ذكريات حُلم الطفولـــــــــــة.....البريئة :)

[se_ Elsyed]

روحي دخليه في كبس الكهربا هيزغزغك

وزغزغك فعلاً يا قرنفله ؟

أعتقد في مقولة بتقول إن هناك ملائكة ملازمة للأطفال بتحميهم .. زي ماحنا بنقول العين عليها حارس كده

أصل لو ما كانش في بودي جاردات من دول بتحمي العيال .. ما كانش ولا عيل فضل في الدُنيا

أنا أتزغزغت زيك كده يا قرنفلة وانا صغير.. لقيت حتت سيخ حديد في الشارع ... و لإني كنت لحد سن العشر سنوات قصير جداً ( يعني حوالي 173 سم مربع - زهيري معايا ولا نمت ؟ ) فطلعت عالكنبة وروحت دافس السيخ في الكبس وإذ بي إتنطر بتاع 5 متر ورا ويغمئن عليه ...

- مره كمان كنا بنبيض الشقة - بندهنا يعني - والراجل يا عيني قرب يخلص وجيت متسحب بالليل وماسك الفورشات الفنية وهاتك يا لوح سورياليه عالحيطه ...

- الغريبة بقى إن قليل قوي لما كنت أأذي نفسي أو اعور نفسي لإني كنت حريص .. بس كنت مصدر أذيه لغيري .. جميع إخواتي الاكبر مني يا إما بطحتهم وفتحت نفوخهم صبياناً وبناتاً .. يا عورتهم بحاجه والسلام ... أخويا الصغير - معايا هنا في السعودية دلوقت - مره كنت واقف في البلكونة في الدور الثاني ولقيته جاي في الشارع وحبيت اهز معاه هزار بوابين في منتهى البراءة .. وروحت خالع مشبك غسيل من الحبل ومنشن على دماغه .. أنا قلت ده مشبك مس هايودعو خالث .. وإذ بالمشبك يرشق في يأفوخ الولا ونافورة دم تنفجر .. طبعاً سديناها بشوية البن اللي كان بابا بيعدل بيهم دماغه .. طبعاً بابا جه ضربنا عشان خلصنا له البن المحوج :blink:

- حب الإستنطاع قصدي الإستطلاع بيبقى أعلى عند الولاد عن البنات .. فمافيش تليفزيون او كاسيت أو مكواتون كهربائيتون في البيت إلا أنا واخويا جبنا أجل أبوها وفكيناها عشان نتفرج على المذيعين وهما نايمين جوا التليفزيون .. أو أبلة فضيلة وهي بتقولنا يا ولاد يا ولاد تعالو تعالو جوات الراديو ...

يــــــــــــــــــاه .. ده اهالينا دول هايدخلوا الجنة حدف من اللي وريناه لهم ..

-------------------------------------

من الواضح يا قرنفل إنتي وبدريه إنكو إتربيتو في البراح والهووو بتاع الريف وأشجار وتوت وحركات .

أما إحنا فتربينا على صخب المدينة وضوضاءها .. أنا عشت معظم طفولتي المشردة في حدائق القبة وكانت سنيما الحدائق جنبنا لزق وتقريباً كنت أسبوعياً لازم أتفرج على فيلم .. ايام ما كانت التذكرة بسبعة ساغ - آه والله لسه فاكرها - يــــــــاه وكان جوز الحمام ثلاث فِرد ... ولإن السنيما كانت صيفي ومالهاش سقف .. ولإن ساعات كنا أخر الشهر والمصروف بيخستع مع النفر مننا فكنا بنطلع العمار اللي جنب السيما ونقف في شباك المنور اللي بيطل على السيما ونضرب الأفلام بلوشي بس الواحد بيبقى جتته خشبت على الفينال بتاع الفيلم ... لإن كنا بنبقى كذا عيل فكنا بنتبادل الادوار .. ناس تتفرج عالواقف .. ويكونوا التانيين قاعدين على الشوباك ومدلدلين رجليهم .. ونبدل بقى اللي قاعد يقف واللي واقف يقعد ... وعشان كده على فكرة كانت هناك نهضة سنيمائية حقيقية في فترة السبعينات .. لإننا تعبنا وبذلنا مجهود خرافي .. حقيقي يعني خوووووررررافي

[badroora]

أنا عارفة يا بدورة مخك راح لبعيد عشان دماغك اليومين دول في السيارات

لأ يا بدورة مش توك توك

توك جمع توكة و هي من الحيوانات الأليفة التي تعيش في الدماغ

لأ بردة مش دي

بعدين هافهمك أصل الموضوع كبير كبير

يسلام يا قرنفله انتى يا قارية دماغى :blink:

والله كنت مستنية امانى تقولى توتوك لعبة كنت هاقول ازاى التوتوك لسه حديث من كام شهر :blush:

لكن انت ماشاء الله قارية دماغى وفهمتينيى مشكورة يا قمر

احب انا الناس اللى تفهمها وهي طايرة wst::

[badroora]

بمناسبة الكهرباء دى بقي لي معاها مغامرات

هاحكى منها حته كدا وبعدين عندى دورية بالليل اول ماخلص على كل الزباين هابقي اشجيكم بها

اديكم تصبيرة كدا ع الماشي

ابويا كان فظيع جدا طبعا مخلفنى وهو عنده 18 سنه وكان بقي دماغة زي مكنش لسه شال الهم المهم مكنش يعرف يعنى ايه تربية عيال وحب الاستطلاع والحاجات دي

فمرة لاقيته بيعمل توصيلة عشان كان فى جنينة قدام الدوار بتاعتنا فى النجع :lol: كانوا بالليل فى الصيف يقعدوا فيها ويشغلوا شفيقة ومتولى ويسلام ع الحكم والانسجام

وبعدين ابويا راح زغدنى بايدة انى اقوم بعيد عشان متكهربش قولتله يعنى ايه كهربا وازاى هتيجي فايدي يعنى

قالى قومى متوجعيش دماغى المهم راح يجيب بلاستر عشان يغطى السلك العريان وانا بقي روحت حطة الفيشة فى الكوبس وحطيت صباعى اشوف بقي ايه الكهرباء اللى هتيجي فى ايديى المهم فحطى اديدي فتكهربت فجية ابويا لاقينى اترميت ع الارض من الصدمة وابويا بكل حنية

واحساس الابوبه اللى بنته بنتهار قدام عنية وراج جاى ورزعنى كف مش قولتلك متعلبيش فى اللى ملكيش فيه wst:: ابويا على فكرة حنين قوى بس وهو صغير مكنش لسه اتدوك فى الابوبة

فروحت لجدى الله يرحمه كنت باقوله يا بابا واشتكيته وقولتله ابويا كهربنى وجدى انهار وحلف ليكهرب ابويا زى ما كهربني

ولكن جدي اب بحق وحقيقة اكتفي بضرب ابويا كف صغير عشان يرضينى :rolleyes:

باالليل بقي فى لحظة تجلى هابقي اكملكم حكايتى مع الكهرباء والترعة :blink:

[إيزيس]

وراج جاى ورزعنى كف

اكتفي بضرب ابويا كف صغير

عقبال ما أفرح بيكي يا بدرية و أشوفك و انتي بتلطعي ابنك كف صغننون زي ده

تم تعديل 13 أبريل 2008 بواسطة قرنفلة

[shawshank]

حد فاكر نصر الدين طوبار لما كان بينشد في إذاعة القرآن الكريم ويقول هنــــــا :

يا إله العالمين حنيني دائم والقلب شاك عليل

سال دمعي يا إلهي ولولا غربتي ما كان دمعي يسيل

غربتي نجوى ونيران شوق وأسى باك وليل طويل

ولك الأمر ومالي رجاء غير أن نسعى إليك السبيل

وإذا ضاقت فنجوى دعائي ...

حسبي الله ...

حسبي الله ...

حسبي الله ونعم الوكيل

ولما بيقول هنــــــا :

يا مؤنسي في وحدتي

يا منقذي في شدتي

يا سامعًا لندائي

فإذا دجى ليلي وطال ظلامه

ناديت يارب ... فكنت كنت ضيائي

تم تعديل 26 أبريل 2008 بواسطة shawshank

[shawshank]

وابتهال مــــولاي للنقشبندي اللي كان بييجي على الراديو على الفطار في رمضان .

[الباشمهندس ياسر]

سلام عليكم

و مسااااااكم ياسمين و فل وورد بلدى

رغم كل الزهور الجميلة اللى شفتها ف حياااااااتى مش لاقى احلى م الورد البلدى

و رغم كل البناااااااااات الجميلة اللى قابلتها ف حياتى مش لاقى احلى من بنت بلدى :D

ما سبق كان استهلالا لابد منه

الموضوع ده وليد اللحظة

بسبب مداخلة ف رد ع سؤال ف موضوع تانى

دخلت علينا ايمو بفكره جباره وقالت اعمل الموضوع

ووعدت انها هتكون اول زبون راشق فيه

يا ترى هنعرف نجيب زباااااااين تانية

بس بشرط

زباينا ناس دماغها رايقة و فكرها راقى

و بتعرف تحافظ ع الابتسامة الصافية

و نوعدكم بمستوى م الخدمة برده راقى

عندنا هنا ... اكيد مش اقل من كوستا او استاربكس

او ع الاقل هتبقى اجمد م الخدمة ف الفيشاوى

مين هنا بيروح الحسين؟؟

و ادى المداخلة المذكورة

اكتر فيلم ابيض واسود بتحبه ايه؟

مش فاكر

فعلا مش فاكر

الافلام الحلوة كتير جدا

و معظمها ليها معانا ذكريات جميلة

اكيد كلنا فاكرين لما نرجع من المدرسة يوم الخميس بدرى

عشان فيه فيلم ع القناة التانية تقريبا ولا الاولى

و الله يا ابنى مانا فاكر... ابنك ... مرحب مرحب

و كده يعنى

سؤالى..

فاكر ايه من ذكرياتك

طب فاكر بنت الجيران و ضحكتها من وراء الشباك

ولا اما تستناها تنزل عشان تجيب حاجة و تقععد تتكلم معاها

لغاية ماتنسى كانت رايحة تجيب ايه اصلا

فاكر لما ضربت الواد اشرف الرخم عشان قالك دى بتاعتى انا

ولا فاكر الشتا

و انت رايح المدرسة الصبح بدرى و المطر بترخ عليك ... ايوه اسمها بترخ عليك

طب فاكر لما عاكست بنت ماشية ف الشارع ... عاكستها بكل ادب طبعا .. مش زى المتخلفين عقليا بتوع دلوقتى

و واحد من الجيران اللى بيصلوا مع ابوك ف الجامع شافك .. وقال لابوك

فاكر شكل العلقة بتاعتها

اى اى .. انا حاسس كانى لسه بنضرب

الله يسامحك يابابا ضربتنى اوى ساعتها لاول واخر مرة ف حياتى

طب فاكر ايه ولا ايه

تيجى نقول لبعض على الحاجات بتاعت زماااااان واحنا صغيرين

[ريحانة]

حاجات كتيييير اوى حصلت زمان وانا صغير

اهمها

تصنيف مدرس الابتدائى لينا فريقين

البنات وانا رئيستهم

والولاد وولد هو رئيسهم

والمسابقات اللى كانت بتم

وكم الضحك والتريقة اللى كنا بنضحكه ع الفريق الخسران

والتحدى اللى استاذنا كان بيحطه على رؤساء الفرق

زى مثلا لما يوم جه قال

الفريق اللى حايخسر كله حايتعاقب الرئيس له ضعف العقاب

وجه السؤال اللى وقع فرقة الصبيان مع رئيسهم نفسه وساعتها جابه لنفسه وقال لو السؤال ليها مكنتش عرفت تجاوبه

قام المدرس قاله خلاص لو فلانة رئيسة فرقة البنات جاوبته

تضربك بالقلم!!!!

واااااااااااااااااااااو

قومت جاوبته

والمدرس مصر ولازمن اضربه بالقلم

وانا اقوله خلاص انا مسامحة

انا اصلا مقدرش اعمل كده

قلبك ابيض

وهو ابدااااااااااااااااااااا

المهم ساعتها اصريت اذل الولد بالمعروف احسن

ومضربوش

وكفاية موقفه الصعب اللى لو انا اتحطيت فيه

احتمال كنت انتحرت وانا لسة فى 5 ابتدائى

وحاجات كتير لغاية دلوقتى بفتكرها واضحك من قلبى

تحياتى للموضوع

واسفة ع الاطالة

[الباشمهندس ياسر]

نورتى الموضوع يا ريحانه

و ان كنا عايزين كل الناس تحكى اكتر عن ذكرياتها وهى صغيره

و نفتكر بقى

و نعيش ع الاطلال شويه

بس اصيلة والله انك مضربتيش الولا

[Emo]

كده ياريحااانة ماتضربيش الولد..

هي دي الصحوبية..!!

تجيلك فرصة لحد عندك وترفسيها..

إيمو مخاصمك..

طيب بمناسبة بقى الولاد والبنات والضرب والحجات دي..

هسيح لنفسي..بس وعهد الله اللي هيتريق لغلس عليه كل عمره الجاااي..

كنت وانا صغيرة في ابتدائي يعني..

عندنا جيران معاهم خمس شباب عيالهم يعني..

مراحل عمرية مختلفة كان في واحد فيهم أكبر مني بسنة..

اسمه أحمد..

المهم أحمد ده في يوم حب يقلد اخوانه المراهقين راح باعتلي صورة ليه وكاتبلي وراها بحبك.. :wub: (مشاعر أطفال ياجماعة محدش يعلق)

بس ياعين مامته وقع ف سكة غلط..بقى إيمو ..ام سحلول..امنا الغولة..ديجندايزر ..تخون حبيبها كابتن ماجد بطل الملعب كابتن خلاق ومهذب وتبص لحتت واد فلعوص اسمه أحمد..

قوم إيمو تعمل ايه....

تفتكروا عملت ايه..

اتصلت بطنط وقلتللها ياطنط ابعتي أحمد عشان نلعب سوا..

وبهتتعه ياحرام..

ودخلتت إيمو الشرير..

طلعت الصورة وقلتله اي ده...!!

(لحد دلوقتي فاكرة منظر وتعابير وشه..ياحرام إيمو شرير والله)

ابتسم وبص ف الأرض..

رحت بكل غرور قطعت الصورة حتت ورميتها ع الأرض ودست عليها...

وقبل ماتدعوا عليا..

ياجماعة انا دفعت من دمي ثمن للتصرف الأهوج ده..

ابن الجيران بقى ..هيعمل ايه..

كووووووول يوم ايمو تصبح بعلقة وشد شعر والاهالي يجوا يسلكوا..

وكوووووول يوم إيمو تمسي بعلقة من أحمد..

مكنش بيرضى يروح المدرسة قبل مايجري ورايا ف الحووش كله..ويقطعله كاام شعره ويسمع صوتي للمنطقة..

ويجوا أهلنا يفكوا الحصاار..

ولحد دلوقتي محدش يعرف ليه أحمد كان بيضرب إيمان..

يعني ده سبق صحفي أهووو..

3 سنين إيمو ذااقت فيهم الويلالات..لدرجة انه ةكان بيقول لأهله المفروض يخدوا إيمو يحطوها بدال إبليس عشان الناس يرموها بالجمرات... :)

وعزلنا ومرت السنوااات الكثير واتفاجئ بيوم أحمد بيطلب إيدي..

إيمو هيسكت..أزااااااااااي..!!

قلتلهم والضرب والعذاب المبين..

والحمد لله ماتجوزنااش..

بس أحمد بيكفر عن سيئاته كويس..

بنته اسمها إيمان..

محل الكمبيوتر بتاعه اسمه إيمان..

وان شاء الله بكرة انا اتجوز واجيب عياله يكلوا بنته إيمان دي اكل..

اه الحبياة سلف ودين..وانا ماسبش ديني ابدااااااااااااااا..

[alsaher]

إيه ده يا إمو

بقى إنتي شايله كل ده من الواد إياه ، وما حدش عارف

بس مالكيش حق هو ماله أحمد يعني

ولا أقول لك بلاش تستلمينا طول العمر ، أنا مش قدك :lol:

بالنسبة لي في مواقف كتير ما بتتنسيش من دماغي خالص

زمان وأنا طفل ، كان النظام عندنا إن كل عائلة ليها حاجة إسمها ديوان

المكان ده بيتجمع فيه الكبار بتوع العيله من المغرب للعشا ، وبيشربه قهوة وبيستقبله الضيوف وكده

نظام عادات وتقاليد

المهم كان جدي ياخدني معاه الديوان ده كل يوم

ويقعده العواجيز يعملوني شغلانتهم

ووالدي كان مسافر ، فكان واحد منهم عمال بيشتغلني كل يوم ، بيقول لي إنت أبوك مش هنا وإحنا قررنا ناخد بيتكم ، وكان بيتنا تحت الإنشاء

ونسكنك إنت وامك في المكان بتاع الحصان (كان لينا حصان وله بيت إنما إيه ... عجب :lol: )

كل ما أدخل الديوان ، يقول موعد طرد والواد ده وأمه إمتى يا جماعة ؟؟؟

وأنا أخانق ومصدف الحكاية

وأقول حأخلي جدي يموتك ، ويرميك في الشارع يا عجوز يا خرفان md2:

المهم في يوم من الأيام فكرت أنتقم

وهو ليه فنجان معين بيشرب فيه القهوة ، يقوم المجنون اللي هو أنا عامل إيه

جايب المعلقة بتاعت الأيسكريم وكيس صغير حاطط فيه ملح

وقال إيه من الدقه بتاعتي ، عمال بأحط ملح من الكيس بالمعلقة في الفنجان wst::

بالصلاه عالنبي حطيت معلقتين أيس كريم

والراجل شرب القهوة بالصلاة عالنبي ، وطبعا مش لازم أكمل إيه اللي حصل بعدها

الراجل ده الله يرحمه كان مسببلي عقده

لدرجة إني في مرة صحيت جدي من نومه ، وطلبت منه ننام في الشقه اللي لسه عمال بتتبني

لأحسن بسلامتي كنت حاسس إنو العجوز إياه ناوي يسطو ويحتل المنزل الليله إياها :)

وجدي ده كان ميرفضليش طلب ، ويقعد يكلمني ويناقشني ويفاوضني ، ومافيش فايده

وفعلا ناخد فراش ونطلع السطوح وننام ، قال علشان نحرس الشقه wst::

وجدتي وأمي يناده ، سيبك منه ده واد مجنون ، وهو يقول لهم لا إنتو المجانين ، إحنا طالعين نقطع الراجل ده :lol:

مانزلناش إلا لما بدأ ضرب نار في المنطقه ، وطبعا الحاجات دي ولا كانت تأثر في جدي ، ولا كأنها سيمفونيه هادئه

فرحت مصحيه تاني وش الفجر ، قال إيه ، خلاص هو باين إنو مش حييجي الليله دي :lol:

أنا مش عارف جدي كان مستحملني إزاي يا جماعه :wub:

أنا فاكر الموقف ده فعلا مع إنه كنت صغير جدا ومش داخل مدرسه أصلا

[Emo]

فرحت مصحيه تاني وش الفجر ، قال إيه ، خلاص هو باين إنو مش حييجي الليله دي

:)

صراحة دمعت من قصتك..

تعرف الحياةةزمان بجدنا وستنا..والبيت واللمة وكده..كنت تحس ان في قلب بيضمك اووي..

دلوقتي بعد ماراحوا..تحس العالم بيدوس عليك..

:wub:

[Spanish Eyes]

موضوع رائع ،،، زمان وانا صغيرة في اعدادية تقريباً مكنتش بحب الجغرافيا والتاريخ اطلاقاً ولا كنت بذاكرهم اصلا كان ايامها كاس العالم اللي مصر كانت بتلعب فيه كان في ايطاليا وكان فيه ضربة الجزاء بتاعة ابراهيم عبدالغني فاكرين؟؟؟؟ المهم المعلق الرياضي معرفهوش طبعا كان في منتهي السسعادة وقال جملة " عدالة السماء التي نزلت في باليرموا" قوووم يجيلي في الأمتحان تحدث عن مدينة باليرموا ونبي ما انا فاكرة هيا فين اصلا قووووم انا مش عارفة حاجة خالص اكتب اية في ورقة الأجابة بلا فخر "" باليرموا هي المدينة التي نزلت بها عدالة السماء""

امنعوا الضحك........

[se_ Elsyed]

مطلوب غطاس فني يغطس ويجيب لنا مواضيع مشابهه بهذا الموضوع عشان نضمهم على بعض وهاتلاقوا فيها حاجات هيلوا خالص

[se_ Elsyed]

أنا جيت

وجايب لكم موضوع موسوعي أرشيفي نضيف من موضوعات طنطي فلانه ..

وأسمحوا لي إني أقول لها طنط مع أني اكبر منها ...

لكن طنط ده لقب خلعته عليها في عبد العمال الماضي مع تقليدها وشاح النيل .

الوشاح أهو .. ولو سمحتي إبقى رجعيه تاني عشان مش بتاعنا

[alsaher]

الله يسامحك يا س س

خليتني دوخت وانا عمال بأدور على الموضوع

لغاية ما لقيت غطاس ماشي في المحاورات قولت أسأله :huh:

باشمهندس ياسر ، إنت علت التوبيك وما قلتش حاجه :)

صراحة دمعت من قصتك..

تعرف الحياةةزمان بجدنا وستنا..والبيت واللمة وكده..كنت تحس ان في قلب بيضمك اووي..

دلوقتي بعد ماراحوا..تحس العالم بيدوس عليك..

ليه كده يا إيمو ، ربنا ما يجيب دموع

الحمد لله جدي وجدتي لسه موجودين ، وربي يديهم الصحه ، لكن انا اللي بعيد ، وأتمنى أقدر أشوفهم قريب ، بقالي 3 سنين بأتمنى :huh:

[أم موني]

أختي العزيزة emo هزتني كلمتك من الأعماق (العالم بيدوس عليك)

كلمة تجمع مشاعر الوحدة و العزلة و الفراغ

إن غابت ضمة الجد و الجدة فقد عوضنا الله عنها بضمة الأولاد

صدقيني سيعاودك الشعور من جديد وستستمدين الحنان ممن ظننت أنك أنت من تعطيه له

أدعو الله أن لايحرم أحدا من ذلك الإحساس لأننا جميعا بحاجة إليه صغارا و كبارا

[Folana]

أنا جيت

وجايب لكم موضوع موسوعي أرشيفي نضيف من موضوعات طنطي فلانه ..

وأسمحوا لي إني أقول لها طنط مع أني اكبر منها ...

لكن طنط ده لقب خلعته عليها في عبد العمال الماضي مع تقليدها وشاح النيل .

الوشاح أهو .. ولو سمحتي إبقى رجعيه تاني عشان مش بتاعنا

السلام عليكم ورحمة الله....

عُمدتنا الغواص فى بحر نغم المحاورات الشهير بعين الاعيان سى السيد ......والله لقد أدخلت البهجت الى قلبى عندما أعدت قراءة هذا الموضوع الميمون...

بس بأستأذنك حأخر الوشاح شوية لانى سلفته للمكوجى من أجل زيادة دخل المواطنين ...يعنى بالعربى بنأجره بالساعة ...

وفكرتنى بالغالية مصرية الهوى...هى أول من خلع على العبدة لله لقب " طنط"....والله وحشتنى جدا...

وبما انه موضوع ذكريات...ففعلا أشعر بحنين لكل الاخوة والاخوات اللى شاركوا فيه....ياسلالالام كانت ايام جميلة....شوف قد ايه كانت روح المحبة سائدة بين الجميع...

أبو زياد

خضر

زعلان

نانسى

ياشو

ناش

نانو

صبح

واحد تانى

نورا

موديست

ايناس

عبده بيه

مصرية يعنى مصرية

أستاذنا محمود الشاعر

عازفة على أوتار الذهب

أبو حميد

وبدرية

وغيرهم.....كلهم كلهم ...بجد من اجمل الناس اللى كتبت معاهم....قد كده كانت الروح الجميلة هى اللى بتدفعنا للمشاركة....

يارب يكونوا كلهم بخير...ومش عارفة أقول كانت أيااااااام ولا أقول....يا خسارة...

[Emo]

من أول السطر..وبخط كبير أووي..

متكرهش حد ف حياتك لأنك مش عارف قدرك العمر هتكمله مع مين..!! :blink:

وأنا ف الصف الأول المتوسط/الإعدادي..كان عندنا نشاطات عشان ناخد درجات المشاركة..يعني نعمل بحووث...

نشارك ببرنامج ف الإذاعة المدرسية..كده يعني..

جيت انا ف مادة العلوم..ولأنها كانت احب المواد عندي ..قلت لازم أعمل حاجة مميزة ..قووم ايمو يفكر ..ويفكر..ويفكر..(وده خطر ع الصحة ع فكرة..)وف النهاية قررت أعمل ايه.....!!

حديقة حيوان ف معمل المدرسة bngn::

عادي عادي..كنت هبدئها مصغرة..

طبعا لقيت صعوبة اووي ف اقناع المدرسة..وبعدها لقيت صعوبة أشد ف البيت..

بس ع مييين..!!

إيمو لما يتحمس لحاجة ممكن يعمل عملية إنتحارية عشان يلاقي التأييد..والموافقة..

نهايته..

رحت جبت سلحفاة..

و5 سمان..

و....

40 سمكة..وهنا بقى الحكاية.. wst::

قعدت اسبوعين متواصلة اضيع الحصة الثالثة والرابعة بحجة رعاية الولايا دوول..

بس السمان ماستحملش مات بدري بدري..

والسلحفاة كانت رخمة ودمها ثقيل فكنت شايلة ايدي من رعايتها..

كنت مهتمية بالسمك العسول اللي دفعت فيه 200 ريال من مصروفي المستقبلي..يعني بابا كان بيخصمهولي بفوائد كمااان :blink:

بس كان معايا مسؤلة المعمل..فمكنتش حاسة بالمأساة اووي..

لحد ماجت المشرفة دي الله يمسيها بالخير خدت اجازة امومة وسبتني مع السمكات دي لوحدي..

زادت المسؤلية بقى ..والعناية ..والإهمال (اهمال الدروس طبعا والحصص)

بس كان عندي مشكلة..

كان فيه حتت سمكة مقرفة لونها اسووووود واسمها الزّبالة_الله يكرمكم_ بيقلولي انها بتنضف الحووض من الحجات اللي مش كويسة..

وكأي طفل لسه فطرته سليمة كنت بكره اي حاجة لونها اسود واحب اي حاجة لونها ابيض..

فنشأ بيني وبين السمكة دي عداء من اول ماجبت السمك..

كل ممانزل مع المشرفة ااقلها تعرفي نفسي افقع عين الزبالة دي..نفسي ادوسها بالشووز..

وهي تقلي اتقي الله يابنتي..ماينفعش تكرهي حاجة عشان لونها..

غابت بقى المشرفة ,,وبقت المدرسة كلها تسمع صوتي وانا عند السمك..

تسمع صوتي طبعا وانا بزعق للسمكة السودا..

انتي وحشة..

وانا بكرههك ..ويارب تموتي..وكل الحجات العبيطة دي..

يدوب قضيت يوم الثلاث والأربع بنزل انضف الحوض وعادي..وطبعا اجازة الخميس والجمعة ..

جيت بعدهم لقيت حوض السمك الله لايوريكم..

عبارة عن (حظيرة) مليان زبايل والألوانات الحلوة اللي حطاها ماتشفش..منا كنت عافصة اربعين سمكة مع بعض..

قلت بس اجيب الحوض الإحتياطي وانقلهم وانضف الحوض ده واغسل الحصى وكده وبعدين ارجعهم..

وقررت ان اسيب السمكة السودا دي تنتحر من سوء اعمالها ..مش هيا وظيفتها تنضف الحوض..

فين بقى النظافة دي..

بدأت انقل ف السمك..واكلمها ااقلها هسيبك تموتي كده لوحدك مخنوقة من قرفك..

انتي اصلا دوووبة.زومالكيش فايدة وكده..

خلصت نقل ال 39 سمكة للحوض التاني..

وفجأة ببص ع الحوض لقيت كوووووووووووووووووووووووووووووول السمك طافي ع المية.. :P

مااااااااااااااااااااااااااااااااااااااااااااااااات ال 39 سمكاية الحلوين لأني نسيت أحط الفلتر ف الحوض قبل ماانقلهم.. mfb:

وبقيت في وشي السمكة السودا..

قعدت اعيط طبعا واعمل مناحة..وغبت بقيت الأسبوع ..ورجعت لقيت بنت اللذيناى دي عايشة مبرتعة ف الحوض لوحدها..

وقعدت معانا لحد نهاية الترم وبعدين معرفش مصيرها ايه..

بس..

نرجع كلنا للكلمة اللي بالأحمر.. :)

ودمتم بحب.. B)

[مغتربة]

إن غابت ضمة الجد و الجدة فقد عوضنا الله عنها بضمة الأولاد

صدقيني سيعاودك الشعور من جديد وستستمدين الحنان ممن ظننت أنك أنت من تعطيه له

الغاليم ام مونى

فماذا تقولى فيمن غابت عنه ضمه الجد و الجده لوفاتهم

و غابت عنه ضمه الاب و الام لوفاتهم

و غابت عنه ضمه الاخوات لغربته

و غابت عنه ضمه الاولاد لان الله لم يرزقه بعد

اى مفرده فى قاموس اللغات اجمع يمكن ان تصف ما يحسه

عذرا هذا ليس بفيلم مليودراما

هذا واقع و معايشه حقيقيه لاشخاص قد يكون احدهم بقربنا الى الدرجه التى تجعلنا لا نلحظه من الاساس

يتبسم فى وجههنا دون ان نعى ان مذاق ابتسامته هى المرار بعينه

ادام الله علينا جميعا الاحساس بالامان و الحنان

دمت بالف خير