ممكن حد يقولي وصفة الحمام المحشي بالرز

[toti]

ممكن حد يكون متميز يقولي البهارات اللي بتتحط في الحمام المحشي بصراحة انا باكلة في مصر عند ابو علي اللي في عباس العقاد طعمة تحفة

و نفشي اكلة مووووووووووووووووووت بس التوابل الللي بيحطها في الرز علشان تديني نفس الطعم مش عارفاها

ممكن حد يقولي بيحط ايه توابل حفضل مستنية ردكم

[Folana]

السلام عليكم ورحمة الله.........

الاخت الفاضلة توتى...اهلا بك معانا.....

انت طلبتى ان اللى يرد يكون متميز..وحيث اننا لسه الصبح والمتميزين لسه نايمين...فاسمحى لى ارد انا عليك بالنيابة عنهم ..وهم كلهم اخوات فاضلات ..لكن لحد ما يشوفوا موضوعك انا حاسمح لنفسى انى ارد عليك....اوكى؟؟؟

انا باحشى الحمام بكذا طريقة ...منها لما اكون مستعجلة ..ومنها لما اكون راضية عن اهل المنزل ..لكن فى الحالتين بيطلعوا حلوين برضه...

اول حاجة انت سألتى عن البهار....ده بيكون فلفل مطحون اسود...او ابيض..بس انا باحس ان الاسود له طعم افضل...بهار ..جوزة الطيب مطحونة ..وهى دى الى بتدى طعم الحمام المميز....انت عارفاها اكيد هى بتتباع عن العطار شبة نواة الخوخ كده بس اصغر وناشفة بتتطحن فى الكبة وتحفظيها ..ولو انى بافضل انها تتطحن حسب الحاجة علشان تحتفظ بنكهتها........

- عند سلق الحمام ..طبعا بتغلى المية وتضيفى ها بصلة مبشورة وحبهان وورق لورا ..وتضيفى حمامة وتستنى لما المية تغلى تانى وتضيفى الحمامة التانية وهكذا....وتسيبى النار تغلى مدة ربع ساعة وبعدين توطى عليها ...

- للحشو بقى.....اهم حاجة انك تدعكى البصل المبشور بالملح والفلف كويس جدا لان مية البصل دى هى الى بتخلى الطعم مسكر وجميل.....

بتدعكى البصلة وتضيفى التوابل ..وممكن تحمرى شوية صنوبر وتضيفيهم على الخلطة بالسمن اللى اتحمروا فيها..او تضيفى ملعقة سمن او زيت على الخلطة..وتحشى...

- طريقة تانية....تبشرى البصل حسب الكمية طبعا وتحطيه على النار فى السمن يصفر بس وبعدين تضيفى الرز وتفضلى تقلبى وتقلبى لحد دراعك مايوجعك :wub:...لحد الارز مايبدأ ياخد لون ويفلفل معاكى....

تضيفى التوابل ..وتبدأى تحشى ..

خلى بالك برضه ..لو فيه جلد مقطوع او بيفكر انه يتقطع يبقى تخيطه الاول علشان الحمام مايفتحش منك .....

او ممكن تلفيى كل حمامة فى ورق فويل لو عايز تضمنى سلامة الحمام.....

ولما يستوى تسيبه لما يبرد ..وبعد كده تحمريه ..اما فى زيت ...او تشوي على الشواية ...وتحرقى له فحمه وتغطيه علشان قال يعنى مشوى على الفحم....

يارب اكون قدمت لك اللى انت عايزاه ....وبرضه فى انتظار الاراء الاخرى...............

[toti]

انا متشكرة جدا جدا علي الوصفة المتميزة طبعا من ريحتها كدة و سريعة طيب قولي هو بيتحط فيها مستكة و لا لا انا اول مرة اعرف ان بيتحطلها جوزة الطيب

علي العموم طبعا حجربها و اقولك

[Folana]

السلام عليكم ورحمة الله.............

ياستى لا شكر على واجب انت نورتينا............بالنسبة للمستكة فيه ناس بتحط فى الشوربة فصين مستكة بس انا عن نفسى مش بحبها مع شوربة الحمام..لكن مع الارانب بتكون ضرورية.........

جربيها مرة من غير مستكة ..ومرة بالمستكة وانت حددى بقى اللى تفضليه..........وجوز الطيب ضرورية مع الحمام ..بس ماتكتريش منها ....

واكون سعيدة باسئلتك واتمنى افيدك..............