أعانى من حساسية مفرطة تجاه ملاحظات ومواقف الآخرين

[ام عمرو]

بجد انا حالتى زادت قوىىىىىىىى حساسيتى المفرطه من العلاقات الاجتماعيه من اى كلمه اى موقف قد يكون موقف عادى بس انا مش باخده عادى واللى مضايقنى اكتر انى بعامل الناس بسعه رحب ولالاسف لا اجد المقابل لذلك احيانا كتير انتظر المقابل لانى بحاجه لرفع معنوياتى وطبعا المقابل عندى مش مادى بل معنوىىىىىىى ولا اجده لدرجه انى ممكن اعيط فى مواقف مينفعش اعيط فيها مثال انى لما جددت الرخصه وموظفه الرخص كلمتنى بغلاسه طبعا عيطت بمعنى انى لما بتحط فى مواقف كده دموعى بتسبقنى علطول وده بيضايقنى جداااااااااا حد بس يرد عليا ازاى اتصرف :wub:

تم تغيير العنوان ليعبر عن محتوى الموضوع

تم تعديل 2 نوفمبر 2006 بواسطة عادل أبوزيد

[nash]

اهلا يا أم عمرو الأول مرحبا بيكي في المنتدي..وإن شاءالله تنبسطي معانا

شوفي يا ستي أختك من النوع اللي بيشتري دماغه ولا عمري فرقت معايا كلمه أو موقف ...تقدري تقولي كده ثقه في نفسي..والحمدلله..

بالنسبه لحالتك أعملي زيي..اللي تحسي أنه مش متوافق معاكي أوأذاك ولو بكلمه عابرة..أعمليله ديليت من حياتك كلها

وصدقيني أنت بتكوني زعلانه ومضايقه ودماغك بتضرب أخماس في اسداس..وبتحاسبي نفسك والطرف الأخر ولا علي باله...

المهم أنت تروقي علي الأخر..واللي مش عاجبه براحته

[أبو زياد]

صباح الخير أختى العزيزة

هوة دايما الواحد بيقابله موضوع كدة اول ما يفتح المحاورات و يحب يشارك فيه

فارجو ان تقبلى مشاركتى

هناك حكم كثيرة للرد على حالتك - وهى حالة معروفة - و عندى للأسف - مع انى رجل وقد يعيبنى سرعة التاثر وتعوقنى كثير عن اداء دورى او انجاز شىء ما

ولكنى لن اورد لك حكم و حكايات - ولا حتى تجاربى الشخصية - الأخت ناش قالت لك ما معناه لا تدققى - وهذا صحيح - مع التجارب - فهناك شىء مهم

ان الشخص الذى ترين منه الإساءة لا يقصد الاساءة

وهذا يحدث كثيرا و عن تجربة - وانت ضربتى مثل - لابد لخوض الحياة ان يكتسب الانسان درجة معينة من الخشونة - هى التى لا تجعله يتاثر بالاحتكاك مع بعض البشر - هى طبقة معينة تكسو طبع الانسان .

والانسانة التى واجهتيها عندها هذه الطبقة ولا تشعر بها - لانها تعودت عليها - اما انت فلا و ربما كان من الصعب عليكى ان تكتسبى ذلك حتى مع الاحتكاك الكثير -

فما هو حل المشكلة - لا اجد لك حلا كما وجدت لنفسى - الا ان تصبرى و تحتسبى عند الله اى شىء تواجهينه من اى بشر و ان تدربى نفسك على الصبر والنسيان تفضلى العلاج من عند الله :

خذ العفو وامر بالعرف و اعرض عن الجاهلين

[نانو]

يا اهلا بيكي يا ام عمرو

لما قريت كلامك قلت ياربي انا شفت ام عمور فين قبل كده و لما بصيت في المرايه عرفت :wub:

الحال من بعضه يا ام اعمرو....طول عمري بعاني من نفس الحكايه ديه

و للصراحه يعني ما لكيش اي حل غير كتره التمرين....علي الصدمات و كيفيه تلقي الصدمات

و ما بداتش اتاقلم شويه غير بعد ما اشتغلت وكنت في اول الشغل مسميني البسكوته من كتر ما كنتش بستحمل اي كلمه من اي حد

بس عارفه يا ام عمرو مع الوقت لازم تتعودي تحطي نفسك مكان اللي ادامك و تعرفي ان كل الناس مش زيك

و بمعني تاني علشان تبقي اسهل ما فيش حد زيك ...ساعتها هتعذري الناس و علي الاقل تزعلي من اي كلمه او اي اسلوب انت شايفاه جارح

من غير ما تزعلي من الشخص نفسه

لانك هتلاقي كل الناس و حشين ( كل الناس عدوينك الا حبيبك نافع) و انت بس اللي كويسه و ده اكيد مش صح

و طبعا صعب انك تتغيري ...صعب انك تكوني مش بتفرق معاكي لان ده هيبقي منافي لطبيعتك..هتفضلي حساسه

واللى مضايقنى اكتر انى بعامل الناس بسعه رحب ولالاسف لا اجد المقابل لذلك احيانا كتير انتظر المقابل لانى بحاجه لرفع معنوياتى وطبعا المقابل عندى مش مادى بل معنوىىىىىى

و الله حاسه بيكي اوي في الحته ديه -_- و تحسي كده انك شبه عبده مشتاق -_-

[Folana]

السلام عليكم ورحمة الله....

الاخت الغالية ام عمرو...الاول عايزة ارحب بوجودك بينا..وابلغك اننا فعلا سعداء بك اخت لنا فى المحاوارات...

تانى حاجة بالنسبة لموضوعك ده..فتأكدى ان كتير بيعانوا من مشكلتك دى......(فكرتينى بنفسى زمان .....كان اللى يقولى ازيك اعيط منه )..بس ده كان عهد وولى...خلاص جعلونى مجرما....

المهم بس دلوقت..انت بتقولى انك بتعاملى الناس بسعة رحب....مش يمكن ده من وجهة نظرك انت بس؟والناس شايفة غير كده...

تانى حاجة لازم تعرفى انك كده بتقدمى نفسك على طبق فضة للناس وتقولى اتفضلوا ياجماعة دوقوا لحمى ...بمعنى ايه...بمعنى ان الناس بتستسيغ الاسلوب ده ..وماحدش حيشفق عليك ويقول ..ياعينى دى طيبة ..لا ابدااا

انت كده بتفتحى شهيتهم لايذاءك النفسى على اقل تقدير....

بيقولوا "ضعف الضعفاء ..يجتذب شرانية الاشرار"....

طب نعمل ايه .....

أول حاجة لازم تواجهى نفسك بنواقصها...انت انسانة خجولة..قلقة...عندك مخاوف اجتماعية ...يعنى مش حأتكلم عن الثقة بالنفس دلوقت ...

والخجل ده نتيجة ان جهازك العصبى حساس جدا لاى مؤثرات خارجية...وشك يحمر نبضاتك تزيد وممكن يبقى اسوأ انه يحدث ضيق فى التنفس مثلا ...

لازم تحاولى التغلب على خجلك...ببعض الاسترخاء..تتذكرى ايه هى المواقف اللى اصابك خجل فيها وتجهزى نفسك لردود افعال مناسبة لو اتعرضتى للمواقف دى مرة اخرى...

انت عندك خبرات سابقة جعلتك دائما تتوقعين ان تصدر عبارات محرجة من الاخرين وبالتالى متوقعة الشر دايما وبتحاولى انك تسترضى الاخرين فى محاولة دفاعية منك لكسب ودهم علشان ماحدش يحرجك بكلمة

وده مش بيحصل ..لان الرسالة مش بتوصل لهم بنفس المعنى ..وماحدش حيطبطب عليك لانه فهم من عينيك انك خجولة..على طول حيفهموا انهم الاقوى وبالتالى حيمارسوا عليك ضغوط نفسية ..زى الموظفة بتاعة المرور ولا الموظف ده..

فى حين انك لو كنت حمرتى لها عينك وعلتى صوتك كانت حتكش ملك فورا ...

طبعا خوفك الاجتماعى ده وقلقك بيؤدى الى انخفاض قدرتك على الاداء وعلى التفكير وبالتالى بتلاقى الموقف خرج عن السيطرة..

اوعى تفتكرى ان فيه حد حيقول اصلها خجولة ومؤدبة يبقى نحافظ على شعورها لا طبعا ..حطى فى اعتبارك ان ده مش حيحصل...يبقى الحل اللى قدامط انك تعيش طول عمرك بالخوف الاجتماعى ده..وبالتالى بتخسرى..وبالتالى صورتك امام ابنائك حتكون مش ظريفة ...وحيورثوا منك الخوف ده..

لازم تكسبى مهارات اجتماعية ...بداية من طريقة حديثك مع الاخرين واسلوب المعاملة وفرض وجودك ..يعنى ماتكونيش دايما متلقية ...

...جهزى ردود فعل مسبقة..يعنى مثلا لو قلت كذا وردت على قالت كذا..حاروح متصرفة بالطريقة دى ...واظن ان عندك خبرة كافية بالمواقف المحرجة لك...

..ابدأى القراءة حول هذا الموضوع ..علشان تقدرى تستبصرى بحالتك وتعالجيها

قومى بعمل تمثليات مع نفسك وتخيلى انك بتردى على حد احرجك ...وده بيسموه التكرار السلوكى

واجهى المجتمع وماتخافيش ....مش عايزة اطيل عليك ..لان الكلام فى موضوع المخاوف الاجتماعية ده يطول شرحه..

بس تأكدى ان ماحدش حيتعاطف معاك..لازم انت اللى تقوى نفسك وتبينى انيابك وقت اللزوم...

وماحدش حيعملك تمثال علشان انت مهذبة وخجولة وخدومة ..بالعكس حيدوسوا على راسك...

وفجاءة حتكتشفى انك كنت بتحاربى طواحين الهوا.....وانك لوحدك ..وماحدش حيفتكر لك اى موقف جميل....

حاكمل معاك بعد شوية لانى تعبت من الكتابة...

مقدمه

فلانة كيشوت....

[MZohairy]

اختي الكريمه

في حالة احساسك بالضيق و عدم تحمل هذه المشكله فلا أجد اي حرج في الذهاب لاستشارة طبيب امراض نفسيه شاطر لينهي لك الموضوع بشكل علمي و عملي و مختصر

نصيحه اخويه ارجوا الا تغضبك

شكرا

[Folana]

السلام عليكم ورحمة الله...

كلامك مظبوط يازهيرى ..الحالة دى متشخصة فى علم النفس ولها برنامج علاجى ...لكن المشكلة ان معظم دكاترة علم النفس بيكتبوا على ادوية وخلاص ..

ممكن جدا تجيب اثر عكسى معاه...هو لو دكتور تحليل نفسى يكون افضل ....يسمعها ويتطلع على تجاربها السابقة ..ويعمل لها استبصار بمخاوفها....

غير كده بقى يبقى نعالجها احنا..... :lol:

[MZohairy]

السلام عليكم ورحمة الله...

كلامك مظبوط يازهيرى ..

بذمتك يا سيادة المشرفه أنا عمري قلت كلام مش مظبوط؟ :lol:

تم تعديل 2 نوفمبر 2006 بواسطة mzohairy

[khedr]

لا اجد المقابل لذلك احيانا كتير انتظر المقابل

أهم شئ في الدنيا وخصوصا هذه الأيام لا تنتظري المقابل

الا من الله سبحانه وتعالي......

وتأكدي سيأتيكي في صور كثيره ولكن لا نحس بها

فاكره المثل....أعمل الخير.....

أجعليه شعارك في الحياه

وأفعلي الخير مع من يستحق ومن لا يستحق

فسوف يصادق يوما من يستحق

...........................

...........................

بسم الله ما شاء الله عليكي

داخله نشيطه ....

ربنا يبعد عنا وعنك التغيييرات........!!!!!

فريق الردووود الجاهز ....

أصحاب المعاهده أياها

كل يوم بنزيد وعددنا بيكتر

ربنا يبعد عنننا العيوووووون

[أبو زياد]

التوصيل مجانا لاى رد خلال 24 ساعة

بس هى فين الاخت صاحبة المشكلة ؟

الظاهر انها اتعالجت !!!

[ام عمرو]

اولا سا محونىىىىىىى على تاخرى فى الرد اصل الهستامين كان زايد خالص اليومين اللى فاتوا

ثا نيا وحشتونى ولو انى كنت بطل طله عليكم وامشى عشان مكدبش بس مبلحقش ارد

ثالثااحتراماتى وتقديراتى لكل من

1 ناش عندك حق طبعا انى بقعد اعض فى اللحاف والطرف التانى مش هنا ادعيلى اعرف اكبر دماغى بجد

2 ابو زياد انا ببص لللسما كتير والله وحسبى الله ونعم الوكيل خاصه فى الناس اللى بيحرقوا الدم فى بلدنا

3 نانو الكلام كتير قوى بينا بجد بس انا مش بسكوته قوى ممكن تقولى منين اهو على الاقل اجمد شويه من البسكوت

4 فولانه<وماحدش حيعملك تمثال علشان انت مهذبة وخجولة وخدومة ..بالعكس حيدوسوا على راسك>

ده اللى بيحصل معايا فعلا كانك كنتى معايا لازم يبقى بينا برضه تكمله كلام

5 مزهرى مين قالك انى هزعل عشان اروح لطبيب او استشارى نفسى مانا بالفعل عملت كده عايز تعرف ماذا فعل

واللهى بجد ومن غير هزار قعد يتكلم اكتر منى كلام انا عارفاه كويس لانى دارسه على نفس وكل ما اجى افهمه على مشكلتى تحديدا يقولى انا فاهم وعارف وفى الاخر زود حالتى النفسيه سؤا بسبب الكشف اللى دفعته فى الاخر

6 فولانه تانى متهالى شوفلكم حل فيا وعالجونى ولو حد بجد عنده حل عملى يقولى لان اللى ايده فى الموقف مش زى اللى بعيد عنه

7 خضر طبعا مغلطش فى اسمك اهو

ونا لا انتظر المقابل لكن احيانا اريده تقدير مش اكتر لرفع معنويات البنى ادم مش اكتر دى الكلمه الطيبه صدقه صح

8 ابو زياد تانى ادينى جيت اهو ملحقتش اتعالج لسه مع انى باخد مضادات الهستامين كتيييير

اشكركم كتير قوى اخواتى واخوانى الاعزاء وعلى حسن استقبالكم لى بجد مش عارفه اقولكم ايه

ربنا يوفقكم دايما ويسعدكم :lol:

[khedr]

بجد مش عارفه اقولكم ايه

:excl:

قولي حالتك بقت ايه دلوقتي

كويسه الحمد لله

[أبو زياد]

أختى أم عمرو

عندما ذكرتى مضادات الهستامين خللى بالك دى بتنيم وممكن يكون لها تأثير على الجهاز العصبى

أرجو أن تنتهى منها فى اقرب و قت وأن تعوضى تأثيرها بالوصفات الطبيعية مثل الفواكه -التمر (فكلى و اشربى و قرى عينا) - التلبينة (شعير باللبن ) - الخميرة - أعشاب الينسون و الكركديه -و غيرها يعرفها اخصائى الطب الطبيعى و الحيوى

جربى ممارسة رياضة - مثلا كورس لياقة فى أى جمنازيوم او نادى - وهذا عن تجربة

ثم طمئنينا فى أقرب فرصة

[ام عمرو]

شكرا يا خضر بس لغايه دلوقتى انا كويسه الحمد الله مش عارفه بقى بعدين هيجرى ايه

ابو ذياد انا كنت اقصد مضادات الهستامين فى الحياه هى دى اللى محتاجها بجد لانها بدات تقلب معايا بضيق تنفس لما بزعل بس رحمه ربنا انى من النوع اللى بهدى بسرعه وربنا يستر

بس ازاى اتحكم فى دموعى لما اتعرض لموقف بايخ عايزة نصائحكم بجد لان الموضوع ده مضايقنى ومش بعرف التحكم فيه

يا ريت اللى عنده تجربه يقولها وان شاء الله تكون مؤثره معايا

شكرا اعزائى

[Folana]

السلام عليكم ورحمة الله....

قبل ما اتكلم انا مش طبيبة ...علشان ماحدش يبلغ عنى النقابة بس....

الاخت العزيزة أم عمرو....انت لو كرهتى ضعفك امام الناس ...حتكرهى دموعك ..وحيعز عليك جدا ان اى حد يشوفها...

كنت بتقولى انك بتنتبهى للموقف بعد مايحصل وتقولى ياريتنى عملت كذا وكذا ...طب ما ده شىء كويس ومبشر بالخير...يعنى اديك بتعرفى اهو ايه هو رد الفعل المناسب ...وايه اللى كان مفروض انك تعمليه ...

بتعرفى بعد فوات الاوان ؟...لا ابدا..مش بعد فوات الاوان ولا حاجة ..لان المواقف بتعيد نفسها ..وحتلاقى نفس الموقف اتكرر فى يوم تانى مع ناس تانيين ..ويمكن من نفس الناس...وفى الحالة دى انت حتكونى منتبهة وحتعرفى تردى...

لانك مجهزة نفسك....وموقف ورا موقف ...حتلاقى نفسك اتشجعتى وقدرتى تصدى فى المواقف كلها ...

طبعا مش النهاردة ولا بكره ...لكن بعد وقت ...مش مهم الوقت قد ايه...المهم انك تبتدى...هنا والان

الامور دى عايزة تدريب بس..ومش لازم تدريب بالتمثيل زى ماقلتى انه حيكون صعب..انا قصدى تدريب بالممارسة ..يعنى استحملى كمان خبطتين تلاتة وجهزى نفسك لهم ...

وممكن لو حد ضايقك تعرفيه ولك كلام معاه..وبعد كده انتبهتى ان كان مفروض تردى عليه بكذا ...انتظرى اول مقابلة او كلام بينكم تانى وردى له الكلام..او قولى له على فكرة انا ماحبتش ارد المرة اللى فاتت لما قلت كذا ..علشان الموضوع مايكبرش بس انا شايفة ان كده غلط ..وتروحى مكملة بقى الكلمتين وتغيرى الموضوع بسرعة جدا جدا على قد ماتقدرى :angry:..لانه اكيد حيرد ..رد انت لسه مش مستعده له

لازم تقوى ثقتك بالله وثقتك بنفسك..واعلمى تماما ان ماحدش حيقدر يعمل لك حاجة ..ماتخافيش من حد ..واعلمى ايضا ان بكائك ده ماهو الا هروب من مواجهة موقف انت اضعف منه وانه اسلوب طفولى ..هروبى ..

ويمكن اللى مدعم شعورك ده ومغذيه ..ان زوجك مسافر وانت لوحدك...واغلب الظن انك بتنتظرى اول مكالمة له علشان تشتكى له من المسئولية ...لازم يكون عندك مقدرة على ضبط او قمع اى انفعالات غير مرغوب فيها وتعلمى كيف تتحكمين فى مشاعرك وانفعالاتك ..وتعلمى فنية التوافق بين الاستجابة وبين المثير الذى تتعرضين له ..

طبعا الكلام ده مش حيبقى 1..2..3.. يعنى مش نقط حتمشى عليها ...لا طبعا ..اسمعى الكلام وفكرى فيه واللى تقدرى عليه نفذيه ..واللى مش قادرة او اللى مش مناسب لك ارميه ورا ضهرك ..بس ابدأى فى تقوية ردود افعالك ...ومع الوقت حتحققى تقدم ملموس ان شاء الله

وهكذا.....كلمى نفسك بينك وبين نفسك وجهزى الردود وتوكلى على الله

اى مساعدة ...نادى علىّ بس وقولى جــــــــزززرر

حاقولك شبيك لبيك

مع تحيات

فلانة زند السبع

دكتوراة فى فن الدفاع عن النفس المقارن من جامعة العباسية

[أبو زياد]

جزاك الله خيرا يا دكتورة فلانة(حنك السبع)

مفيش منك اتنين تلاتة ؟

أنا كمان استفدت من كلامك

بس سؤال صغير للأستاذة :

لو الرد العنيف دة لحد ممكن يزعل منى زى مديرى أو رئيسى فى العمل مثلا ؟

انتى جاوبتى فعلا (التوافق بين الفعل و رد الفعل )

إيه المواهب دى كلها ظ

بس عايزين توضيح أكتر من حضرتك

أنا قلت : طب جززززززر

إلى اللقاء يا أستاذة جزر

[Folana]

السلام عليكم ورحمة الله...

شبيك لبيك..زند السبع بين ايديك...عايز ايه؟...تتطلب ايه؟؟؟؟( وش المارد اللى طلع لاسماعيل ياسين من الفانوس)

طبعا رد الفعل العنيف حيجلب عليك المشاكل...خصوصا من مديرك...انت عايزنى اقطع عيشك بقى ولا ايه...

ده بالاضافة بقى الى ان رد الفعل العنيف عموما مش مستحب..وبيدل على انعدام الثقة فى النفس...وممكن اللى بتكلمه يكون رد فعله اعنف..وتتوالى المشاكل..

هنا بنتكلم عن ظبط النفس...وضبط النفس ده كلمة مش جديدة علينا ..واذكرك بقول الله سبحانه وتعالى .."والكاظمين الغيظ"...

ويدل ايضا على قوة الارادة ...وقوة الخلق ...ومجاهدة النفس....

فين الذكاء الاجتماعى ...اللى يخليك تتخلص من الموقف اللى انت فيه باقل الخسائر النفسية والمادية..

وفيه نوع من ضبط النفس متصل باتخاذ القرار....يعنى انت فى موقف مع مديرك واتعرضت منه لمضايقات ...بتخير نفسك بين ..اما الاقدام على المواجهة وتحمل ماينتج عنها ...او الهروب من الموقف بلباقة ....

هنا بقى تحكمك فى نفسك واختيار البديل الامثل وهو عدم المواجهة فده بينهى تتابع سلوكى مترتب على اتخاذ موقف المواجهة ...وبالتالى ينتهى موقف الصراع بينك وبين مديريك ويعتبر جزء من ضبط النفس .........

ولى عودة معك ..بس حاضطر انهى الحديث بصورة مؤقتة ....

[أبو زياد]

جززززر

فلنعتبر أن هناك نوعين من العلاقات :

علاقة عابرة و هى كانت موضوع حديثنا الأول

و علاقة دائمة مثل المدير و الزوجة و الزميل ... إلخ

العلاقة الدائمة تبنى فيها أساسيات منذ البدايه - ما هى هذه الأساسيات و كيف تبنى ؟

ثم تحدث مجموعة من المواقف ؟

طيب ما فهمته منك هو أن تشد عندما يرخى هو و العكس صحيح مش كدة ؟

شكرا عزيزتى و الموضوع مفتوح

[ام عمرو]

ربنا يكرمك يا فولانه بجد كلامك لازم اعى له تماما واقراه كتير عشان اعرف اظبط نفسوياتى وكل ما هتزنق هفتح الكمبيوتر عشان سيفت الكلام

بس عايزة اقولك انى مؤخرا خاصه مع الناس الدايمين زى ما ابو زياد بيقول واللى مينفعش نهرب منهم بقى اى كلمه يقولولها اخدها على محمل الهزار واقولك كمان انى لما ما بيعجبنيش تصرف ما بقيت اقوله فى وشهم وبرضه بظرف وهزار

لقيت الموضوع ده مريحنى كتيررررررر وده مع ناس معينه فقط مش اى حد يعنى

واكيد لما ححاول ارجع شغلى هلاقى كتير من ده لذلك كلامكم بجد زادنى حماسا انى اصلح الشئ الغلط فى شخصيتى والحمد الله لست من النوع اللى فيه الكبر والحمد الله انى بعترف بالاخطاء واحمد الله برضه كثيرا انى عارفه قدر نفسى ورحم الله امرء عرف قدر نفسى :sad:

فولانه عرفينى اكتر بالذكاء الاجتماعى عن طريق المواقف بمعنى قولى ازاى ممكن نتصرف فى موقف ما ولو حد عنده مواقف يا ريت بقولها فى مجال او شئ فى الحياه ولو حد عنده تصرف حلو يقول عشان كلنا نستفاد

وادى اول موقف هقوله ليكى

مديره مدرسه ولادى فيها كبر جامد وردودها سخيفه على وليات الامور واقصد هنا الماماهات بس ومش من السهل عندها التواصل معانا مش اى وقت نقابلها وانا حاسه ان مستوى المدرسه قل كتير وخايفه اروحلها لانى هقول السلبيات وخايفه من ردها او يكون لها تاثير على الاولاد تفتكرى اروح واتكلم وازاى اكلمها

ربنا يخليكى يا فولانه ومن هنا ورايح هردد انا مش هعيط تانى قدام اى حد

واوعى تقوليلى فى يوم كررى انا مش عبيطه وهبله انا زى السبع :)

زى مش قصير اوزعه انا طويل واهبل

خدى دى منى :wub:

انا مستنيه مع ابو زياد ردك

حززززززززززر

[نبض الابداع]

في ناس كثير كدة وياريت في حل ( انا منهم ) الواحد نفسة يبقى عندة تبلد حسي او مش فرقا معاة بس مش قادر حساسين نعمل اية ؟