ذكريات حُلم الطفولـــــــــــة.....البريئة :)

[nora]

والله انا افتكرتلكم حجتين انما ايه هي مش شقاوة بس موقف عجيب

في يوم وانا عندي 7 سنين البيت كله صحي متاخر قمنا كلنا صحينا وبقينا نجري وبابا اخدني انا وتوؤمي وودانا المدرسه وطبعا رحنا بعد ما طبور الصباح بدأ وكانت النتيجه اننا وقفنا كل المتأخرين في غرفه الاخصائيه الاجتماعيه لحد ميخلص طابور الصباح علشان يعرفو اسباب التاخير وناخد مسطرتين على ادينا المهم فعلا جت الاخصائيه وبدأت تسال كل البنات على اسباب التاخير لحد مجت لعندي انا واختي بس والحمد لله بابا كان اعتذر بالنيابه عننا وقال سبب التاخير فنفذنا من العقاب المهم في النص المدرسه قالت لينا كلنا روحو فصولكم بس وانا واختي مشيين فقالت استنو فقلنا نعم فقالت انتم جيين كده فقلنا ايه في ايه ؟؟؟؟؟

عرفيين كان في ايه .............ز

كنا نسيين شنط المدرسه وطبعا اتعاقبنا على ديا :)

[nash]

نانو يارب يارب يفرج كربتك..وترجعي بسرعه....قلبي معاكي يا عمري :) :sad: :sad:

طنينا بليز

.......................................................................................

نورا...يعني واكلاها واكلاها..هاتتعاقبوا هاتتعاقبوا..والله لو عملتوا أي :D :D

[Folana]

السلام عليكم ورحمة الله ...

ايه يا أطفال المحاورات ..ساكتين ليه؟..فين باقى الذكريات الجميلة...الاب الروحى موديست باتشينو...ايه ..مافيش اى ذكريات مؤلمة عايز تفضفض بها.

خضر..انت مش عاجبنى اليومين دول...مالك يا ولدى ..حاسك حزين اكده ومش عوايدك..عساك طيب..طمنا عليك بذكريتين كده تحت الحساب

نانو ...ناش ..نورا..نانسى...سلوى ..ام مادا..انت وعديتنى انك حتفأجينى بذكريات حلوة فين هى بقى ..

شجعونى بقى علشان انا عندى ذكريات كتير عايزة اقولها...

[nash]

فولانه..العزيزة

أنتي رميتينا ومشيتي... :)

أتفضلي أنتي الأول..وأحنا وراكي

ياة لسه عندي كام واحده صغنتتين

يله يا فوفو أبدأي

[Folana]

السلام عليكم ورحمة الله ...

هو انا اقدر ارميكم..انا مطمئنة انكم متوليين الموضوع...بس انا اصلى فى التليين دلوقت ودمى حيبقى تقييل وحاحكى لكم مآسى بقى ونعيط...سيبنى انا بعدك على طول يالا انا قاعدة اهو مستنية..ونادى على موديست باتشينو يجى يكمل لنا

[nash]

فوفو :o

أنا رايحه أنده هاي شله... -_- mfb:

نورا ونانو والكابتن موديست ....

بس فين باقي الأخوة..والأخوات...

يعني معقوله أحنا بس اللي كنا متشيطنين؟؟؟ :o

ياريت نستفيد من خبرات بعض ...والتجارب المعقده...علشان حياة المسيرة تكمل :)

[inas]

انتم عرفين هلكتوني على نفسي من الضحك شكرا ليكي يا فولانه بجد موضوع تحفه

انا فكرا حجات كتير اوي ليا بس في حاجه بجد عمري مهنساها

بالنسبه لذكرايات الطفوله

كنت في الكويت سنة الغزو والمهم ان كان بابا بيروح يجيب لينا طلبات واحنا طبعا محبوسين في بيوتنا لحظر التجول والكلام ده

وقتها كان عندي ............ سنه انا ونوره

المهم ان الست نوره حبكت معاها الهزار وخفت الدم

وكان في عسكري معرفش باه جنسيتو ايه ومعاه رشاش ولا مش عارف ايه

وانا طلعا اجيب حاجه من السياره الي ركنا امام باب البيت والا الست نوره تقفل البوابه بتاعت البيت

وانا اشوف العسكري واخبط اقولها افتحي ودي مش عيزا تفتح تقولي مش هافتح ااه :wub:

اقولهايابنتي يهديكي يرضيكي مفيش فايده

في الاخر قولتلها يا بت افتحي لا هتاخد

وفعلا بدا العسكري ياخد بالو مني وجي نحيتي

وفتحت نوره اخيرا ودخلت اجري وراها واضربها واستخبيت وقفلت الباب

موقف تاني ليا انا ونوره

كان بابا بيروح الشغل هو وماما واحنا كان عندنا يجي 5 سنين وكانو بيسيبونا في البيت لوحدنا

المهم كان بابا مخزن نمرتو على التلفون وكل شويه نتصل بيه كل منحتاج حاجه

وكان محطوط لينا شريط في الفديو نصحا من النوم نفطر نفسنا ونشغل الفديو على فيلم مولد يادنيا او مسرحية الجوكر وحفظاهم عن ظهر قلب

المهم في مره تقلنا العيار على بابا في الاتصال مره بابا عيزين ناكل جبنه كزا يقول كلو

نتصل ممكن نحط عليها كاكاو يقول حطو

حطينا عليها كاكاو معجبتناش ندهن بيها الطربيزه

بعدها بشويه ممكن نعمل عصير جزر قال اعملوا

عملنا بس طبعا من غير سكر ولا اي حاجه فمعجبناش دهنا بيها ارضية المطبخ

وفي النهاية رحنا جبنا دفايه الي هي سخان واعدنا نولع في كل ماتطوله ايدينا

ورق اقلام رصاص ونطفي في الارض ابو فروه عين جمل وهكذا

وتعبنا ونمنا

وفجاه جا بابا وماما وبدات المعركه

بابا يمسكني يقولي ولعتو ازاي اقولوا اسال نوره

يروح لنوره تقلو جبنا كبريت يجيلي ويقولو منين اقول من الدولاب يقلب بابا الدولاب ميلقيش يرجع لنوره منين

تقولو من فوق التلاجه مسكين الراجل مصدقنا والي اليوم مقدرش يعرف ولعنا الحجات دي ازاي بس انا ونوره وانتم الي عرفتو :unsure:

انا قصصي كتيره انا ونوره وطويله اشوف قصصكم انتم

[عبده بيه]

ما شاء الله الطفولة المبكرة يبقي مفيش لازم نفرق بين الاجيال دلوقتي بقي

مع تحياتي

[Folana]

السلام عليكم ورحمة الله ....

ذكرياتك جميلة يا ايناس ..:blink:..فكرتينى ببناتى لما اخرج انا ووالدهم...اول ما نركب العربية بس..يبدأوا الاتصالات...لما باكره نفسى وبابقى عايزة ارجع اقعد جنبهم علشان يسكتوا..:unsure:

اسمعوا بقى...حد فيكم شاف مجنون قبل كده؟..وجها لوجه يعنى؟...

كنت لسه باحكى لولادى ذكرياتى المرعبة وبعدين قلت ما انتم اولى برضه احكى لكم شوية....

زماااان من سبعين سنة..وانا تفلة غضة بريئة...كان ساكن فوقينا ناس ..عادى يعنى ...ولهم ابن اسمه (س) مثلا....ابيه (س)..كان عاقل جدا..وبينزل يصلى فى المسجد على طول..وكل ما يشوفنى يدينى بونبون ويسلم على ويدعى لى..

وفى يوم ن الايام يا حضرات صحيت من النوم على صوت امى رحمة الله عليها وهى بتحكى لاختى الكبيرة..: مش ( س) ابن ام (س)..اتجنن ... :)

انا اتفزعت وجريت امسك فى امى بايدى وسنانى : يعنى ايه؟...

يعنى اتجنن..وقام بالليل جرى ورا امه بالسكينة وقطع وشها..!!

انا بقى باترعش واعيط ..وامى عمالة تغير الموضوع وتغمز لاختى بس على مين خلاص بقى الصورة فى راسى...

وكنت باخاف جدا اخرج من الباب او انام او اعمل اى حاجة..ويوم سعدى..يوم ما ابيه (س) ده يروح يقضى الويك اند فى العباسية...

سبحان الله ...

ومرة نازلة من الشقة عندنا رايحة المدرسة..لاقيته واقف جنب الشقة..فضلت اتكعبل على السلالم ما اعرفش ازاى واجرى فى الشارع ولقيت عجلة خبطتنى...ايوة عجلة ..

تصوروا بقى انى ما اعرفش اسوق عجل لحد دلوقت بسبب حادثة العجلة دى...كل امنيتى فى الحياة انى اسوق عجلة من غير سندات...:excl:

مش عارفة ايه اللى فكرنى بأبيه (س) ده ....هافف علىّ جدا اليومين دول ..ربنا يستر على النافوخ بتاع الانا...... :blink:

[نانو]

يا سلااااااااااااام يا فولانه علي سيره المجانين ديه

بتفكرني فعلا بالطفوله البريئه

ما اعرفش ليه من بين ملايين دايما المجانين بتجيلي

فيه جاذبيه خاصه كده بيني وبينهم

مره كنت ماشيه في محطه الرمل و بالتحيد ادام تافرنا بتاع الفطير والشاورمه اللي هناك :)

و بابا ماشي ادام و معاه اخويا و مامتي ماسكه في ايدي اليمين واختي ماسكه في ايدي الشمال

واذ فجاه الاقي المجنون جاي في وشنا عكس اتجاه السير

وحسيت انه قاصدني انا و عينيا جات في عينيه ( اول ما عيني جات في عينيه...) لقيته ركز اوي

قلت لماما الراجل جاي يا ماما

و هيا تقولي ما تخافيش ياحبيتي....الشارع زحمه.... اقولها لا ده جايلي انا

و اذ فجاه الاقي مامي مش معايا واختي سابت ايدي وبابا اختفي واخويا طااااااااار

والمجنون جه عندي و ما اقولكوش عمل ايه علشان برستيجي :blink:

[nash]

نانو ...وربي عنيه دمعت من كثر الضحك.....

والله تقولي حصل أيه...طب بجد بجد... :) :) :) ..

وأنتي يافولانه...بتخافي علي السيرة؟؟...طب استني يظهر منه حاجه..كده ولا كده....علي طول رعب....

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

شايفين والله كل ذكرياتكم تنحصر في أحداث بتقع مع القدر...

طيب أشمعني أنا يعني...اللي احداثي كلها تشرد....

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

أنا الصراحه كنت مرات بستظرف مع كوهين ورائيل وبالذات كوهين....

فكنت بعمل معاها حركات...مش حلوة..وتصبر عليه تقول يمكن أعقل ولا حاجه....بحبها قوي كوهين دي... :rolleyes: :lol:

المهم مش واخده بالي أن ماما معانا في نفس الحجرة...وشويه وأتت كوهين تقعد علي كرسي...بمنتهي العبقريه..شلت الكرسي من تحتها...وأوبا..تراك... طاخ :o علي الأرض فوق الباركيه.....وفجأة لقيت نفسي برة الغرفه....والباب مقفول......وبيتفرجوا لوحدهم علي التمثيليه

[Modest]

إيه يا جدعان ... أنا كنت ما صدّقت إن الموضوع ده راح في غياهب النسيان علشان الفضايح اللي فيه :ninja:

ياللا ما علينا.....

بمناسبة عيد الأضحى المبارك الذي مَر منذ أيام قليلة .. أعاده الله علينا جميعاً بالخير و اليُمن و البركات.

لابد من تذَكُّر الألعاب البريئة التي كنّا نلعبها ببراءة أيام الطفولة البريئة و خصوصاً في مواسم البهجة البريئة و الفرحة البريئة و العيديات البريئة و احنا كنا أطفال أبرياء بطبيعتنا (لاحظ تكرار كلمة براءة و جميع مشتقاتها للدلالة على مدى برائتنا و نحن أطفال كجميع الأطفال الأبرياء )

كان أول ما ناخد العيديات نطلع جري على محل بيع الألعاب البريئة :D ... و نشتري بُمب .. بريء برضه.

لكن لم نكن نشعر بالمتعة و احنا بتفرقع البمب واحدة واحدة .. أي بُمبَة بُمبَة :P

و لما كانت الدنيا عيد و لازم نشعر بالبهجة و لإن العيد فرحة يا سلام على رأي الشاعرة صفاء ابو السعود ... فكّرنا في فكرة لطيفة و نفذناها على الفور... ببراءة :D

كنا نسطو على زجاجة دواء حلوة كبيرة كده و نفضيها من الدواء خالص و نغسلها كويس و نجففها، و بعدين نفك البمب اللي في الكيس كله من الورق و السلك المحيط به من غير لازمة و نملأ زجاجة الدواء عن آخرها بالبارود و الزلط الصغير اللي بيتكون منه البمب ثم نقفل الزجاجة بإحكام.

و بعدين نطلع على السطوح (لو السطوح ده بيتكلم كان ودّانا في داهية .. لكن الحمد لله :blink: ) .. نطلع فوق السطوح و نقذف البُمبة الكبيرة اللي هيا زجاجة الدواء و طبعاً يحدُث صوت فرقعة تصحي الحي و كافة الأحياء المجاورة... الحقيقة كان رد فعل أهالينا غريب شوية كأننا عملنا مصيبة :D .. يعني ما نلعبش يعني و لا مانلعبش؟!! :blink:

أترككم الآن لإن عندي جلسة كهربا النهاردة عند الدكتور سين سين .. يارب أقدر أشوفه.

و إلى اللقاء مع ذكريات أكثر براءة :D

[nora]

والله يا موديست كاننا كنا متربيين سوا والله :ph34r:

انا فكرة اني كنت بعمل كده برضو بس كنا بنفك البمب في ورقه اكبر ونشبك الاسلاك في بعض ونعمل بنبه كبيرة :D

وفي يوم واحنا متجمعين كل العصابه في البيت عندنا واعدين نعمل البومبه بابا دخل علينا واعد يزعق وراح اخد البمب وكل حاجه ودي كانت اخر حاجه فكراها:P

[مصرية يعني مصرية]

والله كلكم أمامير خالص

و أبرياء خالص -_-

إنتم أبرياء أنتم؟؟؟

و كل واحد فيكم مخبي بلاوي متلتلة

مفيش بريئة ......إلا أنا :D

منكنتش بعمل حاجة وحشة من إلي عملتوها دي خالص <_<

هحكي لكم بعدين :angry:

:D :D :P

[نانو]

بصوا بقه انا مضطره احكيلكم علي ذكري صوغنونه بس علي شرط حدش يفقد ثقته فيا و في ذكائي

يعني عادي لما بنبقي صغيرين مخنا بيقي صغير ...ولما بنكبر بيكبر معانا .....عادي يعني ...اوكي

زمان و احنا صغيرين كان دايما اخواتي الاكبر مني بيعملوا رباطيه عليا....اخويا اكبر مني بسنه ونص واختي بخمس سنين

بس كانوا هما عصابه عليا دايما

كان عندنا اصحابنا في العماره اللي جنبنا كانوا مصايب و كانت ماما مانعاهم انهم يكلموهم

وكانوا لما يعوزوا يتكلموا معاهم يطلع اخويا واختي البلكونه ويقعدوا يكلموا بعض

واوقات ماما كانت بتطلع عليهم فجاه الاقيهم (اخواتي) يقولوا ابريق الشاي اتدلق

وبعد مرات ومرات من التفكير فهمت ان ده سيم بينهم بيقولوه لما ماما تدخل البلكونه

وبعد فتره بقيت لما انا ادخل البلكونه الاقيهم يقولوا السجاده وقعت

وبقيت هاتجن ...هم بيقولوا كده ليه واقعد اعيط .....واقولهم الكلمه ديه معناها ايه .....حاجه في منتهي الغباء الصراحه

ومره كده من كام سنه قريب يعني كنا متجمعين في مصر علي غير عاده لان كل واحد فينا عايش في قاره اصلا

وافتكرت الموضوع ولقيت نفسي باقولهم بس انا بجد كنت مش طايقكم ...هيا الجمله ديه ..معنا....ها.....ايه

ايه ده -_- ....اكتشفت ساعتها اني كنت في منتهي الغباء :angry: .... ولحد وقتها ما كنتش لسه فاهمه <_<

[nash]

المكان...المدرسه الثانويه

الزمان...أخر العام الدراسي

الوضع...فوضي عامه نتيجه غياب الكثير..للمذاكرة طبعا

تقابلت مع صديقاتي...وطبعا كلنا علي نفس المستوي من الجنون.....الطيور علي أشكالها تقع.. :wub:

وأتفقنا علي قضاء اليوم في المدرسه..حتي لو فوضي...لإنها أروع من كم الأوامر والنواهي اللي بناكلها في البيت...

واثناء بقائنا في حوش المدرسه..(فناء) للي مش عارف معني حوش...

قولتلهم يابنات ...مايصحش كده...تعالوا نحضر حصه...أنجليزي ونتفرج علي البنات الخيبات..بتوع الفصول التانيه..وأهو يمكن نطلع بمعلومه جديده....مش فاهمه..البنات إزاي وافقوا... :wub:

دخلنا الفصل وأستأذنا الاستاذ...والراجل بصراحه أنبسط ,,وقال شايفين البنات اللي خايفه علي مستقبلها....وهو أصلا ماكانش أستاذنا الأصلي...

:angry2: جلست في الكرسي الأول وورايا واحده من الشله...كل ما الأستاذ يعطينا ظهرة...تقوم شداني من شعري أنا أسكت وأقولها حاضر ....أما وريتك...

أخر شده كانت جامده..قومت مدورة في أقرب فرصه وجايباها من شعرها بأيدي الأثنين...في نفس اللحظه المدرس كان غير وضعه ..,شافني ماسكه شعر البنت.....لقيته بصلي وزنهر..ووشه أخضر...وقالي ....ناش...وشك في الحيطه. :o ...يا لهوتي لما شاور بالظبط أقف فين.... :wub:

أنا طبعا كنت في نص هدومي.....وشويه هاعيط..وانا بدور علي كرامتي اللي أتبعترت....

يعني أنا حضرت الحصه ,اصلا مش فصلنا ولا مدرسنا علشان أتبهدل؟؟؟

وقفت الثلاثين دقيقه المتبقيه في حاله حداد.....ووشي في الحائط..!!!

:wub: ضرب الجرس سيبت الأستاذ خرج ولقيتني برزع باب الفصل برجلي...يترد الباب أرزعه تاني...خلاص هاطرشق من الغيظ...وتريقه البنات

في اليوم التالي......ندهلي الأستاذ وأعتذرلي قدام البنات....لإنه عارف إني طيبه...وقالي السبب الرئيسي للإعتذار....أني .....أني.....

كنت محترمه ونفذت أمرة ...بدون ما أرد عليه......

يوة ...الظاهر إنه كان فاكرني مجنونه ولا حاجه لما شاف أيدي ماسكه شعرالبنت

.........................................................................................................................................

أيام وربي بالذات ثانوي أيام تتكتب بحروف من ذهب......أييييييييييه :) :wub:

تم تعديل 19 يناير 2007 بواسطة nash

[nancy]

ناش فكرتينى بايام ثانوى

عرفنا ان الى يجى بلبس مخالف يتحرم من الحصص ويقضى اليوم فى الحوش

فكنا نتفق فى الايام المشمسة اننا نيجى بمخالف علشان نتمنع من كل الحصص ونقضيها كلام وهزار

المهم هما فاكرين ان دة كان عقاب

طيب محدش زوغ من المدرسة ؟؟

انا زوغت مره واحدة فى اولى ثانوى فى اخر ايام الدراسة طبعا

كنا ادام باب المدرسة انا وشلتنا كلها فقولنا مالنهاردة معندناش حصص لان المدرسة بتخلص

طيب منجرب اننا نزوغ وقضينا اليوم بنتمشى على البحر لحد ما خلص معاد المدرسة

بس محسناش انها حاجة جميلة اوى وتستحق التكرار

[محمود الشاعر]

طيب بقى ده انا على كدة كنت ملاك برييييييئئئئئئئئئئئئئئ جدا

يعني مثلا كان اصدقائي العيال بتوع الحتة بتاعتنا بيعيروني ان كل اخواتي بنات علشان كدة بقيت اظهر ليهم كرهه لكل البنات اللي فى الحتة وكنت اجاي فى الخباثة واضربهم وشد شعرهم شرييييييييييير شرير قوييييييييييي بس لما كبرت شوية وعرفت اني كنت قاسي شوية حبوني كلهم اصل انا بطلت اضرب حد :huh: اقصد بطلت بعد ما اتفقوا كلهم عليا يجي بتاع 20 واحدة وراحو مسكني وضربوني حتة علقة محترمة ومن ساعتها وانا باحترم بنات الناس جدا جدا شفتوا كنت بريئ ازاي

كنت بحب قوي العب بالالوان يعني كنت اول ما اشوف علبه بوهية اروح راسم على طول واعمل لوحات فنية محصلتش على وشي وهدومي وعلى الحيطة عادي وامي الله يرحمها ما كنتش بتشد فى شعرها مني ولا حاجة خالص

فى الاعدادية كان عندي وش جلد مخيف فكنت بلبس عباية سودا بتاعة امي واحط الوش وعليه طرحة وتيجي عصابة الاربعين حرامي ونمشي ساعة خروج المدرسة بتاعة البنات بالليل لحد ما المدرسين مسكوني وعلقوني على باب المدرسة مش قلت لكم اني كنت طفل هادي

:sad:

على العموم انا عارف اني صدمت ناس كتير في بس والله انا اتغيرت كتير خوفا من التعليق مرة اخرى

[nancy]

ايه دة يا محمود دة انت كنت هادى بشكل مرعب

امال انت دلوقت هادى وخجول اوى كدة لية :huh:

[محمود الشاعر]

ايه دة يا محمود دة انت كنت هادى بشكل مرعب

امال انت دلوقت هادى وخجول اوى كدة لية :huh:

شوفى يا نانسي علشان احنا خوات ومش هخبي عليك حاجة

انا فعلا بحمل شخصيتين شخصية هادية فعلا وخجولة جدا وشخصية اراجوز ايون اراجوز يعني لو جيتي حدانا فى البيت هتلاقي واحد تاني خالص ملحوظة واحد تاني غير واحد تاني صاحبنا المهم هتلاقى محمود واقف ومعاه اتنين قصيرين عمرو وسلمي عمالين نرقص او نجري ورا بعض وساعات نمثل مشهد من فيلم او مسرحية ده غير المقالب اصل اخواكي عيل قوي فى البيت وبحب اهزر واضحك محبش الكلاكيع لكن برا البيت شخص هادي جدا ينمكن من كتر العلق اللي خدتها زمان يمكن :sad: