عقد عمل بالكويت ب 250 دينار شهريا - أطلب مشورتكم

[salma]

السلام عليكم و رحمه الله وبركاته

اخواني المصريين انا بحاجه لمساعدتكم

جالي عقد للكويت للعمل بشركه الشايع علي راتب شهري 250 دينار

مع العلم بان السكن و المواصلات علينا

ما رأيكم هل هذا الراتب مجزي علما بان العقد لمده عامين و لا يمكن ان اعمل لعام واحد حيث هناك شرط جزائي يتطلب دفع اقامه لعام و استحقاقات اخري اكثر مما سوف اخذه

:unsure:

هل لي ان اعرف ماذا تتكلف المواصلات و السكن و خاصه لو جماعي و الاتصالات و غيرها

ارجو سرعه الرد عليا

و شكرا لكم

تم تغيير العنوان ليعبر عن محتوى الموضوع

تم تعديل 19 أكتوبر 2006 بواسطة Advisor

[White heart]

أولا مرحبا بكِ معنا يا salma ....

لى بعض الأصدقاء ممن تقيم اسرهم بالكويت، فقمت بسؤالهم ... مبدئيا بالنسبة للراتب " 250 دينار " .. تقريبا 700 يورو، بالنسبة للوافد هو راتب معقول، فقد ضربوا لى مثال عن الفارق بين مدرسة كويتية حديثة التخرج ( أى بلا أى خبرة ) قد يصل راتبها الى " 600 دينار " ... فى حين ان المدرسة المصرية حتى مع خبرتها، قد لا يتجاوز راتبها الــ 250 دينار!

عموما على حسب ما فهمت .. المشكلة التى قد تواجهيها هى " السكن " فمثل معظم بلاد العالم اليوم، القيمة الإيجارية مرتفعه جدا، لقد تحدثوا عن شقة صغيرة جدا ( ربما حجرتين ) بمتوسط إيجار شهرى ما بين 200 و 250 دينار شهريا شاملة الخدمات ( ماء و كهرباء ) !، و أفادوا ان الوافدين من الشباب تغلبوا نوعا ما على هذه المشكلة بالسكن " جماعى " بمعنى كل أربع أو 5 افراد يشتركوا فى إيجار شقة واحدة .... اما بالنسبة للنساء فبالطبع نفس الأمر و لو ان المشكلة ستكمن فى مسألة " الثقة " و العثور على الشركاء المناسبين، حيث ان النسبة الغالبة هم من الوافدين من الفلبين و باكستان .... علمت ان المواصلات المنشرة هى التاكسيات ( نصف دينار لقطع مسافة تقدر بــ 10 دقائق )... و لا ينصح بالإعتماد على الأتوبيسات ... أما الغذاء و الشراب فأسعارهم ليست مرتفعة، الملابس مثل جميع الأسواق اليوم .. هناك المستورد من الغرب ( و هو أغلى من متاجر الغرب نظرا للضرائب المضافة المختلفة ) و هناك المنتجات الصينية الرخيصة الثمن ..... علاوة على إحتكار بعض العائلات الكبرى للكثير من المنتجات بالأسواق التجارية .... كالكاظمى ـ أو العثمان ... الخ .. الخ ...

اذا علمت المزيد من المعلومات قمت بوضعهم لكِ ... و لعل العزيزة " نانو " عندما يقع نظرها على هذا الموضوع تفيدك بشكل أفضل و ادق ..

مع أطيب تمنياتى لكِ و للجميع بالتوفيق.

تم تعديل 19 أكتوبر 2006 بواسطة White heart

[نانو]

اهلا بيكي سلمي

شوفي يا سلمي طبعا واضح انك هتبقي لوحدك يعني من غير اسره

علشان كده ممكن يكون فيه امل ...لكن طبعا لو عائله مستحيل لان المبلغ ده هو تمن الايجار بس لشقه مكونه من غرفتين زي وايت هارت ما قال

نقسم حاجه حاجه

اولا بالنسبه للسكن بيكون جماعي و اوقات بشوف اعلانات في الجرايد واحده بتدور علي مرافقه لها و بتحدد الجنسيه مصريه مثلا و بالتالي ممكن تلاقي رفقاء و مصريين لو حبيتي نقول مثلا متوسط تدفعي 80 دينار لو معاكي اتنين و يمكن اقل لو العدد زاد

ثانيا الاكل شهريا مش هيقل عن 100دينار لان الاكل الفتره الخيره زاد جداو بيزيد مع الوقت

ثالثا المواصلات و ديه بتبقي غاليه اوي لو تاكسيات يعني في اليوم الواحد علي الاقل 3 ديناريعني في الشهر حوالي 60 دينار

ممكن فيه مجموعه بيتفقوا مع بعض علي تاكسي ينقلهم و بيدفعوا كل واحد في حدود 15 -20 دينار

يبقي كده المجموع عندنا 200دينار

و طبعا ده بعد ما تستقري و تظبطي الحاجات ديه كلها

لانك في الاول مش ممكن هتلاقي كل ده مره واحده يعني لازم تعملي حسابك انه يكون معاكي مبلغ احتياطي من مصر و خصوصا اول شهرين علي الاقل

بالنسبه للاتصالات مش غاليه و طبعا بتعتمدي علي الموبايل يعني ممكن تشتري خط ب20 دينار و كرت الشحن ب3 دينار و فيه كمان ب1.5دينار

يعني مش مكلف تقريبا

مش عارفه انت بقه ادري لو هتكون تكلفتك حوالي 200دينار و الباقي حوالي 50 و لو قرصتي علي نفسك شويه في الاكل هيبقوا 80 بالكتير اوي

لو انتي شايفه ان المبلغ ده مجدي قصاد السفر يبقي ربنا يوفقك و لو مش محتاجه اوي لموضوع السفر يبقي خليك في مصر احسن

علي فكره الشايع ديه من الشركات الكبيره المعروفه هنا و ان شاء الله يكونوا كويسين

[msox37]

السلام عليكم ورحمه الله

اولا بالنسبه للسكن اسعار الشقق تتراوح من 170 الي 220 ده بالنسبه لشقه متوسطه تتكون من غرفتين طبعا ممكن تلاقي اقل بس مش سهل

في الغالب الشقه بيسكنها 4 افراد

اما بالنسبه لاسعار الموصلات بيكون عندك حلين في الاول

الباص وده 150 فلس

التاكسي وده يبدا من دينار علي ما اعتقد او دينار الا ربع

وفيه حل ثالث انك تشتري سياره وانك تشتري سياره ده موضوع سهل لاكن المشكله في رخصه القياده

المهم ان ال 250 دينار كبدايه في الكويت مش وحش ابدا

[felfel]

العقد ضعيف جدا - تحليل الأخوة سليم واقصى شىء تستطيعى ادخارة 50-80 دينار ودة فى رأى عائد ضعيف جدا مايستاهلش الغربة

التعايش مع 4 أو 5 اشخاص فى شقة واحدة موضوع ملىء بالمشاكل وبجد حياة موش حلوة

التاكسى بالكويت غالى جدا --- وفى أيام الحر المظبوطة التنقل بالمواصلات عذاب

يجب توخى الدقة تمام فى العمل فى الشركات الخاصة حتى لو كانت الشايع - عوما العمل فى الحكومة أفضل بكثير بالنسبة للفتيات فى الكويت ودة طبعا موش سهل دلوقتى

[متمردة]

هاى اختك سلمى انا مدرسه عايشة فى الكويت وبقوللك ان القرصه ممتازة جدا

اما بالنسبه للسكن والمواصلات وكل الحاجات اللى انت بتفكرى فيها ده

مش مشكله ابدا ابدا لان فى كذا حل ليها هنا فى الكويت

ممكن تسكنى اولا مع حد ولو ملقتيش ممكن تاجرى شقه فى حدود 150 دينار

اما بالنسبه لاكل وطالما انت واحده بس فاكيد كمان 50

اما بقى المواصلات ممكن تتفقى مع مواصله زى تاكسر ده فى الاول وكلمه الاول معناها شهرين او ثلاته مش اكتر وبعدين هتتعرفى على ناس فى شغللك هما كمان بيدورا على حد يوصلهم وتتفقوا

التجربه جديده وحلوة وشركه الشايع شركه كبيرة ومشهورة ومحترمة

مفيش مانع لو جربتى سنتين من عمرك مش هتخسرى حاجة وبالعكس هوحشى قرشين ينفعوكى بعدين

[salma]

بجد مش عارفه اشكركم ازاي

انا مكنتش متوقعه انكم هتردوا عليا بالسرعه دي

و كمان تدوني كل المعلومات الحلوه دي

بس كنت عايزه احط اضافه ان في اكتر من مأئه بنت مسافره معايا و انا بالفعل عملت صداقات معاهم يعني مفيش مشكله من السكن الجماعي

و كمان هنتوزع في تلات اماكن بس و السكن علي الشركه في اول شهرين بس احنا اللي هندفع يعني فرصه كمان اتعرف علي ناس كويسه

متخافوش عليا انا مدبره و اتعودت عالغربه و التعب

بالاضافه ان اخواتي هناك حقيقي المكان مش قريب منهم لكن علي الاقل هيساعدوني و مش هبقي لوحدي

اللي قالقني بس موضوع ان العقد سنتين ايه اللي هيحصل لو تعبت او مقدرتش اكمل

و علي العموم بكرر شكري و يسعدني صداقتكم بجد هكون حريصه اننا نعرف بعض اكتر لو ربنا قدرلي و سافرت

و شكرا

[mizo]

الاخت العزيزه سالمه

انا عندى بعض استفسارات؟ واراء

بس كنت عايزه احط اضافه ان في اكتر من مأئه بنت مسافره معايا

1- هى دى شركه ايه (من فضلكم لا يفهمنى احد خطأ)

2- عقد بما يوازى 700 يورو ليه بسيط جدا على الغربه

3-ماهو المؤهل الدراسى والسن متضيعيش عمرك فى وظيفه لن تضيف اليك اى خبره

4-اعتقادى ورئيى الشخصى كما اقول الشخصى الدول العربيه خلاص راحت عليها انتى بتتكلمى فى 700 يورو مرتب

وظيفه بسيطه فى دول الجنوب الافريقى non technical مع امكانيه وجود دخل جانبى بسهوله

5-اوعى تجرى على الفلوس كله بيجى فى وقته والرضا بما قسمه الله بيفتح ابواب من غير اى توقع

اللى بقوله لك خبره 20 سنه منهم 9 فى افريقيا والباقى فى مصر وشفت زملائى الذين رفضت اسافر معاهم الدول العربيه لعدم قبولى بعروض رايت انها غير مناسبه واستغلال وكانت حالتى الحمد لله ترغمنى عتى السفر ورفضت

الان اتذكر الايام لو رضخت لكنت محلك سر مستنى الكفيل علشان التاشيره

انا بقول الكلام ده لان مالحظته ان احنا المصريين ناجحين فى كل حاجه تجاره زراعه طب معارض

جه الوقت اللى مفروض نركز فيه بره البلاد العربيه

لكن 700 يورو لااااااااااااااااااااااااااا :unsure: :sad: mfb:

[bentmasria]

الاخت الكريمة سلمى

انا مررت بتجربة مشابهة قبل فترة وكنت ارملة وحامل وخرجت الى الكويت اسعى وراء الرزق بعقد شركة خاصة

ارجوك اقرأى ما سأكتب بهدوء وترفقى بنفسك

للتنويه انا احمل 2 ماجستير فى تخصص نادر بالكويت ووعدنى اصحاب العمل بأن احصل على الاقامة الدائمة بمجرد دخولى البلد بدعوة لمدة شهر

وايضا بتوفير سكن وعقد عمل بمبلغ 400 دينار وسافرت سيدتى ولحسن حظى انى كنت احمل معى مالا من القاهرة

لم استطع مشاركة اى جنسية اخرى السكن ولم تتوفر مصرية والنتيجة اقامتى باحد الفنادق عشرة ايام ومنها الى شقة فى احد الاحياء المتوسطة بحوالى 100 دينار بها تكييف فقط

اى اننى اضطررت لفرشها كاملة وبمعاونة صديقة كويتية كنت اعرفها بالقاهرة

لن اخبرك عم واجهته من الجميع فقط ساؤكد لك انك ان لم تكونى مضطرة بقسوة الى السفر منفردة فافضل ان تسافرى بصحبة اخ لك او تابعة لاعارة او لهيئة توفر سكن سيدات منفرد كما فى بيوت الطالبات بمصر فبالرغم من اقامتى بسكن عائلات كان باب شقتى يضج بطرق الجيران من ....................... وعقدت اتفاقية مع زوجة الحارس ان ترافقنى فى الصعود والنزول وغالبا ما تبيت معى ربنا يكرمها حتى انها اصطحبتنى للمستشفى يوم مرضت

المهم

تغيرت صيغة الاتفاق وكنت مخطئة فلم اوقع عقدا من القاهرة ولم احصل على فيزا عمل قبل سفرى

الاخوة فى مقر العمل الجديد بدأوا بالتودد الى بشكل سخيف رغم الالتزام الشديد والسبب سفرى منفردة ولم يشفع لى انى من بلدهم

لا اريدك ان تفزعى

لكنى اكبرك سنا واكثر خبرة وما تحملت اكثر من بضعة شهور لاعود وقد تم استغلالى ولم احصل على حقوقى المادية بسبب الشركاء المصريين فى العمل

اعلم انه ربما سوء اختيار منى لكن ارجوك كاخت لى ان تتوخى الحذر فكما يوجد الطيب يوجد الخبيث حفظك الله من الشر

سيدتى انا كنت اعمل على اصدار مجلات ادبية ونلت هذا فمابالك بالعمل فى شركة تجارية او وظيفة ادارية تجعلك دائما امام الانظار وما يترتب على هذا

لا ادرى ماذا اقول

اعانك الله سيدتى ووفقك خذى حذرك حتى من اقرب الناس فالوجوه ليست دائما كما تبدو

[نانو]

بجد مش عارفه اشكركم ازاي

انا مكنتش متوقعه انكم هتردوا عليا بالسرعه دي

و كمان تدوني كل المعلومات الحلوه دي

بس كنت عايزه احط اضافه ان في اكتر من مأئه بنت مسافره معايا و انا بالفعل عملت صداقات معاهم يعني مفيش مشكله من السكن الجماعي

و كمان هنتوزع في تلات اماكن بس و السكن علي الشركه في اول شهرين بس احنا اللي هندفع يعني فرصه كمان اتعرف علي ناس كويسه

متخافوش عليا انا مدبره و اتعودت عالغربه و التعب

بالاضافه ان اخواتي هناك حقيقي المكان مش قريب منهم لكن علي الاقل هيساعدوني و مش هبقي لوحدي

اللي قالقني بس موضوع ان العقد سنتين ايه اللي هيحصل لو تعبت او مقدرتش اكمل

و علي العموم بكرر شكري و يسعدني صداقتكم بجد هكون حريصه اننا نعرف بعض اكتر لو ربنا قدرلي و سافرت

و شكرا

اولا طالما انك مسافره مع بنات كتير يبقي مشكله السكن و المواصلات تقريبا محلوله لانكم هتشتركوا مع بعض فيهم

ثانيا اخواتك دول اخواتك فعلا و لا تتقصدي اصحاب زي اخوات عامه معني كده انك لو حصل لتك مشكله فعلا لا قدر الله هتلاقي حد معاكي(و احنا طبعا اكيد موجودين) لكن اقصد ما تخافيش

ثالثا هو الشرط الجزائي لو حبيتي تسيبي الشغل هو دفع الاقامه بس ....لو هو كده فعلا يبقي مش مشكله لانه مش هيزيد علي 100 دينار بالكتير

طبعا تجربه بنت مصريه قاسيه جدا و عندها حق في حاجات كتير و ده اللي مخليني متردده اني انزل شغل لان المعامله هنا صعبه شويه معاهم

و لازم تبقي مكشره و شكلك قرفان علي طول طالما بتتعاملي معاهم هي ديه طريقه المعامله الوحيده مع كتير منهم

بس بالنسبه لك علشان هتكونوا كتير مع بعض فانشاء الله هيكون ظروفك احسن و ربنا يوفقك

[المغترب]

حاولت جاهدا أن امنع نفسي عن الكتابة بعد اعتزال دام اكثر شهور عده وآثرت الاطلاع ولاالامتناع عن الموقع لظروف ولكن عندما يخص الموضوع طرفا (( بنت مصرية )) للعمل خارج مصر فأنني اقدم النصح بما يرضي الله وبما اعرفه جيدا

1 - العمل شرف اذا كان للرجل او أي فتاة او أمراءة ولكن بدون مزايدات البنت لوحدها في دولة عربية اضع الف علامة استفهام الا في وضع واحد هو تعاقدات وزارة التربية او وزارة الصحة فقط اكرر فقط اما سفر البنت لوحدها احذر منه !!!

2 - التعاقدات التي نوهت عنها الأخت هنا الوضع السائد ان التعاقدات الجماععية لاتكون الا في شركات الأمن والحراسة والتنظيف وحتي هذه لم تسلم والعقد والمسمي الوظيفي (( ضابط أمن )) وياله من اسم جميل وبمرتب يزيد عن 140 دينار - وفي الحقيقة ليس إلا حارس مجمع تجاري او حارس مدرسة وينخدع حضرة الضابط بالاسم والمرتب لاتعدي 30 دينار وهذه الحقيقة ياسادة ولاتقول لي السفارة ولا القنصلية

3 - اعرف جيدا ان جميع الشركات التجارية تحبذ التعاقدات الداخلية حتي لاتكلفها اية ارتباطات بالمتعاقد ولرخصها اما كما تقول الاخت (( مائة بنت )) اظن هذا لم نسمع عنه من قبل وبراتب 250 دينار -- اعتقد اموضوع فيهشيء غير واضح

4 - قانون العمل بالقطاع الاهلي وخاصة كما فهمت من كلمات الاخت انه عقد حكومي وليس عمل بشركة تجارية وهنا لايمكنها ترك العمل الا بعد انقضاء مدة السنتين وفي حالة تركها العمل لصاحب العمل ان يطالبها براتب السنة التي تريد ان تكملها

5 - الكويت بلد جميل ويمكن لأي انسان ان يعيش براتب 200 دينار وممكن يعيش براتب 1000 دينار - ولكن هذه الاخت سوف تواجه صعوبات كثيرة بهذا الراتب الذي لن توفر منه ناهيك عن وجودها كأنثي سوف تكون في صراع يومي مع مشاكل اعفوني من كتابتها انني مازلت اشكك في نوعية العمل وماهي طبيعة ذلك العمل لأنني اعرف ان معظم محلات الشايع يفضلون العمالة الاسيوية بها وقليل منها العربي المتمثل في الجالية اللبنانية وابناء الشام والله الموفق

[رمضان]

السلام عليكم ورحمة الله وبركاته

انا اعمل بالكويت ويمكن اقدر اقدم بعض النصائح اللي تفيدك من خلال تجارب واقعية

اولا انا مستغرب بالنسبة لحكاية ان شركة تجارية تعمل تعاقد من مصر وبراتب 250 دينار الموضوع مش مريحني شوية الا اذا كان تخصصكم نادر ولا اعتقد ذلك .

لان بكل بساطة لو اي شركة في الكويت محتاجة موظفين بسهولة جدا اعلان بنصف دينار يأتي اليهم بدلا من مائة بنت يأتي اليهم 1000 وبنصف هذا الراتب .

ثانيا راتب 250 دينار كبداية بالكويت مش بطال لا بالعكس كويس واسألي بعض الاخوات في المنتدى اللي بقى لهم في الكويت كتير .

السكن مش مشكلة

الأكل مش تكلفته 80 دينار نفس ما تفضلت احدى الاخوات لا بالعكس

انا واحد من الناس كل اكلي في مطاعم لدرجة انهم حفظوني كلهم وعادي جدا وما بتوصل لمثل هذه القيمة ما بالك انتي بنت وهتعملي اكلك بنفسك

في كل الاحوال لا يمكن ان يتعدى قيمة الاكل في الشهر الـ 40 دينار مع التبذير

انتي عارفة كل مشكلتك في الكويت هتكون انك بنت ولوحدك ومعلش انتي نفس اختي هنا الديابة كتير واولهم ولاد بلدك ودي اكبر مشكلة فخدي بالك وخليكي راجل ولا تثقي في اي رجل طبعا الكل مش وحش بس للاسف محدش هنا بيساعد لله في لله ..

[Wilds Horse]

بسم الله الرحمن الرحيم

الاخت سلمي ،،، اكيد دماغك لفت من كتر النصائح المشجعة والغير مشجعة

والاخوة كلهم اكيد اعطوكي اراء صحيحية تبعا للظروف التي مرت بكل منهم ، وطبقا للحالات التي مرت عليه او عايشها بنفسه

ويمكن ده سببه ( ان المعلومات اللي قلتيها قليلة جدا ، وغير كافية لابداء راي محايد ومنطقي تقدري تستفيدي منه ) واهم شئ لابد نعرف ايه الوظيفة المعروضة عليكي ؟؟؟؟ وفي اي منطقة بالكويت ودي مهمة جدا جدا ( لان اسعار السكن تختلف من منطقة لاخري )

وانت مؤهلاتك ايه ؟

ومن كلامك احب ابدء ببعض النقاط :

1- اولا انتي قلتي ان اخواتك بالكويت المكان مش قريب منهم : واحبك تعرفي ان الكويت كلها صغيرة ونص ساعة كافية للوصول من وسط المدينة الي اي مكان ( طبعا ماعدا الاماكن الحدودية ) ، يعني ممكن تكوني تشوفيهم كل يوم .

2- شركة الشايع شركة كبيرة ومعروفة ،، ولها ولها نشاطات مختلفة وكتيرة ،،،، لكن المهم واللي الي الحين ما قلتيش انتي ها تشتغلي في اي نشاط ؟؟؟ وها تكون وظيفتك ايه وبعد كده نشوف اذا الراتب يتناسب مع المهنة والا لا ....

واسمحي لي اقتبس من كلامك ( بس كنت عايزه احط اضافه ان في اكتر من مأئه بنت مسافره معايا )

مش عارف جملة اكثر من 100 بنت لتحديد العدد او للتعبير عن كثرة عدد البنات اللي مسافرين معاكي ؟؟؟ عموما اتوقع ان تكون الوظيفة في مجال البيع

( بائعات ) او مضيفات مطاعم ( انت اللي ها تقولي لنا بالضبط )

وفي الحالة دي راتب 250 دينار راتب معقوووووول ان لم يكن ممتاز لانك لسه مبئدئة ومش ها تلاقي احد ياخذ الراتب ده غير اصحاب الخبرة او الحالات القليلة وحسب نوع الوظيفة ومكانها وطبعا الاخوات من الجنسية اللبنانية ممكن تقولي مرتبهم بيكون بداية من الرقم ده فيما فوووق

و( كمان هنتوزع في تلات اماكن بس ) و( السكن علي الشركه في اول شهرين) بس احنا اللي هندفع

اعتقد ان مشكلة السكن كده محلولة لانه اذا كان السكن علي الشركة خلال الشهور الاولي معناه ان الشركة بالفعل استأجرت سكن لكم وده شئ طبيعي ومعتاد عليه بالكويت وخاصة في حالة العقود وده بيسهل علي الشركة تجميع العمالة ( او موظفينهم ) للذهاب لاماكن العمل وللرقابة عليهم وخاصة انكم كلكم بنات واي مشاكل تحصل بتكون اساءة لسمعة الشركة ،،، وفي الغالب ها تدفعوا الايجار وبيكون مبلغ يتم خصمه من الراتب ومش ها يكون كتير ...

وحتي اذا لم يحدث وانتم بهذا العدد فممكن تقسموا انفسكم لمجموعات علي الاقل لو اخذتم شقة غرفتين وصالة مش ها تزيد عن 170 او 180 دينار تقسم علي 4 يبقي كل واحدة 45 دينار بالكتير ( وزي ما قلت لك الايجار يتوقف علي المنطقة يعني ممكن يقل عن كده )

والاكل بالنسبة لك في الغالب في السكن الجماعي كل واحدة بتقوم بدفع مبلغ شهري يتم منه الصرف علي الطعام الاساسي الافطار والغدا والعشا ) ومش ها يزيد عن 30 دينار للواحدة منكن ( دي غير طلبات كل واحدة الخاصة اللي بتجيبها لنفسها وعلي حسابها ) عموما 50 دينار كافية جدا جدا ( والله فيه مدرسات ما بيدفعوش نصف المبلغ ده ) .

والمواصلات زي ما قالك بعض الاخوة الباص ب 150 فلس ( الدينار 1000 فلس ) وممكن تعملي اشتراك ب 10 دنانير لكن طبعا في حالات البنات ما انصحكيش بالباص مش علشان الباص نفسه لكن لانك ها تضطري تقفي علي المحطة تنتظري الباص واذا نجيتي من الحر او المطر مش ها تنجي من السخافات والمضايقات اللي ها تلاقيها من اصحاب السيارات اللي يعرضوا (خدماتهم) وانت فاهمة اقصد ايه

وبيكون الافضل انكم تتفقوا مع بعض كبنات بتشتغلوا بنفس المكان وتشوفوا حد يوصلكم الشغل ويرجعكم تاني ودول ها تلاقيهم كتير وممكن سيدات توصلكم

اعلان صغير بدينار تلاقي كتييير

وطبعا الاجرة بتتوقف علي المكان اللي ها تروحووه بعيد والا قريب لكن في الغالب بالكتير ممكن كل واحدة تدفع 20 او 25 دينار بالكتير

يعني المصاريف كلها بالكتير 120 دينار يعني ها يتبقي لك 130 دينار خلي الثلاثين دينار علي جنب لمصاريفك الشخصية وبند الهدايا

يبقي لو انت مبذرة ها تقدي توفري 100 دينار يعني حوالي 2000 جنيه تقريبا

باقي بس الشئ اللي قالقك وهو اذا تعبتي او حصل لك شئ ( من الناحية دي اطمئني الناس هنا مش وحوش ) والخدمة الطبية متوفرة وكل حاجة

الخووووف فقط من انه يحصل زي ما قال ومر باحد الاخوات ان شروط التعاقد تتغير ،،، فلابد تتاكدي من ان اذن العمل ( او الفيزا ) والعقد بنفس المرتب

واذا اجراءاتك سليمة فالقانون هنا يقف الي صف العامل

لكن مقابل كده فيه حاجات ثانية كتير ممكن تضيع عليكي بمجرد اتخاذك لقرار السفر وده انت بس اللي تقدري تحسبيها وتقيميها وهي الفرص الاخري اللي ممكن تضيع عليكي .

وكمان رغم اني مش من مؤيدي سفر البنات بمفردهم الا في بعض الحالات بالتدريس او التمريض لكن اكيد كله بيتوقف علي البنت واخلاقياتها وتدينها ( رغم ان المغريات والغربة والوحدة لها تاثير كبير )

عموما ربنا يوفقك لما فيه الخير

[salma]

اولا كل سنه و انتم بخير

كلمه الشكر قليله عليكم

حسيت بجد انكم اخواتي اللي بيحبوني و اكتر كمان

يا اخواني و الله انا مش مسافره عشان الفلوس انا حالتي الماديه كويسه و الحمد لله

ثانيا انا خريجه كليه اعلام جامعه القاهره قسم علاقات عامه و اعلان

و معايا سنه خبره

خليني صريحه معاكم

شوفوا اد ايه فرص في مجالي سهله قوي

و انا نفسي اتعرض عليا فرص هايله

بس

ايه التمن؟؟؟؟؟؟؟؟؟؟؟

الحمد لله ربنا و هبني كتير من المواهب

غيرها مش هتكلم كتير

بس عشان انا اهم حاجه عندي انسانيتي و كرامتي و ........

رفضت و بشده

و بالرغم من اني كنت مغتربه و في مدينه جامعيه من اللي بيقعدوا اربعه في الحجره اللي 3 متر في 3 متر

بس

دايما كان بيربطني بربنا و بتربيتي حبل متين حتي لما يتفك شويه ارجع اشده تاني

بس انا عايزه اخرج لاي مكان

اتخنقت

عارفين معني ان الانسان يكون في غربه حتي في وطنه؟؟؟؟؟؟؟؟؟؟؟؟

انا مش هرمي نفسي في النار و لو العقد ده مش جايب همه خلاص

و معلش تقلت عليكم شويه بس مهما كان انا خرجت بناس جميله زيكم

[قديم]

اخت سلمى

المميزات

بصراحه انا شايف العرض هذا مغري جدا والمرتب فعلا كويس جدااا . حسب خبرتك ومؤهلاتك.

الحياه بالكويت .. جدا ايضا معقوله ..تقدري تعيش حياه كريمه ياقل من نصف هذ المرتب .

عيوب العرض

هذا هــو العيب في العرض كونه مغري جدا ..

المشاكل

كونك لوحدك...؟ فرق بين الغربه المحليه والغربه الدوليه.؟؟؟

العرض اللي تلقيتيه . وحسب تخصصك .. نادر من يحصل عليه .... هذا هــو العيب في العرض كونه مغري

الرأي

انصحك اسالي بدقه عن الشركه بالاسم عن طريق من تثقي فيهم . واسالي عن سلوك العاملين فيها .. و و و .. وهل هي حقيقيه او وهميه او غطاء لمجله ..

فحذاري ان تصبحي فتاة غلاف .

تم تعديل 23 أكتوبر 2006 بواسطة قديم

[Wilds Horse]

السلام عليكم ورحمة الله وبركاته

تشرفنا ياسلمي وتخصصك فعلا ممتاذ وممكن تحصلي فرص عمل ممتاذة بمصر ،،

وربنا يقوي ايمانك ويحفظك ،، ويوسع عليكي ويزيدك ، بس اسمحي لي اعلق علي نقاط بسيطة ممكن يستفيد منها الاخوة اللي يقرؤ الموضوع

بس الاول احب اقول اننا كده عرفنا تخصصك بس الشئ المهم اللي ماقلتيهوش ايه هي الوظيفة المعروضة عليكي ؟؟؟

وقبل ما اكمل كلامي شد انتباهي تعليق الاخ الكريم ( قديم ) [/فحذاري ان تصبحي فتاة غلاف . ] احب اطمنك واطمنه الموضوع مش لهالدرجة

الشركة دي شركة كبيرة ومعروفة علي مستوي الكويت ،، مش عارف الاخ قديم هل هو موجود بالكويت ام لا ،، لكن انا اقيم بالكويت من 12 سنة واعرفها كويس ،، انا قلت انا المرتب معقوووول ان لم يكن ممتاذ بالنسبة لمبتدئة ،،، لكنه مش فرصة جامدة ويادوب يعتبر بداية

وفي الحالة بتاعة التعاقد بتاعك لمدة محددة احب تعرفي حاجة مهمة انه في الغالب انه ( عقد حكومي ) ومعناه ان الشركة اخذت مناقصة او تعاقدت مع احد مؤسسات الدولة بعقد لمدة سنتين في الحالة بتاعتك والدولة بتسمح للشركة باحضار عمالة بعدد معين وبعد انتهاء العقد يسافروا بلادهم ،، المهم ياست سلمي العقد الحكومي من حقوق العاملين فيه ان تذاكر الذهاب والعودة تكون علي الشركة ، وطبعا لك قيمة اجازات سنوية 14 يوم عن السنة ( ممكن تاخذي قيمتها ) ونهاية خدمة 15 يوم عن السنة يعني لو راتبك 250 دينار فبيكون من حقك 28 يوم قيمة رصيد اجازات و 30 يوم مكافاة نهاية خدمة ( عن السنتين ) ، احسيبها انت اقسمي راتبك علي 26 يوم واللي يطلع اضربيه في 58 يطلع الناتج

وعلي فكرة حقوقك مضمونة لان الدولة هنا ما بتنهيش الاقامة بتاعتك الا بعد توقيعك باستلام كافة مستحقاتك من الشركة

ممكن طبيعة عملك تكون مريحة وممكن تكون صعبة وتتطلب الجهد والتعب ( علشان كده باسالك ايه هي الوظيفة )

وحتي اذا كنت مرتاحة ماديا وده ما يمنعشي انه لابد يكون العائد مجزي لكن مجرد انك تسافري علشان انك تجربي حياة تانية لانك اتخنقتي

سلمي احنا كلنا جربنا الاحساس ده احساس بالاختناق والغربة بالوطن ،، وانت مجالك كويس وممكن يكون فيه متعة بالعمل وتجديد دائم وده شئ مش ها تلاقيه في السفر لدول الخليج لان الحياة هنا مثل معسكر العمل ـ ومن ناحية الكرامة الانسانية وده شئ مهم جدا طبعا ، فالحال هنا مثله في اي مكان تاني هاتلاقي الناس الكويسيين وها تلاقي الناس الوحشين وكله بيتوقف علي درجة استجابة البنت وقبولها او رفضها

ماحدش بيغصب حد علي حاجة ،،،

وعموما اذا عندك اي استفسار او تحبي حد يسال لك عن شئ معين هنا ،،، فاخواتك بالمنتدي هنا كلهم تحت امرك

[salma]

شكرا لتفاعلكم معايا الوظيفه هي بائعه في المراكز التجاريه الجديده بالسالميه

الشغل لمده 8 ساعات مقسمه علي شفتين 4 و 4 ساعات

انا اسمع ان السالميه غاليه في الايجار

علي العموم السكن الجماعي بيحل المشكله

بس انا لحد دلوقتي لسه متردده

ادعولي

[زعلان]

ربنا يوفقك ويحفظك وخلي بالك من نفسك

[بنت النيل]

شكرا لتفاعلكم معايا الوظيفه هي بائعه في المراكز التجاريه الجديده بالسالميه

الشغل لمده 8 ساعات مقسمه علي شفتين 4 و 4 ساعات

انا اسمع ان السالميه غاليه في الايجار

علي العموم السكن الجماعي بيحل المشكله

بس انا لحد دلوقتي لسه متردده

ادعولي

الاخت سلمى

لقد ارسلت لكى على الخاص وقولت لكى ان العرض والراتب ممتاز وكويس بالنسبة للكويت

وشرحت لكى كيفية المعيشة هنا بالكويت على اساس الراتب ولكن لم اكن اعلم ماهى الوظيفة التى ستعملى بها

لانك لم تذكريها الا الان وهى بائعه فى المراكز التجارية الجديده بالسالمية كما ذكرتى

فى هذه الحالة فنصيحة من اخت لاختها خايفه عليها انصحك بعدم قبول هذه الوظيفة فعلا لانك صدقنى سوف تتعرضى الى ما لا يخطر فى بالك وخصوصا ان المكان بالسالمية وما ادراكى بمحلات السالمية وما يورد عليها من فئات الناس

فى اللى هيقول ان الواحده المحترمه تقدر تحافظ على نفسها لو هى فين ماشى ده صحيح بس ايه اللى يجبرها انها تعرض نفسها لهذا ؟؟؟

لا يا سلمى لا انصحك كما قلت لكى اناهنا بالكويت من 11 سنة واعرف الكثير والكثير وبشوف الاكثر انا بقولك كدا لان انتى باين عليكى انسانه محترمه ومش هتقبلى اللى ممكن تتعرضى له وخصوصا كمان انك بتقولى ان العقد فيه شرط صح

لكن غريبه اول مره يطلبوا لهذه الوظائف عرب فى العاده بيكون المطلوبين اسيويين فلبنيين بالاكثر لان يعنى هذه الامور التى تحدث لا تفرق معهم كثير ربنا يرحم عبيده

وده رائى بصراحة وطبعا الراءى الاخير راجع ليكى

[النسر المصري]

اخت سلمى

انا متربي في الكويت من تلاتين سنة واعرف عنها اللي مايعرفهوش الكويتي نفسه اللي ليل نهار سفريات هنا وهناك

وانا احد الشاهدين على الاحداث التي حصلت للبنت مصرية .... والتي تعبر بشكل واضح عن الظلم والقمع

اختي الكريمة

لا يوجد ماهو اغلى من الكرامة...كرامتك كانسان...كمسلمة...كمصريه

وكما شرحت لك بنت الليل ان ذلك العمل في السالميه مليء بالمخاطر

فانا اؤكد انه مهين لكرامتك ....فسوف تتعرضين لما ما يتعرضتيه من قبل في حياتك

عوضا عن الراتب الضعيف...وأؤكد ضعييييييييييييييف

فهو لايسمن ولايغني عن جوع....

اختي الكريمه اذا اردت اي مشورة اخرى والتكلم باستفاضه...فانا مستعد لذلك...

ولن في النهاية...اضم صوتي لصوت الرافضيين

والسلام عليكم