ممكن طريقة الفطير المشلتت

[toti]

ممكن حد يوصفلي بالظبط طريقة عمل الفطير المشلتت الفلاحي اللي علي اصولة و هل الدقيق زيرو بس و لا نصف زيرو و نصف بلدي

علشان في ناس وصفوة ليا و عملته طلع ناشف جدا بس و النبي بالخطوات علشان اعملة اصلي بحبة جدا

[مومو الامور]

السلام عليكم ورحمه الله وبركاته

كل سنه وانتم طيبين

تم تعديل 22 أكتوبر 2006 بواسطة مومو الامور

[Folana]

السلام عليكم ورحمة الله...

كل سنو وانت طيب (ة) يامومو ربنا يكرمك ....

توتى...انا ماجربتش اعمله قبل كده...لانه محتاج عضلات وانا كائن ضعيف..لكن جبت لك الوصفة يارب تنفع معاك.....

المقادير........

2 كوب دقيق

نصف ملعقة صغيرة ملح

نصف كوب ماء دافىء للعجن

كوب سمن بلدى

الطريقة......

ينخل الدقيق وتعمل به حفرة يضاف اليها الماء والملح وتعجن جيدا

يلت العجين عدة مرات ...ويلت يعنى تفضلى تشيلى وتحطى فيه علشان يتخلله هواء ..- عارفة؟-

بعد كده تسيبى العجينة تستريح شوية لمده نصف ساعة

ابدئى اللت والعجن تانى..وسيبها ترتاح برضه

بعد كده تفرد العجينة بالنشابة على الترابيزة لحد ماتبقى رقيقة...

ادهنى سمن وابئى شدى الاطراف من الجوانب برقة حتى لا ينقطع العجين وبعد كده اطوى العجينة من جميع الجهات

وحطى سمن تانى كتير طبعا فى كل ملاة بتطبقى فيها الفطير من احد الجوانب ...

وبعد كده اخبزيها فى فرن متوسط الحرارة لمدة نصف ساعة وتدهنى الوش بالماء فور خروجها من الفرن علشان وشها يبقى احمر

وفيه كمان بيعملوا الفطير ده رقات..يعن سمن وبعدين راق لحد ماتخلص..........

مش عارفة بقى حتعملى ايه ابقى طمنينى..............

[سمـ مصر ــا]

كل عام وانت بخير يا toti

بالنسبة للفطير المشللت أنا حقولك على طريقة سهلة

كيلو الطحين شيلى منة كوباية طحين (( يعنى كيلو الا كوب )) (( ويعمل لك المقدار دة فطرتين مشلتت و2 حلو ))

والماء كوب ونصف - ماء دافئ - ومعلقة صغيرة ملح - ممكن تعجينيها فى العجانة وبعدين تلتيها بأيدك لغاية ماتحسى أنها ناعمة

ولينة وتتركى العجين يرتاح نصف ساعة

وبعدين نقسمها 2 كبار و2 صغيرين

ونفردهم بالنشابة وبعد ماتحسى أنها أصبحت رقيقة أدهنيها بالسمن البلدى - الزبد لا لانة بيتحرق مع النار وتبقى سوداء -

وبعدين أتنيها من أول طرف لها بإتجاة وسطها وتكون التنيات عريضة شوية ومع كل تانية أدهنيها تانى

لغاية ما ينتهى معاكى العجين ويصبح كأنة شريط طويل

لفية كأنك بتلفى سويسرول وكل لفة تشدى شوية وتدهنى سمن

حتى تصبح فى النهاية بشكل السويسرول

وضعيها فى طبق وتتركيها ترتاح ربع ساعة

وبعدين تبططيها باليد فى الصنية وتضعيها فى الفرن حتى تحمر

أو ممكن تضعيها على طاسة بس تكون سميكة وتضعيها على النار فوق لغاية ماتحمر وتقلبيها

بس خلى بالك تكون النار هادية جدا

وبالهنا

تم تعديل 22 أكتوبر 2006 بواسطة سمـ مصر ــا

[toti]

انا بجد متشكرة جدا علي وصفاتكم و حجربها و اقولكم النتيجة بس ممكن قبل ما اجربها تقولولي الدقيق كلة حيبقي زيرو و لا نصف زيرو و نصف بلدي علشان متطلعش ناشفة

[bentmasria]

يا استاذتنا الجميلة

الدقيق بيبقى مخلوط يعنى نصف زيرو وبيكون لونه اصفر شوية وكمان

اعتقد لانها اول مرة ان طريقة مدام فولانه اسهل وتظبط معاكى

يعنى بعد العجن

جهزى ادامك طبق فيه دقيق

وطبق فيه سمن او زبدة سايحة

وقطعى العجين حوالى 10 قطع متساوية

ادهنى الرخامة زيت او سمن بالفرشه

وافردى بالنشابة وطبعا عوصيها رشة دقيق صغيرة عشان ما تلزقش فى العجين وبعدين بايديكى مفرودة على القرص كله لغاية ما يبقى سمك الطبقة الواحدة ارق شىء ممكن وحطيها فى الصينية المدهونة جيدا بالسمن

وادهنيها سمن

وارجعى كررى الموضوع فى كل الطبقات لغاية آخر واحدة وبعدين على الوش ممكن قطعتين زبدة صغيرين علشان ريحتها تطلع هايلة

الفرن حرارته 250 وحطيها فوق علشان ما تتلسعش منك مدة 15 دقيقه وبصى عليها اول ما الوش يبتدى لونه يبقى اغمق سنة من اللون الاصلى تابعى بحذر لغاية ما توصلى للون المطلوب وغالبا زمن الفرن لا يتجاوز 25 دقيقه ويكون الفرن سخن قبلها بربع ساعة علشان تطلع هشة

بالهناء والشفاء

وطمنينا

كل سنة وانتى طيبة

[حسين فؤاد]

رجاءطريقه عمل الفطير الدمياطى