ما هي تكلفة بناء فيلا في مصر ؟

[kokowawa1979]

يا نهار أبيض وبخطين حمر :)

آخر الزمن أجاور أهلاوي :lol: طيب الزملكاوية يقولوا على إيه ياسي حسين ؟؟ خان الرسالة :)

عموما ياسحس يكون لنا الشرف إن احنا نجاور سعادتك - بس أنا موضوعي طويل ٌوي يطول شرحه - وأنا مليش علاقة بوادي الملوك - هما سكة وانا سكة تانية خالص .

الأرض عندي في الأصل كانت وضع يد - واشتريتها من اصحابها بألف جنيه للفدان - بعد أن اشتروها بخمسين أي والله - ثم عملت عقدت إيجار مع الحكومة للعشرين فدان بمبلغ 800 جنيه سنويا لحين إنهاء إجراءات التمليك - وانتهت والحمد لله جميع المعاينات وعلى وشك استلام العقود إن لم تظهر بعض الألاعيب الحكومية لكن الألاعيب معروف ديتها .

أقسم لك لو كان بالمنطقة مساحات للبيع سأخبرك على الفور لكن يجب أن تكون المساحات مسجلة كملكية نهائية - وهو ده الاستثمار الصحيح .

اصبر على شوية علشان تشوف شجر الباباظ والعنب

http://wawa79.jeeran.com/photos/116298_l.jpg

أهو أنا باغريك أهو علشان تقبل الزيارة - إيه رأيك انت كمان ياسي السيد -تلبي الدعوة ؟

طبعا الزملكاوية كلهم بلا استثناء مش محتاجين عزومة :)

[الحاج فوزى]

باباظ !! يطلع ايه الباباظ ده يا واوا يا اخويا :) :lol:

على العموم يا سيدى الدعوة مقبولة وان شاء الله اول ما انزل مصر ، اكيد نتقابل

بس الكلام ده من قد ايه ؟ يعنى انت اشتريت من قد ايه ؟ يعنى الف للفدان ده متهيئلى لقطه ، حتى لو كانو اشتروها بجنية وربع :)

على العموم لو شفت حاجة كده ولا كده قول لصاحبك علطووول

حسين

[kokowawa1979]

الباباظ ده ياسحس ياخويا فاكهة استوائية يمكن بيسموها عندكم في الكويت الفافاي - طعمها زي كوكتيل فاكهة لكن أحسن حاجة فيه إنه مخفض للضغط والسكر عن تجارب - ده بعيد عن موضوع شربة الحاج سي السيد :) الشجرة اللي انت شايفها دي عمر 3 سنين

المزرعة أخوك اشتراها بور سنة 2000 وبدأت شغل فيها برضه سنة 2000 بس شوية شوية ومريت فيها بتجارب مريرة - لكن الحمد لله تقدر تقول وقفت على رجليها .

طبعا التجارب المريرة سببها إن أخوك متغرب - فكان الصرف بالهبل لإن المشرف على المزرعة ( المهندس) كان حاطط في دماغة إن أنا معايا مرتبة سرير وباملاها فلوس !!!

الحمد لله ربنا كرمني بمهندس شاب صغير وغاوي علم وشغل أصبحت أتفق معه في تنفيذ البرامج الخاصة بالمزرعة وهو بصراحة غاية في الأمانة في التنفيذ بعكس سابقه .

وحتى لا نخرج عن موضوعنا الأساسي موضوع الفيللا أعدك عند نزولي في الصيف بالبحث جديا في المزارع التي حولنا - لكن ياسحس يجب عليك رؤية المنطقة أولا لأن ما يعجبني قد لايعجبك أنت .

ولك تحياتي صديقي العزيز

[الحاج فوزى]

بصراحه يا واوا يا اخويا

موضوع المزرعة ده من احلام الطفولة :)

ارض وزرع وخضرة ..حاجة كده ترد الروح

ويا سلام بقه لما تجيبلك كام حصان وتعمل احمد مظهر :lol:

على العموم ان شاء الله ربنا يقدم ما فيه الخير

ومتشكرين يا سيدى على المعلومات القيمة ديه ، وبالذات موضوع الباباظ ده :)

حسين

[se_ Elsyed]

معليش يا سحسح

مضطر أصارحك بالحقيقة المُرة ( وش عماد حمد في فيلم أنا الماضي لما في أخر الفيلم ماطلعش أبو عبد الحليم ولا أبو أحمد رمزي وهو أساساً ماطلعش عماد حمدي )

عندي أخبار وحشه عالريق لكن لازم سعادتك تبقى في الصورة

ده خبر منشور في الجرايد النهاردة

الكبار ..أشعلوا سوق حديد التسليح

رفعوا الطن 500 جنيه في أسبوعين.. وغاب جهاز منع الاحتكار

كتب هاني صالح :

سجلت أسعار حديد التسليح أمس ارقاماً غير مسبوقة إذ بلغ سعر الطن 3650 جنيهاً مقابل 3420 الأسبوع الماضي لتصل قيمة الزيادة خلال اسبوعين فقط 500 جنيه فرضتها شركة كبري دون أي مبرر في ظل غياب تام لجهاز منع الاحتكار.

أحدث الانفلات الذي شهده سوق الحديد توقفاً في أعمال البناء والتشييد وارتفعت أسعار الوحدات السكنية بنسبة 20% تحملها محدودو الدخل.

طالب التجار والمقاولون جهاز منع الاحتكار بالتدخل لوقف الزيادة الجنونية في أسعار الحديد واتخاذ اجراء ضد الشركة الكبري التي فرضت هذه الزيادة غير المبررة.

لم يكتف بعض التجار بالزيادة الحالية فاوقفوا البيع استعداداً لزيادة جديدة تفرضها الشركة الكبري قريباً.

طبعاً يقصدوا شخص واحد فقط بيتحكم في أهم سلعة من سلع مواد البناء وهي الحديد وهو احمد مبارك قصدي أحمد عــز

على فكرة قبل ان ينقضي هذا العام هايبقى رفع سعر طن الحديد حوالي 1000 ج في الطن عشان يزداد ثراءً هو ومن يقف وراءه واللي بيعبوا في المليارات عب

بالمناسبة كمان السعر اللي إنت شايفه ده بتاع تجار الجُملة وبالتالي تاجر التجزئة اللي بيشتري منهم بيحط هامش الربح وفيي الاخر الزبون هو اللي بيشربها

[أبو زياد]

طيب إستنوا بأه لأن فيه أبحاث بتجرى لاستبدال حديد التسليح بألياف زجاجية ..

علشان يعرف القوى إن فيه أقوى منه

بس يا خوفى ليحتكر المادة الجديدة الباشا حفيد الباشا !!

ياجماعة نفسى أعرف مين السبب فى العنوان دة : بناء فيلا فى مصر

أرجو تغييره ( بجد و الله ) إلى ما هى تكلفة بناء عشة فى مصر !!

[الحاج فوزى]

يا عم س س

كفايه عليا جمايل منك لحد كده

والله خلاص رجعت فى كلامى ، لا بناء ولا دياوله

والله يـ**ـق احمد عز واللى وراه واللى قدامه واللى جانبه كمان

حسين

[بنت الشاطئ1]

انا مستغربة من الاسعار اللى دايما فى زيادة

انا ممكن حد يجاوبنى على سؤالى الأولانى

انا محتاجة اعرف الأسعار الان فى المناطق الاتية 6اكتوبر التجمع الخامس واسمع عن التجمع الأول هل هو بعيد عن الخامس و هل هو ارخص ولم اسعار العبور و الشروق ارخص

اريد قطعة لكن محتارة اختارها فين ونصحت بألا اشترى شقة لأن سعرها عالى جدا بالمقارنه لو اشتريت قطعة ارض وبنيتها مع اثنين من اقاربى مثلا وكدا نكون وفرنا وكمان تكون العمارة لثلاثة اشخاص فقط ونكون اخترنا الجيران كمان لكن ايه هو المكان اللى يسمح ببناء ثلاثة ادوار فقط احنا ممكن نشترى ارض فيلا او عمارات لكن اين لا ادرى حتى الان

[se_ Elsyed]

أنا هازعل منك يا بنت الشاطيء كده لإنك ما بتذاكريش كويس

أنا زورت التجمع الأول والتجمع الخامس قريب .. وشتان ما بين الإتنين

التجمع الاول بيبدأ من بعد أخر طريق الحي العاشر بمدينة نصر .. ولكن تمشي كل 5 كيلو على ما تلاقي فيلا أو مبنى عمران .

التجمع الخامس في أخر القاهرة الجديدة وبينهم تقريباً 10 دقايق بالعربية و فيه الحب كله والعمار كله والأسعار العالية أيضاً لإن مجمعات آرابيلا وجولف سيتي ومدارس الشويفات والككام جامعة الخاصة عملوا قلبن هناك ورفوا المنطقة على الأخر

6 أكتوبر علاقتي بها إني بأروح اشرب قرفة بالحليب عند أحمد محمود كل أجازة وما باتكلمش في السياسة ولا اسعار الأرض

العبور .. لعبتي وإسألي على أي حاجة فيها أنا تحت أمرك .. واحسن مناطق تأخدي فيها لبناء فيلا هي الحي السابع بجوار الجولف سيتي أو الحي اللسادس .. غير كده ما أنصحكيش وسعر المتر لا يقل عن 500 ج كاش ويزيد إذا كانت القطعة مميزة .. وانصحك بالتعامل مع اي مكتب عقارات محترم هناك لإن لوحدك ممكن تتوهي وماتعرفيش راسك من رجليكي .

الشروق لسه عليها شوية ومقارنة بالعبور .. العبور أفضل وأقرب من العمار

بالمناسبة المسافة بين العبور والشروق حوالي 20 ك وهي أقرب لطريق مصر السويس

بالمناسبة العبور غير مسموح فيها ببناء أكثر من دورين للفيلات ولو هاتبني الدور الثالث - متضمن الأرضي - بتدفعي 25 % من قيمة الأرض الفعلية المثبتة في أوراق التسجيل لجهاز المدينة .

في الشروق مجموعة من الإشخاص رجالة ووقفوا وقفة رجالة رفعوا قضية على جهاز المدينة وكسبوها ولغوا الغرامة دي .

لكن النصيحة النهائية لو ناوية تبني إنتي وتلاتة تانيين يبقى عليكي بأراضي العماير وبيسموها في العبور - الأحياء العائلية - ومسموح ليكي بأربعة أدوار وبرضوا سعر المتر مش هايقل عن 500 ج .. لكن لسه مناطق العماير أقل عماراً وحيوية مقارنة بالفيلات

ولازم ولابد تنزلي مصر وتتفرجي على الطبيعة مرة وإتنين وعشرة وتعملي مقارنات

بس تحددي اهدافك ولا تقارني بين شيئين بينهم 180 درجة .. يعني ما تشتتيش نفسك بين 6 أكتوبر والشروق والتجمع الخامس ..

فإنتي لازم تحدد إنتي عايزة إيه وإيه المنطقة القريبة من حياتك وشغلك وما إلى ذلك ...

أنا على سبيل المثال أنظر إلى 6 أكتوبر مثلاص كأنها في محافظة أخرى وأهلي وحياتي والمجتمع والناس بعيدين تماماً عنها وبالتالي لو روحت هناك يبقى ما حدش هايعبرني .. كما إن شغلي وحياتي العملية بعيدة جداص برضوا عنها ...

وكل سنة وإنتي طيبة

مافيش مبلغ بقى تحت الحسب مقابل الإستشارات البلوشي دي ؟

-------------------

نصيحة أخوية إستثمارية سين سينية للي معاه قرشين على قده وعايز يعمل سبوبة

في أراضي بناء جديدة بتتقسم وتتباع دلوقت في الشروق على طريق مصر الإسماعيلية بجوار " أكوا بارك " وخلف مدارس ممفيس للغات مباشرة وعلى إمتداد جميعة عرابي التي هي عبارة عن قصور وضيعات تخص كبار رجالات الدولة ومنهم أولاد مارينجوس

الأراضي دي تابعة للاهالي والجهاز مالوش دعوى بها ولا تنطبق عليها شروط البناء المُحدد بمدة زمنية معينة وإلا يسحبوا منك الأرض ...

وعشان العمران هناك لسه في الأول فالأسعار هنك رائعة ومغرية جداً

يعني المتر هناك بيبدأ من 100 ج دلوقت ...

تخيلوا إن من حوالي سنتين أو اقل كان بيدللوا على المتر هناك بعشرين جنية وبخمسة وعشرين جنيه ..

ولكن لإن العملية عرض وطلب فالناس هجمت هناك هجمة شرسة وكل واخد أخد له 500 متر واللي اخد ألف متر وبيسقعوا الأراضي دي اللي مستقبلها القريب هايبقى ممتاز جداً جداً وهاتجيب مكاسب كويسة

طبعاً أصحاب الأرض الأصليين شاريين بالفداداين ومقسمينها إلى قطع بناء زي مانت عايز مساحة وعاملين حساب الشوارع والحاجات دي ومحققين مكاسب خيالية لإن المتر واقف عليهم بكلام فارغ

وهناك جمعيتين للبناء عاملين شغل هناك حلو وهما " جميعة مصر الجديدة " وجمعية " الأمل " وبانيين فلل ومباني كثيرة بيبيعوها وعندهم برضوا أراضي بناء للبيع ..

يالله عيشوا ولما تغتنوا إبقوا إفتكروا العبد الفقير لله أخوكو سين سين

[بنت الشاطئ1]

وبيسقعوا الأراضي دي اللي مستقبلها القريب هايبقى ممتاز جداً جداً وهاتجيب مكاسب كويسة

ماذا تقصد بالعبارة السابقة

اذا كنت اريد ان اشترى من تلك المناطق اللى المتر فيها بمية جنيه فكيف الطريقة

[بنت الشاطئ1]

يعنى كيف اتوصل لأصحابها

كيف ايضا اضمن اننا لن ينصب علينا يعنى ممكن يكونوا اصحابها بايعينها مرتين كما حدث مع ناس اقاربى وطبعا صاحبها اللى نصب سافر للخارج ولم يعد حتى الان

[الحاج فوزى]

خايف اسأل لحسن س س يسمعنى رد من ردوده الصاروخية

اسأل ورزقى على الله

فين يا عم الاراضى ده ؟ .. لو تعرف لها سكه قوول وكله بحسابه

يعنى شوفلنا حته كده عشرتلاف متر :lol: :lol: :)

حسين

[kokowawa1979]

فيه نقطة هامة يجب أن أذكرها - أعتقد أن هناك أراضي تتبع أيوب عدلي أيوب - اشتراها من الحكومة على أساس أنها أراضي زراعية ( خللوا بالكم من النقطة دي قوي ) وكل أوراقها هي أرض زراعية للاستصلاح - لكن أخينا أيوب عدلي أيوب نيته سوء من الأول ومش مستكفي باللي ربنا أعطاه له - يعمل إيه ؟؟؟؟ تفتق ذهنه لخطة رهيبه ( طبعا كان راسمها من الأول ) وهو أنه لاتوجد مياه جوفيه لزراعة هذه المنطقة !!! اللي أعتقد مشار إليها من قبل . ومن هنا طلب من الحكومة أن يتم تعديل استثمار الأرض من أرض زراعية إلى أرض بناء - طبعا نسيت اقول إنه كان واخد الفدان من الحكومة ب2000 جنيه قسط !!!! ولما الفدان يبقى مباني شوفوا يبقى بكام !!!!!

ماعلينا تقدم للحكومة بطلب للتعديل ولكن كانت المفاجأة هي القرار في يد رئيس الجمهورية فقط لتعديل الوضع وهنا كانت الاستغاثات في الصحف لإن السيد أيوب عدلي كان قد بدأ البيع لراغبي الشراء على أساس إنه ضلع متين في البلد زي أحمد عز كدة لكن حتى الآن لم تحل المشكلة - فخللوا بالكم واوعوا تتورطوا في مثل هذه المواضيع إلا بعد التأكد من أن الأراضي مسجلة بالشهر العقاري .

شفت ياعم سحس أنا خايف عليك إزاي - وأهو سي السيد زعيم الأهلوية كان عايز يورطك :lol:

[الحاج فوزى]

فينك يا س س

خليت الزملكاوية يتكلموا ويزرعوا بينا الاسافين

على العموم يا واو استنى س س لما يرد عليك وبعدين يكون لنا كلام تانى :lol:

حسين

[se_ Elsyed]

والله يا جماعة انا عرضت الموضوع بمنتهى الامانة والاخ كوكو اضاف تلك المعلومة الهامة والمناسبة الاراضي غير مسجلة بالشهر العقاري والبيع والشراء بيتم بعقود ابتدائية تُسجل بصحة توقيع ونفاذ بالمحكمة

لكن اللي اعرفه ومتأكد منه تماماً ان ناس كبيرة في الدولة - مش كبيرة في السن - شاريين في الارض دي

والمفاجأة بقى ان في الايام القليلة المقبلة سأقوم بالاتصال الشخصي بموظفين اعرفهم في جهاز مدينة الشروق للتأكد من سلامة موقف تلك الاراضي ولو ان الغريب بقى ان الراضي دي تابعة لإدارة مدينة السلام وبالفعل هناك حركة بناء بالمنطقة المذكورة لكن بالتأكيد اللي شغال في الجهاز هايبقى عنده معلومات هامة ومفيدة

واما عن الاخوة اللي بيسألوا عن موقعها فانا ذكرته بالتفصيل

واسف اذا كان هناك تعبير غير واضح

فتسقيع الارض معناه " ركنها فترة من الزمن لحد ما سعرها يزيد

[kokowawa1979]

خبر هايل ياسحس :

لقيت لك فيلا مكونة من بدروم- + طابق أول + طابق تاني على مساحة 900 متر - والمباني على 600 متر لكن صاحبها ماقالش المباني مشطبة أم لا لكن واضح إنها مش متشطبة - وكل ده ب750000 جنيه بس !

إيه رأيك بقى ياسحس -باتكلم جد

سي السيد كتب :

فتسقيع الارض معناه " ركنها فترة من الزمن لحد ما سعرها يزيد

شفتم بقى أهو الأراضي الحاجة الوحيد اللي أسعارها تتمدد بالبرودة وتنكمش بالحرارة :blink:

تم تعديل 28 فبراير 2007 بواسطة kokowawa1979

[kokowawa1979]

لا مؤاخذة ياسحس ياخويا الظاهر إن أنا عجزت وخرفت :huh:

الإعلان كالآتي :

فيلا - بدروم وأرضي وأول وتاني900 متر2 -مطلوب 720000 جنيه

ت 010-6121780 أو 4128014

المكان : التجمع الخامس

ولو مامعكش فلوس زعيم الأهلوية سي السيد جيبه عمران ويقدر يسلفك وتسددهم له على 50 سنه - والله الراجل ده طول عمره شهم :sad:

[الحاج فوزى]

يا عم كوكو الله يهديك .. 700 الف ايه ، قرش ولا سحتوت

يا عم روح نام بقا وخليك فى الزمالك بتاعك :huh:

بس يا كوكو ، انا هقولك على الصراحة ، لو عندك فيلا حلوه كده ومحندقه وتخلص على .. قول عشره حداشر يعنى قول لو حلوه قوى خمستاشر الف ، شغال علطووووول :sad:

على فكرة كلام جد ، الاعلان ده مش مظبوط ، لان كده سعر المتر واقف 800 ، وده اصلاً اقل من سعر متر فى المنطقة ، فما بالك بالمبانى والتشطيبات

حسين

تم تعديل 28 فبراير 2007 بواسطة Huss.

[kokowawa1979]

مش عارف ياعم سحس انت هاتخسر إيه من اتصال ببريزة :huh:

يمكن الراجل كان شاري في الرخص - أو يمكن بعد ماخلص مباني المودام ماعجبهاش الوضع فحلفت عليه يخلص منها لإن قدم الفيلا ( واخد بالك ) كان قدم نحس على المودام ( حلوة المودام دي ) أصل أخوك فلالالالالالالالالالالالالالالالالالالالالاح أصييييييييييييييييييييل

[بنت الشاطئ1]

استاذ حسين تقصد ايه بان الاعلان غير صحيح

بتقول ان سعر المتر 800

يعنى اقل من السعر الحالى

معنى كدا ان السعر ده رخيص

طيب ايه سعر ا لفلل الأن لو رخيصة فعلا هذه الفيلا ممكن نفكر لكن هل ممكن بالتقسيط بالنسبة يعنى للاعلان المذكور