتذتنا...

يمكن فرد من المحاورات بيغيب...بس لازم نتواصل مع اسرته و نقولهم اد ايه ابنهم اثري حياة ناس كتيرة اوي

معلشي اني بحط الفكرة هنا...يمكن مش مكانها

بس مش عارفة انام

و حاسة ان فيه دين....لازم يوفي لكل اساتذتنا اللي اتعلمنا منهم و لسه بنتعلم

انا مستعدة اشارك في اي عمل...سواء تحرير المداخلات...تجميعها...تصنيفها....او كمان اخراجها في شكل كتاب

و سامحوني مرة تانية

بس بفكر....معاكم

[Salwa]

شكرا للحبايب...المهندسة ولماضة مصرية جدا.

ورغم ان الموضوع الذى طرحته العزيزة لماضة من الممكن ان نقول ..(( مكانه مش هنا )) ...لكن؟؟

سوف اترك مداخلتك وردى عليها لأنها تعبر عن وفاء الجيل الجديد من ابناء المحاورات للجيل السابق .

سبق وتمت مناقشة اقتراح مشابه ...ورغم كل ما يوحى به الأقتراح الرائع من اعتراف بفضل كل ابناء المحاورات القدامى ..

الا انى (( كسلوى ...اى انه تفكير شخصى )) ...لايروقنى .

واتمنى فعلا ان استطيع ايصال الفكرة التى تدور فى مخيلتى ..

نحن هنا فى محاورات المصريين .بالتأكيد...نشعر بقيمة ما يكتبه الآخرون (( اكثر من اسرهم التى تحيا معهم ولا يعلمون شئ عن المحاورات او لاتستهويهم او لا...تهمهم..او...كانوا يعتبرونها مجرد هواية ...للغالى ..او..الغالية ))..

او...

كما فى حالتى ..(( بعد عمر طويل )) ..

او ..

فى حالة الاساتذة ...الأفوكاتو واخناتون .....

كانت اسرة الأفوكاتو القريبة ...تتحدث الانجليزية .

واسرة اخناتون القريبة ايضا ...تتحدث الألمانية .

وانا اظن ان المحاورات كمكان او كمجتمع على النت ...ككل ....هو شامل واوضح ...

ما معنى ان يتم تجميع مداخلات لأعضاء رحلوا ....ونترك المداخلات المتفرقة ؟؟؟

وان تم تجميعها ... لن تكون واضحة بدون اضافة مداخلات للرد عليها او مناقشاتها ..

هى محاورات ...

صعب فصل جزء وترك جزء ...

المحاورات كالبحر الذى يجمع فى اعماقه كل اللآلئ الرائعة ...مكانها هنا ياريهام .

مكانها هنا ....فى اعماق قلوب محبيها .

ومن وقت لآخر .....يجب علينا اظهار كنوزها للأعين .

نتباهى بها ...ولتكملوا المسيرة على طريق الخير .

[لماضة مصرية جدا]

المحاورات كالبحر الذى يجمع فى اعماقه كل اللآلئ الرائعة ...مكانها هنا ياريهام .

مكانها هنا ....فى اعماق قلوب محبيها .

ومن وقت لآخر .....يجب علينا اظهار كنوزها للأعين .

نتباهى بها ...ولتكملوا المسيرة على طريق الخير .

لا يسعني سوي ان اقول..."حاضر" بكل طاعة و حب و تفهم

اللآليء الرائعة جدا و الاستثنائية جدا....و الانسانية جدا....خليها تكون في الصدفة اللي حمتها طول السنين....و خلتها تكبر و تغلي و تعلي

و هيكون ليها دايما مساحة خاصة في القلب

و هتكون محط انظار القادمين...حتي و ان رحلنا نحن يوما

مسا حضرتك مساحات دافية في القلب....تفضل دافية حتي بالغياب