ما هي تكلفة بناء فيلا في مصر ؟

[se_ Elsyed]

عزيزى الباشا المصرى ..

والله انت كمان يا شيخ الله يباركلك ..

انا كنتت خايف اسأل على موضوع البدروم ده .. خوفاً من تعليقات المخضرم س السيد اللازعة والساخرة ..

لكنى لم افهم ما المقصود بنصف داخل المبنى ونصف خارجه ! يا ريت توضوح يا س س وبدون تريقة

ما تدينى الأمان يا عم س س علشان اعرف اتكلم فى الموضوع ده براحتى :)

يا فتاح يا عليم يا رزاق يا كريم

هات يابني جردل ميه رشوا قدام المحل ..

وعندك واحد زبون تاني من بتوع التفعيص :)

--------

أنا إذا كنت بأنتقدكم يا حسين بتعليقاتي اللازعه فده لمصلحتكم لإنكم زي أولادي ..

بص يا حاج .. إفرض مثلاً مثلاً يعني عندك مُسطح مبني على مساحة 300 متر .. فتخيل منظر البدروم بيبقى شكله عامل زي الجراج كده ، فبتلاقي يادوب حيطتين تلاتة بس داخل المُسطح عشان تستفيد بأكبر قدر من المساحة وإن شالله تعمل فيها ملعب كوره ... حلو كده ؟

طب أنا راجل غاوي بلبطه وعايز اعمل حمام سباحة وليكن مثلاً 10*20 متر

لكن إنت عارف لو بنيته تحت المسطح ده يبقى صيف شتا الميه هاتبقى برده والواحد هايتكتك ويبقى حمام مساحة مُغطى وزيه زي البانيو ..

يبقى الناس اللي غاويه ومعاها فلوس كتير زيك كده وزي الباشا :lol: بتيجي بانيه نصه تحت المسطح ونصه التاني بره المسطح في المساحة اللي إنت سايبها حوالين المباني .. غصبٍ عن الواحد لإن ده من شروط البنا .. يعني مستحيل تلاقي مبنى لازق في السور مثلاً فهناك مساحة كحد ادنى لازم تسيبها وإلا مش هاتاخد الرخصة النهائية للمباني ..نقول مثلاً 3 متر .. في حين إنك ممكن تسيب أكثر من كده زي مانت عايز

ففي النهاية المنظر بيبقى عندك منظر جنان ..

خُضره وزرع حوالين البدروم ... وحمام سباحه نصه داخل المبنى عشان الستر والستات وكده .. ونصه التاني الشمس طله عليه عشان التهوية وتسخين الميه وحمام الشمس عشان بشرتك الحلوه تكتسي باللون البرونزي القاني

يبقى لحد دلوقت عندك خُضرا وميه .. والوجه الحسن بقى إتصرف إنت أنا مش هاحارب لوحدي ..

بالمناسبة حمام سباحة بالمساحة دي ممكن لحد ما يتشطب ويتحط فيها ميه عشان تاخدلك غطس يكلفك حوالي 80 باكو يا ريس ..

[مصري بالوراثة]

السلام عليكم ورحمة الله

والله ياجماعة جزاكم الله كل خير على المعلومات دي.

الأخ سي السيد .. بحكم إنك خبرة في العبور ألاقيش عندك خريطة بأحياء المدينة ؟ لأن موقع هيئة المجتمعات العمرانية بسلامته حاطط خريطة ماتنفعش يتبص فيها أصلاً!

وبالمرة بقى نكمل الرزالة عليك ! أنا عجباني قوي الجولف سيتي اللي في العبور دي .. متعرفش بكام المتر فيها ؟

ويجعله عامر

[se_ Elsyed]

الخريط غالباً ما تجدها عند المكاتب العقارية هناك ودول بيبقوا الوسطاء اللي بيساعدوك في الشراء او البيع .... لكن لو حصلت إنت على خريطة مش هاتفهم منها حاجه ولا هاتعرف إيه المساحات المبنية ولا الفاضية .. وكمان الرؤاي والمعاينة الفعلية تختلف تماماً عن الخرائط .. لكن لهم هما بقى الخرايط مهمه لإنهم بيقعدوا يعلموا ويكتبوا حاجات خاصة بشغلهم من حيث المساحات الخالية واللي أصحابها عرضنها للبيع ..

للعلم .. ما فيش مساحات في مناطق الفيلات معروضة للبيع من قِبل الجهاز .. كلها خلصت من سنين عددة واللي بيبيع دلوقت هما المُلاك لتلك الأراضي واللي مستحيل توصل لهم إلا عن طريق مكتب العقار اللي بيبقى معاه تفاصيل وتاريخ الأرض بالإضافاة إلى وسائل وتفاصيل الإتصال على ملك الأرض ...

أسعار الجولف سيتي أعتقد مالهاش دعوة بالمتر .. هي عبارة عن فلل متشطبة عالمفاتح وبتتباع على بعضها كده .. وأخر علمي كان من سنتين إن الفيلا ما بأبتقلش عن أرنب .. لكن عندهم تقسيط ... وزيارة لهم هناك هاتعرف كافة التفاصيل لإن برضوا السعر بيختلف من حيث موقع الفيلا داخل المدينة ... وزي ما ذكرت قبل كده .. هي فرع لمدينة الجولف الموجودة بالتجمع الخامس ... وبصراحة هي تُحفة معمارية ... ومش خسارة فيها الأرنب وإتوكل عالله يا راجل .. العيا مُر :)

وطبعاً لما تشتري منهم فيلا لك الحق في إستخدام ملاعب الجولف اللي موجوده بالداخل .. بس ما تنسناش في لفه بالعربية بتاعت الجولف دي اللي أموت واركبها ومش مهم ألعب جولف ولا أشوف الحُفر بتاعتها :lol:

شوف الحلاوه

شوف الجمال

بطه ياخواتي ماشيه تتمخطر عالنجيلة

ممكن كمان تعمل حركات أمريكاني بالعربية

عندي كمان حته كابورليه هاتعجبك قوي .. وشوف الغسيل المنشور ورا العربية ده .... بتاعنا خلي بالك

هـــا هاتشتري ولا بتفعص بس زي أصحابك الباشا وحسين ؟

[الحاج فوزى]

والدى العزيز :) س س ..

اولا انا مش بفعص :lol:

انا خلاص عديت المرحلة الأولى ( مرحلة التفعيص ) وانا الأن فى مرحلة استخراج الرخصة ومن ثم البناء

وطبعاً فى الإستفادة من اهل الخبرة خير كثير .

وخصوصاُ انى لم استقر على اسلوب البناء الفعلى .. يعنى مكتب ، ولا انزل اجازة طويلة شوية ابنى فيها ولا ادور على حد ثقة والمواضيع ده يعنى .

ومش عايز اقولك .. بطبع مراجع فى الهندسة علشان اعرف مراحل البناء والمميزات والعيوب وخلافه . بس على الرغم من ذلك .. الخبرة العملية بتشكل فارق كبير طبعاً .

لذا تجدنى دائماً ادور حول الموضوعات ذات الصلة ..

بص يا سيدى ..

القصة انها مش فيلا .. هى عمارة سكنية .. والتردد فى حلين

الاول : اعمل بدروم ويقسم ثلاث اجزاء ، الاول جراج ، والثانى والثالث فيلا دوبلكس مع الدور الارضى ، لفيلتين كل فيلا بمدخل مستقل

بمعنى يكون عندى فيلا على اليمين بمدخل خاص دوبلكس بدروم وارضى ، واخرى مماثلة على اليسار ومدخل للعمارة غير ،

الحل الثانى ان الغى فكرة البدوم تماماً لتوفير النفقات ، وانفذ نفس السيناريو السابق مع الفارق ان الدوبلكس يكون ارضى واول .

طبعاً الدوبلكس ارضى واول منتشر وسهل نوعاً فى التسويق ، لكن الذى نصحنى به الإستشارى هو دوبلكس البدروم وهو الأقتراح الذى تخوفت منه لعدم تخيلى له عملياً .

بماذا تنصحنى ( بدون غمز ولمز :) )

[مصري بالوراثة]

ايه رأيك ياسي السيد

حاولت أنا اللي أعمل الخريطة طالما البلد دي مفيهاش خرايط!

أرجو إذا كان فيه خطأ تقول عشان أعدله .

مع خالص تقديري

[se_ Elsyed]

إبننا الغالي سحس

أولاً : لفت نظري جُملة إنت كتبتها وإستفزتني بصراحة وهي

و

مش عايز اقولك .. بطبع مراجع فى الهندسة علشان اعرف مراحل البناء والمميزات والعيوب وخلافه

يا سلام .. يا سليم ... يا سلملم

على كده بقى لما يبقى عندي مغص كلوي .. أروح اجيب كتب طب من أيام أبُقراط لحد مجدي يعقوب عشان أذاكرها ؟

يا عزيزي لا داعي لهذا .. وإسمع نصيحة واحد اكبر منك ( على الأقل في عدد المداخلات )

1- إتفق مع مكتب إستشاري كويس يعمل لك الرسومات ويشرف على الشغل وأديني قلت لكم في مداخلة سابقة الرينج كام بتاع الإشراف .

2- المقاول لازم يكون محترم وبيعرف يقرأ خرايط رسم ويشتغل من خلالها ...

3- مافيش داعي تنزل إنت وتاخد اجازة طويلة علشان ما يبقاش عطلة من جميع الجهات .. وحاول تشوف حد ثقة يمسك لك الميزانية ويحاسب البشر دي

4 - الرسومات اللي إنت استقريت عليها حاول ما حدش يفعص فيها ولا يعدل من غير ما يقولك بالتفاصيل هو هايعمل إيه .. وإلا هاتلاقي المبنى بتاعك عنده عاهة مستديمة مالهاش أي حل .

5- موضوع البدروم .. يتوقف على ميزانيتك ولو إني شخصياً شايف إنه مالوش لازم .. وإذا كان عالعربية فإنت لازم تسيب 40 % من مساحة أرضك وتبني على 60 .. إبقى إركنها في الأربعين يا سيدي .. لإ البدروم يعني تكاليف دور بالتمام والكمال إن ماكنش أكثر لإن كل حوائطه الخارجية بتبقى خرسانة مُسلحة صافي مافيهاش ولا طوبة .. وإدفع يا ريس .

الخلاصة : فكرة الدوبلكس دي حلوه وشكلك كده معاك شركاء فهاتبقى مناسبة عشان كل واحد يبقى مع نفسه .

------------

عزيزي مصري بالوراثة

الخريطة صحيحة من حيث ترتيب الأحياء زي ما قلت في مداخلة سابقة .. لكن مش مبينه أي تفاصيل داخلية ..

إنت عايز تعرف إي بس وأنا أفيدك بلا خريطة بلا حساب مثلثات

[kokowawa1979]

هو انت لسة مخلصتش الفيلا ياسحس ؟؟؟؟

[الباشا المصري]

ماشاء الله على الردود الموضوع سخن يا جدعان ماشاء الله

طبعا انا اشكر الاخ سي السيد والاخ حسين وجميع من افاد الموضوع او حتى استفاد منه

الصراحة يعني لو حسبتها تكلفة الفيلا تكون

ارض في العبور مثلا

600 م * 500 ج م = 300 الف جنية

المباني بدروم وارضي ودورين ورف تكون 400 الف جنيه دا متوسط الاسعار اللي جمعتها من اكثر من واحد في ناس قالوا نصف ارنب وناس قالوا 350 الف يعني نقول المتوسط كدا

يبقى الاجمالي 700 الف بدون تشطيب على العظم زي ما بيقولوا والتشطيب حسب كل واحد وبراحتك بس المهم المبنى يتعمل

طب في سؤال يا عم سين سين بالنسبة للبدروم

اقدر اخلي البدروم دا الريسبشن بتاع الفيلا والصالون و السفرة مثلا والدور الارضي غرف النوم وسلم داخلي بينهم ....

والدور الاول والثاني والروف يكونوا خمس شقق كل دور شقتين والروف ؟؟؟

السؤال الثاني انا خايف يتنصب عليا في تحويشة العمر الصراحة انا الاجازة اللي فاتت نزلت التجمع الخامس وفي اخر لحظة خفت اشتري وخايف يحصل كدا السنة دي خاصة ان البيع بيكون بتوكيلات مش في الجهاز ... يبقى السؤال ازاي امشي في المضمون علشان ما يتنصبش عليااااااااا ... ايه اللي اعمله اخد بالي من ايه :) لحسان دي تحويشة عمري مع ورث مع حاجات كثيرررررررررر يعني لو ضاعت ضعت انا

[الحاج فوزى]

انا عمال اقول يا رب الموضوع يعدى بسرعة قبل ما كوكو واوا ياخد باله من الموضوع :)

شرفتنا يا جدو :lol:

عزيزى س السيد

بخصوص موضوع البدرم .. المهندس فى المكتب الإستشارى كان بيقول ان لو مش هعمل بدروم .. لازم اخصص مساحة 10 م لكل شقة كجراج .. وذلك بالدور الأرضى . والا الجهاز سيمتنع عن اصدار رخصة البناء

بمعنى انه لا بد من وجود جراج ، سواء كان بالبدروم او بالأرضى .

هذه نقطة .

النقطة الاخرى التى اود الإستفسار عنها .. السماح بالتعلية ..

قرأت من فترة ان الوزير قد سمح بالتعلية فى المدن الجديدة .. وبالفعل فى اخر زيارة لمصر ( من حوالى شهر ) شاهدت فى التجمع الخامس عمارات بدروم و ارضى + اربع ادوار

فما معلوماتك عن هذا الموضوع .. وما الإجراءات او المطلوب فعله حتى استطيع اضافة ادوار اخرى فوق الارضى وثلاثة ؟

وهل الموضوع يعتمد على مكان الارض او العمارة مثلاً ؟!

اه بمناسبة القراءة .. :) انا مش بعمل كده علشان اعمل المعمارى او الإنشائى بنفسى .. انا بس بعمل محو امية عن موضوع نا داخل فيه ليس الا .

[الباشا المصري]

اه نسيت اقول مثلا اعلان زي دا ايه رايك فيه

-----------------------------------------------------------------------------------------------------------------

ارض 854متر بالعبور الحي الرابع تطل حديقه ومسجد وتطل علي قصور عرابي عليها اقساط اول قسط 2009 المطلوب 180 الف جنيه بالمدفوع

-----------------------------------------------------------------------------------------------------------------

ما اقصدش المكان لان المكان لازم اشوفه على الواقع والحقيقة واشوف مميزاتة من حيث الشوارع والحدائق والبحري والقبلي كدا لكن اقصد من حيث طريقة الشراء دي اراضي القرعة بتاعة السنة اللي فاتت بس المشكلة مفيش تغيير ف الجهاز بعد ما ابني مممكن يقولي باي وشكرا على البناء وجزاك الله خير يالا يا ولاد اتفضلوا عمو الباشا بيقدم لنا المبني دا هدية اروح انا ميت على باب الفيلا واسيب ابني لابويا يربيه هههههههههههههه يا ريت تفيدونا اللي عنده فكرة عن الانون (القانون) المضمون في جمهورية مبارك المصرية

باي

:)

[مصري بالوراثة]

السلام عليكم ورحمة الله

كنت عايز اعرف .. في العبور ، كيف يقيم الحي وبالتالي سعر الأرض فيه ، وماهو ترتيب الأحياء من حيث الأفضلية(لأن هناك فروقات في سعر الأرض بين الأحياء) .

وماهي ميزة الأرض التي تطل على مزارع عرابي؟ (كما يكتب في الإعلانات)

وجزاكم الله خيراً

:rolleyes:

[se_ Elsyed]

هاطلب منكم طلب بس يا جماعة علشان الواحد يلاقي عنده وقت عشان يرد : ياريت بلاش الأسئلة المُكررة إختصاراً للوقت .

--------------

بالنسبة لسؤال إبننا الباشا

اقدر اخلي البدروم دا الريسبشن بتاع الفيلا والصالون و السفرة مثلا والدور الارضي غرف النوم وسلم داخلي بينهم

براحتك .. التقسيم الداخلي ده شيء متروك لك ..

لكن فكرت في الليفنج روم هاتبقى فين ؟

يعني هاتاكلوا وتعيشوا فين خلال اليوم ؟

بتيهيألي القعاد في البدروم طول النهار والواحد يطلع الدور الأرضي عالنوم فقط .. شيء مش مُريح ... بالنسبة لي على الأقل .

---------------

السؤال الثاني انا خايف يتنصب عليا في تحويشة العمر

لا تخف يا حبيب العُمر clwn: :rolleyes:

يا باشبوش يا حبيبي البيع والشرا لازم يتم عن طريق الجهاز ... وإلا اللي إشترى هايندم أشد الندم ومش هايتبهدل في حاجات كتير بعد كده ... أما اللي باع فأهو إسمه أخد فلوسه وخلع .. بالمناسبة إنتو جايين في أيام الرُخص يا ولاد ... فعلى أيام جدو سين سين كان الجهاز بياخد نسبة من قيمة الأرض تقطم الوسط مقابل التنازل بين البائع والمشتري وكان بياخدها من المشتري طبعاً .. أما من حوالي سنتين كده بقى التحويل مجاناً او بشيء رمزي فما بقاش في حجه إنك تشتري بتوكيل لخطورة الامر ... وتزامن هذا أيضاً مع تخفيض رسوم تسجيل العقارات بالشهر العقاري للحاجات الفردية .

فقولي بالله عليك إيه مجال النصب هنا إذا كنت ما بتدفعش الفلوس إلا في الجهاز وعلى رؤوس الأشهاد ؟

---------------------

وهذ السؤال وصلنا من إبننا سحس القاطن بدير النحاس .. بيقول فيه :

عزيزي بابا سين :

بخصوص موضوع البدرم .. المهندس فى المكتب الإستشارى كان بيقول ان لو مش هعمل بدروم .. لازم اخصص مساحة 10 م لكل شقة كجراج .. وذلك بالدور الأرضى . والا الجهاز سيمتنع عن اصدار رخصة البناء

صراحةً لا أعلم شيء عن هذا لإني تخصصي فلل بس .. ولكن إزاي إنت بتقول إنك أشتريت الأرض وما تعرفش شروط البنا إيه ؟ لازم تسأل يا سحسح وتعرف راسك من رجليك

-------

قرأت من فترة ان الوزير قد سمح بالتعلية فى المدن الجديدة

موضوع التعلية ونظام البناء يختلف من مكان لأخر

بمعني : أنا بأزور أخي وصديقي أحمد محمود في 6 أكتوبر دوماً .. ولاحظت هناك إنهم مختلفين عننا تماماً .. والأمور تكاد تكون شبه " بزرميط " يعني الفلل على العماير على المحلات ... وكله على كله ... وكذلك في الشروق .. تخيل ؟

العبور لأ .... أحياء خاصة بالفيلات فقط ولا يُسمح ببناء عماير أبداً .. لكن ممكن جوه مساحات الفيلا المخصصة للبناء تعمل شكل عمارة إنت حر ... طالما جوا السور بتاعك إن شالله تعملها ملعب كوره ... وغير مسموح بعمل مشاريع تجارية ولا مكاتب حتى .. وهناك مناطق مخصصة في أحياء الفلل تُسمى " منطقة خدمات " مستشفيات بقى ومولات وملاهي ومساجد ... إلخ

كذلك في العماير .. هاتلاقيها عماير فقط .. لكن بعضها مسموح له يعمل أنشطة تجارية ..

ده نظام البُنا على السريع كده ..

التعلية بقى : برضوا 6 أكتوبر غير الشروق غير العبور ..

وهاتكلم هنا عن الشرق : في عيال مصريين بحق وحقيق رفعوا قضية على جهاز المدينة وكسبوها ودي كانت خاصة بشرط قد وضعه جهاز الشروق والعبور معاً وكان بيقول : إن الفلل على سبيل المثال مسموح فيها بدور أرضي واول وروف فقط .. وفي حالة تعلية دور اخر يتم تحصيل 25 % من قيمة الأرض الأساسية كما في أوراق أول بيع لها كغرامة تعلية ...

وعلوا في الشروق وما دفعوش ولا مليم وكسبوا القضية ..

أما في العبور فلسه الوضع قائم على ما هو عليه ... وأقصى حاجه هي دور أرض وأول او ثاني في حالة دفع الغرامة ... البدروم تعليته بتبقى لتحت فما فيش مشاكل عليه

ده للفلل

العماير في العبور مسموح لهم بالتعلية حتى أربعة ادوار منها الأرضي .. موضوع الجراج لم أسمع عنه ولم أراه هناك يا سحس ... مش عارف إنت أرضك فين ومين اللي قالك كده ؟

أما قرار التعلية فلا يتم أخذه عشوائي ولا تنفيذه .. يعني أنا مثلاً يعني باني عمارة 4 ادوار خلاص ومتشطبين .. وجه قرار يسمح بالتعلية ... ما ينفعش أعلي إلا لو كانت أساساتي تستحمل كده .... ومش بس كده فقط .. لأ ده لازم رسومات الأساسات يكون متوافق عليها من الجهاز في البداية ..

----------------

إبننا الباشا رجع سأل تاني

اه نسيت اقول مثلا اعلان زي دا ايه رايك فيه

-----------------------------------------------------------------------------------------------------------------

ارض 854متر بالعبور الحي الرابع تطل حديقه ومسجد وتطل علي قصور عرابي عليها اقساط اول قسط 2009 المطلوب 180 الف جنيه بالمدفوع

إعلان زي ده ولا يدخل زمتي بتعريفه .. غير أما أشوف الأرض وأعرف المدفوع كام والباقي كام وبالتالي أحسب متوسط سعر المتر كام ..

بالمناسبة الإجابة دي إتنين في واحد .. على سؤال الباشا والاخ مصري بالرواثة ..

كون أرضك تطل على مزارع عرابي فيها ميزة وعيب :

- الميزة : إن قدامك مساحات هووووووووووو وما فيش حد كاشف فيلتك .. وكل الفلل المُطلة على عرابي بيبقى مسموح لها امام الفيلا بمساحة لا تقل عن 10 متر طول بعرض الفيلا كلها ... فري مجاناً الواحد يعمل فيها جنينة بنت لذينه .. بلوشي ... فبالتالي ممكن توفر مساحة الجنينة في داخل المبنى وتعملها مباني صافي .. والجنينة اديك اخدتها ببلاش .

- العيب : محدوفة حدفه سودا وبعيد عن الطريق العام .... وهووووووووووووو ... وعلى رأي زوجتي لما قالت لي : ده أنا اخاف أقعد دقيقة في مكان زي ده وذئب ولا أسد ممكن يطلع لنا من الغابة دي :angry: ( وكإننا هانسكن في احراش كينيا ... وعيش سفاري يا عم الحاج ) .. لإن مزارع عرابي قدامها ما يشبه غابات من الأشجار وإنت بتطل عليها ... وبجد الجو موحش ... ممكن ناس تانية بتحب الهدؤ القاتل ده ... دي وجهات نظر .

بالمناسبة أسعار الأراضي هناك رخيصة وأتعرض عليه حاجات بـ 200 ج المتر وكانت كويسة فعلاً .. لكن زي ما قلت لكم بعيده .

ترتيب الاحياء من حيث الأفضلية قلته كذا مره يا عم مصري " الحي السابع .. ثم السادس ... الخامس والرابع والثالث والثاني لسه مش عمار وأسعارهم أقل "

تحياتي ،،،

[الحاج فوزى]

بتحرجنا بذوقك واخلاقك والله يا س السيد .

طالما انت فى الفلل وبس .. نروح نبيع ارض العمارة ونشترى ارض فيلا :rolleyes:

الارض فى الشروق على مساحة 1024 عمارات .. البناء على 50 % بدروم وارضى ، ثم 60 % اول ، ثانى ، ثالث.

بخصوص شروط البناء .. هو مكتوب كده بالضبط فى كراسة الشروط .. البناء 50 % بدروم وارضى و 60 % اول وثانى وثالث .

وتعتبر قطعة مميزة . لانها على 3 نواصى وعلى تبة عالية يعنى الارضى بتاعها فى ارتفاع التالت او الثانى للعمائر فى اسفل التبة .

بس انت ليه بتقول ان المواضيع فى الشروق ملغبطة ؟! بالعكس انا لما بروح هناك بشوف الدنيا منظمة .. والعمائر عمائر والفلل فلل

ومتقسمة طبقاً لتقسيمة الجهاز . ممكن تلاقى زى ما انت قلت .. جوا الفيلا شكل عمارة .. لكن فيلا .

على العموم يا عزيزى س س .. لك كل الشكر على المساعدة ( وش واحد بيشكر بجد )

[الباشا المصري]

يا عيني على سي السيد وابدعاته في مجال الفلل سلام مربع لسي السيد ونتمنى له الخير والاخ حسين نتمنى لك التوفيق

برجاء عدم تكرار الاسئلة في الحوار علشان يكون مجدي ما نلف وندور حول نفس النقطة .

سي السيد الغالي كالعادة عندي اسئلة

1- في اراضي بتتباع بتوكيلات بتاعة القرعة دي مضمونة ولا مش مضمونة المشكلة لو الاب عمل لي توكيل ومات اتلغى التوكيل وراحت الارض للورثة ايه رايك في الحوار دا

2- بيقولوا الشروق لها مستقبل حلو اوي خاصة بعد مديني دا كلام صحيح ولا لسا العبور كاسحة

3- في اعلانات عن اراضي امام مدينة الشروق بستين جنيه المتر ومدينة الامل رخيصة اوي ليه اذا حد عنده معلومات مرسي

وتمنياتي لكم اجمعين ولكل شعب مصر ان الله يعيد له مجده وعزته وكبرياءه.

[MOOOM]

السلام عليكم ورحمة الله وبركاته

وكل مناسبة والجميع بألف خير بمناسبة عيد العمال

بصراحة أنا مشارك جديد هنا .. بس عجبني أوي أسئلة الأعضاء وكذلك الردود الكاريكاتيرية لبعضها

لدرجة أنه حصلت لي مشكلة اليوم في العمل بسببها .. وذلك لأنني كنت أقرأ بعض الردود وصراحة مضحكة جدا وخاصة إلي بيروح يفعص ومش بيشتري حاجة .. ودخل عليا المدير في الشغل وأنا بضحك من غير سبب طبعاً .

المهم .. ياريت لو أحد الأفاضل وخاصة العارفين بمدينة العبور والشروق .. يفيدنا عن سعر الشقق من الأهالي وليست بتاعة الجهاز .. لو كانت المساحة من 90 إلى 100م صافي وعلى المحارة .. ممكن تساوي كام وكذلك مثيلاتها في الشروق

ولي سؤال تاني لو سمحتو .. هل الإعلانات عن أسعار الأراضي إلي بتكون على إعلانات العقارات في موقع مصراوي أو على موقع جريدة الأهرام بتكون سليمة ولا مبالغ فيها

وإزاي تكون فيه أراضي بالمدن الجديدة بتاعة القرعة إلي كانت من كام شهر بس ويكون مطلوب أوفر على سعرها مية ولا مية وخمسين ألف جنيه غير سعر الأرض ؟؟؟؟

ولكم جزيل الشكر

تم تعديل 1 مايو 2007 بواسطة MOOOM

[الباشا المصري]

خير الهم اجعله خير :angry:

سلامات يا سي السيد شكلك مشغول اليوم على العموم بس حبيت اطمن عليك

باي

[se_ Elsyed]

أسف للتأخير .. كنت معفوق شويه في الشغل

في اراضي بتتباع بتوكيلات بتاعة القرعة دي مضمونة ولا مش مضمونة المشكلة لو الاب عمل لي توكيل ومات اتلغى التوكيل وراحت الارض للورثة ايه رايك في الحوار دا

مانت ممكن تبيع لنفسك والراجل عايش .. إيه المشكلة .. ليه تستنى لما يفيص وترجع تندم

المشكلة بقى هاتبقى في علاقتك بالجهات الحكومية

مثال : س س عنده فيلا في أحد المُدن الجديدة .. وجه باعها بتوكيل للباشا المصري عشان الباشا عايز يوفر وما يدفعش الدراهم المعدودة للجهاز نظير التنازل ... واحتراماً من الباشا لذكرى المرحوم سين سين راح رامي اليافطة اللي كان مكتوب عليها " فيلا سين سين وولده أبو سريع " وحط بدالها " فيلا الباشا المصري " وزيادة في تأكيد الملكية راح حاطط صورة طربوش جنب اليافطة ... .. تفتكر جهاز المدينة هايقتنع إن الأرض دي أصبحت مُسجلة بإسم الباشا أبو طربوش ؟

أبداً .. كل المراسلات بعد كده هاتفضل بإسم سين سين لإن الأرض مازالت مُسجلة بإسمه ولإن الجاهز عنده وفاء وأمل .. والباشا يقعد يصرخ ويغني أغنية الأرض لو عشطانه يا محمد يابو سويلم ويشارو لهم على اليافطه ويوريهم الطربوش .. وهما يقولوا له لا نعرفك ولا نعرف الطربوش .. إحنا نعرف المرحوم سين سين بس .. تعالى بالتوكيل اللي معاك - من غير طربوش - وإعمل نقل ملكية في الجهاز .. وإحنا نعترف بك وبالطربوش كمان ...

فهمت حاجه ؟

-----------

بيقولوا الشروق لها مستقبل حلو اوي خاصة بعد مديني دا كلام صحيح ولا لسا العبور كاسحة

الشروق حلوه برضوا لكن الرجل تدب مطرح ما تحب وكلها أرض ربنا

في اعلانات عن اراضي امام مدينة الشروق بستين جنيه المتر ومدينة الامل رخيصة اوي ليه اذا حد عنده معلومات مرسي

رخيصة لإن معظمها لم يحصل بعد على تصريح بتحويلها لأراضي بناء ...

وحتى اللي مترخص منها فلسه صحراء جرداء لا زرع فيها ولا ماء

--------------

سعر الشقق من الأهالي وليست بتاعة الجهاز .. لو كانت المساحة من 90 إلى 100م صافي وعلى المحارة

سعر المتر بيبدأ من 800 ج وإنت طالع ومعظم هذه الشقق متركز في الحي الأول اللي عمران على الأخر وكله خدمات ومرافق

ومن اهم اعلام الحي الأول " الشيخ محمد حسان " عمارته في أول الحي الأول

وسيد طنطاوي بتاع الأزهر .. بس لسه ماسكنش فيها .. على فكرة عامل عمارة حلوه قوي وعارضها للبيع ... ممكن تروح وتشوفها

والحاج حليم كبير مشجعي الأهلي واللي بتلاقيه في المقصورة في كل مباراة .. ومسمي كل الشوارع حوالين بيته بإسم لاعبي الأهلي القدام زي صالح سليم مختار التتش وحسين حجازي ومش عارف مين وتحس إنك في الأستاد وله كذا عمره أجمد من بعض .

هل الإعلانات عن أسعار الأراضي إلي بتكون على إعلانات العقارات في موقع مصراوي أو على موقع جريدة الأهرام بتكون سليمة ولا مبالغ فيها

وإزاي تكون فيه أراضي بالمدن الجديدة بتاعة القرعة إلي كانت من كام شهر بس ويكون مطلوب أوفر على سعرها مية ولا مية وخمسين ألف جنيه غير سعر الأرض ؟؟؟؟

من ناحية سليمة .. فهي سليمة .. ولكن لازم تشوف بنفسك

أما أراضي القُرعة .. فدي لعبة كبيرة وموال تاني

[MOOOM]

ألف شكر سي السيد على اهتمامك وردك عليا

بس ياريت لو تديني نصيحة أو معلومات ولو بسيطة عن متوسط سعر المتر للأراضي في مدينة العبور في الحي الأول والثاني .. وهل فيه نظام المشاركة في الأرض والبناء .. يعني لو فيه واحد عنده أرض وعايز حد يشاركة في البناء .. فما هي النسبة العادلة بينهم .. يعني نسبة كام لكام وذلك طبعاً في حالة بناء أرضي وثلاث أدوار وروف

ولك جزيل الشكر وأسف على التعب والإطالة

تم تعديل 7 مايو 2007 بواسطة MOOOM

[الباشا المصري]

الاخ سي السيد اشكرك على الرد ويارب الشغل يخف عليك شويا

انا كنت اقصد ان في ناس اشترت ارض من الجهاز في اقرعة الاخيرة ونظامها

سماح ثلاث سنوات فات منهم سنة الوقتي والاقساط سبعة اولهم بعد ثلاث سنين ولا سنيتين

الناس دي بتطلب اوفر مائة وخمسين الف مثلا او اي مبلغ

طب هل الناس دي بتتنازل في الجهاز اناسئلت قالوا نو الجهاز نو بس بتوكيلات

سؤال على هذه الاراضي بالذابت اللي السداد على سبع سنين بالتقسيط

هل في تنازل في الجهاززززز ولا لأ

وجزاك الله خير

[se_ Elsyed]

متوسط سعر المتر للأراضي في مدينة العبور في الحي الأول والثاني .

الحي الأول والثاني .. عماير فقط .. وبصراحة لا أعرف سعر المتر فيه .

أما عن نظام المشاركة فيستحسن تكونو معارف .. قليل قوي اللي بيقولل أنا عندي حته أرض وعايز اي حد ييجي يشاركني في البنا من الباب للطاق ...

بتتنازل في الجهاز اناسئلت قالوا نو الجهاز نو بس بتوكيلات

سؤال على هذه الاراضي بالذابت اللي السداد على سبع سنين بالتقسيط

هل في تنازل في الجهاززززز ولا لأ

إزاي يتنازل عن حاجه لا يملكها أساساً ؟

التنازل اللي في الجهاز بيتم بعد الإنتهاء من التسديد يا باشا وأثناء تلك الفترة بتعيش إنت بالتوكيل وبتمشي الأمور ..ز