أعانى من حساسية مفرطة تجاه ملاحظات ومواقف الآخرين

[أبو زياد]

أيوة يا اسماعيل انا جزر - آسف أيوة يا أم عمرو

شوفى بقة يا أم عمرو - فولانة مش معقول كدة ادينى فرصة :wub:

بالنسبة للمهمهات إديها هدية - فى عيد الأم - صدقينى

وممكن يكون عيد ميلادها او عيد الأب قريب إديها مش مشكلة

إعرفى نقطة ضعفها و الستات سهل جدا معرفة نقطة ضعفهم

إما إنها مادية - عايزة شوية لفت أنظار لمظهرها - وهكذا

يمكن أحيانا - بلاش تلبسى أشيك منها - :sad:

غذى نقط الضعف دى حتلاقى نتائج باهرة وادعى لى

إلى اللقاء فى مشاكلى بقة - الدور عليا

تعرفى من أهم ميزات مصحات العلاج النفسى إن المرضى بيعايشوا بعض ويحلوا مشاكل بعض :)

يا جززززززر

أهلا بك نبض الإبداع أرجو ان تقرأى أحد مشاركاتنا و تردى برأيك فيها

تم تعديل 8 نوفمبر 2006 بواسطة أبو زياد

[ahm_ali_baba]

السلام عليكم ورحمة الله....

الاخت الغالية ام عمرو...الاول عايزة ارحب بوجودك بينا..وابلغك اننا فعلا سعداء بك اخت لنا فى المحاوارات...

تانى حاجة بالنسبة لموضوعك ده..فتأكدى ان كتير بيعانوا من مشكلتك دى......(فكرتينى بنفسى زمان .....كان اللى يقولى ازيك اعيط منه )..بس ده كان عهد وولى...خلاص جعلونى مجرما....

المهم بس دلوقت..انت بتقولى انك بتعاملى الناس بسعة رحب....مش يمكن ده من وجهة نظرك انت بس؟والناس شايفة غير كده...

تانى حاجة لازم تعرفى انك كده بتقدمى نفسك على طبق فضة للناس وتقولى اتفضلوا ياجماعة دوقوا لحمى ...بمعنى ايه...بمعنى ان الناس بتستسيغ الاسلوب ده ..وماحدش حيشفق عليك ويقول ..ياعينى دى طيبة ..لا ابدااا

انت كده بتفتحى شهيتهم لايذاءك النفسى على اقل تقدير....

بيقولوا "ضعف الضعفاء ..يجتذب شرانية الاشرار"....

طب نعمل ايه .....

أول حاجة لازم تواجهى نفسك بنواقصها...انت انسانة خجولة..قلقة...عندك مخاوف اجتماعية ...يعنى مش حأتكلم عن الثقة بالنفس دلوقت ...

والخجل ده نتيجة ان جهازك العصبى حساس جدا لاى مؤثرات خارجية...وشك يحمر نبضاتك تزيد وممكن يبقى اسوأ انه يحدث ضيق فى التنفس مثلا ...

لازم تحاولى التغلب على خجلك...ببعض الاسترخاء..تتذكرى ايه هى المواقف اللى اصابك خجل فيها وتجهزى نفسك لردود افعال مناسبة لو اتعرضتى للمواقف دى مرة اخرى...

انت عندك خبرات سابقة جعلتك دائما تتوقعين ان تصدر عبارات محرجة من الاخرين وبالتالى متوقعة الشر دايما وبتحاولى انك تسترضى الاخرين فى محاولة دفاعية منك لكسب ودهم علشان ماحدش يحرجك بكلمة

وده مش بيحصل ..لان الرسالة مش بتوصل لهم بنفس المعنى ..وماحدش حيطبطب عليك لانه فهم من عينيك انك خجولة..على طول حيفهموا انهم الاقوى وبالتالى حيمارسوا عليك ضغوط نفسية ..زى الموظفة بتاعة المرور ولا الموظف ده..

فى حين انك لو كنت حمرتى لها عينك وعلتى صوتك كانت حتكش ملك فورا ...

طبعا خوفك الاجتماعى ده وقلقك بيؤدى الى انخفاض قدرتك على الاداء وعلى التفكير وبالتالى بتلاقى الموقف خرج عن السيطرة..

اوعى تفتكرى ان فيه حد حيقول اصلها خجولة ومؤدبة يبقى نحافظ على شعورها لا طبعا ..حطى فى اعتبارك ان ده مش حيحصل...يبقى الحل اللى قدامط انك تعيش طول عمرك بالخوف الاجتماعى ده..وبالتالى بتخسرى..وبالتالى صورتك امام ابنائك حتكون مش ظريفة ...وحيورثوا منك الخوف ده..

لازم تكسبى مهارات اجتماعية ...بداية من طريقة حديثك مع الاخرين واسلوب المعاملة وفرض وجودك ..يعنى ماتكونيش دايما متلقية ...

...جهزى ردود فعل مسبقة..يعنى مثلا لو قلت كذا وردت على قالت كذا..حاروح متصرفة بالطريقة دى ...واظن ان عندك خبرة كافية بالمواقف المحرجة لك...

..ابدأى القراءة حول هذا الموضوع ..علشان تقدرى تستبصرى بحالتك وتعالجيها

قومى بعمل تمثليات مع نفسك وتخيلى انك بتردى على حد احرجك ...وده بيسموه التكرار السلوكى

واجهى المجتمع وماتخافيش ....مش عايزة اطيل عليك ..لان الكلام فى موضوع المخاوف الاجتماعية ده يطول شرحه..

بس تأكدى ان ماحدش حيتعاطف معاك..لازم انت اللى تقوى نفسك وتبينى انيابك وقت اللزوم...

وماحدش حيعملك تمثال علشان انت مهذبة وخجولة وخدومة ..بالعكس حيدوسوا على راسك...

وفجاءة حتكتشفى انك كنت بتحاربى طواحين الهوا.....وانك لوحدك ..وماحدش حيفتكر لك اى موقف جميل....

حاكمل معاك بعد شوية لانى تعبت من الكتابة...

مقدمه

فلانة كيشوت....

احسنت الرد يا اخت فولانه

العيب فعلا فى الاخت ام عمرو ومن هم على امثالها خاصه واتها اعترفت بتأثير الهستامين عليها

يعنى يا ام عمور لما انتى عارفه ان السبب هو الهستامين فلماذا لا تعملى على تقليله :sad: حتى تستريحى

فى رأيى المتواضع بعد ما قدمته فولانه هو ان ترفعى يا اخت ام عمرو شعار

ماذا لو ؟

What if

وبعدها ضعى بنفسك عدة حلول لاجابه هذا السؤال

كمثال

ماذا لو عاكستنى مسئوله التراخيص ؟

ابكى واضحك الناس على

ابكى داخليا واضيع ثقتى فى نفسى

ارد عليها بقسوة واصبح قليله الادب امام الجميع

ارد عليها بأحترام واكسب عطف وتقدير الموجودين

اخرج من الغرفه وارزع الباب واخسر الترخيص

احاول الاستعانه بصديق قبل الذهاب للموظفه

اضحك فى وجه الموظفه وانا اقدم ها اوراقى

احاول ايهام الموظفه بضعفى وقله حيلتى ام بقوتى وتحفزى ضدها

لو فكرت هكذا ووضعت سيناريو لما قد يواجهك ... مع علمك المسبق انه لن يحدث ابدا إلا ما كتبه الله لك ... فستجدين انك فعلا تكبرين الموضوع وانك تقللين كثيرا بيدك من ثقتك فى نفسك وكلا الامرين خطأ

[ahm_ali_baba]

جزاك الله خيرا يا دكتورة فلانة(حنك السبع)

مفيش منك اتنين تلاتة ؟

أنا كمان استفدت من كلامك

بس سؤال صغير للأستاذة :

لو الرد العنيف دة لحد ممكن يزعل منى زى مديرى أو رئيسى فى العمل مثلا ؟

انتى جاوبتى فعلا (التوافق بين الفعل و رد الفعل )

إيه المواهب دى كلها ظ

بس عايزين توضيح أكتر من حضرتك

أنا قلت : طب جززززززر

إلى اللقاء يا أستاذة جزر

الرد العنيف المؤدب لا يزعل احد لان اللباقه مطلوبه

بعد حرب الخليج الاولى قررت ادارة الشركه التى كنت اعمل بها وقف امداد وزارة الصحه وادارة التموين الطبى لوزارة الدفاع بالادويه التى تحتاجها بسبب عدم التزام الجانب السعودى بسداد المستحقات الماليه التى عليه ...

تركت الشركه على هواها وجهلها وان كنت استعدت جيدا للهجوم الضارى فأى وقت

لم يستغرق الامر غير 3 شهور حتى وجدت الادارة تهاجمنى على انخفاض المبيعات وتخلفنا عن الاهداف الموضوعه ...

كنت اعلم ان رئيسى فى لندن هو صاحب قرار وقف البيع ومع ذلك لم اهاجمه شخصيا وتصورت كذبا وجود شخصيه وهميه قدمت له هذا الحل وعليه قمت بمهاجمه هذة الشخصيه هجوما ضاريا قمت فيها بنقد كل تصرفتها ووصفتها بالهجل وبأتخاذها قرارات تتسم بعدم وضوح الرؤيه ولم انسى مدح مديرى المباشر وتعاونه معى فى السابق بكل وضوح مما ادى الى تحقيقينا لاهدافنا بكل سهوله ويسر

الخلاصه

اللباقه مطلوبه

الذكاء الاجتماعى مطلوب مطلوب

الذكاء العلمى

الصراحه مطلوبه

التحليل المنطقى للموقف مطلوب

اتخاذ القرار الصواب فى الوقت المناسب مطلوب وبشدة

عزة النفس مطلوبه

فن التعامل مع الاخرين مطلوب

سألنى احد مسئولى شركتى ذات يوم ونحن نتناول الافطار عن رأيى فى الخطط الموضوعه لهذا العام ... كان يحدثنى وظهرة لى وهو يملء طبقه بالطعام ... فتجاهلته ... كرر سؤاله لى وظهرة مازال لى .... تجاهلته ... وعندما التفت لى وسألنى نفس السؤال ... أعتذرت له بأننى لم اكن اعلم انه يوجه سؤاله لى ... وقدمت له اجابه سؤاله بعدما وصلته رسالتى ... وهى ضرورة احترامى كما احترمه .... ومن يومها ونحن اصدقاء لانه عرف جيدا انه يتعامل مع واحد فهمان وجرىء ومؤدب

ترى اليس هذا هو كل مايريدة المدير من العاملين معه

الذكاء والفهم

الجرأة والشجاعه

الادب واللباقه

الثقه بالنفس واحترامها

واخيرا الابداع فى التفكير فيما لايفكر فيه غيرك حتى تتميز عليهم ... وهو امر لن تستطيع فعله إلا لو قمت بتدريب نفسك على اجابه هذا السؤال

ماذا لو ؟ What if

وصدقنى لو قمت بهذا العمل لكنت فعلا من الناجحين المميزيين

[أبو زياد]

أهلا بك أخى و أستاذى على

عودة بعد غياب لعل المانع خيرا

رأيك أضاف الكثير و أرجو الإستمرار فى نفس الموضوع و شكرا لك

[Folana]

السلام عليكم ورحمة الله....

اصدقائى الاعزاء..ام عمرو..ابو زياد....نبض الابداع....احمد على بابا ...باشكركم وباعتذر عن التأخير لظروف خارجة عن ارادتى ولسه مارجعيتش...واول ما ترجع (الظروف يعنى)..حاواصل الكتابة معاكم ..بس على فكرة انا كل كلامى عن تجارب اما شخصية اما عن ناس اعرفها او من خلال الواقع اللى بنمر به ..يعنى اما مش طبيبة برضه ..

حارد بس على نقطة صغننة نونو ذكرتها ام عمرو عن مديرة المدرسة (لانها بسيطة ومش حتاخد منى وقت فى الكتابة :blink: )

شوفى يا ستى..بقى كل المدرسات ومديرات المدارس..بيتبعوا اسلوب واحد...وهو تخويف اولياء الامور ..او زى ما انت حددتى بالظبط الممهات ( انت كتبتى ممهات دى ازاى :closedeyes: )...يعنى الوالدات اى السيدات ..

تلاحظى فى اى اجتماع لاولياء الامور..بتلاقى المدرسات ضاربين بوز ومكشرين عن انيابهم وتسبقم لهذا الست الناظرة..

ليه بقى؟...أقولك...علشان ولية الامر تخاف تعترض او تشتكى علشان ماحدش منهن يقولها كلمة بايخة...واقرب كلمة تتقال " ابنك او بنتك مستواه ضعيف "...وايه اللى هو فيه ده ...

طبعا الماما حتحرج تتكلم وتسكت علشان ماحدش منهن برضه يستقصد الولد او البنت ...

والاسلوب ده بيتبع مع الممهات بس على حد تعبيرك...لكن مع اولياء الامور...الابهات يعنى ..مش ممكن تتبعه ..ليه؟...لانها اولا واخيرا واحدة ست ...يعنى لازم تكون على درجة من الرقة والشياكة فى المعاملة مع الاب...تانى سبب ..لانها مش حتقدر عليه فى الكلام...لانه سريع الرد..سريع البديهية ..بيتكلم بثقة واقدام ...

والتصرفات دى انا لمستها بنفسى اثناء اجتماعات اولياء الامور...المديرة تشخط فى الام ..ياعينى ...ولما يجى الاب يتكلم ..تستمع اليه وكلها اذان صاغية ونبرتها حتى تتغير...:wub:

الحل.....طبعا انا بارفض اسلوب الرشوة ده...ياعم ابو زياد ماتودوناش فى داهية احنا بنقول يارب بس ارضى عننا ...

اول حاجة لازم تكونى واثقة تماما من الموضوع اللى حتتكلمى عنه ومؤمنة بقضيتك...ومجهزة جميع الردود الممكنة ..وتركزى فى عينيها وانت بتتكلمى..بلاش اسلوب" اصل يعنىى ...ماهو حضرتك...طيب...حاضر...انا اسفة..."

لانها حتقرأك بسهولة جدا ومش حتتديكى فرصة تكملى....

لو لك شكوى خاصة يبقى تاخدى ميعاد وتروحى تقابليها ( وده عادى على فكرة وده المفروض..انك لازم تتصلى بالسكرتارية وتحددى معاها ميعاد...ماينفعش تروحى تقولى انا جاية اقابل المديرة كده )...

تكونى مجهزة النقط اللى حتتكلمى فيها فى ورقة علشان ماتتلبخيش قدامها وتنسى ...

لو شكوى جماعية من مستوى المدرسة ..يستحسن انك تحددى مع عدد من الممهات وترتبى معاهم وتروحوا كلكم مع بعض...

طبعا الصوت منخفض الى حد ما..مع ثقة وشموخ وكبرياء...ولازم تركزى فى عينها وانت بتكلميها ...وناقشيها حتى فى اعتراضها ..مع اضافة بعض البهارات من نوعية ..انا قلت مافيش الا حضرتك اللى حتحل المشكلة دى

وانا عارفة ان حضرتك يهمك مستوى التلاميذ لانهم ولادك

واحنا معجبين جدا باسلوب اداراتك ...وعارفين انك حتتفهمى وجهة نظرنا...

ماتحاوليش تهاجميها لان الرد حيكون انا عارفة شغلى كويس ..لو مش عاجبك حولى ولادك من المدرسة ...

ولو ده حصل ..حتقولى لها ان طبعا مش باتدخل فى شغلك..وعارفة طبعا ان العبء كبير..والمسئولية اكبر....لكن برضه من واجبنا كأسرة اننا ننبهه بعض للنقاط محل الخلاف وهكذا يعنى..

المهم تديها وضعها اثناء الحوار مع الاحتفاظ بكرامتك ...وحاولى دايما ان تمسكى باطراف الحديث...وخلى اسلوبك مقنع..وتكونى على حق بالادلة والبراهين..

واتكلمى فى المفيد..يعنى ماتقوليش اى حاجة بعيدة عن الموضوع علشان ماتفوتيش عليك الفرصة.....

استأذن بقى دلوقت ونكمل بعد الفاصل

ابو زياد...انا معاك الحلقة الجاية ...

[أبو زياد]

صورة واحد قاعد حاطط إيده على خدة و مستنى آخر أوتوبيس

[Folana]

السلام عليكم ورحمة الله....

لأ ياسيدى مش حارد عليك دلوقت ..بس هه... :) :o

[أبو زياد]

ليه يا فلانة بس وجعتى ضميرى حرام عليكى

مش انتى عمالة تدينا دروس فى الحساسية المفرطة (اقرى العنوان )

مش لازم تبقى قدوة لينا ؟

يالله بقى كملى دروس و طبقى علينا و بلاش حساسية

وأنا لسة منتظر

[ام عمرو]

لا لالالالالالالا بجد بجد احيييكى يا فولانه واعذرينى على تاخرى فى الرد

وبجد حقيقى انا محتاجه لكى جدا ولازم اخد كورس عندك فى طريقه ادائك السلس والجميل مع العلاقات البشريه المعقده

واوعى تكونى زعلانه من حد ويا ريت تكملى فى مواقف الحياه وطريقه التعامل معاها بالسيناريو والحوار بجد يا ريت نكمل فى نفس الموضوع او نعمل موضوع جديد للمواقف دى وكل واحد عنده تجربه تفيد الناس يقولها فى طريقه تعامله معاها وانا واحده من الناس اللى بجد محتاجه لكم يا ريت ما تزهقوش منى

احييكى تانى يا فولانه

وكمان ا حى اخى ابو ذياد وربنا يديم دايما الروح الحلوة بينا

[Folana]

السلام عليكم ورحمة الله....

وحشتينا يا ام عمرو..فينك؟...انا قلت انت نفذتى الوصية ورحت ورا الشمس......انا تحت امرك ياستى فى اى حاجة...ويارب اكون بافيدك فعلا..

بس انا مش حاقدر اكتب مواقف ..لانها حتبقى مواقف وطرائف -_-