ذكريات حُلم الطفولـــــــــــة.....البريئة :)

[se_ Elsyed]

وبعدين انت هنا ياناش فى السعودية ؟؟

طيب فين لحسن نطلع جيران

لأ يا نانسي

ناش أعتقد في الكويت

بس اللي حصل ده من شخص بيقول على نفسه من الدمام ... أعوذ بالله من الخبث والخبثاء

[نانو]

ياريت و الله يا س س ناش تكون في الكويت

بدل ما انا بغني ظلموه

ناش للاسف في السعوديه و ذكرت ده في اكتر من مشاركه

انا بحقد عليكم.....كلكم في السعوديه

بس انا بقه قريب هاجي الرياض زياره و المنفوحه بالتحديد

الا ايه المنفوحه ديه صحيح؟؟؟؟؟؟ :lol:

[واحد تاني]

لأ يا نانسي

ناش أعتقد في الكويت

لأ في الرياض :)

ياريت و الله يا س س ناش تكون في الكويت

بدل ما انا بغني ظلموه

ده مفيش اكتر من الناس الحلوة اللى موجودين عندك يافندم ...

بس انتى ركزي كده معاهم شوية هتلاقيهم على طول ...

الا ايه المنفوحه ديه صحيح؟؟؟؟؟؟ :lol:

ادخلي هنا هتعرفي :)

[نانو]

ده مفيش اكتر من الناس الحلوة اللى موجودين عندك يافندم ...

بس انتى ركزي كده معاهم شوية هتلاقيهم على طول ...

:lol:

:)

:)

[nash]

الحمدلله..

والله يا بو زياد من القهرة مقدرتش أسكت ..وخصوصا لما رجع مع باباة...أتكلمت معاه وفهمته حتمية الدفاع عن نفسه ..وفهمته لو لاقدر الله ..لاقدر الله أتعرض لمحاوله خطف أو شيء من هذا القبيل لازم يقاوم حتي لو مات ..لإنه في جميع الأحوال ممكن يموت..يبقي يموت بكرامته...وخصوصا لما كمان قالي أنه خاف الولد يكون معاه مطوة..وهجم عليه..سكتت..ورجعت برضه قلتله ماكنتش تخاف..أصرخ عليه هايترعب ويجري.......وأنا من جواتي باتنفض

..............................................................................................................................

سوري يا فولانه ,,,,,والله طلعت برة الموضوع خالص..بس معليش الموضوع كان لسه جديد وأنا كنت بجد هاموت

وإن شاءالله نكمل ذكريات طفولتنا البريئه جدا جدا :lol:

..............................................................................................................................

أهلا يا نانسي

تعالي جنبي يابنتي ..أحنا زومل..في الطفوله البريئه

أيوة ياعمري أنا بالرياض

وياريت نطلع جيران

.............................................................................................................................

أهلا ياسي السيد

بس لو أعرف الست امينه.....عامله أيه

أنا مش بالكويت بس كان نفسي ياريت والله أنت عارف النظام هنا...يمكن هناك أخف شويه

............................................................................................................................

نانو يانانو

هاتنوري المنفوحه والله

المنفوحه يانانو..حي كله مصريين وتحسي فيه بروح مصر وجوها..يعني تقدري تقولي كده مستعمرة مصريه

ياريت بس يانانو تعطينا خبر قبل ماتيجي..

.............................................................................................................................

واحد تاني : صح

[se_ Elsyed]

يا هلا بالرياض وأهل الرياض

ناش

يان ناش ))))))

هل تسمعيني ولا مانتي ماسمعاش

قوليلي يعني إيه بؤين الشعر دول ؟

وإوعي يكون شعر أحسن أزعل

صن ضحكة الأطفال يارب

فإن هي غردت في ظمأ الرمال أعشوشبت

لكن إن زودوها وبكيوا ..ونكدوا ..هايتلطشوا

أسف على إني طلعتكم من أحلام الطفولة .. لكن ماقدرتش أقرأ حكاية تطليش العيال دي واسكت أو مافهمش :lol:

[Folana]

السلام عليكم ورحمة الله....

أختى الحبيبة ..ناش...بتتأسفى على ايه..الموضوع ما اتغيرش ولا حاجة...ده موضوعنا كلنا ..بيمس جزء من حياتنا...سواء فى الماضى او الحاضر...ماهو الحاضر ده بكره حيبقى ذكرى برضه ونتندر عليه..

انا قريت كلامك ا لصبح بس ماكنتش فى مود رد عليه بصراحة ..لان قلبى وجعنى...

أهم من انه يدافع عن نفسه بالكاراتيه ...لازم تعلميه ازاى يدافع عن نفسه بعقله وعقيدته واخلاقه...تقوى فيه الجانب الدينى وتتكلمى معاه انت او والده بمنتهى الصراحة..لازم يكون عنده خلفية عن اى موقف ممكن يتعرض له..ازاى يفكر..ازاى يتاخذا لقرار الحكيم...ووقت اللزوم يستخدم مهاراته القتالية.....ربنا يحفظهم جميعا .....(دى بقت حاجة تخنق)

عودة الى ذكرياتنا الجميلة..انت فعلا يا ناش مالكيش حل...انت باين عليك كنت مسجلة خطر طفولة ...;)

نانسى...فكرتينى ببناتى....انا بنتى الكبيرة ماشاء الله عليها عقل ورزانة..بتفكرنى بفوزية بتاعة سك على بناتك..اما الصغيرة بقى ربنا يجعل كلامنا خفيف عليها....بنتى الكبيرة تقولى يا مامى انا باخاف اقول لحد من اصحابها انها اختى احسن يضربنى..:o

زعلان ...احنا بنفتكر اهو ..بس يالا معانا...معقول يعنى ماعملتش مقلب فى حد وانت صغير يستاهل يتحكى لنا...بلاش بنت الجيران...اى حاجة تانية....

أبو زياد...سمعت انك بتدور على دكتور نفساوى..اى خدمة ...(هو الصراحة انا مش دكتور بس انا نفساوى دى ..معايا كارنيه النقابة بتاعة المجانين)....

عودة الى الذكريات......

وانا فى3 اعدادى ....كنت فى حصة الماث..والمدرسة قومت بنت تحل مسألة ..واختارت البنت دى بالذات لانها كانت عاملة شعرها وعلى وشها اثار مكياج بايت ...وطبعا البنت ماعرفتش تحل المسألة ..ولاقينا المسز دى راحت حاطة ايدها فى وسطها وعمالة تجيب البنت من فوق لتحت ...

وهوووبا ..فضلت تلطش للبنت على وشها وتنعكش لها شعرها ..وتقول ماهو ده اللى انت فالحة فيه...

وبعد البنت ماكلت العلقة...قلنا لها اصلها كانت خطوبتها امبارح يا مسز....

(ما اعرفش ا تجوزت بدرى ازاى دى)..

وتحولت المسز الى ملاك وديع ..."والله..طب مش تقولى كده ..مبروك..روحى مكانك"....

وبعد الحصة صاحبتى قالت لى تعالى اسمعى..ورجعنا اخر الفصل حيث مجلس ا لبُلدة...ولقيت زميلة لنا فى الفصل ..بتقلد المسز العصبية دى....وتقول دى باين عليها مجنونة ولا تلاقى جوزها كلها علقة ع الصبح جية تطلعه علينا..

واللى تقول ربنا ياخدها ...واللى تقول ست مفتريةا للهى ماتوعى تروح بيتها...,..و,,,و,,,الى ا خر دعوه المظلوم ..

راحت صاحبتى دى واللى كانت مش شايفة من كتر الضحك ...قالت لهم ..أعرفكم بالانسة فلانة أخت مسز علانة ... :)

طبعا العيال ياولداه جالهم هلع...وفضلوا يعتذرولى ..وانا طبعا عملت زى قريبة نانسى (امال ا تضرب يعنى)..قلت لهم لا لا لا مفيش حاجة ..هى غبية كده طول عمرها...

بس ايه ..بعد كده بقيت عُمدة الفصل...ساندويتشات وبيبسى ودخان ..:P كله بلوشى...

ايه ده ..ده انا فهمت حاجة كمان دلوقت بس...يظهر مُدرسة الموسيقى كانت مش بتزعلنى علشان خاطر اختى ..مش علشان ا نا مميزة ولا حاجة..... :) :lol:

[nash]

فولانه روحي ربنا يكرمك ويخليكي لإختك يارب

يعني أوكيه ؟؟ أخد راحتي...؟ طب والله دموعي أغرقت عيوني..ولساني أنعقد وأيدي بتترعش..وقلبي هايقف من الفرحه..

بجد ربي يعطيكي العافيه ..عارفه يا أمي ده الموضوع ده هايطلع بلاوي مستخبيه..وهانتعرف علي حقيقتنا..

بس بجد بجد وعن جد كمان موضوع جميل والله تسلم أيديكي يارب

................................................................................................................................

عارفه أنا لو مكانك كنت أستغليت نقطه الأخوة دي أحسن أستغلال..بس مافيش نصيب ..أنا كنت الكبيرة العاقله ..لإمي

بس تصدقي أختك مفتريه بجد..أوعي تكون بدرس لبنتك.....وإلا هاتلاقيها بتدعي عليكم كلكم في ليله القدر...ربي يحفظهالك ويهديها كمان وكمان....مع أني دايما أسمع عن ولاد عاقلين ومريحين أمهاتهم...إلا ماشفت النوع ده لا عندي ولا عند أخواتي..الجيل الجديد بتاع عيلتنا..وربي اجن مننا..

..........................................................................................................................................

يا سي السيد ياخويا ..أنا دورت علي معني (تطليش) ورد عليه واحد يقولي أن الرقم الذي طلبته غير موجود بالخدمه مؤقتا...

بس فيه رقم تاني..(تلطيش) قولتله طب شوفهولي,,قالي بعد الأطلاع علي امهات الكتب..ومعجم البحر الواسع..وكتب كده أساميها عجيبه قال...التلطيش..تعني التربيت الخفيف علي وجه الطفل الملظلظ..علشان اللظلظه دي تمويه وخدعه بيستغلونا بيها....فتقوم الأم بتربيت وش البيبي لغايه مايبانله أصحاب..وينطم ويسكت..بس شوفت إزاي سهله..

وبعدين مين قال أن ده شعر....لا ده كان نبراس عيلتنا والقانون السائد (.أحنا حلوين أهو معاكم وطيبين بس نكدوا كده..وشوفوا التربيت إزاي هايكون)

.............................................................................................................................................

قوانين الأسرة ..عندنا.. :blink:

1. ممنوع زيارة أي عم نهائيا بدون زوجته تحت أي ظرف من الظروف.

2.ممنوع زيارة أي عم وزوجته بعد الساعه التاسعه مساء..صيفا أو شتاء.

3.ممنوع الذهاب إلي النادي إلا ورجل أمي الحبيبه فوق رقبتنا.

4.ممنوع التفكير في الذهاب إلي السينيما

5.مافيش حضور لإعياد ميلاد صاحبه أو عدوة..بس أحنا اللي نعزم.

4.مافيش حاجه أسمها خروج أصلاإلاللضرورة القصوي

5.ممنوع النقاش في القوانين أعلاة..لإن كده كده...هانفذ الأموامر فننفذها بدون وجع قلب للغاليه

.................................................................................................................

في ظل هذه الظروف القاسيه..كانوا خيلاني بيقضوا أيام التجنيد عندنا..منها ياخدوا بالهم مننا وبرضه وسيله ترهيب بتستخدمها أمي الغاليه..

خال من خيلاني وكان الفرق في العمر بيني وبينه مايجيش سبع سنين ..ومش قاهرني إلا إني كنت بقوله يا أونكل..مش خال لازم نحترمه...المهم الكابتن أتفق مع أصحابه أنه هايقابلهم برة..وكلهم كانوا واخدين أجازة من الجيش وعايزين يهيصوا...وأتفقوا يتقابلوا علي القهوة..طبعا كان مرعوب مامتي تعرف وإلا هاتكون مصيبه...

المهم كذب عليها وقالها هاروح جروبي ومش هاتأخر نامي أنتي..وماتقلقيش..

أنكل ده كان معتمد علي أني بذاكر وبسهر...ايام ماكنت دودة كتب...

المهم أسمع الساعه واحد بالليل خبط طوب علي الفرنده :o ..الأول بصراحه أتخضيت وفكرتهم العفاريت...كان لسه فيلم عادل إمام معروض بتاع الإنس والجن..ومأثر عليه..لكن بعد برهه..وفترة قصير من عمر الزمن ..أفتكرت فجأة أن أنكل لسه في الشارع وأتأكدلي لما سمعت واحد بياندي ياناش ياناش ..ياكل...ردي ردت الميه في... ..وربي الصوت كان قريب من الهمس.الظاهر من الرعب سمعته..فتحت الشيش وبصيتله ببرود....:نعم أفندم ...عايز أيه؟؟ قالي أفتحي الباب..قولتله طيب ليه موطي صوتك؟؟ قالي هاتستهبلي ..قولتله أة....وإلا هاروح أصحي أختك..قالي طيب أفتحي الباب يا شطورة..قولتله بوس أيدي الأول -_- ......كل دة وأنا سانده علي السور وحاطه أيدي تحت ذقني وبتفرج عليه ببرووووود

قالي طب عارفه ..أنتي هاتفتحي الباب في النهايه ..وليلتك مش هاتعدي...يومك هايبقي....قولتله لو كملت هاحدفلك حاجه تنام عليها تحت العمارة.....قالي طيب علشان خاطري..صعب عليه فتحتله ودخل..عادي قعد حوالي يومين كارهني ومش قادر يعبر علشان أخته اللي هي أمي ماتعرفش :wub: .ولا همني مش باس أيدي خلاص...اللي بعد كده يهون..

............................................................................................................................................

لما دخلت القسم الأدبي كان يوم أسود ..نقدر نقول كان ميتم...كنت أنا أول من أفتتح هذا القسم في العيله وكنت جايبلهم كده العار :ph34r:

للأسف كل أخوالي كانوا دكاترة ماعدا أنكل كان خريج تربيه..برضه كان بيتبصله بإزدراء ..

ودار حديث بيني وبين أحد خوالي ..أيه الهباب اللي دخلتيه ده...قولتله بحبه يا بابا عععااااااااااا..

المهم بعد الأخذ والعطا..قولتله الأدبي ده قسم الشعرا والفنانين والأدباء العظام...قالي يا غبيه..الدكتور الجراح ممكن برضه يألف قصص وروايات ويكتب شعر....لكن عمرك شوفتي شاعر أديب بيجري عمليه؟؟؟ وجهه نظر والله أحترمتها جدا -_-

...........................................................................................................................................

وللحلقات بقيه

[Folana]

السلام عليكم ورحمة الله..ز

سى السيد انت مشكلة فعلا..ماشاء الله عليك ..تصدق انى عمرى مافكرت اقرأ امضاء ناش...اول ما اشوف صن دى اروح قايمة مروحة وما اخدتش بالى من تلطيش خالص ..-_- عندك حق تصحينا من احلى نومة بصراحة...

ناش...ربنا يديم الحب والتفاهم بنا يارب ...تعرفى انا شايفة ان مادام كل الناس لها هدف واحد وبيحبوا بعض بجد..وبيراعوا مشاعر بعض..يبقى مش حيكون فيه اى مشكلة واللى عايز يكتب فى اى موضوع عن حاجة تانية خالص برضه مش مشكلة ..لاننا فاهمين بعض ..وقلبنا على بعض بجد....

أختى دى يا ستى خلاص معاش بقى ..ربنا كرمنى فى الاخر وسافرت السعودية قضت فيها سنين عمرها ولسه راجعة من سنتين ..اصل انا الغلطة بتاعة اهلى ..مش كل اسرة تلافيها مخلفة عشرين عيل ..والواحد والعشرين يقولوا ده جه غلطة..اهو انا بقى الغلطة المطبعية دى..يعنى اختى دى كانت متزوجة وعندها اولاد كمان..بس كنت باترعب منها بصراحة

وكانت بتعاملنى بقسوة شديدة جدا..قال ايه..علشان ماحدش يقول انها بتسكت لى علشان اختى..طب مايقولوا ..ايه ياختى ده..

تصورى ان لو فيه مجموعة مش عاملة الواجب وانا من ضمنها ..كانت تسامحهم كلهم وانا بس اللى اتعاقب..تطردنى من الفصل ..تشدنى من ضفايرى...الله الوكيل ياشيخة ...انا متغاظة جدا... :blink: :ph34r: :wub:

كنت ارجع لأمى واللى كانت مدلعانى دلع يغيظ بصراحة..واقعد اعيط لها واقولها بنتك بتضربنى وتهزأنى ...تروح رافعة عليها السماعة وتقولها لالالالا مالكيش دعوة بها ..دى ضعيفة وماتستحملش الضرب..

اروح المدرسة تانى يوم بكارت توصية من أمى ..اتاكل علقة منها ماحصلتش..ربنا يهد....يهديها..

رجوعا الى عبد الحليم حافظ..عندليبى المفضل...افتكرت اغنية اعز الناس..كنت اقف فى المرايا واغنيها واشوح بايدى يمين وشمال ..واقول

"ومين ينسى ..ليالى الشوف وحلبسة...""..

اللى هى يعنى ليالى الشوق وحلاوتها..بس يظهر الشبكة كانت واقعة عندى وكنت باسمع غلط...

[nash]

تسلمي يا فولانه يارب..

ياريت تفتحيلنا موضوع كده ويكون أسمه رنان..مثلا..مثلا فن الأمهات في تربيه الولاد..يوووة ده أنا عندي حاجات كثيرة..أنا الصراحه شويه خجوله وأتحرج أفتح موضوع لوحدي..يعني.....مش عارفه أعبر الصراحه..أصلي منحرجه جدا :blink:

..................................................................................................................................................

وربي ضحكتيني علي موضوع الغلطه دي...تصدقي أن بابايا الله يرحمه كان مصمم يكتب تهنئة في جورنال الأهرام قسم إجتماعيات يقول فيها ( مبروك حماتي بالمولود السعيد ) طبعا ده يدل علي أني ليه خال أصغر مني ..بس والله كان غتت..وواخد الدلع كله..

موضوع معاملة أختك بيفكرني بمعامله مدرسه في الإبتدائي كان ليها بنت ..تقول أنا اللي أخترعت الغلاسه..وكنا برضه بنحاول نكسب رضاها..والبنت دي بصراحه عمرها ماأتبهدلت ولا أخدت عقاب واحد..وده كان بيقهرنا...أيه ايااااام

مش عارفه كمان نموذج أختك شكله عامل زي والدتي...الخالق الناطق.....

طب مانا أهو الكبيرة الحلوة عند أمي بس يا ويله ياسواد ليله اللي يقرب لكوهين ورائيل(الأسم الحركي لمرمر وشرشر)واخدينه عن جدارة...صدقيني المهم دلوقتي نفسيتك تمام

أة أقتراح أخير ياريت نفتح قسم خاص هنا في المنتدي ونسميه (كهوة المصريين ) علي رأي اللمبي..والله هاتلاقينا مسنطرين هناك طول النهار ...

أختك ناش

............................................................................................................................................

فاضل لي كام ذكرايا وأخلص ياريت تصبروا عليه

لي عوده بحول الله

[أبو زياد]

ناش بتكتب بسرعة يا جماعة

و كلنا بنقرا بسرعة بدليل ان محدش لاحظ غلظة فى التوقيع

بس انا قريته من زمان و عجبنى رغم الغلطة -_-

المهم يا ناش حارجعلك - طبعا انا عارف انك من المنفوحة-

يعنى وقع عليكى واجب ضيافة أختنا نانو بنت الإسكندرية :D

ودة طبعا بعد ما تستضيفنا نانو فى الكويت - عروس الخليج - :wub:

والا اقولكم ---ندعو الله كلنا ربنا يجمعنا على شاطىء الإسكندرية فى ليلة صيف ---

والآيس كريم على حسابى:) يااااااااله

لأ نانو انتى معاكى فى الكويت بنت النيل و أظنها من زهرة سيدات هذا المنتدى

و بالمناسبة فهى لم تظهر من مدة - ياريت حد يطمنا- وكمان فى غيرها واظن معظمهم سيدات

احبائى سأستكمل معكم لاحقا و كلى شوق للقاكم

[Folana]

السلام عليكم ورحمة الله..........

تصورى يا ناش ان القوانين بتاعتكم دى هى نفسها القوانين اللى انا بافرضها على ولادى....عندى قائمة ممنوعات طويلة جداااا...بس هم ياعينى مسالمين خالص....خلاص بقى استسلموا للامر الواقع...:ph34r:..احيانا باشعر انهم حياخدونى مرة مكان بعيد ..ويسبونى ويرجعوا هم..علشان يتوهونى يعنى.....بس انت عايزة الحق..فى وسط اللى بنسمعه ده كله..يبقى ده اسلم حل...ده انا موضوع التحرش الجنسى ده جاب لى اكتئاب ..ربنا يحميهم يارب جميعا ....

كنت عايزة اكتب لكم عن ذكريات الطيران بتاعتى ...وازاى كان نفسى اعرف اطير ...ومحاولاتى الفاشلة دائما للطيران ..بس بعد الفاصل بقى ...

[nash]

أهلا أهلا يا أبو زياد

لا والله أنا مش في ..المنفوحه :ph34r:

إن شاءالله لما نانو توصل بالسلامه لازم هايكون لينا إتصال ببعض..وإن شاءالله تنبسط في الرياض

..........................................................................................................................................

فولانه يا عمري....شوفي علي قدر ما كنا هانموت من القوانين والتعسف..في تنفيذها علي قدر ماشايلين لماما جميلة تربيتها لينا وعزوفها عن الزواج..يعني الصراحه كانت معزورة..

أيييييييييييييييييييييه ايااااااااااااام

شوفي أنا ولادي قالولهالي مرة.......ياماما,,,,ها ....وبعدين. :ph34r: ..كنت فاكراهم بيدلعوا عليه.. :blink: طلعت المسأله أكبر من كده بكثير..وفيه تخطيط..لتنفيذ الجريمه الكامله :o

ربي يسترها ويحفظهوملنا يارب...والله بزهقهم..نور عينينا...بس برضه هايتلطشوا

[Folana]

..........................................................................................................................................

فولانه يا عمري....شوفي علي قدر ما كنا هانموت من القوانين والتعسف..في تنفيذها علي قدر ماشايلين لماما جميلة تربيتها لينا وعزوفها عن الزواج..يعني الصراحه كانت معزورة..

لا بس يعنى ...اصل ....ماهو أنا متزوجة... :blink: :ph34r: :ph34r: يعنى مافيش جمايل ولاحاجة ....

متزوجة والدهم طبعا ...ربنا يخليه لهم ويخليه لى انا كمان بالمرة يارب....انسان طيب جدا والله ..ربنا يكرمه ...(كفاية كده بقى احسن انا راضية عنه اليومين دول وحاكتب فيه شعر)

شفتى يا ناش خليتنى اكتب تانى مع انى مش باكتب بعد الساعة 9...

حاكمل معاك بعد كده ..ونتكلم فى موضوع المواضيع اللى عايزة تفتحيها ...بس بالنسبة للقهوة ..هو فيه قهوة مفتوحة هنا فعلا ...مش عارفة اسمها قهوة المحاورات او حاجة كده ..حابقى اقولك عليها ....

[nash]

فولاااااااااااااااااااااااااااااااااااانه :ph34r: :blink:

والله فعلا ضحكتيني..

ربي يديم عليك نعمه السعاده..ويوفقك مع أبو العيال...ويديم رضاكي عليه كمان وكمان يارب

[واحد تاني]

كنت عايزة اكتب لكم عن ذكريات الطيران بتاعتى ...وازاى كان نفسى اعرف اطير ...ومحاولاتى الفاشلة دائما للطيران ..بس بعد الفاصل بقى ...

كارت دعوة مقدم مني لسموك

لزيارة الموضوع ده ...

انت والطيران :ph34r:

[khedr]

ياربي اسيب الموضوع يومين يوصل لحد كده

طيب شويه نقرا ونستوعب

واللا الظاهر اثار الفازلين ابتدت تظهر علي الذاكره

نقرا ونشوف

لجميع المشتركين في الموضوع

[khedr]

فلانه وناش

ربنا يخليكم لنا

................................

................................

زمان كان فيه في شارعنا بنت كده برضه مستقويه مفتريه

زيبعضه وكنا صغيرين عنها وكانت تستقوي علينا

لا تخلي ولد ولا بنت يعدوا من قدام بيتهم

وكنا صحيح بنخاف منها وهي كانت بسم الله صحه

ومره عملت حمش بس من بعيد.....وخدت راحتي وفضفضت بالكلام بس والنبيو طبعا ومن بعيد

ونسيت الموضوع ونازل بعد العصر اشتري للبيت شاي

وستنا فرحه اسمها علي غير مسمي طبعا .....تعكشني في الشارع

وياماما يا بابا يادنيا ياللي هناك حوشوني الحقوني

ربنا كرمني ساعتها با اخويا الكبير كان يادوب واصل من الشغل ويا فكككككيك

ومن يومها وانا لحد اليومين دول كل ما اشوف فرحه امشي من تالت رابع شارع

برضه فيه ستات من يومها..................

جبااااااااااااااااااااااار

[nash]

يا أهلا وسهلا يا خضر

شوف هي المفتريه دي فرحه...بس لإهلها..ونكبه للولاد..

بس والله صعبت عليه...

بيتهيألي ممكن تحاول تاني تمشي في الشارع براحتك..بس إذا ماقدرتش.....نشوف كام جلسه مع الدكتور خالد..ممكن يفيدك في المواضيع دي

يعطيك العافيه

وصباح الخير

[نانو]

ناش و فولانه انتم مفتريين من يومكم بقه مش كده

تعالوا شوفوا الطفوله البريئه اللي علي اصولها

كل يوم الصبح كنت باتفق مع اخويا اني العب معاه شويه بالكوره علي اساس انه يلعب معايا بالعرايس بعد ما نخلص و طبعا اليوم ينتهي و احنا مازلنا نلعب الكره

المهم مره كان بيستعملني جون طبعا و كنت انا كلي علي بعضي كده حاجه صوغنونه اوي و وقفني جون وورايا ترابيزه و راح شايط الكوره...و خير اللهم اجعله خير ...لقيت الكوره اللي شاطها شاطتني انا و لبست في حديد الترابيزه :ph34r: و الدليل مازال حتي هذه اللحظه فوق عيني علي هيئه غرزتين

ان كيدهن عظي :blink: م

بعدها كده بكام اسبوع

كنا بنلعب تاني في البلكونه و روحت ان شايطه الكوره راحت مكسره حته من سور البلكونه ....و اذا فجاه دخلت جدتي علينا ...و قالت...اخص عليك يا هشهوش (اخويا) تكسر سور البلكونه ...طبعا يرد لا و الله مش انا ديه نانو ...و انا طبعا رسمه ملامح الملاك البرئ ...و بدون ادني مجهود و بدون اي ردود

ترد جدتي ....ايه نانو... لأ طبعا ...نانو مش ممكن تعمل كده ..ده شغل شياطين ده انت مش هي....و انتهي الامر بعلقه ساخنه جدا لاخويا و انا طلعت منها زي الشعره من العجين

انا بس اللي كان مضايقني و طبعا لان ما فيش جريمه كامله كان فيه واحده جارتنا واقفه في البلكونه و شايفه الموضوع من اوله ..و من يوميها و لحد النهارده وانا مكسوفه منها اوي :ph34r: