ياريت كل اللى فى دبى يدخل ضرورى

[fouad]

السلام عليكم ورحمة الله وبركاته

لكل الأخوه اللى فى دبى أتمنى انهم يساعدونى فى طلبى وشاكر ليهم مقدما

أنا ان شاء الله جاى دبى بتأشيرة زياره على نصف شهر نوفمبر علشان أبحث عن شغل

مؤهلى : حاصل على بكالوريوس تجاره انجلش سنة 2004

الانجليزى بتاعى الحمد لله كويس

ومعايا كورسين محادثه من الجامعه الأمريكه

وحاصل على شهادة ICDL فى الكمبيوتر

واشتغلت فتره فى قريه سياحيه فى شرم الشيخ كمحاسب

ياريت بقى ياجماعه تدونى النصايح اللى يخدها واحد نازل يشوف شغل فى دبى من جميع النواحى

طيران ايه وسكن وكيفية البحث عن شغل وازاى يومى يبدأ كل يوم أعمل ايه من بدايته وكمان أخد معايا حوالى كام درهم

بجد هكون شاكر ليكم جميعا ياجماعه

السلام عليكم ورحمة الله وبركاته

[fouad]

ايه ياجماعه كل سنه وأنتم طيبين

كل العدد ده شاف الموضوع ومحدش رد خالص

ليه كده انا عشمى فيكم بعد ربنا كبير انكم تفيدونى فى الموضوع ده

[eltayer]

في البدياه كل سنه وانت طيب وفي انتظارك في دبي

الصديق العزيز اخيرا لقيت حد هيرد عليك

عاوز نصيحة ولا هتزعل من الاول لا الصراحة راحة في الاول

بس علي العموم شكلك طلعت الفيزا خلاص وكل شئ تمام يعني ملهاش لازمه النصيحة دي

نخش في الجد

الحياه في دبي

الحياه في دبي من اغلي البلاد التي من الممكن ان تزورها او تعيش فيها

بس ياسيدي علي اساس ان ليك حد هتيجي عليه اول يوم يعني اول يوم هيكون سهل

طبعا مش هتسكن عنده علطول يعني لازم سكن خاص دي سهله ومتوفره في كل حته في دبي

بس المشكله هتعمل حسابك ان هيكون معاك عشر اشخاص في حجره واحده وانت وحظك في موضوع الجنسيات

ادع ربنا ان يكون هنود ومش مصريين

تكلفه السكن في الشهر من حوالي 300 الي 500 درهم في الشهر طبعا بيندفعوا مقدم يعني تعمل حسابك عليها

الاكل هتمشي حالك في الاول اعمل حسابك علي نفس تكلفه السكن ومتصرفش في حاجة ملهاش لزمه خليك في اضيق الحدود

لان الاكل هنا غالي جدا

يعني دلوقتي انت عاوز الف درهم اكل وسكن

المواصلات في دبي نوعين من المواصلات

النوع الاول التاكسي الوطني وانصحك متبصش عليه اساسا خالص

النوع الثاني الاتوبيسات العامه وهي من افضل وسائل المواصلات في دبي

تكلفه الرحلة درهم ونصف

يعني اعمل حسابك في نفس التكلفه السابقه للمواصلات لانك هتستعمل مواصلات يامه وخصوصا في الفتره الاولي

وصلنا دلوقتي كده حوالي الف ونص درهم

نخش علي التدوير علي الشغل انت معاك بكالوريوس تجاره انجليزي والانجليزي بتاعك حلو

الانجليزي حلو دي ميزه حلوه هنا بس الاحلي اللي انت بتعرف عربي ودة اساسي هتفهم الجمله دي لما تيجي هنا

بكالوريوس تجاره لو مصمم عليه هتتعب انا عن نفسي معايه واحد شكله بس عربي واشتغلت حاجة تانيه خالص واساسا مسؤلنيش انت معاك ايه

يعني العمليه هنا ملهاش دعوه بالشهاده خالص

اذن طريقه التدوير علي الشغل

كفايه عليك كده دلوقتي لحد مترد وتقلي ان جي علي مطار دبي ولا الشرقه عشان دي بتفر وجي علي صديق هنا ولا جي لوحدك ومتعرفش حد هنا خالص

وكمان مُصر علي محاسب ولا لا

في انتظار الرد

تم تعديل 25 أكتوبر 2006 بواسطة eltayer

[wahed masry]

الأول لازم تقتنع بإن الأرزاق بتاعه ربنا

وبعد كده أقولك أنا عشر سنين في الأمارات بصراحه غاليه غاليه غاليه غاليه وعموما ربنا يوفقك وتلاقي شغل

وياريت تطمني لما توصل

وأقولك حاجه تانيه لو صادفت أي مشكله ويارب لأ إبعتلي وإنشالله أساعدك

[زعلان]

تحية طيبة أولا

انت فعلا محتاج نصيحة واحد يكون ظروفه مشابهة ليك يعني جي البلد بدون دعوة عمل و عازب

دبي بصورة عامة فاحشة الغلاء

شيء طيب انك تجيد اللغة الانجليزية و العربية فاللغة العربية نقطة جيدة في صالحك وفقا للوظيفة

البحث عن فرصة عمل جيدة يحتاج لصبر ووقت في ظل كم العمالة الرخيصة الضخمة في البلد

السكن مكلف جدا( شقة استديو 48 -60 الف درهم /شقة غرفة 60-75 / شقة غرفتين 70-90 الف درهم ) اذا قد تحتاج ان تشارك شخص في السكن

ستحتاج لسيارة لأنها ستسعفك جدا اذا كان لديك رخصة دولية أو أجنبية ستتمكن من ايجار سيارة لمدة شهر (1800-2500 درهم ) ستساعدك في الوصول لأي مكان لعمل انترفيو كما انها ستوفر عليك مجهود بدني ونفسي كبير اذا ما لجأت للمواصلات العامة (باصات مكيفة) لكن مواقف الحافلات غير مكيفة واحينا غير مضللة

هناك أيضا تاكسي المدينة مكيف وهو كما قرأت في الصحف أنه تاكسي رخيص سته راكب لكن عليك معرفة مسارته وكيفية الاتصال به وتكلفته تقريبا خمسة دراهم للمشاور الواحد

وهناك التاكسي العادية (مريحة ومكيفة خمس شركات تصلك اينما كنت )وهي مكلفة جدا متوسط تكلفة المشاوار 40 درهم

أقل سكن في الفنادق 250 -350 درهم و هي الفنادق الرخيصة لليلة الواحدة

كما ذكرت لك انت تحتاج لشخص ظروفه شبيهة بظروفك فمعلوماته قد تكون افضل

الايام الأولى في دبي اذا لم تكن الظروف مهيأه ( من قبل شركة محترمة أو شخص صديق أو قريب ) ستكون متعبة الا انك قد تتأقلم وتوطن نفسك في أسبوع اذا كنت شخص حرك

ربنا معاك يا ولدي لكن فرص العمل والحياة قد تكون افضل في امارات اخرى كالشارقة وعجمان ورأس الخيمة و الفجيرة و العين و أبو ظبي وان كانت أبو ظبي بدأت محاولة ان تنافس دبي في الغلاء الا ان دبي متربعة على العرش بلا منافس مع ثبات الدخول

[abo 3ali]

صديقنا العزيز فواد

اهلا بيك فى دبى .. و ان شالله ربنا يوفقك و تلاقى شغل

بص ياسيدى انت ممكن تدور على شغل من خلال جريده الجلف نيوز . حتلاقى ملحقين فيها واحد اسمه ابينوتمنت وواحد اسمه كلاسيفايد .. حتلاقى فيهم شغل كتير و خصوصا انك حتيجى فى فتره كويسه بمعنى ان الناس فاقت بعد رمضان و العيد و الاجازات

اكتر تلات ايام بينزل فيهم اعلانات و تركز فيهم هما حد و تلات و خميس و مافيش مانع باقى الايام رغم قلتهم

ممكن برضه فى الجلف نيوز تعمل اعلان انك بتبحث عن وظيفه فى مجالك و تنزله حد و تلات و خميس فى الكلاسيفايد و بتاخد الاحد اللى بعديه فري ..و ده بيكلف حوالى 80 درهم

لازم تظبط السى فى بتاعك على الموجه اللى هنا بمعنى اقلب و انسى السى فى بتاع مصر . هنا فى شركتين بيكتبوا السى فى بحوالى 500 درهم بشكل احترافى و منهم واحده بتدورلك على شغل او بمعنى اصح بتكتبلك السى فى و بتبعته على فاكسات متخذى القرار فى الشركات الهامه و الكبيره

السكن ممكن مشاركه فى غرفه فيها خمسه و انت السادس و ده تكلفته 700 درهم شهريا

انصحك تستخدم الاتوبيسات فى تحركاتك لانه رخيص و حيمكنك تتعرف على البلد بشكل افضل بس لو عندك انترفيو و مستعجل خد تاكسى علشان متبهدلش لبسك و توصل فى ميعادك خصوصا انك حتيجى فى وقت كويس مش حر و نار جهنم زى الصيف

لازم و دى نصيحه اخويه تكون هادى و تعرف ان الارزاق بايد ربنا و تتوكل على الله و ان شالله ربنا حيوفقك

الحياه فى دبى مش سهله و غاليه بس مين قالك ان الحياه فى مصر وردى و رخيصه المهم البنى ادام يكون مكافح و عنده هدف عاوز يوصله

الاخ اللى بيقولك اسكن مع هنود بلاش مصريين ده رايه الشخصى او يمكن هو له ذكريات مش لطيفه لكن اوكد لك انك لو سكنت مع مصريين كويسين و رجاله حتفرق معاك الغربه جامد

و نصيحيه اخويه منى سمعتها قبل ماجى و كلنا بنرددها و هى حكمه .

اذا ابيت يوما ان تصعد الجبال .. فلتعش ابد الدهر فى الجحور

و نصيحه تانيه . انت ليك ودنين . اسمع اللى يعجبك و اللى تقتنع بيه و اللى ميعجبكش طلعه من الناحيه التانيه

اهلا بيك يا صديقنا العزيز و ربنا يوفقك و ما دفعنى للكتابه اليك هو احساسى ان ربنا ادانى شويه معلومات و لازم مابخلش بيها على طالب نصيحه

و لعلمك انا كنت نفس ظروفك و ربنا اكرمنى كرم غير عادى و كنت فى وقت من الاوقات محتار بين شغلنتين ..

عيد سعيد على الجميع و ربنا يكرمك و اهلا بيك فى مدينه الاحلام و الفرص و التعب و الاجتهاد دبى

اخوك ابو على

[fouad]

فى البدايه أحب أشكركم جميعا بردكم عليا

بالنسبه لسؤال الأستاذ الطاير

اللى جايبلى التأشيره هو اللى هيوصلنى لسكن ومعايا ناس أعرفهم موجودين هناك واخد أرقامهم وعلى فكره انا مش نازل لوحدى انا معايا صديق نازل يدور على شغل برضه ولحد دلوقتى أعتقد ان الطيران هيبقى العربيه يعنى هنزل الشارقه لأن هتوفر فلوس ليا عن مصر للطيران

وبالنسبه للشغل مش شرط رئيسى محاسب ممكن اشتغل فى المبيعات فى المشتريات فى التسويق عادى يعنى

وايه اللى هيفرق انى انزل دبى او الشارقه ؟

وايه معنى ان اللغه العربيه نقطة فى صالحى مع ان دبى بتطلب الانجليزى ؟

بالنسبه للأخ أبوعلى

حضرتك بتقول شركتين بيكتبوا السى فى وفيهم واحده بتدورلك على شغل طيب متعرفش تذكرهم بعناوينهم وتليفوناتهم

وياجماعه برضه شركات التوظيف الموجوده اعتقد انها كتير مفيش حد يعرف موقع يكون مجمعهم بالعناوين والتليفونات ؟

عايز أعرف حاجه هى المواصلات زحمه هناك ومتعبه برضه ولا ايه على أساس ان حضرتك بتقول لو وراك انترفيو تخد تاكسى علشان لبسك ميتبهدلش ومتتأخرش ؟

مش عارف أشكركم ازاى ياجماعه

[eltayer]

كويس قوي ان اللي جيبك هو هيسكنك ويوصلك وكمان معاك واحد زميلك يعني كده نص المشكله اتحلت

فاضل النص الاكبر وهو الحصول علي شغل

اعرف جيدا انك لازم في خلال شهر علي الاقل تكون حصلت علي شغل عشان مضطرش تعمل مغادره وتعمل تاني زياره جديده

المهم لازم تركز في التدوير كويس

بالنسبه للعربي ليه مهم لان هنا في اعتبار سايد لكثره الهنود هنا ان كل الناس ببتكلم انجليزي انما العربي قله من الناس

وقليل جدا اللي بيعرف عربي وانجليزي مع بعض بصفتك مصري يعني بتعرف عربي وانت بتقول انك بتعرف انجليزي حلو كده جميل

فاضل كمبيوتر

وطبعا الارزاق بيد الله

المواصلات الباصات هنا تعتبر من افضل وارخص وسائل المواصلات ومريحه وموعدتها سابته يعني لو وراك ميعاد

والميعاد ده هيوفق ميعاد الباص تركب وانت مطمن مفيش بهدله ولا حاجة الباص ليه عدد محدد للركاب عدد الكراسي وبيزيد عليه شويه وقفين

بس يقفوا مستريحين مش كل مصر علب سردين

لا قعت او وقفت هتكون مستريح علي الاخر

التاكسي هو من ناحيه افضل فهو افضل وتقريبا نفس السرعه بس هتكون لوحدك فيه بس هو غالي جدا ومنصحكش تركبه وخصوصا انك لسه معندكش دخل

في البلد لا كده هتصرف كتير قوي علي المواصلات

هناك نوعيه اخري من التاكسي وهو تاكسي عادي سياره ملاكي عادي يملكها اي حد بيقوم بتأجرها وهنا الاجره بتكون بالتفاوض مع السواق

يعني تعتبر ارخص من التاكسي

اما خصوص شركات التوظيف دي انا اعرف انها موجوده بس مسمعتش عنها حاجة خالص

كل اللي اعرفه عنها وده قرأته في موقع وزاره العمل ان هذه الشركات بتقدم خدماتها بالمجان لطالب العمل علي ان تاخذ اجرها من صاحب العمل

عند الحصول علي وظيفة ده اللي انا اعرفه عنها بس معتقتش ان ده بيحصل هنا ربعدين لو اعتمد عليها هتضيع وقت كتير جدا معها وانت هيكون وقتك محدد جدا هنا

منذ دخولك البلد

نقطة وصولك في دبي او الشارقة دي علي اساس انك لو عاوز سكن رخيص تسكن في الشارقه لان دبي غاليه جدا في كل حاجة

فرص العمل تقريبا متساويه بين البلدين

ولكن الكل بيفضل دبي لان لها سحر خاص وشهره بس فرص العمل قليله

في مجالات معينه

بخصوص شغل المبيعات والمشتريات والتسويق ده لازم يكون عندك عربيه خاصه عشان تشتغل الشغل ده

نقطه اخيره او حاجة تعملها اول متوصل تعمل اعلان في الجرنان وتحط كل مؤهلاتك ورقم تليفون ممكن يكون صديقا اللي انت جيله ده هيسعدك كتير في الحصول علي وظيفه واعتقد ان تكلفه الاعلان حوالي ثلاثون درهم يعني رخيصه جدا وممكن تجبلك فرص عمل كتير

وربنا يوفقق ولما تقرب توصل بإذن الله ابعتلي وانا ابعتلك رقم تليفوني لو عزت اي مساعده

بس متتعشمش كتير انا لسه جي جديد ( يعني دي عزومه مركبيه ) بس ولا يهمه اتصل انت بس واللي فيه الخير يقدمه ربنا

اخوك ابراهيم الطاير

من اما برج العرب دبي ( القوز الصناعيه )

[abo 3ali]

بالنسبه للشركات اللى بتكتب السى فى و بتوزعه دول حتلاقيهم فى الجلف نيوز و ان شالله لما توصل ممكن تسيبلى تليفونك و انا اكلمك اديلك عناوينهم و اشرحلك اكتر عنهم

انا يا سيدى عندى ملف فيه كل شركات التوظيف فى دبى و الشارقه و ابو ظبى بعنواينهم و تليفوناتهم ممكن ابعتهملك على الايميل لما توصل باذن الله

توصل بالسلامه و فى انتظاراك يا بطل

[fouad]

شكرا ليكم ياجماعه على التوضيح ده كله

سمعت ان المواصلات بتبقى صعبه من الشارقه لدبى هل ده صحيح ؟

وبالنسبه لايميلى اهو ياجماعه

fouad8856@hotmail.com

fouad8856@yahoo.com

[abo 3ali]

ان شالله اول ماتوصل بلغنى بس انك وصلت بالسلامه و انا حابعتلك كل حاجه بالايميل

و خد السايت ده اتسلى بيه بشويه معلومات قبل ماتيجى حيوضحلك امور كتيره عن الامارات بشكل عام

http://www.egyatuae.com/

و بالتوفيق

[sendrella119]

احم.... احم

ازيكو يا جماعة انا بقي لي فترة بسيطة كده ما دخلتش الموقع

ابدا خناقة بثيطة كده :wub:

ربنا يوفقك يا فؤاد ويكرمك ان شاء الله ......

المهم انا اخويا في دبي بيعمل هناك في شركة محترمة الحمد لله ..ولما توصل ان شاء الله حا ابقي اديلك نمرة تليفونه .

يمكن يقدر يدلك علي موضوع الوظيفة ده.

بس مش مرتاح في السكن بيدفع ايجار عالي ومش عنده وقت يدور علي سكن كويس ورخيص.

كان ساكن مع واحد ...

وبعدين اضطر انه يسيبه علشان زميله بعت لزوجته تعيش معاه

لو حد يعرف اي معلومات عن سكن او محتاجين زميل معاهم

ياريت يقول علي طول ومفيش داعي للخنصرة :unsure:

[eltayer]

ايه يابطل انت محددتش الميعاد ولا ايه ولا دي لسه فكره

علي العموم ارقام التلفونات نزله عليك زي المطر ابسط يعم دي حاجة تتحسد عليها في بلد شكل دي

انوي بس انت علي خير وانشاء الله ربنا معاك

بس لازم تكون راجل ومش من اول وقعه تهرب هنا ممكن تقبلك شويه صعوبات في الاول وده شئ طبيعي في البداية

بس انا مش عاوز اخوفك بس مش عوزك تنخدع في البلد شكلي اما جيت ودبي دي في التليفزيون حاجة تانية خالص

انا عاوز اوضحلك الصوره عشان لما تيجي بالسلامة تلاقي الصوره حقيقية

واكيد صحبك قلق عليها

بالنسبة للاخت sendrella119 ياتري اخوكي ساكن فين بالظبط في دبي وبكام

لان معظم السكن المتوفر في دبي بيكون مشترك يعني عشر افراد في حجرة واحده ودي تكلفتها حوالي من 300 الي 500 درهم في الشهر

يعني لو هو كده يبقي ده العادي واحسن ميروح حته ارخص وتكون ابعد يصرف الفرق في المواصلات

[Tafshan]

مواقع توظيف متعدده :

http://213.132.37.230/bac/job_bank.asp

http://www.carrefouruae.com/English/recruit.asp

http://www.dubaiinternetcity.com/html/dic_jobs.asp

http://www.enritimes.com/oman.asp?countryid=5

http://www.etisalat-careers.ae/

http://www.melcojobs.com/

http://www.nadia-me.com/seeker/index.cfm?C...FTOKEN=14452048

http://www.it-people.com/

http://portal.dubai-e.gov.ae/http://web-vg...;HdrParent=2572

و بالله التوفيق

[fouad]

شكرا ليك يا أبو على على السايت وعلى نصايحك

شكرا للأخت سندريلا على محاولتها المساعده وبالتوفيق للجميع

شكرا للأخ طفشان على مواقع التوظيف دى وهدخل أشوفها ان شاء الله وأسجل فيها

الأخ ابراهيم الطاير

متقلقش ياباشا احنا رجاله والحمد لله وأكيد الواحد عارف ومتأكد انه هتواجهه صعوبات وبمعونة ربنا ان شاء الله الواحد يقدر يتغلب عليها

بالنسبه لتحديد ميعاد السفر ان شاء الله هحجز على اخر الأسبوع هيبقى فى نصف شهر نوفمبر باءذن الله وربنا يكرم

بقولك ايه فيه ناس كتير بتقولى اسكن فى الشارقه أفضلك ايه رأيك ؟

وبالنسبه لأرقام التليفونات اللى زى المطر أنا لسه مخدتش ولا رقم بس أتمنى اننا كلنا نبقى اخوات واللى فى ايده المساعده ميبخلش

وشكرا ليكم مره تانيه

[fouad]

بالنسبه لشركات كتابة السى فى واحد قاللى ان أكبر الشركات دى هى شركة بايت ودخلت موقعها لقيت السى فى وال covering letter ب 129 دولار أولا عايز اعرف هل كتابة شركة للسى فى بتاعى هتنفعنى كويس وهتفيدنى ولا مجرد فلوس بتترمى وخلاص وكمان عايز أعرف ال covering letter ده عباره عن ايه وبيتكتب فيه ايه وايه فايدته فى التقدم لوظيفه ؟؟

تم تعديل 31 أكتوبر 2006 بواسطة fouad

[abo 3ali]

بالنسبه للشركات اللى بتكتب سى فى فانا ارشح لك شركه واحده موجوده فى بر دبى و اسمها فريست امبرشن و دى تقريبا بتاخد 800 درهم رسوم كتابه السى فى و توزيعه على الشركات الكبيره زى ماقولتلك ..

بص من ناحيه ان هى بتنفع فدى وسيله او كارت بتلعب بيه على اساس انك مفروض تاخد بكل الوسائل المتاحه لحد ماتلاقى شغل بمعنى انك لو اشتغلت فى الاول على الجرايد سواء يتدور فيها او نزلت فيها اعلان و بعدين شركات التوظيف الاون لاين و الاوف لاين و بعدين الشركه دى . بمعنى اكتر اللى تكسبه العب به طالما بتدور على شغل . لكن لو الامور الماديه مش متاحه اوى الجريد و شركات التوظيف ممكن تكفى

بالنسبه للسى فى بتاعك فان شاء الله لما توصل ابعتهولى و انا حابص عليه بصه و اقولك راييى و نشوف لو محتاج تكتبه من اول و جديد عند شركه ليتوافق مع متطلبات هنا . او لو ممكن تعدل انت فيه بنفسك بشكل افضل لو عندك خبره معقوله فى كتابته

بالنسبه للتليفونات اللى مستنيها اوصل انت بس الاول هنا بالسلامه و بينا ايميلات و حتلاقى كل الداتا اللى انت محتاجها على الايميل بتاعك

و افتكر دايما اللى قولتهولك .. خليك هادى و متسعجليش اى حاجه و الارزاق بايد ربنا و ربنا يوفقك و يكرمك

[fouad]

أقولك ايه وأعيدلك ايه يا أبوعلى والله أنا بشكرك جدا على نصايحك الغاليه

بالنسبه للسى فى طيب وليه استنى لما أوصل وابعتهولك ما أنا ممكن أبعتهولك من دلوقتى على ايميلك وتشوفه وتقولى رأيك فيه لو عايز زيادات

ومقلتليش ايه فايدة ال COVERING LETTER

شكرا ليك ولكل الأخوه اللى بيحاولوا يساعدونى

[abo 3ali]

يا عم فواد و لا تقول و لا تعيد و ارجو ان اللى النصائح تبقى فى ميزان حسناتى لانى باعمل كده لوجه الله تعالى بدون ماعرفك او حتى اشوفك .. و ربنا يديم المعروف و يقدملك اللى فيه الخير

الكفرنج ليتر ياسيدى دى ورقه فى اول السى فى بتحكى فيها شويه عن نفسك بشكل مختصر و بتقول اد ايه انك مهتم بالشغل مع الناس دى ..

كتابه السى فيهات دى مداراس كتير و الكفرنج من ضمن مدرسه منهم بتقول انه مهم و احترافى لكن عاده مفيش حد بيدقق لان الناس معندهاش وقت تقرا اكتر من صفحتين و فى وقت ميزيدش عن عشر ثوانى . يعنى مش كل حاجه تتكتب فى السى فى بحيث انك متلاقيش حاجه تقولها فى المقابله

انا بالاضافه انى محاسب فانا اشتغلت فى شركه توظيف كبيره فى مصر يعنى عندى خبره بسيطه بالمواضيع دى بالاضافه الى انى ماسك هنا برضه فى الشغل الموارد البشريه بجانب عملى

ارجو انى اكون وضحتلك الصوره

و الايميل بتاعى اهو يا سيدى

deboush@hotmail.com

و بالتوفيق ليك

[fouad]

شكرا ليك يا أبو على وأنا ضفت ايميلك وان شاء الله نتواصل على المسنجر