أسعار سياحية!

[Sherief AbdelWahab]

إذا كنت مسافراً لمكان ما ، فإن المطاعم تمثل جزءاً لا يتجزأ من اختياراتك ..

بعض المطاعم أسعارها مهاودة .. والآخر أسعارها سياحية .. هل اكتويتم بنار الأسعار السياحية؟ احكوا عن أغرب وأطرف تلك الأسعار العجيبة..

خلص الكلام

[بنت النيل]

والله يا شريف الواحد لما بينزل اجازة وبيروح مكان بيكون متوقع انه هيدفع بالاسعار السياحية فبياخد الموضوع عادى وطلما انه اقدم على الدخول لمثل هذه الاماكن فعليه ان يدفع وهو مبتسم..

ولكنى اذكر مره واحنا فى الاجازة وهذا الموقف حصل معانا من فترة طويلة ولكنى اتذكره دائما ولم انساه ابدا

اننا ذهبت انا وزوجى مع اخى والاولاده فى زيارة الى القاهره واحنا ماشين مرينا على حديقة قالنا دى الحديقة الدوليه

فقلت له طب تعالو ندخل نرتاح شوية فيها ومنها نشوفه برده ،،

وفعلا دخلنا واتمشينا واتفرجنا عليها الى حدا ما كانت كويسة فقعدنا نرتاح داخل مكان كدا وفيه كراسى المهم لقيت واحد جاى بيقولنا تحبو تشربو ايه قلت كويس داحنا عطشانين والجو حار وانا بحب اشرب فى مثل هذا الجو البيبسى الساقع ويفضل مع ثلج كمان ..

فقلت انا هاخد بيبسى والكل قال واحنا كمان بيبسى يالله مره واحد ماشى الحال طيب احنا كام واحد كنا ست اشخاص

يعنى طلبنا 6 زجاجات بيبسى وشربنا واتبسطنا وتعالى يا عم خد الحساب عشان نمشى ..

جالنا الراجل يطلب الحساب :) كام ياعم قال 35 جنية ...... ايه كام بتقول كام :D

ليه 6 زجاجات بيبسى بــ 35 ج ليه يعنى فيها ايه وتقف الزجاجة بكام على كدا ؟؟

وكان رد الراجل علينا والله دى اسعار سياحية ،، اى سياحية زجاجة بيبسى وفى حديقة وقاعدين فى شمس والاسعار دى ؟؟ وطبعا دفعنا ومشينا اومال هنعمل ايه

هو الموضوع مش بخل ولا حاجة بس الواحد بيحس احيانا انها استغلال للواحد

فتلاقينى مش بنسى الموقف ده ابدا ولا الاسعار السياحيه بتاعت مصر بذات

[Folana]

السلام عليكم ورحمة الله....

بالله ياشيخ تدلنى على المطاعم ام اسعار مهاودة دى.....انكونيا بنارها؟..الا انكوينا دى...انا بس مش عايزة احكى علشان ماحدش يحدف طوب علىّ....

أصلا مافيش مكان ممكن تدفع فيه اقل من 500 جنيه لو انت واسرتك....المكونة من 4 افراد...

وفيه مطاعم تبدو مهاودة ..لكن لما تيجى تحاسب ..تلاقى نفسك بتقول كلمة واحدة بس .."ياولاد الحر........""

وكل مرة ..مش مرة ومرة ..لأ..كل مرة..بعد مانخرج ..زوجى يقول جملته الشهيرة..""ده انتِ يابنتى بتطبخى احسن منهم ...وممكن تعملى كل ده كمان ..احنا مش حنيجى هنا تانى".....

:D

المشكلة ان زوجى لا يحبذ الوجبات السريعة..يعنى لا كنتاكى ولا بيتزا ولا اى حاجة على شاكلتهم ..لازم يتناول وجبات مفيدة فى اماكن معينة يعنى ...حتى لو سافرنا .....فأنا ما اعرفش ايه الاسعار المهاودة دى ....

وكمان حتى لو بيتزا بتلاقى نفسك دفعت فوق 200 جنيه ....انا بافكر افتح مطعم ..هو مش أنا يعنى ..دى فكرة زوجى ...بيقولى ممكن نفتح مطعم وانت تطبخى فيه ...بس هو اللى حيقبض طبعا ..قلت له لأ ياعم مش حالعب.... :)

[Modest]

جالنا الراجل يطلب الحساب mfb: كام ياعم قال 35 جنية ...... ايه كام بتقول كام :wub:

ليه 6 زجاجات بيبسى بــ 35 ج ليه يعنى فيها ايه وتقف الزجاجة بكام على كدا ؟؟

وكان رد الراجل علينا والله دى اسعار سياحية ،، اى سياحية زجاجة بيبسى وفى حديقة وقاعدين فى شمس والاسعار دى ؟؟ وطبعا دفعنا ومشينا اومال هنعمل ايه

فكرتيني يا بنت النيل بأغلى بيبسي شربتها في حياتي -_- .. كانت في شرم الشيخ الصيف اللي قبل اللي فات أثناء رحلة السفاري بالبيتش باجي .. بعد حوالي ساعة من اللف و الدوران و بعد ما بقى لوننا ترابي أنا و مراتي و أولادي .. انا و مراتي على بيتش باجي و هيا مكلبشة فيا و كانت هاتوقعنا خمسميت مرة من رُعبها و اولادي الاتنين على التاني بقيادة الكبير و أخوه الصغير كان هايوقعُّه ربعميت مرة من الرعب برضه... الحقيقة احنا الاتنين كنا بنتفنن في إننا نرعبهم يعني :)

المهم ما اطولش عليكم -_- .. وقفنا في استراحة نشرب حاجة (وقفة مُخططة حسب البرنامج) و طلبت من أبني يجيب لنا بيبسي و لما جابها كانت من اللي هيا اصغر زجاجة في الدنيا 195 مللي ليتر تقريباً لقيته بيقول لي و هو مكسوف إنه دفع فيهم 40 جنيه :D

في الأحوال دي مش باتكلم لإن الرحلة من أولها لآخرها نصب و فهلوة و يشرف عليها بعض العاطلين كل مؤهلاتهم سواقة البيتش باجي و معرفة الطريق المرسوم للرحلة فقط .. يبقى مش معقول أجي عند دي و اعترض لإنها في النهاية ليست فقط أسعار سياحية و لكن الوصف الدقيق للموضوع برمته و ما شابَهُه من مواقف أخرى في الأماكن "السياحية" هو "سُعار سياحي".

تم تعديل 4 نوفمبر 2006 بواسطة Modest

[واحد تاني]

وانا بقى الموضوع ده فكرني بأغلى (شيشة) شربتها الى الآن ...

كان في رمضان قبل الماضي ...

في فندق رويال ميراج ...

وكانت بسبعين درهم للحجر الواحد (تقولش حجر رشيد)

بس كانت القعدة والخدمة تستاهل اكتر من كده بصراحة :D

[نانو]

بس كانت القعدة والخدمة تستاهل اكتر من كده بصراحة :D

يا سلام يا واحد تاني اهيه ديه الفكره

اوقات الواحد بينسي الفلوس اللي دفعها في سبيل المكان الرائع والخدمه الجميله

كنا لسه انا و جوزي في اوتيل من اياهم و طلبنا العشا و جابوا طلب خطأ و لما كان جوزي ناوي يتنرفذ عليهم قالوا له احنا اسفين و الطلب ده هيبقي مجانا و هنجيب الطلب التاني بتاع حضرتك

و بعد ما دفعنا الحساب جات البنت الفلبيبينيه طبعا باتسامتها العريضه و سالت تحبوا شاي ولا قهوه ...قلنا يا ستي احنا خلاص خلصنا و دفعنا قالت لا

ده علي حساب المكان...طيب و الله لو ماكنتيش تحلفي ....خليه بقي شاي بالنعناع

في الحالات

ديه الواحد بيدفع و هو سعييييييييييييييييييييييييييييييييييييد :)

[nancy]

عارف ياتانى احلى شيشة فى الدنيا فى لبنان عند الروشا والاسعار بالدولار حوالى الحجر ب5 دولار بس تجنن وتخلى الى مش بيحب يشرب الشيشة يدمن

التفاح بتاعهم يجنن

بس عموما حكاية ال مطاعم دى بقت تسعيرة معروفة الفرد من 50 الى 100 جنية

وبعدين بالنسبة للمغتربين هى فسحة وخلصنا يندفع الى يندفع

بس يارب الواحد ميجلوش تسمم كمان فى الاخر :D

ولا يطلع بكبدى وبائى بى... من التلوث

[واحد تاني]

عارف ياتانى احلى شيشة فى الدنيا فى لبنان عند الروشا والاسعار بالدولار حوالى الحجر ب5 دولار بس تجنن وتخلى الى مش بيحب يشرب الشيشة يدمن

التفاح بتاعهم يجنن

طالما عند الروشة يبقى تقصدي جراند كافيه او الديبلومات ... بس 5 دولار ده كان من زمان يا نانسي

انا لسه كنت فى بوتيت كافيه اللى فى السوليدير كانت الشيشة بحوالى 15 دولار

انما لو عاوزة شيشة بجد بقى وجو لبناني وخدمة زي الفل يبقى عليكي وعلى ريم البوادي

فى جميرا وكمان اسعارهم ممتازة يعنى الحجر تقريبا 20 درهم وممكن يعمل لك اي خلطة انتى عايزاها

بخصوص موضوع الاسعار السياحية بقى ... مرة كنت بتكلم مع احد عملائي عن اسعار الشيشة

وضربت له مثال بسعرها فى رويال ميراج ... قاللى احكيلك بقى على اللى انقح من كده ...

قاللى راح مرة يسهر فى (AFTER 8) وطلب شيشة...

جاله المتر يقول له حضرتك بس تعرف سعر الراس (الحجر) كام !

(بالمناسبة الراجل ده ملياردير)

قاله لا سيدي معرفش بس تفتكر يعنى شكلي ميديش على تمن راس ؟ وعموما كام سيادتك تمنه؟

قاله 200 درهم :D !!! قاله لا شكرا مش عاوز ... وساب المكان ومشي :)

[nancy]

لية 200 درهم هى فيها اية؟؟؟؟؟ :ph34r: