نصائح نميسة .... للزوجة الحديثة

[se_ Elsyed]

مع إقتراب دخول بنتنا جي جي الشهيرة في القصيم بـ " مصرية الهوى " قفص الزوجية .. وتلاقي الناس ماشيين في بريدة وعنيزة والرس عمالين يقولوا مصرية الهوى راحت مصرية الهوى جت ..

طالبين من الناس الخِبرة - خمسين سنة وإنت طالع - اللي زي حالاتي إنهم يقدمولها عُصارة فِكرهم وخبرتهم في الحياة الزوجية بحيث بعد ما تنفذ تلك العصارة تجد عصافير الحب وحمائم السلام وصقور الوئام ترفرف فوق عش الزوجية ...

أنا مش هالت وأعجن كتير وهادخل في الموضوع على طول ..

تعالي هنا جنبي يا جي جي يا بنتي ..

- شوفي يا جي جي .. بقى خير في سلامه .. وسلامه فين ؟

أنا أتمرمط كتير في حياتي يا بنتي وسافرت وشوفت أكتر .. وعشان كده عايز أنصحك شوية نصايح من راجل متزوج من نيف وأربعين سنة ... وشوفي إنت بقى لما راجل هو اللي ينصحك ويفهمك على الفوله ... ما علينا نسيبنا دلوقت من الفول والتميس ونخش على النصايح عِدل :

1- إبنك على ما تربيه .. وجوزك على ما تعوديه

ودي النصيحة الأولانية اللي تحطيها حلقه في ودنك - على اخر الموضوع أنا متأكد إن ودان جي جي مش هاتبان من كتر الحلقان وممكن نعملها سلسة طولها ثلاثون ذراعاً تحط فيها الحلقان .. وأهي كل ما تتزنق تروح تبيع لها حلق من دول وأهو يجيب له مبلغ مش بطال -

فالزوج يا جي جي يا بنتي على حسب ما تعوديه .. يعني من أول يوم تديله الوش البلاستيك وتضعي له خطوط حمراء وصفراء وخضراء .. تلاقيه يمشي على العجين ما يلخبطوش .. يعني عايز كوباية شاهي بالنعناع ... تردي وتقوليله " ترى ماني بالفلبينية اللي إستقدمتها من مانيلا ... جُم سوي لنفسك اللي تبيه تراني حاطه مونكير في يدي ومش فاضيه ولا تنسى تعمل حسابي في كوباية نسكافية بالحليب " ... وهكذا

2- إدبحي له القُطه من أولها ...

ويا مكتر القطط في الرياض هنا وتلاقي القطة من دول مربره من كتر أكل الكبسة وحاشي الغنم ... وإستحملي شويه وجمدي قلبك وإوعي القُطة تخربشك وانتي بتدبحيها ... بس صدقيني جوزك أول ما يشوف حالة السادية اللي إنتي فيها ومنظرك وإنتي ماسكه سكينة المطبخ وبتجيبي رقبة القُطة .. عمره ما هاينسى المنظر ده وهاتلاقيه طول حياته ماشي جنب الحيط وخايف أحسن يحصل القُطة ..

3- قصقصي ريش طيرك أحسن يلوف على غيرك ..

وكله كوم والنصيحة دي كوم يا جوجو .. فالراجل مننا يا بنتي ما بيملاش عينه غير الدست .. قصدي التراب .. ويوم ما الميه تجري في إيده ويمسك له مية 100 جنيه .. تلاقيه يفكر في الجواز ويسيب شريكة حياتي اللي إستحملته لحد ما وصل للأمله اللي هو فيها .. فعشان كده عايز شغلانتك تبقى تقييف جيوب جوزك أول بأول ... ومصروف البيت إنتي اللي تمسكية .. ومرتبه إنتي اللي تقبضيه .. ويادوب كفايه عليه 7 ريال في اليوم مصروف جيب أو زي ما بيسميه الفرنجه " بوكيت موني " .... 5 يجيب بيهم علبة المارلبورو وريالين يجيب بهم واحد شاورما ومن غير بيبس كمان خليه يبلع بمية ... ولما يحب يفول العربية .. ممكن تتفقي لك مع بنزينه وتصرفي له إيصالات بالمبلغ زي بتوع الليموزين ...

4- أربطيه بالعيال يربطك بالمال ( مش عارف المثل ده صح ولا لأ ... ما علينا )

يعني كل سنة عيلين تلاتة عشان ما يفوقش وما يبصش بره ويبقى في دوامه ....

5- يا مأمنا للرجال يا مأمنا للميه في الغربال

مش عارف غربال يعني إيه بالسعودي .. لكن الغربال هو الحاجة اللي بيغربلوا فيها الحبوب والدقيق اللي عايز يتغربل ... أظن واضح ؟

يعني خلي مبدأ الشك هو قاعدة في حياتك .. يقولك عندي إجتماعات وهاتأخر في الشغل ... عندي عشاء عمل ... تراني رايح دُبي أحضر معرض جيتكس ... الحركات دي كلها عارفينها وفاقسينها .. وألعب غيرها يابو الشباب ..

أنا تعبت

وأخيراً بالتوزاي مع تنفيذ كل هذه النصايح أحب أنصحك بتحضير شنطة صغيرة في هدومك وصيغتك وتخليها قريبة من باب الشقة .. بحيث أي هوشه كده ولا كده .. يبقى بيت أبوكي مفتوح لك في أي وقت ... أه إحنا ماعندناش رجالة تمد يدها على حريمها ...

وأسيب الميكرفون لحد من أصحاب الخبرة أمثالي ...

[متمردة]

ماشاء على النصائح الجهنميه ده

بس مش غريبه ان سى السيد هو اللى يقولها

واضافه الى النصائح ده كلها هقول ايه حكمة وياريت كل انسان يتبعها

( وجعلنا بينهما موده ورحمه )

وعلى فكرة انا مش من اصحاب الخبرة لكن عاشرت اصحاب الخبرة زى والدتى والداى

[مصرية الهوى]

الله يفتح عليك .. الله ينور عليك .. الله يكرمك ...

وانا قلت برضه ما يجيبها الا سي سيدها ...

ادي النصائح والا بلاش :sad:

وانا اليومين اللي فاتوا نازلة قراءة في كل مواقع الدنيا بدور النصائح النميسة للزوجة الحديثة ..

وعماله اقرأ كلام من حكاية .. الاحترام والتقدير والتجمل والتبعل والكلام ده ..

تصدق يا اخويا كنت هاطبقها :sad: ..

بس الحمد لله لحقتني قبل ما ودي نفسي في ستين داهية والراجل يركب ويدلدل رجليه :P ..

اكتر حاجه عجبتني حكاية دبح القطة .. فعلا فكرة جوهنمية

اذا دلت على شيء فانما تدل على رقة المرأة وحنيتها وطيبتها ..

هأنفذها ان شاء الله :P

ولا تنسانا من نصائحك الجميلة التي نضمن بها بيت هادئ وارف ترفرف فيه طيور السلام والوئام .....

وياسلام ياسلام قد ايه حلو الغرام

B)

( بيني وبينك يا س س وانا متفاعلة بقرأ الموضوع ومنسجمة اقصى درجات الانسجام لقيت الراجل بيكلمني ..

هل تفتكر دي حاسة سادسة تنم عن كشف الطابق المستور والاطلاع على ما وراء الطبيعة :blink:

آه منكم يا الرجالة ...... )

[mizo]

الاخت العزيزه

الظاهر ان الاخ س س بيعزك جداً بسسسسسسس

اوعى تسمعى كلامه لان الكلام ده كان ايامى وايامه ,احنا الى الجواز اخد منا راقات

بس دلوقتى تتكلمى مع الراجل لو مش عاجبه الكلام على طول يديها مسيار

انا نصحتك كل زمن وله رجاله والحمدلله انى شفت الزمن اللى الستات تخاف فيه من ازواجهن :P :blink: