الست المشرفة / فولانه هانم الخربوطلي

[Folana]

السلام عليكم ورحمة الله..........

ايه تمت دى؟....احنا بنسلق بيض هنا؟...كلا والف كلا...

اللى اتقال ده ياجماعة من وجهة نظر الاستاذ س.س..... لانه مش عايز يحكى الوقائع الفعلية التى تم بموجبها تجنيدى فى فريق الاشراف الازرق..ومش عايز يحكى كمان عن سبب الزرقان المفاجىء والذى لاحظه الاخ صبح وزعل منى خالص علشان انا ازرقيت مرة واحد ومش على مراحل زى سيادته...(وادى اخرة الى يبص للقمة غيره..اديك ازرقيت انت كمان يا صبح)

لكن...لانى اتعودت معكم على الصراحة ووعدتكم بإن بابى سيظل مخلوع...سوف اقص عليكم ما خفى من اسرار تلك الحجرة المظلمة المغلفة بالزرقان والذى امتنع سى السيد عن الافصاح عما يدور بداخلها واكتفى بتصريحات الحكومة...كله عال ..كله كويس ..صرفنا لها مرتب شهرى....وما الى ذلك من تصريحات مفهومة ....

الى اللقاء فى الحلقة القادمة............

[shahd]

س س ( صًارخاً ) : إلا شهد ... أي نعم هي ذكية ولماحة وست بيت شاطرة .. لكن وجودها في الإشراف هايطفش الزبونين اللي مربيينهم .

داروين : مش فاهم .. إزاي يعني ... وبعدين هو أحنا في عشة حمام عشان تطيرهم ؟

س س : يا أخ داروين إنت كنت مسافر وما شوفتش حاجه ... شهد إبتدت تتكلم في حاجات غريبة .. مثل زُربيان ... بتنجان ... روانه ... وكل دي مصطلحات مستوحشة ممكن يُساء فهمها من الناس وعلى الأقل هايعتبروها شتيمه .....

ايه المسلسلات الكميلة دي :D

لااااااااااا دي عايزلها شوية شعوبيات على طبق معصوبة بالسمن والعسل

على قرص ملوج مرشوش عليه سحاوق

وطبق عصيد عشان الواحد يعرف يمخمخ mfb:

[Folana]

السلام عليكم ورحمة الله............

ولما طال بها الانتظار ....أخرجت كيس قماش كستور من جيبها ..وفكت الدكة بتاعته واخرجت منه النوبايد...(الموبيل)..واتصلت بالسرايا...

فلانة:...ألوووووووووو

الخادمة عبده..:.....(فى صوت أجش كأنها سوف تتقيأ فى وجه من تحدثه) :...آلللوووو ...مين اللى بيرررررررررررن

فلانة:...أنا ستك يا بغلة انت ...قولى لى ..حد اتصل من السرايا الكبيرة ....قصدى من الوزارة ...يوه ه ه ه نهايته...حد اتصل من أعضاء المنتدى؟

الخادمة عبده (وقد ارتسمت على وجهها علامات الدهشةوالغباء):....أمعاء المرتجع؟...لا ..مافيش حد رَجَع من الهوانم الصغننة..دول اكلوا البصارة كلها ونزلوا يهضموا اللقمة شوية مع البت حلاوتهم والوله زعتر فى الخرابة اللى قدامناا

فلانة:.....!!!!!!!!!!!!!!!!!!!!!!!!! قفلت السكة بسرعة ..احسن حد يكون سمع حاجة ..

واخذت تساوى شعرها وتشفط نَفَس من السنارة ..قصدى السيجارة اللى فى ايدها .....

ومازالت فولانة هانم..تقف فى انتظار سى السيد...وتذكرت مقطوعة من سيمفونية لبيتهوفن كانت اخدتها وهى ماشية من عند مودست من غير ما ياخد باله ..وبدأت تدندن بها ..."

العنب ..العنب ..العنب....مانجاوى وباحب المنجا....ايوه ..أه..."

وفى نفس ذات اللحظة ..امتدت يد غليظة مليئة بالشعر الى عنق فلانة وشدتها الى داخل عربة سوداء ويد اخرى تضع عُصابة سوداء على وجهها ...

فلانة بصوت مرتعش يظهر فيه سنها الحقيقى ..مين..مين ..فيه ايه ياولاد..فيه ايه؟....انا ماعملتش حاجة...ماعملتش حااااااااااااااا.....وتغيب عن الوعى............

وبعد ردح من الزمن لاتعلم مقداره....افاقت على رائحة عصير بصل مخلوط بالنشادر...وفتحت عينيها لتجد نفسها فى غرفة مظلمة..يتصاعد منها دخان ازرق وفوقه دخان احمر....

وابتسامات شماتة وقهقهة انتصارات تدوى من حولها ...ورائحة البخور تملأ المكان ....

قالت فى نفسها ..الله ..الله ...دول حضروا ....وانا دلوقت فى الحضرة اهو....وقامت وقف شافت سلوىوأم مادا ..جريت عليهم وقالت لهم

سلامات ..سلامات ..سلامات ...مؤ..مؤ...سلامات على البلديات ..مؤمؤ ...

وانتابها الدور ..وبدأت تهز رأسها بطريقة هستيرية وهى تقول

"ليلتكم أُنس وجلجلة...أنشد ولعلع يا وله "...

وتخبط وليد بكوعها فى صدره لجل ماينشد ويلعلع ..ماهو حامل المبخرة...

ورأت بنظرة سريعة عادل ابو زيد يجلس متكيئاً..فى عبائته البيضاء وعلى رأسه عمامة حمراء ..بتطلع نور...

جريت عليه وقالت ..شفت فى مناااام صاحب المقام...ده اُبهة ...

أحمد محمود:..الله حى...الله حى ..

فلانة:...ويمامة حايمة عليه..تسبح ربها....

س.س.:.يانور النبى ..يانور النبى

فلانة:..مييلت فوق (حىىى) يده وجيت احبها ...صحونى من النوم خدت بعض وتنَى جاية....

وليد:...صلى على خضرة النبىىىىىىىىىىىىىىى

داروين :...خلاص ..خلاص ..اكتمى النفس..ايه ..انت فى زار هنا ..ولا مولد ...اسكتى خالص...

سكوب:... :blink:

عادل ابو زيد:...فلانة يابنت حوا وأدم ...اسمعى وعىىى.....الصبيان بتوعى رشحوكى تكونى مشرفة و.....

فلانة:..مين ؟أنا؟...ليه؟..أنا؟...كام؟...أنا..........

أحمد محمود:..مش قلت لكم انها رغاية ومش حتسكت ..بس بقى ..:...هااااااااع....حنكون رشحناكى ليه يعنى....انت حتتلمضى من اولها

فلانة:..حاضر يابيه حاضر..انا ساكتة اهو مش حاتكلم خالص...وماتت فى جلدها ..وبدأت تبص حواليها ..شافت سلوى بتدعى لها وهى ماسكة السبحة...أم مادا تبتسم فى هدوء لتبث الطمأنينة فى قلب فلانة..

وسهيلة ..مش فاضية ..بتكشف على العريس....

سكوب:.. :wub:

شريف عبد الوهاب:....اسمعى ..من الاخر كده..انا وافقت بس علشان تبقى تيجيبى الجرايد كل يوم على مكتبى وانت جاية الصبح....وتعملى لى فنجان قهوة ....خلص الكلام

وليد:...يزود البخور وهو يذكر الله ..الله ...حى....ويبخر عادل اللى يزقه بايده ويقوله ابعد شوية بقى علشان النفس..

س.س.:.....بصى بقى يافلانة ياختى...بقى بصريح العبارة كده ..احنا بنجى هنا من صباحة ربنا ..مافيش اكل ..مافي شرب..مافيش مرتبات...واحنا كنا سمعنا كده طراطيش كلام انك من اصل تركى..ووارثة لك قرشين والعملية مبقششة معاك على الاخر...

فقلنا يعنى لو تبقى مشرفة معانا وتشرفى على اكلنا وشربنا وغسيلنا يبقى كويس..ممكن نقبل منك ده...فهمتى ولا افهمك بطريقتى...

احمد محمود:...وتغسلى وتنظفى المكان...وتنظمى الطوابير...وتاخدى الغياب....وتسلى الاعضاء..وتحكى لهم حواديت ..و..و...

عصام شوقى:...استنوا بس ياجماعة..انا مش حاوافق عليها الا اذا كان عندها نور فرامل فى عربيتها ,,,اه ..غير كده يبقى ماتلزمش..

سكوب:... :blink:

فلانة:..ايه ياسكوب ..ماتقول حاجة انت مخاصمنا ولا ايه...طب اى تحية كده بس منك ..

سكوب:..وهو يغادر القاعة... :) :huh: :blink: -_-

عادل ابو زيد:..خلالالالالالالالالالالاص حنجربها الاول فى باب الاسرة..

يا مســـــــــــــــــــــــــــــــــــــــــــــرور

وبدأت فلانة تساوى خصلات شعرها الفضى ..وترتب هدومها استعدادا لملاقاة هذا المسرور...

وفجاءة...انفتح الباب على مصراعية..ووجدت مارد .أشكيف...مخيف...احمر على ازرق....وينبعث من انفه دخان احمر مغلى ...

يانهار مش فايت ..مين سيللور اللى باسمع عنه؟؟!!!...وراح سيللور مديها حتة كف على ضهرها ...كومها فى الارض....

وبدأت تنط من الارض للسقف ..ومن الحيطة الشمال لليمين ..زى الكرة المطاط كده....

عادل ابو زيد:..ياسيللور انا قصدى انها تخضر بس يارجل...ليه كده ..يالا فداك...

وتسقط فلانة على الارض...وتسمع صرخات المشرفين وكل واحد ماسك رمح..واقبلو عليها مهليلين...

هاااااااااه هىىىىىىىىىىىى هووووووووووووووو

وبدأوا يرقصون حولها رقصة الهنود الحمر...ويعملوا اصوات بايديهم على فمهم ..

هونجااا...بونجاااااااا...هاهاهاها....سونجا ..حونكا..هى هى هى .......................

(كانوا بيتوجوها... B) )

والى اللقاء فى الحلقة القادمة والاخيرة..........

[نانو]

ايه الجمال ده يا ست المشرفه

ايوه كده وريهم الكتابه اللي علي اصولها و الفن

كملي ....بس خلي بالك ..انتي كده بتلعبي بالنار ...يا .....سماره :wub:

[Folana]

السلام عليكم ورحمة الله ......

أعزائى المشاهدين..نعود اليكم بعد فترة انقطاع ...لاستكمال الحلقة الاخيرة من مسلسل فولانة هانم ..وذلك بناء على طلب السادة المحاوراتيين...

...............................................

....ولم تشعر فولانة المسكينة بشىء الا عندما توقفت عربة سوداء كانت تعيدها الى منزلها ...وشعرت بايدى اعضاء الجانج المحاوراتى وهى تقذفها من العربة امام منزلها وتسير مسرعة.....

فلانة:...عبدوو...بت يا عبدوووووووووو....تعالى شيلينى أوبح....

عبده:...يانهار أسود..مالك ياستو هانم ..دهسك قطر ولا ايه ؟.....

فلانة :....لأ...يا عبدوو...لأ..موش قطر ....ده شىء كده..الله أعلم به...بيخرج من تحت الارض ...بيسموه سيلور...حاجة فظيعة خالص يا عبدو...أمان ياربى ...ده لا عين رأت ولا جه على بال ..عبدوو...

زنهار ...جبار....يضرب الارض تطلع شرار ..عبدووو...مابالك انا بقى ...فولانة هانم..مسكين..مهيضة الجناح...

تنظر اليها عبده فى دهشة وشماتة فى نفس واحد...وتقول لها :..بس تصدقى ياستو هانم انا اول مرة اشوف لون ازرق بينور كده....

وتتذكر فولانة لحظات أليمة وهى ملقية فى وسط تلك الحجرة الغامضة ..ويترامى الى سمعها همسات وضحكات اعضاء جانج المحاورات...

سى السيد:....هأه...هأه...هااااى ...خدت بالك يا ض يا ول ..لما فولانة لزقت فى السقف..طب على النعمة انا افتكرتها برص وكنت حانزل عليها بالشبشب...

وليد:..ايون يا اونكل ثين ثين...دى أكلت علقة ..ما اكلهاش......حرامى فى مطلع...هاهاهاها

وتتعالى ضحكات السخرية...هه ..هع ..هع ...هههععععع هأأأأأأأأأأأع......

يتملك الغضب من فلانة وتقرر الانتقام...وتدير قرص الهاتف بغضب شديد لتسمع صوت من الطرف الاخر كانت تتمنى الا تسمعه مرة اخرى

فلانة:....الوو...مين؟...أم سنقر؟...اسمعىياوليه...لمى لى العيال...ابو شفة...ومدوحاس...والاعرج ..وبات مان ...كلهم ..وتعالى لى فورا فيه اجتماع ....

واجتمعت فلانة بافراد القبيلة المسجلين خطر..وفتوات الحارة ...ووضعوا معا خطة محكمة من اجل الاجهاز على سيللور والقضاء عليه انتقاما لفولانة....

وجلست فولانة تنتظر بجوار الهاتف البشرى...ومرت الساعات ..الساعة تلو الساعة..ولا حس ولا خبر....

وفجأة دق جرس الهاتف ليقطع قلق فولانة ...وترد مسرعة والفرحة تغمرها

فولانة:..ايوه يا ام سنقر ..هه ..خلصتوا عليه..ضربتوه؟....عرفتوه مقامه.؟.......مات خلاص؟...

ام سنقر:.....ربنا يهدك يا فولانة....ينتقم منك ربنا .....ضيعتى لى العيال...

ده اكلهم ياختى..أكلهم ..وانا هربت بالعافية...

فولانة:....يانهار اسود ومنيل..يعنى عايش؟...هو عرف ان انا اللى ورا المخطط ده؟.....ايه؟...عرف؟؟؟....سترك يارررب

يالاتيف اللوتف يارب...

وفى نفس ذات اللحظة...تشعر فولانة باهتزاز الارض ..وتعرف بقدوم سيللور...

فولانة وهلى لازقة فى ركن الحجرة:..اهلا يا باشا...ماتبطل تمشى بحنية ياباشا ليقوم زلزال...

سيللور وقد انحنى ليلتقط فولانة باظافر يده ..وقال لها وهى معلقة فى الهواء تتأرجح بين اصابعه

سيللور:..بقى خير فى سلامة..وسلامة فى خير ...بالمختصر المفيد..انت اتحسبتى علينا مشرفة زرقا والل ىكان كان...يبقى يسير عليك النظام...

تدفعى لى المعلوم كل اول شهر زيك زى باقى الافراد ...ماذا والا.....

فولانة...حاضر يا باشا ..هو انا لى رأى...انا حاعمل توكيل لسعادتك تقبض به على طول ايه رأيك؟

سيللور:..لأ...انا راجل صاحب مبدأ...انا عندى ضمير......انا سمعت ان عادل خصص لك 24 جنيه...تاخدى ال 4 جنيه وتبعتى لى ال 20 مع وليد...هه قلت ايه.؟

فولانة القول قولك يا معلم...قصدى يا باشا حاضرر

سيللور:..يالا بقى قومى وضبى حالك كده واستلمى الشغل...اوعى تستحمى لمده سنة ..احسن اللون الازرق يبهت...أه....خليك دراى كلين احسن..

وتركها ..وانصرف.....

عبدو:...ياستو هانم..فيه ناس بتقول انها من فرقة حسب الله بتاعة المحاورات....

وتجد فولانة امامها موديست وواحد تانى والزهيرى وابو محمد

موديست:..نهارك سعيد ياهانم...ولا يهمك بكرة ترمحى ولا احسن حصان فى السبق

ابو محمد:..ايييووووه....ماتجمدى كده امال..انا جبت لك معايا عودين رنجة مبطرخين عجب...

المزهوراتى:...تؤتؤتؤتؤ.....لألأ ياجماعة عندها حق..يعنى ده منظر برضه..انا مش عارف هى سكتت لهم ازاى..بس برضه هم عايزين المصلحة...

يالا انا جبت لك اسطوانة عبد الوهاب .."ايها الراقدون تحت التراب..."

فولانة:....عبدوو..هات لى الزنكوغراف قوام

واحد تانى :....هاهاهاهاهاهاهاهاهاهى.....ايه بس يا طنط ..مش قلت لك ما اسمهوش زنكوغراف....اسمه فودافون

فولانة:..فودافون؟!!!...امممم قلت لى بقى يا ابنى ..اتارينى كل ما اشغله يقولى.."لقد نفذ رصيدكم ..برجاء اعادة شحن الاسطوانة".....................

ستــــــــــــــــــــــــــــــــــــــــــار

تمت

تصفيق حاد....................

[نانو]

يا اهلا اهلا يا فولانه هانم :unsure:

يادي النور

اخيرا حنيتي علينا و نورتينا و كتبتلنا مذكراتك اللي ما يعلم بيها الاربنا

اقصد مذكراتك الرائعه....

تسلم ايديكي .... :wub:

الا صحيح ما عنديش الفاكس بتاع فرقه حسب الله علشان عندي مناسبه صغيره كده :closedeyes:

[Scorpion]

[Folana]

السلام عليكم ورحمة الله ...

نانو يا جميلة...وحشتينى والله ونفسى ارد عليك فى كل مواضيعك بس يا واش يا واش علشان لسه بألين...

ياستى لمَا انتى..... حتلاقى فرقة حسب الله التاسع عشر قاعدة على قهوة الفنون موزعين نفسهم واحد قاعد فى الموسيقى الكلاسيك..والتانى فى الاغانى النادرة والتالت مع منير والرابع فى الاغانى الملطوشة...يعنى ..على اساس لو جه اى زبون يهجموا عليه كلهم وياخدوا المعلوم..حابقى ابعت لك نمرة المكوجى اللى بيتكلموا من عنده....

دلوقت بقى نيجى للجد...mfb:

سكوب.... يعنى بجد انا شفت اسمك..انسررت اخر انسرار ...اقوم ادخل الاقيك بتعمل بانتوميم؟...عايزين نسمع صوتك ..مش كله مشاورات كده...طب قول برافو..قول احسنتى..قول امشى من هنا..اى حاجة يعنى...ده انا حتى باكتب فى الدار حداك بتاع الابتسام ...كوباية شاى حتى وانت ابو الكرم...

طبعا وجودك فى حفلة تأبينى آآ تشريفى..شىء يسعدنى فعلا حتى لو بتحيينى تحية ابناء الصمت برضه مقبولة منك..بس الرجل اللى فى الاول ده اللى الكاب واسع عليه..ده مخبر ده يا سكوب ولا مواطن صالح زيينا ؟...

<_< <_<

[مصرية يعني مصرية]

أيوة كده <_<

كلهم هنا

إلا أنا

إوعا حد يجيب سيرتي mfb:

أصل إسمي معدي <_<

[lonly in cold night]

..بس الرجل اللى فى الاول ده اللى الكاب واسع عليه..ده مخبر ده يا سكوب ولا مواطن صالح زيينا ؟...

<_< <_<

واضح ان الست فولانه من ساعة العلقة اياها النظر ما بقاش تمام

يا ستى ده سي سيللور و هو جاى مع سكوب متخفى علشان يفكرك انك ما دفعتيش المعلوم بتاع شهر ديسمبر

طبعا سكوب يا ولداه عامل زى كما فى الافلام العربي واقف يغمز لك ويشاورلك براسه ان خلي بالك من سيللور وانتى ولا انتى هنا

هو كان فاكر انك حاتعملى زى فريد شوقى و تخطفى منه العصايه و تنزلى بيها ضرب على امة راصه (هما حدانا بيئولوها كده )

بس واضح انه ما عرفش بموضوع المعلوم اياه

[أبو محمد]

فولانة هانم ... إيه اللى انا قريته ده .. كل شوية أعمل سكرول آب عشان أتأكد ان فولانة هانم هى اللى بتكتب مش أحمد رجب .. والله حاجة آخر جمال .. أيووووووووووه مش موبكن .. مش موبكن .. مش موبكن (حمادة إمام فى التعليق)

وألف شكر على إنك دليتى نانو على مكان فرقة حسب الله .. حنعملوا حسابك فى السبوبة يا شابة .. بس لونقسطوها علشان أخوكى أبو محمد مأشفر اليومين دول ..

عاوزك إن شاء الله لما تجيبى نانو معاكى علشان الاتفاق لازم تكون لابسة دهبها كله .. بتسألينى ليه ؟ .. الجواب فى المكتوعة دى :

ما حادش بياكولها بالساهل

[Folana]

السلام عليكم ورحمة الله....

مصرية يعنى مصرية....هو انت حد يقدر ينساكى يا جميلة..ده انت نورتنا..بس غاية ما هناك انى خايفة اجيب اسمك فى المحضر..اصل المخفى سيللور ماشى يلم فى اسامى الاعضاء علشان يلهف منهم المعلوم...ربنا يكفيك شره ...يارررررب

lonely in cold night ......اسمح لى بس اقوم اقفل الشباك احسن بردت وانا باقرأ اسمك...هى الدنيا برد كده؟

بقى ده سيللور؟...ياحفيظ...اصل انت مش عارف انا اصلى عينى راحت منى فى العركة اياها مع سيللور...بالك انت.....انت شايف الكاب ده ؟ كل شوية يقع ازاى..اهو انا مقلة عينى بتقع منى كده وكل شوية ارفعها....العتب على النظر معلش...روح ياشيخ ربنا يسترها معاك وتبقى لياليك دافئة او تشترى بطانية...

ازدابو محمد..ازدابو محمد...منور المنتشيئة يا باشا..انت بتقول كل شوية تعمل ايه؟؟؟ :sad:

شيكوريل اب؟.....عجايب ..حقة بطلوا دا واسمعودا...دى حاجة غير الرنجة يعنى؟......

اما من ناحية نانو ..فلا تكلك كله حيبقى تمام التمام..بس جهز انت الحضرة...واهى نانو فى الكويت يعنى حتيجى لابسة شىء وشويات ..بس افتكرنى بقى علشان المصاريف زايدة اليومين دول..وسيللور ماشى يقش....

[مصرية يعني مصرية]

مصرية يعنى مصرية....هو انت حد يقدر ينساكى يا جميلة..ده انت نورتنا..بس غاية ما هناك انى خايفة اجيب اسمك فى المحضر..اصل المخفى سيللور ماشى يلم فى اسامى الاعضاء علشان يلهف منهم المعلوم...ربنا يكفيك شره ...يارررررب

الله يخليكي يا قمر إنتي

يا رافعة معنوياتي :sad:

تم تعديل 6 ديسمبر 2006 بواسطة مصرية يعني مصرية

[Modest]

الواحد لازم يستغل الفرصة دي علشان يتخلص من خصومة بضربة واحدة .. أيوة نبتدي بداية ناعمة و بعدين ندخل في الموضوع

بونجور مدام خربوطلي

مون ديو :D .. أمان يالاللّي .. يوه قصدي أمان ربي أمان :lol:

إتأثرنا كتيييير كتير باللي عملُه المخفي سيلور في حضرِتِك و من يومها و أنا و العيلة و عيلة العيلة و خصوصاً مامّا و بابّا (بي تقيلة) في الأستانة متأثرين جداً و حالة الحزن مسيطرة على الكل لدرجة بطّلنا ناكل كافيار و سومون فيميه على الفطار .. آه صدّقي حضرتك .. ماهي حالة حزن بقى :sad:

أصدقائي حاولوا يطلبوا حضرتك في التليفون لكن الخط على طول مقطوع علشان حضرتك ما دفعتيش الفاتورة من يوم ما ضربتي تفليسة .. بس أنا حفاظاً على سمعة العيلة قلت لهم إنك شادّة سلك التليفون .. من الحزن يعني :wub:

الأصدقاء أصرّوا إلحاحاً إنهم يوسطوني في بعض الرسائل اللي عايزينك تبلغيها لسيلور و هنا أعرض عليكي بعض الرسائل و ليس الكل .. يعني إذا السيد سيلور خلّى فيكي "أو فيهم" حاجة بعد ما توصلي له الرسائل دي هابقى ألحقك بالجزء الثاني

الرسالة الأولى من ناش

ما تزعليش يا فولانة يا حبيبتي ... خلي سيلور ده يوريني نفسه و أنا أخلي ولادي يقطعوه و أنا اعمل عليه شوربة.

الرسالة الثانية من مزهوراتي

لألألأ .. هو عامل جدع على الستات؟ .. لو يقدر يواجهني هاعرفه قيمته بس هو ما يقدرش يواجهني.

رسالة أخرى من أبو محمد

أيوووووووووووه .. أني بعون الله نقطعوه حتت و نقزقزوه مع الجندوفلي و الجلاجولا و أم الخلول.

و رسالة من نانسي

و لا يهمك يا فولانة.. عندي عمال في الفيلا الجديدة اللي باشطّبها .. ابعتي لي بسلامُته و أنا أخليهم يحطوه في خلطة الخرسانة و بكده تبقى الفيلا لونها أزرق من غير دهانات و لا دياولو.

الرسالة التالية من نانو

أختي الحبيبة فولا..... (يظهر شافها و هي بتكتب الراسلة B) )

و رسا................................

.

تم تعديل 7 ديسمبر 2006 بواسطة Modest

[Folana]

السلام عليكم ورحمة الله...

صلعنبى...صلعنبى...يا الف نهار ابيض...احم احم...قصدى يعنى...

أوه.....موديست باشا بنفسه مشرفنى يطمئن علىّ..ده كرم زائد وعطف انا لا استحقه من معاليك...

بت يا عبدو هاتى كرسى سليم للباشا بسرعة.....اتفضل يا باشا ارتاح...عملت طيب انك اخفيت عن العائلة سبب وفاتى..قصدى سبب انقطاعى عنهم ...أنا اشكرك..اشكرك

ايه ..بتقول ايه؟...حتعالجنى على حسابك؟...اوه ..ميت فل يا باشا..قصدى ميت ميرسى...انت كرمك زاد وغطى..بس كده مش كتير ؟...ايوه عارفة ..سمعت انك سلكت كام فدان قرنبيط من واحد تانى...يالا يستاهل علشان بيتريق علىّ علشان مش عارفة اقول جالون فون بتاعته دى...

فى انتظار زيارتك القادمة يا باشا ...بس احيات انبىىى تفتكرنى بكام كيلو لحمة بتلو علشان انا فى غاية الهفتّان سعادتك..

سلامى لكل من راسلنى...والبقاء لله فى اللى اتكلوا وهم بيكتبوا لى لسه...