كبسولات سين سينيه في العلوم الادارية

[se_ Elsyed]

هاحاول في الموضوع ده اقدم معلومات ومحاضرات مُبسطة في علم الادارة بشكل عام

انا عارف ان ناس كثير بتستتقل دم بعض المواضيع وخصوصاً الموضوعات الطويلة اللي بتاخد العديد من الصفحات

وبالتالي سأحاول على قدر الامكان تبسيط تلك المفاهيم المكلكعه وتقديمها بشكل مبسط ومفيد

وجميعها تتعلق بما قرأته او بما لدي من محاضرات تتلعق بهذا الموضوع

والمنتظر من حضراتكم حاجتين :

1- اما انكم تنفضوا لي وتقولوا كفايه وارحمنا بقى مش ناقصه كلاكيع والافضل ان تقول لنا كام نكته على حكيوه حلوه كده

2- او تشجعوني عشان اكمل بدون مجاملات وذلك في حالة وجود ناس إدارجية ويهمهم الموضوع

------------

وهابدأ كده بعربون محبه صغيرة والتكمل تتوقف على الاهتمام من جانبكم

وظائف الإدارة الخمسة

مدخل:

قد تسمع هذه الأسئلة، أو قد يتبادر بعضها إلى ذهنك، وهي "ما هي الإدارة؟ من هو المدير؟" أو قد تقول لنفسك "أنا موظف فقط، فما حاجتي لمعرفة العملية الإدارية!؟ أليس هذا هو عمل الرؤساء والمدراء!؟".

في الواقع، كلنا مدراء. فمهما يكن موقعك أو وظيفتك يتلزّم عليك أحيانا إدارة بعض الأمور. وحتى يمكنك إدارتها بشكل جيد، عليك أن تعي العملية الإدارية وعناصرها الرئيسية ومبادئها العامة. لذا.. سنحاول هنا تبسيط هذه العملية، وشرحها بشكل موجز، يكفي لأن تتكون لدى الفرد منا صورة عامة عن هذه العملية الهامة.

ما هي الإدارة؟

من المنظور التنظيمي الإدارة هي إنجاز أهداف تنظيمية من خلال الأفراد وموارد أخرى. وبتعريف أكثر تفصيلا للإدارة يتضح أنها أيضا إنجاز الأهداف من خلال القيام بالوظائف الإدارية الخمسة الأساسية

التخطيط

التنظيم

التوظيف

التوجيه

الرقابة

ما الهدف من تعلّم الإدارة؟

إن الهدف الشخصي من تعلم الإدارة ينقسم إلى شقين هما:

1. زيادة مهاراتك.

2. تعزيز قيمة التطوير الذاتي لديك.

من المؤكد أنك ستطبق أصول الإدارة في عملك وفي حياتك الخاصة أيضا. لكن تطبيقها يعتمد على ما تقوم بعمله. فعندما تعمل مع موارد محددة ومعروفة يمكنك استخدام الوظائف الخمسة للإدارة. أما في حالات أخرى فقد تستخدم وظيفتين أو ثلاثة فقط.

يُتبع

[nash]

اما انكم تنفضوا لي وتقولوا كفايه وارحمنا بقى مش ناقصه كلاكيع والافضل ان تقول لنا كام نكته على حكيوه حلوه كده

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

أنا لسه داخله المنتدي وبقول بسم الله الرحمن الرحيم....

لا هات علم فن الإدارة أحنا منتظرين

ناش ليسانس آداب

[واحد تاني]

والمنتظر من حضراتكم حاجتين :

1- ***

2- او تشجعوني عشان اكمل بدون مجاملات وذلك في حالة وجود ناس إدارجية ويهمهم الموضوع

------------

وهابدأ كده بعربون محبه صغيرة والتكمل تتوقف على الاهتمام من جانبكم

يُتبع

تشجيع حاد ل س س ...

توكل على الله يازعيم ...

فى انتظار كبسولاتك ... :blink:

[Folana]

السلام عليكم ورحمة الله....

كبسولات سين سينيه ..أه ه ه ..نسبة الى س.س.....يانهار ياولاد..ده انا مخى خلاص محتاج قطع غيار...تصوروا برضه مافهمتش الا دلوقت .... :wub:

كمل يا استاذ س.س. الله يخيلك ..ده احنا كلنا او انا يعنى بالتحديد..فى عرض اى جرعات ثقافية اتمنظر بها على العيال..ومن غير ما اقول وارد ..انا باستفاد كده من خبراتك وخبرات جميع الاخوة من غير ما اقول لحد...

موضوع جميل فعلا ..محتاجين اننا نطلع عليه ونلم بأبعاده ...

فى الانتظار بقى ماتطولش علينا ........خصوصا انى فى الادارة دلوقت وعايزة اتثقف شوية علشان الترقية وكده...

وعلى فكرة حتى لو ماحدش رد ..تأكد اننا كلنا متابعين..مين يعنى يقدر يفوت موضوع زى ده وخصوصا ان اللى كاتبه س.س....

اختك فى الله

المديرة الادارية فلانة هانم عطية

[Modest]

جبت ورقة و قلم و مراية و قاعد في أول تختة جنب واحد تاني :wub:

موضوع رائع كلنا في حاجة إليه... على بركة الله يا مستر س س دراز ....

يا عبد البر .. يا عبد البر :)

[أبو محمد]

كبسولات سين سينيه في العلوم الادارية, والاجر والثواب على الله

أن قريت العنوان عالسريع .. وقريته "سين سنية .........." قلت لا حول ولا قوة إلا بالله .. دى الظاهر واحدة داخلة وقاصدة سين سين .. وانا الصراحة مابحبش منظر الدم

لكن ربنا ستر وأدركت إنه موضوع مهم جدا وشيق جدا .. أنا متأكد من فايدته للجميع إن شاء الله ..

ماعندناش تنفيض اليومين دول .. إحنا لسه منفضين عالعيد

[هادي]

يا كبسولاتك يا سين باشا

و انا اللي قلت ان ممكن ينصلح حالي بعد رمضان واتوب عن البرشام

لكن برضه ابن آدم ..

إي ي ي يـه

.. يظهر .. مفيش فايده ..

أول ما ظهرت لي حتة كبسولة واحدة لقيت نفسي مش قادر اقاوم

قول يا استاذ

فكرتني بالذي مضى ..

وعلى رأي اخونا أبو محمد

مفيش تنفيض

نفضنا تنفيضة العيد .. و بح

بس سؤال ع الماشي لو فيها سآلة أدب مني يعني

هي الادارة في الاساس علم ولا موهبة !!

وشكرا

[se_ Elsyed]

إذا توكلنا على الله

عايز 5 يكتفوني ومنهم إتنين مشرفين عشان أضمن إني مش هاتفك أبداً

بس إدوني بضع سويعات بس أخلص حتتين الشغل اللي في إيدي وأجي زي الرهوان

[se_ Elsyed]

هي الادارة في الاساس علم ولا موهبة !!

منور الغرزة يا هادي بك ... هات يابني شريط برشام هنا للبيه

الإدارة يا باشا موهبة يُصقلها العلم

بس برضوا ممكن واحد ما عندوش الموهبة دي يتعلم ويقرأ ويستفيد منها في شتى مجالات حياته ولكنه لن يكون مُبدع

إذا المدير المُبدع بيكون موهوب في الأساس

لكنه لو موهوب وما أتعلمش هايبقى زي قطعة الدهب التي يعلوها الصدأ ... يعني تشوفها ما تفرقش بينها وبين حتة الصفيح في حين إن داخلها نفيس

والمدير الغير موهوب ولكنه متعلم إدارة بيبقى عامل زي حتة الصفيح اللي واخده وش لميع وتحسبها من بعيد إنها ذهب

إذاً الموهبة والعلم لابد أن يُكملا بعضهما البعض لكي ينتج عن ذلك مدير ناجح

وبرضوا نرجع ونقول ونكرر إني لا أقصد بالمدير هنا هو المدير الغلس المكشر أبو حواجب عامله زي السبعة المقلوبة اللي بتشوفه في الشغل وبيخصم للناس الغياب أو بيديهم زيادات والكلام ده

ولكن

كلٌ منا مدير في موقعه

فـ فلانه هانم مديره في مطبخها ومع ولادها

وسين سين مدير في مسمط الكوارع اللي عنده

والمُزارع مدير في مزرعته

و مين مننا ما بياخدش قرارات يوميه في حياته إن شالله حتى وهو قاعد في البيت فكر يروح يشتري جرجير عشان السلطة ... ما هو ده قرار برضوا ومحتاج تفكير وتخطيط وتدبير أي نعم ما بناخدش في التفكير أيام وليالي وإلا السلطة تكون بردت لكن في النهاية الإدارة بتدخل فيه بشكل مباشر أو غير مباشر وشئنا أم آبينا

ومين منا ما بيعانيش من مشكلة إدارة الوقت

تسمع الواحد من دول يقولك ... يـــــــــــــــــاه ده أنا نفسي ومُنى عيني أفتح وأغمض وآلاقي اليوم بقى 72 ساعة عشان ألحق أخلص اللي ورايا ... في حين إن عمر اليوم ما هيبقى 72 ولا كمان أقل من 24 .. وفي حين أيضاً إن برشة إدارة صغيرة مع معلقة إدارة وقت وشوية ترتيب مفرومين وكل ده نضربهم في خلاط الإدارة ممكن اليوم بتاعنا يكفي شغلنا ولعبنا وعبادتنا وسماعنا للموسيقى وممارسة هوايتنا ونومنا وراحتنا ويفيض كمان 3 أو 4 ساعات ممكن نسلفهم لحد مزنوق أو نتبرع بهم لسداد ديون مصر

وعن إذنكم بقى أحسن ورايا غسيل وراجع بسرعة

إنتظرونا بعد الفاصل

[MZohairy]

يعني باختصار عايز تعرفنا الواحد ازاي يبقى إدارجي :wub:

سكتك خضرا وعلى البركه ياللا :)

[النسر المصري]

اونكل سي السيد اونكل سي السيد...انا عاوز برشاااام....انا خرمان من امبارح والدماغ مش ظابطه معايا

بس تعرف حاجة يا س س

انا اخدت شهادتين ايزو في علم الإداره التطبيقيه9001

ولكن لك ان تصدق او لا تصدق

انا أقرأ كلماتك جديده علي تماما.... فكم هي سهله ومفهومه وعميقه التعريف (ده غير ان الراجل الرزل بتاع الايزو مكنتش بطيقه وكان بيقعد يتنطط بالكلام علينا)

انما انت بقى هتجيبلنا الدهليز بتاع الموضوع ....اكمني بتحبنا زي ولدك ياس س

فزدنا من علمك بارك الله فيك

تم تعديل 4 نوفمبر 2006 بواسطة النسر المصري

[محمود الشاعر]

تسجيل متابعة

كمل ربنا يبارك فيك

[se_ Elsyed]

إخوتي الأعزاء

طبعاً هاتقولوا عليه دلوقت " عشمتني بالحلق خرمت أنا وداني "

لكن لأ والله لست أنا هذا الشخص اللي يقعد يخرم في ودان الناس وبعدين ياخد ديله في سنانه ويجري

فما منعني من التواجد في الأيام الماضية وبعض الأيام القادمة هو العمل وظروفه

وبإذن الله أخلص فومين الغسيل اللي في إيدي وأوعدكم إني أرجع بشوية قنابل من العيار الثقيل وهاتكون أولها التكملة بقوة في هذا الموضوع

وعندي حته كوميدي عن زيارة مبارك الأخيرة لروسيا .. واعتقد هاتفرقع برضوا

وعندي برضوا كام حته في باب الأسرة والطفل هاتخليكو تنسوا فولانه هانم الخربوطلي وتقولوا " ما إلها إلا سين سين "

لذا إنتظرونا قريباً ... وإوعى تغمض المحطة

[صبح]

يا عم مستنيينك على نار

خلص الفُمين وتعالى بسرعة

[النسر المصري]

على فكره يا س س

لو كنت فاكر اني هازهق وانا قاعد مستني انك تكمل الموضوع يبقى احب اقولك

انسى البنسه....انا لازق هنا مش متحرك لغاية لما اشوف الموضوع كمل

هه بقى مليش دعوه

[نانو]

ياااالا يا س س

احنا هانفضل واقفين كده كتير

و بعدين الموضوع ده مهم ومفيد ولو انه لو جه من يجي 28 سنه كان هيبقي احلي :unsure:

كنت بشتغل في شركه ادويه مديره علي 32 راجل

و كنت والله مديره زي العسل ...و عمري ما كنت بازعق لاني ماقدرش طبعا احسن واحد فيهم يتهور وارجع اتعور لاني طبعا كنت اقصر واحده فيهم واصغر واحده و كانت ايااااااااااااااااااام

بس اللي انا فاكراه كويس ان الابتسامه و المعامله الكويسه مع الحزم من غير اهانه للي قدامي هي اللي بتجيب شغل و تمشي الناس مضبوط و ما كانش حد متخيل اني اقدر امشي القسم كله و اطلع انتاجيات عاليه كمان

و كان عندي واحد لما ادخل عليهم الاوضه اللي فيها الشغل و يكونو ا عاكين و اجي كده ازعق

يقف يضحك... و يبص لي و يقولي ...مالك يا دكتوره...انت كنت متعشيه قلوب امبارح و لا ايه؟؟؟؟ :D

ااااااااااااااااااااااااااااااااااااااااااااايه ايام ؟؟؟؟اما اقوم اشوف التقليه بقه :sad:

[أبو زياد]

خش يا أبو السيد فى المفيد

الشعب عايزك ياريث

أحسن مدير فى رأيى هو الذى لا تحس انه مدير زى س س كدة ما تحسش إنه مشرف

يعنى واخد الإدارة على كبر قصدى الكبير كبير

صباح الفل

نانو ...

مش انتى اللى مثلتى فيلم : مراتى مدير عام ؟؟!!

تم تعديل 8 نوفمبر 2006 بواسطة أبو زياد

[Eldisel]

يامعلم س س .... الزباين وقفة اقدام المسمط بتاعك طوابير مستنين البهاريز .... :ph34r: مش معقولة اللطعة الي انت لطعهلنا دي واللهي :D

كدة المسمط ممكن ياخد سمعة مش كويسة

واحنا وراك والزمن طويل لحد مناخد البهاريز .... :excl: