ما هي تكلفة بناء فيلا في مصر ؟

[بنت الشاطئ1]

انا لسه من شوية كنت بتكلم فى التليفون مع مكتب عقارات جبت رقمه من موقع مصراوى

سألتهم على المتر بكام فى العبور

ولما قالولى اتصدمت

قلتلهم هى مش العبور ارخص من كدا

قالولى هى فعلا كانت ارخص

والناس عرفت انها ارخص من التجمع فالطلب زاد فالسعر غلى

[se_ Elsyed]

انا لسه من شوية كنت بتكلم فى التليفون مع مكتب عقارات جبت رقمه من موقع مصراوى

سألتهم على المتر بكام فى العبور

ولما قالولى اتصدمت

قلتلهم هى مش العبور ارخص من كدا

قالولى هى فعلا كانت ارخص

والناس عرفت انها ارخص من التجمع فالطلب زاد فالسعر غلى

كام يعني يا بنت الشاطيء ما أنا لازم أعرف السعر ؟

أنا قرات مداخلتك دي ... سبحان الله بعد ما كتبت الموضوع التالي

العرب قادمون

من الأخر كده يا بنت الشاطيء

شوفي يا بنت الناس

في مثل بيقول " القرش صياد "

القرش يعني الفلوس مش سمك القرش

إنتي تنزلي أجازة بإذن الله .. ومعاكي القرشينات .. وتحددي المنطقة اللي إنتي عايزه تسكني فيها ... وبإذن الله لو فلوسك جاهزة .. لازم هاتلاقي فرص ممتازة ...والبلد فيها كل حاجه .. شقق نصف تشطيب وفيلات نصف تشتطيب ومن غير تشطيب خالص ومتطشبة و و و بس اللي يدور

نسيت أكلمك صحيح عن موقع شقق فاخرة في مدينة نصر

وهي مجموعة عماير كثيرة جداً وجديدة وتقع خلف مدارس المنهل في شارع مصطفى النحاس .... روحي إتفرجي وهاتلاقي مساحات وتصميمات جميلة ولها طابع خاص .... من سنتين المتر كان بـ 1200 ج تقريباً وفيه تسهيلات كمان ... دلوقت بالتأكيد زاد بعد إرتفاع مواد البناء

وفي كمان شركة إسمها الواحه عاملة مشاريع سكنية قرب الحي العاشر وتحديداً قرب سوق السيارات .. أسعارهم مش بطالة برضوا

ده ملخص لأسعارهم إن شاء الله يفيدك ويفيد أي حد عايز يشتري بالتقسيط

شقة مساحة 179م ... اجمالي 219000 ج ... دفعة حجز 5 % 11000 ... دفعة حجز 35 % 76800 ... دفعة إستلام 15 % 32800 ... 36 قسط شهري 1400 ج ... ست أقساط نصف سنوية من تاريخ التعاقد 8000 ج

دي أسعار جايبها من أحد الأصدقاء الي إشترى عندهم لأن لهم وكلاء هنا وأخو صديقي ده راح إتعاقد له هناك وشاف الموقع .

[MABELGABRY]

السلام عليكم ورحمة الله

هذا موقع الوسيط .. رجاء الضغط هنـــا

وهنــــــا إعلانات مصراوي العقارية

ومن هنا ممكن تنزل النسخة الالكترونية الكاملة لوسيط القاهرة - بس هو بيتأخر يومين عن موعد نزول النسخة الورقية

الضغط هنـــا

أنا مع الأخ الفاضل سي السيد في سرعة الشراء (طبعا بعد الدراسة الجيدة) --لان اسعار العقارات في مصر بتزيد كل اسبوع خلال السنتين اللي فاتوا دول --- المنطقة التاسعة اللي خلف مدارس المنهل سعر المتر فيها دلوقتي 1600 - 2000 على المحارة مع تسهيلات سنتين بحد اقصى --

[بنت الشاطئ1]

انا لسه من شوية كنت بتكلم فى التليفون مع مكتب عقارات جبت رقمه من موقع مصراوى

سألتهم على المتر بكام فى العبور

ولما قالولى اتصدمت

قلتلهم هى مش العبور ارخص من كدا

قالولى هى فعلا كانت ارخص

والناس عرفت انها ارخص من التجمع فالطلب زاد فالسعر غلى

كام يعني يا بنت الشاطيء ما أنا لازم أعرف السعر ؟

هقول لحضرتك كام السعر طبعا

قالولى ان ال500 متر هتكلف 250 الف جنيه

ايه رأى حضرتك

لى سؤال

هو لازم علشان اشترى اى عقار فى مدينة العبور لازم التعامل مع السماسرة

[MABELGABRY]

انا عندي قطعة أرض فيلات في العبور - اشتريتها من فترة المهم تاريخ استلام الارض كان 20/9/2006 يعني لازم التراخيص تخلص قبل 20/6/2007 -- انا باتعاقد دلوقتي مع مكتب لعمل التصميم والتراخيص وفيه تنوعات كتيرة في الاسعار (كعادة مصر في كل حاجة بتعملها) -- المكتب اللي انا مرتاح له طلب 5000 لعمل التصميمات واستخراج التراخيص - اعتقد فيه كمان رسوم عند الجهاز (حوالي خمسة كمان) -- يا تري ايه رأي الخبراء هنا في السعر ده؟

فيه كمان موضوع عمل جسة للأرض - ده هيكلف الف جنيه لو عملته -- يا ترى ده ضروري المهندس بيقول انه ممكن يفيد في تخفيض تكلفة المسلح بس ايه رايكم في السعر؟

[بنت الشاطئ1]

بالمناسبة كلمة جسة بكسر الجيم ام فتحها

[MABELGABRY]

جسة بفتح الجيم وده موقع فيه معلومات اكتر

http://www.homekw.com/bet/archive/index.php/t-117.html

[hooba]

عمنا سييين ....عايز رأيك المحترم في قطعه ارض كسبتها في القرعة اللي فاتت دي و هيه في 6 اكتوبر في منطقة بيسموها التوسعات الشماليه هيه ارض عمارات مساحتها 450 متر.

و لما سألت عليها بيقولوا في منطقة الحزام الاخضر مش عارف رأيك ايه في المنطقة دي و في 6 اكتوبر عمتاً .....مع العلم اني هاستلم لسه بعد سنتين او تلاته لأن مفيش مرافق لسه ..

دلوقتي انا محتار و مش عارف ابيعها و لا اسيبها و تعتبر منطقة كويسه للسكن في المستقبل ولا لأ .....

الله يعينك علينا .... و جزاك الله عنا كل خير ... tth:

[se_ Elsyed]

بسم الله الرحمن الرحيم

نجاوب على أسئلة أبناءنا في الخارج

- قالولى ان ال500 متر هتكلف 250 الف جنيه

خطيتيني يا بنت الشاطيء أنا قلت المتر وصل 1000 ج ولا حاجه خلال الشهرين الي سبت فيهم مصر

السعر معقول وشويتين كمان ... بس عايز أعرف الأرض في انهي حي لإني زي ما قلت لك ... السعر العالي ده لحاجة كويسه جداً في السابع او السادس.

وساعة الشرا الكلام ممكن يختلف والسعر ينزل لو فلوسك حاضره على الترابيزة ....

ومرة تاني

500 ج ده سعر يندفع في قطعة أرض مميزة وموقعها كويس وممكن تلاقي حاجات أقل لو ما بتفرقش معاكي إن الأرض لازم تبقى على ناصية ولازم تبقى بحري ولازم تبقى قريبة من الطريق العام وما إلى ذلك من مميزات بترفع سعر الأرض ..

على فكرة .. لو ميزانيتك 500 ألف إلى مليون ممكن تلاقي حاجة جاهزة واقفه على التشطيب وولا بُنا ولا وجع دماغ ...

هو لازم علشان اشترى اى عقار فى مدينة العبور لازم التعامل مع السماسرة

حضرتك العبور والتجمع و6 أكتوبر مش مناطق شعبية هالاقي صاحب العقار ساكن فيها او معلق ورقة فيها التفاصيل وأدخل أسلم عليه وأشيل البيعه ...

وبعدين السمسار بيبقى عنده تنوع كبير جداً في العقارات أو الأراضي المعروضة للبيع .. وبأللفه معايا لحد ما يقول حقي برقبتي ومجاناً كمان ... وفي الأخر لو تم البيع بتبقى عمولة السمسرة المتعارف عليها اللي لازم تدفعيها سيادتك هي 2.5 % من قيمة الأرض ...

المكتب اللي انا مرتاح له طلب 5000 لعمل التصميمات واستخراج التراخيص

ممتاز .. اتوكل عالله

فيه كمان موضوع عمل جسة للأرض - ده هيكلف الف جنيه لو عملته -- يا ترى ده ضروري المهندس بيقول انه ممكن يفيد في تخفيض تكلفة المسلح بس ايه رايكم في السعر؟

الجسة حضرتك بالبلدي كده بتتعمل عشان نتعرف على نوعية التُربة على عمق معين ..

ليه ؟

الإجابة : عشان ما أبقاش مكلف طبخه ألوفات وأجي بقرش ملح أبوظ الدنيا ... يعني لو الأرض على عمق 10 متر كانت عبارة عن طَفله - بفتح الطاء - وجيت أنا بنيت زي الباشا كده بالطريقة المعتادة ... يبقى بعد فترة قصيرة هالاقي الأرض طقطقت ومش بعيد المباني تشرخ والمبنى ينهار لإنه يقف على أرض غير صلبة ..

وبالتالي في هذه الحالة وعشان الشغل يبقى على أساس علمي صحيح .. فالمهندس المُشرف الصح على الموضوع بيعمل حقن للأرض وإجراءات أخرى تجعل التُربة متماسكة تحت المبنى وبكده يبقى عالج موضوع الطفلة ده

وأكتر منطقة فيها طفلة في العبور هي الحي الخامس

الجسة بتتم بألة كده عامله زي البريمة بتاعت التنقيب عن البترول ... وهي فعلاص بريمه .. وبييجي الفنيين يختاروا على الأقل 3 أماكن متفرقة من القطعة ... ويحفروا في كل حته 10 متر .. وعلى بُعد كل متر بياخدوا عينة من التُربة .. والعينات بتتجمع وتتحل بطرق يعرفونها هم وبعدين يعطيك التقرير النهائي خلال يومين تلاتة ... خلال الفترة دي بقى إنت بتبقى زي اللي مستنى نتيجة الثانوية العامية ... لإن لا قدر الله باطن الأرض عندكلو ماطلعش مظبوط ... يبقى جهز نفسك لتكاليف أخرى أضافية لم تكن في الحُسبان ... ودي أقدار بقى ..

عايز أطمنك في موضوع الديد لاين اللي بيحدده الجهاز عشان تستخرج التراخيص ... فالموضوع ممكن يمتدد .. ما تخافش

وأزيدك من الشعر بيت ... فإستخراج الرخصة في حد ذاته ليس ضماناً لسحب الأرض .. لو الحكومة هاتغلس يعني ... بل لابد إنك تبني حاجه تبان من على وش الأرض ... يعني تعمل لهم دور دورين كده إن شالله هيكل خارج حتى عشان يسيبوك في حالك ...

تحياتي للجميع ،،،،

[se_ Elsyed]

عمنا سييين ....عايز رأيك المحترم في قطعه ارض كسبتها في القرعة اللي فاتت دي و هيه في 6 اكتوبر في منطقة بيسموها التوسعات الشماليه هيه ارض عمارات مساحتها 450 متر.

و لما سألت عليها بيقولوا في منطقة الحزام الاخضر مش عارف رأيك ايه في المنطقة دي و في 6 اكتوبر عمتاً .....مع العلم اني هاستلم لسه بعد سنتين او تلاته لأن مفيش مرافق لسه ..

دلوقتي انا محتار و مش عارف ابيعها و لا اسيبها و تعتبر منطقة كويسه للسكن في المستقبل ولا لأ .....

الله يعينك علينا .... و جزاك الله عنا كل خير ... tth:

والله يا ريس كان على عيني

6 أكتوبر بالنسبة لي عامله زي المسافية بين الصين وشبرا الخيمة كده

وما بأروحش هناك إلا لثلاث أسباب :

1- اخلي الواد عمر يلعب في دريم بارك طول اليوم لحد ما يتهد وينام من التعب .

2- أو يكون احمد محمود طابخين اكله نضيفة وعازمني هناك .. فبأجي على نفسي واخبط المشوار مع إنه بيبعت لي السواق رايح جاي .

3- او يكون في أمر مستعجل وفي إجتماع في الوكر بتاعنا وهو عبارة عن كوفي شوب نضيف بنجتمع فيه لمناقشة أمور الرعية ...

هما دول الأربع اسباب

بيع الأرض دي وتعالى أسكن في العبور وأنا أدلعك ... :P

[MABELGABRY]

شكرا جزيلا يا س س وجزاكم الله خيرا

[hooba]

يا جماعه حد يقولي رأيه في الموضوع ده .......

واحد عارض عليا اشاركه في مباني لقطعه في التجمع الخامس ...

و الوضع الحالي إنه مخلص مباني للبدروم و سقف البدروم و سقف الارضي ...هوه عايز من العمارة البدروم و الدور الارضي و الملحق و أنا آخد الاول و التاني ...

مع العلم ان الارض في الحي التالت في التجمع ...

تبقي حساباتها ازاي دي ؟ .........و انا عرفت من المحاورات ان متر الخرسانات من 300-350 ..بس مش عارف النص تشطيب تكلفته كام في المتر ...

و المنطقه دي تعتبر كويسه و لا لأ ......؟؟؟

و شاكريين لتعاونكم ....

[felfel]

الحى التالت من أقل الأحياء فى التجمع الخامس والسبب وجود مساكن متوسطة ( شباب ) فى وسط مناطق الفيلات نفس الشىء بالحى الرابع اللى فه الجهاز بس بصورة أقل

ترتيب الأحياء من حيث الرقى والأسعار من الأقل إلى الأعلى كالتالى :

التالت-الرابع-الخامس-التانى-الأول

متر سعر الأرض بالحى التالت اليوم ممكن يكون فى حدود 1300-1600 جنية للمتر , وأنت ممكن تحسب سعر التكلفة هيكل خرسانة + مبانى + كهرباء + سباكة + بياض محارة داخلى + نارة داخلية + واجهات + مدخل و سلم + وتكون المشاركة بنسبة المساحة الكلية لمساحة الأربع شقق أللى هاتاخدهم

حل تانى أسهل : سعر متر الشقق فى الحى التالت ممكن يكون 1500-1700 دة سعر البيع بإفتراض هامش ربح 30% يكون التكلفة 1000-1300 للمتر يبقى تحس مساحات الشقق وتضرب فى الرقم دة يطلعللك . طبعا يفضل تسأللك شوية سماسرة عن الشقق حولين المكان عشان تقيم الأسعار بطريقة أكثر دقة

بالمناسبة أسعار الأراضى والشقق بالتجمع الخامس تختلف بعض الشىء عن باقى المدن لجديدة فى إن سعر كل شىء بيتغير تقريبا كل أسبوع

[بنت الشاطئ1]

السلام عليكم

هناك ارض للبيع فى 6 اكتوبر جنوب الاحياء

ممكن حد يقولى هل هذه المنطقة مناسبة للسكن ام لا وهل قريبة من الجامعات

[hooba]

الأخ فلفل .....شاكر جدا لاهتمامك ...

عمنا سييين ....العمليه ملطشة معايا و شكلي جايلك العبور كده ......

[fcs]

أهلاً يا جماعة،

انبسطت قوى لما لقيت فى ناس بتتناقش كده فى موضوعات تهمنى جداً، بجد شكراً ليكو كلكم.

أنا عندى أرض 900 متر فى الياسمين، استلمت الرخصة وعاوز أبدأ فى البناء.

المكتب اللى عمل لى الرخصة عمل لى مقايسة بالبناء على 440 متر (شقتين فى كل دور).

مشكلتى هى إزاى أراجع المقايسة وراه؟

وهل الأحسن إننى أروح بالرسومات لكذا مكتب أطلب منهم إنهم يعملوا لى مقايسة وأقارن ما بينهم؟

ولا تنصحونى بإيه؟

حاجة على جنب: يا س س ... إيه حكاية غرق العبور ده؟ وإيه المناطق اللى تأثرت بيه؟ وهل هيفرق فى الأسعار هناك؟

[الباشا المصري]

اخواني الاعزاء ازيكم اجمعين وخاصة سي السيد اخبارك ايه لعلك بخير

اخواني ايه معني السقف اسلاب دا لاني لقيت اعلان عن فيلا في الشروق مكتوب في الاعلان سقف سلاب يعني ايه فهموني وميزته ايه وايه البديل ليه يعني لو مش اسلاب يكون ايه مثلا اسلوب ههههه مس عارف ياريت حد ينورني

سلامات و جزاكم الله خير

[se_ Elsyed]

الأخ فلفل .....شاكر جدا لاهتمامك ...

عمنا سييين ....العمليه ملطشة معايا و شكلي جايلك العبور كده ......

تشرف يا ريس

العبور هاتنور

عندي لك فيلا مطرحين وصاله وعفشت ميه إيجار جديد إنما إيه .. لُقطه :closedeyes:

---------------

اخواني ايه معني السقف اسلاب دا لاني لقيت اعلان عن فيلا في الشروق مكتوب في الاعلان سقف سلاب

ما إنت لو بتذاكر الدروس أول بأول .. ماكنش ده بقى حالك وماكنتش تتلطم ما بين الشروق والغروب وبلاد تركب الكتاكيت

بص يا سيدي :

كان يا ما كان يا سعد يا إكرام ولا يحلى الكلام إلا بذكر النبي عليه الصلاة والسلام .. كان في 3 طُرق لتصميم وتنفيذ الأسقف :

1- الطريقة البلدي او الكمر ( جايه من كمره يعني ) ودي الطريقة الشائعة في البناء وتقريباً في مظعم بيوتنا .. وكانت بتعتمد على تنفيذ السقف بالإرتكاز على كمر ( جمع كمره ) والكمرة بتبقى راكز على العواميد أو على الجدران لو البيت مبني من غير عواميد ... وكان من أكثر عيوبها هو إن الغرف او الأماكن بتبقى محدده .. يعني ما ينفعش أسيب الكمره وأبني بعيد عنها ... تخيل منظر غرفة كده في وسطها نازل كمر مش مرتكزه على اي حاجه ؟ هاتبقى حاجه بشعة ....

لكن من مميزاتها إنها إقتصادية .. لإن السقف لا يكون سميكاً حيث إن في دعامات ماسكاه وهي الكمر ... وبالتالي مش هايستهلك حديد او خرسانة كتير ... وخصوصاً الحديد لإنه غالي ...

2- طريقة الهوردي ... ودي تأتي بعد الطريقة البلدي من حيث الإقتصاد وهي عبارة عن إن السقف بيبقى مرتكز مباشرة على العواميد لكن يتخلل الخرسانة المُسلحة بلوكات طوب أسمنتي من الحجم الكبير متداخله مع حديد التسليح .... لكن الدورانات الخارجية للمبنى لازم يبقى فيها كمر ساقط على العواميد ...

مميزاتها ... إنها بتديلك حرية كبيرة في تقسيم المبنى من الداخل ... يعني تجيب حيطه هنا توديها هناك إنت حُر ...

عيوبها : إن البعض ممكن ينظر لها إنها أقل متانة من الفلات سلاب اللي إنت سألت عليها وهاتكلم عنها ... من عيوبها أيضاً إنها مُكلفة في الحديد وفي الخرسانة ... لإنك بتزود حديد وخرسانة عشان السقف المنبسط ده يبقى ماسك بعضه ومتين .

3- الفلات سلاب .... زي الهوردي بالظبط بس ما فيش بلوكات طوب بتتخلله ... ومُكلف برضوا

أنا مش مهندس لكنني اتكلم من خبرة علمية ليس إلا وأترك الأمور الهندسية لأولي العلم ...

حاجة على جنب: يا س س ... إيه حكاية غرق العبور ده؟ وإيه المناطق اللى تأثرت بيه؟ وهل هيفرق فى الأسعار هناك؟

مش غرقانه ولا حاجه يا عم فيسفس ... دي حالات فرديه لكن الأمور بشكل عام مستقرة وسعر الأرض في إرتفاع

أنا عندى أرض 900 متر فى الياسمين، استلمت الرخصة وعاوز أبدأ فى البناء.

المكتب اللى عمل لى الرخصة عمل لى مقايسة بالبناء على 440 متر (شقتين فى كل دور).

مشكلتى هى إزاى أراجع المقايسة وراه؟

وهل الأحسن إننى أروح بالرسومات لكذا مكتب أطلب منهم إنهم يعملوا لى مقايسة وأقارن ما بينهم؟

ولا تنصحونى بإيه؟

المقايسات والكلام ده مش بالكيلو ولا بالإجتهاد الشخصي من مكتب أو من صاحب الأرض ولكن في المُدن الجديدة يحكمه شيئين مهمين :

1- إشتراطات جهاز المدينة ... يعني عندنا في العبور لا يُسمح ببناء فيلا على نسبة تتجاوز 50 % من مساحة الأرض .. يعني حضرتك لو عندك قطعة أرض 900 ..ز يبقى لا يُمكن أن تبني على أكثر من 450 متر .. لكن ممكن تبني إن شالله لو على متر واحد فقط ماحدش له عندك حاجه ... على عكس العماير .. البناء مسموح على 60 % فقط .

2- بعد مراعاة تلك الإشتراطات تأتي رغبة العميل التي ينفذها المكتب الإستشاري الذي يُنفذ

يعني المكتب بتاعك ده جاب المساحة دي منين ؟

[مصري بالوراثة]

الأخ سي السيد

موضوع المياه الغير معلومة المصدر اللي في العبور ده مش حالات فردية -كما قالت الصحف- وإنما بيغرق أحياء بحالها زي السابع والسادس مثلا وسمعت كمان الخامس.

فأرجو أن تفصل المقال في هذا الأمر العضال!

مع خالص شكري وتقديري

[se_ Elsyed]

الأخ سي السيد

موضوع المياه الغير معلومة المصدر اللي في العبور ده مش حالات فردية -كما قالت الصحف- وإنما بيغرق أحياء بحالها زي السابع والسادس مثلا وسمعت كمان الخامس.

فأرجو أن تفصل المقال في هذا الأمر العضال!

مع خالص شكري وتقديري

للمرة المليون

أنا ساكن في الحي السادس

وما شوفتش حاجه ... ولا أعرف حاجه

يبقى إيه بيغرقنا وهدومنا متبهدله وعمالين نلغوص في المجاري .. وكل ده وإحنا متنومين مغناطيسي ومش حاسيين ....

الحي السابع والسادس مأهولين بالسكان وتكاد تكون القطع الغير مبنية معدودة ...

الحي الخامس لسه هووو عشان أرضيته اغلبها طَفله والبناء عليها محتاج تجهيزات وتكتيك مُعين

وكما قلت من قبل

من يسمع ليس كمن يرى

اللي عايز يسكن في العبور .. يعني هو مُستهلك يريد شراء سلعة ما .. عليه أن يسأل ويطقس ويلف ويشوف بنفسه ويعاين السلعة قبل الإقدام على الشراء ..